رواية ديون النبض الفصل السادس والاربعون 46 بقلم مروه صياح


 رواية ديون النبض الفصل السادس والاربعون 

عدّى خمسة وأربعين يوم، كنت بعدّهم باليوم والساعة والدقيقة والثانية، من ساعة ما مجد رجع مصر...

كنت متابعة نجاحه ومستقبله، وكأني شايفاه قدام عيني. كنت حاسة بسعادة كبيرة جدًا، وخصوصًا إن مشروعه وحلمه اللي كان بيحلم بيه بدأ يتحقق على أرض الواقع، في كل حاجة وفي كل تفصيلة.

وأكتر حاجة فرّحتني لما سمعت من رغد إنه حطّ كل اللي يملكه من فلوس في المشروع ده. ما كانش بيفكر إنه يحتفظ بجزء من فلوسه لنفسه، بالعكس، كان سعيد وفرحان إن كل اللي بيعمله هيكون ليه أثر مع الوقت.

كنت كل ما أسمع أخبار عنه، أحس بفرحة جديدة بتدخل قلبي، لكن وسط الفرحة دي كانت فيه غصّة جوايا.

كان نفسي أكون شريكته في الأمل ده.

كان نفسي أكون معاه، وما أقصدش إني أكون شريكة في نجاحه أو شهرته، بالعكس تمامًا. كان نفسي أشاركه فرحة إنجازاته، وأعيش معاه الأمل اللي بيحاول يحققه، وأقدر أنا كمان أقدّم كل اللي في إيدي، وعلى قد ما أقدر، أساعد الناس اللي محتاجين رعاية أو علاج أو جراحة.

لكن حياتي وقفت عند النقطة دي.

حياتي المهنية وقفت، وأنا كان نفسي أكمل.

كنت ببص على رجلي، وعلى العجز اللي بقيت فيه، وأفتكر كل حاجة كنت بحلم أحققها، وكل المجهود اللي كنت مستعدة أبذله علشان أساعد غيري.

وكان ده أكتر شيء بيوجعني على نفسي.

كان الوقت بيعدّي، وأنا بحاول أتعايش مع واقعي، لحد ما في يوم، دخل علينا ياسين وقال بحماس:

ياسين: مجد دلوقتي طالع في برنامج على التلفزيون، مستضيفينه علشان يتكلم عن مشروعه!

مسكت الريموت بسرعة، وبصيت له وسألته بلهفة:

أنا: على قناة إيه يا ياسين؟

قال لي اسم القناة، ففتحت التلفزيون، واتجمعنا كلنا قدامه علشان نتابع الحوار اللي بيدور بين مجد والمذيعة.

كانت بتسأله عن المشروع وتطوراته، وبتتكلم عن حجم الإنجاز اللي حققه، وكان واضح من كلامها قد إيه هي مقدّرة اللي بيعمله.

وبجانب الحوار، كانوا فاتحين باب المبادرة لكل شخص حابب يساهم ويساعد في المشروع ماديًا؛ لأن مهما كانت الأجهزة اللي اتوفرت للمستشفى، ومهما كانت تكاليف العلاج والأدوات الطبية، فمع مرور الوقت، المشروع هيحتاج دعم مادي ومعنوي مستمر علشان يقدر يكمل.

ومش بس كده، كانوا كمان فاتحين باب التطوع للدكاترة اللي حابين يشاركوا بعلمهم ومجهودهم، ويقوموا بعمليات مجانية أو مقابل أتعاب رمزية.

كان مشروع ضخم، وخطوة حقيقية لتحقيق حلم مجد.

فضلت قاعدة قدام التلفزيون، وأنا حاسة بفخر وانبهار بيه وبكل اللي قدر يعمله.

وفي اللحظة دي، حسيت إن تضحياتي ما راحتش هدر.

يمكن أنا مش موجودة جنبه، ويمكن ما قدرتش أكمل الطريق اللي كنت بحلم بيه، لكن على الأقل، الشخص اللي ضحيت علشانه بيحقق حلمه، والحلم ده مش هيكون سبب في نجاحه هو وبس، ده ممكن يكون سبب في إنقاذ حياة ناس كتير كمان.

وده كان كفاية يخليني أحس إن كل الوجع اللي عديت بيه كان ليه معنى.

عدّى الوقت، وكنا كلنا مبسوطين بنجاح مجد، وكل ما تظهر أخبار جديدة عنه، فرحتنا بيه كانت بتزيد.

لكن حازم وياسين ورغد ما كانوش مقتنعين بقراري، وكل شوية يصرّوا إن مجد لازم يعرف الحقيقة.

وأنا كنت برفض بشدة.

ما كنتش عايزة أي حاجة تهزّ اللي مجد بدأ يبنيه، ولا عايزة أكون سبب في إنه يرجع خطوة لورا بعد كل اللي حققه.

وبعد شهرين ونص...

كان المفروض إن مجد يبدأ يجهّز نفسه علشان يرجع ألمانيا تاني.

وفي الوقت ده، كانت ساره في الشهر الرابع من الحمل، وقربت تدخل الخامس، وبدأ التعب يظهر عليّها أكتر.

كان فيه حاجات كتير بتتغير حواليا ومجد بعيد عني، وكل يوم بيعدّي كان بيقرّبنا من مرحلة جديدة، من غير ما أكون عارفة إيه اللي مستنيني فيها.

ديون النبض 🫀 

بقلم الكاتبة مروة صياح 🎯✍️

في الفيلا عند مجد...

كانت سارة وصلت لمرحلة من اليأس في علاقتها بمجد، بعد ما فقدت الأمل إن علاقتهم تتغير، وإنه في يوم من الأيام يبصلها بنفس الطريقة اللي كانت بتتمنى يشوفها بيها.

لحد ما في يوم، وهما قاعدين على الغدا، دكتورة جيهان قررت تفتح الكلام مع مجد.

بصت له وقالت:

دكتورة جيهان: مجد، عايزة أكلمك في حاجة.

وبعدين بصت لسارة وقالت لها:

دكتورة جيهان: سامحيني يا سارة.

رفعت عينيها لمجد، وقالت بعتاب:

دكتورة جيهان: مجد، لحد إمتى هتفضل كده؟ هتفضل تكلمني وتقولي يا دكتورة جيهان؟ نفسي أسمع منك كلمة ماما زي زمان.

بصلها مجد وابتسم ابتسامة بسيطة، وقال:

مجد: خلينا نركز في المهم.

دكتورة جيهان: أنا بكلمك علشان سارة.

في اللحظة دي، سارة رفعت راسها وبصت لمجد، وكأنها مستنية تسمع منه رد يطمنها.

مجد ساب المعلقة من إيده، وبص لدكتورة جيهان باستغراب.

مجد: مالها سارة؟

دكتورة جيهان: أنت يا مجد مش واخد بالك منها خالص، ولا حتى بتراعي إنها حامل! 
دايمًا مشغول عنها، وأنت أكيد فاهم وعارف كويس إن الحامل محتاجة اهتمام ورعاية، محتاجة كلمة حلوة، وإنك تقرب منها وتحسسها إنها مش لوحدها.

مجد بص لدكتورة جيهان، وبعدها رجع بص لسارة، وكأنه بدأ يفهم إن أمه عارفة حقيقة العلاقة اللي بينهم.

لكن قبل ما يتكلم، دكتورة جيهان سبقته وقالت:

دكتورة جيهان: مجد، أنا عارفة كل حاجة، علشان كده مش هلف وأدور معاك في الكلام. أنت لحد إمتى مش هتشوف سارة على إنها زوجتك وشريكة حياتك؟

مجد بص لها، وبعدها رجع بص لسارة مرة تانية، وسكت لحظات قبل ما يرد.

مجد: الحاجة الوحيدة اللي مش قادر أجبر نفسي عليها هي قلبي. وأنا كنت واضح معاها من البداية. أنا نفذت اللي أنتوا عايزينه من سنة تقريبًا، عايزين إيه تاني؟

رجع بص لدكتورة جيهان، وكمل بنبرة فيها عتاب مكتوم:

مجد: كنتوا عايزيني أتجوز سارة، واتجوزتها. وهي كان أقصى أملها إني أكون موجود معاها، وأنا موجود معاها دلوقتي. بتدوروا على إيه تاني؟

سكت شوية، وبعدها رفع راسه وقال:

مجد: لو كان بإيدي، كنت اديت لكم قلبي بالمرة. لكن والله مش بمزاجي، وغصب عني.

دكتورة جيهان سكتت، وبصت له قبل ما تسأله:

دكتورة جيهان: يعني بالرغم من اللي وعد عملته فيك، لسه بتحبها؟ كانت بتستغلك، وأنت بالرغم من كل ده لسه متمسك بحبها؟

مجد ما ردش.

فضل ساكت لحظات، وبعدها قام من على السفرة وقال:

مجد: أنا شبعت. كملوا غداكم أنتوا.

وساب السفرة ومشي.

دكتورة جيهان قامت وراه، ونادته:

دكتورة جيهان: مجد! على الأقل قرّب من مراتك.

وقف مجد، ورجع بص لسارة، وبعدها رد عليها:

مجد: أنا بعمل اللي عليا. أقصى ما في وسعي بعمله.

دكتورة جيهان: أنت مش بتعمل اللي عليك يا مجد. لو كنت بتعمل اللي عليك فعلًا، ما كانش ده هيبقى حالها.

مجد بص لسارة، وبدأ يلاحظ قد إيه هي تعبانة في حملها، رغم إنها لسه ما دخلتش شهور الحمل الأخيرة، ولسه هتبدأ تدخل في الشهر الخامس.

أما دكتورة جيهان، فكملت كلامها وقالت:

دكتورة جيهان: وأنت دكتور، وفاهم وعارف إن الحالة النفسية عامل مهم جدًا في صحة الحامل. ومش بس الحامل، ده أي إنسان لما نفسيته تبقى كويسة، بيقدر يعمل حاجات كتير حلوة في حياته.

مجد بص لها، وفجأة ضحك ضحكة عالية، ضحكة كان وراها وجع أكتر من السخرية.

مجد: معقولة؟ معقولة دكتورة جيهان هي اللي بتقول الكلام ده؟

قرب منها بنظره، وكمل:

مجد: طب أنتِ ما قلتيش الكلام ده لنفسك ليه من سنين طويلة؟ ما حاولتيش تراعي نفسية ابنك ليه، وهو لسه طفل ومحتاج أمه؟

في اللحظة دي، دكتورة جيهان بصت له وهزت راسها، وكأن كلامه رجّعها لسنين كانت بتحاول تتجنب مواجهتها.

دكتورة جيهان: خلاص يا مجد، أنا عرفت غلطتي. وعرفت قد إيه كنت مقصرة معاك.

مجد سكت، وبصلها بنظرة صعب تعرف هي شايلة إيه جواها، وبعدها قال:

مجد: عرفتي متأخر أوي يا دكتورة جيهان.

وبعدها استأذن منها بهدوء:

مجد: بعد إذنك، علشان عندي شغل.

وسابها وخرج.

كان بقاله فترة طويلة جدًا ما راحش المستشفى الجامعي.

ركب عربيته، وفضل سايق في طريقه، لحد ما قرر يتجه للمستشفى علشان يشوف الدنيا هناك ويتابع الشغل بنفسه.

وبمجرد ما دخل المستشفى، بدأت الذكريات تتزاحم في دماغه.

افتكر غرفة الكشف، والإشراف، والأيام اللي كان بيقضيها وسط الطلبة والدكاترة، وافتكر وجوده في المكان ده قبل ما كل حاجة تتغير.

افتكرني ...

افتكرني وأنا واقفة وسط زمايلي والنظرات اللي كانت بتتبادل بينا من غير ما نحتاج نقول أي كلام.

حتى بعد ما بعدنا عن بعض، فضلت التفاصيل دي عايشة جواه.

افتكر لما كان بيشوفني واقفة مع دكتور سمير، وكنت بمثل إني سعيدة معاه.

افتكر نظراتي وتصرفاتي وكل مرة حاول فيها يفهم إيه اللي اتغير، وليه بقيت بعيدة عنه بالشكل ده.

كل حاجة رجعت قدام عينيه، كأن الزمن رجع بيه لورا، وكأن المسافة اللي بينا ما قدرتش تمحي أي ذكرى.

لكن يا ترى، إيه فايدة كل ده دلوقتي؟

إيه فايدة الذكريات اللي بترجع له كل ما يحاول يهرب منها؟

ذكريات بتجمع بين الفرح والحزن، وبين السعادة والتعاسة، وبين الأمل واليأس.

كان جواه مشاعر متناقضة، ومش قادر يحكم عليها، ولا حتى يحدد هو محتاج إيه علشان يرتاح.

هل كان محتاج يرجع مجد الإنسان اللي كان بيحلم ويحب ويستنى بكرة؟

ولا بقى مجد اللي بيضغط على نفسه، ويغرق في الشغل، ويحاول يملأ كل لحظة في حياته بالمسؤوليات، علشان ما يسيبش لنفسه فرصة يفكر؟

يمكن كان بيحاول يثبت لنفسه إنه قادر يكمل، وإنه يقدر ينجح ويحقق أحلامه مهما حصل.

لكن الحقيقة اللي ما قدرش يهرب منها، إن فيه جزء جواه لسه واقف عند وعد.... عندي أنا...

وجزء منه، مهما حاول يشغله بكل اللي حواليه، ما عرفش ينسى.

ديون النبض 🫀

بقلم الكاتبة مروة صياح 🎯✍️

مجد لنفسه دخل حجرة الكشف بتاعته.

فتح الباب ودخل، وبعدها قعد على الكرسي، وكأنه رجع بالزمن تلات سنين لورا.

بص حواليه، وكل ركن في المكان بدأ يفكره بحاجات كتير كان فاكر إنه قدر يتجاوزها، لكن الحقيقة إن الذكريات كانت لسه عايشة جواه بكل تفاصيلها.

افتكر أول مرة شافني فيها.

كان وقتها خارج من عند دكتورة جيهان، وكان متضايق جدًا، والوجع مالي قلبه. فتح باب حجرة الكشف، لكنه اتفاجئ لما لقاني قاعدة على مكتبه.
متقمصه دور مساعدته ولابسه البالطو الخاص بيه...
لابسه سماعته ماسكه قلمه....
ومش بس كده لما دخل عليا وقتها كنت واثقه من أنه مريض جاي يكشف...ووقتها ثقتي بنفسي وطريقة كشفي والامل اللي كنت بتكلم بيه....

وقتها، بدأ يبتسم بينه وبين نفسه، وكأن المشهد بيتعاد قدام عينيه من جديد.

افتكر لما قربت منه وقلت له:

وعد: باين عليك ضغطك عالي.

وبدأت أتعامل معاه بهدوء، وأقيس له الضغط مرة واتنين وتلاتة، وأحاول أطمن عليه، لحد ما خلصت الكشف واكتشفت إنه هو دكتور مجد.

فضل قاعد مكانه، والابتسامة بدأت تكبر على وشه وهو بيستعيد التفاصيل دي.

مجد لنفسه: ياه يا وعد... قد إيه وحشاني! نفسي أشوفك، ونفسي أسمع صوتك. نفسي أسمع منك الكلام اللي كان دايمًا بيديني أمل إني أعيش. نفسي أحس بنفسي زي ما كنت بحس بيها وأنا معاكي.

مد إيده وفتح درج المكتب، فلقى اللوحة اللي كنت عملتهاله بالريزن، واللي مكتوب عليها اسمه:

دكتور مجد ياسين الرفاعي.

مسكها بين إيديه، وفضل يتحسس الاسم بأصابعه، وهو مبتسم.

وبعدها بص على مقلمة الريزن اللي كنت عملتهاله برضه، واللي كان بيحط فيها الأقلام والورق الصغير اللي بيدوّن عليه ملاحظاته.

فضل يتأمل الحاجات دي شوية، وكأنها مش مجرد أدوات على مكتبه، لكنها جزء مني لسه موجود معاه، حاجة من شغل إيدي، وذكرى من أيام كان فيها لكل تفصيلة بينا معنى.

مجد لنفسه: أنا إزاي سايب الحاجات دي هنا؟

سكت لحظة، وبعدها ابتسم ابتسامة هادية، وكأنه مش قادر يستغنى عنها.

مجد لنفسه: دي ذكرياتك يا وعد... وذكريات إيدك اللي عملت كل حاجة فيها.

أخد اللوحة والمقلمة، لكنه قبل ما يمشي افتكر ميدالية المفاتيح اللي كنت اديتهاله هدية.

افتكر وقتها لما قلت له إنها حاجة بسيطة، وشكر مني علشان وقف جنبي في الموقف اللي حصل مع دكتورة جيهان.

الابتسامة اختفت تدريجيًا من على وشه، وملامحه اتغيرت.

فضل واقف لحظات، وبعدها اتحرك، وهو حاسس إنه مش قادر يكمل شغل، ولا عنده طاقة يضغط على نفسه بقية اليوم.

طلع تليفونه واتصل برغد، لكنه ما ردتش.

وفي الوقت ده، كانت رغد في المطبخ، والتليفون كان على الصامت. رن، وبعدها فصل، من غير ما تعرف مين اللي اتصل بيها.

أما مجد، فما عرفش يوصل لها.

كان عنده متابعة سريعة في المستشفى، وبعدها قرر إنه يروح لهم بنفسه ويعملها مفاجأة، بدل ما يتصل بحازم ويبلغه إنه جاي.

كان اليوم يوم الاتنين، فقال لنفسه إنه يروح لهم النهارده، بدل ما يستنى ليوم الخميس.

مجد لنفسه: الفترة الجاية هكون مضغوط، ولازم أرتب للسفر من تاني. قدامي عشر أيام... أزورهم النهارده، وأحاول أزورهم مرتين تلاتة كمان قبل ما أسافر. أشبع منهم على قد ما أقدر.

وفعلًا، خلص متابعته في المستشفى، وركب عربيته واتجه للعمارة اللي إحنا قاعدين فيها.

كان الوقت بعد الساعة سبعة مساءً.

كنا خلصنا غدانا، وقاعدين كلنا مع بعض في الصالة.

وفي الفترة الأخيرة، كنت كل ما أجي أقعد معاهم، أطلب من حازم يساعدني أقعد على الكنبة بدل ما أفضل على الكرسي المتحرك، وأطلب منه يسيب الكرسي قريب مني علشان أقدر أستخدمه لما أحتاج أتحرك.

كنت فاكرة كلام مجد، كبامه لرغد إن ياسين مايستسلمش للقعدة على الكرسي، وإنّه يحاول يتحرك باستمرار على قد ما أقدر.

كنت بحاول أتمسك بالأمل اللي زرعه جوايا، حتى وهو بعيد عني.

رغد كانت قاعدة وسطنا، وبتحكيلنا عن حور، وبتضحك وهي بتوصف لنا محاولاتها الجديدة في الحركة.

حور كانت بدأت تقف على رجليها، وتاخد أولى خطواتها، وده كان مخلينا كلنا فرحانين بيها ومتابعين كل حركة بتعملها.

كنا مندمجين في الكلام، وفجأة جرس الباب رن.

حازم: يا ترى مين؟

رغد: آه، صحيح! أنا مستنية الدليفري. كنت طالبة حاجات لحور، فتقريبًا هو اللي وصل.

قام حازم علشان يفتح الباب ويحاسب الدليفري، لكنه أول ما فتح، اتفاجئ بمجد واقف قدامه.

حازم: مجد؟!

مجد دخل بسرعة، وبص له باستغراب وهو بيقول:

مجد: في إيه يا حازم؟ فين تليفون رغد؟ برن عليها، والتليفون غير متاح!

حازم ما لحقش يرد عليه، ومجد دخل لجوه، وهو لسه مستغرب إن رغد مش بترد على اتصالاته.

كنا كلنا قاعدين في الصالة؛ أنا وماما ورغد وياسين وحازم، ومجد كان دخل لحد نص الصالة، قريب من الريسبشن.

ما كانش فيه وقت إن حازم يقومني و يدخلني الأوضة بسرعة، ولا حتى فكر هتصرف إزاي.

وفجأة، مجد دخل الصالة...

وفي اللحظة دي، كل حاجة وقفت.

أول ما سمعت صوته، حسيت بصدمة شديدة. رفعت عيني للحظة، ولقيته قدامي، واقف في نفس المكان اللي كنت بحاول أتخيل إنه مش هيكون فيه طول الفترة دي.

ما كنتش عارفة أتصرف، ولا أقول إيه، ولا حتى أبص له.

وطيت راسي بسرعة، وكأني بحاول أستخبى من عينيه، ومش قادرة أرفعها تاني.

أما مجد، فبمجرد ما دخل وشافني قاعدة وسطهم، وقف مكانه.

كان باصص لي، وكأنه مش مصدق إن اللي شايفه حقيقي، وإنّي فعلًا قدامه بعد كل الفترة دي.

فضل واقف ثواني، من غير ما ينطق بكلمة واحدة.

وإحنا كلنا اتجمدنا مكاننا.

محدش اتكلم، ومحدش عرف يبدأ بإيه.

عدّت لحظات طويلة، وكل واحد فينا كان غرقان في صدمته، لكن أنا كنت حاسة إن الوقت بقى تقيل بشكل مش طبيعي.

ضربات قلبي بدأت تزيد، وإيدي فضلت تتحرك بتوتر، وأنا بفرقع صوابعي من غير ما أحس.

جسمي بدأ يرتجف بشدة، ومهما حاولت أهدى نفسي، ما كنتش قادرة أسيطر على رعشتي.

ما كنتش متخيلة إن مجد هيشوفني، ولا إني هشوفه بالشكل ده.

كنت فاكرة إن الإجازة هتخلص من غير ما نتقابل، وإنّي هقدر أكمل الأيام اللي فاضلة من غير ما أواجه اللحظة دي.

لكن مجد كان واقف قدامي دلوقتي.

بعد كل الغياب، وبعد كل محاولاتي إني أبعده عن حياتي، لقيته فجأة قدامي، من غير أي استعداد، ومن غير فرصة أهرب من المواجهة.

وأنا لسه موطية راسي، مش قادرة أبص له، ولا عارفة إيه اللي ممكن يحصل بعد اللحظة دي.

ديون النبض 🫀 

بقلم الكاتبة مروة صياح 🎯✍️

في اللحظة دي، رغد حاولت تفك حالة الصمت اللي إحنا كنا فيها، فقربت من مجد وقالت له:

رغد: تعال يا مجد، اقعد.

بصلها مجد، وبعدها وجه كلامه لينا كلنا وقال باستغراب:

مجد: ما قلتوليش إن وعد رجعت من السفر؟

حازم رد بسرعة:

حازم: وعد لسه راجعة من أربعة أيام. حتى سمير ما رجعش معاها. هي نزلت قبل معاده بأسبوعين، وقالت تقعد معانا شوية، علشان سمير مش هيطول في مصر.

كانت عيون مجد عليّا، وما نزلتش لحظة.

كان بيتأمل ملامحي، وكأنه بيحاول يملى عينه من وجودي قدامه، ويثبت لنفسه إن أنا فعلًا بقيت هنا، وإن المسافة اللي كانت بينا انتهت للحظة.

أما أنا، فكنت لسه موطية راسي، مش قادرة أبصله بعيني، ولا عارفة أتصرف إزاي.

لحد ما قرب مني وقال:

مجد: إزيك يا وعد؟

في اللحظة دي، رفعت عيني وبصيت له.

عيوني قابلت عيونه بعد شهور طويلة من غير ما يشوفني أو أشوفه، ومن غير ما نتقابل.

ابتسم وقال:

مجد: ولا أقولك يا دكتورة وعد، زي ما قلتيلي أول مرة؟

حسيت إن ضربات قلبي زادت أكتر.

لسه فاكر!

لسه فاكر نفس التفاصيل، ونفس الكلام اللي قلتهوله أول مرة اتقابلنا فيها.

نزلت راسي بسرعة، وقلت بصوت حاولت أخليه طبيعي:

وعد: إزي حضرتك يا دكتور مجد؟

كان مادد إيده علشان يسلم عليّا، فمديت إيدي أنا كمان.

لكن بمجرد ما إيدي لمست إيده، حسيت كأن كهربا مسكت في جسمي كله، فسحبت إيدي بسرعة، وبعدها حاولت أستعيد هدوئي وقلت:

وعد: حمد لله على السلامة.

فضل باصص لي، ورد بهدوء:

مجد: الله يسلمك.

رغد قربت منه تاني وقالت:

رغد: تعال يا مجد، تعال اقعد.

وفعلًا قعد، وبدأنا نتكلم كلنا.

كنت معظم الوقت ساكتة، بسمع كلامهم وبحاول أندمج معاهم على قد ما أقدر، لكن وجود مجد قدامي كان مخليني مش قادرة أتصرف بطبيعتي.

وفي بعض الأوقات كان بيوجه لي الكلام ويسألني عن سمير وأحواله، وبعدها سألني:

مجد: اخترتي تخصص إيه؟

وعد: أطفال.

بص لي باستغراب، وقال:

مجد: أطفال؟ ما كانش ده هدفك من البداية؟

سكت.

ما كنتش عارفة أرد عليه وأقوله إيه، ولا إزاي أشرح له إن حاجات كتير اتغيرت، وإن الطريق اللي كنت برسمه لنفسي ما بقيتش قادرة أكمله زي ما كنت بتمنى.

عدّى وقت وإحنا قاعدين، وبعدها حاولت أتكلم معاه بشكل طبيعي، فقلت:

وعد: سمعت إن حضرتك بدأت في مشروع الصرح الطبي اللي كنت عايز تحققه. مبروك يا دكتور مجد.

بص لي وقال:

مجد: الله يبارك فيك.

وبعدها فضل باصص لي بنظرة طويلة، نظرة حسيت كأن وراها كلام كتير ما اتقالش.

وكأنه بيقول لي إن ده ما كانش حلمه لوحده، وإنه كان حلمنا إحنا الاتنين.

لكن أنا ما قدرتش أستحمل نظرة عينيه، فهربت منها بسرعة.

كنت عايزة أهرب من القعدة كلها، مش بس من نظراته.

بصيت لحازم، وكأني بطلب منه من غير كلام إنه ييجي يقعد جنبي.

حازم فهمني، واتحرك فعلًا وقعد جنبي، ومسك إيدي بعدما كنت طول الوقت بفركها وبشد في صوابعي من شدة توتري.

لكن مجد كان متابعني.

كان باصص لإيدي وهي بين إيدين حازم، وملاحظ حركتي وتوتري، وحاسس إن في حاجة مش طبيعية، وإنّي مش على بعضي.

أما أنا، فكنت بحاول أتماسك قدامه، وأتصرف وكأن وجوده قدامي مجرد أمر طبيعي، رغم إن قلبي كان له رأي تاني خالص.

ديون النبض 🫀 
بقلم الكاتبه مروة صياح 🎯 ✍️ 

ما كنتش عايزة أبين خوفي، ولا كنت عايزة مجد يحس بأي حاجة من اللي أنا فيها.

كنت خايفة يلاحظ ارتباكي، أو يكتشف قد إيه وجوده قدامي مأثر فيّا.

فسندت راسي على كتف حازم، وكأني مرهقة وتعبانة ومحتاجة أرتاح.

في اللحظة دي غمضت عيني، لكن مجد ما كانتش عينه بعيدة عني.

هو كمان غمض عينيه، كأنه محتاج يضمني لحضنه...
وكأنه ضمني بعينه... ومره واحده...اتنهد

وكأنه بيلوم نفسه على إنه بيفضل باصص لي بالشكل ده، وإنه ما بقاش من حقه يبص لي أو يتأملني زي زمان.

ما كانش مستوعب إنّي بقيت شخص تاني بعيد عنه، وإن المسافة اللي بينا وصلت بينا للحظة دي.

وفي نفس الوقت، ذكرياته معايا كانت بتعدي قدام عينيه.

افتكر أيام ما كنا بنقعد مع بعض، ولما كنت أسند راسي على كتفه وأغفل فعلًا، وهو يفضل جنبي من غير ما يتحرك علشان ما يصحينيش.... وفي مره شالني ورقدني علي سريري...

لكن المرة دي كانت مختلفة.

أنا ما كنتش نايمة، كنت بحاول أهرب من القعدة، وبفكر إزاي أخلي حازم بعد شوية يدخلني أوضتي، وتكون دي فرصتي إني أبعد عن مجد من غير ما أضطر أواجهه أكتر من كده... 

خصوصًا إني ما كنتش هقدر أقوم وأتحرك لوحدي، ومش عايزة مجد يعرف أي حاجة عن عجزي.

عدّى وقت، ولما حازم حس إني محتاجة أرتاح، شالني ودخلني أوضتي.

وبمجرد ما دخلني وحطني على السرير، فتحت عيني بسرعة، وحطيت إيدي على قلبي، وكأني كنت بحاول أهدي ضرباته اللي ما كانتش راضية تهدى.

حازم بص لي وقال بهدوء:

حازم: خلاص يا وعد.

بصيت له، وقلت بصوت مليان خوف:

وعد: كنت خايفة قوي يا حازم.

قرب مني، وطبطب على راسي وقال:

حازم: يلا ارتاحي أنتِ.

وبعدها سابني وخرج، ورجع يكمل قعدته مع ياسين ومجد.

أما أنا، ففضلت لوحدي في أوضتي، بحاول أستوعب اللي حصل، وأهدي قلبي من المواجهة اللي كنت فاكرة إني هقدر أتجنبها.

فضل مجد قاعد شوية مع ياسين وحازم، وبعدها استأذن منهم ومشي.

ديون النبض 🫀
بقلم الكاتبة مروة صياح 🎯✍️

بعد ما دخلت أوضتي، فضلت أفكر في مجد...

في نظرات عينه، ولمسة إيده، وهيئته اللي ما اتغيرتش. كان زي ما هو، بنفس الروح، ونفس القلب، ونفس الضحكة والابتسامة، وكل تفصيلة فيه كنت وحشاني.

كنت مشتاقة أشوفه وأسمع صوته، ولسه مش مصدقة إن ده حصل فعلًا، وإن القدر جمعنا قبل ما يسافر.

لكن يمكن دي كانت أكتر حاجة محتاجة أفهمها وقتها... إحنا بنفكر ونخطط، وربنا هو اللي بيقدّر ويدبّر، وكل حاجة ليها نصيب وميعاد.

وفي الوقت نفسه، كان مجد بعد ما استأذن ومشي من عندنا، رجع الفيلا.

كانت سارة ومامته مستنيينه. سلّم عليهم بسرعة، وبعدها طلع أوضته، لكن عقله كان لسه عندنا، بيراجع تفاصيل القعدة من أول لحظة دخل فيها لحد ما مشي.

كان بيفتكر نظرتي ليه، وإزاي هربت منها بسرعة، ولمسة إيده لإيدي، وإزاي سحبت إيدي بسرعة. حتى هيئتي وأنا قاعدة ومطّية راسي، وحالة التوتر والقلق اللي كنت فيها، وفركي المستمر في إيديا.

فضل يسأل نفسه: يا ترى إيه اللي كان مقلق وعد بالشكل ده؟

على قد ما كان سعيد إنه شافني بعد شهور طويلة، وعلى قد ما كان نفسه يشوفني ويسمع صوتي، كانت جواه أسئلة كتير.

ليه محدش فيهم بلّغه إن أنا موجودة في مصر من أربعة أيام، زي ما حازم قال؟

لكن وسط كل الأسئلة دي، كانت فيه حقيقة واحدة مسيطرة على تفكيره: إنه شافني فعلًا... وإنه كان مشتاق للحظة زي دي أكتر مما كان متخيل.

عدّت الليلة، وبعدها بيومين...

كان عنده محاضرة في الجامعة. خلصها ورجع بعدها للمستشفى الجامعي.

كان ماشي في الطرقة، وفجأة عينه وقعت على شخص أول ما شافه مجد اتجمد مكانه.

وقف مستغرب، مش مصدق إنه شايفه قدامه. فضل ثابت في مكانه، وعينيه متعلقة بيه، وهو بيقرب منه بابتسامة واضحة.

كان جاي مخصوص عشان مجد.

ومجد فضل واقف مستنيه...


تعليقات