رواية خلخال مشوه الفصل السادس والاربعون 46 بقلم زمرده

 

 

 


رواية خلخال مشوه الفصل السادس والاربعون بقلم زمرده




سكتت عنهن لان اكيد يجبرني حتى لو حجيت شوي وأجت جايبة الصنينة گابلتني وگعدت
ويمنا ريحانة يسولفن وانا بالگوات اكلت لگمتين من شافني انسحبت ثنيناتهن صاحن

_ شأكلتي

_ ما اگدر والله شبعت

هيوفة : خايبة نفسة أنت يرادلج غذاء زين

_ روحي ما تهوى والله

طبت امي
نجوى : شكو

ريحانة : حواري يمة اكلتلها لگمتين وتگول شبعت

نجوى : ليش ولج يمة

_ ما اگدر والله چن بعدني اتنسى

نجوى : يااا

أبتسمت
_ اتشاقة

گعدت امي يم الجهال وريحانة وهيوفة گامن يكفن شغل البيت وانا طلبت سبحت وبس طلعت صارت گدامي بركة سلمت علي وبتوتر گالت

بركة : أخوي اجه يشوف الجهال عليج الله لا تسوين طلابة

صفنت بوجها حايرة شأحجي
بركة : هاا حواري

_ هسة تذكر

بركة : جا غير نخاف منج

_ التسعت اشهر وين چان بيهن

بركة : حلو مشاكلهم لخاطر الجهال عليج الله

_ لا تحلفيني طابت الروح منه كلش

بركة : جا وهذا حق حورية ابو جهالج هيج سهل عدج

_ جا ما گتوله هيج سهل عده يخليني وانا حامل

بركة : ضنج ما حجينا والله هواي ردنا بس نفتهم العلة وين وما گال

_ الله كريم وخري من دربي

بركة : ما تحجين

_ لا وينه هو

بركة : بالغرفة يمهم

_ خوش

مشيت لغرفة امي وهي وراي صاحت
بركة : عود صدگ

بلاية ما اندار رديت عليها
_ أي صدگ

طبيت للغرفة وسديت الباب بلاية ما اقفله گعدت وي روحي صافنة شگد ما اريدن اخليله اعذار بس توگف بعيني وگفته ببيت جدي هضمني
من بنصهم گال يريد يطلگ والاكثر خلاني طول هاي الاشهر وهو ابد ما متذكر انا حامل بجهاله

گمت اخذت مشط امي وگعدت امشط عيني على المراية وحسيت الباب انفتح ما حطيت ببالي هو الا بعدما درت اشوفن منو الطب وشفته گبال عيني

وسعت عيوني رافضة وجوده وياي بالغرفة سد الباب وانا صحت
_ اطلع براا ما اريدن اشوفك اطلع حققق

عبد الحق : اششش صوووتج

شمرت عليه المشط متخبلة احس انعادت گدامي كل هذيج الفتره العدت ،من شافني كلش رافضة حتى اسكت اجه سد حلگي يحجي
عبد الحق : كافي بس احاجيج اريد اوصل لحل

فرغت روحي من ايده و وگفت على جهه الهث وهو عينه علي أبتسمت مستهزئة
_ جا مو على الاساس تريد تطلگ يا حل هسة طلع

عبد الحق : بيناتنة جهال مو مال طلاگ

_ لا والله وهسة تذكرت بيناتنة جهااال

عبد الحق : اگعدي احجي وياج وكافي نصي صوتج

_ ما انصي واطلع لا تخليني اتخبل اكثر من خبااالي

عبد الحق : حورية

_ لا تگلي نعالية امشي مني حق امشي اكررررهك

خزرني من گلت اخر كلمة وتقدم يمشي بخطوات ثكيلة وگف گبالي وانا من القهر ارچف رچف مزغر عيونه ونضراته حرت شأفسرهن

عبد الحق : اليكره معناها بيوم من الايام حب وانا لليوم ما مصدگ بيج حابتني

صفنت بعيونه ما متقبلة حجيه
_ اذا ما عندك ثقة بي ما جابرتك علي محكمة اكو واخوي المحامي اذا تريد والدرب الاجيت بيه رد منه الا كرااامتي حق

عبد الحق : ما اطلگ خليها ببالج

رديت خطوتين ليورة ورفعت ايدي
_ عادي لا تطلگ لان انا ما افكر اتزوج لان المني وبي طلع شلونه بمنو إأمن

من بين سنونه نتر
عبد الحق : كافي لا تخربطين

_ بالعكس جاي احجي الصدگ

عبد الحق : نبدي صفحة جديدة

_ وهم تحرگها مثل ما حرگت الصفحة الگلبها أنت نار تحرگني ما اريدنك جازت روحي منك كلش

طگ ميز المراية بصفحة وصيح
عبد الحق : كاااافي لا تحجيهااا لا تگولين چازت الروح منك

وعلى صوت صياحه طبت امه تهدي بيه وانا اباوعله ما مهتمة
شيماء : كااافي يمة ليش تصيح مو گلت تحاجيها بهداوه

عبد الحق : ترريد اطلگهااا

شيماء : لا ماكو شني تطلگ

چتفت ايدي وبلاية ما اباوعله گلت
_ يطلگ عمة يطلگني لان اذا رديتله اسودنه والله

فكت عيونها تأشرلي عليه
شيماء : فلك اسكتيي

_ عليش اسكت عمة شيماء الحجي بس لأبنج لو شني

عبد الحق : شلوون راح احطنها برگبتييي دخيلك يااا علي ناوية على روحها اليووم

نجوى : انا گلتلك لا تحاجيها گلبها محمل عليك بس أنت عاندت

البنات واگفات يباوعن وابد ما تدخلن وانا خليت وگعدت على الچرباية اباوع عليهم ببرود غريب ما اعارف يجوز چنت محتاجة اشوفنه شارب من نفس الكاس الشربني منه

باوعلي مستغرب وچن برودي زيد النار حطب خله وطلع يرگع بالبيبان روحه بطرف خشمه گمت وشلت الخاولي شريته على الباب ومشيت اردن للغرفة يم الجهال من سمعت صوت واحد بيهم يبچي بس طبيت اجن وراي يحچن ما راضيت شلون حاجيته هيج

حطيت سيف بحضني وباوعتلهن
_ ما عشتن العشته انا ولا احترگ گلبچن وانخذلتن مثلي لا تحچن بشي ما تعارفن قساوته علي وحتى أنت عمة لا تدافعين لأبنج لان سوايته وياي صعبة

شيماء : هو انا بعدني كلشي ما حاجية

_ يعني خاف تحجين اطيتها الج ليگدام

°غاية°

نزلت من الخط وطبيت للبيت اسحل بروحي تعبانة مشيت بلاية ما انام هستوني طبيت وابتسمت ناسية التعب من شفت ميمنة تفتر ب عون
نزعت چنطتي واخذته من ايدها وهي تحجي وياي

ميمنة : عود هم يجي يوم واوگف هل وگفة هاي واتانيه يجي من المدرسة

بوسته من خدوده
_ يجي هل يوم يجي ويعل گلبج ما يقرا ويخليج تلطمين

ميمنة : لا أنا اگولن يطلع شاطر

_ على امه

غابت أبتسامتها وبلعت ريگها
ميمنة : هنيالي اذا طلع عليها

درت على الباب من سمعت صوت صخر طب يمشي بثگل وگف يمنا يسألني مثل كل مرة شصار وياي وشني درجاتي
_ تحرچني من تسألني احس ما عدي جرئة مثل گبل واگلك

صخر : لازم صخمتيها

_ مو كلش

صخر : يعني

_ اطبن وزاري

صخر : أي بعد شكو

_ بس درجاتي ضعيفة

صخر : اهاا شگد

مشيت چبت الشهادة من الچنطة وحطيتها بايده مقهورة وهو بس شافها گال
صخر : لااا شني هاي غااية

_ شبيدي الاسئله كلش صعبة

صخر : بس مو هيج ما واصلة التسعين

ميمنة : ياا صخرر راح تبچيهاا

باوعلي ورد باوع للشهادة يريد يهون علي بس مو دربه هذا
صخر : يلا ميخالف بس تعوضين بالوزاري لاززم

هزيت رأسي
_ أن شاء الله

درت عليها وما اعارف شلون انتبهت چانت رافعتلها حاجبها من شافتني بساع عدلته وچن طبيعي
ماكو شي بهل وكت حسيت هي بهاي حركتها خلته هيج يحجي وياي ما فكرت زايد ودنگت شلت جنطتي ومشيت للغرفة بدلت هدومي وتمددت ما الي نفس بكلشي حتى نوم ما اگدر انام شگد ما چنت نعسانة بس النتيجة قاهرتني وما جاي اتقبل درجاتي ابد

هستوني غفيت وفززتني عمة عطاء تندهني بس مو أي ندهه احس اصبعها زرف عظم رچلي صحت متوجعة
_ هييي هيج يااا عمة هيج يگعدون الوااادم عليج الله

عطاء : جااا شلون گومي ولج بساااع

_ ياستار شكوو هستوني نمت والله

عطاء : اجوج خطااابة

_ اهووو عمة لا تتشاقين

عطاء : خايبة والله خطابة عليج ويردون يشوفوج

اطيتها ضهري وغطيت روحي وجهي بشعري المحلول
_ شيشوفون مني عمة گليلهم ما تريد تعرس وفضت راحت

جرتني
عطاء : گومي ولج

گمت ضايجة
_ جا مو ابن أخوج يريدني

عطاء : ولج اعااارف بس امشي نتونس شوي

_ ياااعمة صدگ تحجين

عطاء : وداعتج احجي صدگ بساع بدلي واطلعي

_ فلا اطلع اخافن والله

عطاء : منين ولج

_ ابن أخوج عمة غير يتخبل اذا يعارف طالعة

عطاء : هو انا اريدن اخبله تطلعين لو اطلعج بهذا ثوبج الطافر

_ الله منين دزج علي

عطاء : مو اطيح حضج

تأفأفت حايرة وهي بس طلعت انا بدلت ثوبي ومشطت شعري واكو دولكة يمي بيها ماي غسلت وجهي ،وما اعارف شلون اجه ببالي اخليه مفتوح
بس لميت اطرافه بلقراصة حتى لا يجي على وجهي ورشيت عطر وطلعت ترددت مستحية من شفت نسوان ثنين گاعدات ردت ارد بس شافني و وحدة منهن گالت

_ تعاي حبيبتي لا تستحين

كملت دربي مدنگة سلمت عليهن وگعدت بصف جدة هواي سولفن ومدحن بالولد وانا احس هذا كله ماله داعي لو ما طالعة احسن لان مابينا وحدة تطلع للغريب
غضة : أم سلوان خية لو علينا احنة راضين بس الشور الأول والاخير الها وللزلم

أم سلوان : حگ هذا والله انا هواي مدحتلي أم أحمد بيها واتمنى تصير من نصيب ابني

غضة : أن شاء الله كلشي نصيب والله يكتب البيه الخير

بس مشن وطبن امي وجدة بعدما وصلنهن الباب خرزتني جدة دنگت ما مفتهمة شبيها ضايجة مني درت لعمة عطاء اسألها وگبل لا احجي گالت

عطاء : انا الج اذا ما اگله حاله شعرها والنسوان ما نزلن عيونهن منه شوفي

_ يااا عمة حرااام الفتنة

عطاء : عادي الحرام بعيني غاية

_ والله مو قصدي

عطاء : عود گليله مو قصدي

بساع غورگت عيوني وهي تهدد بي بصوت ناصي خليت وعفتها مشيت يم ميمنة بالمطبخ هستوني طبيت وانطگيت الباب مثولة من شفت يمها صخر

ميمنة : الله الله شبيج چان طحتي

كضيت راسي متوجعة وهي وياه اجوي يشوفون شبيه باوع على المكان الانطگيت بيه
صخر : كلشي مابيه بس انتبهي بعد شو صايرة ما اعارف شلونج

ميمنة : أي والله حتى عدها طلعات غريبة

دنگت مقهورة فوگ الوجع يرزلون بي دنگ يباوع علي
صخر : هاا شنو راح تبچين

_ جا غير جاي ترزلوني

ميمنة : ليش معتبرة هاي رزالة

_ جا شني

ميمنة : خل اسكت احسن

وما گدرت تضمها بگلبها بس طلع گالت
ميمنة : الرزاله من صدگ من يعارف بيج حليتي شعرج گدام النسوان

_ شخصبتني ترا نسوان حالهن حالنة

ميمنة : لا حبيبتي هسة أول شي من راح يرحن گدام الولد يحجن بشعرج

صفنت ابد ما اجت على بالي
ميمنة : شلون ما فطنتيلها وعود هاي أنت الملتزمة

_ ما ادري والله غير هستوني گاعدة من النوم

ميمنة : عمة تحلفت بيج مو

_ أي والله گالت راح تگله وهسة راح يفكر أنا متقصدة

ميمنة : جا اكيد عباله متقصدة

گعدت حايرة وبس اجت عمة گمت احجي وياها مقهورة
_ كلة منج عمة والله لوما مگعدتني هواي احسن

عطاء : هاا راح تحطيها براسي

_ جا غير أنت سحلتيني من الفراش خبصتيني خبص حتى ما لحگت افكر

ما ردت علي وچن انا والحايط سوا الظهرية طلعوا علي من المستشفى وكلهم التموا عدنا افتر وبالي عد عمة ومن گد ما مشدوها وانا اصبن الجاي صبيته على ايدي الچنت لازمة بيها المشخلة وبنفس الوكت فلت القبق وتكوم الجاي على ايدي حسيت بروحي راحت صحت من الوجع وطاح من ايدي
القوري ويمي چانت ميمنة وهيوفة ركضلي وعلى أثر صوتي كل الموجودين صاروا بالمطبخ

كضيت ايد ليث ابجي
_ ايدي ليييث توجعني ايدي احترگت

كضاها من المعصم يباوع عليها حمرة صايرة چن چبدة اندار على هيوفة
ليث : عباها بساع اخذها للمستشفى

جابتها واجت عيونها مدمعة وتباوعلي عدلت حجابي ولبستنياها ومن ايدي الثانية كضني وطلعنا و ورانا امي وصخر الدرب كله انا روحي
تلوب من الوجع وبس وصلنا للطؤارى گالوا يحتاج ينشال الجلد المحترگ يعني يكردوها

بچيت خايفة
_ ما اريدن ليث خلي نرد للبيت عليك الله

لم وجهي بين ايده يقنعني
ليث : لازم حتى لا تتشوه تتوجعين شوي وتصيرين زينة

_ لا والله اخافن

ليث : جا شلون

_ نرد للبيت

ليث : جا عليش اجينا

أمي وصخر وليث يقنعنون وانا بالگوات اقتنعت ومن صدگ كردوها شاغت روحي شبعت بواجي
كاتمة صوتي بايدي وبس خلص حسيت الدنيا تدور بي كضيت ايد ليث حيل وانا گاعدة

دنگ يحاجيني
ليث : هاا دختي

هزيت رأسي بأي
_ لعبت روحي

ليث : اجيبلج عصير تشربيه

_ لا بس ماي

ليث : صار تعال صخر يمها

اجه وگف يمي صخر وليث مشى يجيبلي الماي شوي ورد فتحلي البطل يشربني وامي ما گدرت حتى تطب وياي ضلت برا ما گدرت تشوف
گومني ليث يعدل بعباتي وبس طلعنا اجت علينا امي عيونها مدمعة

حضنتني
زهرة : سودة علي يا يمة ريت بي ولا بيج

همست يابس بلعومي
_ اسم الله عليج هسة اصيرن زينة لا تخافين

زهرة : يا ما اخافن غير گلبي ممرود مرد

بس طلعنا بباب المستشفى واگفين جانوا كل الولد ومن بيناتهم هو يباوع علي وانا لابده بسد ليث چن عيوني اشوف بيهن مغوش من البچي البچيته

بس شافونه اجوي كلهم گبالنه يسألون شسوولي
صخر : كردولها الجلد المحترگ ولازم يوميا تعقيم

برهان: هواي محترگ

صخر : أي والله هواي

دنگت امسح عيوني ومشينا انا وليث وامي للسيارة وهم ضلوا ورانا شوي واجه صخر وردينا للقرية بس طبيت تلگوني ومن ببناتهم أبوي اجه اخذني من حضن ليث
محمد : سودة عليه يا بوية عيونج بچن بايدي ولا ايدج

بست ايده
_ اسم الله على ايدك بوية

ابتسم وباسني من راسي ورفعت عيوني على جدي من گالت
رأجس : الحمدلله على سلامتج جدي غاية

_ الله يسلمك جدي

بس شافتني جدة طبيت گالت
غضة : خايبة وين چان بالج وحرگتي روحج

_ القبق فلت واحترگت

غضة : دتعاي اگعدي يمي

مشيت گعدت يمها وهيوفة اجت نزعتني عباتي والبنات التمن علي
وانا گاعدة واحس ايدي تگرص بي من الوجع واحاول اغلس عنها وثاني يوم صادف عدي امتحان اخذني ليث أجله الي لان ايدي اليمنه محترگة وشلون اكتب

°بركة°

بالفرصة طلعت من الصف انا وصديقاتي وبس شفت هند جاية علي درت وجهي منها ،ما چن اشوفنها وبوكت ما حلينا رادت تحجي وياي وطلعت بساع شعوري غريب تجاها ما اعارف بشني اتصرف وياها من اشوفها چن اشوفه واحير وين اديرن عيوني عنها روحي حايرة وضياع الضايعته اشبه بضياع طفل وسط زخمة السوگ

صعدت بالخط غاية مو وياي وگبل لا يحرك الخط انتبهت عليه هو جاي ياخذها واگف يم سيارته وعينه على سيارة الخط مالتي

جريت نفس ودرت عيوني منه ما اريدنه ينتبه اباوعله جاي وباله يروح لبعيد حرك أبو الخط وانا ابد ما درت وجهي منعت روحي بالگوة وسيطرت عليها الدرب كله ما ببالي غير هل سالفة هاي
تعبت شورطني وحطيت رچلي ومشيتله اذا انا بس التفكير نهش عقلي وما اعارف شني المضموم

طبيت للبيت هدوء فتحت باب المطبخ صوت ماكو عارفت لو نايمين لو يم بيت جدي ردت بوجهي امشي لغرفتي بس ما اعارف شني الخلاني امشي لغرفة امي فتحتها وطاح گلبي من شفتها متمدده على المصلاية خفت لا بيها شي رچلية ما عانني امشي وانا بمكاني صحت

_ يمةة حاجيني يمةةة

ما ردت علي وما طلعلها صوت بالگوة گدرت احرگ روحي وامشيلها ندتها مره مرتين ومن فتحت عيونها بچيت بصوت اناشغ وهي طفرت ما تعارف سبب بچيي الهستيري كضتني من ايدي تحاجيني وانا بس اردد

_ خفت يمة خفت

شيماء : خايبة من شني خفتي ولج حاجيني شبيج يا يمة عليش هل بچي هذا

_ عبالي بيج شي اجيت اموتن يمة

شيماء : يااا ولچ غفيت ما ادري بروحي

مسحت عيوني اناشغ وهي حضنتني تهديني وين الا گدرت اهدء واجرن نفس عدل وبس شافتني هديت گالت
شيماء : تتغدين اصبلج

_ لا ما اريدن من اگعد اكل

شيماء : جا خوش

مشيت للغرفة بدلت هدومي وتمددت والرچفة احسن لهسة بعدها بي وبس گعدت تغديت ومشينا عد بيت جدي ويوم يجر يوم لحد ما خلص
الاسبوع
وردت انفتحت الطلابة من جديد وهل مرة اقوى ما ضل واحد ما تدخل بيها وماكو كل حل ولا توصلوا ولو لخبر عن اخوي

واليوم صار 3 أشهر بالضبط ملتمات يم بيت جدي ساعة الساعة يدگونة لان امس الولد حارگياهم بيت من بويتهم خارج القرية

تنهدت عيني على امي تلوب اصواتهم برا مخبوصين لهنا وصلتنة الليلة هم ناويلهم على نية وماكو غير بس الله يسترنا منها ولو حجينا واعترضنا شيخلصنا

گمت شلت عون ومشيت اطيه لميمنة طبيت للديوانية اباوعلها تباوع للولد مو الشباج صحت عليها اندارت علي

_ شبيج

ميمنة : مابي شي

تقدمت اخذته مني
ميمنة : نضفي الديوانية أنت بمكاني

_ جا صارلج شگد ما منضفتها

ميمنة : خايبة حتى المكناسة ما تلزم وياي ما اعارف ليش لازمني گلبي

_ اسم الله

ميمنة : ادعي مايصير شي

_ أن شاء الله ماكو شي بس صلي على محمد

ميمنة : اللهم صل على محمد وآل محمد

°ليث°

صحت بصوت عالي اريدنه يسمعني
_ صخررر ناوشني الجداااحه بساااع

شمر علي الجداحة وانا بايدي كارتونه زغيرة صرت بعيد عن المكان البيه رشينا النفط شعلتها وشمرتها وركضت بساع وصحت عليهم
_ نوووح حققق بساااع تعالوااا

طفرت من السياج واسمع صوت نوح وراي يحجي وي حق بس وصلت عدهم صفگت بايدي

_ تممناها

برهان : عاشت ايدكم

صخر : شو بس أنت الباقين وينهم

_ وراي هسة يجون

دنگت انكت هدومي ورفعت راسي من اجوي وكفوا فحطانين
عبد الحق : هاا نمشي

صخر : أي جا شني ضلتنه

تلفت بيناتهم
فقار : جا عزيز وينه

سألته مستغرب
_ عزيز جا مو ضل هنا

برهان : لا مشى وراكم

°وردة °

درت اباوع للجامة الدرب طويل وما اعارف وين ماخذني من الصياح تعبت وهو خلصها متنرفز بسبب اليتسمى سمير عارفت المقصود بكلامه أبو علي أخو صاحب أبوي ابو صخر

درت عليه متنرفزة من صاح
صمد : بت النعااال خنسسست لان درت اكو كلب ابن كلب جاي ينبش علينا

نترت
_ لا تغلط وما يهمني منو يدور علي بس اهم شي يخلصوني منك لان هاي شوووفتج ما جاي اتحملهاا

كض فچي بقوى
صمد : اذا ما خليت هذا وجهي ما تنسي بس اصبرلي اذا ما كسرت عينج وعين ابوج ما اطلع أبن أبوي

رفعتله ايدي
_ خوفتني شوف رچفت

طگني على راسي خلاني احس الدنيا صارت تفتر بي ما اعارف شلون سكتت وسترت على روحي طبگ گبال بيت اقل ما ينگال عنه بوسط هيمة نزل واجه فتح الباب من جهتي عتني من ايدي حسيت چتفي انخلع سحلني سحل طببني جوة حتى ما خلاني امشي مثل البشر

بس طببني عطت
_ شبيييك منو گالك ما اعرف امشييي خررب روح اهلك يا حيوااان

طبگ الباب واجه فر وجهي براچدي من حرگة گلبي بساع وبقوة ما اعرف منين جبتها رديته اله كض وجهه يباوعلي مصدوم ومن نضراته تشاهدت على روحي وركضت اريد اشوفلي مكان اختل بيه منه بس ما لحگت

رفعني بأيد وحدة يفر بي منا ومنا وانا چن لعباة مو بني آدم بايده كضيت ايده خايفة من حسيت عده استعداد يلطشني بالگاع من كل هاي المسافة بس الله هداه ونزلني بس لوما منزلني احسن جرني ورد راسي بقوة على الحايط بنفس الوكت حسيت بشي نزل على عيوني وانغمى علي

مر وكت ما معلوم وفتحت بس اشوف غواش چن بس بياض گبالي صيحت بحرگة گلب ما اعارف يسمعني لو لا

_ عميتنييي الله ياخذك يا حيوااان الله ينتقم مننك

شوي وحسيت بايد كتمت انفاسي تلاويت وياه هو ماكو غيره بس وخر ايده من حلگي رديت اصيح بصوت اقوى من گبل شوي

_ ما كفااااك عميتنيي تريد تموووتني خررب ابووك يا كلب يا ابن الكلب

صمد : بت ال**** اسكتي لا انعل سلف سلفاااج

سكتت مغمضة عيوني احس بيه من يتحرك حركته تبين شگد هو متوتر كلساع وطايح من ايده شي

_ شبييك سطرتنييي ترچف ايدك لازم بعدك تتعاطى

صمد : هواااي سكتتلج راح اجي اخليج تتمنين ملك الموت جاييج ولا انا

_ ارچع واكلك انا ما اخافن

صمد : مو صوج احد صوجي انا البينت كل نقاط ضعفي يم وحدة مثلججج عديمة مشاااعر

_ خليهن الك المشاعر

صمد : انعل ابوووج

_ وابوك بگبررره على هل خلفة من زغيركم لچبيركم عارات

سكت ما رديت عليه من اطاني حجايه اكبر من راسي گلت استر على روحي لان هذا عده استعدادا هنا يدفني من يگبن خبالاته

اختفى اليوم كله وما رد غير وي صلاة الصبح من صوته وهو طب يغني عارفت مو بوعيه

فركت عيوني اباوعله بصعوبة يسحل بروحه سحل واصل مرحلة صعبة هزيت ايدي وگمت اطبن للغرفة
فرشت مصلايتي لگيتها هنا مال ناس خيرة مبين مو مالته لان هو بعيد كل البعد عن طريق رب العالمين

هستوني خلصت وطب وانا استغفر وگف گبالي يضحك
صمد : هااا المؤمنة استغفري زين

رفعت عيوني اباوعله ودنگت لميت المصلاية ابد ما دايرتله بال لان مو بوعية وحرامات اتعب روحي واحجي وياه بهذا العقل الثميل تمددت على الفراش المفروش بالگاع اباوعله وبگلبي اگولن

حرامات ضيعت عمرك بهذا الدرب بيا وجه تلاگي ربك

غفيت وما حاسة على روحي وما گعدت غير على صوت هوسة برا الغرفة لبست حجابي وطلعت واستغربت من شفت اخوه هنا عبرت منهم بلاية سلام صاح وراي

صمد : وسم مو تسلميين

انداريت عليه
_ حقكم علي لازم اسلم لان أنتم ماخذيني للسوگ مو خاطفيني

رواد : شگد دارمية هاي

صمد : مو جديدة علينا

_ أبو الشررب اسكت لا اهينك

أنا گلتله هيج لو عيونه صارت بگصته طفر يريد يكضني وكضاه اخوه
صمد : هدنييي عليهااا اموتها رواد اشوفهااا الاهانة على اصولها

رواد : ولك مو تدري بيها بوووخة وبس لسان ما چن تسمعها غلس عنها

صمد : شأغلس وهي تدوس بنص مصارريني بت الكلب

_ أنت ابن الكلب تروح فدوة لخيط من خيوط عباة ابووي

رواد : مو اهده عليج والله

_ يعني تعارف اخوج جلب وهل كاضه

رواد : لا اله الا الله

_ تبرى منكم أنت واخوك

صاح متنرفز
رواد : لج شنييي أنت بلاء اسوود

_ أي بلاء وطاح على راسكم

صمد : سمعت متحملها على اعصااابي

رواد : چذاب جا غير ذابح روحك عليها

رفعتله حاجبي بحقارة اعارف كلش زين شلون اتعامل وياه خليتهم ومشيت ادور بالمطبخ اريدن شي اكله عاد يصير بي حيل اعاركه زين

لگيت قطعتين چبن مثلثات وصمونه خليتهن ومشيت حميت الچاي هو مسوي وانا متانيته افكر صار أيام انا ماكو شسووا وشعجب لهسه ما وصلولي شحال أبوي هسة لو امي الما عايزة زين وبس ظيم ريام ومصيبتها كافي عليها

طفيت النار من فار الچاي وصبيتلي گعدت اكل هنا وما مشيت يمهم بس رابطة أذني وياهم اسمعهم شجاي يحجون وكل ضنهم ما اسمع حسهم الناصي

رواد : لك يوم عن يوم يتخبلون علينا اكثر ردها لاهلها ترا ما ناويلك على خير

صمد : خلهم الي يجي بأيدهم يسووه ما يهموني

رواد : بس هي تهمك وأنت ابد ما هامها ولا مباوعتلك

صمد : اخليها تباوعلي مثل گبل

رواد : شلون

صمد : ما عليك أنت وين أنتم هسة

رواد : بالمزرعة لان امس هجموا البيت علينا وما اعارف شلون طلعنا منها سالمين

صمد : عارت ما يصيبنة شي

ضحك بصوت عالي
رواد : تعترف

صمد : جا چذب كون اجيبلك ام الاسلامية تفتي براسك چم فتوى

رواد : ماعدي خلگك انا مثلك

صمد : گبل چنت هواي اتحملها

رواد : والوحيد بينه خلتك تصلي وتصوم

صمد : ورديت الدرب اكثر عواج من الطلعتني منه

رواد : متندم

صمد : لا

رواد : چذاب

صمد : لا تلح

گمت شلت صينيتي غسلت الگلاص مال چاي ومشيت اردن للغرفة عبرت منهم ما چن سمعت شي وطبيت اصفن وي الحياطين من مشى رواد طب هو للغرفة يسألني

صمد : تتغدين

_ لا

صمد : تاكلين سم

_ السم بگلبك

طلع وطبگ الباب حيل وراه وانا ضليت ما تحركت لليل وماكو اله أي حركة بالبيت گمت اشوفن وينه واستغربت من ما شفته موجود دروته بالبيت كله ماكو مشيت لباب البيت حركته مقفول عارفت بيه طالع خليت ورديت گعدت بالصالة عيني ع الباب ساعات مرن وانا على گعدة وحدة من طب صحت

_ وييين چنت

صمد : بسم الله الرحمن الرحيم منين طلعتي

_ شالك اسم الله ورگعك بالگاع

سد الباب واجه وگف گبالي من وگفت فايرة اعصابي وخليت ومشيت للغرفة عفته وراي يصيح شوي وطب جرني وگفني گدامه

صمد : صار ساعة اكل خرررة واگلج تعاي احاجييج

_ انگلبت الدنياا شصار يعني اذا ما اجيييت

صمد : اگلبها على رأسج انااا

_ مو هيته الك وتگلبها ما توخر من

خرزني وانا رديت گعدت شوي ورد يصيح
صمد : مو مخليلج زقنبوووت ليش ما ماكلة

_ زقنبووت بنص گلبك كووون

صمد : حاااولي مرة وحدة بس حاولي لا تررردين لج راح امووتج من لساااانج

_ عليش ما ارررد شني اخاف منك واسكت

صمد : لا وييين تخافين استغرب اذا خفتيي عينچ گوووية من يوم يومج بت خزعل

_ تاج على راسك اسم ابووووي

صمد : يااا دين محمد ما سبييته گلتلج بن خززعل

_ أي وانا اگلك خزعل تاج راسك

صمد : گومي تزقنبي

_ زقنبوت بگلبك أنت

صمد : ناوية تخليني اطب سچن بيج لو شني القضية

_ ردني الاهلي وحلها اذا اضل يمك اخليك تكتل روحك

صمد : اكتلج أنت

_ ما تگدر

خرزني وطلع وانا من سمعت معدتي تقرقر من الجوع خليت ومشيت حميت الاكل المخليه الي هو وگعدت اكل اباوع عليه يحسب بكوم فلوس گدامه

نزلت الخاشوگة من ايدي
_ شني هالفلوس بايگهن أنت

رفع راسة عيونه بگصته صايرات
_ لو مسلب احد احجي ما اگولن

صمد : مني ما تگول

_ انا

صمد : والله اكبر چذابة على وجه الكرة الأرضية

_ خلف الله عليك انا أمرة متدينة ويني وين الچذب

صمد : أي خوش

غلست عنه وگمت انضف البيت حاله حال الظيم تقيدت افتر وهو گاعد بايدي المكناسة اشرتله على الباب
_ گوم اطلع برا اريد انضف

صمد : أول مرة اشوفلي وحدة مخطوفة تنضف

_ روحي عزيزة مو مال اگعد بهيج مكام

صمد : اهاا

_ أي والله يلا بساع اطلع

صمد : ما اتحرك مو غريب عليج انا نضفي گدامي

_ لا والله

صمد : أي والله

نترت
_صمدد

بنبرة صوت ما گدر يسيطر عليها رد
صمد : هااا وردته

بلعت ريگي اتلفت ما اريدن اضعف لا وردة لا تحنين عاندت حتى ما اديرن وجهي من اجه وگف گبالي وبنفس نبرة الصوت يحجي

صمد : وردة ما حنيتي كافي عذاب خلصت روحي ،مشتاگ الايااامنه

جر كلمة ايامنه وكض وجهي داره عليه خزرته
صمد : عيونج نزليهن وبطلي هل مكابر هذا

_ وخر مني صمد

صمد : رديلي الله عليج اكسبي بي اجر مثل گبل مو چنتث تگليلي احبك واكسب بيك اجر

باوعت بعيونه بلاية ما ارد كمل هو
صمد : اريد اردن اعيش وياج نحقق احلامنا سوا اطيني فرصة ثانية وعد علي ما تتندمين

_ ماعدي فرصة ثانية انا

صمد : بس الي انا غير عنهم انا صمد عشگج لو نسيتي

_ نسيت

صمد : حطي عينج بعيني واحجي

رفعت عيوني بعيونه
_ نسيتك نسيت كلشي يربطني بيك

صمد : ما اصدگ

_ صدگ لان ما اريدنك بعد انا من كل خاطر احجيها الك ما اريدنك

صمد : بس انا اريدج

_ مو مهم وخر من دربي

صمد : ما اوخر اذا ما نوصل لحل

_ ماكو حل

صمد : لا اكو

أبتسمت والغصة صارت ببلعومي تجرح
_ الچانت مرتك بيوم من الايام صرت أنت المر بحياتها

صمد : مو من كل گلبج هل حجي

نترت
_ شتررريد مني

صمد : اريدج أنت عشگي الحرمتيني منه

ضحكت مستهزئه
_ يااا عشگ نسيت أنت شنو چنت تسوي بي نسيييت شلون خليتني انززف من ضربك وحتى مات ابني ببطني وهو بعده عمرره ما متجاوز 5 أشهر ببطني يا حب يا عشگ تحجي عنه أنت أنت متتت بالنسبة الي من ساعة الموتت ابنك بايدك

صمد : متندم والله

_ مايفيد الندددم ما راح تغير شي من تتندم

بعدني احجي وفزينا انا وياه على صوت الباب من اندفر ثلاث دفرات من برا كفيلة تخليه يوگع ...


ليش تخاف حبني بصوت
واذا مريت من شارعنة دوّرني
وخل عينك تصد عل باب من تفوت
حبني بصوت 
خل يدرون جاي نموت
ليش عيونك الحلوات سهرانات؟
وحدهن وانة لوحدي 
ولوني ولونهن مبهوت
واذا مريت من يمك
جنازة وللنجف مزتوت
لا تستحي من الوادم
فل شعرك على التابوت

°وردة°

جرنـي يضمني ورا ضهره وانا ارچف صرت من اصواتهم شگد ما هوَ شخص مو زين بس الا الشرطة وهوَ عده امور تخالف حتى القانون من بين كل الأصوات ميزت صوت عم جفون "سميـر" انتفضت بخوف من بين الفضوى وسمعت صوت سحب أقسام 

من ورا ضهره طلعت بس عيوني انتبه عليَّ جاي اباوع عليه نزل السلاح من ايده ونتر بصمد داير عيونه مني 
سميـر : اطينا البت لا اطلعك منا بدمك 

صمـد : منو أنتَ واطيها الك

سميـر : أنا الدولـة شني ما تعارفني

أبتسم صفح ودار على الجنود يمـه 
سميـر : جيبوه وراي واذا ما هد البت الي غير تصرف وياه 

فز مندار عليَّ كض ايدي حيل وانا عيوني على الجنود التموا علينا 
صمـد : اوگفـي وياي هل مرررة ما جبرتج اجيتي بـ ارادتج گليلهم اجيتي وياي بأرادتج 

_ لا ما ردت اجي جبرتني أنتَ گلت احجي وياج وضحكت عليَّ

طگ ايده الثانية بالحايط وصيح ما راضي يربطون ايده رديت ليورة من وگف گبالي جندي 
_ بس اللبس عباتي 

ركضت للغرفة حطيت عباتي على رأسي وطلعت ما مصدگـة راح اطلع منا بعد كل هاي الايام بس طلعت من البيت بنضرة الامتنان باوعتلـه واگف يدخن وراد ضهره على السيارة بس شافني أشر تعـاي ولان انـا اعرف بعلاقته ويَّ اهلي حسيت بالامان وانا امشيلـه بس وگفت گبالـه گـال وهوَ يشمر الچگارة من ايـده 
سميـر : صدگ جايـه وياه بـ ارادتج

هزيت رأسي بـ لا 
_ راد يحجي ويـاي 

سميـر : وصعدتـي بالسيارة

_ أي 

أشر على رأسـه 
سميـر : عقـل عدج لو حچـارة 

خزرتـه متنرفزة من استهزائـه بـيه عگـد حاجبه ونتر 
سميـر : عدلي عيونج لا اردج يم هذا المجرم يعدلهـن الج 

_ أي ردني عـادي 

أبتسم ومسح على شواربـه 
سميـر : والله لوما اهلـج اسويها صدگ واردج

ما رديت عليه اخاف لا يشكيني الابوي اشرلي على السيارة صعدت ورا اباوع من الجامة طلعوا صمـد من البيت رابطين ايده ومحاوطيه ثنين جنود صاح يأشرلهم على السيارة بس ما سمعت شني اليگولـه واقل الدقيقة وصعد هوَ بمكـان السايق تلفتت اسأل

_ سيارتك هـاي

شغلها وبلايه ما يندار جاوبني 
سميـر : أي 

ضليت اباوع للدرب ومن مليت حطيت رأسي على الجامة وغمضت عيوني ما اعرف شگــد مر وكت وفزيت اعدل بحجابي نازل من راسي على أثر صوته من گـال 
سميـر : شبيج 
باوعتله من الجامة يباوعلي 
_ مابيَّ شي 

عدلت گعدتي ادعي ما منتبه عليَّ هواي من شعـري چـان طالع غمضت عيوني ورديت فتحتهن  من گـال 
سميـر : اخوانج ورانـا 

فزيت مندارة اباوع من الجامة الورا سياراتهم أي والله جاي اشوفهن دمعن عيوني وانداريت امسحهن من گـال 
سميـر : تنزليلهم

_ شوكت نوصل

سميـر : ما ضل شي 

وما صدگت من شفت طب بدربونـة اهلي روحي ردتلي وعيوني غورگن وانا اشوفن أبوي واگف بالباب گبل حتى لا يطبگ السيارة فتحت الباب وهوَ صاح 

سميـر : اطيي مجـااال ما طايررين 

طبگهـا بساع وانا نزلت مفرفحـة روحي على حضـن أبوي بنص الشارع شمرت روحي عليه متعلگـة برگبته ما چنت خايفة گد شعرة من صمد لان اعارف بيه ما راح يأذيني بس شوگي الاهلي غلب كلشي 

شيخ خزعل : يابعد ابووج يا بوووية 

حاضني بأثنين اديـه واخواني التموا عليَّ وخـرت ابوسن ايده 
_ مشتاگتلك بوية روحي فرفحت على الامان بسدك 

سميـر : زحمـة تفرچت الوادم عليكم 

ضحك أبوي وأشرلي اطبن جوه مشيت و جواد ومُهاب وياي واسمعنهم يحجون وراي 
شيخ خزعل : ممنون منك ابو علي ما اعارف شلون اجازيك 

سميـر : تحجيلي حقيقـة ضلت بت اخـوي عـدك

بس فتحوا الباب صارن گدامي واگفـات امي وسمر وجفون ركضت الامي ما چن هذا عمري رديت طفله زغيره وانا اشم ريحتها

حضنتها بكل ما عـدي من قوة وهيَ تسألني بخوف 
أم جـواد : خوما سوالج شي صمد ورديـة يمـة احجيلي الف حسبة أجت ببالي 

وخرت اردن عليها 
_ لا والله كلشي ما سوالي هـاي انا رديتلج سالمة 

أم جـواد : الف الحمدلله 

أبتسمت من أجت حضنتني
سمـر : صح حقنـة أنتِ بس مكانج بالبيت فـارغ

_ تكسرين وتچبرين 

اخذت فطومـة منها ابوس بيها 
_ يابعد روح عمتج شكثـر مشتاگتلج

طبينا جوا شعور غريب وانا اباوع بكل ركـن من البيت چن مفارگتـه دهر مشيت لغرفتي فتحتهـا اباوعلها مرتبـة درت على صوتها وراي

جفـون : عمي هنا مو

_ أي ،برا يم أبوي 

جفـون : اريدن اسلم عليه 

_ اذا يطب واحد من الولد اگلـه يصيحـه الج

جفـون : شكرًا 

_ العفوا 

هيَ طلعت وانا طلعتلي هدوم ومشيت للحمام اسبح طلعت الخاولي على راسي گدامي صار مُهاب وگفت بمكاني من شفتـه چاي عليَّ مبتسم 

مُهـاب : وردت البستـان أختي الچبيرة شمعـة البيت 

_ بعد بعد 

اجـه حضني يحجي 
مُهـاب : اذا ما شعلنالج عشيرته ما اتسمى أبن أبوي 

_ وين اخذوه

مُهـاب : للمركـز

_ جفون تريد تشوف عمها بعـده هنـا

مُهـاب : أي ماشي اصيحـه الها

بس طلع هوَ انا مشيت گتلها وهيَ ما صدگت بساع طلعت تباوع على باب الشارع متانيتـه يطب واگفـة اباوع عليهم من الشباج 
طب بس تعابير وجهه مگلوبـة ركضتلـه تحضنـه بس الغريب ما حضنهـا مثل اول مرة شافهـا عدنـا

نزلت ايدهـا وضلت تباوعله بأستغراب اشرلها على البيت وعارفت قصده يريدها تطب دارت عيونهــا مغورگـة طبت حابسه دموعها وما ردت على امـي من سألته شبيج لحگتها وبس شافتني انفچــرت 

جفـون : ما يحجي وياي وردة عموو مدري شبيه

سديت الباب وگعدت يمها ايدي على چتفها واحجي وياها 
_ يجوز تعبـان لو حسبـه ببالـه

جفـون : لا انا احس اكو شي 

_ مثل شنو

رفعت اچتافها 
جفـون : ما اعـارف بس ما ارتاحيت لسكوتـه

_ لا تفكرين تبين بعدين

جفـوه : شوكت بعدين ليش انا اكو بعدين بحياتي 

_ اكوو بس گولي يا الله 

جفـون : يا الله 

°ليث°

نـوح : انا شفتـه بس كل ضني رد يمكم 

برهـان : لا ما رد راح اخابر عليه يجوز رد للبيت

دگ عليه مرة ومرتين وماكو ما يرد من أيسنـه تطشرنـا ندوره وما ضل عدنا غير نرد لنفس المكـان الحرگناه حتى نشوفـه 
صخـر : ليث وحق وفقار أمشوا وانا اضلن هنا يم السيارات برهان امشي وياهم نوح ضل يمي 

ردينـا نشوفـه وماكو اله أثر بالمكـان أخر شي تلثمت وطبيت بنص الدخـان وراي يصيح برهان يخـاف لا اختنگ انا كل بالي يم عزيز وادعي مو هنا هوَ طب وياي فقار يدور اخوه بـس تيبست بمكاني من شفتـه طايح والنار قريبة عليه صحت بصوت عالي اسمعهم برا وفززت فقار بالگلتـه 
_ هنااا عزيززز تعالوااا نطلعـه 

فقـار : وييينه ولك ما جاي اشوووفه 

أشرت على مكانـه 
_ هذااااك 

من الشباج شفتـه الباب چان مقفول من مكانـي ركضت دفرته دفرة والثانية انفتح طبيت والولـد كلهم وراي دنگت ارفعـه من الگـاع انخبصنا 
خبص ما گدرتله وحدي وگابلني عليه برهان نزلناه نتراكض منتهي من الدخـان نريد نلحگ عليه 
شغل صخر السيارة وحطيناه بيها وصعد يمه فقار واحنة لحگناهم ما تنشاف ورانا غير العجاجة وبس وصلنه للمستشفى اخذوه للطوارئ 
ضلينا واگفين برا ومن طلعت الممرضة سألنها عن حاله وچان چوابها 
_ حالته حرجـة وعده حروق من الدرجـة الثالثـة

الدرجـة الثالثة يعني اشبـه بالتشـوه من مشت هيَ طلع وراها الدكتور التمينا عليه نسأل 
الدكتـور : بده يستعدل التنفس عده بس لازم يضـل تحت المراقبه 

°حـواري°

طلعت من الغرفـة مفزوعـة من صوت العياط برا طبت ريحانة من المطبخ وجهه صاير أصفر حسيت صاير شي وسألتها 
_ شكوو ريحانـة

ريحانـة : ماكو شي

_ شلون ماكـو احجي شكوو هذا صوت اميي تعيط 

ركضت اطلع وهيَ وراي وكل ذرة بجسمي انتفضت ما مصدگـة السمعته أذني 
نجوى : يمة عزيززز ولكم احترگ ابني بناااارنـه

فتحت عيوني ما اريد اصدگ الجـاي اسمعـه وانداريت عليها بالگوة احجي 
_ شبيـه عزيززز 

عيونها متروسـة دموع ومبين أول مرة تسمع السمعتـه انا كضيت ايدها اسند روحي اريـد اطلع بس سمعت صوت حوراء وسيف يبچون رديت 
شلت حوراء بايد ترچف خبصت الدنيا وريحانـة شالت سيف تسكت بيه ذرة حيل ما ضلت عـدي بالي عد حجايات امي ما تحملت اضلن ولبست عباتي شگد حاولت تمنعني بس انا عاندت 
جوا عباتي ضميت حوراء وطلعت وهيَ وراي شايلة سيف وبس فتحت الباب صاروا گبالي أبوي وعمامي يصعدون بالسيارات عيوني عليهم بخوف الدنيا كلها سألتهم 
_ وين ماشين

اندار عليَّ أبوي واول مرة اشوفنه بهل حـال وجهه صاير احمر مثل واحد حابس عبرتـه 
باقـر : للمستشفى نشـوف اخـوج

احساس بداخلي خلاني اسأل رغم انا سمعت بس تمنيت يطلع السمعتـه غلط
_ شبيه اخوي

صفن بوجهـي حاير شنو يرد عليَّ شيگلـي احترگ نتيجـة افعالهـم
رأجس : طبي جوة جـدي 

ما رديت وكملت دربي للبيت جدي وبس طبيت صوت خبصتهن بأذني صارت كملت ليجوه 
اسحل بعباتي احس على لحظة راح تطيح من ايدي حوراء وبس شافتني جدة صاحت بيَّ

غضـة : شطلعـج يمدولبه بعـدج نفاااس 

اجت ميمنة اخذت حوراء من ايدي وانا رديت عليها
_ بيا حال انا جدة فدوه گلولي شبيه عزيز شنو احترگ

عيني على امي واحجي گاعدة وحيلها رايح وبس سألت ردت عليَّ
نجوى : احترگ اخـوج تشـوه أبو وجهه الحلـوو

نشغت اتلفت اباوع بالوجوه كـل معالم الموجودين تگلي أي السمعتي صح گعدت گبـال امي اريد انطق صوتي اختفى شهگت وبس دموعي تنزل وبصف امي گاعدة عمة زهرة تحجي وياي

زهرة : ولج حورية صلي على محمد البجي ما يصلح عليج 

جريت نفس طويل من بين دموعي گلت بصوت بالگوة ينفهم
_ شلون ما ابجي عمة هذا عزيز هذا اخوي مو أي واحد المحترگ

°غايـة°

كضيت بلعومي چن بالعـة صخرة من نار هلگد ما حابسة شهگاتي گمت ورا ميمنة من صاحتني سدت باب المطبخ وحضنتني بچيت رأسي على چتفها
ميمنة : ابجي لا تضمين بگلبي يصير بيج شي اذا استحيتي من الكل لا تستحين مني

اردد بلاية وعي 
_  تشـوه وهوَ موهوس بروحـه تشـوه الچـان يگول ماكو بجمالي 

ميمنة : الله كاتبله هيج ادعي يطلع حرگـه قليل مو هواي 

_ ياارب 

وخرت امسح عيوني من انفتح الباب طبت هيوفـة وسدته وراها بس شافتني گالت 
هيوفـة : ابجي عادي ترا اعـارف بيه يحبج

شهگت من گالت كلمة "يحبج" گابلني ثيناتهن يهونن عليَّ ومن ميمنة سمعت صوت عون يبجي طلعت وضلت يمي بس هيوفـة گعدت بصفي من گعـدت جرت نفس بضياع تحجي 

هيوفـة : محترگ گلبي من شوفتـه بهل وضع متكتر حاله من حال الغريب ضيرم الجان يخاف على اخوانه من الهوى هسة ساكن البيت واخوه چان بنص الموت 

_ شتتوقعين من شخص فاقد ذاكرتـه

ما ردت عليَّ وضلت ساكتـه انفتح الباب وطبت عمة عطاء : هيوفـة المكيودة 

باوعتلها مستغربـة 
هيوفـة : يا مكيودة عمة 

عطاء : كيدج عظيم بت زهرة طيحتي الزلمة بعشگج مرتين 

هيوفـة : هاا 

عطاء : ضيرم برا يريدج

بلايه ما ترد گامت طلعت وعمة اجت يمي 
عطاء : هاا ضايجة على عزيز 

هزيت رأسي ساكتة ردت گالت 
عطاء : عارفت بيج حبيتيه ولو هوَ ما ينحب بس يمج غير 

_ مقهورة عليه عمه شلون راح يتقبل الصارلـه 

عطاء : يتعالج

جريت نفس وگمت طلعت وراها گعدت بصف ريحانة الحاطة سيف بحضنها وبس تصفن ودموعها تنزل يوم ما چان سهل بين حالنه والچاي والماشي گضه ثاني يوم كل ضنه راح يطلعوه بس اجه نـوح گال 
نـوح : ما يطلع اليوم گالوا يحتاج يضل بعد 

نجوى : جااا خلوني امشي اشوف

نـوح : وين تمشين عمة ما يخلون احد يطب يمه

نجوى : حتى لو اباوعلـه من بعيد 

نـوح : ما اعارف شگلج بس شوفي الولد اخافن اخذج ويضلون يحجون 

نجوى : خابرلي على صخر وگله 

نـوح : صار 

طلع مبايله دگ على صخر شويَ ورد حجاله نوح عمة تريد تجي واكيد ما رضى ضلت عمة تشيل روحها وترگعها الا تمشي 
غضـة : خايبة اگعـدي وين تمشين والزلام تارسـة المستشفى 

نـوح : والله ما ضل احد ما اجه واصدقائـه ما اعارف منين عارفين بالصار وكلساع جايتنه مجموعة 

نجوى : جا شلوون 

زهرة : تاني من تصفى المستشفى امشي

نـوح : الا بالليل

نجوى : ميخالف 

نـوح : اشوفن اذا صفت اجي اخذج 

حواري : وانا هم 

نـوح : وين خوية تردين تورطيني ويَّ حق

حواري : وشدخله هوَ 

نـوح : شلون شدخلـه

وبس طلع نترت جدة بحواري
غضـة : شني شدخله جا غير زلمتج شو ما اعارف شلونج أنتِ

حواري : مو زلمتي جدة خليني ساكته زحمة احجي وامه هنا 

شيماء : يعني اذا مو هنا تحجين

حواري : أي وما اخلي حجاية تعتب عليَّ ما اکولنها

شيماء : احجي عادي 

حواري : لا عيب منج 

گمت من مكاني من سمعت صوت ليث يصيحني مشيتله المطبخ بس شافني گـال 
ليث : اريدن اطب اسبح كتلني الظيم 

_ اوگف اسويلك درب 

ليث : بساع بعد اخوج 

_ صار 

طبيت گتلهن ليث راح يطب
تسترن وانا رديت صحته صعد فوگ وضليت گاعدة على الدرج خاف ينزل وما أحد ينتبه عليه وانا على گعدتي اجت ميمنة حطت عون بحضني رفعته ابوسنـه واحجي وياها 
_ شگـد ريحته طيبيه المدلل 

ميمنة : البوطرة هيج وهوَ هم نضيف 

_ أي فدوة لعيونه 

ميمنة : ديري بالج عليه بين ما اغسل المواعين 

_ صار 

مشت تغسل مواعين الغدا ولحگتها هيوفـة ضليت اناغيله صاير ينتبه ويتفاعل ويَّ أي واحد يحاجيـه وبس نزل ليث وشافه بأيدي اخذه من ايدي حايـر شلون يلعب وياه عون اول واقرب طفل لگلب كل شخص بينا

ليث : اضحك بعد عمك فدوة لضحكتك اروحن انا وكل واحد من بيت رأجس 

غضـة : يااا فلك

ضحك واطانيه ومشى لجدة
ليث : هاا غضة شبيج 

غضـة : ولك ما تگول جدة مثلهم

ليث : انا احبن اگولن غضة گومي بركة خلِ انامن على رچلين غضة 

گامت بركة چانت گاعدة يم جدة وهوَ تمدد على رچلها مسحت على شعره مثل كل مره
غضـة : تعبـان بعد حبوبتـه

ليث : أي والله جدة مهدود حيلي 

غضـة : سودة عليَّ يمتى ترتاحون ياحبوبة اتعب من اشوفن حالكم هيج 

ليث : الله كريم تنحل 

غضـة : شيحلها اذا جاي تكبر ما تزغر 

ليث : ما تنحل اذا ما تكبر جدة 

گـام گعد على حيله ،واندار علي
ليث : غاية اصعدي جيبلي محفظتي فوگ نسيتهـا 

_ صار 

صعدت اجيبنها واستغربت من شفت كتر مال شعـر بصفها شلتها وبالايد الثانية شلت الكتر مستغربــة وما حطيت ببالي هذا الكتر لمنو نزلت بأيدي ثنينهن بلاية ما احجي اطيتهن اله لبس الكتر بأيده وحط المحفظة بجيبـه وگـام ضليت صافنة عليه 
ولا چن شفت هيج شي عده طبيعي الوضع ولا چن اكو شي

مشى هوَ وانا رديت گعدت ويوم يجر يوم وصار اسبوع وطلع عزيز من المستشفى كلنـا واگفـات نباوع من الشباج طب يمشي وكاضه 
فقار و وراه ليث ،وجهه ملفوف وايـده ثنينهـن 

تنهدت ودرت على صوت ريحانة بصفي 
ريحانـة : سودة عليَّ ،شصاير بيك يا خوية 

رديت اباوعلـه مقهورة الحوش يروش ما ضال واحد من أل خبير ولا من بيت الرباح ما اجه
اليوم كلـه ضلينا نركض ،طب صاير رماد من التعب بنص الهوسة وصاحها 

صخـر : ميمنة چيبلي الجرواية السودة بسااع 

گامت تمسح بأيدها تحجي وياه
ميمنة : ليش ويـن چراويتك

صخـر : اخذها مني برهـان بساعج 

ميمنة : هسة اوگف بس اغسل 

غسلت ايدها من زفرة المواعين وصعدت اقل الدقيقة ونزلت اطتهياه ووگفت يمه مشيت اغسل 
ايدي چانوا واگفين قريب على السنك اسمعهم شني يحجون 
صخـر : هـاج هذن ضميهن عدج لا يطيحن منـي 

اخذت كارتات مدري مال شنو من ايده وبصوت خافت تلومه 
ميمنة : شلون تشيلهن وياك هيج بله طاحن منك وتتورط 

صخـر : ما انتبهت 

ميمنة : اووف منك هذاك اليوم من ضاع مو ضلينا حايرين صاير مهمل صخر 

صخـر : معتمد عليج وبطبيعتي ابد ما اعتمد على أحد 

رفعت راسي اباوعله مبتسم بساع مشيت مبتسمـة وفرحانة بنفس الوكت ،شلت كوم مواعين من فرحتي وطاحن من ايدي وصارن رماد فـزوا كـل الموجودين يمي ومن بيناتهم صخر اجه يسأل خوما صايرلي شي 

رديت ليورة اباوع ع الگزاز 
_ لا مابيَّ شي بس المواعين راحن 

صخـر : فدوة الج لمن الگزاز گبل لا تجيچن جدة

حجه هيج وطلع اجت گرصتني 
عطاء : وين چان بالج ولج

فركت مكـان الگرصة شايغة روحي عيوني دمعـن وهيَ تريدني الا احجي 
عطاء : عد عزيز مووو

_ لا والله عمة فلتن من ايدي مادري شلون 

عطاء : اذا تردين تشوفي گليلي حتى احصلي چم فلس دزداني فـارغ

_ يااا عمة 

عطاء : أي والله شبيج خليني استفـاد

مسحت الدمعـة النزلت من عيني ودارت على ميمنة تحقق وياها الحمدلله من خلتني ما صدگت اشرد ومشيت للصالة عفتهن حايرات بالگزاز والهوسـة وبس طبيت وراي سمعت صوت الولـد مخبوصين خوفـة صارت بيَّ وما ضلتلي قابليـه لكل شي يصير بعد

طبت هيوفـة تهف صاحتها جدة اجت وگفت گبالها 
هيوفـة : هاا جدة شرايـدة

غضـة : شكو شصاير برا شبيهم

هيوفـة : الرباح معاند ما يمشي إلا وماخذ عمة عطاء وياه وجدي رضى والولد گبوا ما راضين 

غضـة : يااا وشدخلهم

هيوفـة : اندري بس اضن هاي هيَ جدي ردها

عطاء : رد مني ولج

اجت من المطبخ تهز بأيدها اشرت على روحهـا 
عطاء : بعلي لو اموتن ما اردن 

هيوفـة : جدي اطـى حجاية وگدام كل الموجودين 

عطاء : حجايته ما تمشي عليَّ

طگت جدة على حلگها تنتر بعمـة 
غضـة : صخـام الصخمج اسكتي ولج

عطاء : يمة لو ينطبگ السما على الگـاع ما اردن حطوها ببالكم 

غضـة : جا شترردين

عطاء : يعتذر مني

غضـة : ما يسويها

عطاء : براحتـه اضلن هنا

خالـدة : لازم حلتلج الگعـدة هنا 

اندارتلها عمة رافعـة حاجبها وابتسمت ابتسامه جانية 
عطاء : أي وگاعدة على خوانيگج هم بعد شني مضوجج 

خالـدة : هسة انا شحجيت لو من توصل يمي الحجي يصير يبززج 

عطاء : اسكتي عني خالدة احسلج 

ما ردت عليها وگامت تنافخ لان تعارف عمة عطاء شني ما تندگ وياها اكثر شويَ وطب جدي وبس گاللها
رأجس : حضري روحج تردين ويَّ عمج و حجايـة زايدة ما اريدن 

عطاء : اعذرني بوية بس ما اردن 

رأجس : مو بكيفج اطيت حجايـة لعمج 

عطاء : تعارف شرط بوية ليش تحجي بدون ما تاخذ شوري

رأجس : حجيت بعد ولازم تردين 

محمد : يعني شلون بوية تجبرهـا 

اندار عليه جدي ينتر ما راضي 
رأجس : لا تتدخل أنتَ خلها ترد وكلشي يفض

محمد : اذا زلمتها وما جاي شلون تفض 

عطاء : سهلة اردن خوية بس باجر تلگوني عدكم اهم شي ما اكسر حجاية أبوي 

باوعتلها حايرة صدگ تحجي وهيج بهل سهولـة

مشت للغرفـة لبست عباتها وأجت وجدي ما صدگ گاللها يلا طلعت وكل الموجودين خلتهم بحيرة من أمرها 
ميمنة : يعني صدگ ردت هيج

هيوفـة : خايبة شترد شوفي اذا ما باجر اجتنا لو كاتلها لو كاتلته 

واگفـات بصفي يتبسبسن ومن طشت الوادم جابوا عزيز للديوانية الجوة كلهم مشوا عده الا انا حـرت شلون اروحن وراهم وشلون اشوفنه بهل حال شجعت روحي الف مرا گبل لا اخطي للديواينة وبس طبيت بين هاي الهوسة ما گدرت حتى اتحمدله بالسلامة وخليت وگعدت بصف بركة بنص سوالفهم و گال لفقار 

عزيز : فقار اريدن امشي للبيت 

گامله فقار سنده وطلعوا وراهم لبست عباتها امه وريحانة وحواري گامت تلملم بغراض الجهال صفنت عليهم 
حـواري : نسيتهم ثنين شلون اشيلنهم 

زهرة : جا هيوفـة وين

حـواري : مشت للبيت غاية تمشين وياي

_ يمة اروحن

زهرة : أي عادي بس بساع 

مشيت للغرفة لبست عباتي وطلعت اطتني حوراء 
حـواري : اخذيها انا اشيلن سيوفي الحباب

أبتسمت ودنگت ابوسنها تنوكل اكل بس مشت لحگتها انا اول ما طيبنا صارت گبالنه ريحانــة 

حـواري : شلون تخليني وحدي

ريحانـة : انشده بالي والله وهم ردت احظر مكـان عزيز 

اجت اخذت حوراء من ايدي وهمستلي 
ريحانـة : ضاج اخـوي لان ما گتيله الحمدلله ع السلامة 

بهتت واحس من الخجل اريدن اطيرن من گدامهـا 
ريحانـة : اصعـديله 

نشغت 
_ لا يمةةة شني اصعدله مو حرام 

ريحانـة : أي حـرام چيرة حتى چيرة 

_ بفرگي 

ريحانـة : أي طبعاً جا بفرگمن 

خلتني وطبت وانا رديت لان ادري الولد كلهم برا عادي اطلع مادام بس همَ وبس شافني ليث اجـه عليَّ 
ليث : شعدج طالعة ولج 

_ جا مو طلعت ويَّ حواري شني ما شفتني

ليث : لا ما جنت هنا 

_ تريد شي 

ليث : لا بس نزلي رأسج صاحب عزيز هنـا

دنگت ومشيت وراه بس طبيت صارت گبـالي ميمنة تكنس الحوش نزعت عباتي احجي وياها 
_ جا مو امي گالت لا تشتغلن اليوم نخلي التنضيف على باچر

ميمنة : كل البيت كفينـاه ضلت ع الحـوش بس اصعـدي لعـون شوفي خاف گعـد 

_ تدللين أنتِ وعون 

أبتسمت بتعب وانا كملت دربي وگفتني امي تحجي وياي ومن صاحتلها جدة انا صعدت فوگ و ويَّ طبتي سمعت صوته يناغي مشيت بساع ودنگـت لكاروكـه شلته احجي وياه

_ تحجي ويَّ روحك شنو توم الزغيرون ضايج عيني 

يكض وجهي بأيده ويدنگ عليَّ حضنته وانا اتذكرها ما يوم شلته اذا ما صارت گبال عيني هيَ 
واتمناه بحضنها وهوَ يكبر فكرة مات گبل لا يشوف امــه هواي متعبتنـا

دنگت حطيته ع الچربايـة وسويتله ممـه وما اعارف شلون عيني اجت على جرار الميز مفتوحـه شويَ مشيت اسدها بس صار العكس فتحتها مستغربة وانا اشوفـن صورتـه صورة صخر بملابس عسكريـة وثلاث نجوم على اچتافـه 
رچفت أيــدي وطاحت الممة وانگلب الحليب البيها وانا اشيلن الباج وقرا المكتوب بيه بالحـرف ألواحد

وزارة الداخليـة 
"الضابط صخـر محمد رأجس أل غضب"

اكثر من مرة عدت المكتوب وما اگدر استوعب وما صحاني غير صوت بچي عون ركضت اسويله ممة جديدة حطيته بحضني اشربها اله وعيني على الميز ما تروح من بالي صورتـه ابد ردت بس اسيطر على روحي وما ابين الشفتـه من طبت هيَ فحطانة باوعت على مكـان الحليب المگلوب 

_ طاحت من ايدي 

ميمنة : عادي ولا يهمج هسة انضفها 

_ لا تعـاي يم عون وانا اگومن امسح المكان 

ميمنة : يمعودة اسكتي 

وصدگ مسحتـه هيَ وبس خلصت اخذتلهـا 
هدوم 
سبحت وردت گعـدت يمي تحجي ويَّ عـون 
ميمنة : يمة مشتاگـة لهذا الوجه الحلو مفارگته اليوم انا يمة فدواا لليعـرفني 

اخذتـه مني من صار يشمر روحـه عليها شمتـه من رگبته 
ميمنة : افيشش ردتلي روحي 

اباوعلها شلون تحجي وياه چن چبير اصفن بكـل مرة واگولن يجوز الله يحبه واطاه هيج خاله تموت على طاري اسمه 
صخـر : السلام عليكم 

رفعت راسي من سمعت صوته ردينا السلام انا وهيَ نزع الچراوية من رأسه وگعد يباوع لعون فتح ايده وهيَ گامت اطته اله نزلت وخليتهم وكل فكـري عده اذا هوَ هيج مكانته ليش ما يحجي وشني نيته من ضم هل شي

بس شافتني نزلت من فوگ گالت
زهرة : غاية يمة چا شوكت تقرين 

_ هسة 

زهرة : شوكت هسة مو طر نص الليل

_ والله يايمة ياريت لو إاجل الامتحان لان خوت روحي من التعب 

زهرة : سودة عليَّ حگـج خلِ ليث يمشي وياج تأجلي 

_ هوَ ليث تورط 

زهرة : جا الاخو المن يراد 

نـوح : لتاچيل الامتحانات

عدل شعـره 
نـوح : جوعـان 

_ تعبااانـة 

نـوح : هذا لو ليث چان گلتيله صار ومن عيوني وچنك على اكل بس نوح وحد مظلوم 

ليث : ابجي بعد ابجي 

نـوح : اسمي نوح يعني نوح يعني بچي 

طگـاه على رگبتـه 
ليث : امس ليش گلتلك امشي وياي للگيعـان وطگيتني بوري

نـوح : ما احبهن شني هيَ اجباري عمي انا حتى مصرفي منهن ما اريده 

ليث : حگك عدك احنـة على گد ايدك شوكت ما تريد فلوس نورقلك 

نـوح : جيبوكم متروسـة بالاخص أنتَ

غضـة : خايب تف من عينك 

طلعت من غرفتهـا تتچـه على العوجيـه صفگ ايد بأيد 
نـوح : هوَ هذا الفقير ماكول حگـه وما يگدر يحجي 

غضـة : وينك وين الفقارية
خايب نوح تاخذنا للشط وتردنا عطشانين 

نـوح : على ذكر الشط جددددة 

وبس جاب سيرة الشط طگـاه على زنده خازره 
ليث : اطيح حظك والله 

نـوح : وررق

ليث : اكـل تبن 

نـوح : جا احجيلهااا ،منو امس چـان هناك 

غضـة : منو خايب

ليث : ماكو احد جدة بس هذا يمسلت حشاك 

فتح محفضته وحط بأيده 25 ونوح ضحك باسها وحطها على گصته
نـوح : شلون رزق الا يخبل اللهم يهنيكم

ليث : امشي من لا اطيح حظك عود عبالك اعبرها الك 

نـوح : جا احجي 

خزره ونوح يغث ليث من يضحك خله وصعد فوگ وقبل لا يلحگـه ليث گلتله 
_ باجر تاخذني أاجل امتحاني

ليث : مو هواي اچلتي

_ جا شبيدي مو تشوف الوضع شلونه

ليث : شعدج

_ قواعـد 

ليث : قاريـته

_ أي ،بس ماعدي حيل اراجع 

ليث : انا اراجعلج وأنتِ بس اسمعيلي تگدرين

صفنت حايرة وهوَ جاوب روحت 
ليث : أي تگدرين يلا گدامي للغرفة 

أبتسمت ومشيت گبله طلعت چنطتي وهوَ گعـد اطيته كتاب العربي والدفتر بدا يشرحلي ولنص المادة وحسيت روحي راح اغفى 

ليث : هاا غاية شو صحصحي ما ضل شي .

_ تعبت والله

ليث : كملي ونامي مو دوامج ضهـري 

_ أي 

ليث : جا اتحملي ساعة 

_ بس اوگف اغسل وجهي وارد 

ليث : خوش وجيبلي وياج ماي 

_ تدلل 

فتحت باب الغرفة وطلعت امشي بنص الظلمة مغمضة عيوني طبيت للمطبخ غسلت وجهـي و جبتله ماي ورديت فتحت عيوني صح ورديت مركزة وياه وما صدگت من خلصنا بساع جريت مخدة وتمددت وهوَ طفى الضوه عليَّ وطلع وگبل دوامي بساعة گعدتني ميمنة والحمدلله صدگ جاوبت وما راح لا تعبي ولا تعب ليث بحيث بس طبيت تلگاني 

ليث : هااا جاوبتي

هزيت رأسي بـ أي 
_ كلش زينة 

ليث : عفية بالشاطرة 

_ لوما أنتَ ما اجاوب 

ليث : تدللين عليَّ چم غايـة عدي

_ بس وحدة 

ليث : تمـون وتدلل 

مشيتله بساع حضنتـه 
نـوح : ما تحضنيني لو ما اعجب انا 

ليث : شلون ويَّ غيرتك احنة 

وخرت من ليث 
_ مو هوَ حجيه حلو 

نـوح : جا انا شبيه حجيي لو هيَ حضوض 

ليث : أي حضوض 

نـوح : مچنص عمـي

ليث : وتالي وياك 

ميمنة : تعـاي طبي مناگرهم من الصبح وبعده

طبيت من صاحتني من باب المطبخ وگفت يمها 
_ شجـاي تسوين

ميمنة : فورت ممية عون تعارفين يوميا لازم افورها 

_ عود ليش 

ميمنة : حتى تتعقم 

_ اممم منين عارفتي

ميمنة : اتذكر امي هيج تسوي من چانت بركـة زغيرة 

_ وعود ما تضل بكتريا

ميمنة : أي اگلج چنهن جوعانات

تباوع قفص طيور جفون 
_ اي چن صدگ 

ميمنة : جا حطيلهن اكل خطية 

نزلت الجنطة من چتافي ونزعت العباة ومشيت حطيتلهن الاكل وللعصر واحنة گاعدين وطبت علينا عمة عطاء فـزت جدة من مكانها

غضـة : سترك يا ربي شجابج ولج

عطاء : ابني جابني 

زهـرة : جا مو امس مشيتي

عطاء :وانا گتلكم اردن 

اجت گعدت يم جدة 
عطاء : وداعـة ولدي هل مرة ابوي لو غصبني اردن اله الا اشهركم واخزيكم انا يتعنطز عليَّ ويگلي ما رديتج أنتِ اجيتي والله وسفـة 

غضـة : وأنتِ اچتج من الله على الله حتى ترديـن وحچتج وياج 

عطاء : هااا يمة شو مدري شلونه حجيج

غضـة : بعدني ما حاجيه 

عطاء : يعني الج نية تحجين وتلوميني اگومن امشي اشوفن يا شارع يلفيني 

گامت على حيلها اريد تسويها صدگ وتطلع صاحت بيها جدة 
غضـة : خايبة اگعدددي لا اطيح حضج تطنگـرين چن زعطوطة

عطاء : ياا انوبه سويتني زعطوطـة انعم الله عليج يمة هوَ انا هم هذا حضي اتلگـاها منج من أبوي 

غضـة : راح تاكلني بگشوررري دهر الصابج موش مرة تصلين صلي 

گعدت تدردم ويَّ روحها طگتهـا جدة بعوجيتهـا صاحة متوجعـة 
عطاء : اخخخ يمة شبيج وياي هيَ هيج رحمـة الابوج 

غضـة : هيج ونص احجيلي شبيكم 

عطاء : گولي شنو مو بيكم انا اريدن اتطلگ وبعد ما الي رده هناك ماكو احد يحبني لا ابو ولدي عشتـوا ولا اوادمه 

غضـة : والله كل الحگ الهم على سوايتج هذاك اليوم بيهن ما يلامن يكرهنج 

عطاء : يستاهلن يمة حياية الله وكيلج بس انا دواهـن 

غضـة : هـاي انا شمتنسية بيج بطلايب لو بشني 

عطاء : اضن هيج

وبس رد جدي وشافها عيونه صارت بگصتـه گبل لا يحجي وياها أبوي گاله
محمد : اطينا مجـال بوية نفتهم منها الصاير لا تحكم گبل لا تسمع 

رأجس : شصاير يعنـي شوف شحاجيه والرچـال ردها علينا 

عطاء : ما ردني بويـة انا أجيت ابني جابني وبعد ما الي رده هناك 

رأجس : مو بكيفـج 

محمد : احجي خويـة شصاير

عطاء : ترضاها خويـة يگلي أنتِ رديتي انا ما رادج 

محمد : ليش هيج حجـة

عطاء : انا عود ردت اصير زينة وياه بس هوَ مو أدمي احاجيه ما يرد گلتلـه اذا ما تريدني هنا اردن منين ما أجيت چان يگلي انا ما رادج أنتِ اجيتي 

وجـدي سمع هيج لو تخبـل عيونه صارت بگصتـه خله وطلع يتحلف بيه وعمة گعدت متشمته على متشفي گلبها

عطاء : عمـي الگعدة هنا حلوة اليوم فلا احسن بيه يگضي لو طلايب لو نوم 

زهرة : اهم شي تناميـن

عطاء : أي والله 

°هيوفـة°

نزلت اباوع بعيوني ممرود گلبي على حالـه صاير اعصاب وابد ما يتحاجـة ولو سكت حتى لو نحجي وياه ما يرد گاعـد گبالـه فقار حاير شلون يعقم حروقـه انتبهلي واگفـه اباوعلهم بتردد ممـزوج بالحيره گـال 

فقـار : ما تصيحن ضيرم يّجي يعقمـهن

نجوى : وضيرم وين يتذكر يمة

فقـار : هيج امور لا ارادي راح يتقنهن عقلـه الا وعي يوجهه 

نجوى : جا خوش امشي صيحيه عمـة 

_ صار 

رديت للغرفـة وبس فتحت الباب شفتـه صافن بالفراغ
اندار عليَّ واخذله صفنـه بوجهـي گبل لا يگول
ضيرم : صخـر صاحبي

فـززن گلبي بلهفـة بعدم تصديق حجاياته مشيت بساع يمه ارد على سؤالـه
_ أي صاحب عمرك صخر اخوي 

طال سكوتـه ما چن متذكـر غير اسمـه حاولت ما اخلي يتعب اكثر وگلتلـه 
_ ما تنزل تساعد فقار يعقم حروق عزيز 

ضيرم : بس ما اعـارف

_ ميخالف بس ساعده لان ما يگدر وحده خطية 

بين التردد والقبول راد يگول لا بس گـام وياي ونزلنه انا وياه سوا وبس شافنه فقـار تدنـه يسويله مكـان گبال عزيز گعد ضايع يباوع بوجهه وشوي شويَ بدأ يتذكر 
ضيرم : اطيني شاش أول شي لازم ينشال الدهـن القديم 

أبتسمت مبين بدا يتذكر شويَ شويَ هوَ وفقار كملوا كلشي وزادت فرحتي من صار يسولف ويَّ عزيـز

حـواري : هـاي شنو منو منورنـا الثگيـل ضيرم زوج الريشـة 

خرزتها اريدها تكست حتى يضل متفاعـل ويَّ عزيز بس هوَ انسحب ورد صعد فوگ وانا ما اصدگ يتأقلم ويانة گمتلها 

_ لو اكضج انعنع ضلوعج هم ما يرتـاح گلبي هيَ هاي سوايـة يعني ما تگدرين تكضين لسانـج

حـواري : لا والله ابد فلا اگـدر اعذريني هـاج سيف متبرعـة بيه مني الج

حطت سيف بحضني وشردت للغرفـة لحگتها چانت متمدده 
_ شني شو شمرتيـه عليَّ واجيتي تنامين 

حـواري : نعسااانة بطلت ما اريدن اصير أم ردوهم 

_ وين نردهم 

حـواري : الابوهم عشتوااا 

_ جا حوراء وين 

حـواري : عـد خالتها تلگيهن بالديوانية هواي تلعي موتتني شمرتها 

_ شو تشمرين بجهالج أنتِ 

حـواري : بس انام اردنهـم 

ضحكت وطفيت الضوة عليها وطلعت تلاشت ضحكتي من شفت عمـة گاعدة وتمسح عيونها مبين باچية وما تريد احد ينتبه عليها گعدت گبالها

_ شبيج عمة ليش تبچيـن

نجوى : شلون ما ابجي وانا يوميا صاير شي بواحد من ولدي واحد ذاكرته فقدها والثاني تشوهـه والثالث فاگـد عيونه 

_ كلشي صار قدر مكتوب من رب العالمين بس ادعيلهم والايام كفيلـه تغير كلشي ما يضل الحال مثل ما هوَ

نجوى : دوم ادعيلهم بس ما جـاي اشوفـن غير التعب مسير عليهم 

_ ضلي ادعيلهم ويجوز بيوم من الايام باب سما ربج مفتوحة ويسمع دعائج

نجوى : الله يسمـع منج

_ أن شاء الله 

طبت ريحانة شايلة حوراء نايمة مشت ودتها للغرفة وردت تباوع على سيف بأيدي 
ريحانـة : اليوم حورية متبرية من جهالها 

_ لان ما نايمة طگن فيوزاتها كلش 

ريحانـة : حگهـا ،تنوم واحد الثاني يگعد وضالـه هيج وكلساع وگالت انا شورطني وعود انا وياها والله فلا اعوفنهـا 

_ نفسيتها تعبانـة هل هيج تحجي 

نجوى : هـاي ضوجتها كلها علمود حق بس بتـي واعارفها زين جاي تكابر 

ريحانـة : ما تـلام يمة ترا هوَ خلاها بأصعب ايامها بس بنفس الوكت انا ما اريدن زعلهم يطول أكثــر بس بعد براحتها 

نجوى : شبيدنا عليهم يا يمة الله يهديهم بيناتهم جهال 

اطيت سيف لريحانة من سمعت صوت ضيرم يصيحني بس طبيت گـال 
ضيرم : رأسي بساع اطيني حباية وجع رأس 

كاض رأسـه بقوة فتحت المجر مخبوصـة اطيتـه وحده من الشريط وصبيتله بالگلاص مـن دولكــة الماي اخذهن مني شرب وتمدد بساع مغطي عيونه ضليت اباوعله مقهورة صاؤ فترة مو قليلة 
رأسه هيج يوجعـه بس ما بيهم واحد فارغ وياخذه الطلايب رگع وحدة فوگ الثانية ما مطياتنة مجـال حتى نرتـاح

نزلت حجيت العمـة گالت تحاجي فقار ياخذه وصدگ للعصر اخذوه صخر وفقار ومن ردوا چنت واگفتلهم بالحوش طبوا بس اول مرة اشوفن 
الابتسامة على وجـه أخوي ضليت اباوع مستغربـة وسألت 

_ شبيـه ضيرم

تقدم وگف گبالي 
صخـر : كلشي ما بيه 

_ جا والوجع البراسـه

صخـر : جـاي يستعيد ذاكرتـه

نشغت
_ عليك الله

صخـر : اسألي فقـار

احس الدنيا كلها بهل لحظة مو گد فرحتي روحي ردتلي بهذا الخبر وبديت اتأمل خير ويوم عن يوم صار يتذكر تفاصيل بسيطة ومرات حتى حجايـات إلى أن بيوم من الايام چنت گاعدة اني وياه نباوع على مسلسل حتى ما اخليه يحس بالملل گـال
ضيرم : مرتضى منو مرتضى هيفـاء

درتلـه بايدي الريمون نصيت التفزيون 
_ ليش

ضيرم : تردد ببالي هل اسم وحسيت اعرفـه

_ ما عدنـا واحد هنا اسمه مرتضى

سكت من جاوبته ورد يباوع تمددت ضهـري يوجعني وابتسمت من رفعني يحط رأسي على رجليه المادها شي بسيط بس كفيل يخليني اسبوع ليگدام فرحانة 

°بركـة°

حاطـة ايدي على خدي واباوع حايرة شلون اهـون على امي بجيها يوميا على طول هالفترة يزيـد ما يقل وبكل مرة يصعد ضغطها الا تسكت مثل ما صار هسة 

گمت اطيها دواها والومنها 
_ هيج هيَ يوميا يمة ناوية على روحج لو شني 

شيماء : ما تحسون بنار گلبي ولا احد بيكم يعـارف شجاي يصير بيَّ مفارگـة واحد من اولادي انا 

_ يرد يمة 

شيماء : شيرد تضحكـون عليَّ والدم وهـاي الفترة كلها لو عايش چان ردلي وما ضليت هيج مفرفحـة على شوفتـه 

سكتت ما اريد استوعب كلامها ولا اگدر ارد اطيتها حباية الضغط وگلاص الماي رديت گعـدت صافنـة وطب برهـان سلم وسأل 

برهـان : شكو شبيها امي

_ صعد ضغطهـا اجـه عليك صخر گـال من يّجي يريدك تمرلـه 

برهـان : ما گـال شيريد

_ لا والله 

شيماء : چنت يم بيت كاظم مو

برهـان : أي 

راد يطلع وصاحت وراه 
شيماء : ضل يا رايح يا راد تتغاضى حتى عن خسارة اخوك لخاطر عشگـك المستحيل 

وگف بمكانـة واندار 
برهـان : ليش مستحيـل يمـة

شيماء : ما اخليك تاخذها حفيدة غـازي من بتـه ما تدوس بيتي 

برهـان : اهاا 

شيماء : وداعتكم 

برهـان : أي هاي هيَ بكيفـج

بكل برود رد وخله وطلع صفنت عليها ما مصدگـة هذا الحجي يطلع منها 
_ ليش هيج حجيتي ويـاه يمـة

شيماء : جا بعد كلشي صار ترديني اخليها تدوس بيتي 

_ بس هيَ شدخلها 

شيماء : امها بت غـازي 

_ وحتى لو ثنينهن بكلشي صار مالهن ايد عليش تحمليهن ذنب 

شيماء : خوب طبيتيلهم مرة صرتي المدافع الهن 

_ لا والله مو مدافع بس جاي احجي الحگ 

ما ردت عليَّ وخلت وگـامت لبست عباتهـا المعلگـة مشيت وراها اسأل 
_ وين يمة شو ماشية وحدج

شيماء : لبيت عمج باقر اشوفن جهال اخوج

طلعت وخلتي وراها و ويَّ طلعتها طب حق سألني 
عبد الحق : وين ماشية أمي

_ لبيت عمي باقـر توصلني الهم

عبد الحق : ميخالف 

وصلني وكل ضني راح يمشي بس گال يريد يشوف الجهال فتح باب الديوانية وطب وانا طبيت يمهم جوا سلمت وگلت لعمة 

_ حق بالديوانية ويريد يشوف الجهال 

نجوى : هلا بيه جا ما يطب 

شيماء : لا هسة هم يتعاركون خليه احسن 

نجوى : بعد بكيفكم ،يمة ريحانة اخذيله الجهال
بلاية ما ترد مشت للغرفة وانا وراها فتحت الباب جانت حواري والجهال نايمين وبس شغلت الضوه فزت هيَ تباوعلنه والنعاس بعيونها 

ريحانـة : راح اخذ الجهال ابوهم يريد يشوفهـم

هزت ايدها 
حواري : عشتوا ابوهم

_ شو بالوجوه تحجين ولج 

حواري : ومنو أنتِ حتى ما احجي بوجهج 

_ غير اختـه 

حواري : بس بت عمي 

_ صح غلبتيني

دارت وجهه على الحايط تكمل نومتها وريحانة طلعناهم گبل لا نوديهم للديوانية صاحتلنه امي 

شيماء : شو اوگفن اشوفنهم 

دنگت ريحانة اطتها سيف بأيدها وانا ضليت شايلة حوراء منا لمن سمعنا صوتـه يصيح بأسمي خلينـا ومشينالـه وبس شافهم بأيدنه گـام على حيله 
اخذ حوراء مني ويباوع لسيف مشى گعد حاطها بحضنه وگـال لريحانة  ... 


شكرا لزيارتكم عالم روايات سكيرهوم

تعليقات