رواية فصلية بديلة ( شموخ ) الجزء الثاني الفصل الثامن والاربعون 48 بقلم ام ملكوت

:-بعدما استلمنه النتيجه ونزلنه اخذنه راهب تدريب من كل نوع ربع ساعه كختاميه تالي مر اليوم مو مثل العاده وانما التهينه نشتغل ونعدل بالدائره ونرتب بيهه ويه العاملين ونطلع كراسي بره وندخل طاولات جوه ونزين المكان

لاستقبال الوزير وطبعا احسان وياي وياي بكل خطوه يساعدني وراهب بكل مره التفت عليه اشوفه خازره لاحسان وشاد قبضه ايده بغضب

premium

حسيته غار منه لان مرافكني لا وانما متاكده من غيرته لهذا السبب صرت اتعمد اطلب من احسان يساعد زميلاتي حتى يبتعد عني ويتكفى شره

لراهب منا لخلص الدوام تركنه بقيه الشغل للعاملين ورجعنه احنه كلمن لبيته بعدما اخذنه الزي العسكري .. وبالطريق كلت لبابا يمر بيه لابو الكوي

انطيته البدله يغسلهه غسله معدله ويكويهه وبليل يجي سلام ياخذهه منه عاد حاسبته مقدما مثلما متعود علي ورحنه للبيت نزلنه وانه فرحتي

مامطيتهه لاحد بشرت اهلي ووريتهن النتيجه مالتي وحيل فرحوا بيهه باركولي همه الكل وصدمني بابا لمن دك صدره ووعدني بسياره

احلامي لو بديت استلم شغلي ونجحت باول قضيه الي وفعلا ثاني يوم سوينه حفله تكريم وتقدم الوزير النه لبسنه الشارات بالزي العسكري

ودكيناله تحيه ورجعنه لاماكنه القى علينه هوه والعميد وبقيه المحققين خطابات قصيره والجو مولع حماس وشغف لحدما كمل حفل التكريم وانه

عايفه الكل وعيوني ضايعه بتفاصيل راهب ووكفته وهوه مطبك اديه وره ضهره ورافع راسه بثقه وعاكد الحواجب بجديه .. جريت حسره

وبقيت صافنه بي حتى املي عيوني منه واشبعهه بلكي تصبر على فراكه منا ورايح .. بلعت غصتي وعيوني جمرت مادري شلون راح اكدر اعيش بدون

شوفته بس ميخالف لازم اقوي كلبي واعوده على فراكه وهاي نظراتي اله هسه راح تخليني اشتاقله اكثر من ما تشبعني وتصبرني .. درت عيني عنه وصفنت

بالفراغ كلهه دقايق معدوده خلص الحفل وكل الموظفين رجعوا لشغلهم ومهامهم واحنه انطونه هل نص يوم عطله حتى نكضي ويه عوائلنه وهذا

يلي صار رجعنه للبيت احنه الكل وانه جانوا اهلي محضرين نفسهم ماعرف شسالفه سالتهم وكالوا راح نطلع لمدينه الالعاب نتونس عاد وافقتهم وردت

اروح ابدل ملابسي بس ماقبلوا واصروا اروح وياهم بالزي مالتي وركبوني بالسياره وهمه متجاهلين رفضي القاطع.. كلهه دقايق وصلنه

للمدينه ونزلنه سويه دخلنه واشوفهم كل واحد منزل وياه علاكه جبيره وكراتين بقيت اباوع بتساؤل وانه اشوفهم يفتحون بالعلاليك ويطلعون

منهه الكيك والعصاير والحلويات والنفاخ واخيرا الكيكه الجبيره يلي صايره على شكل زي عسكري وايقنت انهم مسويلي حفله خاصه ابتسمت

وعيوني دمعت لمن اجه بابا باركلي واخذني لحضنه لا اراديا بجيت وانه منا شلون جنت رايدتلي حجه حتى ابجي .. المهم بقه يطبطب على

ضهري ويضحك علي لان ابجي مثل الجهال صرت كدام الكل ضحكت على ضحكه وابتعدت امسح بدموعي وكفت انه وياه وامي بالوسطه لزمت

السجين وهمه لزموا ايدي وكصيت الكيكه بقوا اخواني يصوفرون والبنات تصفك اخذت قطعه كيك وكلت منهه لابوي وامي واكلت الباقي منهه

وانطيت السجين لامي استلمت الكيك تكص قطع وتنطي لكل واحد صحنه وعصيره كعدت انه عل

كرسي يم بابا وزفرت براحه لمن خله ايده على كتفي وباوعلي وعيونه تلمع فخر ومبتسم .. ميلت راسي على كتفه وكتله بتنهديه..

_شكرا بابا حبيبي فضلكم ماراح انساه طول عمري السويتوه وياي انتو ماظن اكو اهل بالدنيا تسوي لبناتهه 

_هذا واجبي الكلفني بي ربي وكلبي اتجاهج لا تشكريني على شي يابويه وانه كل الاريده بهاي الدنيا ان تكونين بخير انتي وبنتج وتعيشين بسلام ومتماسكه ويه اخوانج

_ربي يحفضك ويطول بعمرك ولا يحرمنه منك يروحي انته وخيمتي 

_يبعد بيتي ويحفضج الي بنيتي..

ابتسمت ورجعت سانده راسي على كتفه فتره وكملوا اكل وكمنه تطشرنه بالمدينه شي تتمشى وشي تلعب وشي كاعده تسولف وانه من ضمن اليتمشون طبعا ..

اجه يمي سلام وهوه شايل ريانه وبقينه نسولف على الشغل والدنيا ومن تالي سولفلي عن حبه لنوره وتفاجاات من وكف كبالي وكال بتردد ..

_احم شموخ انه ونوره كاعد نتواصل 

_شنوو هاي من يمته ولك

_بعدما اعترفتلهه بعرس احسان باسبوعين اخذت رقمهه من نقالج بدون ماتدرين وحاجيتهه يعني تقريبا صار ٤ اشهر

_اشو مادري ولك وشلون تراسلهه وتتواصل وياهه وانتو مابينكم شي رسمي مايصير ياسلام

_ماكدرت خويه بعدي عنهه واشتياقي الهه هوه يلي جبرني اسوي شي مارضاه على نفسي واختي 

_وشنو جان رد فعلهه من راسلتهه

_كالعاده اكلتني بلسانهه وترزلت ذيج الرزاله بس عسل على كلبي و ربج 

_هههه وتالي

_علت كلبي اسبوع وانه العب وياهه فاره وبزون لحدما طكت روحهه وسالتني شريد من الاخر وكتلهه اريدج حلالي ونصيبي لو تقبلين 

_لا بربك

_ههه اي والله جبتهه من الاخر وهيج كتلهه اشو ام كفشه بقت تضحك علي تكلي عفت الحلوات كلهه اجيت علي انه الزركه 

_منيلهه زركه عمي بسماري هيه 

_عند روحهه زركه مدري تريد تشردني المهم اخذتهه على كد تفكيرهه وماخليتلهه حجه كتلهه قابل بيج وحابج على زراكج

_هههه شلون ثنين خرب شرفكم

_ههه جا شسوي نوب تكلي انه اريد اكمل واريد اصير دكتوره وعندي زملائي واحجي واسولف ويه العالم وابقى ليالي مناوبه بالمستشفى انته عندك عادي هل اشياء تصير 

_والله ذكيه خلت كل العراقيل كدامك حتى ماتكول ماكتيلي بالاخر

_اي لوتيه ام كفشه بس اخوج هم مو سهل

_ههه ادريك وتالي وين صفت

_حلفتلهه بالقرآن الكريم اني حابهه ورايدهه حلالي وكل هل حجج والعراقيل ماتوكف بوجهي وبس تكمل سادس اذا حابه اتقدملهه ونعقد ويمته مادبر وظيفه نتزوج على راحتنه كالت انطيني شهر افكر 

_واخذت شهر كامل ها

_لا افا عليج انه اصبر شهر وره اسبوع رجعت احاجيهه ذلتني ياخويه ياله كالت موافقه بس ميخالف هيه تمون عل عين نوب تكلي ماريد

نتراسل ونتواصل عود من اخلص السنه نلتقي كتلهه اتواصل وياج علمود ادرسج الاشياء الماتفهميهه ياله وافقت نتواصل 

_على مصلحه يعني

_اي والله بس ميخالف انه هم اراسلهه على مصلحه صرت اكدر اسمع صوتهه وسوالفهه مال عجايز قبل لا انام وهيه تستفاد من ذكاءي الدراسي 

_هههه مخابيل بس اشو ما حظيت بيكم ولا حسيت بيناتكم شي لمن تلتقون 

_صرت اتفاده اباوعلهه بوجودكم بس بالبوكات وهيه الشرنفص تضل تخزر بيه ماعاجبهه 

_هههه لا بربك 

_اي والله نوب اكلهه ليش اباوعلج بحب وانتي تخزرين تنب علي تكلي احسن حتى محد يعرف بينه 

_ههه ذكيه عود ماشاءالله عليهه

_اي والله الله يعين المرضى شلون راح تعالجهم 

_الله يسهللهه ويوفقهه بتعليمهه خطيه لا تلهيهه عن دراستهه وحاول شما تكدر تساعدهه بالدراسه حتى تحقق حلمهه 

_اي اكيد جا شلون غير انه فرحان بيهه ومنتظرهه تطلع طبيه اكثر من يوم لم شملنه 

_ههه انشاءلله ربي يحقق حلمهه و يحفظكم لبعضكم ويتمملكم على خير 

_تسلمين يبعد روحي انتي ويوفقج بشغلج يارب 

_امين حبيبي ..

ابتسمت واستمرينه نتمشى و يحجيلي عنهه بقيت اضحك عليه وهوه يقلدهه من تتشرط وتتخوصرله وتمد لسانهه عليه جنهه عجوز وعلى كولته من تخزره يرجف

كلبه عبالك امه واكفه على راسه وتتشرط مو بنيه بعمر ال١٨ ابتسمت وانه اشوف عيونه تلمع من يجيب

طاري اسمهه ويتذكر سوالفهه حسيته فعلا يحبهه من كلبه وضايع بسوالفهه وتصرفاتهه تنهدت

وتمنيت تصير من نصيبه ومايواجهون صعوبات الدنيا الواجهناهه انه وجنان وتعذبنه بيهه ..

كملنه سوالف ومر الوقت كلش حلو ورجعنه لبيتنه بعد ٤ ساعات من الونسه والاحتفال دخلنه للبيت وبوجهي لغرفتي نزعت الملابس العسكريه خليتهم

بجنطتهن وخليته على جهه اودي بيد سلام بعدين يودي للكاويه ودخلت للحمام سبحت ونشفت وطلعت لبست ترواكه خليت مكياج خفيف مشطت

شعري ووكفت صليت المغرب والعشا بعدما سمعت الاذان وطلعت يم اهلي اجتلي ريانتي تركض اخذتهه لحضني وبقيت واكفه واسمعلهم وهمه

يسولفون عن جماعه بابا يلي وياهم بالمزرعه ان صابتهم كورونا وابوي شك عنده كورونا لان صخن

الصبح وصارت عنده كحه خفيفه لزمت كلبي واجيت عليه تلمست جبيته شفت حرارته مرتفعه وهوه بعد ايدي وكال ..

_لا بويه شموخ لا تلزميني لا يطلع بيه كورونا وترحين بيهه انتي وبنتج يمعوده 

_اسم الله عليك بابا لا تحجي هيج مابيك شي انشاءالله روح للمستشفى سوي مسحه حتى اذا لا سمح الله بيك تلحك على نفسك بالادويه والفيتامينات 

_اي هوه هيج قررت باجر الصبح انشاءالله ياخذني محمد للمستشفى اخذ مسحه واشوف روحي 

_اي انشاءالله مابيك الا العافيه حبيبي 

_بعد بيتي بنيتي باجر اول يوم الج كمحققه هاا 

_ههه اي انشاءالله بابا 

_شدي حيلج يبويه تعبتي سنين واجه الوقت يلي لازم تحصدين بي ثمار تعبج بس لا تتهاونين وتبردين تره شغلج الجاي يرادله تعب وتركيز وبال صافي اكثر من قبل 

_انشاءالله بابا حبيبي لا توصي حريص 

_الله يوفقج يابويه واشوفج احسن محققه بالدائره

_تسلم ينظر عيني انته الله يحفضك ويديمك خيمه على راسنه 

_ويديمكم حوالي بخير بنيتي ..

ابتسمت ورحت للمطبخ اساعد امي وعبير بالعشه لحدما كمله صبينه الاكل بالصاله والتمينه كلنه سويه ناكل عدا سلام طلع اولما رجعنه لعرس

صديقه معزوم .. كعدنه نتعشه ونسولف تالي كمت غسلت ماعين وعبير مسحت الارضيه بالصاله وعطرتهه كملنه كلشي واحذت ريانتي ودخلت

للغرفه حضرت ملابسي لباجر لازم اطلع كشخه وهيبه بما اني صرت محققه عن حق .. طلعتلي طقم قهوائي وكعب وشال اسود وجنطه مطقمه

باللونين طلعت شارتي صفنت اتامل بجمالهه واحس كل زخرفه بيهه ترسملي طريقي بالمستقبل رغم كل الزخرفه متعرجه الا ان نيتي وشغلي راح

يكون بيهه مستقيم .. علكتهه بجيب الستره وكملت تجهيز ملابسي اجيت اخذت ريانتي دخلتهه للحمام سبحتهه وهيه تدردم باسماء الالوان

بالانكليزي نشفتهه وطلعت لبستهه ملابسهه وكعدت وراهه امشط شعرهه فجاتا التفتت علي باوعتلي صافنه وهيه ترمش بعيونهه ببراءه عكدت

حواجبي باستغراب شبيهه هناك ووضح صوت سلام بالبيت وفتحت عيونهه بفرح وكالت بلهفه وهيه تاشر عل باب ..

_بابي سوسو 

_بابي سلام اجه 

_اي 

_يمه اروح فدوا لهل لسان خلي امشطلج بسرعه حتى نروح لبابا سوسو ماشي 

_اي بثرعه بثرعه ..

دارت شعرهه الي وكملت تمشيطهه وانه اضحك عليهه خليتلهه قراصاتهه وحضنتهه بستهه وشميتهه وهيه تحاول تخلص روحهه مني حتى تروح بره ماحس الا ودخل سلام علينه بعدما دك الباب وهوه بملابس

الطلعه بعده باوعتله وثنينهم فتحوا اديهم لبعضهم خلت ونزلت راحتله تركض بدهداشتهه الكلوشه المسويتهه جنهه فراشه نزل اخذهه من الكاع فراهه

وهوه رافعهه باديه وهيه تضحك نزلهه لحضنه بوسهه و تكزكزت من شواربه وضحكت وهوه عل عناد رجع يبززهه بيهن لحدما عكدت حواجبهه

متضايقه ومعصبه ضربته على حلكه خفيف وهوه تصنع الالم وبرطم عود يبجي  هيه شافته هيج لو تخبلت بقت تمسح بخدوده وهيه تكله لا لا تبجي

باسته بحلكه مكان الطكه وهوه شهك بشوغه وصارت تضحك.. ضحكت عليهم وانه عيوني مدمعه بحيره وانه اشوفهه شلون ركضتله متلهفه

ومشتاقتله بس لان طلع ساعتين من البيت ورجع يارب كون يبقى هيج وياهه طول العمر ويعاملهه مثل بنته ومايتغير عليهه لمن يتزوج ويصيرون

عنده اطفال .. اخذهه وراح لغرفته يبدل وهوه يبوس ويشمشم بيهه مثل عادته تنهدت وكمت طلعت يمهم كعدنه بالصاله لل١٠ نباوع تلفزيون

وريانه نامت بحضني خدرت رجلي منهه وكمت شايلتهه وياي ترخصت من اهلي وفتت لغرفتي خليتهه بجربايتهه ونمت بجربايتي نايمه للصبح ..

ثاني يوم كعدت بدلت ملابس الدوام لبست جنطي والكعب لزمت الشاره بيد وريانتي بيد وطلعنه

لاكاني ابوي بالصاله ابتسملي صبحت عليه ورحت وانه بيدي الشاره وكدامهم كتله ..

_كل هل تعب والسنين الكضيتهه بطريق حلمي ماكدرت اكملهه واتخطه مصاعبهه لو ما ربي وانتو

موجودين وياي وواكفين بضهري واليوم اول الي كمحققه وبيدي شاره حقيقيه واريد تلبسنياهه بيدك

حتى اتبارك باول خطواتي لمحصول تعبي وثمار سنيني اريد بيدك تجهزلي كشختي بشارتي حتى امشي على خطاك واكون قدوه لغيري 

_خادم انه وسنيني وتعبي فدى لعيونج دفعته ومستعد ادفع باقي عمري حتى اشوفج واخوانج

بخير وتتقدمون بنجاح بالحياة وتتوفقون بمستقبلكم وتكونون قدوه لغيركم 

_الله يحفضك النه ويديمك يخيمتنه ..

ابتسم واخذ الشاره من ايدي دنبسهه بالستره وباس راسي نزلت على ايده ردت ابوسهه وسحبهه مني حاضني لصدره غمضت عيوني اتامل بدفو حضنه

واخذ طاقه منه ابتعدت اخذت نفس وطبطب محمد على كتفي وهوه يكول..

_رفعي راسنه شموخنه خليني اتباهه بيج كدام مريتي وناسي وخلي جهالي يكولون بالمستقبل ان عمتهم ملازم تحقيق واحسن محققه بالدنيا 

_يبعد حيلي تامر انته يا سندنه بعد الله وابونه ..

ابتسم وحضنته يطبطب على ضهري ابتعدت ورحت حضنت امي ودعتلي بالتوفيق بستهه براسهه وطلعت انه وسلام للكراج ركبنه بالسياره

واخذني للشغل كلهه نص ساعه وصلنه ونزلني بالباب تمنالي التوفيق ونزلت وكفت بالباب اخذت نفس ودخلت اجت عيني لا اراديا على مكان مكتب

راهب وفريقه وعكدت حواجبي وبهتت ابتسامتي لمن مالكيت احد منهم موجود بالمكان بلعت ريجي بصعوبه واستوعبت الصاير لمن اجو العمال شالوا

كراسي ومكاتب فريقه من المكان .. عفتهم وصعدت بالمصعد وانه روحي خاويه وكلبي حاوطه

وجع غريب انفتح باب المصعد ولاكيت المحقق ساهر تحمحمت ورحت صبحت عليه وسالته ..

_سيدي بس سؤال 

_اي تفضلي يابنتي 

_المحقق راهب ماجاي اليوم شنو عندي دفتر ملاحظاته ولازم انطي اله 

_ليش ماتدرون ان المحقق راهب سلم شغله البارحه بعد الحفل واليوم اعتقد لو باجر رح يرجع لمحافظته ودائرته 

_هاا شكرا سيدي 

_ولو العفو ..

ابتسمت بزيف ورحت لمكتبي وانه ضايعه يعني خلاص راح هيج هانت عليه الشغله وراح بدون مايشوفني لو يودعني حتى وكأن ماجان بيناتنه

مشاعر ولا صداقه راح وهوه حارمني من اخر مره اشوفه بيهه .. تذكرت البارحه وصفناتي بي خلال الاحتفال انعصر كلبي وكعدت عل كرسي بتثاقل

وانه مدركه ان البارحه نظراتي يلي تشردت بيهن عنه جانت اخر نظرات بيناتنه واخر مره اشوفه بيهه .. خليت ايدي على راسي وانه ساندتهن عل ميز

وغمضت عيوني مانعه دموعي من ان تنزل شكدما جنت فرحانه ومتحمسه لليوم الا ان روحه راهب بهل طريقه دمرت كلشي بعيني وكسرت

فرحتي رغم البارحه حسبت حساب لهل لحظه وان كلشي انتهى وكلمن راح يبتعد ويمشي بطريقه بس ماحسبت ان تجي الفركه بهل سرعه

ويروح من دون وداع حسبت راح اشوفه اليوم واشبع عيوني بشوفته قبلما انحرم منه بس لا ماصار يلي توقعته..

وروحته بهل شكل كسرت خاطري وواهسي باول يوم الي كمحققه ردته يشوفني وانه شارتي على بصدري ردته هوه ياخذني ويدليني على مكتبي

الجديد ردته هوه اول شخص بالدائره يشوف كشختي ويباركلي باول يوم الي باستلام شغلي تمنيت لو جان موجود واصبح بوجهه ويشوف

نتيجه تعبه كل هل عام كباله .. بوسط ضيقه صدري وزعلي وافكاري تراود لاذني صوت راهب

وهوه يحجي ويانه كيفت ورفعت راسي بلهفه عل باب بس شفته ضابط من الضباط المساعدين

بهتت ابتسامتي وكمنه دكيناله تحيه وكال موجه كلامه الي ولزملائي الطلعوا من الاوائل..

_الكل موجود 

_اي نعم سيدي

_راح اصيح باسماءكم وانطيكم رقم مكتب كل واحد بيكم الجهزناه اله بالطابق الاول 

_تمام سيدي..

وكف صار يصيح باسماءنه وينطي رقم المكتب لكل واحد بينه لحدما وصلي وكال رقم مكتبي رفعت راسي باوعتله بصدمه وتساؤل وكتله وانه اتقدم اخذ المفتاح..

_بس سيدي هذا مو مكتب المحقق راهب 

_اي نعم 

_بس ليش انه بالذات 

_لان هوه وصاني انطيج مكتبه بعدما يروح لان شاف هل مكتب مناسب الج 

_تمام سيدي شكرا 

_العفو ..

اخذت المفتاح بايد وكلب يرجف وطلعت وانه صافنه بي ليش انطاني مكتبه ليش سوه هيج ووصه الضابط علي بدون مايدير بال للاشاعات يلي

ممكن يطلعهه علينه معقوله هيج يثق بي حتى يوصي علي ويامنه على البيناتنه .. نزلت من المصعد وصار المكتب مقابيلي صفنت بي ومشت

خطواتي متردده وترجف وقبلما اوصل فززني صوت احسان وهوه ينده باسمي التفتت عليه واجه تقدم علي وهوه عاكد حواجبه باستغراب..

_هااا محققتنه وين نازله هنا 

_هاا احم مو مكتبي هنا خلو الي 

_شنو رقمه بله ..

نزل عينه عل مفتاح شاف الرقم المرسوم بالمداليه ورفع حواجبه بتفاجئ باوعلي وباوع لمكتب راهب وكال بترقب..

_راح تاخذين مكتب راهب 

_احم اي الضابط انطانياه لان موصي هوه 

_ورح تكدرين تدخلين وتشتغلين بنفس مكانه ..

باوعتله بحيره ونزلت انظاري عل مفتاح وانه اهز برجلي بتوتر مادري شسوي هسه وشلون راح اكدر ادخل لمكتبه وهوه يحوي بكل زاويه من زوايا على

ريحه راهب وطيفه اختنكت والغصه حاوطتني لمن عفت احسان وتوجهت للمكتب لزمت يده الباب فتحت القفل ودخلت وكفخ وجهي ريحه عطره

بالمكان باوعت بارجاءه وشفته ماخذ نص اشياءه ومبقي نصهن توجهت لميز مكتبه تلمست الساعه الرمليه يلي عليهه بصماته التبعث لروحي الدفو

والسلام باوعت للكومدي وجان ناسي جاكيته الجلد السوده بيهه رجف كلبي واخذتني رجلي ملهوفه عليهه اخذتهه بتردد وقربتهه من وجهي

استنشقت عطره المختلط بريحه جسمه ونزلت دمعتي مجمره على خدي بلعت غصتي كوه ونزعت سترتي ولبست جاكيته وانه احس بدفو صدره 

و ضهره يلي احتواه هل جاكيت تخيلت نفسي بحضنه وحضنت روحي بيهه ثواني وفتحت عيوني نزعتهه بستهه وشميتهه حيل ورجعتهه لمكانهه وخليت

سترتي بصفهه باوعتلهن متامله بيهن وجريت حسره وعدته بكلبي اكون كد ثقته وكد وجودي بمكتبه واشتغل بكل صدق وامانه .. 

سديت الكومدي ورحت على كارتون شغلاتي خليته عل ميز وفتحته صرت اطلع وارتبهن عل ميز خليت صوره صغيره الي ويه ابوي وامي بحفله

البارحه وخليتهه عل ميز طلعت ساعتي الرمليه وباوعت لساعه راهب ابتسمت ورجعت ساعتي للكارتونه طلعت كتبي الادبيه ردت اخليهه على ميز

المكتبه وشفت بعض من كتبه موجوده عليهه عاد خليت بصفهن بس الاحبهن ودائما اقراهن التفتت على اللوحه الخشبيه وشفتهه فارغه وفقط

ملاحضات ملونه عليهه عكدت حواجبي باستغراب وتلفتت بالمكتب وانه اشوف شغلاتي اختلطن ويه شغلاته وعبالك المكتب صار مزدوج مو متفرد

مادري ليش وشنو نيته من بقى اغلب شغلاته بالمكتب ماعرف مايريدهن ماعرف ناسيهن ماعرف قصدا سوه هيج حتى ابقى افكر بي ووين مالتفت

الكاله جزء ووجود بمكتبي وحوالي .. تنهدت بحيره ورحت كملت ترتيب بقيه شغلاتي وشغلاته عفتهن على حطتهن بس رتبتهم ومسحت الميز

والكتب بقطعه قماش مبلله من التراب اجيت فتحت الستاره وفتحت الشباج المطل عل حديقه خليت الهوى يداور بالمكتب وشغلت كل الاضاءه

الموجوده حتى صار المكتب منور ويبعث راحه وطمأنينه للنفس والروح .. ابتسمت ورحت للكرسي صفنت بي ثواني وانه اتذكره لمن يكعد هنا ويطبك

اصابيعه يستمع للمقابيل رفعت ايدي تلمست محبسه باصابعي وكعدت بمكاني بقيت اكلب

بملفاته المخليهن هنااك واجالي اتصال على الارضي رفعته بعدما تحمحمت ورديت..

_الو مرحبا المحقق راهب وياي 

_ اهلين مراحب لا للاسف المحقق راهب رجع لمحافظته لو محتاجه شي انه المحققه شموخ وياج اكدر اساعدج بشي

_اهلين سيده شموخ انه اريد اشتكي على شخص حاول يعتدي علي ويهددني بالقتل وحتى اطلق علي ولولا ستر ربي جان رحت بيهه 

_تمام انطيني معلومات هل شخص واذا تعرفي او لا و راح احول شكوتج هاذي لقسم البحث الجنائي يستلمهه 

_تمام ماعرف منين ابدي بس هيه الشغله كلهه بدت بالجامعه لمن تقدملي زميل وياي ورفضته لان جان اصغر مني بسنتين هوه مرحله اولى وانه مرحله ثالثه وبصراحه جان عندي

شخص معجبه بي انه لهل سبب رفضته وتشردت منه بس هوه صار يتعصب بكل مره يشوفني ويهددني لو تخرجنه ومامنطيته موافقتي يصير

وين مايلكاني يقتلني وتغاضيت عن تهديده وماخذته بجديه اصلا وحتى لمن صار يراقبني من كدام بيتي هم تكتمت عل موضوع لان اهلي كبار

بالعمر وناس فقره وعلى باب الله احنه مو حمل مراكز وشكاوي وهسه انه متصله عليكم بدون علمهم اريد تلقون القبض عليه وتفكوني شره لان

وصلت بي المواصيل ان يطلق علي مباشرتا وانه بين الطلاب كبال باب الجامعه 

_وتالي اجتلكم الشرطه او حاول شخص يشتكي عليه غيرج

_اي قدمنه بلاغ للشرطه ورادوا دليل ملموس يعني تصوير كامرا او اي شي ثاني بس للاسف ماجان

عندي هيج دليل وانه طالبه المساعده منكم اريد انتو تاخذونه وتخلونه يعترف بالسواه 

_تمام انطيني هسه اسمه ورقمه اذا عندج وعنوانه واي شي يخصه

_حاضر .. هوه اسمه براق مرحله ثانيه بجامعه ^^^^ سمعت ان يداوم مسائي بصيدليه ^^^^ بالبصره القديمه قريب عن بيتهم بس ماعرف بالضبط عنوان بيتهم وين ورقمه هوه ••••••• 

_تمام راح احول هل معلومات وانشاءالله خلال كم ساعه همه ملقين القبض عليه 

_اي بس لو سمحتي لا تخلينه يعرف اني مشتكيه عليه وهوه حاليا بالجامعه موجود اذا تردون تعرفون مكانه 

_شلون كدر يداوم وهوه محاول يقتلج بباب الجامعه 

_جان ملثم وحتى بعدما حجيت للمدير وزملائي ان هوه يلي حاول يقتلني ماصدكوني لان ماعرفوا وبسرعه شرد وجنت الوحيده يلي حجه وياهه

وباوع بعيوني لمن اطلق علي وانه اعرفه من طبره حاجبه ومن صوته لمن حجه وكال هاي عقوبه رفضج لتاج راسج 

_تمام انشاءالله دائره  الامن العام راح تاخذ حقج منه والقانون رح يحاسبه على فعايله وياج بس

بالمستقبل اذا ثبتت عليه التهمه وتحول محكمه راح نضطر ندعيج للمحكمه تنطين افادتج وشهادتج 

_هاا بس انه ماريد اجي ماكدر

_هاي الاجراءات القانونيه مانكدر نستغني عنهه 

_بس شلون اذا اهلي عرفوا

_تكدرين تجين ويه شخص من اقاربج للمحكمه بدون علمهم عادي 

_تمام بله احاجي اقاربي واشوف 

_مو تشوفين لازم تحاولين تقنعينه او تقنعين اهلج حتى تحضرين لان وجودج ضروري واذا ماجيتي من ذاتج راح تضطر الحكومه تجي لبيتج تطلب

حضورج وذيج الساعه مو بس اهلج حتى المنطقه وجوارينكم رح يعرفون بالسالفه واكيد انتي ماتردين هيج موضوع يطلع للعلن

_لا خلاص لعد راح احاجي واطلب من اقاربي واذا اضطر الامر اجي ويه صديقتي وحدي 

_التشوفينه بعد بكيفج 

_شكرا الج سيده شموخ

_العفو واجبنا..

سديت الاتصال ورتبت معلوماته يلي انطتهن الي بالملف شغلت الحاسبه وبحثت على رقمه وحساباته طلعتلي صورته طبعتهه وكبستهه بالملف اخذت

عنوان بيته المضبوط كتبته وطبكت الملف كمت اخذته لبست جاكيتي واجت عيني على جاكيت راهب ابتسمت بامتنان وطلعت قفلت المكتب

ورحت لمكتب المحقق ساهر وبيدي الملف دكيت الباب وصاح تفضل دخلت دكيتله تحيه وخليت الملف عل ميز مالته ورجعت اخذت مكاني واكفه بصرامه وكتله ..

_سيدي هذا ملف قضيه استلمتهه قبل شوي عبر اتصال هاتفي خاص بالدائره واجيت سلمتهه الك لانهه من مهام البحث الجنائي اتمنى تتطلع عليهه وتكلي اذا تقبلون هيج قضايا او لا 

_تمام تفضلي كعدي خليني اقره الملف

_حاضر سيدي..

اجيت كعدت عل كرسي وهوه يقره بتفاصيل الملف رفع راسه باعجاب وكال بتساؤل..

_منين كدرتي تجيبين عنوانه المضبوط وصورته

_بحثت عليهم سيدي وطلعتهن هيج علمتونه انتو بفتره تدريبنه

_عفيه عليج اليوم اول يوم وهاي اول قضيه الج رغم مو اختصاصج بس تممتي شغلج على اكمل وجه وجبتي وانه راح استلم هل قضيه واطلع انه وفريقي حتى نسحله لهل خسيس 

_تمام سيدي شكرا الك

_العفو واجبي واختصاصي هذا 

_ محتاج شي سيدي

_لا تكدرين تروحين بس لحظه اريد التلفون الستلمتي منه القضيه تجيبي الي وتاخذين واحد

جديد من الضابط زهير لان هذا تجي عليه الشكاوي للمحقق راهب انتي تلفونج خاص ومكالماتج تختلف عن هل مكالمات 

_تامر سيدي ..

ابتسم واشرلي عل باب منطيني رخصه اروح دكيتله تحيه وطلعت امشي بثبات توجهت لمكتبي اخذت التلفون فلته من الكهرباء وصفنت بي

تلمسته وانه اتامل باحساس راهب بهذاك الوقت لمن جان يلزمه ويرد على شكاوى الناس .. ابتسمت بتعب واخذته وديته للضابط زهير وانطاني واحد

جديد اخذته واجه وياي شكله بالكهرباء لان تركيبته تختلف عن تركيبه هذاك علمني عليه وشلون اسجل بي الرقم الاريده وشلون اتصل

والى اخرى .. حاولت اسجل رقمه واتصلت ورن نقاله ابتسمت بامتنان وتشكرته وهوه رد علي وطلع سديت الباب وراه ورجعت كعدت بقيت اصفن

بالميز الخالي من الملفات شويه واندك الباب صحت تفضل ودخل احسان دك تحيه وهوه عيونه تلمع فرح ودخل ضحكت عليه لان يعرف ماتجوز التحيه للمراة بس كاحترام يسويهه المهم اشرتله عل كرسي وكتله..

_تفضل سيد احسان تفضل 

_تامرين ست شموخ 

_شلون شفتني بله

بالميز الخالي من الملفات شويه واندك الباب صحت تفضل ودخل احسان دك تحيه وهوه عيونه تلمع فرح ودخل ضحكت عليه لان يعرف ماتجوز التحيه للمراة بس كاحترام يسويهه المهم اشرتله عل كرسي وكتله..

_تفضل سيد احسان تفضل 

_محققه توب تخلين حتى المتزوج يطلك

_هاا شهل حجي نوب ولك تره اروح افتن لزهره 

_هههه اتشاقه وياج واصلا هاي عاده بيه اضل امسلت من تزيد دهشتي بيج 

_همم تمام لعد اذا مالك نيه ثانيه

_لا مالي اي نيه الحمدلله تزوجت وسترت على كلبي وروحي من الانحراف

_هههه احسن شي تسوي 

_وينهه الجانت تكره الزواج

_اكرهه بالنسبه الي وللبنات يلي ماعدهن حول ولا قوه مو للزلم واقاربي العزيزين 

_هاا هيج يعني السالفه

_اي ياحساني 

_شني ماكو ملف على مكتبج شو 

_اليوم اول يوم وماكو قضايا 

_استمتعي بهاي الساعات الفارغه راح تشتاقيلهه بعدين سمعت ان المحققين هنا يستلمون باليوم ٣ قضايا اذا مو اكثر بحيث ماتلحكين تحلين الاولى تلكينهم يطالبون بالثانيه 

_انه هم هيج سمعت بعد انه اشد حيلي وانشاءالله اكدر اسيطر عل وضع الا صدك انته شنو حاليا خلصت تدريبك بعد

_اي الاسبوع الجاي اكدر استلم شغلي كضابط مساعد 

_هاا تمام بالتوفيق انشاءالله 

_شكرا بس الشكر مايفيد اريد تحجيلي ويه العميد وتطلبين اكون مساعدج بما اني ابن عمج واحسن

الج من الغريب وانه ماروح اشتغل لشخص ثاني واضيع تعبي عليه وانتي موجوده ومحتاجتني

_همم ماعرف اذا يصير او لا 

_لا يصير كالي الضابط سالم بيوم ان المحققين همه يلي يختارون مساعديهم وان هوه راهب اختاره لان يعرفه واخوه يصير نسيبه ويكدر يثق

بي ويطلعه على اسراره ومهامه لان بهيج امور حساسه لازم تاخذيلج شخص تعرفينه وتثقين بي ان ماراح يفشي بسر او بمعلومات قضيه خاصه للغير 

_هيج طلعت الشغله هنا يعني

_اي هيج ليش انه كتلج تحجين ويه العميد هسه حتى تلحكين علي لان مثلما تعرفين انه خوش

انسان امين وصادق وحليوه وشخصيه فالكل يطلبني اكون مساعده واذا مالحكتي عل حجز يروح نصيبج مني 

_هههه ونعم 

_احجيهه احجيهه لا تزيفين

_هههه لا حشاك ماردت اكولهه اصلا 

_ميخالف جذبي

_ههه الا صدك شلونه شهر العسل انشاءالله تهنيت

_اي حلو بعد اول ايام العرس مزه 

_ههه اي صحيح بس كاعد تلحك على شغلك 

_ماعندي شي كاعد افتر وره الضباط ماتشوفين كتلج اخذيني يمج عل اقل يصيرلي شغل مستقر مابقى بس اقضي اشغال عن البقيه 

_تمام انشاءالله ادخل للعميد احجي وياه واطلب تكون مساعدي بصفتك ابن عمي واعرفك واثق بيك

_تمام اتفقنا يله هسه خلي افلت اكمل شغلي وانتي ارتاحي وابقي انتظري السحله المعدله 

_ههه تمام انشاءالله 

_ادكلج تحيه لو زحمه

_هههه 

_هيه ندري ممنوعه بس كاحترام مستعدين نتجاوز ام القوانين لخاطر هل شموخ..

ضحكت وكام وكف كبالي بثبات ودك تحيه هزيت راسي برضى وكتله يرتاح نزل ايده وحودب ضهره عود تعب هوه ابو حلك خله وطلع

تنهدت بحيره من طلبه وفكرت بي شويه هناك و اجالي اتصال عل ارضي رفعته بسرعه اجالي صوت المحقق ساهر وهوه يكول..

_سيده شموخ تكدرين تجين لمكتبي 

_حاضر سيدي ..

سديت السماعه وكمت لبست سترتي عدلت الشاره اخذت دفتر ملاحظاتي وطلعت رايحه لمكتب

المحقق دكيت الباب ودخلت بعدما سمحلي دكيتله تحيه ورفع راسه انطاني ملف اخذته بيدي وكال..

_هذا اول ملف قضيه حقيقيه الج اريد تشدين حيلج وتصيرين كدهه وترفعين راسي تمام 

_تمام حاضر سيدي

_واذا حليتي هل قضيه خلال يومين راح تكون كل القضايا يلي تجيلي تستلميهه انتي 

_تامر سيدي انشاءالله خلال يومين يكون حل القضيه يمك

_تمام بالتوفيق انشاءالله ..

ابتسمت وخليت الملف جوه ايدي دكيتله تحيه طلعت وانه اكلب بالملف مبتسمه ومتحمسه هذا اول ملف قضيه استلمه هنا ثمار تعبي هنا عداله

وحق هواي ناس لازمتهه بيدي حاليا وانشاءالله لو حليت القضيه راح استلم شغل المحقق ساهر لان هيج الشغل هنا كل محقق بالبحث الجنائي تشترك

وياه محققه بالجنائيات يحلون القضايا سويه وهل شي كل ٥ سنوات يتبدل لمن نترقى لملازم تحقيق

اول .. جريت نفس براحه واجالي احسان باوع للملف وكال بابتسامه على وجهه..

_مبروك على اول سحله بشغلج

_احلى سحله وعلي لو هيج الواحد ينسحل لو يكعد يمسح الارضيه ..

ابتسم على شكلي ورحت لمكتبي كعدت عل كرسي خليت الملف كبالي وفتحته وجان بي صفحتين

معلومات قريب العنوان وجانت قضيه خطف اخذت نفس اهدي بروحي وبديت اقره المعلومات بتمعن وتركيز وجان عباره عن : 

_قضيه رقم 1 _

••ساره امراة متزوجه لديها ٤ اطفال تعمل كمعلمه في احدى المدارس الابتدائيه في البصره تم اختطافها وهي في طريقها للذهاب الى المدرسه

وقد شوهد في كاميرات المراقبه ان الذين اختطفوها كانوا رجلين و٣ نساء منقبين قد اختطفت يوم الاحد في تمام الساعه ال٧ صبحا

وقد مر ٣ ايام على خطفها ولم يجدوا اثرها الى الان .. يذكر ان المعلمه ساره وحسب شهاده المعلمات ومدير المدرسه التي تعمل بها وبشهاده

زوجها واهلها ان ليس لديها اعداء ابدا .. يرجى التحقيق في هذه القضيه وتوضيح الحقيقه من

خلال هذه المعلومات التي سردناها لكم لتتحقق العداله وتعود الضحيه التي هي ام وابنه وزوجه لشخص ما عاجلا ••

قريت بقيه التفاصيل وكلبت للورقه عكدت حواجبي باستغراب همه مو ذاكرين تسجيل كاميرات لعد وينه ليش ماموجود ضمن الملف ..

تنهدت بحيره ورحت ادور على موقع الخطف وشفته قريب من المدرسه تمام وقريب عل جامع يعني لازم هسه اسحب التسجيلين حتى اعرف

المضموم بيهن .. هزيت راسي بايجابيه ورفعت التلفون اتصلت باحسان واجالي دك تحيه ورفعت راسي كتله..

_انت مو تريد تصير مساعدي

_اي اكيد

_لعد اعتبر اليوم اول مهمه الك وياي 

_تمام امري شنو المطلوب مني هسه

_المطلوب تروح تشغلي سيارتك حتى نروح للمدرسه يلي بال^^^^ اريد اخذ تسجيل الكاميرات منهه 

_تمام رايح انه اشغل السياره لعد وانتي استعدي

_تمام لحظه حساني

_هاا

_ انته مستعد تكون مساعدي لو هل شي يجرح مشاعرك وكبريائك

_لو يجرح مشاعري وكبريائي جان ماقترحت عليج تخليني مساعدج 

_تمام لعد انتظرني 

_تمام ..

بقه واكف وكمت انه لبست الستره اخذت العنوانين بالضبط ودفتر ملاحظاتي والقلم توجهت لسلاحي

اخذته خليته بالحزام وعدلت حجابي والتفتت عليه وهوه يباوعلي ومبتسم باعجاب لوحت بيدي و رفع حواجبه وهوه يكول..

_هسه صرتي شموخ عن حق وحقيق

_ههه شكرا الك ويله نطلع لا تكضيهه صفنات

_من بعدج انسه شموخ ..

ابتسمت وطلعت قبله من المكتب وهوه اجه يمشي بصفي صعدنه بسيارته وانطلقنه للمدرسه صف السياره بالباب ونزلنه وكفني الحارس طلعتله

شارتي ورفع ايده بتحيه مبتسم بادلته ودخلنه بوجهنه لغرفه المديره دكيت الباب ودخلت واحسان وياي وريت شارتي الهه وكالت بتوتر واضح على ملامحهه..

_اهلين بيج سيده اا

_شموخ 

_اهلين سيده شموخ تفضلي بشنو اكدر اساعدكم

_بلا زحمه عليج بس رايده تسجيل الكاميرات مالت المدرسه من كل الجوانب وحتى الداخل اذا ممكن مالت الاسبوع الفات كله

_هاا اي اي ليش لا بس انتظروني دقايق حتى اسحبهن الكم لان يطولن

_اذا ممكن انه اريد اسحبهن لان طريقتي اسرع 

_اي تمام تفضلي لهذي الغرفه ..

هزيت راسي بايجابيه ورحنه وراهه اشرت لاحسان يبقى بره يراقب الوضعيه ودخلت انه وياهه لغرفه الكاميرات راحت بتردد عل حاسبه وصارت تنقل

ملفات وغيرهه عكدت حواجبي باستنكار واجيت عليهه لزمت ايدهه وهيه باوعتلي وبلعت ريجهه بصعوبه وكتلهه..

_هاي شكاعد تسوي ليش نقلتي ملفات من مكانهن 

_لا مو هذن ملفات المدرسه الخاصه مايصير واحد يطلع عليهن 

_لا عادي منصبي وشارتي تخولي ادخل على اي شي اريده واشوفه ضروري

_بس مايص...

_ست شروق خلصت مهمتج تكدرين تطلعين هسه خليني اشتغل على راحتي 

_مايصير انه المديره هنا ومايجوز تاخذين اي شي بدون ماوافق 

_تمام روحي للمديريه العامه واحجي هل حجي الهم عود بس هسه خليني اشتغل رجاءا طلعي بره ..

باوعتلي حامقه علي وطلعت بنتر وهيه تدردم لاكنهه المعلمات حجتلهن على كلامي ودخلن علي ضربت الميز بنفاذ صبر والتفتت عليهن متخوصره وكالت وحده منهن..

_العفو منكم بس مايجوز تداهمون المدرسه بهل طريقه وتطلعون على خصوصياتهه التسجيل بي

بنات اغلبيتهم محجبات وحق الطالب مايصير نتجاوز عليه فلو سمحتي اطلعي بره والتسجيل التردي راح نجيبه الج احنه 

_احسااان 

_نعم سيده شموخ

_طلعهن بره واذا ماقبلن انطي خبر للبحث الجنائي بانهن كاعد يعرقلن عملنه وطريق التحقيق واحتمال يكونن مشتبه بيهن وهمه يشوفون شغلهم وياهن 

_حاضر ..

باوعلي بخوف وانلصمن على حلكهن حسني كلبي من توترهن وفزعتهن هاي المالهه اي اساس ان عدهن شي لهذا السبب طلبت تسجيل الكاميرات

الداخليه حتى اعرف طبيعه العلاقه بينهن وبين المعلمه ساره حتى اقطع الشك باليقين اذا جانن مالهن شغل بقضيه خطفهه.. 

طلعهن بره احسان ورجعت انظاري عل شاشه رجعت بيهه ليوم الخطف وجان التسجيل مو واضح كلش لان بعيد عاد اخذت التسجيلات البقيه

نسختهن بالفلاشه وطلعت وهنه بعدهن بالباب واكفات رفعت ايدي البيهه الفلاشه وكلت للمديره..

_مشكوره ست ماقصرتي انشاءالله اطلع حقهه للضحيه واسحل كل واحد اله ايد بالسالفه لا تخافون ..

هزت راسهه بايجابيه وهيه وجهه ماكله الخوف خليت الفلاشه بجيبي وطلعنه من المدرسه عبرنه الرصيف ودخلنه للجامع نزعنه من رجلنه ودخلنه

لكيناه فارغ وبس ثنين او اكثر من الزلم الكبار بالعمر موجودين بي شافنه امام الجامع واجه سلمنه عليه وريته الشاره وكتله..

_السلام عليكم شيخ 

_وعليكم السلام تفضلوا بشنو اكدر اساعدكم 

_احم بلا زحمه عليك شيخنه اريد تسجيل الكاميرات الخارجيه نحتاجهه بالتحقيق بقضيه الخطف الصارت قبل ٣ ايام

_اي عادي بس انه انطيت نسخه للشرطه قبل يومين 

_هذيج النسخه خاصه بالمحققين اما احنه يرادلنه نسخه ثانيه همين 

_ميخالف تفضلوا وياي انطيكم النسخ

_بلا امره عليك بس اريد انه اسحبهن 

_اي ليش لا تفضلي يابنتي تفضل ابني ..

ابتسمت ورحنه وراه لغرفه صغيره جان بيهه كذلك شاشه وحده مقسمه على اربع جهات حوالين الجامع اجيت طلعت الملفات المسجله قبل اسبوع

وكذلك اخذتهن ونسختهن بالفلاشه نفسهه تشكرت منه وطلعنه ركبنه السياره وكال احسان بتساؤل..

_سؤال ليش اخذتي التسجيل مالت اسبوع كامل مو مالت يوم الخطف وبس

_حتى اشوف شنو الوضع بين الفتره ما قبل خطفهه وبعده وشنو التغييرات يلي صارت

_بس ليش بشنو راح يفيدج هل شي

_ لان الشخص لمن يريد يجي يخطف مايجي على عمى عيونه لازم يكون مخطط ومراقب الوضع ويعرف كل زين يمته تدخل ويمته تطلع ومن ياجهه

بالضبط تجي واذا جانت تجي مشي لو بسياره كل هذا يبين بالمراقبه ويراد عل اقل يومين قبل الخطف يراقبون ياله ينفذون خطتهم 

_اي وياج حق بهذا الشي ممكن يكون اكو اشخاص تراقب قبل الخطف بيومين بس وبعدها اذا خطفوهه ماراح يكون اكو شي مفيد بالتسجيل 

_وهنا الفرق اذا صار تغيير بالوضع قبل الخطف وبعده معناهه نكدر نوصل للحل يعني خلي انطيك مثال 

_اي 

_اذا بالتسجيل جان قبل الخطف اكو شخص يبيع شعر بنات كبال المدرسه وبعد يوم الخطف هل

شخص مابين نهائيا معناهه هذا واحد من الخاطفين او مسلط عليهه يراقبهه بامر من الخطفهه 

_هاا هيج السالفه يعني

_اي

_زين ولو طولتهه عليج بس شمعنى اخذتي التسجيلات الداخليه مالت المدرسه

_واضحه حتى اعرف منو اليحبهه ومنو اليكرهه للمعلمه ساره مو همه كالوا ماعدهه اعداء 

_اي

_اريد اكتشف هل شي بنفسي واعرفه لان ماثق بكلام الناس ابد 

_عفيه عليج 

_اعجبك انه بهل سوالف

_والله انج عاجبتني من زمان

_والله شكلي راح احتاج رقمهه لزهره بهل ايام 

_هههه ليش

_حتى افتن عليك كلما حجيت كلمه زايده 

_ ماتكدرين تفتنين انتي التنكرهين

_لا بطه وتريد اسكتلك حتى لا انكره شنو

_انتي ماتسكتين بكل مره تسكتيني انه بطريقه شكل 

_لعد سيطر على اعجابك بذكاءي وكول ماشاءالله قبلما تمدحني لا انحسد 

_هههه ماشاءالله ماشاءالله ميروهي ماشاءالله ..

بقه يحجيهه مثل الاغنيه الهنديه وهوه يسوق باوعتله رافعه حواجبي بتعجب وضحك عليه من يفر بايده هزيت بايدي ورجعت عيني عل شوارع

وانه صافنه بالقضيه وكلام المعلمات وتصرفاتهن هنه والمديره لحدما وصلنه للدائره نزلت ودخلت بوجهي للمكتب واحسان وراي كعدنه عل قنفه

وسحبت اللابتوب لحضني خليت الفلاشه ودخلت عل تسجيلات شفتهن طوال تنهدت بحيره والتفتت على احسان باوعلي بتساؤل وكتله..

_هيج ماراح اخلص انه منا لاسبوع كامل هاك اللابتوب ساعدني وانه خلي اكوم عل حاسبه افتحهن 

_تمام ..

اخذت الفلاشه خليتهه بالحاسبه نسخت المقاطع ورجعتهه للابتوب وكعدنه ندور على شي غريب وندرس كل تحركات الوضع الخارجي وماشفنه شي

غريب وحتى البائعين الجانوا بالخارج بقوا بمكانهم بعد الخطف ومحد حاول يوكف يمهم او يحجي ويسوي وياهم شي عاد سحبت الملف وخليت اكس

على نقطه التسجيل الخارجي .. رفعت راسي عل ساعه وشفتهه ب٢ يعني بعد نص ساعه يداوم

الشفت الثاني طفيت الحاسبه وحجيت ويه احسان يلي بعده مندمج يدور ..

_كافي احسان رح يخلص الدوام والتسجيلات الخارجيه ماكو بيهه شي مريب 

_خلينه ندور مره ثانيه خاف اكو شي مامنتبهيله

_لا راجعت كل التسجيلات وشفت ماكو شي يعني هسه تركيزنه لازم ينصب عل داخل 

_اي تمام تردين اخذ الفلاشه وياي للبيت اشتغل عليهه لو

_لا ماريد شغلنه يطلع لبره وتصير مشاكل خلينه فقط بالمكتب نتباحث بالموضوع رغم عدنه بس باجر وعكبه لازم نسلم الحل مالت القضيه بس

ميخالف احاول انه من جانبي اعيد المقاطع بالبيت وادرسهن انته ارتاح لان تعبت وعيونك راحن من الصبح لهسه 

_لا ماعلي شي بس على كولتج هل شغل مايصير يطلع لبره وخاصه مني وانه بعدني مامستلم منصبي 

_اي وشكرا على مساعدتك الي اليوم تعبتك 

_تعبج راحه انتي هم الله يساعدج خوش انسحلتي اليوم 

_ههه اي والله بس هذا جزء بسيط بعد وبعد راح تشوف الويل وياي مو محققه هينه وضامه روحي وره المكتب انه يعني حضر روحك بكل قضيه الي

نطلع بمهمه شكل ونروح لمواقع مختلفه لا عبالك اكعد واطلب من الناس تحجيلي القصه انه اروح اشوفهه بعيوني

_ههه وانه وياج وين ماترحين وصدكي يمكن احسن قرار اتخذته بحياتي اني قررت انتقل وياج

واطلب اكون مساعدج لان بهيج شغلات ما اامن ياخذج شخص غريب ويفتر وياج بكل مكان ترحيله 

_اي والله فعلا كلامك وانشاءالله بس اكمل هل قضيه احاجي العميد واطلبك منه كجائزه لتعبي 

_تطلبيني منه ليش حسيت روحي كاعد انخطب...