رواية ديون النبض الفصل التاسع والاربعون
بعدما مجد سابهم ومشي، ركب عربيته، وكان كل اللي بيدور في دماغه إنه يبدأ حياة جديدة معايا، حياة من غير وجع ولا ألم، حياة يعوض فيها كل لحظة بُعد وكل يوم اتحرمنا فيه من بعض.
قرب من مول كبير، ودخل وبدأ يلف في المحلات، لحد ما اختار فستان لونه أوف وايت، واشترى كل المستلزمات اللي تخصه علشان ألبسه في يومنا.
كان مهتم جدًا بكل التفاصيل، وكأنه عايز يعوضني عن كل حاجة فاتتنا، ويخلّي اليوم ده بداية مختلفة لينا إحنا الاتنين.
وبعد ما خلص، رجع لينا مرة تانية.
كان حازم رجع من شغله وبقى موجود، لكن أنا كان بالي لسه مشغول، وكل تفكيري مع مجد وتصرفاته واللي ممكن يحصل بعد كده.
أول ما مجد شافني، قرب مني ومسك إيدي وقعد جنبي، وبعدها بص لحازم وقال:
مجد: حازم، أنا عايز أتجوز وعد.
طبعًا حازم كان عرف كل حاجة، وعرف إن مجد اكتشف الحقيقة كلها.
مجد كمل كلامه وقال:
مجد: حازم، أنا عايز أتجوز وعد النهارده.
حازم بص له وقال:
حازم: وأنا مش معترض يا مجد وأنت عارف... بس
مجد قاطعه بسرعة:
مجد: ما فيش بس! إنت ليه متردد؟
حازم: أنا مش متردد، وإنت عارف ده كويس. بس وعد هي اللي عايزة تعرف إنت ناوي على إيه بالضبط.
في اللحظة دي مجد بص لي وقال:
مجد: في إيه يا وعد؟ إحنا مش اتكلمنا في الموضوع ده؟
بصيت له وقلت:
وعد: علشان خاطري يا مجد، قولي إنت ناوي على إيه بالضبط؟
بص لي وقال بثبات:
مجد: هقطع علاقتي بالماضي خلاص. حياتي هتبدأ من دلوقتي، وكل اللحظات اللي فاتت، بكل اللي حصل فيها، انتهت. أنا مش عايز أرجع لأي حاجة منها تاني.
بصيت له وقلت بهدوء:
وعد: مش هينفع يا مجد. أنا مش هينفع أبني سعادتي على هدم سعادة ناس تانية.
بص لي باستغراب وقال:
مجد: يعني إيه؟
وعد: يعني لو إنت فعلًا بتحبني وعايزني أكون موجودة معاك، لازم تفهم حاجة.
أنا عارفة إن الموضوع بالنسبة لك صعب، وإنك صعب تسامح بعد كل اللي حصل، لكن صدقني في الأول والآخر اللي إنت وصلت له ده كان بسبب دكتورة جيهان وتصرفاتها.
بص لي وقال بعتاب:
مجد: لسه يا وعد بتبرري لها؟ أنا بقولك الموضوع بالنسبة لي انتهى!
سكت شوية، وبعدها قلت:
وعد: لكن بالنسبة لي ما انتهـاش. مهما كان اللي حصل، دي أمك يا مجد، ومهما أخطأت في حقك، واجب عليك تبرها وتحاول تسامحها.
هي في الأول والآخر كانت بتتصرف وهي فاكرة إن ده لمصلحتك ولمستقبلك، وإنها بتحافظ عليك وبتمنعك تبعد عنها، حتى لو اختارت طريقة إنت مش عايزها ومش مقتنع بيها.
سكت لحظة، وبعدها كملت وأنا ببص في عينيه:
وعد: والحاجة اللي وجعتني أكتر إنك مش هتقدر تسامحها، مع إنها أمك... وساره بردوا أم طفلك يا مجد.
قربت منه وقلت:
وعد: أنا مش هرضى إنك تسيبها علشاني، ولا إنك تقطع علاقتك بأمك بسببي.
بص لي وقال بحسم:
مجد: مش هينفع يا وعد. أنا خلاص هاخد قراري وهطلق ساره.
بصيت له وقلت:
وعد: وأنا كمان أخدت قرار يا مجد.
بص لي بذهول وقال:
مجد: يعني إيه؟
وعد: يعني إنت إن سبتهم... يبقى إنت كمان تسيبني.
فضل باصص لي بنظرة طويلة، وبعدها قام من جنبي وقال بعدم استيعاب:
مجد: أنا مش فاهم... مش فاهمك يا وعد! مفيش حد اتأذى أكتر منك، ومع ذلك إنتِ متمسكة بيهم!
بصيت له ورديت عليه:
وعد: علشان خاطرك إنت يا مجد. أنا ما تعودتش أشيل من حد، واللي حصل في الأول والآخر أنا عارفة إن ليه أسبابه، حتى لو كانت أسباب غلط.
بس ده كان قدري، وأنا مش عايزة أكون سبب في إن حد تاني يعيش نفس الوجع.
سكت لحظة، وبعدها كملت:
وعد: فكّر في ابنك يا مجد، أو بنتك اللي لسه ما جاتش الدنيا.
مالهمش ذنب إنك تكون سبب في إن روح لسه ما اتولدتش تتحرم من أبوها. ما تحاسبش الطفل ده على غلط أمه أو جدته.
بصيت له وقلت:
وعد: إيه ذنبه؟ إيه ذنبه إنه يتعذب زي ما إنت اتعذبت؟ إيه ذنبه إنك تحاسبه على حاجة هو ما عملهاش؟ هو خلاص جاي للدنيا، ومن حقه يعيش وسط أبوه وأمه ويحس بوجوده.
قربت منه أكتر وقلت:
وعد: مش هينفع يا مجد. لو إنت فعلًا عايزني أكمل معاك، ما ينفعش تقطع علاقتك بأمك، ولا بأم طفلك اللي جاي.
مجد حط إيده على راسه، وكان واضح إنه مش قادر يستوعب كلامي، لكن أنا كملت:
وعد: يا مجد، إنت فاهمني... وإنت عارف أنا قد إيه بحبك. بس صدقني، أنا علشان بحبك ومتمسكة بيك، عايزاك تعمل اللي عليك للآخر.
أخدت نفس وكملت:
وعد: مش معنى إن حد حرمنا من اللي إحنا عايزينه، وحرمنا من حياتنا، إننا نرد له نفس الأذى. ومش معنى إن حد أساء لينا إننا نرد الإساءة بإساءة.
بصيت له بحب وقلت:
وعد: بالعكس، إحنا لازم نرد الإساءة بإحسان، وده اللي أنا عارفاه عنك. الخير اللي جواك أكبر من كل اللي حصل، ومش عايزاك تخسر نفسك بسببه.
سكت لحظة، وبعدها قلت:
وعد: الخير اللي جواك لازم يظهر الأول مع أهلك وأسرتك قبل أي حد. أنا مش هكون مبسوطة وإنت بتتألم بسببهم، أو بتأذي نفسك بقطع علاقتك بوالدتك.
وطيت صوتي وكملت:
وعد: صدقني، مع الوقت الوجع ده هيأثر في علاقتك بيا أنا كمان، وأنا مش هستحمل ده. مش هستحمل أحس إنك خسرت أمك وابنك بسببي، ولا هستحمل أكون سبب في حرمانك منهم.
بصيت له وقلت آخر كلامي بوضوح:
وعد: أنا مش هكون سعيدة يا مجد، حتى لو بقيت مراتك وعشت معاك كل يوم. أنا عايزاك تكون مرتاح من جواك، مش مجرد إنك تكون جنبي...
ديون النبض 🫀
بقلم الكاتبة مروة صياح 🎯✍️
في اللحظة دي مجد بص لي، وكان واضح عليه إنه وصل لمرحلة مش قادر يستوعب فيها إصراري على موقفي، وقال بوجع:
مجد: وعد، ليه مصممة تعذبيني إنتِ كمان؟
بصيت له وقلت بهدوء:
وعد: صدقني يا مجد، إنت دلوقتي غضبان وزعلان، لكن لما تهدى وتفكر شوية، هتعرف إن ده القرار الصح، علشان ما تندمش بعدين.
قربت منه وقلت:
وعد: والله يا مجد، أنا مش عايزاك تتعذب ولا تحس بألم ووجع تاني طول عمرك. أنا عايزاك دايمًا مرتاح، من ناحية كل اللي حواليك وكل اللي بيحبوك. أنا مش هكون سعيدة وأنا حاسة إن فيه ناس تانية مش سعيدة بسببي، ومش هقدر أفرح وأنا حاسة إني أخدت حياة مش حياتي.
بص لي وقال باعتراض:
مجد: لا يا وعد، هما اللي أخدوا حياتنا مننا، هما اللي سرقوا سعادتنا، وإنتِ اللي مش قادرة تصدقي ده.
بصيت له وقلت:
وعد: حتى لو زي ما إنت بتقول، خلاص يا مجد، اللي حصل حصل. إحنا دلوقتي مش هنقدر نرجع اللي فات، لكن عندنا واقع لازم نتعامل معاه. فيه طفل جاي للدنيا، والطفل ده مسؤول منك إنت.
بص لي وقال:
مجد: وأنا مش هقدر أتغاضى عن نفسي يا وعد أكتر من كده.
وطيت راسي وقلت له:
وعد: وأنا آسفة يا مجد... أنا كمان مش هقدر.
كان واضح إنه في حالة صراع بين رغبته إنه يتجوزني ويبدأ حياته معايا، وبين رفضي إني أكون سبب في قرارات ممكن يندم عليها بعدين.
بص لي وقال:
مجد: كده يا وعد؟
هزيت راسي وقلت:
وعد: سامحني، أنا مش هقدر أبني سعادتي على تعاسة حد تاني.
قرب مني ومسك وشي بين كفوفه وقال برجاء:
مجد: لا يا وعد... علشان خاطري. أنا ما صدقت إنك هتكوني قريبة مني تاني،ما صدقت إننا هنعيش مع بعض، أنا مش هقدر أستحمل إحساس إنك بعيدة عني مرة تانية.
بصيت له وقلت:
وعد: وعشان خاطري وأنا كمان،بس بلاش تطلق سارة. أنا عارفة إنك زعلان دلوقتي، وعارفة إن اللي حصل صعب عليك، بس أنا بقولك خد وقتك. بلاش تاخد أي قرار دلوقتي.
مسكت إيده وكملت:
وعد: عشان خاطر حبنا، وعشان خاطر حياتنا مع بعض، وعشان ما تحسش في يوم إنك ظلمت حد أو إنك عملت حاجة تندم عليها قدامي.
فضل باصص لي، وكأنه تايه ومش عارف يعمل إيه.
رجع مسك وشي بين كفوفه وقال:
مجد: أنا بحبك قوي يا وعد.
بصيت له وقلت:
وعد: وأنا كمان بحبك قوي. ومش هكون مبسوطة لمجرد إنك اخترتني وسِبت كل حاجة وراك. بالعكس، أنا مبسوطة إنك متمسك بيا، لكن مش عايزة تمسكك بيا يكون على حساب حد تاني.
في اللحظة دي ياسين بص لمجد وقال:
ياسين: مجد، على الأقل ما تفكرش في الموضوع ده دلوقتي خالص. ما تاخدش أي قرار وإنت غضبان. اهدى وفكر كويس، وبعدها قرر.
مجد بص لنا وسكت شوية، وبعدها قال:
مجد: ماشي، أنا مش هاخد أي قرار دلوقتي. هفكر كويس، بس محدش يضغط عليا في أي حاجة تانية.
وبعدها رجع بص لي وقال:
مجد: بس إحنا هنكتب كتابنا النهارده يا وعد، علشان خاطري. أنا مش هقدر أستحمل إنك تبقي بعيدة عني مرة تانية.
بصيت له وابتسمت وقلت:
وعد: لو قلتلك موافقة، إنت مش هتاخد أي قرار دلوقتي؟
بص لي وقال:
مجد: ده ده ردك يا وعد؟
قلت له:
وعد: أيوه. قبل ما تفكر في أي حاجة، نتكلم مع بعض، وأنا واثقة إننا هنقدر نوصل لحل وسط يريحنا إحنا الاتنين.
بص لي وقال بحب:
مجد: وعد، المهم عندي إني أكون موجود معاكي إنتِ. أي حاجة تانية مش عايز أفكر فيها دلوقتي.
ابتسمت وقلت له:
وعد: مجد، أنا بحبك قوي.
بص لي وابتسم وقال:
مجد: إنتِ عارفة أنا بحبك قد إيه يا وعد؟
وبعدها أخدني في حضنه، وأنا غمضت عيني وسندت عليه، أخيرًا بعد كل البُعد والوجع بقينا قريبين من بعض تاني.
في اللحظة دي ياسين بص لنا بابتسامة، وبعدها قال:
ياسين: يلا يا حازم، قوم يا ابني، خلينا نجهز ونجيب المأذون، ونفرح بوعد ومجد.
وبعد كده بدأنا نستعد لليوم اللي استنيناه طويلًا...
ديون النبض 🫀
بقلم الكاتبة مروة صياح 🎯✍️
في اللحظة دي، مجد بصلي، وفجأة شالني وبدأ يلف بيا، وهو بيضحك بفرحة عمره ما قدرش يخبيها، وقال:
مجد: أخيرًا يا وعد... هتكوني ليا أنا!
بصيت حواليّا، لقيت الفرحة مرسومة على وشوش كل اللي حوالينا. ماما وحازم ورغد وياسين، وحتى حور الصغيرة كانت بتضحك معانا من غير ما تكون فاهمة إيه اللي بيحصل.
ياسين بص لحازم وقال بفرحة:
ياسين: يلا يا حازم، اتصل بالمأذون علشان نفرح بيهم.
وفي الوقت ده، ماما قربت مني وقالت بابتسامة:
ماما: يلا يا وعد، علشان تلبسي فستانك وتجهزي لعريسك.
مجد بصلي نظرة طويلة، نظرة كان جواها كلام كتير مش محتاج يتقال... شوق حبيب لحبيبته، وعشق عاشق لمعشوقته، وشوق سنين من التعب والانتظار، كأنه بيقولي إننا أخيرًا وصلنا لنهاية الطريق اللي تعبنا فيه كتير.
حازم قرب مني وقال وهو مبتسم:
حازم: خلاص يا وعد... هتتجوزي!
في اللحظة دي، مجد قرب من حازم وقال له بجدية:
مجد: حازم، أنا عارف إني قصرت مع وعد في حقوقها، بس أنا عايز أعمل كل حاجة تليق بيها.
طلع دفتر الشيكات بتاعه، وفتح على شيك على بياض ومده لحازم.
مجد: اكتب اللي إنت عايزه، وأنا إن شاء الله من بكرة هبدأ أجهز الشقة اللي هنعيش فيها أنا ووعد مع بعض. وإحنا هنعيش في شقة بابا لحد ما شقتنا تجهز.
وبالنسبة للمهر والشبكة وكل حقوق وعد، إنت اللي تحدد اللي تشوفه مناسب.
حازم بصله باستغراب وقال:
حازم: إنت بتتكلم في إيه يا مجد؟! إنت واخد حتة من قلبي، ولا كنوز الدنيا كلها تساوي لحظة من لحظات سعادتكم وإنتوا مع بعض.
وبعدين أنا عارف إنك بتحب وعد، وكل اللي إنت بتتكلم فيه ده قدام سعادتكم مع بعض مالوش أي لازمة.
وبعدها بص لنا ياسين وقال بحسم:
ياسين: لا طبعًا، مش علشان مجد ابني أنا هقصر في حق وعد. أنا اللي هكتب في الشيك، وهكتب اللي أنا شايفه مناسب وبالزيادة كمان.
أخد دفتر الشيكات من حازم، وبص لمجد بابتسامة وقال:
ياسين: يا دكتور مجد، إنت كده هتطلع مديون جامد لوعد!
مجد بصلي، وابتسم ابتسامة كلها حب، وقال:
مجد: أنا مش مديون لوعد باللي هي عايزاه بس، ولا بحقوقها وبس... أنا مديون لها بقلبي، وبنجاحي، وبمستقبلي. وبمجدي اللي وصلت له...
وسكت لحظة، وبعدها كمل وهو باصص في عيني:
مجد: وعد بالنسبة المجد هي اللي حققته.
بصيت له وقلت من غير ما أشيل عيني من عليه:
أنا: وإنت وعدي أنا يا مجد... الوعد اللي كنت مستنياه.
وبعدها بنص ساعة، كنت دخلت مع ماما ورغد، وبدأوا يجهزوني ويلبسوني الفستان.
كنت حاسة بكسوف وخجل شديد، والقلق والتوتر مسيطرين عليّا لدرجة إني مكنتش على بعضي.
كل ما الوقت بيقرب، وكل ما فكرة إني بعد لحظات هكون مع مجد بجد تقرب من الحقيقة، كنت بحس إني مش مصدقة نفسي.
معقولة كل ده بيحصل بجد؟! معقولة اللي كنت بتمناه وأستناه بقى حقيقة مش مجرد حلم أو خيال؟!
ماما بدأت تسرحلي شعري بهدوء، وعملتلي فورمة رقيقة وهادية، ونزلت خصْلتين على جانبي وشي، ورغد حطتلي مكياج بسيط وهادي.
كنت كل شوية أبص لنفسي في المراية، وأبتسم من غير ما أحس.
لحد ما الباب اتفتح، ودخل حازم.
أول ما شافني، عينه دمعت، وابتسم وهو بيحاول يخفي تأثره، وقال بصوت هادي:
حازم: وعد... أنا مش مصدق إن أنا هسلمك لعريسك دلوقتي. مبروك يا وعد، إنتِ ما تعرفيش أنا قد إيه مبسوط لك.
قربت منه، ودفنت نفسي في حضنه، وقلتله بصوت مليان امتنان:
أنا: حازم، أنا عمري ما هوفيك حقك. إنت كنت ليا كل حاجة بعد بابا الله يرحمه.
حازم شدني لحضنه، وبعدها شالني وخرج بيا.
وفي اللحظة اللي مجد شافني فيها، كان هو كمان داخل.
رفعت عيني وبصيت له، ومن أول نظرة حسيت إني مش عايزة أنزل عيني من عليه.
كان إحساس غريب وجميل في نفس الوقت... إحساس إن الشخص اللي قدامي ده هو اللي قلبي اختاره من وسط الدنيا كلها، وإن ربنا خلقه عشاني وخلقني عشانه.
مجد بمجرد ما شافني، قرب مننا، وأخدني من حازم بكل حب، وقعدني على الكنبة.
وبعدها مسك إيدي بكل قوته...
ديون النبض 🫀
بقلم الكاتبة مروة صياح 🎯✍️
مجد قرب مني، وأخدني من حازم، وقعدني على الكنبة، وبعدها مسك إيدي بكل قوته، وبصلي بابتسامة مليانة فرحة وقال:
مجد: مبروك يا وعدي أنا... أخيرًا بقيتي مراتي.
ابتسمت ووطيت راسي من شدة الكسوف، وفي الوقت ده المأذون بدأ يستعد علشان يكتب كتابنا، وبدأ يقول كلامه المعتاد.
أما مجد، فكان طول الوقت عينه عليّا، وكأن كل اللي حوالينا اختفى، ومبقاش شايف غيري.
فرحتنا ببعض وقتها كانت أكبر من أي كلام ممكن يوصفها. أنا فعلًا مكنتش مصدقة إن اللحظة دي بقت حقيقة، وإن أنا ومجد خلاص بقينا زوجين.
المأذون خلص كتب الكتاب، وفي اللحظة دي مجد حط إيده على كتفي، وضمني لحضنه أكتر، وبعدها مسك وشي بين كفوفه وطبع قبلة طويلة عليه.
ماما قربت مني وحضنتني وباركتلي، وبعدها رغد وحازم وياسين، وكل واحد فيهم كان فرحان بينا من قلبه.
ومش بس كده، بعد ما كتبنا كتابنا، بصيت لياسين وقلتله:
وعد: خلاص يا ياسين، إنت اطمن عليّا.
وبصيت لماما وكملت:
أنا: وإنتِ كمان يا ماما، اطمني عليّا.
وبعدها قلتلهم إن أنا كان نفسي الأول نجمعهم هما الاتنين، ونفرح بيهم، وبكده بدل ما يبقى عندنا كتب كتاب واحد، يبقي كتب كتابين.
وفعلا ياسين بص لمامتي وأبتسم وكأنه بيطلب منها ايدها للزواج...
الموضوع اللي فتحته أنا وأتأخر أوي....
ماما وطت راسها وابتسمت...
وفهمنا كلنا أنها موافقه....
طبعاً مش هتلاقي قلب يكون ونس ليها غير ياسين...
ابو قلب كبير...
فعلاً حازم مسكها من أيدها هي كمان ووصلها لياسين بنفسه...
وابتسم المأذون وقال علي بركه الله...
وبدأ يكتب كتب الكتاب لياسين وماما هما كمان...
كنت واقفه ماسكه ايد رغد وأنا وهي في منتهي السعاده وراحه البال....
وكان حازم ومحد شهود علي زواجهم....
وسط فرحه وابتسامه مرسومه علي وشوشنا كلنا....
ولأول مره ياسين يبص لماما ويتملي منها وكأنه مشتاق يبصلها ويتأكد من ملامحها....
وبعد كتب الكتاب... بصيت لياسين وقلت له...
وعد: مبروك يا ياسين....
أنا في غاية سعادتي.... بقي أنا وانت هنحتفل بعد كده بزواجنا مع بعض...
كملت وأنا بهزر معاه طلعت خلبوص كبير ....
هو أنت بتبص لماما كده ليه...
بصوا لي كلهم وضحكوا....
وأنا لقيت فينا أن كل قلب اتلاقي بقلبه اللي بيكمله...
قلبي أنا مع قلب مجد...
ورغد مع حازم.......وياسين مع ماما ريهام...
وطبعا قلبنا كلنا الصغنن حور بنت حازم...
وكانت فرحتنا كلنا أكبر، لأننا بقينا عيلة واحدة، وكلنا مع بعض.
قعدنا فترة طويلة بنتغدي ونتكلم، وكل واحد فينا حاسس بسعادته وسط الناس اللي بيحبهم.
فضلنا مع بعض شوية بعد ما المأذون مشي، لحد ما مجد بصلي وقال:
مجد: وعد، إحنا هنخرج مع بعض، وهنكون لوحدنا بعيد عن الكل.
بصيت له وسكت شوية، وبعدها هزيت راسي وقلت:
أنا: لأ يا مجد.
بصلي باستغراب وقال:
مجد: لأ ليه؟
أنا: لأ يا مجد، مش هخرج وأنا كده.
مجد مسك راسي بين كفوفه، وبصلي بحنان وقال:
مجد: وعد، إنتِ معايا أنا، وهشيلك في عيوني قبل ما أشيلك على إيدي.
هزيت راسي وقلتله:
أنا: يا مجد، عشان خاطري، مش هقدر أخرج كده.
مجد: وعد، أنا ما رضيتش أقول نعمل فرح علشان ما تزعليش، لكن مش معنى كده إن إحنا مش هنعمل. بالعكس، لما تكوني كويسة وتقفي على رجليكي، هعملك أحسن فرحة.
دفنت راسي في حضنه وقلتله:
أنا: يا مجد، أنا مش عايزة حاجة. لا عايزة أخرج، ولا عايزة فرحة، ولا عايزة أي حاجة. أنا مش هخرج من البيت وأنا كده.
الدموع بدأت تنزل من عيني، ومجد ضمني لحضنه أكتر، وبعد شوية قال:
مجد: خلاص يا وعد، أنا كنت بقول نركب مركب ونكون مع بعض، ونبعد عن أي حد شوية.
ضميت راسي في حضنه أكتر وقلتله:
أنا: عشان خاطري لأ، أنا مش هخرج من البيت وأنا كده.
بصلي وسكت، وبعدها قال بهدوء:
مجد: خلاص يا وعد، اللي إنتِ عايزاه. بس توعديني إنك إن شاء الله تكوني كويسة. أنا هكلم الدكتور، يتابع حالتك، وأنا واثق إن شاء الله إنك هتكوني أحسن وكويسة، لا إما نسافر تتعالجي بره أفضل. أنا مش هسكت يا وعد غير لما تقفي على رجليكي.
بصيت له بابتسامة وقلت:
أنا: مجد، صدقني أنا كويسة، ومش هحتاج أي حاجة من اللي إنت بتقول عليها دي.
في اللحظة دي، كلنا كنا بنبص لبعض.
على قد ما كانت السعادة مالية قلوبنا، على قد ما كان موضوع العجز اللي أنا فيه مضايقهم.
أنا كمان كنت فرحانة جدًا وسعيدة إن مجد بقى معايا، لكن كان نفسي أكون واقفة على رجلي، أكون واقفة في حضنه، وأرقص معاه، وأتحرك وأجري منه وهو يمسكني، وأعيش فرحتي بالشكل اللي كنت بتمناه.
لكن رغم كل ده، كانت فرحتي بيه هو أكبر من أي حاجة تانية.
فضلنا مع بعض فترة طويلة، أكلنا وهزرنا، وكانت اللمة دي بالنسبالي أغلى من أي فرح ممكن يتعمل.
ومع الوقت، الساعة بدأت تتأخر.
بابا ياسين كان قاعد جنب ماما، بعد ما بقوا زوج وزوجة، وأنا كنت قاعدة جنب مجد، وحازم قاعد جنب رغد، وحور قاعدة على رجليهم.
كنا كلنا متجمعين في مكان واحد، ولأول مرة كنت حاسة إن اللمة دي جمعتنا كلنا بالشكل اللي كنت بتمناه.
بعد ليلة طويلة مليانة فرحة وسعادة، حازم أخد حور ورغد وطلعوا شقتهم، وياسين وماما دخلوا شقتنا.
أما مجد، فشالني ودخل بيا شقة ياسين، وقفل الباب ورانا.
أول ما دخلنا، قعدني على السرير، وبعدها نزل على ركبته وقعد قصادي...
في اللحظة دي، مجد كان باصصلي بعين كلها شوق، وعينيه بتلمع من كتر الفرحة. قربت منه، وحطيت إيدي على راسه بين كفوفي، وطبعت قبلة هادية على راسه.
رفع عيني وبصلي، وقال بصوت مليان عدم تصديق:
مجد: أنا مش مصدق نفسي يا وعد... إنتِ فعلًا معايا؟ إنتِ دلوقتي بقيتي مراتي أنا؟
ابتسمت له، وهزيت راسي وأنا باصة في عينيه.
وفجأة شالني من مكاني، وبدأ يلف بيا في الأوضة، وهو بيقول بفرحة:
مجد: يا وعد! أنا مش مصدق! اعملي أي حاجة، قوليلي إني مش بحلم!
فضلت أضحك، ولفيت دراعاتي حوالين رقبته، وبصيت له.
كانت الفرحة مالية عينيه بشكل خلاني أحس إنه أخيرًا قدر ينسى كل لحظات الحزن والتعب اللي عدّت علينا، وكأنه مش شايف في الدنيا كلها غير إننا بقينا مع بعض.
بعدها قعدنا على السرير تاني، ومجد بصلي وقال:
مجد: إيه رأيك نصلي ركعتين مع بعض، ونشكر ربنا على النعمة اللي إحنا فيها؟
ابتسمت وقلتله:
وعد: طبعًا يا مجد.
جابلي حجاب، وبدأ يلفه على شعري بهدوء، وبعدها وقفنا وصلينا ركعتين مع بعض، نحمد ربنا على فضله، وندعي إن اللي جاي من عمرنا يكون مليان خير ورضا وراحة بال.
بعد الصلاة، قعد مجد على السرير، وبعدها قرب مني...
ولأول مرة، كنت في حضنه وهو في حضني، مش مجرد حبيبين مستنيين اللحظة دي، لكن زوج وزوجة جمعهم ربنا بالحلال.
كانت لحظة مختلفة عن كل اللحظات اللي عشناها قبل كده؛ لحظة حسيت فيها إن كل الانتظار والصبر كان ليهم معنى، وإن أخيرًا بقى لينا بيت واحد وحياة واحدة.
