رواية زوجتي غريبة الاطوار الفصل الرابع 4 بقلم هاجر نور الدين

 


رواية زوجتي غريبة الاطوار الفصل الرابع بقلم هاجر نور الدين


- هو ممكن حد فيكم يقتلني؟

قولتها وأنا بحاول أمنع نفسي إني أستفرغ،
أصل حقيقي الموت أهون عليا من إني أكل من المنظر دا!

ردت عليا سمر وقالت بنفس الإبتسامة الباردة:

- لأ يا حبيبي منقدرش إنت حبيبنا كلنا.

رديت وأنا شبه هعيط والحروف طالعة من بين سناني:

- لأ لأ أنا راضي، إقتلرني أهون رالله!

قربت سمر من ودني وقالت بهدوء:

- إهدى عارفة إنك مش بتاكل كدا، إتظاهر بالأكل بس ولما ننزل هجبلك أكل من بتاعكم.

عيني لمعت لوهلة وحسيت إني إرتاحت نسبيًا وقدرت آخد نفسي، وإحنا قاعدين كنت أنا باخد الحاجة من هنا أوديها الناحية التانية وكأني باكل.

إتكلمت بتساؤل وقولت بتردد:

- هو لو عايزين نخرج نعمل إي؟

إبتسمت سمر وقالت وهي بتبصلي بنظرات بتوحي لأنها فهماني:

- بنخرج.

حاولت أضحك وقولت:

- لأ قصدي يعني تعالوا في يوم نخرج مع بعض.

ردت عليا حماتي وقالت بإبتسامة وهي بتبص لـ والدي:

- صح عايزين نخرج ونسترجع أيام الشباب شوية.

إبتسمت بحماس عسان أخيرًا هنخرج من البيت دا وأدور على طريقة للهرب، لكن رد عليها والدي وقال بإبتسامة وحماس هو كمان:

- ممكن نروح نتفرج على ماتش تقطيع الجثث اللي بيحصل كل شهر، أو ممكن ناخد جولة في جنينة الجماجم كلنا نشارك في مسابقة أكتر آكل للحوم هناك يكسب.

بصيت ليهم بصدمة وإختفت إبتسامتي ونظراتي راحت لسمر اللي كانت مبتسمة ليا بسخرية وخبث وقالت:

- مش عايز تروح يا حبيبي ولا إي؟

رديت عليها بتقطع وقولت بتمثيل الإبتسامة:

- لأ حاسس إني حابب أقعد النهاردا في البيت، إنتوا بتمسكوا في الكلام أوي ليه؟

ضحكت وقربت مني من تاني وقالت بصوت واطي:

- أنا عارفة إنك حاولت تهرب إمبارح، بس من قواعد العالم بتاعنا الأضحية بتاعتنا مش بتلاقي الطرق بتاعت عالمنا إلا إذا حد مننا سمحلها تمشي فيها، وإنت تعتبر أضحية لينا فـ ملقتش الطرق.

بلعت ريقي وسكتت وأنا ببتسم برعب.

***

بعد ما رجعوا البيت قعدوا يفكروا اللي المفروض يعملوه،
إتكلمت سمر وقالت بعد ما خدت نفسها:

- طيب بصوا أنا فكرت في حاجة، إحنا هناخد 10 كيلو لحمة ونروح ليه كـ مبادرة مننا للتفاهم معاه.

برق والدي وقال بخضة:

- 10 كيلو!
إنتِ عارفة الكيلو بكام؟

إتكلمت سمر وقالت بإنفعال:

- يعني إبنك اللي مش عارفين إي اللي حصلوا دلوقتي وعايش مع وحوش ولا 10 كيلو لحمة يا عمي إنت كمان!

إتكلم بنبرة عياط وقال بحزن وإستسلام:

- إبني للأسف، لما يرجع والله لأخدهم منهُ.

بصيتلهُ حماتي بقرف وقالت وهي موجهة الكلام لسمر:

- طيب يلا يا بنتي هنجمع كلنا وهنروح مع بعض، محدش يطلع للكائن دا لوحدهُ.

حركت سمر راسها بالموافقة وبدأوا فعلًا يتحركوا ونزلوا إشتروا اللحمة، بعد ما وصلوا قدام شقتهُ إتنهدت سمر وقالت وهي بتخبط:

- محدش يتكلم كلام مالهوش لازمة وأنا هحاول أحل معاه.

بعد ما فتح كلهم سكتوا وكانوا خايفين من المنظر اللي شايفينهُ قدامهم، ماسك حتة لحمة نية ووشهُ عليه أثار من دم اللحمة وهو بياكلها وقال بلا مبالاة وملامح جامدة مرعبة مع المنظر:

- خير؟

حماتي منعت نفسها إنها تستفرغ، وسمر إتكلمت وقالت وهي بتقدملهُ بوكس اللحمة:

- إحنا جايين عشان جايبينلك هدية وكمان عايزينك في موضوع.

بعد ما فتح البوكس ولقى فيه كمية من اللحمة فتح الباب وهو بيقول:

- إدخلوا.

بعد ما دخلوا وقعدوا سمر إبتسمت بأمل وقالت:

- أنا عارفة اللي حصلك من سمر اللي هي في العالم بتاعك هناك.

ملامحهُ قلبت وعيونهُ إحمرت بشكل مرعب وقال بغضب:

- إنتِ بتفتحي الموضوع دا معايا ليه؟
عارفة إني ممكن مخرجكوش من هنا؟

إتلكمت سمر بسرعة رقالت بخوف:

- لأ ما هو أنا لسة جيالك في الكلام، أنا قصدي إن إنت يعني مش عايز تنتقم، هتسيبها تعيش حياتها بعد اللي عملتهُ فيك؟

هِدي شوية وقال وهو بيسند ضهرهُ على الكنبة:

- وإنتِ مهتمة ليه بموضوع إنتقامي غير إن ليكِ مصلحة؟

إبتسمت بأمل من تاني وقالت:

- أكيد، مصلحتي هي مصلحتك، زي ما هي أذتك أذتني برضوا وخدتني لعالم مش بتاعي ودلوقتي خطفت جوزي، يعني إنتقامنا واحد أنا معاك مش ضدك.

سكت شوبة وبعدين قال بهدوء:

- وإنتِ إي اللي خلاكِ متأكدة إني ممكن أساعدك، يعني هي برضوا كانت حبيبتي ومراتي ليه أقف في صفك ضدها؟

جاوبتهُ سمر وقالت بمحاولة لإقناعهُ:

- عشان هي دلوقتي مش مراتك وهي نفسها اللي كانت سبب في إنك شبه تطرد من العالم بتاعك بإستبدلها ليك بنسخة من عالم تاني صح ولا إي؟

سكت شوية وظهر في عيونهُ الغضب وللحظة خافوا ولكن قال:

- وإنتِ محضرة إزاي تنتقمي ولا جاية تتكلمي وخلاص، أنا مش هعرف أروح العالم بتاعنا غير لو شادي دا طلع منهُ وقتها تلقائي هروح.

إتكلمت سمر وقالت بحماس:

- عندي خطة أكيد وعارفة إنك مش هتعرف تروح دلوقتي، بس تقدر تقولي الطريقة اللي تخليني أروح وتقولي المخارج اللي ممكن نطلع منها أنا وشادي للعالم دا عشان بعدها ترجعوا تلقائي للعالم بتاعكم مرة تانية.

سكت شوية بيفكر وبعدين قال بتساؤل:

- وإنتِ لو روحتي وسمر جات هنا فكرك هتقف ساكتة لحد ما ترجعي إنتِ وشادي من هناك؟

إتكلمت سمر من تاني وقالت:

- ما هو دا دورك بقى، أنا هطلع شادي من هناك وهطلع معاه، ووقتها إنت وهي هترجعوا للعالم بتاعكم من تاني، وبعد ما عرفت مكايدها ضدك تقدر تمنعها من إنها تستغلك وتستبدلك لعالم تاني وقتها.

خد نفس بيفكر وبعدين قال بهدوء:

- موافق.

إبتسمت سمر بسعادة وحماس ولكن إتكلمت والدتها وقالت بخوف:

- يابنتي هتروحي تاني برجلك المكان دا إزاي، خلي أبوه اللي يروح يجيبهُ.

بصيلها والدي وقال بخضة:

- أبوه إي اللي يروح يجيبهُ إنتِ شكلك خرفتي!

إتكلمت والدة سمر وقالت بغضب وإنفعال:

- أنا نفسي أشوفلك منفعة واحدة، دا إبنك دا ياللي الخرف ماسكك من ساسك لراسك يا عجوز يا مملح.

رفع حاجبهُ بإستنكار قال بتساؤل وغضب:

- إي بقى مملح دي؟

ردت عليه والدة سمر وقالت:

- دي اللي زعلتك يعني؟
مملح يعني معفن مخلل من زمن وخلاص ملحت.

قبل ما يتكلم تاني إتكلمت سمر وقالت بتنهيدة وصداع:

- يا ماما متقلقيش أنا كنت هناك وعارفة الطريقة اللي هتعامل بيها هو ميعرفش وممكن يعمل حاجة غلط يضيعوا هما الإتنين فيها.

بعدها وجهت كلامها لـ شادي وقالت بتساؤل وتركيز:

- قولي دلوقتي إي الطريقة وهعمل إي هناك؟

بدأ يوصفلها طرق في العالم بتاعهم وثغرات تقدر من خلالها تهرب وتشوف العالم بتاعها وقالها على حاجة شبه الطلاسم تقولها في مكان معين في العالم بتاعهُ تقدر بيها تنتقل في لحظة.

خلص شادي كلامهُ وقال:

- دلوقتي هنطلع على السطح أو آي مكان خاوي منهُ للسما وبقطرات دم مني وشوية طلاسم هيتفتح قدامي العالم بتاعي ليكِ مش ليا، ولما تيجي سمر بالإجبار وقتها هتحكم أنا فيها.

قاموا كلهم وكانوا هيتحركوا، إتكلم شادي من تاني وقال:

- الإتينن دول يفضلوا هنا، لو طلعوا هيموتوا مني قبل سمر بسبب إزعاجهم ومالهومش لازمة أصلًا.

والدي قعد فورًا بخوف وحماتي بصيتلهُ بفقدان أمل وإنزعاج وقعدت هي كمان وهي باصة لسمر بخوف.

إبتسمتلها سمر بإطمئنان وبعدها طلعوا للسطح.


شكرا لزيارتكم عالم روايات سكيرهوم

تعليقات