رواية جريمة في شقة مشبوهة الفصل الرابع والاخير بقلم ياسر عوده
سكت ومعرفتش اقول ايه، اللى اسمها سميه دي ماطلعتش بني ادمه، دي كانت شيطانه وكانت قادره تخليني اوافق على كل طلبتها، ودا اللى حصل فعلا، منا ماكنش عندي استعداد وقتها اني اتحبس بسبب اللى عملته مع شهاب، ومش بس كده ماكنش عندي استعداد ان الفديو بتاعي انا وعصام يتنشر في كل حته على الانترنت، وعلشان كده انا قولتلها:
-انا تحت امرك.
ابتسمت وقتها وقالت:
-ما كان من الاول، على العموم نورتي يا زيزي في شغلك الجديد بين زملاءك.
سابتني بعد ما قالت الكلام ده، وانا قعدت مكاني، ماكنتش متخيله المصيبه اللى وقعت فيها، معقول انا هربت من قريتي بعد ما انتقمت من شهاب بعد ما ضحك عليا، علشان اجي هنا وابقى لقمه سهله في بوق كل راجل.
لقيت شيماء بتقرب مني وقالتلي:
-قومي يا زيزي روحي ارتاحي، عارفه ان الموضوع صعب عليكي في البدايه، بس هتتقبلي الامر وهتتعودي عليه ماتقلقيش.
كان نفسي اجيب شيماء من شعرها واحطها تحت رجلي، بس للاسف ماقدرتش اعمل كده خالص، اولا لاني كنت لسه تحت تأثير المخدر اللى هي حطتهولي، وكمان انا كنت عارفه انها بتنفذ التعليمات مش اكتر من كده.
روحت الشقه اللى بنام فيها وماكنتش عارفه اعمل ايه، ولما كنت قاعده في اوضتي لقيت شيماء جايين عندي ومعاها كل البنات اللى في الشقه، وقعدوا معايا واتكلمت دينا وقالت:
-اسمعي يا زيزي، انا عاوزه اقولك حاجه لازم تنتبهي عليها، مافيش حد فينا احنا الاربعه لينا يد في اللى حصل معاكي، يعني مافيش حد فينا كان يقدر ينبهك للي هيحصل، علشان كل وحده فينا سميه عملت معاها اللى عملته معاكي النهارده، كلنا متصورلنا فديوهات واحنا بيتعمل معانا علاقه، واللى هتفكر انها تتكلم او حتي تتنفس، وقتها الفديوهات دي هتنتشر في كل مكان، وطبعا الشرطه وقتها مش هتسبنا، علشان كده مافيش وحده فينا كانت تقدر تنبهك للي هيحصل معاكي، وعلشان كده احنا جينا علشان نعرفك الحقيقه وتعذرينا وماتزعليش منا.
-لو زعلت او مزعلتش هيفيد بايه، ما خلاص انا ضعت واللى كان كان.
وقتها لقيت شيماء اتكلمت وقالت:
-عارفه يا زيزي انا اشتغلت الشغله دي ليه، علشان انا اتولدت في بيت كل اللى فيه بيكره التاني، ابويا كان بيخون امي مع أي وحده وخلاص، مش مهم حلوه او وحشه او حتى بومه، المهم انها وحده وغير مراته، ابويا كان تاجر غني وورث عن ابوه فلوس كتير اوي، بس كل دا ماقعدش معاه كتير، ضيع كل الفلوس دي على الستات اللى كان بيعرفهم، كل يومين يمشي مع وحده شكل، هو علشان كان مفكر ان الستات دي بيحبوه علشان شخصيته اتصدم لما افتقر، لانه وقتها شاف الحقيقه، شاف ان مافيش ولا وحده فيهم عبرته، وهتعبره ليه اصلا انا ابويا كان شكله وحش اوي بصراحه ومافيش وحده رضيت بيه امي، ومش عارفه هي اتجوزته ليه اصلا، وكانوا كل يوم بيتخانقوا مع بعض، وكل مره يتخانق معاها فيه كان بيقولها:
-انتيه بومه ونحس، انتي السبب في الفقر اللى بقيت عايش فيه.
وكانت بترد عليه وبتقوله:
-انت ربنا فقرك علشان النجاسه اللى كنت بتعملها، واحد غيرك كان لازم مايعملش اللى انت بتعمله علشان عندك بنات، لو وحده من بناتك عملت اللى انت بتعمله هيبقى بسبب اعمالك.
ولما قالتله الكلام دا ماستحملش كلامها، ومسكها وفضل يضرب فيها، ومانتبهش وقتها ان هي ماتت في ايده، واتسجن ابويا وكل وحده فينا انا واخواتي رحنا في حته، وانا اتنقلت من مكان لمكان، لغايه لما لقيت نفسي هنا في الكوافير ده، واتعمل معايا نفس اللى اتعمل معاكي، ورغم ان انا مافيش حد اخاف منه لو عرف اللى انا عملته، بس انا فكرت لو مشيت من هنا هروح لمين وهعمل ايه، ومع الوقت بقيت حاسه ان المدام سميه احسن من ناس كتير اوي شوفتهم في حياتي، وبصراحه مابقاش فارق معايا اني اسبها وامشي.
-بس انا مستحيل افضل مستسلمه زيك كده يا شيماء، وانا ماتعودتش اسيب حقي مهما طال الزمن.
-انتي بتفكري في ايه يا زيزي؟
-هتعرفي بعدين، ماتقلقيش.
كل البنات اللى كانوا موجودين وقتها ماخدوش كلامي بجد، كلهم كانوا مفكرين اني بقول كلام وخلاص، بس هما ماكنوش يعرفوا اني لو خدت قرار وقتها يبقى لازم انفذ، انا بس كنت محتاجه لشويه وقت وخطه تخليني اخد انتقامي.
انا اشتغلت زي ما سميه طلبت بالظبط، وماكنتش بعترض على أي حاجه، ودا اللى خلى البنات تتأكد اني كنت بقول كلام وخلاص، ومرت حوالي 6شهور، وكنت مستنيه الفرصه اللى هاخد فيها انتقامي، وفي ليله من الليالي كل البنات روحوا، وانا كنت معايا شغل زبون يعني، وكانت سميه هي كمان لسه موجوده، ولما خلصت شغلي ولقيت نفسي انا وسميه لوحدنا، وقتها لقيتها بتقولي:
-تعالي يا زيزي انا عاوزه اتكلم معاكي.
وقعدت معاها ولقتها حطت قدامي فلوس، كان مبلغ مش صغير حوالي 10000 جنيه، وقالتلي:
-خدي يا زيزي الفلوس دي نصيبك في شغلك الفتره اللى فاتت.
-انا مش عاوزه فلوس.
-اومال عاوزه ايه؟
وقتها انا عنيا كانت عماله تلتفت حوليا، كنت عاوز أي حاجه تنفع انفذ بيها اللى في دماغي، وفعلا لقتها كانت طفايه سجاير، بس كانت من الرخام، ومديت ايدي على الطفايه ومسكتها وانا بقولها:
-انا عاوزه اخد حقي.
وقبل ما تفهم سميه انا اقصد ايه، لقتني نازله على دماغها بالطفايه، وفضلت اضربها اكتر من مره، كنت كل مره بضربها فيها كنت بفتكر واحد من الرجاله اللى هي اجبرتني اعمل علاقه معاه، وفضلت اضرب فيها لغايه لما لقيت مابقاش واضح حاجه من ملامحها بسبب الدم، كانت ماتت واتأكدت من انها ماتت خلاص.
وبعد ما قتلتها قعدت على الارض وانا مش عارفه اللى عملته دا صح ولا غلط، كان عندي احساس جوايا غريب ومش مفهوم، كنت حاسه بالخوف بس ماكنتش ندمانه على اللى عملته، ولو رجع بيا الزمن بردوا هعمل نفس اللى عملته وهقتلها، لانها تستاهل القتل.
قعدت افكر اعمل في جثتها ايه، فكرت احاول انقل الجثه وادفنها في أي مكان، بس حسيت اني مش هقدر اعمل كده، ولقيت وقتها ان احسن حاجه اني اهرب، ولقيت قدامي الفلوس اللى سميه كانت بتدهالي، خدتها ونضفت نفسي من الدم وخرجت من الكوافير بعد ما قفلته ورايا ومشيت.
انا روحت على محطه القطار، وهناك ركبت اول قطار كان متجه للقاهره، وبعد ما وصلت للقاهره ولقيت الدنيا زحمه حسيت ان داه يبقى المكان المناسب اللى هستخبي فيه، وقعدت في وحده من الفنادق الرخيصه لغايه لما اطمأن ان كل حاجه تمام، وفي ليله لما كنت نايمه لقيت باب الاوضه بيتفتح عليا، ودخل رجاله الشرطه واتكلم معايا واحد منهم وقالي:
-انتي زيزي ابراهيم؟
ماعرفتش ارد عليه واقوله ايه، فرجع وكرر السؤال مره تانيه، وقتها قولتله:
-ايوه انا، بس انتم مين وعاوزين مني ايه؟
-احنا الشرطه، هتيجي معانا براحه ولا نسحبك بمعرفتنا.
-حاضر هاجي معاكم.
وفعلا روحت معاهم لقسم الشرطه، وماكنتش فاهمه هما وصلولي ازاي وكمان عرفوا منين اللى انا عملته، مافيش حد كان شافني وانا بقتل سميه، ولقيت وكيل النيابه اللى اتعرضت عليه بيقولي:
-انتي متهمه بقتل المجني عليه سميه شاكر.
-انا ماقتلتش حد يا باشا، ومعرفش حضرتك بتتكلم عن ايه اصلا.
-بلاش انمار يا زيزي، الحقيقه بانت، كاميرات المرقبه في الكوافير سجلتلك وانتيب تقتلي سميه لما فضلت تضربيها بطفايه السجاير.
كانت صدمه حقيقيه بالنسبالي لما عرفت ان سميه كانت حطه كاميرات مراقبه في الكوافير دا غير اللى كانت في شقه الضيوف، وعرفت من وكيل النيابه انها كانت حطه كاميرات سريه ومافيش حد فينا انا والبنات كنا نعرف موضوع الكاميرات دي، وطبعا صورت كل اللى حصل بيني وبين سميه وازاي انا قتلتها، وطبعا دا غير فديوهت العلاقات الغير شرعيه اللى كنت بعملها مع الرجاله اللى كانوا بيجوا لـ كوافير سميه، وكل التهم دي ماكنتش كفايه للنيابه، علشان الاقي وكيل النيابه بيقولي:
-وكمان في جريمه تانيه مستنياكي من فتره طويله، جريمه تشويه المجني عليه شهاب وحرق وشه بمايه نار، يا تري فاكره الجريمه دي ولا نسيتي.
في اللحظه دي حسيت ان كل حاجه انتهت، وعلشان كده انا اعترفت قدام وكيل النيابه بكل حاجه عملتها، وانا اهو قاعده مستنيه حكم الاعدام.
ـــــــــــــــــــــــــــــــــــــــــــــــــــــ
دي كانت الاعترافات اللى قالتها زيزي وانتم سمعتوها، بس اعذروني انا كنت محتاج اسألها سؤال مهم جه على بالي، وفعلا سألتها وقولتلها:
-تفتكري انتي جانيه ولا مجني عليكي، حاسه انك اتظلمتي؟
وقتها لقيتها بتبتسم وقالت:
-أي حد مكاني لازم يقول انه اتظلم، بس الحقيقه انا كنت بحصد نتيجه الاختيارات الغلط اللى اخترتها، انا اكبر غلط عملته اني حبيت شهاب، وكنت مفكره اني هعيش قصه حب رومانسيه زي اللى شوفتها في المسلسلات، وغلطتي الاكبر اني كنت مستسلمه ليه وسلمتله نفسي، ودي كانت النتيجه.
ــــــــــــــــــــــــــــــــــــــــــــ
وانتم كمان كنت حابب اسمع منكم، هي زيزي اتظلمت ولا لا.
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
