رواية جثة القبر الفصل الرابع والاخير بقلم محمود الأمين
الجزء الرابع
كنت واقف مصدوم قدام واحد متعلق من رقبته. مين اللي شنق الدكتور سعيد؟ ومش هكون متفاجئ خالص لو البصمات اللي في المكان طلعت بصمات الدكتور حازم عبد الكريم.. أصل القضية دي تعدت حدود المنطق، كل حاجة بتقول إن حازم عبد الكريم لسه عايش.
وفي نفس الوقت، تحليل الـDNA بيقول حاجة واحدة بس، إن الجث. ة اللي في القبر هي جث. ة حازم، رغم ظهوره في كاميرات المراقبة مرتين وهو طالع يوم الجريمة العمارة بتاعته، وساعتها المفروض كان خلاص مات. تخيل أنت شايف واحد في الكاميرات المفروض إنه ميت ومدفون، طالع عمارة ونفذ فيها جريمة.
وبعد كام يوم، يظهر في كاميرات المراقبة للمرة التانية، واللي كانت في البنزينة اللي على الطريق اللي لقينا فيه العربية وجواها جث. ة عماد حافظ، صاحب مكتب تأجير العربيات.. وأكيد شبيه حازم ده قتله عشان ما يعترفش عليه.
ومع وصول رجالة الطب الشرعي والمعمل الجنائي، بدأ فحص الجث. ة ومسرح الجريمة، ولكن وإحنا بنفتش البيت، لقينا أسطوانة كانت في دولاب المجني عليه.. يا ترى الأسطوانة دي فيها إيه؟
ومن حسن الحظ إننا لقينا في شقة الدكتور سعيد جهاز DVD، وشغلنا عليه الأسطوانة، واكتشفت إنه فيديو مصوره الدكتور سعيد وبيعترف فيه على إنه هو اللي قتل الدكتور حازم، وكان بيكشف فيه شوية أسرار خلتني واقف مش فاهم أي حاجة، عشان اتكلم وقال:
_ أنا الدكتور سعيد، أنا بصور الفيديو ده وعارف إن قدامي ساعات وهتقتل، واللي هيقتلوني هما العصابة اللي أنا شغال معاهم، بعد ما بقيت عندهم كارت محروق. خايفين على نفسهم من إنه يتقبض عليا وأعترف عليهم.. بس قبل ما أقول أي حاجة، يا ريت تلحقوا تقبضوا على الدكتور منصور، مدير المستشفى، قبل ما يهرب بره البلد.. هو كمان كان بيطلب مني أهرب قبل ما الناس دي توصلّي وتخلص عليا، ومش عاوزكم تتعبوا نفسكم، الناس دي مش من مصر أصلًا، واللي ارتكب الجريمة زمانه رجع بلده دلوقتي. بس بما إني خلاص هموت وباقي في عمري ساعات، خليني أعترف اعتراف صغير. وسط كل حاجة غلط كنت بعملها، أنا خونت واحد من أعز أصدقائي، الدكتور حازم عبد الكريم، وكنت على علاقة بمراته صفاء، وأنا عارف إن مهما حكيت مفيش مبرر للخيانة، بس الحكاية كانت واصلة ما بينهم لحيطة سد، وهي حبتني زي ما أنا كنت بحبها، بس ما كنتش أعرف إن الموضوع هيوصل لحمل، في نفس الوقت اللي كان فيه الدكتور حازم بيهددني إنه هيبلغ عني الشرطة بعد ما عرف موضوع تجارة الأعضاء، ولقيت نفسي محتار ومش عارف أتصرف.
وقبل الجريمة بـكام يوم، اتصلت بيا صفاء عشان تبلغني بكارثة. الدكتور اللي هي متابعه معاه الحمل طلع صديق شخصي لرامي عبد الكريم، أخو جوزها، ورامي عرف إنها حامل، وفي نفس الوقت هو كان عارف إن أخوه عنده مشكلة في الموضوع ده. ورامي ده لما عرف، اتصل بيها وطلب منها يعرف مين أبو الطفل اللي في بطنها، وإنه لو ما عرفش هيحكي كل حاجة لحازم. وساعتها صفاء خافت واختفت فترة، وعرفت إنها قاعدة في شقة إيجار، وحازم عمل بلاغ تغيب لما اختفت وما ظهرتش غير بعد ما أنا نفذت الجريمة.
وأنا ما كانش قدامي اختيار تاني.. أنا اللي قطعت الفرامل في عربية حازم عشان تتقلب بيه ويموت. أيوه، أنا القاتل وبعترف بده. وبعد ما حازم مات، رامي رجع يتصل تاني بيها، وساعتها صفاء اكتشفت إن رامي ده مش فارق معاه سمعة أخوه، ولكن اللي فارق معاه هو الطفل اللي هتخلفه، واللي هو أصلًا مش ابنه. وطبعًا الطفل ده هيورث كل حاجة. كان فارق معاه الفلوس أكتر من شرف أخوه، وطلب من صفاء تنزل الطفل، مع وعد منه إنه مش هيفضحها وهيسيبها تكمل حياتها عادي، ولكن صفاء رفضت وقالت إن الطفل ده يبقى ابن حازم، عشان بعدها بفترة أصحى على خبر قت. ل صفاء.
وكنت عارف ومتأكد إن اللي قتلها هو رامي، أخو حازم، عشان الميراث. وبعد ما كل حاجة خلصت وافتكرت إني هعيش في أمان، جالي تليفون من الدكتور منصور بيطلب مني أطلع بره البلد وأداري، عشان في كلام وصل إن حازم كان بلغ عني فعلًا، وإني دلوقتي بيتعمل عليا تحريات، ولو فضلت مكاني الناس دي هتخلص عليا، عشان أنا بالنسبة ليهم كارت محروق دلوقتي، ولو اتقبض عليا هعترف بكل حاجة. وعشان كده أنا سجلت الفيديو ده.. ومعنى إنكم بتسمعوه دلوقتي يبقى أنا ميت.
....
قفلت الفيديو اللي كنت بسمعه أنا ووكيل النائب العام، وعلى طول طلع إذن بالقبض على رامي عبد الكريم، وطلعت قوة من موقع الحادث اللي كنا واقفين فيه، وقبضنا على رامي عبد الكريم في بيته. كان قاعد وبيمارس حياته عادي جدًا، وفاكر إن الموضوع عدى. وبعد ساعات قليلة، كان واقف قدامي في المكتب، وقلتله:
_ خطة في منتهى الذكاء. لبست لبس أخوك، وأجرت عربية من نفس نوع عربيته ونفس اللون، وكنت عارف إن في كاميرا بتصورك، ومستحيل حد كان يشك فيك. وعرفت إن بعد موت أخوك، صفاء اللي كانت مختفية وكانت خايفة لتقول لأخوك على الحقيقة، ظهرت وراحت العمارة اللي فيها الشقة اللي حصلت فيها الجريمة. جهزت كل حاجة واتحركت على هناك، وكنت مراقب العمارة من بعيد لبعيد، لحد ما البواب ساب العمارة وراح عشان يشتري من السوبر ماركت اللي آخر الشارع. وكنت عارف إنه مش بيطلع الشقة خالص. طلعت فوق ودخلت الشقة، ربطتها وضربتها وحقنتها بحقن الأدرينالين، وكنت بتحاول تبين إن الوفاة حصلت بسبب توقف عضلة القلب، ولما فضلت عايشة خنقتها.
بس السؤال اللي كنت بسأله لنفسي: لما القاتل كان عاوزها تموت بجرعة من الأدرينالين، ليه ضربها وساب كل الكدمات دي على جسمها؟! كنت مستغرب تصرفك بصراحة.
وبعدها نزلت ومشيت من الشقة.. اللي هي أصلًا ملك أخوك، وطبيعي إننا نلاقي بصماته جوه، وفنجان القهوة اللي كان شارب فيه آخر مرة كان في الشقة، عشان أنت كنت لابس جوانتي. وبعدها قررت تخلص من آخر طرف خيط ممكن يوصل حد ليك، صاحب مكتب تأجير السيارات اللي كان فاهم إنك الدكتور حازم. وحقه بصراحة إنه ما يبصش على وشك ويتأكد إنك أنت صاحب البطاقة، عشان لما رجعت الدفتر وشوفت المبلغ المدفوع في تأجير السيارة، فهمت ليه هو ما تأكدش: مبلغ كبير.. وأكيد أقنعته ييجي معاك مشوار بعد ما التأجير خلص، وخلصت عليه.
فرد عليا رامي وقال:
= برافو يا باشا.. كل حاجة حضرتك قلتها مظبوطة. أقنعته إنه في مصلحة هياخد فيها أضعاف اللي أنا دفعته في تأجير العربية دي، وعرفت إنه طماع وبيجري ورا القرش. ولما وصلنا للمنطقة اللي لقيت فيها العربية، خلصت عليه. كنت خايف يعترف عليا لما يكتشف إن العربية دي كانت موجودة قدام مسرح جريمة.. وبصراحة أنا استغربت إنكم وصلتوا ليا، أنا كنت فاكر إني خلصت على الموضوع.
_ تخيل بقى إن اللي يكشفك هو نفس الشخص اللي كان على علاقة بمرات أخوك.. الدكتور سعيد، صاحب أخوك الله يرحمه، هو اللي قال واعترف إنك كنت طمعان في الميراث، وعارف إن الولد ده مش من صلب أخوك، وعشان كده كنت عاوز صفاء تنزله، عشان طبعًا كان هيورث كل أملاك أخوك الدكتور حازم عبد الكريم.
...
رامي اترحل للنيابة، وإحنا بدورنا قدرنا نقبض على الدكتور منصور سليم، مدير المستشفى، وكان متلبس في عملية تجارة أعضاء، ولحد دلوقتي لسه بيتحقق معاه.
أما رامي، فتحكم عليه بالإعدام؛ لأنه ارتكب جريمتين قت. ل مع سبق الإصرار والترصد.
وبالنسبة ليا، الشيطان اللي في القصة دي هو رامي، اللي لما تشوف الحكاية من بره هتقول إنه قتلها عشان شرف أخوه، ولكن في الحقيقة هو قتلها عشان الميراث، رغم إنه كان ممكن يفضحها ويتعمل تحليل ويكشف قدام الناس كلها إن الولد ده مش ابن أخوه. ولكن تعمل إيه في النفس الأمارة بالسوء، واللي للأسف موجودة في نفوس البشر؟
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
