رواية جثة النصاب الفصل الرابع 4 بقلم ياسر عوده

 

 

 

رواية جثة النصاب الفصل الرابع والاخير بقلم ياسر عوده



كلامه صدمني، لانه فهمني ان بطاقه نصار مزوره، ومعني كلامه انه نصب عليا وكمان جوازي منه باطل، وقتها انا قررت اني لازم اوصل لكل الحقيقه، واتصلت بـ اولاد عمامي وحكتلهم كل حاجه حصلت، ومن صدمتهم قالولي اني اسيب الموضوع عليهم، وهما هيتصرفوا بس كل اللى محتاجينه مني بينات صديق نصار اللى اتعرفت عليه عن طريقه في اول لقاء بنا، ومن حسن حظي اني كنت محتفظه ببيناته عندي في المكتب بتاعي، وهما بعد كام يوم اتصلوا عليا علشان اروح لمكان تباعهم، ولما روحت هناك لقيتهم موجودين ومعاهم صديق نصار واللى كان اسمه تامر.
طبعا اولاد عمامي كانوا ضربوه وقتها علشان يتكلم ويقول الحقيقه، ولما روحت ابن عمي قاله:
-ارجع احكي كل اللى انت حكيته من الاول وبالتفصيل، علشان لو ماعملتش كده وقتها هندفنك مكانك.
واتكلم تامر وقتها وقال:
-صحبي نصار اسمه الحقيقي مش نصار، والحقيقه انا نفسي ماعرفش اسمه الحقيقي ايه، هو كان بيقولي ان اسمه ايمن، بس حتي الاسم دا انا مش متأكد منه.
-ايه حكايته نصار ولا ايمن اللى انت بتقول عليه؟
-انا عرفته من حوالي سبع سنين، اول مره قابلته فيها كنا في محطه قطار، كنت مسافر للاسكندريه وقتها، ولما قابلته عرفني على نفسه انه واحد من رجال الاعمال، ورغم انه ماكنش راكب vip بس هو قدر يقنعني انه اضطر يركب في العربيه المميزه علشان مالقاش مكان في ال vip وفعلا صدقته، وفضل يتكلم معايا عن مشاريعه اللى عملها، واقنعني بالنهايه اني اديله المبلغ اللى كان معايا علشان يشغلهولي معاه ويديني كل شهر مرتب شهري، ووقتها قال ان المرتب هيكون كبير ومجزي جدا.
بصراحه وافقت وبعد ما رجعت من الاسكندريه اتقابلت معاه واديته الفلوس اللى كانت معايا، ووقتها كتب على نفسه شيكات وقالي اني مالقش وان فلوسي معاه في امان.
وبعد ما دا حصل انا ماشوفتهوش تاني ولمده ست شهور تقريبا، كان زي اللى اختفي او اتبخر، وكل الناس وقتها قالولي انه نصاب ونصب عليا، بس انا ميأستش وفضلت ادور عليه، كنت عارف اني هقابله تاني ودا اللى حصل فعلا، في يوم شوفته بالصدفه ومشيت وراه وقتها وعرفت هو بيقعد فين، ومسكت فيه واتخانقت معاه وكنت هاخده للقسم، وقتها قالي:
-وحتي لو خدتني للقسم، ايه اللى هيحصل انت هتعملي محضر وانا هعملك محضر، ويبقى محضر قصاد محضر والشيكات اللى معاك مزوره والامضا اللى عليها مش بتعتي، وحلني بقا.
رديت عليه وقتها وانا منهار وقولتله:
-منك لله يا شيخ، ربنا ينتقم منك، بس انا مش هسيبك حتى لو هقتلك.
-طيب ليه تودي نفسك في داهيه، انا عندي حل مناسب ليك.
-حل ايه؟
-تشتغل معايا لغايه لما تاخد كل فلوسك.
-انت عاوزني اشتغل معاك ايه، نصاب؟
-مش اسمها كده، اسمها تفتيح مخ، بص انا مش من طبعي انصب على الرجاله، بس انت اللى استفزتني وكنت طيب زياده عن اللزوم، بس اوعدك هرجعلك كل فلوسك لو ساعدتني، انا مش عاوز منك غير انك تمثل الدور اللى هقولك عليه.
مش عارف انا ليه وقتها سمعت كلامه، يمكن علشان كنت عاوز فلوسي، وفعلا ابتديت اسمع كلامه، كان هو اللى بيحدد الست اللى هينصب عليها، وكان بيخليني السبب في معرفته بيها، زي اللى حصل مع مدام انتصار، هو اللى كان محدد انه هينصب عليها، من ساعه لما شفها اكتر من مره في المطعم اللى بتقابل عملاءها فيه، وعرف انها مرتاحه ماديا وسيده اعمال وعندها شغلها، وقتها قرر انه ينصب عليها، وطلب مني اتواصل معاها على اساس اني عاوز شقه، وهو كأنه بالصدفه هيكون معايا علشان يتكلم معاها، ولما هي لقته هو اللى بيتكلم في التفاصيل خرجني من اللقاء وكمل معاها، بس هو قبل ما يقابلها كان عارف كل حاجه عنها، وعلشان عارف هي معاها فلوس قد ايه وافق على الشبكه والمهر وكمان مؤخر الصداق.
ــــــــــــــــــــــــــــــــــــــــــــــــــــــــ
لما تامر حكي كل القصه دي انا قولتله:
-يعني كل اللى حصل كان خطه هو محضرها من قبلها؟
-بالظبط كده.
ومن بعد ما عرفت من تامر كل حاجه، انا طلبت من اولاد عمامي انهم يجبولي حقي من نصار، وفعلا هما مسكوه واجبروه يطلقني، وكمان دفعوه كل حاجه كان كاتبهالي، وعلشان هو كان خايف منهم هو عمل كل اللى طلبوه منه.
لما خلصت انتصار كلامها ضابط الشرطه سألها:
-وليه مابلغتيش الشرطه عنه وقتها؟، يمكن وقتها كنت حميتي ضحايا تانين منه؟
-فكرت فعلا اعمل كده يا فندم بس خوفت على سمعتي، انا وحده شغاله في سوق العقارات وليا اسمي وسمعتي، وخوفت الناس تعرف اني اتنصب عليا الناس يفتكروني بعد كده ست سهله او يقولوا عليا كلام مش كويس.
-طيب لو كنتي فعلا خايفه من اللى انتي بتقوليه دا، ليه جيتي تقولي الحقيقه دلوقتي؟
-علشان لو انا ماجتش بنفسي وحكيت، اكيد انتم كنتم هتوصلولي باي شكل، ممكن بعد يوم او اتنين او حتى شهر، وانا حبيت اظهر حسن النيه وجيت قصرت عليكم الطريق وجيت احكلكم بنفسي كل حاجه اعرفها عنه.
ـــــــــــــــــــــــــــــــــــــــــــــ
وبعد ما خلص الضابط تحقيقه مع انتصار سبها تمشي، كانت مستبعده من دائره الاشتباه بسبب سمعتها وشغلها اللى كانت خايفه عليهم، دا غير ان هي خدت كل حقوقها من نصار وهو ماقدرش ينصب عليها في اي فلوس.
التحريات كانت اسهل من بعد ما حكت انتصار كل المعلومات دي، الشرطه كانت فاهمه ان اللى ارتكب الجريمه دي وحده من ضحايا نصار، واللى هيساعدهم في معرفه ضحايا نصار هو تامر صديقه وشريكه، رغم انه اتنصب عليه من نصار، بس دا ماكنش مبرر انه يساعده للنصب على ناس تانيه.
ولما تم استجواب تامر اللى قعد وقال:
-ضحايا نصار كتير اوي يا فندم، انا اللى اعرفهم كتير مش قليل، واللى ماعرفهمش اكتر.
رد عليه الضابط وقاله:
-انت قولنا اللى تعرفه، والباقي سيبه علينا احنا هنوصله.
وبداء تامر يحكي عن معظم الستات اللى نصب عليهم، بس اللى شد انتباه ضابط الشرطه ان تامر حكي عن وحده من الستات دي وقال:
-اغرب وحده انا شوفتها كانت هند، اصلها ماكنتش ست عاديه، هي كانت تعرف نصار من حوالي سنتين تقريبا، ورغم انه نصب عليها وعمل فيها حاجات كتير، ورغم كل دا هي فضلت على علاقه بيه وماسبتهوش خالص.
-وضحلنا كلامك، ازاي نصب عليها وفضلت على علاقه معاه؟
-هند كانت ظروفها مختلفه شويه عن اي ست، اتولدت في بيت لقت ان امها متحكمه في كل حاجه، في حياتها وفي ابوها وكمان حيات اختها، وامها كانت بتحب الفلوس وهند كانت جميله، واول صدمه في حياه هند لما امها اجبرتها تتجوز من راجل بنها وبينه 25 سنه، كانت هي عندها 20 سنه واللى اتجوزها كان عنده 45 سنه، ومش بس كده دا كان متجوز ومخلف كمان، واولاده تقريبا من سن هند، وقعدت هند معاهم في نفس بيت العيله علشان تشوف العذاب كل يوم، مره من جوزها اللى كان بيغير عليها جدا، لدرجه انه كان مانعها من الخروج ومش بس كده حتى الوقوف في البلكونه او الشباك ممنوع عنها، دي لو حتي حبت تنشر الغسيل لازم يبقى موجود وعينه عليها، ومع مرور السنين كبر جوز هند ووصل لسن ال 60، ووقتها كان مجنون بيها، كان متأكد انها بتخونه، فرق السن اللى بنهم كان مجننه حرفيا، واخيرا الدنيا ضحكت لـ هند لما جوزها مات، وقتها خرجت من بيت العيله بس كمان كان معاها من جوزها ولد وبنت، وراحت تربيهم بعيد عن عيله جوزها، ورغم كده فضلت تحت عنيهم، ديما كانوا مهددنا لو فكرت تتجوز هيخدوا منها عيالها وكمان ميراث عيالها، وكل التهديدات دي خلت هند تعيش حياه صعبه، وفي يوم قابلت نصار وبمجرد انها قبلته وقعت في حبه، كان مفهمها انه محامي ومع مرور الايام هند بقت تحت طوعه، وابتدي ياخد منها كل حاجه، في البدايه اتجوزها عرفي من غير ما حد يعرف، وبعدها سرق الورقتين العرفي وقطعهم، ورغم انها اكتشفت دا بس ماقدرتش تبعد عنه، كان قادر يسيطر على عقلها، وسحب منها كل فلوسها ولولا ان فلوس اطفالها في حساب بنكي وماتعرفش تسحبهم، كان نصار قدر يخدهم منها.
ضابط الشرطه سأل تامر وقاله:
-يعني هند لسه على علاقه بـ نصار لغايه دلوقتي؟
-ايوه يا فندم، وهو حاول يتخلص منها قبل كده بس كان بيرجعلها لما بيبقى عاوز منها علاقه غير شرعيه، والحقيقه انه كان بيعرف يقنعها انه لسه بيحبها وماحبش حد غيرها.
ـــــــــــــــــــــــــــــــــــــــــــــــــ
الاقوال دي كانت كفيله انها تخلي الشرطه تقبض على هند، وفعلا تم القبض عليها، وبتحولها للطب الشرعي اتضح ان خصله الشعر اللى كانت في ايد المجني عليه متطابق معاها، ولما ابتدي الضابط يستجوبها قالت وهي بتبكي:
-انا عارفه اني عملت حاجات غلط كتير في حياتي يا فندم، بس هو نصار السبب في كل اللى حصل.
-علشان كده انتي قتلتيه؟
-ماقتلتهوش يا فندم، انا بعترف اني كنت ناويه اقتله، بس ماقدرتش اقتله.
-قولي على اللى حصل بالتفصيل؟
-هو اتصل عليا وطلب مني اروحله الشقه، مع اني كنت واخده قرار من قبلها اني ماقبلهوش تاني واعيش زي اي وحده محترمه لـ اولادي وبس، ورغم كده قدر يأثر عليا كالعاده وفعلا روحتله، ولما حصلت العلاقه بنا لقيته نام، وقتها فكرت اني دي فرصتي علشان اتخلص منه، وفعلا روحت وجبت سكينه بس لما جبتها وحاولت اقتله ماقدرتش، افتكرت عيالي والفضيحه اللى هيعيشوا بيها، وانتبهت انه مغمي عليه ولما حاولت افوقه مافقش، وقتها خوفت يكون مات ويتهموني فيه وانا فعلا ماعملتهوش حاجه، وروحت وخده حاجتي كلها وشغلت كل التكيفات علشان لو مات ماحدش يكتشف الجثه على طول علشان ابعد الشبه عني، وكمان خدت الفلوس اللى كان عاينها في الخزنه اللى عنده، كنت عارفه راقمها لانه فتحها قبل كده قدامي، والفلوس دي من حقي اساسا، ودا كل اللى حصل يا فندم.
ــــــــــــــــــــــــــــــــــــــ
طبعا ضابط الشرطه ماكنش مصدق هند، بس الصدمه الحقيقيه حصلت لما وصل التقرير النهائي للطب الشرعي، واللى بيأكد ان موت نصار كان بالسكته القلبيه وبسبب تناوله كميات كبيره من حبوب المنشطه.
طبعا تم القبض على هند واتهمها بتضليل العداله والتستر على جثه نصار، وتم قفل ملف القضيه بعد اعتبار الموت قداء وقدر وبدون اي شبه جنائيه.


انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم



شكرا لزيارتكم عالم روايات سكيرهوم

تعليقات