رواية خلخال مشوه الفصل الخمسون 50 بقلم زمرده

 

 

 


رواية خلخال مشوه الفصل الخمسون بقلم زمرده




منين نچيب مثلك حتى ننساك
ومنو المثلك يعوضك لو خسرنه
الشبه كل اربعين حجاية تنگال
اذا واحد يصح چان انتضرنه

°غاية°

احترگت ،گبال عيني ،گبالي النار ماخلت بيها شي ينشاف ،عبارة عن كتله نار وتفتر بالحديقة وعبرت على الحوش ،صيحت عيوني عليها تمنيتهن بالعمة ولا شافنها هيج لايبه روحها تريد اليطفيها، ماكو احد من الولد هنا ،وهاي انا الجبانة روح بروح حطيت وياها ،جدة تسودنت فكت باب الشارع وتدور احد ينقذها، بس ماكو النار اكلت جسمها، هدومها ماعن عليها

_ راححح تمووووت عمة لحگيلهااا

عمة عطاء چانت اشجع وحدة بينا، فكت الماطور ونگعتها الا طفت وبساع فقدت الوعي وي طبة صخر من برا يركض ،بهت بساع من شايفها ممدوده وملتمات عليها احنة
غضة : الحگ لمريتك جدةةة صخر ،احترگت ميمنة الحگلهااا

بلايه وعي لطم على رأسه ودنگ شالها، وگبل لا يطلع صاح علي اچيبله شي يسترها بيه، گمت من الگاع وانا رچليه مثل الخيوط اسند ظهري على الحايط ،اطيته بطانية امس هي غاسلتها، لفها بيها وطلع يركض يصيح على مدري ياهو من الولد برا

انداريت على جفون حاطة عون بحضنها وصوت بچيها وبچيه واحد ،غمضت عيوني وحتى الغواشه المحاوطتهن تأملت بيها وبلكن من افتح الگه الصار حلم وراح اشوفنها تخبز كلشي مابيها ..! !

بس وعاني على حجم المصيبة اللفتنه صوت بركة من طبت تسأل
بركة : شصايرر، سمعت عياط ؟

درت وجهي من تلاگت عيوني بعيونها المنتظرات الجواب ،رچفة ايدي والدخان ،وصينيه الشناگ الطايحة بالگاع ،كلهن ما ركزت بيهن مثل
شالها الطايح بالگاع وبعد بيه جمرة النار، مشت شالته وتلفتت تسأل

بركة : شال ميمنة هذا ،شبيها اختي جدة ؟؟؟

رچف صوتها بأخر حجايتن ،ومن الصعب نگلها الحقيقة
غضة : لاحتها نار التنور وخذاها صخر للمستشفى
مابيها شي لا تخافين

جدة بالگوة كاضه عبرتها وتحجي، بحجيها مو بس زرعت امل بداخل بركة ،حتى انا الشفتها بعيني
بركة : جا شبيچن ،ليش هيج وجوجهتچن مخطوف لونها اذا مابيها شي

غطت وجها بالشيله تبچي ،بهتت بركة ومشت بساع دنگت گبال جدة
بركة : هااا جدة تچذبين علي مووو، ميمنة شبيهااا عليكم الله حاجوني

گامت تفتر بيناتنة ،كضت ايد امي
بركة : ميمنة عمة ،اختي شبيها، ميمنة ،والله احسن بيها شي

الكلمة تعيدها مرتين الا تنفهم، شافت بس شالها وأثار الصار وهيج حالها، چا انا شگاولن واحجي
على عيوني الشافن كلشي وشلون اوصف الصار ثگل على گلبي وحتى الهوا الاتنفسه يخنگني جمرة
نارها والدخان كلها بيه، واضلن إامل روحي وانا اسمع عياطها وحالها من گالتلها امي

زهرة : احترگت بساع بساع اخيتج ،ادعي يلحگولها

امي اكثر انسانة لو صار شي تگول ،لا تستعجلون وتاملوا خير بس هل مرة حسيت بيها فاقده الامل الضاله انا احاول ازرعنه بروحي ..! !

بركة : لااا ،گولي غيرهااا عمةةة ،تعيشش مووو الله عليكم گلولي تعيشش ،ما ضل عدددي غيرها اخت والله

لمتها بحضنها امي وگمت انا ما مستعدة أشهد حرگة گلب عمة والحيلها المهدود يوميا على واحد من بزرها، غسلت وجهي ومشيت بساع فرشت مصلايتي وتوجهت لرب العالمين مثل ما وصتنا هي كلنه وخذناها تعلوم "أكبر هم تحله فرشة السجادة"

من تشوفوني بفترة الامتحانات مهومة ،تجي تاخذ كتابي مني وتگلي
_گومي صلي هسة يخف تعبج .

غطيت وجهي وگطعت صلاتي ابچي من تذكرتها جبرت روحي ورديت صليت من جديد وطلعت
بساع
على صوت عياط اختي صاحبتها واقرب انسانة
الها
هيوفة : احترگت ،شلوون احترگت ،ليشش مااا طفيتوهاا بسااااع، والله اموتن لو صارلها،اختي يمةةة

ضلينه كلنه بالحوش ،ومابينه الطبت جوه حتى الهوا اليحرك الباب يفززنه ،فزيت وطفرت من مكاني
من شفت ليث طب ،گبلي ركضتله وحالها يفطر باب الگلب
بركة : هااا ليث ،اختيي شلونها عليك الله، تلاحگولها مووو ،حاجيني، زينه موو ؟؟

جر نفس ثگيل وبتعب خله الخوف يتضاعف بگلبنه
ليث : ادعولها

شيماء : يمةةة بتي ،يعني مو زينة مووو، ولج ميمنة يمةةة

اندار للجهه الثانية ،ومن ركزت عليه چانت عيونه مغورگة ،ضليت صافنه و واگفه بمكاني حتى من طب جوا
شيماء : ولكم والله حيل ما ضل عدييي، انا بس بصائر كافي علي ،ناخيتك يا علي يابو الحسن توگفلهااا

شوي هدات ارواحنا من خوفها من رد أبوي وجدي وعرفنا منهم ثلات أيام لو عدن معناها عدت مرحلة الخطر ،كلنه ساعة ساعة حسبناهن، نوم چافه عيني اخافن انام
وثاني يوم بالليل كلهم ملتمين ولحت علي امي حتى امشي للغرفة واغفالي شوي ،هستوني غمضت عيوني وانرج البيت مو بعيطه وحده، عياطهن من قوته گمت مرتين وطحت

و وي فتحتي للباب بوجهي صارت
_ ماتت ميمنة

طحت بمكاني اللطم على روحي و وياهن اعيط
_ ماتتت يمةةة لاااا، ولكم اختنة يمةةة، ميمنةةة

كلشي صار بساع، أخوي الما شايفته ثلاث أيام طب شايل تابوتها وي اخوانها حطوه
بنصنة ،اتلفتت ما اريدن اصدگ بس كلشي يوحي الصار حقيقية وهاي جابوها حتى نودعها وهي جثة بلاية روح ...
بركة : يمةةة اختي ،ماتتت اختي ،ماتت الما عدييي غيرهااا
كومت شعرها خصلاته صارت بين ايدها فاقده وما تحس بروحها
بركة : جاا هيييج، هيييج وحدي اضلن بلاية اختت ماعدددي بعد ولا وحدة ،أنت لو بصائر اعاتب منييي بيچن ،ريت يوميي انكتب گبل يومجج، گلتلج ضليتي بس أنت الي وحرمتيني منج

ريحانة : وعوون ميمنة وعووون الزغيرون ولج مفارگج ليلتين ما نااام ،يا حضن يسد مكااانج اله

ما اعارف الوكت الضلت بيه شگد بس كلش زين اتذكر وجهنا التشوهت من اللطم، اتذكر ثوب امها المشگوگ من طوله واتذكر حال بركة وما انسى
من شالوها وعيطانه وبيچنه وراها وحتى يسكتونه ردوا حطوها بالگاع واتقربت عليها هيفاء الچانت مبتعده وصافنه عليها ،ومن كل جهه التموا اخوانها يبچون ويعاتبوها وكل واحد بينا عده عتاب الها ما يگضي
برهان : خويةةة يابعددد اخوووج، ميمنة ياخوووية

جعفر : ليشش تخلينا، ليششش بعازتج احنه ،مو اگلج امي الثانية أنت ،وين اكو أم تخلي ضناهااا

برهان : چنت دوم اوصيج لو جابوني شهيد اللطمي علي وگابلي تابوتي وانعيي، بس ما حسبت انااا شيال تابوووتج

عبد الحق : ولج خووية منو الگالج بينه حيل فگدتج ،ياشمعةةة بيتنة ياخويةةة شلووووون نفارگج

بركة : ريتهاا النار حارگتني گبلج ولا شفت هذا اليوووم يمةة اختي يمةةة

عمي عد طرف التابوت گاعد يبچي وابوي وعمامي كلهم واگفين والدموع تجرري، واليريد يعاتبها گبل اسمها يگول
محمد : يالحنينة ياااعمي يا مررريت ابنيي، كسرتينة بعد عمممج

هيوفة : يعني هاي هي بعد ما اشوفنج، ولا بكل مكان وراج افتر ،ولا اكو احد يسمعلي، ولا من اطبن أول وحدة اشوفج، جا هيج ميمنة منو الچانت تگلي شوكت تجيبين واشيلن ابنج ،تالي گبل لا تشيليه انشال تابوتج

جراها ضيرم من صارت تلطم على روحها وفرفحت بين ايده تگمز من طلعوا يشيعوها وصوت
"لا اله الا الله" سجينة وتنحط بنص گلوبنه
هيوفة : اروحن ،حاجيهممم اروحن وياهم ،ضيرررم احجي وياااهم

وبركة من جهه ثانية تخبلت بين ايد جعفر
بركة : اذا ما تاخذوني امووتن الحگهاا والله اخذونيييي

شمرت عليها الحجاب والعباة عمة عطاء
عطاء : اخذوها

غمض عيونه چبده حمره ،لبستن بأيد ترجف شعرها نصه طالع وركضت گبل جعفر تطلع حافية بس تريد تلحگ عليهم، طبيت افتر بين الوادم واحسن بروحي اشوفنها بين الوجوه، ومبين بين الكل
احنة اهل المصاب مبينه عناوينه من دمايت وجهنه گعدت على الدرج ،صافنة، البيت ما بيه حتى چرة النفس گد ما متروس نسوان، معقولة هسة يطلع كل شي حلم وافزن منه ؟؟؟

بس من سمعت صوت حدايد چادرها برا تنصب استوعبت، الصار حقيقية وهاي هي بدت ايام فاتحتها وصار لازم نوگف بيها بس وين ،ياهي بينه تگدر
نسمات : غاية

رفعت راسي بثگل عيوني احسنهن مورمات
_ هااا

نسمات : گومي شوفي عون بكلت عدج يسكت

بلايه ما ارد گمت ومشيت للغرفة چانت گاعدة ريحانة وهو بحضنها يبچي ويردد
عون : ماما

دموعي بساع طاحن من سمعتها بحلگه ،شگد چانت تأذينة من يگولها بس هسة اكثر ،هسة صدگ عارف معناها والمنو تنگال وعلى منو فك عينه وشني فگده الحقيقي

عون : ماما

فتحتله ايدي اريدن بس شهگتي تروح
_ تعال حبيبي ،تعال

شمر روحه علي يبچي والشهگه البصوته اخذتلها ساعة الا راحت ،نزلته على المخده من نام وضليت گاعده عد رأسه طر الصبح وانا على هاي الگعده مره اصفن واگولن حلم وراح افزن منهه ومره اتذكرها وابچي وخوت ارواحنا وخاف ضاله ذرة من الحيل عدنه اختفت من اجوي
من النجف دافنين ثاني وحدة من خواتنه، تلگيناهم عد الباب ومن بين الكل طبت بركة بالبداية ما عارفتها وجهه مختفية علومه ،چانت ساندتها خالتها

مشيتلها حايرة شنحجي الاحجي وياها، حضنتها وهي وي كل حجايها تحجيها تشهگ
بركة : كسرن ضهري وخلني وحدي ،شلون يگضي العمر بلياهن

درت بدموع اباوع لعمة ،صوتها رايح بس ما تگدر تسكت
شمياء : يمةةة يااا بزر بطنييي، يمةةة يا چبيرتي يا ميمنة يا يمةة ،دفنوهاا گبالي خية زهرررة، نزلوهااا گبالي ،والكم سنة ونص فگدت ثنيين ،على ياهيييي اصبرر روحيي

غطيت وجهي ابجي بصوت ،والنسوات يهونن عليها وتوسلن بيها الا رضت تطب جوا ،درت عليها امسح بعيوني هي صافنة عيونها على الدرب اليودي للتنور

_ بركة

اندارتلي وبلعت ريگها اكثر من مرة الا گدرت تگول
بركة : هاا

_ تعاي

كضيت ايدها وطبينه جوا
بركة : عوون؟

_ نايم

بلايه ما تسألني وين مشت للغرفة وانا وراها ،چان هو گاعد ويمه نسمات مدري شعجب ساكت عدها رفعت رأسها وتبدلت نضراتها للقهر من
شافت حال بركة ،گامت على حيلها من دنگت بركة شالت عون وحضنته ودموعها على الساكت ينزلن وانا ونمسات وياها نبچي وهو يتلفت ما مفتهم شي

كض وجها بأيده الزغار وهي تباوعله بنضرات مليانات حسره
عون : بكه

بركة : ياروح بركة ،عون الزغيرون الضل تذكار من بنات امي

من طاحن دمعها مسحن يباوعلي
عون : بكه اوااا، بكه

°جفون°

امسح بدموعي واشتغل وكل ما اركز وي صوت الملايه يردن يصبن عيوني ،وگفت يم السنك اجرن النفس بالگوات
نمسات : جفوون، عليج الله صيحيلهم يشغلون المولد بساع

هزيت رأسي ب أي ودگيت باب المطبخ حتى يجينه احد ،شوي وسمعت صوت بره
نوح : هااا شرايدات ،وينچن

فتحت شوي من الباب
_ شغلوا المولده بساع الملاية جاي تقرا

جر الباب سداه بلايه حتى ما يرد، هزيت ايدي ورديت اعزل بالمطبخ ما ضل شي لوكت العشا شيگضيهن هل أيام هذا أول يوم وهيج ثگيل على رواحنه ،ورا صلاة المغرب فتحوا باب المطبخ
على كبره وبدت الهوسة، جوا ايدهم نتراكض حتى

نوح : جفووون

درت بايدي سلة الخضرة
نوح : اطي الخضره لغيرج بساع

اطيته بأيد وحده من بنات أل خبير
نوح : تعاي احاجيج

مشيت يمه مستغربة ،دنگ علي يشاورني
نوح : مرة عمي كاظم راح تجي وي بناتها ،اطي خبر لجده

_ شعجب مو جدي ما يرضى

نوح : هذا عزه مابيه جدج يرضى لو لا ،وكلها تعارف عمج رد مو مال ما يوگفون ويانه

_ اممم

نوح : بساع

هزيت رأسي ومشيت من بين النسوان زرگت يم جدة
_ جدة

دارت علي چانت تحجي وي نسوان أل خبير ملتمات عليها وخواتها هم
غضة : هاا

_ عون يگول مرة عمي كاظم وبناتها راح يجن وگالي اگلج

غضة : خوش

وبس اچن جده چانت طبيعية وي مرت عمي وما بينت ابد هاي اول طبتها النه والبنات خطية گامن ويانه ايد بأيد لان بس انا وريحانة وبنات أل خبير وعود حفيدات ألرباح موجودات بس ابد ما حركن روحهن والفاتحه چانت ثگيله

وبالليل بس هادت الوادم گالت
نسمات : نلم الفراش نغسله .

_ يااا ولج يا غسل هذا

نسمات : لازم باعي حال الظيم حاله صار ،عدكم غيره نفرش؟

_ أي اكو

نسمات : جا گومي وياي

_ بس ارتاح شوي ضهري راح يموتني

مددت بنص المطبخ ،رفعت راسي من سمعت صوتها طبت ،بطنها گدامها وملامح وجهه مكسورات ،دمعن عيوني وانا اتذكر صداقتهن الچنت بيها اضرب المثل لصداقتي انا وحواري

هيوفة : اريدن امشي ابدل هدومي

ريحانة : شو وجهج اصفر ،شبيج ؟

هيوفة : بطني حيل توجعني

ريحانة : يااا يمةةة ،من شوكتت

گعدت عد راسي وردت ضهرها على الحايط
هيوفة : اريدن اموت، ما جاي استوعب الصار والله

ريحانة : ليش منو بينه مستوعب

غطت وجهه تبچي وتحجي
هيوفة : من أجيت هنا گبل چم يوم رادتني اباتن هنا وانا ما رضيت گالتلي مشتاگتلج صار هواي ما مسولفه وياج ،وانا گتلها ما اگدر

گعدت على حيلي ،بأيدي مسحت على چتافها وهي كل جسمها يهتز من البچي ،ويا ليل الفواتح شگد ثگيل تهيج بيه الذكريات والحزن يتضاعف، الما اخذ حيفه من البجي هسة وكته
هيوفة : انا روحي احسنها جاي تطلع ،شلون اعود روحي على فرگاها

طبت تسحل بروحها ،گامتلها هيوفة وحده تباوع للثانية وبهاي وگفتهن ضاعت مني البيهن مكسورة اكثر ،بصوت ممسموع شهگت وطاحن دموعها

بركة : راحت ميمنة ،صاحبج واختي لافها التراب

جرتها هيوفة تحضنها وسوا يبچن ،طر الفچر وگضه الليل بحسرتنة وصوت نحيبنه، التمينا كلنه الوادم الجايتنة نايمة واحنة گضه الليل كله وحده مگابله الثانية ومن بعد صفنه نردد

_ عود صدگ ،هاي هي ماتت

شيماء : يااا يمةةة، جمرة فگد اختها چاوية افااادي شلون اجرع فراگ الثانيةةة

عمن عيونه من البجي ،هل مرة من صدگ ما نگدر نجرع الصار ،مصيبتين باقل من سنتين
وثنيناتهن طاحن على ضهر عمة شيماء ،صوته من برة دگ الباب خانگته العبيرة مبين من گال

برهان : يمةة

شيماء : تعال يابعد كسرة امك ،تعال يابعد مصايبها وحزنهاا

ماده رجليها وتنحب، مگابلتها بركة الضال لا وجه ولا رگبه ما جرت دم وكل ما تلطم على روحها ونكضها تردد
بركة : هدوووني، خواااتي وحده بصف الثانية اندفننن
ريحانة : راح تموتييين والله ،بس اطي لروحج فكه طبگ حسسج

تطگها على وجهه تريدها تصحى، فتح الباب وطب يدورها بيناتنة
برهان : بركة

گال اسمها وگعد گبالها
برهان : اسكتيلج شوي لخاطري، ما ضل عدي حيل بعد ،لا تهدين حيلي فدوة اروحنلج

بركة : مو بيدي ،والله مو بيدي ،ما يروح من بااالي شلون دفنوها، برهااان مو تعارف انا اگولن عليها امي ،احبنها والله ،چنت ما ازعل حتى من تحجي علي ،ليش خلتني ومشت

حضن راسها لصدره وهي كاضه دشداشته السوده تبچي وهو دموعه بطرف رمشه، مسح على رأسها من حس بيها هدت و وخرها
برهان : گومي ارتاحي ،ما تعبتي ؟

بركة : تعبني فرگاهن والله

برهان : وياج بنفس المصيبة ،بس خايف عليج ضليتي بس أنت

من گال هيج جروحنة كلنه مو بس جروها ،لم وجهه بين ايده من بجت تتلفت
بركة : ضليت بس انا ،يعني صدگ بس انا وما عدي اخت وانا الچانن عدي ثنين

من بدت تگعد الوادم گمنا راكنين حزنة على جهه وكاضين الفاتحه، ويوم الختمة چان اصعب يوم على ارواحتنه
نسمات : راح تجي الملاية ،ياس ماكو محد جابلنه

اشرتلي من بعيد عفت نسمات ومشيتلها، بس دنگت عليها گالت وصوتها گبل الحجي يسولف تعب
هيوفة : خل احد يمشي لبيت عمي يوسف ،جيبوا ياس من الزارعته

_ صار

مشيت بساع للمطبخ من طبت الملاية ،دگيت الباب محد اجاني ،فتحته ومديت رأسي ادور هلبت احد هنا
نسمات : طبييي ولج لا يشوفج احد

انداريت عليها
_ والله ما اطبن ولا اخلي صينيتها بلايه ياس ،هي تحبه

اول عباة أجت گدامي لبستها وطلعت وهستوني اريدن اطلع وسمعت صوت وراي
نوح : ويين ماشيةةة

انداريت عليه كاضه العباة بأيدي ولامتها لان مابيها طباگه
_ امشي لبيت عمي يوسف اجيبن ياس لصينينة ميمنة

نوح : الشارع متروس وادم، ماتفكرين من تطلعين أنت ،لو اخذت رچليج

خزرته وانا كلش زين فاهمة شني اليقصده وما گدرت اسكت
_ كلشي لازم اله سبب، وهذا السبب واگف گبالي

عيونه على اصبعي الاشرت بيه صارت ،خزرني ومشى بساع علي ،رديت ليورة
_ وروح أبوي لو تقربت اكثر بعد اشكيك العمي

نوح : اسبج واسب عمج الطلع عيينج، ترفعييين اصبعج بوجهييي

_ واخليه بنص عينك اذا ما تچوز مني

بحجاياتي زدت الطين بله ،طگيتها رگضه جوا من حسيت راح يكضني يگضي بي التوبه
سيوف : اسم الله شبيج ،يااا ليش تركضين ؟؟

حطيت ايدي على گلبي وما خليت حجاية تعبت علي ما حجيتها
_ أبو السفينة المعفن أبو ريحة يريد يطگني ويغلط حتى على عمي

سيوف : ليش شني سويتيله

_ والله ما سويتله شي بس شافني اريدن اطلع يگلي اخذت رچليج

نسمات : وتالي ماكو ياسات

_ هسة اروحن اجيب

كضتني من ردت اطلع وجرت العباة من فوگ راسي
نسمات : استري علينه والله مبين احترگ حرگ منج من صوت صياحه

_ وخله يحترگ شسويله انا

سيوف : يعني ما تعغفين تسكتين لو تعبغين الحجاية

_ ابد والله ما اگدر

سيوف : مثل غمد سبحان الله

دگيت عناد الا امشي اجيبن الياسات وبعدني ما طالعة ورد لگفني ومنوره خشمه صاحني
نوح : طبي انا اجيبن

طبيت جوا حتى بلايه ما اردن عليه، اليوم فرغوا البيت بس للنسوان وما يطبون غير بس ولدنه واكثر شي علي ونوح وهم نصبوا بعد چادر وي الچادر القديم برا هل انشلع گلبي وطلع بوجهي أبو السفينة اكثر من مرة
نسمات : هاا بشري

_ راح يجب نوح

نسمات : خوش

ضلينه انا ونسمات گاعدات بالمطبخ علمود الياسات والملاية بدت قراية وكلساع وحده جايتنة
_ وين صارت الصنينة

شالتها نسمات ومشت وگبلها وصتني
نسمات : حطي الياس بالمزهرية هاي

چانت محظرة مزهرية زغيرة شفاف لونها، هزيت راسي ب أي وضليت گاعدة على نار وطفرت
ذيج الطفرة من اندگ باب المطبخ ،بس شفته گبالي نترت بضوجه

_ وين صرررت، صدگ تحجي يعني

نوح : اخذيهن وبلايه حجي زايد

اخذتهن من ايده وطبگت الباب بوجهه من گال
نوح : لا تطلعين برا بعد

حطيت الياسات بالمزهرية واخذتها ومشيت ،بنص ذاك الضجيج حطيتها بالصنينة ورديت اخذتلي زاوية گعدت بيها ،اكثر من ساعتين تقرا اروحنه خوت من گمت حسيت الدنيا افترت بي وعيوني
متعلگه بخوف على بركة
الطگ خشمها دم ،حتى الملايه طفت السماعة و وگفت قراية، گبلي ركضت غمد وانا لحگتها ،القاري برا يقرأ وما احد موجود عدلت الحجاب
على راسي ودگيت الباب مال شارع حيل ،وخرت بساع من
انفتح ،مد رأسه وملامحه تغيرت من شاف الخوف بملامحنه
عبد الحق : شكوو شصاير ؟

_ بركة ،تخربطت ،خشمهاا طگ دم

من گلتله هيج گبلنه ركض ،سويناله درب طب وطلع شايلها وعليها عباة محطوطه ساترتها و وراه ركضت عمة عطاء ،گلبونه ضلت عدها، ما افتهمنا شي من الختمه بالاخير ومن ردوا چانت روحها خاوية وأثر الكانونة بأيدها ...

طببوها بالغرفة وعمة شيماء ما تحركت بعد من عد رسالها، ما افتهمنا شني البيها، اخذنه عمة عطاء على جهه نسألها

عطاء : ديرين بالچن تچيبن طاري گدام شيماء

سيوف : خوفينه عمة ،احجي شبيها بركة ؟

عطاء : ضغطها صاعد كلش ،والدكتور گال لوما خشمها طاگ دم چان صارلها شي

لطمت على وجهي
_ يمةةة، ليش عمة شيماء عايزة مصايب اكثر بعد

عطاء : الحمدلله عدت ،بس گال حق هل يومين ياخذها للدكتور

حواري : أي احسن

شايله سيف وبطنها گدامها كلش چبيرة ،ما ضل الها غير شهر وتسجيب ،اخذت سيف من ايدها
_ خلي عدي ،ارتاحي منه شوي ومددي ،هلكتج فرتهم

حواري : والله راح اموتن من تعبهم ،حايره ببطني وبيهم تبذلهت

ابتسمت
سيوف : الله يساعدج

ردتها الابتسامه بتعب وجهه شاحب مبين عليه ثگل هل أيام بالاخص الجهال سودنوها ومن استغرابهم بس يبچون وما يرضون بغيرها
وهسة مدري شعجب الله هداه ورضى بي ،ضليت حايرة بيه ،حوراء نايمة وهذا حتى ما خلاني اگعد بس افتر ...

من تعبت منه مشيتلها لغرفة جدي وجدة
بس شافتني
گعدت على حيلها چانت ممدوده اطيتهياه
_ شورطج وصرتي أم ،عقلج وين بيا بير طايح منج

مدته بحضنها
حواري : هينه لو على ورطة سيف وحوراء ،الورطة الچبيرة بعد شهر تجي

_ يله شتسوين بعد هاي حياة المتزوجات

حواري : اشوفن بيج يوم يا جفون

غميتها وطلعت من الغرفة ،وبس طشت الوادم طبوا جدي وعمامي والولد ومن بيناتهم عيوني ركزت وي صخر أول مرة اشوفنه من ذاك اليوم الركض
بيه وهي بين ايده، ما يروح من بالي
ابد اليوم البيه رد خيم علينه الحزن ،ومثل ما گعدنا الگعدة ورا فاتحة بصائر گعدناهه هسة
ورا فاتحه ميمنة ،ناس تبچي وناس صافنه بذكرياتها مثل ما هسة اتمنى اشوفنها تفتر بيناتنة والزغير
گبل الچبير تگله صار وتدلل
،وهو من بين الكل گاعد على باية الدرج چگارته بايده وجراويته السوده على اچتافه هذا الهدوء اعارفه شني ،هدوء بشر ما يعارف شني اليتصرفه لو شني يگوله بشر تايه عاش كلشي مثلنه
ومثل ما احنه ما نريد نستوعب هو اضعافنه ..! !

أول گعده نگعدها ،واول لمه وهي مو ويانه ،لمه مخيم عليها الحزن والسبب فگدانها
باوعت لهيوفة ودنگت بقهر أول مرة تگعد وحدها چانت اذا ميمنة تفتر هي تفتر وياها ،تگعد تگعد وياها
وشرط حاطه عكوس اديها بحضنها وتخلي ميمنة تشوط روحها توخرها وترد تحطهن وبضحك تگلها

_ ما احسن روحي قريبة عليج اذا ما اگعد هيج .

ليلة گضت منكسر يواسي منكسر، بگلب الزغير والچبير خلت اثر، جدي كلساع يصفن ويردد

رأجس : يا جدي يا ميمنة يابعد جدج ،كسرتينه جدي

بعد ثلاث أيام من التعب من غير الگبلهن نمت بلايه حتى مخده ما ادري بروحي ،فزيت وجه الصبح البيت هدوء ،حطيت الحجاب على راسي وطلعت من الغرفة اتلفت بالبيت ،عماتي بالصاله نايمات وانا والبنات بالغرف ،فتحت باب
الديوانية الولد وعمامي نايمين سديته وكملت دربي للحوش مختنگة ،ذيج الايام ما صبحت
بثگل هيج مثل اليوم ،چانوا يچيبون طاري هذا اليوم بعد الفواتح ما چنه نفتهمه شني ،هسة عشناه، وهاي المره الثانية ...

فتحت قفص الدجاجات وگعدت حاطه ايدي على خدي واباوعلهن يفتر گبالي وينگرن بالگاع
عبرن للحديقة ياكلن من الثيل، گمت وخليتهن اريدن اطب بس غيرت دربي من سمعت صوت
حركه قريب على شچرة النبگ ،هزيت ايدي وصحت عليها بصوت مو كلش عالي

_ شعدج صاعده قرررده ؟

دنگت باوعتلي
غمد : اشتهيت نبگ گبل لا حتى اتريگ

_ انزلي لا يشوفج واحد من الولد عيب

غمد : شوف هاي مني تحجي بالعيب

_ انا علمودج حتى لا تنحرچين

غمد : اوگفي بس اخذ بعد وانزل

خليتها وطبيت جوا، انداريت من حسيت بخطوات وراي چان صخر ،عبرني بلايه ما يحجي ،صرت كل ما اشوفنه چن اشوفنها گبالي ،هو وفقار عاشوا نفس المصير ،حطيت قوري الچاي على النار صافنه عليه وفززني صوتها الناعم

سيوف : صباح الخيغ

_ صباح النور

سيوف : ما شفتي غمد؟

_ تلگياها على شجرة النبگ

سيوف : ياا يااا

_ أي والله

طلعتلها تمشي بساع وانا طلعت وراها اباوع عليهن ترزل بيها وغمد ما متهمة تريد تنزل ومبين متورطه لان المكان الصاعدتله مثل كل مرة عالي

غمد : اسكتي راح اطيح والله سطرتيني سطر

سيوف : وعساج طايحة

برهان : شكو

اندارينا انا وياها على صوته ورانه، عدلت حجابها وانا جاوبته
_ هاي غمد صاعده على شجرة النبگ وسيوف تخاف عليها لا تطيح

رفع رأسه باوعلها
برهان : شمصعدج ولج ؟

غمد : اجيب نبگ ،زقنبتوني والله ،طبوا جوا حتى بس اعرف انزل

برهان : طبن، خلنها تنزل

سيوف : حاجيها بغهان ،والله شالعة گلبي

برهان : تريد تعيش طفولتها

سيوف : يا طفوله ،صاغت سادس

وگفت كبالها
غمد : بغهان والله هي هواااي تكبغ المواضيع

خزرتها
سيوف : لا تقلدين علي

ضلن يتناگرن وبرهان من شاف سالفتهن مطوله خله وطب جوا ،طگتها على ايدها
سيوف : كله منج ،حتى البقية بحياتك نسيت اگله شدهتي بالي

غمد : ديله واذا

سيوف : طيح الله حظج غمد

غمد : اختي حبيبتي

سيوف : اعاغف اعاغف ،بگلبج گلتي وحظج

رمشت بعيونها ومن سكتت وما ردت تأكدت سيوف كلش زين تعارف طينة اختها، ركضت جوا من تذكرت الجاي ،صبيتلي بگلاص وطلعت خبزه من الضال
مال امس وچبن وگعدت اكل ،اللگمه بحلگي ورفعت رأسي على صوتها گبالي

سيوف : بالصدگ بالچذب گولي اكلن وياي

_ محترگ الجاي حتى زحمة اعزمچن

سيوف : جا شبيج ما تعغفين تسوين جاي ؟

_ منو گالج انا غاية ،أصلا مقهورة على النسوان الشربن جايي

غطت حلگها مصدومه من صراحتي وانا بثالث لگمه وانسدت نفسي متذكرتها من چانت تگلي "يله انا مكان هيوفة اسويلج ريوگج"
تنهدت وگمت شلت الصنينة عيوني مغورگه ،غسلت وجهي وبشالي نشفته ،وبس درت
لگيته وراي ،نضراته غريبة ،ما عارفت شني تفسيرهن مشيت من گدامه اريدن اعبر، اعترض دربي وهو يسأل
نوح : شبيج ؟

_ وخر

نوح : احجي وياج جاي

_ كلشي ما بي ،عليك الله نوح وخر من دربي .خليني امشي

نوح : باوعيلي

_ نوح

نوح : تبچين على ميمنة ؟

هزيت رأسي ب أي وباوعتله، مال برأسه بهدوء نطق
نوح : جا اذا متت انا هم تبچين علي

_ أنت بس موت وتدلل

غمني متنرفز من ردي اضن ما چان متوقعه، مشى بلايه ما يحجي ،تساعدنه على الريوگ ،التمنه بس واحد يباوع بوجه الثاني چن ادينه مربطه وما نگدر نمدها للزاد
زهرة : لخاطري اگلج اكلي ،مو تگوليلي عمة احبنج جا صارلي ساعة اتوسل بيج ولگمه ما حطيتي بحلگج

بركة : مو بيدي ياعمة والله، مو بيدي ،اغصن گبل لا احطن اللگمة بحلگي

زهرة : لخاطر امج ،عينيها وعيني روحج

بركة : هل مرة ما ضل عدي حيل حتى روحي اعيننها

تحجي وتبچي وخاف بينه وحده رادت تاكل انسدت نفسنه كلش وردت المواعين مثل ما هن ،باوعت من شباك المطبخ على سيوف چانت
واگفه وگبالها واگف برهان يحجون بشني ما اعارف حديثهم ما طول هواي ومن ردت سألتها

گالت
سيوف :گلتله البقية بحياته، زحمة اخته وانا ضاله لهسه ما ماخذه من خاطغه

_ صح

سيوف : غاح نمشي احنة

_ هاا ،ليش ؟

سيوف : امي خطية هسة ضاله وحدها

_ هم تردن ؟

سيوف : جا شلون ،غاح اگول لجده وهم غمد تحضغ غوحها

شوي ولحگتها ،جده ما ترضى تمشي وهي تقنع بيها و وين الا اقتنعت وگالتلها
غضة : گبل السبعة بيوم تجين ،خوش ؟

سيوف : خوش ،يله غمد غمد حضغي غوحج

وداهن ليث ورد ،ضلينه طول هاي الايام مخبوصين اجازاتنه گضن وما گدرنا نداوم، يوميا ناس جاية وناس رايحة وعلى هل حسبة لليوم السابع، طبيت للغرفة عليها

_ شني غاية ما ناوية تطلعين ؟

هزت رأسها ب لا
_ شجاج ولج ؟

غاية : راح اموتن، حتى من انام اتحلم بيها، اتحلم اشوفنها گبالي تحترگ

بلعت ريگي ومشيت بحيرة گعدت گبالها
_ راح يصير بيج شي اذا تضلين هيج تفكرين

حطت عيونها بعيوني
غاية : ما اگدر

_ أنت جاي تفكرين بيها گبل لا تنامين مو ؟

هزت رأسها ب أي
_ لان تفكرين بيها تجيج بمنامج، جربي مرة لا تفكرين بيها وشوفي

چنت اضن الحجي الجاي احجيه راح يجيب نتيجة بس ابد ما غير شي ،وحالتها يوم عن يوم بدت تسوء حتى عون الچان يريدها ما گدرت تداريه واخذته ريحانة ،گضه يوم السابع وعبرن عليه ثلاث ،وبيومها ملتمين على الغدا وسألني

ليث : جا غاية وين ،شو ماكو ؟

_ ما تريد

ليث : ليش ما تريد

_ ما اعارف

نزل خاشوكته من ايده وگام ،باوعت لعمة تحسرت بقهر وقلة حيله
زهرة : منين اتلگاها من صخر لو من غاية ،هونها ياربي

طلع من الغرفة مو وياه هي گعد ياكل ساكت وما حجه شي ،وبالليل اجه عزيز حتى يشوفها من گتلها گالت
غاية : ما اريدن اشوفه

جريتها من ايدها
_ شني ما تردين تشوفيه، ولج صارله هواي متانيج زحمة

غاية : جفون لا تلحين فدوة ،تعبانة والله

_ غاية

غاية : عليج الله

تنهدت وطلعت بس شافني وحدي گال
عزيز : ما رضت مو ؟

هزيت رأسي ب أي ،اندار على عمة من
حاجته
زهرة : اعذرها عمة ،هي نفسيتها شوي
تعبانة وبعدها ما مستوعبه الصار گدام
عينها

عزيز : عذارها، وخايف عليها انا ،لازم
تحاولون وياها

زهرة : جاي نحاول والله، بس شوي
شوي وبلكت ترد مثل گبل

عزيز : أن شاء الله، اترخص انا عدي شغل

زهرة : الله وياك عمة

بس مشى طبتلها عمة تحاجيها وهي بس صافنة
زهرة :مو احجي وياج ،غاية يمةة

غاية : ها يمة

زهرة : شبيج يابعد روحي ،حاجيني

غاية :شحجي يمة

زهرة : ليش هيج حالج تبدل ،مو اول ايام ما چنتي هيج

غاية : صرت اتحلم بيها يمة ،صرت كل ما انامن ما تفارگ منامي

تحجي وتبچي ،حضنتها عمة وانا واگفه اباوع عليهن وابچي
غاية : تعبت ،يمةة تعبت والله ،تمنيت ما نازلة يمها ولا شايفتها هيج ،مو هينه على روحي والله

زهرة : اعارف يا روح امج ،بس خوما تضلين هيج ،حاولي ،خايبة غاية لا تزيديها علينه،منا أنت لو اخوج احير بمنو

وخرت من حضن عمة تمسح بعيونها
غاية : احاول

بايدها لمت شعرها المفتوح وتحجي وياها بتشجيع
زهرة : عفية بعد أمج

گبل لا انامن كفيت البيت لان ماكو غيري ،واخيري شي طلعت تأكدت من گن الدجاج والبطوط وطبيتو وي طبتي لاگاني صخر طالع وجنطه ب
أيده استغربت وين ماشي ،كملت دربي للغرفة وبس تمددت نسيت السالفة وبساع غفيت والصبح
من سألت جده عليه على الريوگ مستفگده مكانه

گتلها
_ شفته بالليل طالع من البيت وبأيده جنطه

غضة : يااا وين ماشي

محمد : هسة اخابره واشوفن

دگ عليه عمي شوي ورد عليه حجه وياه ما راضي على روحته وبس سده باوع لعمة ما راضي يلوم بيه
محمد : يعني شبيه الخشب الهنا، ضال يوميا ماشيله لمكان يجيب خشب

رأجس : خليه على راحته

محمد : يابة والدرب ،هنا هنا ماشي

جدي يشرب جاي ما متهم لان بنضره عگابه ما يصيبهم شي وگد كلشي هم بينما عمي الضوجه چانت مبينه عليه طول اليوم والعصرية من
مشت عمة لبيت عمي باقر گالت ضال بالها عد هيوفة وانا مشيت وياها ،بس طبيت اخذت عون من ايد
ريحانة ابوس بيه

_ يمةة طگ گلبي عليك والله ،مشتاگتلك عون الحلو

ابوس بيه وهو يضحك ،گعدت حاطته بحضني اباوع لهيوفة، صايرة هيكل حتى ذيج بطنها زغرانه
زهرة : عليج الله يمة خليني اخذج للدكتورة ،گلبي ما مرتاح

نجوى : اتوسل بيها ،طاحت وذرة من لساني وما جاي تقتنع

هيوفة : اخافن

نجوى : من شني ؟

هيوفة : ما جاي يتحرك، اخافن لا صايرله شي وهم اخسره

فكيت عيوني بخوف مصدومه من الگالته وعمة لطمت على صدرها
زهرة : تحجين صدگ ولججج

نجوى : جا المن ساكته، صخام الصخمني ،گومي حضري روحج بساع

هيوفة : مااا، ما امشي

وبعد محاولات وتواسيل الا قتعت ،اخذهن عزيز ومشن عماتي ثنيناتهن وياها ،واگفه بصفها عد باب المطبخ حاطة ايدها على گلبها وتدعي
ريحانة : ربي لا تفجعها بضناها بحق محمد وآل محمد عدك
عيونها يسولفن العاشته وشگد چان صعب عليها اكثر وحده بينه ما هادت، وكت هواي مشى وماكو لا هن ردن ولا اجانه خبر ،اندرت علي

ريحانة : اللبسي عباتج، نمشي لبيت جدي راح اموتن والله

هزيت رأسي ب أي ولبست عباتي وشلت عون وهي گبلي طلعت تهف ،بعدنه ما فاتحين الباب وانفتح من جوا بقوة ولاگانه يركض ،طاح گلبي وحسيت صاير شي ،صحاحت وراه

ريحانة : نوووح ،تعااال ،نوووح

اندار عليها
نوح : ميت ،راح يسوولها عملية

عاطت بصوت عالي وغطت وجهه ترجف
وچن بشاعة الموقف العاشته صارت گبال عينها بالگوات گدرت اطببها جوا ،وبس جدة شافت وجوهنا مگلبه گالت

غضة : خايبات شبيچن تنوحن، صاير شي لهيوفة مو ؟

ريحانة : ماتتت ابنها جدةةة، هم مات ابنهااا گبل لا تشوفه

بهتت عيونها صارت علي ،ريحانة چن مو بوعيها تردد
ريحانة : هم مات ابنهااا

غضة : ماتت صدگ ،خايبة جفووون صدگ ؟

_ نوح گال ،ليش ما تعارفون ؟

غضة : لا وروح أبوي عارفت منچن ،حاجني شلوون

_ ما حجه شي بس گال راح يسوولها عملية

دگت على رأسها
غضة : يايمةة مات وليد الريشةةة يايمةة، ولج حبوبة هيوفة ،سودة بوجهي يا حبوبة ما لحگتي تشيلي بحضنج ،سوده علي

عطاء : شصاير

غضة : هنيااال گلبج خايبةةة، اطيني گلبج البارررد

عطاء : اعذريني يمة تعبت الا بردته

اجت گعدت گبالي
عطاء : شصاير جفون ؟

_ نوح گال ميت ابن هيوفة وراح يسوولها عملية

عطاء : هاا

_ أي والله

عطاء : هسة يطلع مفتهم غلط وراح يجيبوها

غضة : شيجبوها وهي امس طبت بالسابع

عطاء : أي يمة عادي هواي نسوان تجيب بالسابع لا تخافن

انا كلش زين اعارف حجيها بس حتى تهدينه بس هديت وتأملت خير ومن اجه ليث تلگيناه لان اكيد ماشيلهم
ريحانة : بشر خوية ،شصار ؟

ليث : هسة طلعوها من العمليات ،الحمدلله ما تسمم جسمها، الدكتورة گايله الأمي صارله اكثر من اسبوع غنيت

غضة : ستررك ياااربي

عطاء : وهسة شلونها هي ؟

ليث : بعده ما فاكها البنج

صعد فوگ وخلانه ،العجيب من گتلها چانت ردة فعلها طبيعية
_ عود صدگ غاية ما ضجتي ؟

غاية : انا توقعت ،الحمدلله من طلعت هي سالمه الجاهل يتعوض

هزيت رأسي
_ صح حجيج

رديت طلعت مخليتها وحدها مثل ما هي تريد ،ضليت واگفه بمكاني عد الباب اباوع لريحانة تنوم بعون ودموعها بهدوء ينزلن، تنهدت خانگني كل هذا الحزن،

جا مو طر الفرح قريتنة ..! !

ليش ما دام وكسرنه كسره لطول العمر ما راح ننساها وزادها اليوم ابن هيوفة
عطاء : جفووون ،وين صافنة

فزيت
_ ها عمة ؟

عطاء : اطلعي حطي اكل لطيورج سطرني، كاتلهن الظيم

_ جا ليش ما تحطيلهن أنت

عطاء : وانا شدخلني بيهن

_ مو الج اجر

عطاء : ما اريدنه

مشيت للمطبخ، حطيتلهن دخن ،وانا جاي اترس مطارية الماي مالتهن طب من برة اول شي عبرني بعدين تراجع بخطواته واگف بصفي يباوعلهن...

بلايه ما يندار گال
نوح : اذا ما ترديني ليش مدارية طيور أنا جايبهن

_ تعارف احب الحيوانات

اندار باوعلي وابتسم صفح
نوح : صح

گالها وطلع ،رديت علگتهن واحس بروحي واصله لمرحلة كلش صعبة من النرفزة بسبب اسلوبة الناشف واستفزايزته وياي وبالاخص صاير يذكر
طلعتي ،صح السويته غلط بس الكل نسى أو تناسى الا هو ...! !

ثاني يوم طلعوها من المستشفى ،منتهيه التعب مبين عليها ،تحمدت الها بالسلامه وگعدت گبالها
زهرة : جفون يمة

درت عليها تصيحني من المطبخ
_ هاا يمة

زهرة : اخذي هذا گلاص العصير خليها تشربه، بين ما اسويلها اكل

_ صار

اخذت الگلاص ومشيت لغرفة عمي محمد ،گعدت گبالها
_ عمة سوتلچياه

بللت شفتها بطرف لسانها
هيوفة : ما اريدن

_ ليش ،جا مو توج طالعة من عملية وتحتاجين تتغذين

غضة : تشربه مو بكيفها

هيوفة : والله جدة ما اگدر ،نفسيتي مسدوده

جرت الگلاص من ايدي
عطاء : گومي ،واشوفن ياهي الما تشربه

گمت وهي گعدت بمكاني وصدگ چبرتها تشربه، الظهرية اجه ليث وگال
ليث : لازم تردن للدوام بعد ما اگدر امدد اجازتچن اكثر

_ شوكت نداوم ؟

ليث : الأحد

_ خوش

ليث : غاية وين ؟

_ بالغرفة

مشالها للغرفة وانا وراه ،دگ الباب وطب ،جانت ممدوده وصافنه بالغرف من حست علينه طبينه گعدت على حيلها، أبتسم ومشى گعد گبالها وبده يحجي ويقنع بيها تداوم وهي رافضه
ليث : جا اذا ما تداومين حتى انا ما اداوم، لخاطري مو رديتني وياج ،جا تخليني لنص الدرج

غاية : ماگدر

ليث : شني ما تگدرين ،داومتي گبل

غاية : تعبانة انا ليث والله

تلاشت ابتسامته هي كملت
غاية : اذا شفت نفسي اگدر اگلك

ليث : خوش

باسها من رأسها وطلع ،ردت تمددت ما چني موجودة والاحد گعدت حضرت روحي للداوم
من سمعت صوت سيارة أبو الخط برا شلت جنطتي وطلعت بساع، بوجهي صار ليث جاي
من الگيعان ،و وراه طب نوح ما چن شفته وكملت دربي

بالحزن الايام مشت ،هيوفة بدت تصير زينة الا غاية تسوى حالتها وكلش تبتعد جاي ،بايدي مبايلها يدگ طبيت للغرفة
_ هذا عزيز يخابر

گعدت على حيلها، اطيتها الموبايل وما طولوا دقيقة يحجون ومن سدته گالت
غاية : يريد يجي

_اي هلا بيه

غاية : يريد نطلع

_ اخذوني ويااكم

غاية : ما اطلع

_ اطلعي عليج الله ،عليج الله

غاية : ترا حتى لو طلعت ما راح اخذج وياي

_ هاا

گامت على حيلها حايرة تفتر ،شوي وطبت عمة گالتها عزيز هنا ،بس رادت تطلع كضيتها
_ وين وين باااعي خلقتج وجهج ما غاسلته ،غير اذا شافج هسة يتندم على الساعة الحباج بيها

غاية : ماشية للحمام بس هديني

هديتها وضليت بالغرفة ما طلعت ،ردت تنشف بوجها مشطت شعرها ولمته من فوگ بكتر وخلته محلول على طوله، وگبل لا تطلع رشت
عطر ،طلعت وراها چان گاعد بالديوانية ،دگت الباب وطبت واسمع صوت عمة يمهم ...

°غاية°

سلمت وگعدت بصفه بس بعيده عليه، اندار باوعلي ورد يحجي وي امي
عزيز : انا حاجيت عمي وگلتله رايد اطلعها تغير جو وما اعترض

زهرة : جا اذا عمك راضي اطلعوا بس لا تتأخرون بعد عمتك خاف جدك يجي ويضل يحجي

عزيز : ساعتين ونرد

زهرة : گومي يمة حضري روحج

اندرلي من گلت
_ ما اريدن اطلع

عزيز : ليش غاية ؟

_ ما اريدن

عزيز : اذا تضوجين اردنج والله

_ عزيز

اندار على امي ورد يحجي وياي ويقنعوني وبعد هذا اصرارهم استحيت اضل رافضه وگمت حضرت روحي ،طلعتله هو چان متانيني
بالسيارة فتحت الباب وصعدت بالصدر، شغلها وبس حرك گال

عزيز : صار شگد مشتريها واريدن اطلعج بس ما صارتلي فرصه

_ عادي

ورد عيونه للدرب كاض ايدي بين ايده والدنيا بدت تغرب، من وصلنه لمنتزه طبگ السيارة واندار علي
عزيز : تنزلين ؟

_ أي

نزل گبلي وانا فتحت الباب ونزلت عيني للجهال التلعب، دنگت اباوع الايدي رد كضاها وچن يگلي انا يمج
عزيز : أمشينه

گعدت على مسطبة وهو ضل واگف گبالي
عزيز : تردين شي تاكلين ؟

_ لا بس ماي

عزيز : صار ،ضلي هنا شوي واردلج

هزيت رأسي ب أي وضليت گاعدة شوي ورد بيده علاگه سوده گعد وحطاها بيناتنة، طلع منها بطل ماي فتحه واطانياه بس شربت اطاني كيكه وعصير

_ ما اريدن

عزيز : لخاطري

احذتهن من ايده، فتحتهن اكل وعيني على الوادم گدامي ،انا ساكته وهو ساكت ،بس خلصتهن سحب رأسي لصدره، رفعت عيوني اباوع عليه، ما احد ينتبه علينه لان مكانه صاير بزاوية بعيده عن العين

_ عزيز

عزيز : غايته

_ تعبت من التفكير والله

عزيز : بت عمنه وچبيرتچن ،خسارتها مو هينه، بس اذا تضلين هيج تتأذين وانا التعبج اتعب

_ اتمنى امسح ذاكرتي ولا اضل اتذكر حالها بذاك اليوم

عزيز : تناسي ،ذكري روحج بالصار قضاء وقدر ومن يوم الخلقها ربج مكتوبلها هيج تموت

_ ما اگدر اقتنع والله ،گلبي يوجعني والله ،شلون هسة هي جوا التراب

عزيز : كلنه على هذا الدرب

هو يقنع بي وما مقتنع ،ضلينه فوگ الساعة گاعدين وعلى گعدتنه خابره ليث ،فتح سبيكر
ليث : رد اختي لا اطيح حظك، وين ماخذهااا ساقط

عزيز : زحمة تغلط واختك بصفي تسمعك

ليث : اكل تبن، ردهاا يله

عزيز : شوي ونرد

ليث : خررب اهلك ،ردوا هسة

ليث محترگ گلبه وعزيز يضحك ،اخذت الموبايل منه
نصه صوته من سمعني گلت
_ ليث

ليث : مو اتوسل بيج نطلع وما ترضين ،شني الغير رأيج هسة

عزيز : انا غيرت رايها

ليث : اكضك لوما اكضك اذا ما حليب امك ازوعكياه شوف

عزيز : مو اگلج لا يغرج اسلوبه وياج چنه سلاب مال اراضي

ليث : المحامي الملعب

عزيز : اسكت اسكت لا اغردلك

ليث : بعد لسان محامي ،اگلج غاية هذا مايفيدج ملعب ومحيل وأنت فقيرة، اطلگج منه

جر الموبايل من ايدي سداه بوجهه وگام وگف گبالي
عزيز : گومي نرد

گمت عدلت عباتي ومشيت وياه للسيارة وبس طبينا القرية ضحك من شافه واگف عد الباب وكركه بأيده اشرلنه ننزل، وبس نزلنه باوعلي

ليث : طبي جوا وحسابج بعدين أنت

عزيز : لا والله

ليث : تسكت لو احط الكرك براسك

عزيز : ارفع عليك قضية اخيسك بالسجون بس سويها

ليث : اكل قندار

طبيت وخليتهم يتنگارون ،احاول ما اخلي عيوني تصد لمكانها بس لا ارادي اوگف
واضلن اباوع، بعده اثر النار من صعدت بالحايط، غسلوها بس ما راح كلش
چبل چن صار على صدري ،انداريت على صوتهم وراي طبوا ثنينهم ومن شافوني واگفه گبل عزيز اجاني ليث

لم وجهي بأيده
ليث : ليش تأذين روحج غاية

_ هنا احترگت ،بعيني شفتها

عزيز يباوعلي حاير وليث كضني وطبينا جوا ،النفس اصيرن بالگوات
اچره لو طلعت للحوش ،كابوس موتها ما يفارگني ..

°حواري°

طلعت للحوش اباوعلها بقهر، صافنه وعيونها على النخل گبالنه ،تنهدت مختنگة من هل ايام الچانن مو بالحسبان ابد ،مشيت وگفت گبالها باوعتلي ودنگت ومن گتلها

_ حوراء تگول عمة شو ناسيتني

ردت رفعت راسها عيونها على حوراء الشايلتها انا ،فتحت ايدها اطيتهياه
_ تعبت هواي بيهم لان أنت مو وياي

بركة : اسفه

_ لا تتأسفين ،انا بس اريدن اشوفنج بخير

بركة : الفاگده خواتها ما يمرها الخير

گعدت بصفها ايدي على بطني بالگوات اگومن وبالگوات اگعد
_ احنة كلنه خواتج وباجر عگبه ينملي البيت
عليج ونصير ثلاثه

بركة : اختنگ كل ما اتذكر شلون ماتت متوجعة

سكتت ما اعارف شني ارد عليها، الحزن مغيم على البيت ،عمة ابد بعد ما صحت وبركة يوميا طايحة علينه
من غير حق الصايرات حجاياته معدوده على گد السؤال والجواب ،گمت وگفت اباوعله طب بايده اكثر من
ملف ،مشيت وراه وبركة ضلت هي وحوراء برا طبيت وراه للغرفة
_ حق

رفع رأسه علي
عبد الحق : ها

_ اصبلك غدا ؟

عبد الحق : لا ما اريدن

_ شلون تضل هيج
گعدت يمه
_ أنت لو الولد عمة وبركة مابكيم احد يتقوه
حتى
تقوه البقية ،حتى عمي صاير ما يلفي للبيت

يباوعلي بلايه ما يحجي وانا كملت
_ مايصير كلكم هيج تضلون ،جا عمه منو يهون عليها

عبد الحق : النار الحرگتها جاي تحرگ بگلبي

_ سلامه گلبك

جر نفس بقوه
عبد الحق : كل ما اطلع اتذكر چدارها النصبناه برا ما توقعت ثنين من خواتي ياخذهن الموت ،وحده جابت وماتت والثانية احترگت وخلت عون العافته بصائر

_ بركة منتهي حالها، وما ضلت عدكم غيرها، اوگفوا بسدها ولا تخلوها تگعد بروحها وحزنها

عبد الحق : هادة حيلي بركة

بايدي مسحت على چتافه ،رد يشتغل بس مبين باله مو يم الشغل بس مجبور ،گبل الأربعين بچم يوم صار عدي طلوگ ،خذوني للمستشفى وجبت، متمدده على السديه
واباوع عليه، شالها ويأذن بأذنها، طاحن دموعي من گال

عبد الحق : اسمج ميمنة

حطاها بحضني، باوعتلها اريدن ابچي ،مو بس اسمها مثل عمتها، حتى شكلها ،عيونها مكحلة
_ حق

عبد الحق : ها

_ تشبه ميمنة كلش

هز رأسه ب أي
عبد الحق : اسم على مسمى

اخذتها مني عمة شيماء ،بدموع شالتها تحجي
شيماء : الج نصيب من الدنيا احلى من عمتج أن شاء الله يابعد حيلي أنت وياها

مسحت دموعي وامي بصفي بأيدها تمسح على شعري ،رفعت راسي من گالت
نجوى : لا تبچين يمة موزين عليج نفسه أنت

بالليل طلعت ومشيت عد اهلي، بس مددت اجوي ثنيناتهم شمروا روحهم عليه، حضنتهم ابوس بيهم
_ افيشش يا رحيتكم

شايلة عون ومبين عليها التعب بسببهم
ريحانة : موتوني والله فلا ينچرعون

_ سيف حباب ،حوراء وكحة مو ؟

ريحانة : أي والله، شو يمة اطينياها

نزلت عون من حضنها ومشت اخذت ميمنة من ايد امي ،بس باوعتلها گالت
ريحانة : حيل تشبه ميمنة

_ بس شفتها هيج گلت

يحانة : سبحان والله

واحنة نحجي طبت هيوفة، تحمدتلي بالسلامة وگعدت ،ريحانة حطت ميمنة بحضنها، صفنت بوجها وباوعتلي
هيوفة : چنها ميمنة

_ واسمها ميمنة

وسعت عيونها
هيوفة : سمتوها ميمنة ؟

هزيت رأسي ب أي
_ حق سماها

غورگن عيونها ،باستها من راسها وردتها عد ريحانة وطلعت
ريحانة : فلا جاي ترد طبيعية

_ حگها ،خسرت صاحبتها واختها وجم يوم خسرت ابنها

°بركة°

اربعين يوم مشن وانا ما مصدگتهن ،اربعين يوم بيهن لو غفت عيوني افزن على أمل المرن مثل المر حلم وموش حقيقة ،بس لا الصار صدگ وهاي
انا گاعده بين گبورهن ثنيناتهن، وحده بصف الثانية

حيرة لياهي عيوني تندار ولمني عتابي يصير حضنت گبرها وبچيت بشهگة وصوت عالي
_ بعدني ما متعلمه على فراگ بصائر ،زديتها علي ميمنة ،عون يتمتيه مره ثانية ،هديتي حيلي وتلاشت عافيتي بفراگج والله

شيماء : حسبت تلتمن علي وتلطمن عد گبري ،ثلاث بنيات عدي يبچن الوادم بفاتحتي ،تالي ثنين اندفن وضلت بس زغيرتهن هد حيلي وحيلها فراگچن

وكت طويل ضلينه گاعدين ،گوموني بالگوه من بيناتهن ،تمنيت اضلن اكثر ،والاصعب من جبروني اصدن عيوني
عنهن ،ساندني جعفر
صعدني بالكوستر ونزل واجوي البقية صعدوا، من الجامة اباوع
على الضلوا يمها ودموعي بلايه حس ينزلن، صخر گاعد واگف وبصفه برهان ،جگارته بايده وحاني ضهره طبطب على ضهره برهان وحاجاه، ومشوا صعدوا بالسيارة مال صخر

اباوعلهم مخبوصين بالوادم الجاين ويانة ،واگف والشمس تدگ على راسه ويصيح
ليث : تفطتنوااا رحمة للكائنات ،موتاااكم ما شايفيهم

جعفر : لا تصيح شبيك

ليث : تعال اوگف بمكاني ،اشتعلوا اهلي

نوح : وين فلينة المااي

ليث : بسيارة حق ،حطها بكوستر النسوان بساعك

نوح : يا طلابة السودة جا واحنه

ليث : الفلين الثانية متروسة

فتح الكوستر وحط الفلين مال ماي
نوح : بعد تردن شي

ردينه عليه ب لا
ليث : لك چسااار جيب عماتك لا احطنك برگبتي أنت وياهن

چسار : مرمرني والله

ليث : الحگهن

چسار : منو مشى وياهن

ليث : ولد عمك محمد وقصي

°ليث°

الشمس تدگ فوگ راسي و واگف اللمن بالوادم فتحت باب السيارة ومديت راسي
_ گوم صخر واليرحم اهلك محد دواهم غيرك

صخر : ضيرم وين ؟

_ مشى وي جدة تزور ابوها

وبس طلع من السيارة بعيطة وحده خلاهم ينخبصون، لفيت الجراوية على راسي متشمت
_ والله دوه

علي : هاا شبيك

_ احترگوا اهلي ومحد سمع حجاياتي ،هسة بعيطة وحدة خلاهم يصعدون

اقل الربع ساعة كلهم التموا
ضيرم : لييث يله اصعد

_ اوگف

نزلت من البيكم وصعدت بسيارة صخر اسوقنها، يوم ثگيل والدرب طويل، من ردينا للعصرية طشت الوادم كلش الا گدرنه
نطب نرتاح، و وي صلاة الصبح گعدت مهدود حيلي من التعب بس لازم امشي للگيعان اشوفن الوضع

لبست هدوم الشغل وبس نزلت صارت گبالي أبتسمت من شفتها تصلي وتانيتها تگضي صلاتها
_ تقبل الله

باست التربة وردت علي
غاية : منه ومنكم، صليت ؟

_ لا والله مستعجل اريدن امشي گبل لا تطلع الشمس

_ توضى وتعال صلي

نزعت جروايتي
_ صار

مشيت توضيت ورديت كبرت وبديت اصلي وهي گبالي گاعدة ،كل حسرة تجرها تحفر اثرها بگلبي

بس شافتني كملت صلاتي گالت
غاية : اسويلك ريوگ ؟

_ لا ،ما اطول شوي واردن

غاية : خوش ،انا راح انامن

عگدت حاجبي
_ ليش ما نايمة ؟

غاية : ما تاخذ عيني نوم

_ لازم تنامين موزين هيج

غاية : احاول ،يله امشي لا تتأخر

_ خوش

گمت لفيت چروايتي وطلعت ،وي طلعتي صار بوجهي يريد يطب ،عبرني يريد يطلب صحت
عليه
_ صخر

وگف بمكانه
صخر : هاا

_ شبيك خوية

صخر : گول شني المو بيه اخوك

_ تمشي وياي للگيعان

من بعد صفنه گال
صخر : امشي

بس وصلنه للگيعان مشى للمربط، طلع الهيلانه ربحها وگعد راد ضهره على الشجره، مشيت گعدت بصفه ،طال السكوت گبل لا يگول
صخر : چانت الشمس بحياتي بايام الشتا، وهسة صار اربعين يوم مفارگ شمسها

_ حبيتها صخر

طفه الچارة بالگاع ورد
صخر : التعويد اصعب من الحب ،تعودت اول ما اطبن تتلگاني ،كلشي احجيلها جنها مراية گدامي بلايه ما اتقيد وياها

_ ميمنة مو بس عودتك على وجودها بحياتك ،من يوم المشت وانا احسن اكو فراغ بالبيت ،چن فاگد اخت من خواتي

تحسر ما يعارف شني اليحجيه ،گمت انكت هدومي
_ ماشي اشوفن المكاين واردن

صخر : خوش

شغلت المكاين ورديت لگيته گاعد بنفس مكانه،بس شافني وگف
صخر : ترد ؟

_ أي

صخر : بس اردن الهيلانة

وداها للمربط ورد ،درب الرده ساكت ما حجه شي خاف گبل ما يحجي صار اكثر من گبل ساكت ومبتعد عن الكل
موت ميمنة خلاهم ينسون سالفة مرتضى بس انا ما نسيتها، وبيوم من الايام گدرت احصل عنوان ورقم اقرب صديق اله

نزلت اركض والموبايل على اذني ،من صارت گبالي سديته
غاية : شكوو ليث ؟

_ ماكو شي

غاية : والله اكو شي ،اكو طلابة مو ؟

_ لا ،من ارد اسولفلج

وبس طلعت خابرت عليه
_ وينك أنت أي تجي وياي ،خوش راح امرلك

صعدت بالسيارة ،شغلتها ومريت عليه، بس دگيتله هورن طلع ،وبعد السلام گلتله
_ أبو درع متأكد من عنوانه ؟

أبو درع : متأكد

_ عاشت ايدك

انا اسوق وهو يدليني
أبو درع : اطبگ هذا بيته

طبگت السيارة وامل قوي صار عدي ،نزلت عيني على البيت ،وگف بصفي طبطب على ضهري
أبو درع : ناسي روحك ،نزلت بلايه ما تطفي السيارة

_ مشدوه

أبو درع : مبين ،تعال

دگينه الباب اكثر من مرة الا سمعنه صوت
_ منووو

أبو درع : جوارينكم جدد

رفعتله حاجبي
_ شهل چذب

أبو درع : اتعلم

_ منك

أبو درع : جا مو بعينك

_ عدي مصلحه يمك راح اضلن ساكت

طگاني على رگبتي عينه للباب من انفتح وگبالنه صار شاب يطلع عمره نهاية العشرين ،واول ما شافنه چن حس ورانه شي
_ العفو منو أنتم ؟

أبو درع : خطار

_ اهاا ،تفضلوا

بس طبينا وانسد الباب جر السلاح وحطاه براسه مبتسم يحذره
أبو درع : بس ادوسن الزناد اطشر راسك، اختار حياتك لو عنوان مرتضى

°كوكبة°

نزلت كرار على فراشه وطلعت اركض من سمعت صوته يصيح
مرتضى : غضب الله وينججج، لج كوكبببة ويينج

_ هناا هنااا والله

طب خازرني
مرتضى : ما تسمعين، طرررشة بت الكلب ،طرشةةة

_ والله هسة سمعتك، چنت انوم كرار

ابررله على أمل يغفرلي، بس هو بقانونه ،غلطتج بقصد بدون قصد تتحاسبين عليه ،جراني من شعري

مرتضى : كرار مو كرار من اصيحنج تعوفين كلشي وتجيني، افتهمتييي

_ هد شعري مرتضى والله گطعته

جراه اكثر وجهه بوجهي
مرتضى : لو بيدي احرگج والله

كضيت راسي بوجع وبجيت
_ شمسويتلك انا

مرتضى : لا روحج ولا گلبج الي وساكتلج
هد شعري ودگ على گلبه
مرتضى : هذااا اغبررر، ما لگه غيرج وأنت تفكرين بغيررري

_ ما مفكرة بغيرك والله

مرتضى : لا تحلفيين ،انعل ساس اهلج وساس اليوم الشفتج بيه

فززتني عيطه كرار، والسبب صوت مرتضى العالي مت من مكاني اريدن امشيله

واستوقفني
مرتضى : ما ترحيله

_ يبچي

مرتضى : خليه

_ مرتضى

عاط
مرتضى : جاااي اگلج خليييه

روحي تعلگت بالغرفة وهو كل ما جايه يعلى صوته اكثر ،مرتضى مسوي بيه خوفه من اقل شي يفز
_ عليك الله

مرتضى : گلت لاااا

سديت اذاني وعطت
_ راح يمووووت ،اسمعع صوووته

نشغت وعطت من دفرني برجله على رچلي ،شاغت روحي ،وبكل عدم رحمة ضل واگف گبالي ولا متهملي
_ ليشش هيج ،ليششش ،بگلبك ماكووو رحمةةةة

مرتضى : ماكوو

_ لانك بدون احسااااس، مو بشر أنت والله مو بشررر

كضيت ايده واحس فچي تهشم بأيده ،اريد احجي ما اگدر ،وهو وجهه گبال وجهي
مرتضى : تضلين راكبه رأس وياي اندمج والله اندمج

تلاويت وياه وطلعت روحي الا هدني، دفرني وگام وما صدگت اركض للغرفة واشيلنه، حضني حيل خاوية روحه من البجي ويردد

كرار : اماا، اماا

ابوس بيه واحجي
_ روح امك ،والله روح امك ،هنا انا هنا ،لا تبجي

اسكت بيه وانا محتاجة احد يسكتني ،طلعت بيه بالحوش افتر واناغيله
_ ياغناتي هل ولد يكبر ويعمر البلد ويعيش لمه هل ولد ،شوكت اشوفك ملتحي واشوف طولك واستحي واگولن تستروا جاكم وليدي

يضحك وانا اضحك لضحكته، شگد يمر بي التعب بس شوفته تردلي ضحكتي وانسى الدنيا وياه

طلع من الاستقبال
مرتضى : صوتج بت الكلب

ما رديت عليه وخليت وطبيت جوا ،من ردت اسوي غدا وفتحت الثلاجة تصوصي كلشي مابيها ،مشيت للأستقبال حتى اگله بس طبيت گال

مرتضى : خيررر

_ ماعدنه شي ناكله

مرتضى : وشسوي

_ يعني شتسوي، غير تچيبلنه شي خوما نضل كاتلنه الجوع

مرتضى : ما اطلع

_ ليش ما تطلع ؟

مرتضى : بكيفي

استغفرت ربي ورديت احاول احجي بهدوء
_ من امس ما ماكلة شي

مرتضى : وعساج لا اكلتي هم

_ مرتضى ترا مايصير ،ما تجوع أنت ؟

مرتضى : لا

_ مو اكو يبيعون لفات فلافل على الشارع ،جيبلنه منه

مرتضى : هوااااي تلحين ملاحظة روحج

_ جا غير اكلك ما ماكلة شلون يعني ما الحن

نتر بي وگام طلع شوي ورد بأيده علاگه اخذتها منه چانت بيها بس لفه وحده
_ جا وأنت ما تاكل ؟

مرتضى : ما اريدن

بلايه ما اهتم گعدت اكل وكرار يمي يفتر، بس كملت گمت غسلت ورديت نومته واخذتلي هدوم
وطبيت سبحت ،احسن بروحي گاعدة بسچن ،اگومن بضرب واگعد بضرب ابني ما مفتهم
شي من الدنيا ما وعى على امان الخوف من هسة مسطير على گلبه،

تدنيت من اجه گعد بصفي ،ولا ارادي بسبب جشاعة اسلوبه وياي كل ما يحاول يتقربلي انفر منه ،بس هل مرة چانت غير ،زدت الطين بله، طگاني راچدي وگام يصيح

مرتضى : انعل اهلج ،رچلج انااا ولج رچلج مو غريب

_ تعارف انا مجبوة عليك بعد عليش كل هل مصايح

دنگ علي متخبل من حجاياتي الواجهته بيهن ،بس هاي الحقيقة
مرتضى : چنتي راديته مووو ؟

_ ما رايده احد ،"انا بس ردت اهل يحتووني"

مرتضى : اهلج بعمرهم ما راح يحتووج

ابتسمت وهزيت رأسي ب أي
_ اعارف

مرتضى : اذا تعارفين ما تعيشين وياي مثل كل مرة ورجال

_ أنت مثلهم

مرتضى : لا

_ والله مثلهم

گمت وخليته واگف بمكانه ،تمددت بصف كرار ونمت يوم عن يوم ما اتقبل كلشي جاي يصير وياي و وصلت بي ارادده لان تعلمت على الضرب وصار عدي شي ما يفرق، ثاني يوم چنت گاعدة واللعب انا وكرار وطب هو
مرتضى : باجر خطوبة اخوج

رفعت راسي عليه
_ منو منهم ؟

مرتضى : حسن

_ يخطب رفيف ؟

هز رأسه ب أي ،دنگت مقهورة ما اتنمالها تعيش الجاي اعيشنه انا لان اخوي نسخة من مرتضى واكثر بعد
مرتضى : ترحين ؟

_ غير أنت توديني

مرتضى : لا ما اطلع

_ جا شلون ؟

مرتضى : يجي عليج حسن انا گلتله

ما حجيت شي وصدگ ثاني يوم مشيت الاهلي بطرگ روحي انا وكرار حتى ما متحظرة لان هنا كلشي ما عدي غير چم ثوب مال بيت
ولهسه ما اعرف شني الخلانه نطلع من البيت بليلة ظلمة ..! !

صعدت بالسيارة ليوره ساكته بلايه ما اسلم ،بس حرك گال
حسن : ما تسلمين لو خورسج مرتضى

_ ما تستاهل السلام

حسن : اهاا

ما حاجيته الدرب طويل اكثر من ساعة ،كرار گضاها بس نايم ،من الباب بس وصلت تلگتني
سكينة حضنتني وانا بچيت چن مفارگتها دهر، هي تبچي وانا ابچي ،اخذت من ايدي كرار تبوس بيه ما مصدگته هيج كبر

سكينة : ياااروحي الكبرااان، ولج يخبل صاير فدوة للخدود

باوعت لبنطها متألمه اشوفنها كبرانه
_ ما نجحت العملية مو ؟

أبتسمت ومبين ورا ابتسامتها الوجع متكتر
سيكنة : لا

مسحت على ايدها الشايلها بيها كرار
_ خلي املج برب العالمين چبير

سكينة : الله كريم ،يله تعاي نطب

طبيت انا وياها وگبالي امي صارت ،چن امس شايفتني حتى سلامها استكثرته علي حاولت
اذكر روحي هاي امي من يوم يومها علموديش اضوچن

صاحتني من فوگ
سكينة : كوكبة تعاي بسااع

شلت كرار وصعدت ،بس شافتني طبيت فتحت الكنتور
سكينة : اختاري شنو تلبسين

_ اختاريلي أنت

سكينة : هذا الفستان الزيتوني يخبل يطلع عليج

_ امشي ورا ذوقج

سكينة : وما تخسرين

اطتنياه
سكينة : يله بدلي بساع

اطيتها كرار وطبيت بدلت وطلعت ،أبتسمت من شافتني تصلي على محمد
سكينة : بعد بس مكيجي، تعارفين مو ؟

_ أي شلون جا

سكينة : يله انا راح ابدل

حطت كرار بالگاع واطته غراض يتلهه بيهن ومشت تبدل وانا گعدت امكيج ،مكياجي بساع خاص لان خفيف وفستاني مال محجبات
ما سويت شعري ،بس رتبت الحجاب بنفس لونه، ونزلت گبل سكينة
لان هي تحب مكياجها بالمناسبات شوي يصير ثگيل

شوي وكالوا يله ،طلعنه لبيت خالتي الي بس شافتني طبيت انگلب وجهه وحتى
ما كلفت روحها تشيل ابن ابنها ،ما اهتمت وحاولت اتونس گبل لا اردن لذاك السجن ،وبس خلصت حفله الخطوبة ردينا لبيت اهلي ،اخواني ملتمين وابوي بيناتهم ما بيهم احد حتى گالي شلونج ،بس سعد گام سلم علي
سعد : تردين اليوم ؟

_ أي ،لان مرتضى گال ردي

سعد : منو يوديج ؟

_ ما اعارف

سعد : گوم اسماعيل ودي اختك

اسماعيل : ماكو غيري يعني

سعد : لا ماكو ،يله وديها

شمر عليه سويج السيارة وگبل لا اطلع گالي
سعد : لا تضوجين مني ،ردتج تمشين حتى لا يغثوج

ابتسمت
_ ما ضجت ،اعارف بيك تفكر بي

ودعته وصعدت ،الدرب كله ساكتين ما چن الصاعده وياه اخوي ،طبگ السيارة گبال باب البيت ونزل دگ الباب ما فتحه احد
اسماعيل : عدج مفاتيح ؟

_ أي ،بالجنطة

طلع الجنطة من السيارة وانا فتحت الجيب الزغير مالتها ،دورته ما هو
_ ماكو

اسماعيل : راح اطفر

طفر فتحلي الباب وطبينا ،وگفت عد باب الصالة مصدومة بالمنظر الشفته ابد ما يروح من بالي على كبر بشاعته ... 
يتبع

اسفه على نقل الاحزان الكم بس هذا ما واجهوه اصحاب قرية خنسة
كنت خافيه هذا الحدث عنكم على طول فترة كتابتي للرواية وكانت احد الاسباب لقبولي أن اكتبها لان تستاهل هل انسانة تكون ذكرى جميلة بگلبي وگلبكم


شكرا لزيارتكم عالم روايات سكيرهوم

تعليقات