رواية فصلية بديلة ( شموخ ) الجزء الثاني الفصل الرابع والخمسون 54 بقلم ام ملكوت

:- بعد الكلام يلي سمعته منهه اولما فتحت عيونهه وهيه تحجي وتعاتب ابوهه صار شبه مستحيل بعيني اني اجتمع بشموخ بعد ايقنت ولاول مره 

ان الحب مايكفي ومو سبب كافي حتى يخلي كل اثنين يجتمعون ايقنت ان حبي الهه يختلف تماما عن حبهه الي .. صفنت بحيره بيهه وماعرف السبب

هوه مابيده شي بعد ولا يكدر يجبرهه علي .. رجعت راسي عل حايط وغمضت عيوني وانه تتراود لاذني كل كلمه حجتهه وجاهدت بيهه على

رفضي قاطع صفنتي لمن طلع محمد يطمن علي كتلهه صرت احسن وكعد يمي للضهريه كالوا راح نروح للجامع عاد كلت اروح وياهم كمت وشوي

احس صرت احسن بس حيلي مهدود بعده لزم ايدي محمد وطلعنه من المستشفى عبرنه الشارع ورحنه للمغاسل توضينه ودخلنه سلمنه على امام

الجامع والبقيه ووكفنه نصلي الضهر والعصر وانه بكل ركعه وبكل سجود وبكل تسبيحه ادعي ربي بالرحمه والهدايه لكلبي وكلبهه وادعي يجعلهه

نصيبي رغم قراري يلي ما مر عليه يوم واحد باني انساهه واشوف حياتي ويه غيرهه ورغم كل كلامهه وكل السوته وياي جان حبهه بكلبي اعمق

جنت وبقيت لهسه عالق بيهه واطلبهه من ربي بكل صلاة الي وانه انتظر الفرج منه وبس هوه الرؤوف يلي قادر ينولني حاجتي بيدي ومايتركهه غصه

بكلبي .. من بين دعائي لسلامتهه ودعائي تكون نصيبي ترواد لاذني كلامهه لمن كالت لابوهه البارحه

" بابا ماريده انه راهب ماريد اتزوج منه خلاص اعتقه واعتقني خلي يروح بحال سبيله وخليني اعيش بعيد عنه وياكم وويه بنتي "

نزلت دمعه حاره من عيني على التربه وكمت عن السجود وانه شاد قبضه ايدي وبركان شاعل بصدري احسه غمضت عيوني وكعدت اسبح

بالسبحه واهدي ثوابهه للمهدي المنتظر عجل الله فرجه.. جانت امي تكلي كلما ضاكت بيك الدنيا واختنك بريتك الهوى تذكر الحجه عليه السلام

واهديله تسبيح او حتى ولو آيه صغيره بنيه الفرج وتهوين الشده وفك الكرب وعلى درب هل تسبيح استمرت حياتي ومشت ايامي بالايام الاخيره بدون

عزيزه كلبي الماخذه كياني وروحي .. كملت وكمت على جهه كعدت وسندت راسي عل حايط ومخلي ايدي على رجلي ومستمر اسبح مغمض عيوني.. 

كلهه ثواني واحس روحي هدات وسكنت لوعتهه فتحت عيوني واجه كبالي ابوهه وهوه يباوعلي بحيره بقه واحد يباوع للثاني بدون كلام وبملامح

حايره تالي هز راسه باسف وطبطب على ضهر محمد وكله يله نرجع .. بلعت ريجي بصعوبه وكمت ردت ارجع السبحه واجه امام الجامع كال بابتسامه مطمئنه على وجهه..

_اخذهه وياك يابني كمل تسبيح وهدي روحك المتعبه 

_لا مايصير حجينه هاي السبحه ملك الجامع ماكدر اخذهه

باوعتله ونزلت انظاري عل سبحه وروحي ضايعه مادري ليش كلام الحجي انطاني امل متدفق بروحي ماكدرت اسيطر عليه ولا كدرت غير اني

اشكره وانوي النذر مثلما كلي ابتسم وطبطب على ضهري ودعالي بالخير .. التفت على شخص كاعد وحاط اديه على راسه ويبجي بصوت شبه مسموع

وراح عليه لزمه من كتفه وبقى يحجي وياه عفتهم وطلعت وانه مبتسم ومتيقن ان رب العالمين يختار يلي يقودون بيته من احسن الناس وشرط كلماتهم

تكون بلسم عل جرح .. رفعت راسي قريت اسم الجامع وابتسمت بتعب ورجعنه للمستشفى دخلوا همه يمهه وانه بقيت بالباب كاعد منا لليل صار

هدوء وابوهه ومحمد راحوا للبيت يجيبون امهه وملابس الهه كلهه نص ساعه ورجعوا وهيه وياهم كمت سلمت عليهه وباوعتلي باستغراب وتنهدت

_بداعه عزيزه كلبك ..

رفعت راسي باوعتله وهوه يباوع بترقب ضهرت على ملامحي شبه ابتسامه متعبه وانه اعرفه حلفني بيهه طبطب على ضهري ولزم ايدي كومني

على حيلي وطلعنه نمشي سويه ركبنه بالسياره واخذنه لمطعم قريب ماجان الي خلك وحيل ادخل عاد دخل هوه جابلنه صاجيات ورجع كعدنه ناكل

وانه مالي نفس اكلت لكمتين بالتواسيل وبقيت اشرب ببسي وصافن بالدنيا لحدما كمل اكله هوه ورجعنه للمستشفى دخلنه وكذلك بقيت بالباب

ماكدر ادخل واشوفهه ولا الي حق وعين ادخل واخوتهه وابوهه يمهه كعدت ساند راسي عل حايط وغمضت عيوني غفيتلي كم ساعه على هل وضعيه

وفزيت لمن صار صوت خطوات بعيده عني فتحت عيوني وشفتهه هيه وسلام طالعه من الحمام وهوه ساندهه فزت روحي ووكفت على حيلي باوعتلهه

بقلق وهيه عبرت من يمي متجاهله روحي التمرمرت عليهه ومتجاهله نظراتي الهه شديت قبضه ايدي وغمضت بنفاذ صبر وانه السبحه بيدي

الا شوي جان انكطعت وتطشرت رجعت كعدت بمكاني فركت وجهي بغضب ورجعت وكفت بقيت

اتمشه واديه على خواصري كلهه ساعه تقريبا وطلع سلام باوعلي واجه علي لزم كتفي وكتله ..

_سلام رايح للبيت انه انتو يمهه بعد هيه بحاجتكم اكثر مني واصلا وجودي ماله معنى 

_تمام خويه روح ارتاح بس شلون رايح وحدك وانته بهاي حالتك خليني انه اوصلك 

_لا ماكو داعي صرت احسن انه هسه اخذلي تكسي وارجع للبيت اخذ الوالده ونتوكل 

_صدك تحجي ياخويه وين رايحين انته والوالده وياك بهل وضع خليكم عل اقل هل يومين مايصير تجون وترحون بيوم واحد 

_لا عادي وهم ياله نروح مناك شغلي وبيتنه مانكدر نبقى اكثر

_عل اقل انطي خبر لابوي شكله لو سالني ليش ماقنعته يبقى 

_انه من اطلع اخابره واكله هسه نايم خطيه خلي تعب البارحه

_ماشي خويه براحتك بعد ماضغط عليك ..

هزيت راسي بايجابيه طبطبت على كتفه ومشيت خطوتين وترردت روحي ماكدرت اروح ماكدرت اكمل طريقي وارجع بدون ماشوفهه واطمن على

حالهه التفتت على سلام شفته راح للحمامات.. شديت قبضه ايدي بتوتر وتوجه كلبي قبل رجلي يمشي بخطوات متردده للغرفه مالتهه طليت عليهه

وانه اشوف اهلهه يمهه نايمين وهيه كاعده وصافنه بالفراغ باوعتلي والتقت نظراتنه لحظات وانه كلبي يعاتبهه ويحاول يتشبع بنظراتهه قبلما

اروح لان جنت مقرر ان هل نظرات رح تكون الاخيره بيناتنه لا محاله .. جريت حسره ونزلت انظاري عنهه طالع من الغرفه طلعت من المستشفى

كلهه وانه روحي تحترك كلما ابتعدت خطوه عنهه يعتصر كلبي اشرت لتكسي من بعيد اجه صف يمي صعدت ورجعت لبيت ابوهه دكيت

الباب وفتحه الي ابن عمهه تجاهلته ودخلت للبيت وكفت بالساحه وصحت لعبير كم مره ياله اجت تركض بقلق باوعتلي وكتلهه..

_روحي كعدي امي وخليهه تحضر نفسهه وطلعي جنطنه خلينه نرجع يله 

_وين راجعين راهب صلي على محمد وين ماخذ المره بهل برد وبهل صبحيه

_ماراح يصير شي روحي كليلهه لامي تحضر نفسهه بسرعه منتظرهه انه بالسياره 

_بس 

_ بدون بس عبير كتلج روحي صيحي لامي خلي نروح كافي جان المفروض من الاساس مانجي ولا نعتب باب هل بيت ..

على صوتنه وكلامي طلع عمهه ساجد وهوه نعسان ومستغرب باوعلي واجه علي لزمني من كتفي وكال بقلق..

_خير عمي راهب وين رايحين بهل فجر صلي على محمد وفوت يابويه مايصير هيج تروح من عدنه 

_اللهم صلي عليه يا عمي خلينه نروح عندي دوام ولازم اليوم انه بكربلا موجود ومشكورين وماتقصرون على كلشي 

_اهده هسه انته اهده مو البارحه طايح وضغطك مرتفع ليش تسوي هيج بروحك وتقهرهه تعال

خلينه نفوت للديوان نكعد نتفاهم سويه لبينما اخابر لشهم وتكعد تحجي وياه

_عمي لخاطر الله عوفوني اروح انه لا اريد احجي ولا اسمع حجي اجيت ابارك لاختي ورجلهه

واشاركهم فرحتهم وهسه خلاص كفيت ووفيت وانتو ادريكم ماتقصرون بس لازم نروح وماكدر ابقى اكثر لا تصر علينه 

_لاا والله ماتروح علي القرآن الكريم لو خليتك ترحون لبيتكم ياراهب 

_عمي 

_خلوني اروح ياجماعه والله عندي شغل

_ابد والله حلفت عليك ولو انه لو انته اليوم ..

غمضت عيوني بنفاذ صبر ورجعت فتحتهن لمن لزمني من ايدي وبقه يسحب بيه للديوان مشيت

وياه من لا جاره وكعدت عل قنفه وانه اهز رجلي بتوتر وعصبيه اجه هوه عدل الدوشك يلي مفروش كبالي وطبطب عليه وهوه يباوعلي وكال..

_كوم ياعمي ناملك ساعتين ارتاح شوف عيونك شلون جمرن 

_لا مرتاح هيج خليني 

_لكك كوم الله يساعد التاخذك على هل عناد ..

باوعتله باستنكار وبقى مصر الا اتمدد عل فراش فركت وجهي بنفاذ صبر ورحت كعدت متربع عل فراش باوعلي باستغراب وبادلته النظره هز راسه باسف وكال..

_نام ياعمي نام تريد اجي الوليلك

_مرتاح هيج

_استغفرالله ياربي شلون بهل فجريه هاي 

_عوفوني اروح عمي واخذوا راحتكم ليش متعذبين وياي ..

ردت اكوم ولزم ايدي مرجعني عل فراش تافاف وكام على حيله وهوه يكول..

_اذا ماتريد تنام كوم ويانه خلي نتوضه ونصلي بدل مامكابلني وعاكد النونه ..

هزيت راسي بايجابيه وكمت وياه فتح باب الديوان القفله علي حتى لا اطلع ورحنه للمغسله توضينه وكملنه ورجعنه فرش المصلايات احسان ووكفنه

نصلي سويه كملت وبقيت كاعد اسبح وانه عيني على احسان وروحي تحترك منه  بس حسيته غريب تصرفاته وكلشي بي عكس قبل ماجنه هذاك اليباوع لشموخ متلهف هسه كاعد يراسل بنقاله ورغم القلق والحزن مبين على وجهه بسبب حالتهه بس ماحاول يروح للمستشفى ولا تلهف عليهه مثل قبل ..

كملت تسبيح ورفع راسه اجت عينه علي وعكد حواجبه باستغراب ولا اراديا سالته ماعرف بشنو جنت افكر اصلا من سالته هل سؤال وكتله..

_احسان انته مرتبط

_شنو

_مرتبط لو لا 

_غير متزوج انه شنو مرتبط لو لا 

_متزوج

_اي من سنه تقريبا 

_يعني من انتقلت للدائره هنا جنت متزوج لو

_لا وقتهه جنت خاطب 

_همم

_ليش سالت

_هيج مو اشوفك كبرت و ظنيت انك مامتزوج كلت اشوفلك بنت الحلال

_لا سيد راهب متزوج انه الحمدلله وعندي بت حلال ماتقصر انته 

_الله يسعدك وياهه 

_تسلم ..

ابتسم ورجع يراسل وماي ثلج نزل على كلبي احس من كالي ان هوه متزوج يعني طوال هل سنه يلي مرت وهوه ويه شموخ وبنفس الدائره يشتغلون ما

جان اله نيه سيئه اتجاهه ولا حاول يتقربلهه ويخليهه تحبه يعني كل خوفي وشكوكي وغيرتي من اذكر انهم سويه مالهن داعي ومالهن وجود بالحقيقه ..

ابتسمت وكمت لفيت المصلايه ورجعت كعدت عل فراش والسبحه بيدي وساند راسي عل قنفه كلهه كم دقيقه وعيوني طفت كلش والنعاس والتعب

سيطر علي وهمه رجعوا ناموا .. لفيت السبحه على ايدي وتمددت عل فراشي سحبت البطانيه غطيت راسي ونمت للعصر ماحاس بالوقت ياله

كعدتني عبير وهيه بيدهه صينينه الغده باوعت للساعه ب٤ العصر وبس عمهه لشموخ موجود احسان لا.. كمت اكلتلي لكمتين بعد اصرارهه ورحت للحمام

غسلت وجهي وبللت شعري وطلعت اتمشه بالحديقه بعيد عن البيت وادخن كملت الباكيت على فرد وكفه ودخلت للديوان كعدت عل قنفه واخذت نقالي راسلت محمد ..

💬صباح الخير خويه محمد شلون صار وضع شموخ 

💬هلا بيك راهب صباح النور الحمدلله احسن بس الدكتور كال لازم تبقى فد يومين على ماتستقر حالتهه تمام وتجنبا لاي مضاعفات مفاجئه ممكن تصيرلهه 

💬تمام هاذهو الحمدلله على سلامتهه ومابيهه الا العافيه انشاءالله 

💬تسلم حبيبي الغالي انته وين حاليا بالبيت لو 

💬لا بعدني عمك قفل الباب علي البارحه ماخلاني ارجع لولايتي

💬زين يسوي وين تريد تروح بهل طريقه وتفاشلنه وياكم ياخوي 

💬لاا انشاءالله ماكو فشله بيناتنه بس انه خلصت اجازتي هنا ولازم ارجع ماتجوزلي الضله بعد

💬 ميخالف انته تعنيت من هناك لهنا علمودي انه وعبير تحمل هل يومين ولا تروح بهل طريقه انتظر ابوي يكعد وياك ونتفاهم بهدوء وذيج الساعه تكدر وين ماتريد تروح

💬يمعود شنحجي ليش هوه شضل حتى نكعد نحجي بي خلاص الصار البارحه خله النقطه عل سطر وانتهى كل الحجي بهل موضوع وبيناتنه ياخوي تراهه الروح جزعت واكتفت ضيم

💬 فاهمك انه ياراهب ووياك حق شما حجيت بس اعتبر كاعد اطلب منك معروف وحاول تلبي الي اصبر هل يومين وابقى بالبيت وانشاءالله بس تتخطى مرحله الخطر نجي ونتفاهم 

💬امري لله ياخوي والله انه علمودكم باقي وبس ترجعون اودعكم وداع جزيل واتوكل 

💬يسلم مودك ابو معاذ وكفو منك 

💬بعد روحي 

💬حبيبي والله ..

طلعت من المحادثه ورفعت عيني على عمهه وهوه كاعد صافن بيه وعاكد حواجبه بجديه نزلت النقال وكتله بتساؤل..

_خير يا عم ليش هل نظرات اذا عندك كلام كوله وانه كلني اذان صاغيه

_ شوف ياراهب انه معرف بطبعي الصريح وماعرف الت واعجن بالسالفه هنه سؤالين واريدك تجاوبني عليهن بصراحه يابعد عمك

_تفضل عمي

_الكلام الدار بينك وبين بت اخوي شموخ جان علمود مصلحه ريان لو علمودك 

_من اي ناحيه

_من كل النواحي شنو جانت نيتك لمن حجيت هيج وياهه وعاتبتهه

_ والله ياعمي البارحه الكل عرف البكلبنه شنو  وظروفنه والمانعنه من الزواج شنو وانه بتكم اكثر

من مره طلبت تكون حلالي وهيه رفضتني وصدتني عنهه مو هسه من سنين طويله مرت 

_ليش جان عندك تواصل وياهه كل هل سنين المرت

_لاا ابد مافكرت بيوم اتواصل وياهه من وراكم ورغم لا عندي تواصل وياهه ولا اكدر اشوفهه واسمع صوتهه الا اني بقيت احبهه ١٠ سنين كامله لحدما التقيت بيهه باول يوم تدريب الهه بدائره 

_يعني مصادفه خلي نكول

_وهيه هيج اصلا جانت صدفه صادمه الي والهه ماتوقعنه الدنيا تفتر بينه وتجمعنه بهل طريقه وبصدفه غريبه ماممكن اي بشر يصدكهه

_وتالي

_تالي ياعم....

بديت احجيله عن الاحداث يلي صارت ويانه لمن انتقلت للبصره وشلون شوي شوي صرت اتعود على وجودهه بحياتي واتعلق بيهه ماستحيت منه ولا

ترددت بالعكس مشيت بدفع صدري وافتخر بحبي الهه لان جان عل فطره ومالي نيه سيئه اتجاهه وقله بهل وكت الشخص يحب ويقدر البنيه اليحبهه

ويخاف عليهه من الهوى مثل حبي وخوفي على شموخ .. كملت سرد قصتي وهوه هز راسه باسف وحيره ضرب على رجله وكال ..

_ياعمي الحب صعب ومانخلق للكلبه ضعيف وانته اثبتت ان اليحب شمهما صار وياه وابتعد عن اليحبهه طوال ما هيه متربعه بكلبه ماراح ينساهه ولا يشوف غيرهه 

_اي ياعم

_ انه جربت الحب مرتين بشبابي وبالاول انخذلت وانخانيت بس الله عوضني بحلى خالتهه خلت كلبي يرجع شباب وروحي تزهر والحب مثل السماد

لمن تفرشه بارض خصبه وطيبه تثمر زرع بدون ماتخلي بذور حتى ومدام انته حبك لشموخ 

عل فطره وهيه كلبهه طيب صدكني راح تحصد ثمار حبك الهه بيوم من الايام وتكول كلام عمي ساجد صحيح 

_انشاءالله ياعم انشاءالله ..

هز راسه بايجابيه وطبطب على كتفي ابتسمت بامتنان ودخلت علي عبير وهيه وجهه اصفر باوعتلهه باستغراب ومن رجفه كلبي كمت على

حيلي الهه وسالتهه شصار بقت تباوعلي بضياع وتاشر على داخل البيت وكوه نطقت ..

_امي راهب امي امي مادري شبيهه امي راح تموت راهب ام..

اختل توازنهه وانه تخبلت روحي عفتهه كعدت عل قنفه و طلعت وانه اركض وادور امي وين موجوده ومادري شلون وصلت الهه واشوفهه نايمه وفاتحه عيونهه مثل المصروعه

اجيت عليهه بسرعه اخذتهه بحضني وصرت اطبطب على وجهه محاول ارجعهه لوعيهه بس عبث كمت على حيلي واخذتهه بين اديه شايلهه

وطلعت بيهه وعبير اجت تركض وراي وهيه لازمه عبايتهه حاولت امنعهه بس بقت تتوسل ماجان بيدي غير اخذهه وياي هيه الثانيه

صعدنه بالسياره وطرت بيهه للمستشفى وكفت السياره بالباب ونزلت شلتهه ودخلتهه لصاله

الطوارئ اجه الدكتور فحصهه وهيه جسمهه مشتعل نار وكال للممرضين اليمه..

_صايبتهه شمره بسبب الحمى ابره بسرعه 

_دكتور دخيلك امي بيهه ضغط وسكر يجوزلهه هل ابره

_اي عادي مال صخونه هيه 

_تمام هاذهو تمام 

_هيه بيهه كورونا او مريضه

_لا دكتور مابيهه شي فجاتا صابتهه حمى

_اشك عدهه كورونا روح لقسم التحليل صيحلي الدكتور علي بسرعه كله الدكتور حسن يريدك وخلي يجيب معدات المسحه وياه

_تمام حاضر دكتور ..

عفتهم وعبير كاعده يم راسهه تبجي ورحت جبت الدكتور علي واجينه اخذلهه مسحه من خشمهه وراح علكولهه مغذي وزرقوا ابره خافض حراره

وابره ثانيه ماعرفت مال شنو بس اعتقد مال شمره او صرع هيج شي الهه وبقوهه تحت المراقبه .. التفتت على عبير وهيه تبجي اجيت

عليهه حضنتهه وخابرت لمحمد اجالي بسرعه هوه وسلام سالوني عن حالتهه وكتلهم شاكين بيهه كورونا دعولهه بالسلامه وبقوا يمنه

دقايق تالي راحوا لشموخ بس محمد بقى يم عبير يصبر بيهه منا لمرت تقريب الربع ساعه واحنه منتظرين حرارتهه تنزل كل شوي اجي اخلي ايدي

على راسهه اجيك وضعهه وارجع بعدما الكاه على حطته اجه ابو شموخ يباوعلنه بقلق طبطب على ضهري وكال ..

_خير انشاءالله ياعمي شبيهه الوالده سلامات

_حمى صابتهه فجاتا وشاكين عدهه كورونا ياعمي

_ يله بله منين اجتلهه هل مكروده اشو كاعده وساكته بالبيت 

_ قبل اسبوع تقريبا اخذتهه للمستشفى علمود مفاصلهه احتمال هناك لاكفتهه من المرضى 

_خطيه الله يشفيهه وانشاءالله مابيهه الا العافيه 

_تسلم يا حجي ..

هز راسه بايجابيه وطبطب على ضهري يصبرني وراح على عبير ومحمد حجه وياهم وكاللهه..

_عمي عبير مايصير تبقين هنا انتي حملج بعده ببدايته والطوارئ كله امراض وبكتريا لا تنعدين يابويه وتتمرضين 

_عمو ماكدر اروح روحي وبالي يم امي خايفه عليهه يصير بيهه شي وماكون يمهه

_لا صلي على محمد وانشاءالله امج بخير وسلامه مابيهه الا العافيه هسه تروح الحمى ويبشرج اخوج بكومتهه بسلامه

_ انشاءالله عمو انشاءالله الله يسمع منك 

_يله هسه روحوا للبيت انتي ومحمد ارتاحولكم شويه ومن تكعد احنه نتصل عليكم

_ماكدر اروح للبيت عمو والله خلوني هنا 

_جا روحي يم شموخ بغرفتهه واذا صار شي نصيحلج تمام

_تمام اروح يم شموخ بس وين 

_تعالي وياي عمي تعالي خلي محمد هنا يم اخوج خاف يحتاجله شغله 

_تمام عمو..

_وهسه شلونهه اجه الدكتور شافهه لو لا.. دخلت غيبوبه .. ليش وشلون هيه مساع مابيهه شي وطلعت بره تشم هوى شصابهه .. تمام جاي انه يمكم جاي 

_خير خويه شصاير خوفتني

_شموخ صار وياهه مضاعفات ويكولون مرتفع ضغطهه والا شوي جان صار بيهه سكته ثانيه لو مامتلحكيلهه

_تحجي صدك شلون صار هيج

_كالوا يمكن لان انقهرت من شافت عبير تبجي المهم خويه راح اروح يمهه انه اشوفهه لان كال سلام دخلت غيبوبه ..

جمدت بمكاني وكلبي رجف عليهه بقيت بحيره بين ابقى يم امي وبين اروح اطمن عليهه واشوفهه فركت وجهي بحيره وبقيت افتر بالصاله لحدما

طلع الممرض رحتله بسرعه وهوه يفحص بحراره امي هز راسه بايجابيه والتفت علي انطاني فايل وهد حيلي لمن كال..

_حرارتهه صارت احسن بس للاسف الوالده وياهه كورونا شديده ولازم تبقى بالحجر الصحي

بالمستشفى فد ١٥ يوم اذا مانتكست حالتهه تكدر تجاوز الخطر واذا ماتحملت بعد بيد الله 

_احجي غيرهه دكتور فدوا شلون يعني بيهه كورونا وهيه عدهه ضغط وسكر وعضامهه ومفاصلهه تعبانه امي جبيره مو حمل هل مرض

_ ادعي ربك ينجيهه بهيج حاله الدعاء دائما اقوى من الدواء..

فركت وجهي بحيره وقهر ورحت بخطوات تعبانه وعيوني جمرت لزمت ايدهه بستهه حيل وغمضت لمن صارت تنزل دموعي لا اراديا ياربي شنو من

امتحان هذا ياربي الى متى وانه ابقى عايش هل شكل يارب اخذت مني عزيزه كلبي وحرمتني من ان تكون نصيبي لا تحرمني همين من امي ياربي

نجيهه وكومهه بالسلامه وخفف عليهه مرضهه والمهه ياربي ماعندي بدنيا غيرهه لا تفجعني بيهه لا تمتحني بيهه دخيلك .. تركت ايدهه وكمت

مسحت دموعي لمن دخلوا الممرضين خلوهه عل نقاله واخذوهه لغرفه الحجر الصحي يلي بيهه المرضى بالكورونا رحت للدكتور حاجيته وكتله بتساؤل..

_اي تكدر تطلعهه وتحجرهه بالبيت بس حاليا وضعهه مو مستقر وتجنبا للمضاعفات والخطر خليهه هنا فد يومين كلاثه لبينما تتعدل درجه حرارتهه وتصحى ساعتهه تكدر ترجعهه للبيت 

_تمام دكتور شكرا الك 

_واجبي ..

هز راسه بايجابيه وطلع من الغرفه اجيت كعدت يمهه عل كرسي بتثاقل ورجعت راسي عل حايط وانه اباوعلهه واول مره هيج اخاف من الخساره

كلشي بالدنيا يهون كسره وخسارته الا وجود الام مو هين ولا يكدر كلمن جان يتحمل كسره فراكهه ويصبر .. 

تذكرت عبير شلون بيهه هسه شلون اكلهه وهيه منا حامل وخاف تسقط من القهر والبجي اجه يمي محمد وكال بقلق..

_هاا خويه طلع صدك بيهه كورونا 

_اي والله يامحمد

_لا حول ولا قوة الا بالله منين اجتلهه هل مصيبه 

_قدر الله وما شاء فعل ياخوي قدر الله والحمدلله على كل حال 

_الحمدلله ياخوي انشاءالله ربي يكومهه بالسلامه ماتستاهل هل وضع تنحط بي خطيه

_اي والله وهسه انه محتار بعبير ماريد اكللهه ان امي بيهه كورونا وتروح تشبع قهر وخوف وتسقط طفلهه لا سمح الله

_وشلون يعني اول تالي راح تدره 

_خلي نكلهه بيهه نسبه قليله ماتاثر عل رئه ولا عل ضغط والسكر 

_هيج رايك

_اي ياخوي لان اختي ادريهه ماتتحمل ابد واذا حجينالهه الحقيقه ممكن تروح بيهه لا سمح الله مو بس ابنهه 

_لا جا هاي هيه رايح اكللهه مثلما اتفقنا 

_اي وكللهه يومين ويطلعونهه للبيت واذا استمرينه نهتم بيهه وننطيهه علاج تطيب خلال ١٥ يوم

_تمام انشاءالله يله محتاج شي انته

_لا سلامتك بس

_كول خويه

_ شلون صارت شموخ 

_بعدهه والله حاليا داخله غيبوبه وكال الدكتور يمكن الغيبوبه المؤقته احسن الهه حتى يرتاح الدماغ من التفكير ويخف عليهه الضغط وهيج يشفى جرحهه بسرعه ويطيب

_تمام مدام كال الدكتور هيج معناتهه انشاءالله مابيهه شي كم يوم وتكعد 

_بيني وبينك ياخويه الدكتور هل حجي كاله لابوي بس لمن طلعت وراه كال احتمال ماتكعد خلال ايام ويجوز تطول اشهر او سنه او ماعرف الى ان الله يفرجهه عليهه

_تحجي صدك ياخوي اذا هيج معناهه هاي مو غيبوبه مؤقته

_همه يسموهه مؤقته لان مايعرفون يمته تنتهي مالهه وقت محدد مثل الغيبوبه الجبيره 

_زين وشلون اذا ماكعدت 

_والله مادري ياخوي يحاولون ياخذولهه اشعه لراسهه ويشوفون سبب الغيبوبه ويحاولون يشتغلون عليه حتى تكعد 

_لا تكعد شموخ قويه و انشاءالله مابيهه الا العافيه والله يكومهه بالسلامه 

_تسلم ياخوي انشاءالله ربي يسمع منك ويكومهه و الوالده بسلامه انشاءالله 

_آمين يارب..

طبطب على كتفي وطلع من الغرفه رجعت كعدت بمكاني وانه روحي تلوب عليهه تريد تشوفهه وتطمن عليهه ولولا امي جان سكنت يمهه

وماتحركت من الغرفه ..

اووف منك ياكلبي اووف .. 

هزيت راسي باسف وحيره وبقيت اشغل روحي بالنقال شويه ودخلوا عبير  محمد تطمنواعلى امي من بعيد وراحوا ماخذهه للبيت اتصلن علي اسراء والبنات وطمنتهن عن حالهه وكتلهن مابيهه شي يومين وتطلع جذبت عليهن حتى لايجفصن كبال عبير ويخوفنهه ..

 المهم مر يومين تقريبا وهيه تكعد شويه تسولف وياي تالي يضربوهه ابره مسكن لعضامهه وكعدت ادلك بيهن بفكس لان صارن يونن عليهه وباليوم الثالث انطوهه ابره سكر وضغط ومغذيات وفيتامينات جبتهن من الصيدليه واخذناهه انه ومحمد وعبير طلعناهه من

المستشفى صعدت بالسياره ولفت انتباهي ابو شموخ وهوه يصيحلنه رجعت نزلت واجه باتجاهي وهوه يكول..

_هاا عمي راهب وين رايحين 

_بعد اليوم طلعت الوالده افضل تكون بالبيت واعتني بيهه احسن ماتكون بالمستشفى وتنتكس حالتهه اكثر 

_خابرت صديقي هنا شافلي بيت راح ااجره واكعد اعالجهه وادير بالي عليهه 

_صدك تحجي ياعمي تجذب انته 

_ليش

_بيتي موجود وضال تدور ايجارات روح اخذهه لبيتنه هناك بتهه ومرتي ومرت ساجد يمهه تعتني بيهه وين ماخذ المره ببيت معزول وحدهه 

_لا عمي مايصير والله لا ترحون تنعدون منهه هوه احنه اجينه نشاركم فرحتكم تالي نعديكم ونروح تريدنه 

_لاا ياعمي شسالفه محد راح ينعدي الحمدلله عدنه مناعه احنه وهيه راح تبقى بغرفه معزوله فوك يم غرفه محمد لا تعدي احد ولا احد يعديهه وهناك البنات يعتنن بيهه انته شتعرف وتريد تضل وحدك يمهه

_بس عمي

_لا بس ولا غيرهه توكل على الله واخذ امك لبيتنه وانه راح اخابر النسوان يعدللهه الغرفه والفراش ويديرن بالهن عليهه 

_خاف تصير زحمه ياعمي

_لا ماكو زحمه ولا شي احنه اهل وعزاز وانتو خطاري فوكاهه شلون تريدني اخليك تكعد بيت ايجار وبيتي مفتوح الكم وعلي اطلع من البيت اذا تريد واخليكم تعيشون بي

_ماتقصر ابو محمد كفو منك والله

_حبيبي ابو معاذ عيوني الكم ..

ابتسمت وطبطب على ضهري صعدت بالسياره وطرت بيهه للبيت مالهم نزلتهه عل كرسي المتحرك ودخلت بيهه للبيت جانن النسوان يعدلن بالغرفه بقينه ننتظر دقايق وكالوا يله صعدوا اجيت على امي اخذتهه بين اديه شلتهه وصعدت بيهه ومحمد وعبير وراي صعدوا فتحوا الباب ودخلتهه خليتهه

عل جربايه وكلت لعبير توكف بالباب لا تدخل وتنعدي نزعتهه حجابهه وعبايتهه وغطيتهه باللحاف شغل محمد الصوبه واجيت انه طلعت المغذي الهه ضربت بي ابره فيتامين ومقويات وعلكته الهه فوك الجربايه ووصلته بالكانوله يلي بيدهه تلمست جبينهه اجيك حرارتهه وجانت مرتفعه شويه كمت جبتلهه حبوب خافض حراره شربتهه وكعدت يمهه ترخصوا محمد وعبير وطلعوا من الغرفه كمت سديت الباب والتفتت عليهه وانه اشوف روحهه ذبلانه وعيونهه كوه تفتحهن اختنكت وغصيت بعبرتي اجيت عليهه تمددت يمهه حاضنهه ودافن وجهي بصدرهه وانه دموعي تهل مثل المطر على هدمهه بقت تمسد على ضهري وتكول بصوت متقطع..

_يمه ..وليدي .. حبيبي كوم اطلع لا تنعدي وليدي .. لا تخليني خايفه عليك .. روح يمه منا لا يصير بيك شي

_عساهه بيه ولا بيج يايمه عساهه بكلبي ولا بريتج هل مرض يمه انه شلي بالدنيا بعدج شلي بروحي وبصحتي خلاف عينج يابعد عيني 

_انه اقوه بالله وبيك يايمه لا تكسر كلبي عليك وتخوفني روح اطلع وانشاءالله الكاتبه ربك يصيبني اول تالي

_الله يكتبلج العمر الطويل والصحه يايمه الله ياخذ من عمري على عمرج ومن صحتي على صحتج يبعد روحي ..

رفعت راسي باوعتلهه بتعب وبقت تمسح بدموعي وتمسد على خدي بلعت غصتي وكمت من حضنهه مسحت دموعي الباقيه اخذت نفس وكمت كتلهه

هسه اجي ونزلت بقيت واكف عل درج صحت لعبير وطلعت من المطبخ بت عمهه لشموخ يمكن اسمهه جنان باوعتلي بتساؤل وكالت..

_هاا خويه محتاج شي عبير راحت ترتاح بغرفتهه ضهرهه صار ياذيهه 

_خو مابيهه شي

_لا تطمن مابيهه بس لان افترت وبقت واكفه على حيلهه كل اليوم 

_هاا تمام 

_تريد شي محتاج شي اختك انه لا تستحي مني

_بلا زحمه عليج خويه بس اريد ادخل للمطبخ اسوي اكل للوالده علمود تاخذ الدوه

_افاا كلي وانه هسه اسويلهه شنو مسموح تاكل وشنو لا 

_لا خويه لا تعبين نفسج انه اسوي

_لا ابد والله ماكو تعب كلي وانه اسويلهه التريده

_مو شي ثكيل يعني شوربه عدس وسوب دجاج اذا اكو وكون ماصخ كله مابي ملح علمود ضغطهه

_انشاءالله حاضر هسه اسويلهه واجيبه الهه وبعد محتاج شي

_صلاحيه ماي اذا ممكن 

_اي انشاءالله..

ابتسمت على كلامهه واخلاقهه وشلون معزبه ويانه اعرفهه خطيبه محمد ماينلام لو مات عليهه ماشاءالله عليهه خوش بنيه ومعزبه وكلبهه طيب مو مثل اخوهه.. المهم راحت شويه ورجعت بيدهه صلاحيه الماي وكلاص انطتنياهه وكالت..

_هذا الماي وهسه خلال ساعه يكون يمك الشوربه والسوب 

_تمام شكرا الج خويه رح اتعبج وياي

ابتسمت بامتنان وصعدت للغرفه خليت الصلاحيه عل ميز وبقيت كاعد يم امي منا لمرت ساعه وفعلا دكت الباب كمت على حيلي فتحته وانه لابس

كمامه واخذت صينيه الاكل منهه تشكرتهه وراحت نزلت اجيت كعدت عل جربايه عدلت كعده امي وصرت اوكلهه شوي شوي لحدما شبعت كمت

انطيتهه حبوب الضغط والسكر شربتهن ورجعت تمددت وغمضت عيونهه نايمه اجيت تمددت يمهه وغفيتلي جم ساعه بدون ماحس للمغرب .. 

سمعت الاذان وكمت دخلت للحمام توضيت وطلعت فرشت المصلايه ووكفت اصلي الفرض .. كملت وطولت بسجودي داعي ربي بالرحمه والشفاء

لامي لحدما مرت دقايق وجعتني رجلي ونملن ياله كمت على حيلي لفيت المصلايه رجعتهه لمكانهه

وكعدت امي رادت تروح للحمام طلعت كذلك وكفت عل درج وصحت لعبير اجتلي بسرعه وهيه قلقه وكالت..

_ها راهب شصار امي بيهه شي 

_لا مابيهه بس تريد تروح للحمام 

_اي رايحه اصيح لخالتي ام احسان ونجي

_خلي بس هيه تجي لا تجين وياهه يمعوده ستري على روحج وابنج لا تنعدين

_تمام انشاءالله..

نزلت راسهه بحزن وراحت فركت وجهي بحيره هسه الواحد مايكدر يلومهه ولا يمنعهه شلون بله بيهه لو الواحد يحذرهه لو تنسى انهه حامل وتشمر

روحهه بحلك المرض .. راحت صاحت للمره واجت هيه واخت احسان صعدن وراي كومنهه كعدت عل كرسي حيلهه مهدود بعد حيلي حيلهه و ماتكدر

تمشي بحدهه ..دخلنهه للحمام وبقيت انه انتظر همزين سمعت حجايه ابو محمد وجبتهه هنا والا شلون ادبرهه انه وحدي وادير بالي عليهه.. 

كمت وكفت كبال الشباج وصفنت بالحديقه سرح بالي يم ام عيون سمره وانه افكر واسال الهوى الهاب كعدت لو لا راح تصير زينه لو تبقى نايمه غيبوبه

شلون اذا ماكعدت شلون بيهه وبنتهه شلون راح تصبر بلا امهه وشلون اصبر انه واتحمل لو صارلهه شي كله هذا بسببي كله من وره راسي وسوالفي القهرتهه .. 

فززني من صفنتي لمن طلعن من الحمام التفتت عليهه واجيت اخذتهه من ايدهه نومتهه عل جربايه  وكعدت بصفهه امسد على ايدهه وكالت المره ..

_خاله راهب خليهه تنام ترتاح وانته اطلع شم هوى مايصير تضل محبوس وياهه لا تنعدي وتتمرض 

_اي انشاءالله بس منو يبقى يمهه خاف تتدهور حالتهه

_احنه يمهه لا تخاف كل شوي اجي اطمن عليهه وانزل 

_مشكورين والله كفيتوا ووفيتوا ويانه ووكفتكم ماراح انساهه طول عمري

_لا تشكرنه احنه اهل واحباب وواجبنه هذا اتجاهكم 

صفيتهه بالكراج ونزلت تمشيت داخل المستشفى وصولا لغرفتهه شفت سلام وابوهه وامهه طلعوا من الغرفه متوجهين لبره وانه استغليت هل فرصه

ودخلت للغرفه شفتهه شلون نايمه بذبول ووجهه اصفر وشاحب لونه تقربت عليهه لزمت ايدهه بستهه وشميتهه وانه عيوني مجمره على حالهه

نزلت وجهي يم وجهه وبقيت اقره آيات قرانيه ب نيه الشفاء يم اذنهه وامسد على خدهه وراسهه كملت وبست راسهه من فوك الحجاب وطلعت 

من الغرفه وانه صدري مخنوك بي النفس وكفت بالساحه ايدي على صدري واجر النفس غصب طلعت جكايري وصرت ادخن لحدما الله كالي بس

شمرت الجكاره عل نص وركبت سيارتي راجع بيهه للبيت وصلت وفتحلي احسان الباب دخلت صفيت السياره بالكراج ورفعت نقالي اتصلت على سالم

وكتله ياخذلي اجازه مرضيه من العميد لان الوالده مريضه ولازم نبقى هنا فد ١٥ يوم عاد هوه راح ساعه حاجه العميد ورجعلي خبرني ان العميد

اعتبرهه اجازتي السنويه لان اصلا الاجايز بدت تتوزع وخله اسمي باجايز هل شهر تشكرت منه وسديت الاتصال بعدما طمنته على حاله امي

فتحت باب السياره ونزلت دخلت جوه وبوجهي صعدت لامي بقيت متمدد يمهه وانه اصفن بحالتهه مره واتذكر حاله شموخ مساع مره شلون ثنين

عزيزات على كلبي ومايهون علي افرط بوحده منهن غمضت عيوني وغفيت وانه السبحه بيدي وادعي ربي يشفيهن الي ويكومهن بسلامه ...

.

.

:- مر اسبوع وانه بالمستشفى رغم احس نفسي زينه وردت اطلع من اولما كعدت من الغيبوبه بس ماقبل الدكتور وكال خلي نراقب حالتهه فد يومين

والشريان يلي صارت بي العمليه والحمدلله طلع كلشي سليم وحتى الشريان مسلكه زين والقلب وضعه تمام اخيرا كتبولي خروجيه وطلعوني

من المستشفى طلعت بالباب وكفخ وجهي هوى بارد غيم على بركان كلبي بقيت واكفه ثواني اخذ نفس لحدما جابولي السياره كبالي صعدني بابا

وهوه ساندني وصعدت وياي امي وسلام ومحمد بالصدر يسوق صعد بابا اخر واحد وانطلقنه للبيت وانه صافنه بالشوارع والدنيا متجاهله فكره اني

راح اشوف راهب لمن اوصل للبيت ورح اعيش وياه بنفس البيت فتره بلعت ريجي بصعوبه وقررت انحبس بالغرفه لا اشوفه ولا يشوفني احسن اله

وللكل بلا ماتصير مشاكل زايد واحنه بهذا وضعنه النحس .. كلهه دقايق ووصلنه دك هورن محمد وفتحلنه الباب مرتضى تفاجات من وجوده بالبيت

بس مدام هوه موجود معناهه بيت عمي ساجد رايحين لان ابوي مانعه لمرتضى من ان يجتمع ويه بيت عمي واساسا هوه ماله عين يرفعهه بعين عمي

ساجد بعد الصار هذاك اليوم ونيته العاطله ويه جنان .. المهم اجه ابوي نزلني من السياره وهوه اجه بسرعه علي لزمني من ايدي الثانيه

باوعتله باستغراب وهوه غلس عن نظراتي اخذ ايدي من ابوي مشاني لداخل البيت وتحديدا لغرفتي تمددت عل جربايه واخذ اللحاف غطاني ..

صفنت وكان هل موقف مر علي من قبل وهل عطر وريحه الجكاير نفسهه الشميتهه بكل مره اكون تعبانه وانام بدون ماتغطى او بدون ماخلي مخده جوه راسي ..

ايقنت ان الشخص يلي جان يهتم بيه هل شكل هوه مرتضى باوعتله وشفته راد يروح ولزمت ايده التفت علي باستغراب وكتله بتردد ..

_مرتضى بعدك زعلان مني 

_على شنو 

_على الصار بعرس محمد 

_لاا 

_انته اخوي واعرفك من تزعل وتحقد لو تعاركنه واعرف نظره عيونك اتجاهي لو جانت حب او كره لا تحاول تضم علي 

_لا مازعلان منج بس ماكاعد انسى السويتي وكدام اليسوه والمايسوه انطيتي بيه وانه اخوج 

_سامحني خويه ماقصدي انطي بيك واقلل احترامك كدام الناس وانما جنت ماله من تصرفاتك

وكارهتهه اتجاه جنان والخلاني اتخبل هذاك اليوم هوه ضعفهه لجنان ودموعهه لمن دخلت للغرفه

وشفتهه بهل حال خفت تكون مسوي بيهه شي وفقدت عقلي والا صدكني انه احترمك واقدرك وبعمري مافكرت انطي بيك كدام احد 

_خلاص عوفج من هل موضوع نامي هسه انتي ورتاحي حتى تطيبين بسرعه والله كريم تالي

_يعني هسه انته كلبك صافي اتجاهي لو بعده 

_ما بكلبي شي اتجاه احد وبالاخص انتي ادريج فطيره وشخصيتج رغم صرامتهه الا ان كلبج طيب واكبر دليل على هل شي لمن تكومين حتى واحنه

متعاركين تغسلين ملابسي وتسويلي اكل بدون ماتتمنعين لو تتمللين مني وصدكي ماكو اخ يكره

اخوه فقط تلكين بسبب المواقف البايخه التصير وياهم كل شخص حاقد شوي على اخوه لا اكثر

_يعني هسه انته حاقد علي

_ههه لا ماحاقد 

_اثبتلي بله

_شلون اثبتلج يعني تردين اكوم اركص

_اي

_هههه دنامي نامي لا اروح ابوك حلوياتج الجبتهن 

_جبتلي حلويات

_اي كلت خطيه صارلهه اسبوع تحش باكل المستشفى الماصخ اكيد كلبهه متلهف عل حلا هسه

_اي والله بعد اختك ياخويه صدك طاك كلبي عل حلا بس خاف ابوك مايقبل

_اي لا تكثرين باليوم اكليلج نستلايه وحده خاف كلشي يصير

_لا هوه انه اصلا عندي هبوط بالسكر مايصعد بسهوله ف جيبلي هل حلويات وخليني ابسط قبل لا يجي ابوك

_ههه تمام...