رواية زوجتي غريبة الاطوار الفصل الخامس 5 بقلم هاجر نور الدين

 


رواية زوجتي غريبة الاطوار الفصل الخامس والاخير بقلم هاجر نور الدين


- الإتنين دول يفضلوا هنا، لو طلعوا هيموتوا مني قبل سمر بسبب إزعاجهم ومالهومش لازمة أصلًا.

والدي قعد فورًا بخوف وحماتي بصيتلهُ بفقدان أمل وإنزعاج وقعدت هي كمان وهي باصة لسمر بخوف.

إبتسمتلها سمر بإطمئنان وبعدها طلعوا للسطح،
بدأ شادي يقول الطلاسم اللي هتظهر العالم بتاعهُ
وجرح نفسهُ جرح بسيط وجرح سمر نفس الجرح عشان يتمزج الدم بتاعهم ببعضهُ لأن طلب النقل ليها وهيبدلها بـ سمر النسخة المتوحشة من العالم بتاعهُ.

ظهر العالم بتاعهُ قدامهم فعلًا ووقتها بص لسمر وقال:

- يلا دورك، حافظة اللي قولتهولك؟

هزت راسها بالموافقة وبعدت خدت نفس عميق ودخلت العالم اللي كان قدامها كأن العالمين مقسومين جانبين كل جنب عالم مختلف، بمجرد ما حكت رجليها فيه إختفى العالم بتاعها.

كانت وقتها جوا أوضة النوم اللي في شقتها القديمة قبل ما ننفصل، خرجت من التواليت وأنا بحاول أقضي معظم وقتي بعيد عنها وعنهم كلهم.

قربت سمر مني وهي ملهوفة وقالت بخوف وهي بتتفحصني:

- إنت كويس يا شادي؟

بصيتلها برعب وبحاول أفك إيدي اللي مسكتها وقولت بإبتسامة قلق وخوف:

- آه كويس يعني في إي؟

بصيتلي سمر بنظرة حزينة وقالت بهدوء:

- إنت مش قادر تميزني منها؟

بصيتلها شوية بعدم فهم وقولت بتردد:

- أنا خلاص بحبك إنتِ مش بحبها هي لو دا إختبار عشان تشوفيني هتأثر يعني لما تمثلي زيها هي مش فرقالي.

إتحولت نظراتها للغضب وقالت وهي بتزقني بعيد عنها ومنفعلة:

- تصدق أنا الغلطانة إني معرضة نفسي للخطر ورجعت هنا تاني عشان واحد زيك، أنا أصلًا اللي أستاهل.

خلصت كلامها ولعدت عني شوية وهي بتاخد نفسها بعصبية،
أنا لسة مش عارف دا إختبار منها ولا دي سمر بجد!

أصل إي اللي هيجيب سمر هنا، يعني المفروض أعمل إي دلوقتي،
بدأت أتكلم بتردد وحذر وقولت بتساؤل:

- طيب لو إنتِ سمر مراتي قصدي اللي كانت مراتي قوليلي آي حاحة ميعرفهاش حد غيرنا إحنا الإتنين.

بصيتلي وقالت بعيون ضيقة وخبث:

- في وراك فراشة!

صرخت وبعدت روحت جنبها وأنا مرعوب،
أنا عندي فوبيا من الفراشات وبترعب منهم بشوفهم كائنات شريرة وعايزة تأذيني لما بتطير حواليا!

بصيتلها للحظة بإستيعاب وقولت وأنا مش مصدق لسة:

- إنتِ بجد سمر؟
طيب جيتي هنا ليه وإزاي؟

إتنهدت وقالت وهي لسة زعلانة:

- عشان أنقذك لأنها لما جابتني هنا واجهتني وقالتلي إنها هتاخد مكاني عشان تاخدك وتستبدلك بـ طليقها اللي شيفاه مش عاجبها دلوقتي، وأنا للأسف زي العبيطة رجعت عشان أنقذك.

خبطت راسي بإيدي وقولت بغضب وإنفعال:

- وحياة ربنا أنا غبي حقك عليا، بس إنتِ كنتِ هنا وعارفة قد إي الناس دي مرعبة وخصوصًا هي أنا فكرتها بتختبرني ولو قولت إني لسة بحبك هتاكلني!

بصيتلي بطرف عينيها بغضب وقالت من بين سنانها:

- عمومًا معملتش زيك ورجعت للموت برجلي عشانك،
بس هنقول إي ما إنت كدا كدا خاين وعمرك ما هتتغير ونفسك أولًا، أنا هعتبر اللي عملتهُ واللي بعملهُ عمل إنساني ولما نطلع من هنا هنساك بجد.

إتكلمت بتنهيدة وأنا بحاول أهديها وقولت:

- يا حبيبتي والله ما أقصد، طيب هحب دي إزاي بالله عليكِ!
وبعدين مفيش طريقة للخروج من هنا غير بإذنهم، إنتِ غبية إنك رجعتي دلوقتي هنموت أنا وإنتِ!

ردت عليا وقالت وهي بتدور على حاجة في الحيطان:

- إهدى إنت بس شوية وإعمل اللي بقولك عليه عشان منموتش فعلًا ومش عايزة أسمعلك صوت عشان مش طيقاك.

سكتت فعلًا لأن معاها حق، أنا أصلًا واحد واطي،
خونتها مرة وإنفصلنا ولما رجعت تلحقني من الموت أنكرت حبها في عينها وقولت إني بحب واحدة تانية ومقدرتش أعرفها.

أنا لو مكانها أهرب لوحدي وأسلمني للوحوش اللي برا.

الباب خبط ووقتها حسيت بقلبي هيتشال من مكانهُ،
بصت سمر ناحية الباب بقلق وبعدين قالت بهدوء وهي رايحة تفتح:

- متعملش آي حاجة توضح إنك قلقان وأنا هتعامل أنا كنت معاهم قبل كدا عادي.

فتحت الباب وكانوا الثنائي المرح كالمتوقع، 
إتكلمت حماتي وهي بتقرب من سمر وبتشدها من خدودها وبتقول:

- حبيبتي يلا عشان تتعشوا معانا،
إنتِ بشرتك بقت ناعمة أوي ليه كدا حساها زي ملمس البشر!

إبتسمت سمر وقالت بهدوء:

- يمكن عشان إتغذيت كويس الفترة اللي فاتت من البشر لما كنت هناك، المهم إني هفضل العشا لوحدي أنا وشادي النهاردا.

ضحكت حماتي وقالت بنظرات لؤم:

- آه كدا لازم أروح أنا كمان، وبعدين خلاص هنسيبكم براحتكم النهاردا.

إتكلم والدي وقال بنبرة غريبة كأنهُ هيغني:

- إبني برضوا يتحب ويتفضل يتقعد معاه فعلًا يابختك بيه.

ضربتهُ حماتي في كتفهُ وقالت وهي بتضحك:

- يلا بينا إحنا سيبهم براحتهم.

كان سمر لسة مبتسمة ومش بتعمل آي حاجة تاني، 
بعد ما مشيوا قفلت الباب ووقفت وراه وهي بتاخد نفسها.

إتكلمت وقولت بعد ما هديت شوية:

- مكنتش أعرف إنك عندك الثبات الإنفعالي دا كلهُ!

ردت عليا بنظرات حاسس إنها لو بتتحرك هتموتني:

- إزاي وأنا لسة مقتلتكش لحد دلوقتي دا أكبر دليل على ثباتي الإنفعالي إني لسة سيباك عايش.

إتحمحمت وسكتت عشان ميبقاش مصيري على إيد بشرية وسط الوحوش دي.

رجعت تاني تدور على حاجة في الحيطان لحد ما قالت بإبتسامة نصر:

- لقيتها.

قربت منها بفضول وبعدها قالت:

- الوردة دي مش مجرد رسمة صغيرة في الحيطة، الوحيدة اللي باللون العنابي وسط كل الأسود دا، المهم إفضل ماسك إيدي متسيبهاش.

فضلت سمر ماسكة إيدي وهي حاطة الصباع اللي إتجرحت منهُ عشان تدخل العالم على الوردة وبتقوا الطلاسم اللي علمهالها شادي.

بدأوا بعدها الإتنين يدوخوا ولكن فضلت سمر مكملة في اللي بتقولهُ، في الوقت دا في عالمنا الطبيعي كانت سمر وشادي النسخة المُوحشة من العالم التاني لسة واقفين على السطح وسمر ظاهرة بشكلها الطبيعي للعالم بتاعها نص بشرية ونص بجسم أسود فاحم وعيون نارية، كانت بتتكلم بغضب وبتقول:

- إبعد عن طريقي أحسن ليك يا شادي عشان هقتلك.

إبتسم بسخرية وقال:

- بجد؟
هتعرفي تقتليني يعني؟
خلاص أنا قررت مسيبكيش تعيشي حياتك ولقيت اللي يساعدني في دا، إزاي عايزاني أسيبك بعد ما كنتِ السبب في إستبدالي وجيباني عالم مش هتشاف فيه غير وحش بياكل لحوم وممكن أتغذى عليهم لو فقدت القدرة على التحمل ومسيري محتوم وسطهم، إزاي هسيلك بعد كل دا؟

ردت عليه وقالت بغضب وإنفعال:

- لأني مش عايزاك، أنا عايزاه هو.

صرخ في وشها وقال بغضب:

- يبقى كنتِ تفضلي مستبدلة نفسك وعيشي إنتِ معاه هنا،
لكن أبقى مديكِ اليشم الخاص بيا والأمان وتستبدليني وتطرديني برا العالم بتاعي؟

ردت عليه سمر بإبتسامة ساخرة وقالت:

- أيوا لأنك مش فارقلي تموت أو تعيش، المهم أنا واللي عايزاه.

كان هيقتلها بس وقف مكانهُ عشان هي عايزاه يغضب لأقصى حد عشان تقدر تتحكم في اللاوعي بتاعهُ وترجع، ولكنهُ هدى نفسهُ وقال بهدوء وإبتسامة:

- بجد؟
وإنتِ الأمر نفيهُ عشان كدا أول ما يرجعوا ونرجع العالم بتاعنا هختمك هناك ولو حاولتي تخرجي منهُ تاني مسيرك الموت.

برقت وقالت بصدمة:

- أكيد مش هتستخدم اليشم بتاعي ضدي في حاجة زي دي؟

إبتسم وقال بسخرية:

- ليه أكيد، ما إنتِ إستخدمتي اليشم بتاعي في أذيتي برضوا، كلها دقايق وهخلص عليكِ بالحياة.

بمجرد ما خلص كلمتهُ وصلنا للعالم بتاعنا من تاني وفي اللحظة نفسها إختفوا هما من العالم بتاعنا وهو ماسكها بالعافية وغصب عنها للعالم بتاعهم.

كنا وقتها على السطح، صرخت بأعلى صوت وأنا مش مصدق إني رجعت من تاني للعالم بتاعي، مش مصدق إني رجعت عايش ولا مصدق كل اللي مريت بيه وإني كنت في حاجة خيالية مستحيل تتصدق.

حضنت سمر بسعادة ولكنها زقتني وقالت بخضة بعد ما كانت مبتسمة:

- إي في إي إحنا منفصلين!

مسكتها من إيديها وقولت وأنا بجرها ورايا حرفيًا ونازلين تحت:

- هرجعك حالًا أنا مقدرش أستغنى عنك.

أول ما وصلنا للشقة دخلت حضنت أبويا وكنت هحضن حماتي من السعادة واللاوعي اللي كنت فيه بس والدي وقف قدامي وقال برفعة حاجب:

- إي في إي يا إبن المجنون!

إتكلمت سمر وقالت بغضب:

- برضوا عايزاك تفهم إني مش هرجعلك خلاص.

روحت عندها وقولت بإبتسامة وحب:

- لو مكنتيش عايزة ترجعيلي وبتحبيني مكنتيش خاطرتي بحياتك عشاني، عايز أقولك إني عرفت قيمتك دلوقتي أكتر من آي وقت فات، متعرفيش بحبك قد إي ومش عايز غيرك  حقك عليا أنا أسف واللي هتقوليه هعملهُ بس متبعديش عني تاني.

سكتت شوية وبصت لوالدتها وهي بتقول بتساؤل وإبتسامة:

- إي رأيك يا ماما اللي هتقولي عليه هعملهُ، واللي هتقوليله هو عليه لازم يعمله.

ردت ماما عليا وهي مبتسمة وقالت:

- يعني بعد ما عرضتي نفسك للخطر عشانهُ مستنية رأيي، أكيد يابنتي موافقة عشان خاطرك إنتِ بس، لكن بالنسبالهُ فـ هو يجيب مهر من أول وجديد ودي هتوجع أبوه.

إتكلم والدي وقال بصدمة وإنفعال:

- الله!
وأبوه مالهُ دلوقتي؟

ردت ماما عليه بطرف عينيها:

- عشان معرفتش تربيه وخان بنتي.

رد عليها والدي وقال بغضب:

- ربيتهُ بس هو طالع فرع شيطاني مع نفسهُ أنا مالي!

بدأوا بعدها خناقهم المعتاد وأنا وسمر كنا بنضحك عليهم، 
بصيتلها وأنا بجد ممتن جدًا ليها وحبها في قلبي زاد الضعف ومن سابع المستحيلات إني أخونها أو أأذيها أبدًا مرة تانية.

بعد شهرين كنا رجعنا لبعض أنا وسمر، صحيت من النوم بدري عشان الشغل وقومت عشان أدخل التواليت.

ولكن في طريقي شوفت ورقة مرمية على الأرض،
وطيت وفتحتها وكان مكتوب فيها الآتي:

- إوعى تفكر إنك إتخلصت مني  أنا هلاقي طريقة وأرجعلك، متنساش إنك جوزي وإني مراتك لسة، هرجعلك يعني هرجعلك يا شادي.

رميت الورقة برعب وأنا بقرأ كل اللي حافظهُ من القرآن من الخضة، أنا إزاي نسيت موضوع جوازي منها!

عليت صوت وقولت زي المجنون عشان لو سمعاني تسمعني ولو مش سمعاني أبقى طلقتها وخلصت منها:

- إنتِ طالق بالتلاتة يا سمر ياللي من عالم الوحوش،
ولو رجعتي تاني وريني إي الرابط اللي بيننا بقى.

مش عارف اللي قولته صح ولا إي بس كان لازم أحدد سمر مين فيهم أحسن تيجي في مراتي الغلبانة، خدت نفسي وبدأت أجهز للشغل بشكل طبيعي.

انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم


شكرا لزيارتكم عالم روايات سكيرهوم

تعليقات