رواية رحيلها مميت الفصل السادس 6 بقلم روزان مصطفي


 رواية رحيلها مميت الفصل السادس 


طلع محمد ورا ميرنا وقفل الباب وراهم، قعدت ميرنا على الكنبة وهي منهارة نفسيًا من اللي حصل ومن قلة ذوق حماتها وقلة ذوق البنت اللي المفروض إنها عينيها من محمد. حاول محمد يواسيها كالعادة، ولكن ميرنا رفضت منه أي كلام أو إنها تسمع منه أي تبريرات، وكان كل ما يتكلم تسكته وتطلب منه إنها عايزة تقعد لوحدها.
راح محمد دخل الأوضة وغيّر هدومه وقال لها إنه رايح مشوار، ونزل من البيت.
أول ما طلع من الشقة وقفل الباب وراه، حماتها سمعت قفلة الباب، فـ بصت لـِ  سُهى وقالت: أكيد إتخانقوا بسبب اللي حصل، يلا.. اياكش يطلقها ويرجعها لبيت أمها ونخلص منها. 
سُهى بلّت شفايفها بـِ لسانها وقالِت: والله أنا مش عارفة محمد خدها عشان إيه، ضعيفة وصغيرة ومش باين عليها الأنوثة خالص، مكانش يستاهل واحدة زي دي أبدًا.
نزل محمد من شقته وتجاهل الدخول لشقة والدته، وفتح بوابة العمارة، لكن والدته وقفته وقالت: رايح فين يا محمد؟
محمد بـِ ضيق: رايح مشوار، وياريت محدش ليه دعوة بـِ ميرنا ولا يخبط عليها خالص. ميرنا تعبانة، ولو وصلني إن في حد خبط عليها أو ضايقها بالكلام، والله العظيم ما هتشوفوا وشي في البيت هنا تاني.
كان لسه هيفتح البوابة ويطلع، لكن والدته وقفته وقالت: استنى، خد سُهى معاك عشان عربيتها بايظة، ولسه عايزة تروح للميكانيكي.
محمد بـِ ذوق وهدوء: معلش، أنا مش هقدر، لأن أنا متأخر وطريقي بعيد.
سُهى وقفت وقالت بـِ نظرات كلها إغواء: مش هعطلك، الموضوع مش هياخد أكتر من ساعة، خسارة فيا الساعة يا محمد؟
بص لها محمد وحس بـِ إحراج وقال: لا، مفيش حاجة، تعالي، اتفضلي، أنا هوصلك عند الميكانيكي.
ابتسمت والدته بـِ انتصار لما شافته طلع ومعاه سُهى وقفلوا الباب. كانت ناوية تضايق ميرنا بكلامها كالعادة، لكن افتكرت كلام ابنها، فـ محبتش إنه يسيب لها البيت وميرنا تستفرد بيه.
لكِن بعد حوالي نص ساعة من مشوار محمد، سمعت صوت باب شقته بيتفتح فوق، ونزلت ميرنا وهي لابسة عباية شيك وشبابية، وخدت شنطة الإيد بتاعتها معاها.
وقفتها حماتها وقالت لها بـِ أسلوب وحش: رايحة فين من غير إذن جوزك؟
ميرنا مردتش عليها، وفتحت البوابة وطلعت.
حماتها قالت: يلا، في ستين داهية! خليه لما ييجي هقوله إن إنتِ خرجتي من غير إذنه، ياكش تغوري مترجعيش.
أول ما اتأكدت إن ميرنا بعدت وركبت تاكسي من على أول الشارع، أخدت مفتاح شقتهم، النسخة اللي معاها واللي عملتها من ورا محمد، وطلعت على فوق. فتحت باب شقتهم ودخلت أوضة النوم، وقعدت تتفرج على الحاجات. فتحت الدولاب بتاع ميرنا وشافت قمصان النوم بتاعتها وقالت: على إيه ياختي؟ جسمك حتى مش أنثوي عشان تلبسي قمصان النوم دي!
دخلت المطبخ وفتحت التلاجة، لقت التلاجة نظيفة وكل حاجة مترتبة، ما عرفتش تمسك عليها أي حاجة، فـ رجعت لأوضة النوم تاني وقعدت تدور فيها على شوية حاجات، لكن ملقتش اللي هي عيزاه. راحت للحمام، وطلعت من باسكِت الغسيل اللي مش نظيف هدوم ميرنا الداخلية، وحطتها في كيس تاخدها معاها، وأخدت خصلة من شعر ميرنا من المشط.
أخدت الحاجة اللي تخص ميرنا، سواء خصلات الشعر أو الهدوم الداخلية، ونزلت لـِ شقتها، وغيّرت هدومها وحطت في شنطتها الكيس اللي فيه الحاجة، وقفلت باب شقتها وراها كويس بالمفتاح وخرجت من العمارة، وهي عارفة وجهتها تحديدًا. عدت كذا شارع لحد ما وقفت على ناصية شارع منهم، ولقت توك توك معدي، فـ راحت مشوراله وقالتله يوديها لِـ مكان معين. وداها بالفعل، ونزلت قدام بيت من تلات طوابق في حتة تعتبر نوعًا ما شعبية. طلعت وطلبت تقابل الدجالة اللي هي رايحالها عشان تعمل لـِ مرات ابنها عمل يخليها تفقد حياتها بالكامل.
على الناحية التانية، كان محمد أخد سُهى في طريقه بـِ عربيته عشان يوديها للميكانيكي زي ما طلبت. سُهى بصت عليه وهو سايق، وفضلت تتأمل شكله، وقالت بـِ إعجاب واضح: متغيرتش كتير، إنت بس بقيت أحلى، وابتديت تهتم بـ صحتك وبـ الرياضة.
محمد بـِ ابتسامة هادية: شكرًا، إنتِ كمان متغيرتيش كتير.
سُهى مصدقتش إنه قال كده، فـ قالت: إيه دا إنت واخد بالك مني بقى؟
محمد بـِ هدوء: طبعًا، مش إحنا قرايب؟
سكتت شوية، وبعدين قالت: هو أنا ممكن أسألك سؤال يا محمد؟
محمد: اتفضلي.
سُهى: هو إشمعنى ميرنا اللي إنت اتجوزتها وأخدت ناحيتها خطوة رسمي؟ مع إن إنت مكونتش كدا وقت ما اتخرجت. معتقدش إنها ذوقك.
محمد سكت شوية وقال: أنا اخترت ميرنا عشان أنا بحبها، وعشان هي بنت كويسة جدًا وطيبة جدًا. ومش ذوقي إزاي؟ بالعكس، ميرنا ذوقي جدًا. أصل أنا مباخُدش بالشكل يا سُهى، أنا باخد بـِ أصل الإنسان وطبعه، وأنا شايف إن ميرنا على نياتها جدًا، ودا اللي أنا بحبه فيها.
سُهى سكتت شوية وهي متضايقة، وبعدين قالت: يعني قصدك إن أي بنت عرفتها قبل ميرنا كانت مش سالكة وبتاعة حوارات؟
محمد ضحك ضحكة صغيرة وقال: لا، مش قصدي كدا. القصد إن أنا لقيت في ميرنا اللي أنا بدور عليه ومشفتوش في غيرها، أنا متعمقتش في حد زي ما تعمقت في ميرنا، عشان كدا حبيت إن هي اللي تبقى شريكة حياتي وتشاركني الباقي مِن عُمري.
محمد بـِ فضول: وبعدين إنتِ بتسألي عنها كتير كده ليه؟
سُهى بـ هدوء: أبدًا، بس يعني أنا ملاحظة إن خالتي متضايقة منها، وإنت مش عاجبك الوضع كـ كُل.
محمد: هو فعلًا مش عاجبني الوضع، بس الوضع اللي مش عاجبني هو إن ماما بتضايقها وهي معملتلهاش حاجة.
سُهى ضحكت وقالت: مين اللي قالك؟ ما يمكن هي بتضايق مامتك من تحت لتحت، أو بعد ما إنت تخرج مثلًا بتعمل معاها حركات مش كويسة، فـ مامتك بالتالي رفضاها وكرهاها.
محمد بـِ ثقة: لا، مش ميرنا، الكلام ده ما يطلعش من ميرنا. أنا أعرفها وواثق فيها وضامنها كويس جدًا. ماما بس اللي مبتحبهاش عشان حصلت حوارات كدا قبل الجواز في فترة الخطوبة، فـ من ساعتها وهي مش مستلطفاها يعني. لكن أنا بحاول أوفّق بينهم، بس حاسس إن خلاص، مبقاش ينفع أكتر من كدا. 

سُهى حاولت تفهم منه قصده إيه، فـ قالت بـِ خبث: يعني إيه؟ هتعمل حاجة ولا إيه؟
محمد لاحظ اهتمامها، فـ قالها: متشغليش بالك. على العموم، إحنا قربنا نوصل للميكانيكي، هي إيه مُشكِلة عربيتك بالظبط؟ 
سُهى قالت: مش عارفة، حاسة إن العربية حالتها مش تمام كدا وبتعمل أصوات غريبة في الموتور، وخايفة أمشي بيها وتوقف في نُص الطريق، ويبقى الوضع مش لطيف، وتكون إنت مشيت ومحدش يساعدني.. بس شوف ربنا وقّعك ليا من السما إزاي! أتمنى بس مكونش عطلتك خالص.
ابتسم محمد بهدوء وقال: لا، مفيش عطلة ولا حاجة. أنا معاكِ، بس مش هقدر أتأخر أكتر من ساعة عشان أنا ملتزم بـِ ميعاد. 
ابتسمت سُهى من جواها لأنه ابتدى يلين معاها، وهيفضل معاها وهتعرف تأثر عليه.
على الناحية التانية، وقف التاكسي قدام عمارة شكلها كويس، عمارة ولاد ناس. نزلت ميرنا من التاكسي بعد ما حاسبته، وبصت على العمارة وهي بتتنهد براحة، وكأنها أخيرًا رجعت لمكانها الطبيعي. ضغطت على الإنتركم بتاع شقة والدتها، وفات حوالي خمس دقايق لحد ما ردت والدتها بصوت نعسان وقالت: مين؟
ميرنا بهدوء: أنا يا ماما، افتحيلي، مش قادرة أقف في الشارع أكتر من كدا. 
والدتها بـِ فرحة: ميرنا! استني، هفتحلك يا حبيبتي، مبصيتش في الكاميرا.
ضغطت على زر فتح البوابة، فـ طلعت ميرنا وقفلت البوابة وراها، ووصلت لباب شقة والدتها وخبطت. والدتها فتحت باب الشقة ودخلتها وحضنتها، وقعدت ترحب بيها. اترمت ميرنا في حضن والدتها وهي عايزة تعيط، لكن محبتش تقلقها عليها. وفي نفس الوقت، ما قدرتش تستحمل،  هي هربانة من كتر الضغوطات اللي اتعرضت ليها في بيت جوزها، فـ عيطت.
والدتها بـِ قلق: مالك يا حبيبتي؟ محمد ضايقك؟
ميرنا وهي بتتشحتف وبتاخد نفسها: مش هو بس يا ماما، أنا مبقيتش قادرة أستحمل اللي بيحصل دا، وكنت ناوية مشتكيش ليكِ من أي حاجة، بس الوضع بيزيد سوء.
والدتها بـِ قلق: خير يا حبيبتي، امسحي دموعك واهدي واحكيلي إيه اللي حصل، إيه اللي مخليكِ معيطة كدا؟
بلعت ميرنا ريقها وقالت: يا ماما، أنا تعبت من الست دي مش سيباني في حالي، عمالة تعمل مشاكل بيني وبين محمد، لدرجة إنه هو نفسه اتخنق منها، ومبقاش عارف يتصرف معاها إزاي. اتحط بيني وبينها، وبرغم كده بقوله ميوقفش قصادها عشان... مش عايزاه تشيل ذنب. 
إتنهدت والدتها بـِ غيظ وقالِت: هي الست دي لسه زي ما هي؟ خلاص، مش قادرة تنسى اللي حصل في الخطوبة؟ دي بقت حاجة تقرف، ينتقم منها ربنا، هي السبب في اللي إحنا فيه دا ولا تعيطي ولا تزعلي نفسك، اقعدي معايا هنا يومين، ومحمد لما ييجي نشوف كلام معاه ونلاقي حل.
رجعت ميرنا ضهرها لورا وقالت بـِ تعب: حل إيه اللي هيشوفه؟ هيعمل إيه يعني؟
والدتها بـِ جدية: يشوف ليكُم شقة برا، بعيد عن الولية دي.
ميرنا وهي بتراعي وضع محمد: أيوه، بس مين هيهتم بيها؟ هي عايشة لوحدها وملهاش غير ابنها دا. 
مامتها قالت: تتفلق، تعيش لوحدها إن شاء الله طول العمر، ما هي فيها صحة تضايقك، مش هيبقى فيها صحة تاخد بالها من نفسها؟ ملكيش دعوة إنتِ. ادخلي غيّري هدومك والبسي حاجة مريحة واهدي، استهدي بالله..هعملنا فنجانين قهوة عشان نفوق، لأني لسه صاحية من النوم، وعشان إنتِ كمان تهدي، ونقعد في البلكونة بقى زي زمان.
مكانتش قادرة تجادل، ولا قادرة تقول إنها عايزة ترجع البيت عشان محمد ميقلقش عليها، فـ سابت الأمور زي ما هي وقالت: عندك حق، أنا أصلًا مش قادرة أرجع هناك، حاسة إن نفسيتي زي الزفت.
والدتها بـِ وعد: طب لما أشوفك يا محمد، عشان إنت قولت إنك هتبعد مامتك عنها خالص ومش هتخليها تضايقها.
قامت ميرنا وهي بتخلع عبايتها وقالت: والله العظيم، حتى وهي بتضايقني بحاول أخدمها بـِ عنيا وبقول عشان خاطره وعشان ربنا يباركلي، لكن هي مبتقدّرش. بهدلتني ومسحت بيا الأرض قدام بنت أختها، وقعدت تسخر مني وتقولي إنتِ معندكيش غير الهدوم اللي دايبة على جسمك دي؟ ما تشوفي البنات الكويسين بيلبسوا إيه!
والدتها بـِ قهر عليها:  ربنا يكسر بنفسها البعيدة، والله لأوريها. 
قامِت تحضر قهوة وكيك في المطبخ، وميرنا بتغير هدومها عشان تستريح شوية. لما غيرت هدومها، راحت لوالدتها المطبخ وقالتلها: أنا مبقيتش عارفة أتصرف إزاي، إنتِ عارفة كويس يا ماما إن أنا بحب محمد وهو بيحبني، وحاربنا كتير جدًا عشان نكون سوا، لكن هي وقفالنا زي العمل الردي، مش عيزانا نبقى مبسوطين أبدًا. إحنا حتى مش عايشين حياة زوجية عادية بسببها، هي كل ما تحس إن إحنا مع بعض، بتطلع تخبط أو تعمل أصوات أو تطلع على السطح تقعد تخبط في حاجة، تزعجنا وتقلقنا، أو تعمل نفسها تعبانة عشان ابنها ينزلها ويسيبني.
اتأففت والدتها بضيق وقالت: بصي يا بنتي، حماتك دي من يوم ما شوفتها وأنا عارفة إنها هتبقى حما على حق، يعني هتوريكِ الويل.. بس أنا شوفت تمسُكِك بيه وتمسكُه بيكِ وتنازلُه عن حاجات كتير عشانك، وهو شال كتير عنك، فـ قولت إنه شاريكِ، لكن بروده عشان خاطر إنها أمه دا مش عاجبني يا ميرنا، لازم أجيبُه هِنا ويتشد، وياخُدلك شقة بعيد عن الولية دي، يا مفيش رجوع لـِ بيتُه.
فركت ميرنا جبهتها بـِ صوابع إيديها وقالِت: يا ماما، أنا مش عايزة أعقد المواضيع، مش عايزة طلاق، أنا مش هعرف أعيش من غيره.
بصت لها والدتها بـِ حزم وقالِت: بُصي بقى، ما هو إنتِ في الحالتين مش عايشة. لو فضلتي في الهم دا، نفسيتك هتتعب وهتنهار، وعلاقتكم كمان هتبقى زفت، دا إذا كانت مبقتش زفت أصلًا. تعالي على نفسك شوية وتنازلي عشان تعيشي عيشة مرتاحة، وإلا هخرج إيدي من الموضوع دا خالص وأسيبكم تاكلوا في بعض إنتوا التلاتة.
إتنهدت ميرنا بـِ تعب وإنهاك وقالت: خلاص يا ماما، اللي تشوفيه صح اعمليه، أنا مبقاش عندي أي حيلة أعملها. وعلى فكرة، أنا جيت فعلًا من وراه؛ لأنه هو نزل يوصل بنت خالته وسابني.
كانت ميرنا تجهل إن محمد نزل يقابِل سِمسار عشان يشوفلهُم شقة بعيد عن أمه، وفي الوقت اللي كانت فيه بتشتكي لوالدتها من تدخل حماتها في حياتها، كانت حماتها بتدبر لها أذى من نوع تاني، بعدما أخدت خصلات شعرها والهدوم الداخلية بتاعتها وراحت للدجالة عشان تعمل لها عمل يخلي حياتها تنقلب رأسًا على عقب.

-  عند الميكانيكي. 

جاب محمد من السوبر ماركت العصير لـ سُهى اللي عملت عندها هبوط، أخدتُه منُه وشكرتُه وهي بتقول بإحراج مُزيف: يا خبر عطلتك عن ميعادك، بس أعمل إيه خايفة لوحدي بالليل. 
نفث محمد دُخان البرود من بوقه وقال: مفيش مُشكِلة أنا أجلت الميعاد لـِ بُكرة، متخافيش أنا معاكِ. 
كتفت إيديها وبصت ليه بإعجاب وقالت: وحشني لما كُنت أحتاج حاجة وأصحيك تيجي تكون معايا، بحس معاك إن ليا ضهر كدا ومش خايفة، شعور الأمان معاك ليه طعم تاني. 
إتنحنح محمد وقال للميكانيكي بإرتباك: هتاخُد وقت يسطا؟ 
الميكانيكي بـِ تركيز: نُصاية يا باشا. 
فركت سُهى دراعها وقالِت: نُص ساعة دا الجو تلج. 
خلع محمد الجاكيت بتاعُه وحطُه على أكتافها وقال: لو في مكان قُريب كُنت خدتك فيه بس زي ما إنتِ شايفة.. سيبت عربيتي عشان أسوق بيكِ عربيتك. 
سُهى بـِ دلع: اي مكان معاك هيبقى حلو، حتى لو وقفة شارِع. 
وشه جاب ألوان فـ بعد مسافة بسيطة وهو بيقول: معلش هتصل على ميرنا أتطمن عليها. 
النار غليت في صدرها وهي بتبُصله بيكلمها.. 
رن على فونها مردتش غير بعد حبة حلوين ردت وقالِت: ألو. 
محمد بـِ حنية: إيه يا حبيبي عاملة إيه؟ بقيتي أحسن؟ 
ميرنا بـِ رد مُقتضب: أنا عند ماما. 
ضيق محمد عينيه وحس أن دمه بيفور وقال: يعني إيه عند ماما؟ خدتي إذن من مين عشان تتحركي من دماغِك؟ 
ميرنا بـِ ضيق: مخدتش إذن من حد بس أنا خلاص تعبت من اللي بيحصل، قولت أريح أعصابي عندها شوية. 
لسه محمد هينطق قربت مِنُه سُهى وهي بتتلمس طرف شفايفُه وبتقول بـِ صوت واضِح عشان تسمع ميرنا: إيه يا محمد في بواقي عصير على شفايفك، همسحها بإيدي عشان مش معايا منديل. 
عينيها وسعت بـِ صدمة وقلبها بدأ يدُق بـِ إنفعال وهي بتقول: دي سُهى اللي معاك؟؟ اللي بتمسحلك شفايفك!!! 
محمد بإرتباك: إنتِ فاهمة غلط، ألوو! 
قفلت المُكالمة في وشه وإنهارت من العياط 
قامِت من السرير خرجت برا الاوضة لوالدتها في البلكونة
وققت قُدامها وقالت بـِ عيون مليانة دموع: أنا عاوزة أتطلق.. ياريت تكلميه تفهميه دا وإني مش قابلة صُلح. 

Ghazal
Ghazal
تعليقات