رواية خلخال مشوه الفصل السادس 6 بقلم زمرده

 

 



رواية خلخال مشوه الفصل السادس بقلم زمرده




أَتذكر أَول مَرّة مِن گال اسمي
دَگّات گلبي بِـ كِل مَكان
بِـ جِسمي

•---∞∞∞∞∞∞∞---•

نوح : بيت غازي متعرضين ل فقار وما أعرف هسه ميت لو عدل

صحنه كلنه خايفات وهيَ من الخوف تريد تحجي ماتگدر بس دموعها توگع من عيونها للگاع ،مرة عمي باقر ما أعرف اوصف حالها بهل وكت وهيَ عدها
فقار ويَّ الهوه ،قليل لو گلت ما عرفت شتسوي وشلون تلطم وتبچي وزاد ضيمنه ضيم من طاحت علينه مغمي عليها لا من أيد ولا من رجل بس نفس ،بالگوه أمي گعدتها بس ضلت تگلب بعيونها ما
مستقره

بنفس الوكت جدي وعمامي والولد كلهم أجوي على صوتنه العالي وخبصتنه بعمه من طاحت علينه انطسروا لا يعرفون
شبيها ولا احنه شبينه كل وحده عيونها مدمعه
وبس بصائر حالها يشرح مدى قوة الخبر الوگع علينه وخرب گعدتنه وسوالفها بي ...!

مسح وجهه نوح وذاك هوَ صوته مختنگ يريد يبچي
على صاحبه
نوح : خابرني فقار ،گال چن راح يصيرلي شي لان اكو سيارة جاي تلحگني وين ما اروحن ،گال تعالولي بطريق بيت صاحبة حسين راد منهم ،بس بين ما اجيتكم اخابره ماكو ما يجاوب مغلق

انخبصوا خبص وكلهم طلعوا وصخر بأيدة الموبايل
يخابر ماعرف على منو ويمشي مستعجل يريد يلحگهم ،وقبل لايطلع سمعته يصيح بالحوش
_ وصل الهم حچي اذا طلع فقار يمهم صدگ، لا يضلون ببيوتهم ،لان احرگهن عليهم .

وبس طلعوا رجعت انغمى عليها ،أمي تريد تگعدها
تضرب على وجهه راچديات وهيَ ماكو
زهرة : ولج ريحانة الحگيلي بگلاص الماي

ريحانة تبجي وتباوع الأمها تريد تگوم ما تگدر
وحواري مو أقل من حالها
ريحانة : بادن رجليه عمه

ركضت بركة جابت گلاص ماي واطته الامي ،وامي ترش عليها تريدها بس تصحى ،وكلنا ملتمات عليها
عاطت بينه
زهرة : وخرن شني حتى هوه ما يوصل الها .

وخرنه منها وهيَ بس فتحت عيونها ما على لسانها غير اسمه
نجوى : يا يمه يا فقوري ،جيبولي وليدي ولكم فقوري يمه

تون ودموعها ما وگفن أبد حتى من أجه عزيز يحاجيها ،تبجي وتحجي وياه
نجوى : لا تچذب عليَّ انا گلبي يگلي وليدي بي شي

عزيز : بمكان البجي ادعيله يمه ،ادعي نلگاه اليوم لان اذا ما لگيناه راح نچني على روحنه وعليهم .

زهرة : شناوين عمه ؟

عزيز : كل خير

باوع على ريحانة وحواري وبصائر
عزيز : كافي تنوحن ،شني سالفتچن ؟

ريحانة : خايفين عليه والله

سكت وگام من مكانة يريد يطلع ،جلبت بي أمه تتوسل
نجوى : عليك الله تعال اذا سمعتوله خبر لو لگيتوه
لا تعلون گلبي

لزم ايدها يحاجيها
عزيز : صار ،والله صار من عيوني

طلع هوَ واحنه ضلينه ساعة تجر ساعة وچن الوكت صار ما يمشي وكل خبر ما سمعنه ولا أحد اجانه ،الخوف سيطر علينه ،وزاد خوفنه واتحول لرعب من طب عزيز يركض يصعد فوگ وكلنه وراه نصيح شكو وما يرد علينه

نزل من فوگ على نفس ركضته شايل تفگة صخر صيحنه وراه وهوَ گد ما مبين مستعجل حتى وجهه ما داره علينه وطلع منا وخلانة نحير بهل وكت شنفكر ويا حسبه تمر بالنه ..!!

°ليث°

صعدنه بالسيارات كلنة ماشين نشوفه،واذا ماكو وما لگيناه بيت غازي شنوا على نفسهم
حلف جدي لو فقار صايرله شي يمحي نسلهم ولا يرحم منهم الچبير والزغير ..!!

طبگنه سياراتنه ما أعرف شلون ونزلنه نتراكض بالمكان ندورله أثر ،وانا أمشي حسيت دست على
شي دنگت شلته ومن ركزت جانت هاي شفقته
صحت وانا چن أنسلبت روحي مني
_ جدددي

التفت جدي من سمع نبرة صوتي العاليه ،مشيت بسرعه يمه وانا شايلها
بس وصلت يمة رفعتها اشوفها اله وكلهم التموا

_ هاي شفقة فقار جدي ،شفقته شفته لابسه اليوم

جرها من أيدي عبد الحق يگلب بيها ،من أكد على حجيي عمي باقر وگال صدگ هاي شفقته ،عله صوت جدي وبحزم گال
رأجس : اصعدوا

محمد : شراح نسوي بويه ؟

رأجس : احرگ بيوتهم عليهم والله ،والسماني رأجس منا لباجر اذا ما رجع ما أخليلهم مچان يگعدون بي .

ردينه صعدنة بالسيارات وحركنة لقرية غازي ،بس طبگنة صاح جدي يأشر بأيده
رأجس : احرگولي بيتهم هذاگ فارغ ،نحسبها إنذار الهم

صخر : نفط منين ؟

محمد : خبره بالحرگ أنتَ بعد، شوف منين تجيبلنه

راح صخر بسيارته واحنه ضلينه هنا بين ما جاب النفط ورجع ،اخذ الدبة جدي من ايده
وخلاها بأيد نوح
رأجس : رش البيت وانا اعلگ النار بي .

ونوح ما گال باطل ،رش البيت كله وجدي اندار علينه
رأجس : أريدن جداحه .

طلع صخر جداحه من جيبة واطاها لجدي ،اخذها منه ودنگ للگاع اخذ كارتونه زغيره ،شعلها بالجداحه واحنه كلنه رجعنه نشوف النار الگبت بكل ركن بالبيت بس جدي شمرها عليه ،بس بدت الأصوات تعلى دروا بالبيت احترگ ،صعدنه سياراتنه وحركنه نطلع من ظهر القرية منين ما اجينة بدون ما يحسون علينه ...

وبس ردينه لقريتنه گال جدي حضروا تفگكم ،حضرناهن و وگفنة ببداية القرية متحضرين لمواجهة بيت غازي اليوم لو همه لو أحنه

°حواري°

ما أعرف احير بأخوي الما اله خبر لو بأمي الكلساع توگع علينه لو بصوت رميهم الحرگ القرية
ومبين تفسيره شنو ،مبين ما لگوا فقار وهاي صوت
الجيلات دليل

نجوى : راح أبني يا خية يا زهرة ،راح أبني ،والله گلبي يگلي صاير شي لفقار

زهرة : گولي يالله ،جا يسوّن بي شي الا مخابيل شني تايهلهم

أمي ما سكتت ولا هادلها بال ،وكل ما جاية صوت الرمي بالقرية يزيد واحنه هنا طايحه گلوبنه ،مشيت گعدت يمها ،انا أخته بس اهون عليها شلون ما أعرف..!

گعدت بصفها امسح على أيدها الخالتها على رجلها وصافنه تباوع لحلقتها
_ بصائر

اندارتلي من سمعتني حاجيتها
بصائر : هااا

_ حلگج صار أبيض ،والله يرد اخوي ما يعوفج

بصائر : لازمة گلبي بأيدي والله ،خايفة لا يروح ضحية لعداوتهم

_ لا والله يرد ،شني يروح ،بس گومي اشربيلج ماي بلي ريگج

هزت رأسها ب أي وگامت ،شربت ماي ورجعت گعدت بمكانها بصفي ،بدة يكسر الجو ويطلع الصبح وهاي احنه گعدتنه ،و ويَّ ما گال الله وأكبر صلاة الصبح طبوا كلهم محزمين والتعب مبين عليهم ،گمنه كلنه نتلگاهم وبصائر وأمي يدورنه بعيونهن بيناتهم بس
ماكو هوَ ...!!

ميمنة اطتهم ماي وأمي ماتحملت اكثر ما تسأل وبالاصل كلنه متانين حجاية منهم تريح گلوبنه

نجوى : فقار وينه باقر ؟ابنك ليش مو وياكم ؟

باوعت على ضيرم وعزيز تسألهم
نجوى : اخوكم وين ؟

حار أبوي شني يرد على أمي ،وضيرم وعزيز سكتوا والحيره مبينه عليهم ،من حيرتهم عرفت ما لگوا فقار ،گعدت بالگاع اباوعلهم حيلي رايح اتمنى اسمع حجي عكس الراح اسمعه ،عيوني غوشت بالدموع وانا اسمع حجيهم

باقر : باجر انا بهاي أيدي اردلج فقار ،بس صبريلنه هل ليلة

نجوى : تحجي صدگ وانا شيصبرني ،شلون ما اشوفه اليوم بعيوني ،والله بي شي وليدي بي شي

محمد : شني ما رايدين روحهم ويسوله شي

باقر : ماخذينه حتى يلون ذراعنه وندفع خسارة الگيعان

نجوى : شني اليثبت باجر تردولياه ؟

ليث : اطيناهم أنذار ،لوما رجع باجر نحرگ بيوتهم عليهم

صخر : اخذيها وعد من هل شارب باجر لو نسويها بحر دم نجيبه

نجوى : والله خايفة لا يروح بيها وما اشوفه بعد

محمد : ما اله زلم التطلع وراه وتطلعه من جوه الگاع ،مگطم هوَ وتخافين عليه ؟

ضيرم : وحگ من خله بيَّ روح ،انا كتال كل چبير وزغير بيهم لوما رد أخوي باجر

نتر بيه عمي ما راضي على عصبيته وصوته العالي
محمد : هيد عمي منا عمليتك كافي تگمز علينه

گعد ضيرم وأعرفه هسه لو يخلوه يروح لبيت غازي يكتلهم كلهم اذا ما طلعوله فقار بس لازمينه جدي وعمامي بحيث گاعد على نار يهز برجله ويباوع للساعه بالمطبخ
نجوى : شوكت تردوه ؟

باقر : باضنعش الضهر .

جدي من باوع للساعه وحسب الوكت الضال ،بكل تهديد ونيه گشره الهم حجه
رأجس : والسماني رأجس أل غضب بأجر اذا ما ردوه بالمعروف أهد عگابي عليهم لخليهم يحرگون بيوتهم بيهم ،أثر الهم ما يضل بس احسبولي هل چم ساعه .

ضلوا كل واحد يحجي بجهه ويتحلفون لبيت غازي
أنا گاعده بصف بصائر وهيَ مخليه رأسها على چتافي
صافنه وأحس بالي كله يمه ،هسه وينه ،أذوه ،سوّله شي ،خاف ما يرجع النه ،بنص تفكيري بي وفززني حق يحاجي بصائر گاعد گدامها ...

عبد الحق : وجهج حيل أصفر ؟ خاف ضغطج نزل ؟

بلعت ريگها بالگوه يطلع صوتها
بصائر : أي هبط لان الدنيا تفتر بيَّ جاي

عبد الحق : أخذج مستشفى ؟

بصائر : لا ما يحتاج

استغفر ما راضي لان ماتريد تمشي للمستشفى ،عكس عيونه منها الي يحاجيني
عبد الحق : بدون زحمة عليج خيار وملحي خلي تاكل لا يزيد الهبوط

_ صار

وخرتها مني وگمت سويت الها خيار وملحته مثل ما گال ورجعت يمها وهوَ بعده گاعد ،اخذ الماعون من ايدي يجبرها تاكل وهيَ من الهبوط نفسها تلعب ،جبرها تاكله كله وانا گاعده اباوعلهم ،اول مره اشوفه يهتم بأحد جاب عمره شنكه وما ينحمل چنه عزيز أخوي هم شايف روحه ...

درت وجهي من شفته انتبه عليَّ جاي اباوعلهم ،أجت
عيني على صخر الگاعد بالصاله وباب المطبخ صاير گدامه يسولف ويَّ الولد وكل ما تصد عينة على البنات ،گاعدات سوا ،ريحانة وميمنة وغاية ،يصد عيونه منهن ويسمح وجهه وما أعرف بشنو يهمس ويَّ روحه ،چن اكو شي مضوجه لو يتخايلي ما أعرف ...!!

گمت وره ميمنة من سمعت جده صاحتها ،گاعده بالصاله وكلهم يمها الولد وعمامي وجدي من غير حق
غضة : تعاي حبوبة ميمنة

مشتلها ميمنة گعدت يمها وانا مشيت لزگت بصفهن گعدت خاله رأسي بيناتهن
ميمنة : گولي جده شرايده ؟

غضة : سولچن لگمة خلِ يأكلون خوما يضلون على لحم بطنهم

ميمنة : صار من عيوني

غضة : سالمه عيونج المكحله

أبتسمت وگامت وانا گمت امشي وراها ،بس طبت للمطبخ صاحت ل بركة وغاية
ميمنة : گومن وياي نسويلهم اكل

گعدت انا بصف ريحانة ،گامن هنَّ يسون اكل الهم وانا گمت يم أمي ،چن گاعده على نار تباوع للساعة
تريدها تركض ركض ويخلص الوكت ...

ميمنة : گومي جفون اطي السفرة لنوح خلِ يفرشها

أخذت جفون السفره ومشت للصاله أطتها لنوح ورجعت ،صارن ينگلن بالاكل ونوح وعزيز ياخذون من ايدهن ،اباوع عليهم من باب المطبخ كلهم التموا يأكلون ويتناقشون على بيت غازي ،بس كملوا صاح
صخر : جاي جاي

گامت ميمنة تترس القوري ماي وتحجي
ميمنة : استغرب اذا ما صاح جاي جاي

جفون : مو اگول يتنفس جاي

ميمنة : لا يسمعج يمعوده

جفون : ما أخاف

صخر : مني الماتخاف ؟

گمزنه كلنه من طب للمطبخ رافع ردان دشداشته وعينة على جفون الصارت تطگطگ بمكانها ،بلعت ريگها تريد بس تلزگها وهوَ مزغر عيونه يباوعلها

جفون : وداعة خرزة جاي اگول ما اخاف بس من صخر

يباوعلها بطرف عينة ما مقتنع
صخر : لازم اصدگج

هزت رأسها ب أي ،ما حاجاها بعد وطلع من المطبخ وهيَ بس طلع خلت أيدها على خصرها
جفون : يعني ليش تحجيني مو تعرفين بي شلون حقنه

طب من باب المطبخ وگف وراها خازرها
صخر : صارن هواي

اندارت تباوعله ،لون بوجهه المابي لون ماضل
جفون : انا قصدي انا حقنه

صخر : ما تترگع

جفون : أبد ؟

جفون : أبد

ماگدرت ما اضحك على تعابير وجهه ،كلها ضحكت
بنص ذاك الضيم تضحكنه سوالفها ،وصخر خزرنه خزره جماعية ومشى يطب للصاله
زهرة : الفلكج كون ياجفون ما لگيتي غير صخر تندگين بيه

جفون : عمه هوَ انا شوكت مندگه بي بس حضي الفگر خلاه يمسعني

زهرة : من تحجين باوعي بعيونج ،لا أعرف لسانج ما الج حيله

ولا چن صاير شي مشت لقفص طيورها تحاجيهن
جفون : اعذريني حلفت وداعتج چذب

غاية : حلفتي وداعة خرزة هسه تموت

جفون : خوب موتي أنتِ

شيماء : يااا يااااا

جفون : أي والله شني تگول خرزة تموت

وتحجي من كل عقلها ،من شافنها تحجي صدگ ما حاجنها بعد ،النعاس كتلنه ،وما بينه أحد گدر ينام
كلنه گاعدين فد گده يامن يجيب الضهر ويرد النه
وبهل يوم مشى عمي محمد لمدراسنه اخذلنه اجازه كلنه وين نگدر نداوم بهذا الوضع ...

محمد : وينك صخرررر

طلع صخر يركض لعمي الواگف بالباب وشايل الشاجور بأيدة ،اول مره اشوف عمي يركض بالعركه وياهم وما يگلهم لا ،بس هل مره سالفتنه ويَّ بيت غازي چبيره ...!

صخر : هاي 15 طلقة كافي ؟

محمد : جيبلي بعد

أجه عمي يوسف شايل بأيدة التفگة ،نباوعلهم و وجوهنه مخطوف لونها ،وگفوا كلهم مسلحين متانين خبر يوصلهم قبل لا يطلعون
رأجس : كافي واگفين امشولهم .

محمد : ما نستعجل والغلط يصير بينه ،ماضل غير نص ساعة ويخلص الوكت ونمشيلهم

ضيرم : انا ماشيلهم گبلكم

فتح الباب يريد يطلع وكلها تصيح وراه ،وگف بمكانه بالباب ما طلع ،وگف بباب المطبخ اباوع عليهم كلهم مشوا يمه واصواتهم تعالت بس وصلوا للباب
كلهم فد صيحه صاحوا
_ فقاااار

طلعنه نتراكض من سمعنه اسمه ،انا أول وحده وصلت لان قريبة منهم وبس شفته واگف بنصهم
هلت دموع الفرح من عيوني وانا اشوفة مابيَّ شي و واگف بطولة

هاي أمي الچان حيلها بايد طلعتله تركض حارت شلون تعبر عن قلقها عليه ،تحضن بي وتبوس بوجهه ما مصدگه شافته عيونها
نجوى : يمه گلبي وليدي ،رديتلي يابعد أهل نجوى ما مصدگه شفتك بعيوني والله

فقار : شني يمه ما رايدين روحهم ويسويلي شي !

رأجس : ما سوّلك شي ؟

فقار : لا بس طگوا تايرات الدراجة بچيله خلوها تنشال وتنرگع بيَّ ،اخذوني غدر العارات

محمد : ما عرفت منو ؟

فقار : ميزيت منهم محسن من صوته عرفته ،هوَ الربطني ،وهوَ الردني يم القرية ومشى

رأجس : والله أيده الربط بيها ايدك أنتَ اخليك بأيدك تكسرها

ضلوا واگفين بنفس مكانهم يحجون ويتحلفون ب بيت غازي ،واحنه واگفات نباوع عليهم من بيناتنه مشت ريحانة دموعها على خدها تباوعله بس شافها عافهم وأجه مبتسم حضنها يحجي وياها وهيَ مچلبه برگبته
فقار : كافي بچي ولج ،شني دمعتج بطرف عينج هاي أنا رجعت وكلشي ما بيَّ

ريحانة : وگع گلبي عليك والله شمتانيه ما أبجي وانا أعرف نهاية الثارات خسارات وگلت هاي هيَ خسرناك

فقار : هيج أنا عزيز عدگم ،شو جنت حاس بطات جفون أعز مني

ضربته على جتفه
ريحانة : لا تحجي هيج شني مو تعرف بيَّ شگد أحبك

مدت رأسها من وره ميمنة
جفون : لا تحط بطاتي بالنص من هستوك رجعت

ضحك ورفع أيدة غمها بدون ما احد يشوفه ،شافني واگفه اباوعله أشرلي اروحله
مشيت وانا امسح بدموعي بأيدة الثانيه حضني صرنه كل وحده من جهه انا وريحانة ،مشى يطب جوه واحنه حاضناته
وكلهم ورانه طبوا هاي الگاع المشوا عليها شهدت شني جاي يخططون من مصايب لبيت غازي غازات ..!!

طبينة للمطبخ وأمي لهسه ما مصدگة هوَ هذا فقار گدامها ،وخرتنه و وگفت تسأله جوعان ،عطشان ،ماكل لو لا وهوَ يجاوبها ويحلف مابي شي
ومن بيناتنه يدورها بعيونه ،بس شافها مشالها واگفه يم الكاونتر وتمسح بدموعها
وبس شافته گدامها شمرت روحها بحضنه تبجي بصوت عالي وكل دمعة وگعت منها تشرح شگد جانت خايفة عليه ،وهوَ بس يمسح على رأسها بس
سكتت وخرها يحاجيها
فقار : ليش هيج تعبتي عيونج ،مو تعرفين ما ارضه تبچين ؟

بصائر : مو بيدي والله ،ماتدري شصار بيَّ من البارحة لليوم

فقار : خفتي عليَّ ؟

هزت رأسها ب أي وهوَ أبتسم واحنه هنا كلنه نباوع بس حرامات جدي گطع اللقطه الرومانسية علينه
من صاحه بالصاله مشى راح يمهم
كلهم هناك گعدوا ،وانا من فضولي مشيت وراهم اخذتلي ركن اصفن بي على حجيهم
رأجس : للعصر اذا ما أجوي يعتذرون انا موديلهم گوامة ،والي تصرف ثاني وياهم حتى لو اعتذورا ما اسكت الهم وحگ من سماني رأجس لخلي فقار بيده يسكر الايد الغدرته

محمد : وانا وياك هاي فعلتهم اذا ما تبررت النه غير تصرف وياهم

باقر : گلنالهم احنه خسارنين اضرار الگيعان ،عموا على نفسهم وحتى حگ بعد ما الهم يمنه

أجه نوح گعد بصف فقار ما أعرف شيحجي وياه يبسبسون ،انا شني أذني گامت تحكني ،گمت أمشي اگعد يم جده لان فقار گاعد بصفها ونوح بصف فقار
گعدت من جهتها الثانيه واسمعهم يسولفون
نوح : وگعت گلبي نذل

فقار : مو اول حجايتين براسهن خير ليش خربتها بالاخير

نوح : أنچب زوعتني العافية ،لهسه أحس بروحي ما مصدگ شفتك

فقار : اگرصك وتصدگ ؟

نوح : انجب ايدك چنها چلابتين

فقار : مو خاف يطلع حلم وانا هسه مكتول

نوح : عار رجعت كلشي مابيك

ضحكوا همَ الاثنين ولا چن اكو احد يمهم ملتهين بشاقهم ،ارتاح گلبي وانا اسمع صوته يضحك وحتى محد حجه عليهم من صوتهم صار عالي عكس كل مره كلها ترزلهم ...

گمت من صاحتني جفون ،مشيت وراها وگفت يم قفص طيور الحب مالاتها معلگته بالمطبخ ،نزلته تضحك فتحتلي الحله مالتهن ،أبتسمت من طارت خرزة وشفت بيضه زغيرونه بالحله ،وهاي ما صدگه چن شلون بتها راح تصير أم وهيَ جده

جفون : بااااعي ولج راااح تصير أم خرزتييي

خليت أيدي على أذني سطرتني
_ ولج لا تعيطين

جفون : فرحاااانه والله

ضحكت اباوعلها شلون تگمز بمكانها
جفون : ولج ما عبالي راح تبيض هيج بسرعه

_ جا غير متزوجه ليش ما تبيض ؟

جفون : فدوووه فدوووه راح تجيبلي خرزااات مثلها وكركمات مثل رجلها

_ أي ونفتح بيهن بسطيّه نبيعهن انا وياج وبالنص الفلوس

جفون : ليش يمه اطيج غير مالاتي

_ هااا بعتيني علمود الفلوس ،مو اگلك أنتَ فد واحد خسيس مو كفوا

جفون : اعذريني هاي عمتي الربتني بالفلوس ما أعرفها

زهرة : ايا طايحة الحظ

ضحكت تبرر لعمه وانا اباوعلها ضايجه ،الادبسزز تبيعني بسرعه
جفون : والله عمه مثل شبيج بسرعه تصدگين .

زهرة : جا ما لگيتي غيري تضربين بي المثل ؟

جفون : مو بس أنتِ حبابه وتتحمليني

زهرة : خوش ،خوش ،اضحكي عليَّ بسوالفيج

ضحكت وتباوعلي تحرك بحواجبها ،ياربي شگد شريره ولا مبين عليها هلگد ما ملامحها بريئه

مشيت طبيت جوه وهيَ بعدها ملتهيه بخرزة وكركم ولا شادتلي بال ،أحس غرت منهن شني هاي أول تالي تعوفني وتفضل أحد عليَّ ،بس هوَ اجاگ من تالي
بس هيَ نذله ،بس ما تبدلني ببشر بحيوانات ،هيَ صار شگد خابصه روحها على طيور الحب والله جابهن تبيعني انا وعشيرتي لخاطرهن

طبيت للغرفة يم هيوفة وميمنة گاعده يمها تمشط بشعرها ،بس شافتني گالت
هيوفة : الحمدلله على سلامة أخوج

گعدت يمهن ارد عليها
_ الله يسلمج

لزمت ضفيرتها من كملت ضفرها ميمنة
هيوفة : انشلع گلبج

ميمنة : لا يمعوده جا شتگولين على شعري ،احوس
عليه اريد اگصه وأمي ماتخليني

هيوفة : والله زين تسوي ،خلصت عمري اگلج طولي حلو وثخين حرامات ،هاي أمي أبد ماتخلي غاية تگص شعرها ،اذا يضل شعرج يطول يصير مثل شعرها

ميمنة : ما أحب الشعر الطويل

هيوفة : حلو والله ،أمي دوم تگول حالاة المره بشعرها

ميمنة : راح اخلي بس شوي يطول مو هواي لان ما اتحمله

هيوفة : ميخالف

ميمنة : شربتي دواج ؟

هيوفة : أي اطتنياه بركة

ميمنة : خوش ،راح اروح حواري ضلي گاعده يمها شوي خطيه تضوج وحدها

هزيت رأسي ب أي وضليت گاعده اثرم براسها سوالف وهيَ من ضوجتها تسمعلي وتشاركني

°غاية°

واگفه اغسل مواعين وأمي تسوي الغده وميمنة وياها ما عافتها ،كلساع شامرات عليَّ ماعون وانا اغسل وساكته ،أجت وگفت بصفي انداريت الها مبتسمه من گالت
ريحانة : هاي لو حواري هيج كلساع شامرات عليها ماعون جان ملت وكسرتهن

رجعت اخض المواعين وارد عليها
_ عاد حواري كلشي ولا الشغل ،واكثر شي المواعين تتخبل منهن

ريحانة : بس اجيتهم گالت خلصيني من المواعين

_ يااا

ريحانة : أي والله

_ كارثة والله هاي عود أنتِ جاية خطار واستغلتج

ريحانة : يمعوده يا خطار وهم هيَ خطيه وحدها

_ صح والله انقهر عليها

ريحانة : ضاله بس عرك هيَ وعزيز

_ چن رويسيه

ريحانة : أي والله ،وهيَ هم تعانده وهوَ روحة بخشمه طبعة صعب وهيَ ما تعوفه دوبها من دوبه

_ ما تعرفيها هذا طبعها

ريحانة : بس مو ويَّ عزيز ،والله ساتر عليها من عصبيته ضيرم ما يقبل أحد يحاجيها

_ بس هوَ يحاجيها

ضحكت تأخذ مني الچدر تضمه بالكاونتر
ريحانة : طگ گلبي على لماتنه ،بس طلعت الجيه من عيوني ولا تهنيت بيها

_ حضج

ريحانة : أي والله

صاح جدي من الصاله
رأجس : غداچن وييين ؟

مشت أمي للصاله تحاجي جدي
زهرة : ما ضل شي ويكمل عمي

رأجس : يالله خفن أيدچن عگابي جاعوا

محمد : جا واحنه بوية ما نجوع ؟

رأجس : همَ أهم منكم

ضحكوا الولد واحنه بالمطبخ ضحكنه على حجاية جدي ،وعمامي وأبوي اخذوها زعله
يوسف : جاملنه بوية ،مو هيج تطگها بالوجه

رأجس : جا اچذب عليكم ؟

باقر : أي چذب قابلين

باوعت على الشباك من أنفتح باب الشارع وطب عمي سمير وراه مرته وأبنه ،لا والله زين من أجوي بعد وكت شراح يخلصهم من جدي ،سلموا علينه ومشوا للصاله بس گال عمي
سمير : السلام عليكم

استلمه جدي حتى بدون ما يرد السلام عليه
رأجس : بعد وكت زين من تذكرت تجي .

سمير : جا شني بوية مو تعرف أنا من البارحة مشيت لبغداد لان اليوم موعد خالدة مال دكتورة

نشفت أيدي و وگفت اباوعلهم
رأجس : نسيت ،گلي شگالتلكم الدكتورة ؟

دنگ عمي ومن بلع ريگة مبين الوضع ما يبشر بخير
سمير : گالت عدها عقم ثانوي ،ويمكن أبد ما تحبل

أبوي دنگ رأسه مقهور ،رغم شجاعة اسلوب عمة خالدة بس موقفها يقهر
رأجس : جا سهله ازوجنگ

رفع رأسه أبوي ما راضي على حجي جدي
محمد : لا يابة

رأجس : جا يضل طول العمر بدون بزر ؟

محمد : الله موجود ويلطف بحالهم

رأجس : ونعم بالله ،بس احسب حسابك بفرحة الزهرة انا خاطبلك

سمير : شسالفه يابة

رأجس : اسكت اسكت ،مو بكفيك ،الشيب ترس راسك وأنتَ ضال بدون بزر

سمير : جا وعلي ؟

رأجس : تضل بس على علي ؟

سكت عمي سمير حاير ،ومو بس هوَ ماكو أحد حجة ولا اعترض على حجي جدي لان اكيد كلمتة هيَ التمشي ،باوعت على عمه خالدة گاعدة تباوع على جدي تعرف ما تگدر تحجي وياه ،الوحيد جدي من بين الكل يگدر الها ...

انداريت على صوتها تصيحني
ميمنة : غاااية

_ هااا ؟

ميمنة : تعاي شو وياي

مشيت ارجع للمطبخ ،اول ما طبيت شمرت السفره عليَّ ،اخذتها ومشيت صحت نوح ،اجه يم باب المطبخ الجوه يباوعلي ويباوع للسفره بأيدي
_ افرشها

نوح : هم گولوا نوح مابي فايدة ،هاي انا يوميا افرشلكم السفره

_ ديالله افرشها واسكت

نزع شفقته رگعني بيها على راسي ولبسنياها
هزيت أيدي وهوَ يضحك عليَّ
نوح : تخبلين ،بس مو بحلاة أم عيون من تلبسها .

ضيرم : ياهيَ هاي أم عيون ولك ؟

ضحكت اباوع لنوح شلون گمز من ضربة ضيرم على رگبته ولا شفته شوگت وگف وراه
نوح : مو صاحبتي الله وكيلك

ضيرم : جا مني ؟

نوح : أختك ،قصدي أختي .

ضيرم : هااا

باوعلي نوح يخزرني زين انا شدخلني ،شلون ويَّ غيرتهم اضطر يعترف ويگول أختي لان من گاله أختك خزره الا گال أختي يالله فك عگدة الحواجب الدوم مطبوگات ...

أخذ السفره ومشى يفرشها وميمنة وريحانة يصبن الغده بالمواعين وانا ركضت احظر الخواشيك
ونوح وفقار تگابلوا ينگلون المواعين ويسولوفون
ويتشاقون بيناتهم
ميمنة : خفي أيدج غاية

سديت البوري واطيتهن لنوح ،واحنه صبينه لروحنه وگعدنه ناكل بالمطبخ والزلم بالصاله ،وبس كملوا تگابلن ريحانة وميمنة يغسلن المواعين عود لان هنَّ الكبار ،انا وبركة گعدنه يم باب المطبخ نحش بمعلمة الأحياء لان نفسها تجيها بنفس الوكت سمعنة باب
الشارع انطبگ شوي وطب برهان ببدلته العسكرية

برهان : وخرن خلِ أطب

گمنة انا وبركة نسويله طريق ،اول ما طب راح سلم على أمه وميمنة ومشى يشوف بصائر من شافها وگفتله تريد تسلم عليه ،وگف گدامها لم وجهه بأيدة
برهان : شني هاي ليش هيج عيونج مورمتهن ؟

نجوى : شني ليش ؟ جا غير خافت على رجلها .

برهان : نعال على رجلها حشى السامع ،جا من ينعمن عيونها يفيدها رجلها

نجوى : يااا

برهان : أي والله عمه ،لا تزعلين بس هيَ منا موزينه هبوط وعيونها بيهن جفاف هل مناحه هاي تطيح حضها

سكتت عمه من شافته منفعل ،ضل يحجي وياها شوي ومشى طب جوه يمهم
گعدت انا بصف ريحانة اباوعلها مادري شبيها كلساع وخلت أيدها على حلگها ،حتى أمي انتبهت الها
زهرة : شبيج ريحانة عمه ؟

ريحانة : مادري عمه ،اشو نفسي كلش تلعب .

زهرة : يااا ولج خاف حااامل

بهتت صافنه واحنه شني حجاية أمي خلتنه نطافر من الفرحه
ريحانة : هااا

زهرة : ولج غايبة عليج ؟

ريحانة : أصلاً ما الها موعد

نجوى : ولج يمه ريحانة هيج الله أبو الحسنين واشوف وليدج بحضنج

لمعت عيونها تباوعلنه حايره من گالت الها عمة خالدة ما ادري شعجب
خالدة : عدي تحليل بالبيت هذاك الشهر جبته وما لحگت استعمله ،اجيبلچياه ؟

ايدها صارت ترجف چن حتى صوتها اختفى
نجوى : امشي جيبي فدوه .

گامت عمه خالدة لبست عباتها بسرعه وطلعت بدون ما أحد يحس بيها من الزلم ،واحنه هنا ضلينه على نار يامن يجيب عمه كلنه متوترين وياها وبس جابت
التحليل تواسيل الا گامت تسوي وكل أحنه واگفيلها يم باب التواليت بره ....

دگت عليها حواري الباب وهيَ فتحته بأيدها التحليل ودموعها من عيونها للگاع يوگعن ،بهتنه كلنه نباوع بوجهه وهي حاضنه التحليل وتبجي ،مشتلها أمها تحاجيها
نجوى :ميخالف يمه الله ما قاسملج هسه، لا تبچين

مسحت دموعها بايدها الثانية ومدت التحليل كلنه خلينا روسنة نشوفة ،وتگمزنه صار بفلس من شفنه الخط الثاني
ميمنة : حااامل والله هذا الخط الثاني

من الفرحه كلنه عيونه مدمعات ،طبينه جوه وضحكة الفرح مسيطرة علينه ،مشت عمة نجوى للصاله تبشر جده وكلنه وراها بس شافتنه جده گالت

غضة : شبيجن مثل سرب طيور طبيتن علينه ؟

نجوى : عمه عدي الج بشاره ؟

باوعت جده علينه كلنه واگفات والضحكة ما فارگت وجه ولا وحده بينه
غضة : أحجي شني ؟

نجوى : ريحانة حامل

صلت على محمد جده والولد وعمامي صاروا يتباركولها ،فرحة بنص ظروف ما معروف شني تاليها
غضة : تعاي ولج تعاي أحبنج

مشتلها تضحك وجده لزمتها تبوس بيها وهيَ الضحكه ما فارگت وجهه
غضة : ولج ياحبوبة تمنيت مو محرم جان سويتلج حفلة على هذا الخبر اليرد الروح

محمد : وين ماشي صخر ؟

التفتت على صوت أبوي يصيحه وهوَ جاي يطلع من
الصاله ،بلع ريگة بأيدة باكيت الجگاير
صخر : بالحوش شويَ وأرجع

بدون ما يسمع رد أبوي طلع ،گعدت على الدرج اباوع على قوة هذا الخبر الحلو الخله چبيرنه وزغيرنه يضحك ،مبتسمه وأيدي على خدي واباوع لريحانة كل ما تصفن تدمع عيونها ما مصدگه ...!

غضة : باعن تگعد هنا يمي كشاية ما تشيل خوش .

واحنه الممنونات نگول خوش ،هذا الحمل الصار خمس سنين متانينه وياها
بس كلهم الولد طلعوا راحت ميمنة للغرفة وصاحتني طلعنا هيوفة تگعد يمنه ،ضحكنه وسولفنه حتى نسينه شني متانينه اليوم ..!!

گعدت هيوفة بصف جده وعاد جده وما تشكيلها جانت لو توگع فلاونزه تدثرها وحتى للمدرسه ماتخليها تروح وانا من اگول مريضه تگلي كلشي مابيج
غضة : سوده عليَّ ياحبوبه ،اليوم ماشفت طولج وياهن ،ريت الكسر بيَّ ولا بيج

هيوفة : يا جده أسم الله ،ليش هيج تحجين اطيب والله انا شابة أنتِ شيطيبج

ضحكت وبركة تصفگ وتتشمت بجده
بركة : باعي جده قصدها أنتِ كبرررتي

غضة : انلصمي أعرف قصدها، وانا اعرفچن تردن تسوّن فتن بيني انا وعزيزتي

ضحكت هيوفة شمتانه بينه
هيوفة : لا تحااااولن ،انا عزيزة گلب جده هي گوووه

غضة : بعد روحي روحج ياحبوبه

كلنه نباوعلهن مدلغمات وجده راگعتنه بعرض الحايط ولا چن گاعدات
جفون : اگومن اشوف خرزة احسلي

زهرة : ولج عوفيهااا كرهتيها بالساعة البيضت بيها

رجعت گعدت بصف حواري المادري وين صافنه ولا جنها گاعده ويانه عيونها على ريحانة
غضة : حظرن جايچن ،تراهم على جيه .

زهرة : شني عمه تعلمين الغيب ؟

غضة : راح يّجون ،ما يعمون على نفسهم ويخلوها تكبر اكثر

زهرة : جا هنيالنه اذا أنحلت

غضة : تنحل تنحل ،أهم شي فقار مابي شي

زهرة : أي والله ،يمة غاية گومي حضري الجاي ،وأنتِ جفون گومي وياها

جفون غلست وبقت لازگة يم حواري وانا ما حجيت شي گمت بوجهي للمطبخ ،احضر بالاستكاين واسولف ويَّ روحي جده تحجي وحدها وين يّجون وهيَ واصله للضالين بينهم ...!!

ميمنة : تردين شي ؟ اجي اعاونج ؟

درت وجهي عليها من طبت ،بأيدي مواعين الجاي
_ لا ماعدي شي

وأنا احجي وياها طب نوح مستعجل يحجي
نوح : ماي حضرلي دولكتين

باوعت لميمنة ورجعت اباوعله
_ يعني أجوي ؟

نوح : مو همَ ،بس مودين كبار عشيرتهم وناس واسطة صلح ما أعرف شني ،يالله ميمنة خفي أيدج

اطته الدولكه ومشى ،وراه طب عزيز اخذ الدولكه الثانيه وهم مشى ،شني انا اشتغل عدل فضول حواري وصيت ميمنة على الجاي وطلعت بالحوش اتختل قريبة على الباب صرت ،الصوت صار واضح
واگدر اسمع حجيهم

واحد صوته خشن ومبين چبير بالعمر ،سلم وبدة يحجي
_ اليوم احنه جايّين نفض خلافكم أنتم واولاد أل عبود

رأجس : سالفتنه ماتفض وياهم ،كثرن عليهم لا وحده ولا ثنين وصلت بيهم يخطفون حفيدي

_ حقك ،بس أنتم هم ما مقصرين الله يحفظه وأحد من ولدكم حرگلهم دوانم

صخر : انا حرگتهن شيخ

فزيت على فتحة باب الديوان ،من لجحني نوح خزرني وأشر طبي ،طبيت اركض واضحك أول تالي يشتغل عدي فضول حواري

ميمنة : هاا ترزلتي ؟

_ لا ،بس انخزرت

ميمنة : منو شافج ؟

_ نوح

ميمنة : يالله نوح ولا غيره

انداريت على صوته وراي
نوح : احش رجليج لو شفتج بعد هناك تتسنطين.

_ أول مره وأخر مره

نوح : الجاي كمل ؟

ميمنة : كامل بس تانيني اصب

ضل واگف وهيَ شالت القوري تصب الجاي بالاستكاين ،بس كملت اخذ الصينيه ومشى بالگوه شايلها جبيره ومليانه ملي

وگفت بباب المطبخ صحت وراه
_ راح يوصلن للخطار نصهن بالصينيه

نوح : انلصمي

°ليث°

خزره جدي لان گال الهم هوَ حرگ الگعيان ،ما يرديهم يعرفون منو السواها وخله دوانمهم رماد

حجه وأحد من الدزايهم طرف ثالث بيناتنه
_ وحده بوحده نحلها ولهنا خلِ تكف المشاكل نستر على هاي الشباب ،شتگول أبو محمد ؟

رأجس : انا لو مبلغ بخطف حفيدي جان شمرت ولدكم بالسجن واحد واحد ،اخيسهم الكم ،و واحد منهم محسن الربط ايده ورده لهنا

بهتوا من جدي ذكر أسم محسن
_ على كيفك عمي ،جا أحنه ما نريدها توصل هيج .

رأجس : جا اذا ما تردوها هيج عدي الحل بس كونهم يرضون بيه

_ شني الحل ؟

رأجس : فلس من فلوس گيعانهم بعد ما الهم طاحن كلهن بفعلتهم الما تنحجي ،واذا تردون ادفع هم ماعدي مانع ادفع واسجنهم ،خلهم يختارون فلوس لو ولدهم

تدخل واحد من الموديهم طرف ثالث بيناتنه
_ انا احاجيهم ،خلهم يسترون على وليداتهم

رأجس : ولا عبالكم تفض وياهم ،راح اوگع بس وحده منهن ،الباقيات ما ناسيهن

تعالت اصواتهم ما راضين على حجي جدي ،انا والولد گاعدين نباوعلهم ولا تدخلنه لان جدي مكفي وموفي
رأجس : هذا العدي غيره ماكو ،وگولولهم وردولي خبر

گاموا يردون يمشون ،واحنه هم گمنه كلنه وجدي مترأسهم واگف يحجي بنصهم

رأجس : شگد فلوس خسارة الگيعان واگعات ببطنهم
كل حگ ما الهم يمي بعد

_ نحاجيهم ونردلكم خبر

رأجس : من صالحهم يرضون لان منا الباجر الي تصرف ثاني وياهم

ماحجوا شي بعد وطلعوا من الديوان وعمامي وجدي وراهم وانا والولد ضلينه هنا
صخر : والله لو جايّن ما اخليهم يطلعون غير دمهم بطولهم

صفگ أيد بأيد
ضيرم : تمنيت واحد منهم جاي والله اطلع حرگة گلبي بي

عبد الحق : جا همَ غشمه من ما أجوي يعرفون بينه ما نويلهم على خير

ضيرم : انا لو واحد منهم يطيح بأيدي قسم بذات إِلله عظم صاحي ما اخلي بي

صخر : جا شني نسكتلهم ،اذا ما كسرت أيدهم الانمدت على فقار فلا انحسب من عگاب الرأجس

برهان : كافي رحمة لدينكم تشعلوها ما تهدوها شني أنتم

صخر : لان ما جنت هنا تحجي هيج والله لو ويانه جان رميتهم بساعة الما لگيناله أثر

برهان : رد هسه والحمدلله ،وبعدين شني أنتم قابل مقصرين وياهم مو حرگتولهم بيت بذيج الحسبه

ضيرم : لكل فعل ردة فعل ،جا ماخذيلنه زلمة موش جاهل

فقار : الله أول مره احس بروحي عزيز

اندار عزيز عباله صاحه
عزيز : هااا

فقار : مو يمك

حزرة ودار وجهه يشارك الولد بحديثهم
عزيز : لوما نفذوا حجي جدي انا محضرلهم خوش دعوه ،والله اخليهم يبيعون الفوگاهم والجواهم وما يحلوها

ضيرم : عشت ،والله جاي اگلك

عزيز : بدون ماتگول انا حاطها ببالي ،منا الباجر اذا ما ردولنه جواب ابدي اشتغل عليهم

°هيوفة °

گاعده بالغرفه والملل كاتلني ،انا ما متعوده هيج احب امشي وافتر ونهاري كله يخلص شغل مو مخلصتها گعده ،جده گاعده يمي وكل ما تشوفني احوس وما اگدر اتحرك تگلي
غضة : سوده بوجهه غضة ،سودة علي ياحبوبة .

_ اسم الله عليج جده ،كافي هيج تحجين شبيَ انا مو تگليلي كلها فتره وتگومين

غضة : أي حبوبة ،بس انا انقهر من اشوفنج ماتگدرين تتحركين

_ ميخالف شسوي

بنص حجينه واندگ باب الغرفة ،غير راحت روحي من فتح الباب من کالتله جده تعال وشفت طوله نزلت راسي اعدل بحجابي واحس بهاي أيدي ترجف انا حالي ينگلب لو شفت طوله شلون لو حجه وياي وگال اسمي

گبل لا يگعد يم جده ما اعرف شعده وياها باوعلي أي والله باوعلي وگالي
ضيرم : شلونج هيفاء ؟

بالگوه طلع صوتي وانا اجاوبه بصوت مادري شلون سمعه
_ الحمدلله بخير

ضيرم : ضلي دوم بخير

من ثولي وگلبي الما تحمل حجاياتة ،هنَّ بسيطات بس هاي روحي لينه وياه وبكلشي تفرح ،ما لگيت روحي غير مخليه ايدي على گلبي اهدي خباله ومن كد ما حضي حلو هوَ يحجي ويَّ جده وأجت عينه عليَّ ،بسرعه نزلت ايدي والحمدلله ما جان مركز ...!

طول ما هوَ گاعد انا بكل حيلي مركزة ويَّ كل حجاية يحجيها ،ما لگيت روحي غير مبتسمه من سمعته يحلف لجده
ضيرم : وداعة شوارب صخر ما حاط السالفه براسي

غضة : شني بكيفك ،جا غير جدك ناويلكم ،أنتَ وصخر أول شي

ضيرم : شني السالفه جده ؟

غضة : شوكت تعرسون مو دگ عمركم الثلاثين

ضيرم : مو هسه جده وضعنه مال عرس احنه

غضة : جا شني منا لفرحة الزهره ماتفض مشكلتنه ؟

ضيرم : تفض أن شاء الله ،بس گليلي مو ابوج ميت شلون ترضين نعرس ؟

غضة : بس خطوبة بيناتنه

ضيرم : شني هاي جده كلشي مقررة أنتِ وجدي واحنه اخر من يعلم

غضة : جا شني تكسرون كلمة جدكم ؟

ضيرم : لا حشه ،بس انا ما اريد اتزوج هل وكت

غضة : شعدگ ؟

ضيرم : أريدن بيت وحدي ابني

غضة : هااا يعني هاي فليساتك اليمي للبيت ؟

ضيرم : أي

غضة : أي سهله ،اخطب وابني وبس يخلص البيت تتزوج

ضرب على رجله ضايج
ضيرم : منين ما اجيج تجيني ،شني السالفه جده

غضة : روح حاجي جدگ

ضيرم : جا هوَ جدي من يقرر ياهوَ يگدر يفك حلگه بعد

غضة : والله عجزتوا شني نريد نشوف بزرتكم

سكت يباوعلها حاير من طب صخر باوعله يحاجي
ضيرم : تعال عريسنه اگعد بصفي جده شلون عدها الك سالفة الا تخليت تتمرغل بالگاع من الفرحه

باوعله صخر ما مفتهم شي ومشى گعد بصفه ،خله أيده على رجل صخر يگله
ضيرم : راح نعرس ما تدري ؟

صخر : ياهوَ هذا اليعرس ؟

ضيرم : انا وأنتَ .

صخر : هاا ،واحنه أخر من يعلم ؟

ضيرم : أي والله شفت شلون

صخر : احجولي شني السالفه

ضيرم : جدگ مقرر يزوجنه واحنه ما نعرف

صخر : صدگ جده ؟

غضة : أي جا شني طلابه ،لشوكت تضلون هيج ؟

صخر : حاجي جدي ،أنا ما ناوي اتزوج هسه .

غضة : شني ما ناوي جا أنتَ مو حتى أكبر من ضيرم

صخر : عرسوله هوَ ،انا من الاخير ما رايد اتزوج

ضيرم : ما اعرس اذا ما أنتَ تعرس

نتر بيه عيونه بگصته
صخر : شني ضيرم ؟
هسه شكو صار عصبي ،أخويَ حتى المواضيع البسيطة تعصبه بحيث بنفس الوكت طلع من الغرفة خله جده وضيرم يصفنون وراه ...!!

باوع على جده مستغرب من عصبيته المو يم الموقف
ضيرم : هذا شبي ؟

غضة : أندري انا

ضيرم : مادري شجايه اليوم مطنگر ما يحتاجه

غضة : يجوز اكو موضوع ماخذ فكره ،اعذره حبوبه

ضيرم : جا جده تعرفين انا مخاويه بروحي ،بس خايف عليه لا يصعد ضغطه

غضة : ما يكض روحه ويعوف العصبيه الا يصير بي شي

تأفأف ضايج وانا كلساع اخطف نضره عليه ،ضل ساكت روحه بخشمه ،من صاحوه طلع من الغرفة وضليت بس انا وجده ،وانا رجعتلي ذيج الخوفه من گال جدي يريد يخطبلهم ومن عرفت هسه هوَ وصخر بالبداية جن روحي بدت تنسجب مني ،خليت أيدي على صدري اريد اتنفس ،انتبهت عليَّ جده شلون جاي اصارع ويَّ روحي ...

غضة : أسم الله الرحمن ،شبيج ولج هيفاء جده ؟

أشرت على صدري بالگوه يطلع صوتي
_ مختنگه جده

غضة : ياا ياااا ولج من هستوج مابيج شي

بلعت ريگي چن ساچين صارت ببلعومي
غضة : ولج زهرة تعاي شوفي بتج ما أعرف شبيها

مدت رأسها من الباب
جفون : شنو جده ؟

غضة : روحي صيحي عمتج خلِ تجي هاي هيوفة ما جاي تتنفس

فتحت عيونها تباوعلي خايفة وانا بالگوه احس بروحي جاي اتنفس بس أكابر أخاف على جده لا تنهبط هيَ هسه تباوعلي هيج وباد حيلها من الخوف

طبت أمي تمشي بسرعه گعدت گبالي تحاجيني تريدني احجي وانا كلش الكلمه بعد ما اگدر احجيها كلهم التموا عليه زادت خنگتي من بينهم طب ليث
گعد يعدل بحجابي ويحجي ويَّ غاية
ليث : اركضي جيبلها عباية خلِ اخذها للمستشفى .

ركضت غاية جابت العباية وأجت ،خلاها على راسي وشالني وصخر طلع گدامنه يشغل السياره
اخذوني للمستشفى وگالوا هاي بسبب البنچ ولان ما صار هواي من طلعت من العملية هيج يصير وياي بس انا اعرف لا سالفة بنچ ولا شي انا سالفتي غير أعرف العله البيه ...

خلولي أوكسجين وگالوا بس يخلص الوكت اگدر اطلع ،أمي گاعده يم رجليه تباوعلي بقهر ،وصخر وليث گاعدين على السديه گدامي ،صخر يگلب بموبايله وليث مادري منو خابر عليه وطلع من الردهه
شوي ورد مخبوص خبص يحجي ويَّ صخر

ليث : يگول جدي ارجعوا

صخر : شكو ؟

ليث : رادينله وچن اكو شي

شلت الاوكسجين وهمَ ثنيهم صاحوا رجعي ،ما رجعته وحاجيتهم
_ خلِ نروح صرت زينه

ليث : متأكده ؟

_ أي والله

ليث : جا خوش ،عدلي عباتها يمه

عدلت عباتي أمي وشالني ليث خلاني بالكرسي وطلعنه نرجع للبيت ،بس وصلنه للقرية من بعيد شفت هوستهم ميزت ولدنه وعمامي من بينهم والباقين هواي لا واحد ولا ثنين ناس غرب ما أعرفهم منو وگفتهم هاي خلتني أرجف بمكاني ...!! 🪾


شكرا لزيارتكم عالم روايات سكيرهوم
تعليقات