رواية خلخال مشوه الفصل السابع بقلم زمرده
ثارِي چِفوفهُم عَمية
وَ لا تِندل تَعب روحِي
•---∞∞∞∞∞∞∞---•
°غاية°
مشت للمستشفى تصارع ويَّ نفسها ،خنگتها مو طبيعية وچن هذا هوه الدنيا ابد ما تشتمه ،روحي ضلت تلوب عليها ،يامن يردها واشوفها گدام عيني
مابيها شي
شوي هده بالي من گال عزيز مخابر ليث وگايله خلولها أوكسجين وهسه
أحسن
سألته : شوكت يردون ؟
اندارلي چان يحجي ويَّ جدي
عزيز : نص ساعه هيج ويردون
_ خوش
مشيت يم جفون ما أعرف شعدها ساكنه المطبخ
بس طبيت شفتها گاعده وخاله قفص الطيور تذكرت خرزتها مبيضه
گعدت بصفها اباوع على خرزرة الكارها حياتها منوره جفون خلتها تتندم على الساعه القررت تبيض بيها
ومن كل عقلها تحجي ويَّ خرزرة
جفون : اگلج جوعانه ؟ مشتهيه شي ؟
ضحكت اباوعلها ما مصدگه هاي تحجي من كل
عقلها ركزت بملامحها والله چن صدگ جاي تحجي
اجت گعدت بصفها تدردم
حواري : انا شگد خبله بس مو مثل خبالج
جفون : انجبي
حواري : انجبي النذله الخسيسه
عاطت بيها
جفون : هسه انا يمج حذاج ،ليش تعيلين ؟
حواري : وسم لهل صوت
جفون : نتعارك ؟
حواري : أنجبي شو بعتيني فرد نوبه
جفون : ما بايعتج بس مگابله زقزوقاتي وأنتِ تعيلين بيَّ
حواري : جا شني مگابلتهن وعايفتني
جفون : تغارين ؟
حواري : لا انجبي
ضحكت جفون وشالت قفص الطيور تعلگه تريد
وبنفس الوكت طبت ريحانة تخابر والضحكه شاگه حلگها جفون علگت القفص وركضت لزگت يمها من
سمعناها گالت
ريحانة : عدي الك خبر يرد الروح
أنا گعدت گبالها من گعدت اريد اسمع ردة فعله على خبر حبالتها الصار سنين متلهفين اله،اشرتلها تفتح سبيكر وهيَ ما گالت لا وفتحتها وصوته وصلنه يسألها
حمزة : ياخبر ؟
وهيَ تضحك وتگله
ريحانة : خبر ما ينشره بمال ،يعوضك تعب سنين العمر
حمزة : ولج وگع گلبي ،عقلي بعد ما يفكر ،احجيلي
لا تشلعين گلبي
ضحكت وصوت ضحكتها رنت بالمطبخ وهيَ تگله
ريحانة : انا حامل حموزتي
اخذله بالدقيقة مختفي صوته ،صوته رجف من سألها ما مصدگ
حمزة : عليج الله
ريحانة : والله ،حمزة انا حامل
ضحك ضحكة من كل گلبه وهيَ تحولت ضحكتها
إلى بچي بچت بأنهيار تحجيله واحنه هنا وياها عيونه دمعت
ريحانة : بعد خمس سنين انزرع جاهل ببطني ،خضرت بطني بعد سنين من التعب والشلعان گلب ،حمزة راح نصير أم وأب ،الله راح يعوض تعبنه
وهوَ بس يگلها أي والغصه لازمته يريد يبچي وياها
نزلت دمعتي على حجيها اليشرح مرارة العاشته ،گمت وجريت حواري وجفون وياي زحمه لازگات يمها يمكن تريد تحجي براحتها واحنه نايمات على خوانيگها ...!
گعدت يم جده الگاعده تلوب وكلساع مباوعه للباب
أخر شي ما تحملت ضربت على رجليها تلوم بصخر وليث
غضة : شبيهم ما اخذوني وياهم
شيماء : وين رايحة عمه هسه همَ على جيه
غضة : گلبي غادي نار عليها
ضحكن عماتي يباوعلها شلون تلوب على هيوفة باوعت على البنات وغميت نفسي ،وهيَ ما أعرف شلون لگفتني
غضة : ضلي ضلي بهاي غيرتج
ضحكت احاجيها
_ جا شني جده غير أنتِ تفرقين
غضة : تفرقت عظامي لو مفرقه ،بس هاي معزتها بگلبي غير عنكم كلكم
بركة : جا هيَ التفرقه شلونها حمره لو خضره
غضة :طارت بركتج يا بركة ،ماتحجين حجاية براسها خير ،تسكتين تسكتين وتشمرين قنابل موش حجايات
ضحكنه نباوع على بركة الگلبت وجهه ،بنفس الوكت
سمعت صوت ليث يصيح
ليث : غااااية
گمت اركضله ،طبيت للمطبخ شفته واگف يم الباب
وشايل هيوفة وأمي طبت وراه
ليث : سويلي طريق اطب
هزيت رأسي ب أي وطبيت گلت للبنات اجه ليث ،بس شفتهن تسترن صحتله
_ تعال ليث
طب يريد يمشي للغرفة ،صاحتله جده
غضة : تعال حبوبه خليها يمنه
ما حجه شي واجه خلاها بصف جده وضل گاعد يحجي ويَّ جده موجه كلامه النه كلنه
ليث : عينكم عليها ،بلگوه رد نفسها طبيعي ،لا تخلوها وحدها حتى من تنام راقبوها ،چم يوم ويستقر وضعها
غضة : صار ما نهدها بعد
گام يعدل بهدومه ويحجي لچده
ليث : رادين كبار عشيرة بيت غازي والناس الوسيطه
غضة : يا الله ،وشني يگولون ؟
ليث : خسارة الگيعان والبيت الحرگناه وگعن ببطنهم حتى نسكت على سوايتهم لفقار
غضة : يعني فضت ؟
ليث : بس وحده ضلن هواي
غضة : يااا جا ما يصير صلح ؟
هز رأسه ب لا
ليث : يا صلح جده ؟ للگبر احنه وياهم ما يلمنه مكان واحد غير بس بالطلايب
غضة : أنتم ولد ولدي تعشگون الطلايب عشگ
ضحك يعدل شعره ،أخوي واعرفه لو حجه هسه راح يشمرلنه حجاية أكبر من رأسي وما گدر يسكت
من جده گالتله
غضة : احجي لا تضمها بگلبك ،أعرف لسانك يضل يحكك
ضحك يحرك حواجبه لجده ،وخلانه نضحك من
گال
ليث : شوكت نعشگ نسوان ،مخلصيها بس طلايب
غضة : جا ما تعشگون ،منو كاضكم ؟
ليث : والله انا ياجده بعدني ما لاگي الاعشگها ،من الگاها أجي اگلج امشي اخطبيها
غضة : هاا ولك ليث ناويلك على الغريبه
ضحك يهز رأسه أي
ليث : جا جده انا غير الغريبه ما أجيب الامي چنه
غضة : ياا ياااا وجدگ يخليك
ليث : الله كريم لجدي ،هسه خلِ الگاها
گال أخر حجاياته ومشى يطلع ،انا گعدت بصف حواري وبصفي جده وبصفها هيوفة ،اسمعهن يحجن ما مخليه بالي يمهن بس ما اعرف شلون أذني لگطت چم حجاية ما عرفت تفسيرهن
غضة : هيج ياحبوبه تخوفيني عليج ؟
هيوفة : صرت زينه والله
غضة : مو عليَّ تچذبين حبوبه ،انا أعرف گليب عزيزة گلبي شبي
ما حجت هيفاء الچان الحايط رد هيَ ردت ،درت وجهي على حواري الگاعده بصفي وبالها مادري وينه بس صافنه وكلساع تجر حسره جنها طالعه من گلبها
ندستها فزت تباوعلي
سألتها مستغربه من حالها الانگلب برمشة عين
_ شبيج ؟
حواري : شبيه ؟
_ انا اسألج ،شو گالبه الخلقه ؟
حواري : مابيَّ شي بس منعسه
_ والله حتى انا
مددت بمكانها وغطت وجهه بشالها مخليه رأسها على رجلي ،باوعت على بصائر الگاعده بصفي مبتسمه على أثر ابتسامتها أبتسمت اشاقيها
_ الوجه ورد وبانت سنونج ،هاي هيج مفعول فقار قوي
بصائر : اقوى من مفعول الفوار
ضحكت بصوت من كلهن باوعلي ضميت ضحكتي بأيدي ،ندستني تحاجيني بصوت ما يسمعه غيري
بصائر : أريد اشوفه
_ منو ؟
بصائر : أبن عمج ،يعني منو ؟
_ شني ما شفتي ؟
بصائر : فتحيلي عقلج نايم بي مطي
_ لشوكت اضل اگلج هدي سوالف فقار
بصائر : لان احبه شبيج حتى خلقتي صارت تشبه خلقته
_ جا شبيج ما تگليله أحبك وتريحين گلبه
بصائر : وأنتِ شمدريج ما گايلتها اله
_ مره رحت اوديلهم العشه ،سمعت نوح گاله أحبك وهوَ رد عليه جا شبيها بت عمك ماتحبني
أبتسمت
بصائر : هاي بداية الخطوبة
_ وهسه ؟
بصائر : بعدني حاقده عليه من نهه عليَّ ،بس تدرين شنو ؟
سألتها
_ شنو ؟
بصائر : ما جنت أعرف بروحي احبه الا من حسيت هاي هيَ راح اخسره
_ جا احجيله خطيه والله ،سنين وهوَ يباوعلج من بعيد لبعيد ماكو احد بينه ماعرف بي يريدج
بصائر : لا بعد راح اصير حبابه
_ عفيه، عفيه
ضحكت تهز بأيدها
بصائر : اشو أنتِ تعلميني چن انا العمري 17 مو أنتِ
_ لا تعيشين دور الچبيره ،تره انا وياج فرق بس سنتين
بصائر : المهم أكبر منج
_ خوش
ضحكت وگامت من سمعت صوته طب هوَ ونوح
زغرت عيونها تباوعلهم
بصائر : شريچتي ما تعوف رجلي شويَ ؟
ضحك نوح لان يعرف مقصد الكلام عليه
نوح : اخذي ،شني لازمه انا ؟
بصائر : هاا مو هاي لازم ايده
باوع نوح الايده البيها لازم ايد فقار وضحك ،عافها يباوع لبصائر رافع ايده
نوح : وهاي عفناها ،أمر خدمه بعد ؟
بصائر : لا سلامتك
نوح : خوش
طلع يهز بأيده ويضحك وفقار مشى عيونه عليها ،أبتسمت ورمشت بعيونها وهوَ راح بيها تراب بحيث بس وگف گدامها جر راسها يبوس عيونها ويحجي
فقار : اروح فدوه لهاي العيون التباوعلي ،بويه أنهجم بيت الجابج على هل حلاة
صاحت بي جده
غضة : الخفيف اثگل مو گدامنه
رجع باس خدها يلاشي بجده
فقار : تونكل جده تنوكل ،ما أعرف شلون كاض روحي وما لافها بخبزه وماكلها
أنا الابتسامه وياها شگت وجهي ومفتحه عيوني چن عدي امتحان وهيج مركز فد تركيز حتى ما انسى شلون جعص وجهه وشفط خدها الثاني ببوسه أم الصوت وامها تضحك وجده وامه يرزن بي وهوَ ولا
مهتم ...
صاحت بينه انا والبنات
غضة : المفلوكات ديرن وجوهتچن
غطيت وجهي يجف ايدي ومن بين اصابعي اباوعلهم لزم ايدها ومشى ،صاحت وراه عمه شيماء وانا نزلت ايدي من وجهي لان أمان بعد
شيماء : وين ماخذها ولك ؟
فقار : خلوني اخنسلي فد خمس دقايق الكم أجر والله
شيماء : ردها ردها لا اسولف العمك عليك
فقار : شبيج عمه ،احسبيني أبنج
سكتت عمه حايره وهوَ اخذها ومشى ،وبس طلعوا خنست وراهم حواري ،أجت ميمنة من المطبخ گعدت يم هيوفة تسألها
ميمنة : شاربه دواج ؟
هيوفة : بس الوره العشه ما شاربته
ميمنة : هسه من نسوي عشه وتتعشين اشربي مو تغلسين عليه
أبتسمت
هيوفة : لا ما اغلس
ميمنة : عفيه حبابه
گمت وعفتهن يسولفن ،النعاس كتلني ،طبيت للغرفة شفت بركة نايمة وعلى صفحة عمه خالدة ،انا هم حطيتلي مخده ونزلت غطه من النضده وبس تمددت غفيت على گد التعب والقلق العشناه بهل يومين
°حواري°
مديت رأسي من باب المطبخ اشوفهم وين مشوا شو اختفوا وعود هستوهم طلعوا ،طلعت من سمعت صوت ضحكتها ،مشيت ادور صوتهم وأبتسمت من شفتهم واگفين بصفحة البيت اكو ترك وخانس بيها أخوي يدور ختلات ،ضميت روحي بالحايط مطلعه بس عيوني واباوعلهم أخاف لا يلجحوني ...
فقار : لو أعرف يوميا امشي ويَّ بيت غازي حتى احصلي حضن هيج
ضحكت وخلت رأسها على صدره ورفعت رأسها تباوعله واخوي غرگان بيها ،أبتسمت وخليت ايدي على حلگي من باسته من حنچه وهوَ غمض مبتسم
وقربها لصدره اكثر مربطها بايده
بصائر : فقارري
فقار : هاا روح فقار
بصائر : أحبك انا
وخرت بسرعه مخليه ايدي على عيوني ورافس أول لقطة فسوق بحياتي اشوفها ،صخام باسها والله باسها ،طبيت اركض للبيت بالگوة ضامه ضحكتي فرحانه بيهم والله هيج چن انا صارت بگلبي مطايه من الفرح مو أخوي
بس شافتني جفون اتبسم للحياطين جابتني بكفخه على رأسي خلتني افز فزه تسوه عمري ،لزمت رأسي اصيح بيها وادگ رجلي بالگاع
_ ادبسززز راسي راااح ،هيَ هيييج ؟
جفون : جا شبيج تتمضحكين ويَّ روحج ،شني تخبلتي ؟
ضربتها على أيدها الضربتني بيها خليتها تگمز
_ ما عليج مني ،هسه عرفتيني ؟
جفون : وسم ،سم سم بگلبج وبگلب التسألج
_ سم الحسين أن شاء الله ولي مني تريدني احاجيها وهيَ علمود خرزة وكركم لابستني بدال نعالها
ميمنة وريحانة گاعدات من حجيت ضحكن وريحانة صارت ترافس من الضحك وانا ما گدرت اضم ضحكتي من استوعبت حجايتي ،غمتي جفون وانا رجعتلها الغمه
ميمنة : جا هيَ هيج ،حجيتي على روحج مو عليها
أبتسمت احك راسي
_ لساني يمسلت انا اعرف شبي دوم بالمواقف هاي يضل يجفص
ريحانة : هم زين نعرفج
بنفس الوكت دگ مبايلها رجلها گالها راح يّجي ،بس سدته اندارت على ميمنة
ريحانة : أريدن حمرة الطخ بيها خدودي وجهي ما أعرف شلونه
ميمنة : اوكفي اجيبلج من هيوفة
گامت ميمنة تريد تروح صاحت وراها
ريحانة : وعطر وياج
ميمنة : صار
شوي ورجعت اطتها الحمره والعطر ،اخذتهن وگامت وگفت گدام المراية بالمطبخ وگفت يمها اباوع عليها خلت شوي لشفتها ونوب خلت على اصابعها ودهنت خدودها
ريحانة : شلوني ؟
ميمنة : تخبلين بس حمرة وهيج حلوه من تخلين مكياج هواي شلون
جفون : الحلو حلو لو يگعد من النوم ما تحتاج مكياج
ضحكت واندارت تباوع للمراية خجلانه ،بنفس وگفتنه طبوا الولد و وراهم جدي وعمامي يحجون
بالصار هسه ،وانا لا ارادياً عيني تشكلت يم صخر صايره على كل نضره منه اركز ،شفته صد عينه بسرعه من أجت على أختي وبسرعه طب للصاله شلون واحد شارد من شي ..!!
كلهم طبوا وضل عزيز يباوع لريحانة مزغر عيونه
وما تحمل ما يحجي أخوي الحباب بس مو حباب وشايف روحه
عزيز : شني شبيهن خدودج حمر ،مصخنه ؟
دنگت مستحيه منه
ريحانة : لا مابيهن شي
عزيز : جا ليش هيج حمر ؟
ريحانة : بس خالتلهن حمره
باوعلها يهز بأيده ما راضي مبين ،بس لان عود متزوجة وچبيره ما حاجاها وطب جوه وهيَ بقت تلوم بنفسها
ريحانة : هسه انا عود ليش خليت شني ما شايفني بلايه مكياج
ميمنة : شبيج هسه علموديش هيج انقهرتي ،جا غير متزوجه أنتِ واذا خليتي
ريحانة : لا والله انقهرت كلهم شافوني ملطخه هل وجه هذا
ميمنة : شلون وجه يخبل ،هيَ كل وحده تلطخ روحها تطلع هيج حلوه
ضحكت ومن اجتها صيحه من عزيز سكتت
ريحانة : هسه أنتِ الا تضحكيني وتعرفين بيَّ ضحكتي شهيره
ميمنة : اضحكي ،اضحكي الدنيا خلصانه
أبتسمت تضم كذلتها النزلت من الحجاب وانا اليوم حالفه اصير المراقب مال عشاگ ،احط عيوني ويَّ كل ثنين انا ثالثتهم ، لان هسه انا ضامه روحي وره الشجره واباوعلهم شلون أول ما طب شالها رافعها من الگاع وضام رأسه برگبتها ساكت ،وهيَ تضحك
وتحاجي
ريحانة : يااا حمزززه ،شوو حبيبي خلِ اشوفك
وخرت راسه من رگبتها تمسح بوجهه وهوَ ساكت يباوع بعيونها
ريحانة : حمزة
مارد عليها ودنگ يبوس عيونها
حمزة : اغدي فدوه لهاي العيون
ضحكت بصوت وهوَ على أثر صوت ضحكتها يضحك أول مره اشوف أختي هلگد فرحانه ،أول مره ما اشوف كسره بعيونها ،من فرحتي لفرحتها ما گدرت اضم دموعي وبجيت خاله أيدي على حلگي وفززني
صوت خطوات أحد وراي طلع من باب المطبخ ...
انداريت واشوفه صخر مدنگ يعدل بدگمة دشداشته
وبس رفع رأسه بهت وچن الدنيا وگفت بي وبعد ما عرف شلون يمشي وهوَ يباوع عليهم حتى انا ما شافني ،وجهه انخطف لونه حار يرجع لو يكمل طريقة ،وانا ساكته اقنع روحي فشل من الموقف مو غير شي ،أي يمكن مو غير شي ..!!
ومن صدت عينه عليَّ أشرلي تعاي ،مشيت اطگطگ راح يرزلني لان شافني اتخنس عليهم بس والله مو بيدي انا جسمي يضل يحكني من الفضول ...
أي وهسه احسلي خوش راح اترزل رزاله غسل ولبس ،ويامن يوصلني اله شني غير دفرت نفسي مية الف دفرة الا وصلتله وانصدمت من گالي
بصوت ناصي ما يريدهم يسمعون
صخر : گلي الاختج خلِ يطبون بالديوان زحمه هنا واگفين
انصدمت من حجه هيج وما اخذها بصياح ،عاد هوَ على كلشي يعصب ،والصدمني اكثر ما رزلني ..!!
هزيت رأسي ب أي ومشيت ،سويت نفسي هسه طالعه واصيح
_ ريحااانة
دارت وجهه تباوعلي مزغرة عيونها وچن تگلي لاگفتج ،عكست عيوني منها وسلمت على رجلها وراها گتلها
_ تعاي احاجيج
بس أجتني همستلها
_ طبي أنتِ ورجلج للديوان فارغ ،طلع صخر وشافكم و وداني عليج گال خلي تطب زحمه هنا واكفين
بس كملت كلامي رفعت رأسها وبس شافته واگف بسرعه دارت وجهه ومشت تحجي ويَّ رجلها
ريحانة : تعال نطب للديوان زحمه واگفين هنا و الولد كلهم هنا
حمزة : جا رجلج واذا ؟
ريحانة : مو تعرفني استحي
ضحك ومشى گدامها للديوان وانا مشيت ارد للبيت
وبنفس الوكت طلع صخر ،بس طبيت للمطبخ لگيتها گاعدة وخاله ايدها على خدها
ميمنة : صخر طلع مو ؟
_ أي
ميمنة : وريحانة ؟
_ طبت للديوان هيَ ورجلها صخر شافهم وگالي روحي گليلها تطب جوه
صفنت بوجهي وسألتني وما أعرف ليش حسيت وره سؤالها اكو شي
ميمنة : يعني شافهم ؟
هزيت رأسي ب أي وهي صفنت وصفنتها طالت ما حجت ولا حرف وضلت عينها على الباب وبس طبت ريحانة صاحتها
ميمنة : تعاي ريحانة
أجت وهيَ گامتلها جرتها على صفحه تحاجيها وچن ما تريدني اسمع ،بس انا لو اشتغل فضولي دبيب النمله اسمعه وحركة الشفايف افسرها ،ركزت وياهن
كلش
ميمنة : ليش تخلين رجلج يّجي هنا ويحترگ گلب صخر ،ارحمي بحاله حرام تره ضغطه موزين ساعة الساعة يصير بي شي من قهرج
ريحانة : والله من فرحتي من راد يّجي ما گتله لا
ميمنة : حتى انا نسيت وكيفت راح يّجيج بس من تذكرت صخر والله متت من القهر
ريحانة : شافنه
ميمنة : گالت حور
سكتت ميمنة وريحانة هم ما حجت حايرات وين الا تذكرت وركضت
ريحانة : نسيت رجلي بالباب
ميمنة : الحمدلله
اخذتله ماي وطلعت ،وانا ضليت هنا اجيب منا واودي منا سوالف براسي وكلساع تطلعلي فكره
شكل وتجي براسي غيرها وضليت هيج الا أن اجتني جفون باوعتلها ودرت وجهي
گعدت بصفي
جفون : زعلانه ؟
_ أي
جفون : وزعلتهم
رفعت أيدي اريد اكفخها وهيَ شردت وانا نسيت الگاعدين هنا وانفتحت احجي واحجي الا أن اجتني عيطة معدله من ضيرم نصيت صوتي ادردم وما أعرف شگلت لنفسي من مشيت للصاله ،بس شافني جابني بخزره معدله خلتني اعدل وگفتي وبس درت وجهي على عزيز سوالي بسيطه ورجع يحجي ويَّ عبد الحق ،عوجت حلگي ومشيت أطب للغرفة وبس
شفتهن غاية نايمة وبركة وعمه اخذني النعاس وحطيتلي مخده بصف غاية وجريت الغطه تغطيت وياها ونمت ....
ما گعدت غير الصبح على صوت غاية تفتر بالغرفة تحضر روحها تريد تروح للمدرسة ،صحت بيها
_ طفي الضووه عيوني راحت
غاية : خايبة شنيوصارلج شگد نايمة ،وبعدين مو عدج دوام ؟
_ جا غير ضهري شني
غاية : جا حتى لو اگعدي
_ هاي لان أنتِ گعدتي تردين حتى انا اگعد
غاية : خايبه جفون گاعده وأنتِ نايمه امداج
غطيت رأسي واحجي عليها ضايجة
_ جا هيَ جفون مگلبتني ،كله حايره بزقزوقاتها
عافتني وطلعت من الغرفة وانا بعد ما گدرت انام گمت لبست حجابي وطلعت اسحل بروحي سحل هوَ انا مكيفه دوامي ضهري حتى اضل نايمه بس الله يوفقها تريدنه كلنه نگعد وياها ...
گعدت يم باب الغرفة اتثاوب مرجعه رأسي على الچرجوبه ،اجت ميمنة تحاجيني وانا مطفيه اخير شي جابتني براچدي صحاني أسبوع ليگدام
لزمت خدي صار نار ،باوعتلها مصدومه وهيَ تضحك ميمنة : جا شلعتي گلبي احجي وياج وأنتِ سكرانه عاد گلت اصحيج
فركت خدي يوجعني
_ جا هيَ هيج حتى الميت يصحى
ميمنة : يعني صحيتي ؟
_ لا بعدني نعسانه
وگبل لا تحاجيني طفرت للغرفة ،اعرف تريدني اشتغل وياها ،لفيت روحي بالغطه وصدگ رجعت نمت ما گعدت غير على جرة الغطه مني ،صيحت انزل بثوبي
_ هيييج هيَ ،شبيجن اليوم ؟
جفون : اگعدي التنبل ،ماضل وكت للدوام
باوعت على الساعة وطفرت من شفت بعد بس نص ساعة ويّجي الخط وهاي واگفه گدامي حتى مبدله سجاجه تتحضر گبل بوكت مثلي انا اشتل الخط بره وانا بعدني ما مبدله
ركض ركض مشيت لبيت اهلي نوح وصلني، كلهم رايحين بس انا هنا ضاله ما احد گعدني يعرفون لو گعدوني عقل براسي ما يضل ...
بس طبيت لگيت ريحانة بالمطبخ تسوي ريوگ من شافتني گالت
ريحانة : بعد وكت زين واجيتي
نزعت عباتي احاجيها
_ هستوني گعدت
ريحانة : تنمبل مال نوم
_ اكو احلى من المخده
هزت أيدها تضحك وتحضر بگلاصات الجاي ،گبل لا اطلع گتلها
_ سويلي لفه حبابه
ريحانة : روحي بدلي وتعاي
وانا ما گلت باطل مشيت اريد اروح لغرفتي وبس طبيت للصاله شفت أمي وابوي والولد گاعدين صبحت عليهم ومشيت للغرفة طلعت هدومي وبدلت
وحضرت جدولي وطلعت من سمعت صوت ريحانة تصيحني حتى اتريگ
گعدت وياهم على الصينيه اخوط بگلاص الجاي واسمع حجي أمي ويَّ أبوي
نجوى : عمي ناوي يعرس للولد عمتي گالتلي ،يريد يخطب لضيرم وصخر
باقر : زين يّسوي ،طاح لساني وانا اگله اخطبلك وما يرضى
يحجي أبوي ويباوع لضيرم
نجوى : شعده وما يرضى وحتى لو ما رضى عمي بعد قرر وتعرفه من يحط سالفة براسه
باقر : هذا ابنج گدامج واسألي ليش ما يرضى
باوعت أمي لضيرم وهوَ ياكل ولا يباوعلهم ،وانا عفت السالفه على النص وگمت اركض البس عباتي من سمعت هورن الخط شلت جنطتي وطلعت ،بس صعدت بالسياره شفت رقية گاعده بصف جفون ،ما رضيت اگعد بصف رقية
_ جا شني شو ماخذه مكاني ؟
رقية : انا شدخلني هيَ گعدتني
خزرتها
_ ليش گعدتيها ؟
جفون : مو زعلانه عليَّ أنتِ ؟ شلون تگعدين بصفي ؟
گعدت من گال الرجال تأخرنه ،وضليت الطريق كله افور بس اريد اكضها اطيح حضها والله
وبس نزلنه جريتها من عباتها وهيَ انسحلت بأيدي وانا شني لو بيدي اكتلها
جفون : ولج هدينيييي
وگفت گدامها اباوعلها تعدل بعباتها
جفون : شبيج تخبلتي ؟
_ شلون تگعدين رقية بمكاني ؟
جفون : جا غير أنتِ زعلانه
_ راضيني يالله
ضحكت ومشت وانا ركضت وراها احجي
_ راضيني لا تلگيني سامتلج خرزة وكركم
اندارت عليَّ مصدگه
جفون : حتى اسمج وراهن
فتحت عيوني مصدومه وهيَ ضحكت وجرت وجهي تبوس بخدودي وبس وخرت مسحت خدي ورجعت باستني
جفون : اذا مسحتيها امدج هنا واجفص بنص بطنج
مشيت گدامها ابيع ثگل وهيَ وراي
جفون : لوما مهددتني بالعزاز ما جان بست خدودج الجايفة
انداريت الها جبتها بكفخه گعدتها وزن ،لزمت رأسها وركضت تريد تلزمني وانا ركضت وهيَ تركض وراي واخذنه الساحه طول بعرض نركض وعبينه تطاير ورانه ،وبس سمعت الجرس دگ ركضت الصفي وهيَ وراي تتحلف بيَّ
وبس خلص الدوام وطلعت من المدرسة شفتها جاي تصعد بالخط وبس صعدت ركضت صعدت بصفها اضحك ورقية صعدت بصفي ومن التمن البنات كلهن رجعنه للبيت انا نزلني گبال بابنه ومشى ...
فتحت باب الشارع اسحل بروحي سحل وبس طبيت للمطبخ شفت أمي وريحانة گاعدات وعزيز واگف يحجي وياهن حاجيته منوره
خشمي
_ سويلي مجال اطب
وخر وانا طبيت شمرت جنطتي ونزعت عباتي وگعدت فحطانه چن جنت بالحرب مو بالمدرسه ولو هيَ حرب صدگ لو تنجح لو تخسر ،أمي تحجي وياي وانا شني حيلي رايح اكره دوام الضهري لان يومي ما اعرف منه شي واكره الصبحي لان اگعد من وكت ...
فتحت حجابي واحجي ويَّ أمي من سألتني
نجوى : خوما فاتج شي ؟
_ لا هم زين بس تحضيرات يوميه ،بس باجر عدي امتحان والاحد هم امتحان
نجوى : خوش ،جا تغدي واقري
هزيت رأسي ب أي وگمت شلت جنطتي ومشيت للغرفة بدلت ورجعت للمطبخ ،صبيتلي غده تغديت ورديت للغرفة طلعت كتبي وگعدت أقره ،والله تعبانه بس لوما امتحان شهري فلا جان قريتله والازمني هاي السنه الثانيه ،أبوي راد يبطلني لان رسبت بس لوما ضيرم چان صدگ انا مبطله هسه وگاعده اغسل مواعين
من تذكرت المواعين حطيتلي ورقة وقلم وصرت احفظ من كل گلبي ،الدراسه ولا المواعين مسوياتلي عقد مو عقده وحده ...
انا والليل الا خلصت وما عولت شوكت اشمر الكتاب وامد روحي احرك بجسمي المتكسر
فتحت ايدي وصرت ارافس من التعب بنفس الوكت طبت ريحانة من شافتني عبالها بيَّ شي
اجتني تركض وانا اخذني الواهس امثل واسوي روحي ملزومه ،بس من تذكرت هيَ حامل گعدت على حيلي وهيَ من شافتني گعدت لزمت گلبها تباوعلي
وتصيح
ريحانة : يمه الحگيلييي شو حور ما أعرف شبيهااا
ضحكت اباوعلها ومن شافتني اضحك باوعتلي تايهه يمكن حستني تخبلت ..!!
بالگوه حاجيتها من بين ضحكتي
_ مابيَّ شي والله بس جسمي متكسر وحركته
غمتني ومشت بدون ما تحجي شي وانا طلعت وراها الضحكه بعدها ما رايحه وكل ما اباوع بوجهه ارجع اضحك وهيَ ترجع تغمني شافتنه أمي وعاطت بينه الا جرينه عدل
الدنيا ليل وانا وحدي گاعده من ضوجتي ،مشيت طلعت هدومي مال مدرسه وطبيت للحمام غسلتهن وحطيتهن بنجانه وطلعت بره اشرهن
ويا ما طلعت سمعت صوت باب الشارع انفتح وكل ضني واحد من اخوتي فما درت وجهي وضليت أعصر بالقميص بأيدي ،شريته وكملت الباقيات ودرت حتى ارجع للبيت بس گمزت من شفت حق ساند ضهره على النخله البلحوش ويباوع ما أعرف وين بس مو عليَّ ،وانا من ثولي نشغت نشغه تجيب التايه بحيث على أثرها التفت حق وانا لان بلايه حجاب
جريت السدريه وخليتها على رأسي تنگط ماي بس
أهم شي اتستر ثوبي دلع شويَ
باوعلي من ضل يتلفت وعينه استقرت عليَّ ،ما نزل
عيونه وضل يباوع والا شافني أريد اركض أطب الا دنگ وصاحني
عبد الحق : حواري اوگفي احاجيج
بلعت ريگي والتفتتله اريده يحجي حتى اطب ،بس انا وياه ولو شافونه واحد من اهلي شراح يخلصني منهم
عبد الحق : انا والله ما أعرف بيج بالحوش أجيت لعزيز
لزمت السدريه حيل من يم رگبتي أخاف لا يبين مني شي
_ بس عزيز مو هنا
عبد الحق : أعرف هوَ گال تانيني بالبيت وانا أجيت
هزيت رأسي ب خوش ودرت وجهي أريد امشي
اطب جوه بس وگفني صوته من صاح بأسمي مره
ثانيه التفتتله اريده يحجي بس من ضل ساكت سألته
_ شنو ردت تگول ؟
حمحم يدير وجهه
عبد الحق : سلامتج طبي جوه الجو بارد لا تتمرضين
ما حجيت شي ومشيت أطب جوه بس تذكرت النجانه ورجعت اجيبها وبس انداريت لگيته يباوعلي وبس شافني رجعت دنگ رأسه وطلع مبايله من جيبه يگلب بي ،شلت النجانه وقبل لا أطب سمعته يگول..
