رواية لا أمان لك الفصل السابع 7 بقلم ورود الخالدي

يعمر:::

طلعت من بيتهم ..روحي بخشمي بودي افلش اي شي اشوفه كدامي دمرتني دمار..عود اني جاي وفايت بزودي  حقيقة جان قصدي بس اشوفها ولاجانت عندي  اي نيه تتطور لامور وتروح بهيج اتجاه..جنت رايد بس شوفتها من زمان مشايفها ..ومن اشوف امها واختها الزغيره يجن لبيتنا ..تبقى عيني عليهن بلكي جاية وياهن بس للاسف مجانت تجي ..حتى من انخطبت سناري توقعت تجي وانتظرت جيتها بس هم ماكو ..روحي طلعت من كطعت  الامل بجيتها..اي تاكدت هي بعد متوصل لبيتنا من شفتها حتى مفكرت تجي بحفلة عقد سناري الي هيه صديقتها تقريبا مكدرت اصبر كلت اروح اشوفها لو ادري مرايح..جانت اغلى امنية عندي ابوسها واعضعض خدودها الحلوات ..بس مو بهالموقف ولا بهالطريقة  خطية تكولي مفكرت بيه شنو احساسي من رجال غريب يفوت لبيتنا ويبوسني ويحضني مفكرت انه هذه اول خطوة تحس بيها البنيه انه براءتها دتنسلب منها شويه شويه اويلي شلون حجي يوجع...حقها والله حقها بكل حرف كالته..هسه اني واحد سربوت ومكسر كحوف الدنيا على راسي وممخلي بنيه تعتب عليه هي شعليها شنو علاقتها..بطبيعتي الخايسه..اصلا هي كل ما اشوفها تذكرني بانه اخلاقي متعجبها..لا والكارثة تكولي ما احبك لو تصير نبي وينزل عليك الوحي..اووووف..اوووف قهر بس الله يدري شلون قهر بكلبي..من وره حجيها..بله اني عاقل مخبل تالي عمري لازك لبت الناس تعالي حبيني ماحبيني وهي تصدني واني مجلبلها لك شبيك يعمر من شوكت انت ماعندك سالفه وتركض وره بنات الناس..الاشراف ..انت حقك بت ليل..تكضي وياها ربع ساعة وتعوفها هذا الي تستاهله ...واحد مثلك سمعته زفت وريحة اخلاقه الخايسه واصله السابع جار شمفكر اكو بت اوادم تحترمك شتريد منها ..لنفرض خليتها تحبك اي وبعدين ..من تكسر كلبها وتعوفها هي هاي الرجولة برايك كبر طمك عمرك فوك٣٣ وعقل ماكو براسك..خطية تكولك .شتستفيد من تخرب اخلاقي بتصرفاتك اي هذا معنى حجيها..بس لا....لا والله ابد معندي نيه اخربها اصلا حيل عاجبتني قوتها واخلاقها وثقتها بنفسها والتزامها..يمكن لو تكولي احبك ..من صدوك..الكفها وانهزم بيها لاخر الدنيا واكعد واسكت بس اكابل عيونها..بس شسوي كطعت اي امل اليوم بكلمة احبك منها اي كالتها بوضوح ما احبك لان تفكيرك سطحي وحياتك كولها فساد وعربدة ومعندك اصول ولاحرمة ..صح هالكلام ..اذاني بس كل حرف طلع منها حقيقة ما اكدر انكرها..بعدني مواصل بيتنا دك تليفوني رقم حسين ..

الوو شنو السالفه صار اسبوعين ماكو!!

مشغول هالايام

وهسه هم مشغول..كولنا مجمعين بشقه مصطفى 

اجي..بس..مو مال شقه مختنك شويه واريد نكعد بره ع الشط؟؟

اي نكعد ع الشط...الجو يخبل اليوم يله تعال نطلع كلنا الليلة..

ورحت وياهم طلعنا كعدنا بكازينو ع الشط..يعني عادي هاي الكازينو الشباب يكعدون يشربون بيها.. وكعدنا حسين ومالك محضرين مزة وشرب ..اني احس نفسي مغثوث ما الي خلك حتى اسولف ..وبطبيعتي ما اشرب هوايه هيج بيك لو بيكين واكتفي..لان مجرب نفسي اذا شربت هوايه اسكر بسرعة واخرب حتى ويه جماعتي فمتحذر من الشرب الهواية..بس من شربت اول بيك ثاني بيك مكتفيت جنت حيل مغثوث لان حاس نفسي خسران فد شي غالي عليه..بقيت. اشرب مصطفى كلي

يعمر هوايه شربت كافي..

مهتميتله يمكن شربت البطل كله وقبل ميخلص مدريت بالدنيا ..معرفت شصار مصار كعدت الصبح لكيت نفسي بالتوقيف..استغربت شعندي بالتوقيف ليش موقفيني ..كل الي اتذكره جنت البارحة اشرب ويه جماعتي شصاير بالضبط..لكيت ولد متمدد بصفي كتله:

شوكت جابوني لهنا..

جابوك نص الليل ..جنت حيل ثكلان وتصيح ..كلبت الجو حتى مخليتنا انام..

حيل ضجت من حجيه وعرفت اني البارحة هوايه ثكلت واكيد مسويلي طلابه حتى موقفيني ماكو نص ساعة واجه صفوان..اول مدخل يمي كلي:

يعمر تريد اجلطة لابويه شيخلصها طلابتك ابويه بره ميت من القهر ويتوسل بالضباط حتى يقبلون الكفيل!!

لك ما اتذكر شي شمصخم شملطم ما اتذكر والله

متتذكر ..شنو متتذكر شلك بيها هاي كالب الكازينو ..وكاسر البطل براس واحد من الولد واللاخ مورم وجهه ومخرب ملامحه شيفضها هالطلابة ..وليوين تبقى هالشكل ويه هالشله التعبانه الي..مجايبليك غير الاهانه ..يعمر انت غير جبيرنه غير انت الي تنصحنا مو احنا الي ان انصحك 

صفوان ما ادري والله ثكلت حيل وما ادري شجنت اسوي!!

والقبض شنو ..ابويه بشيباته يتوسل بالضباط ..ترضاها على ابويه يعمر..وياريت تطلع بكفالة وتخلص هم ورانه اهل..الولد الضاربهم وجيب المشيه ورد المشيه وهم ابويه راح يشبع طن قهر.. بسببك... 

حجه هالحجي وراح من راح بقيت اكل بنفسي  خررب ليش شربت هوايه وخربت الدنيا غير اعرف نفسي وماخذ حذر ..شيخلصها هالطلابة وحتى لو خلصت مراح اخلص من الملامة مالت ابويه ادري بيه هسه كلبه يفور....

طلعوني بكفاله بنفس اليوم بس ابويه اكل كلبي اكل وحقه ما الومة ابنه الجبير وهيبة بيته جايبله طلابة مال سكاره..ومخلصت الطلابة لابيوم ولا بيومين هم مشيات وكعدات وفصلت الولد فصل دم يله تنازلو عني وانفضت . ..والي عرفته انه من الولد الي جانو بالكازينو انه جماعتي النواقيص اول متعاركت وجتي الشرطة ولا واحد منهم ضل انهزمو ..مثل فص ملح وذاب..حتى ثاني يوم الصبح ولا ناقص منهم لحكني للمركز...اي هي هاي صحبتهم صحبه كاس وونسه وسحب فلوس ..وره هاي الطلابة عرفت اوادمي وعرفت انه علاقتي بيهم مجايبتلي غير الاذيه والسمعه الزفت والملامه من ابويه اصلا مستحي اخلي عيني بعين ابويه..صعبه حيل صعبه ابنه الجبير يخلي يتوسل باليسوة والميسوه حتى يتنازلون عنه وتنسد السالفه بعدين الشرب عمره مطول شارب احد بالعكس اليشرب محد يحترمه يحجون كدامة شكل ووراه شكل وقررت اترك المشروب واعوف شله النواقيص الي جنت مصادقهم وابدي صفحة جديدة من حياتي مابيها غير شغلي وعائلتي ورضا ابويه المسكين الي حتى شوفه ديضعف يوم بعد يوم..وبالنسبة..لامنية هاي هيه هم قررت اعوف البنيه بحالها ..كافي القهر الي سببته الها ..صح متطلع من بالي ومن افكاري بس شسوي يعني متريدني بحياتها قابل..اجبرها كوه تحبني..لا مترهم 

وهي اصلا بعد موصلت لبيتنا نهائيا..يمكن اكثر من ٣شهور مشفتها..

امنية::::

خلصت نازك شهر الخامس من الحمل حيل فرحت من جتنا يا الله صايره عدها بطن زغيره فدوة تخبل بالحمل كعدنا وسولفنا ورادت مني افصللها نفانيف مال حوامل..وبعدين كالت:

خيطيلي جراجف لجرباية لولي

 لان اخذت سونار وطلعت حامل ببنيه وقررت تسميها ليال 

اي غير تشترين الجربايه ونعرف قياسها حتى افصل!!

اي عندي الجربايه عمها اشترالها جرباية..تخبل هي جرباية وهي هزاز!!

عمها اشترالها!!؟

اي يعمر...فدوة الكلبه من عرف هيه بنيه اشتره جربايه تجنن..شكد حباب وذواق؟؟

ههه منو الحباب يعمر!!؟

اي يعمر..شبيج تحجين عنه باستهزاء!!

لا استغفر الله ليش استهزء بس هو مو حباب يحاول يسوي شغلات زينه لعائلته يغطي بيها على سيئاته!!

لا..لا حرام عليج يعمر حيل حباب اصلا هو..عمود بيت عيالي ..

اي عمود..بيتكم السكير!!يمعودة ذاك اليوم مسويله طلابه شكدها ومفشلكم!!

هاي انتي وين تحجين تره يعمر ترك الشرب من زمان وحتى جماعته عافهم وره الطلابة..وهو حتى من جان يشرب ..جان حباب حيل وهسه من ترك الشرب وعاف جماعته عمي وعمتي ..حيل مرتاحين من ناحيته اصلا تغير عبالك صار انسان ثاني!!

هههه..ولا اصدك هالطفرة الدرامية ....بس ع العموم الله يهدي العاصي..نتمناله الخير

بقت عدنا يومين وراحت..وره فتره ماما كالت خالتج جهزت كولشي واحتمال راس الشهر ياخذوها لسناري يعني عرسها قريب..بصراحة هالمرة فكرت اروح مو بس لخاطر سناري لا والله عندي فضول اشوف التغيير الي صار على يعمر والي اصلا ممقتنعه انه هو ممكن يتغير..وقبل الحنه مال سناري بيوم اتصلت بيه وكتلها اكيد اجي ..وضلت تلح انتي كلتي ابقى يمج من الصبح لليل فانحرجت لان اني فعلا وعدتها بيوم الي مجيت بي بالعقد وكتلها وعد مني بيوم الحنه والعرس ابقى من الصبح لليل يمج.. وفعلا ثاني يوم الصبح رحت اني وماما ورفوله لبيت عيال نازك طبعا الصبحيه كولها نضحك ونسولف ومريم خطية تنظف وحدها وتعزل بالبره وتلمع بالثريات والجام خلت البيت يلهث رغم همه بيتهم نظيف بس بيوم الحنه كلبت البيت كوله احنا كاعدين بالصاله صار وقت الغدة بينما دنتغدة اجه يعمر..سلم علينا.

السلام عليكم 

ماما كالت ؛

هله بعد خالتك..

شلت راسي شافني ابتسم وبعيونه نظره تشبه نظره ..شخص  يتعرف بيه لاول مرة وكلي:

شلونج امنية ..عاش من شافج!!

الحمد لله ..بخير..

وكعد يتغدة عادي حتى نظراته الي متغيرة اي احس هوايه اشياء متغيرة بنبرة صوته ونظرته يمكن فعلا الله هداه وتغير وقرر يعاملني معامله عاديه حالي حال اخواته ومرت اخو نازك..الحمد لله تطور زين لحد الان....وره الغده راح كعد بالصاله اخذ الريمونت يكلب بالقنوات طلع  فلم اجنببي وبقه يباوع ..عاد البنات بس صار الساعة بالوحده ونص بدلن كولهن ..ام يعمر شافت مريم تبدل تريد تروح وياهن للصالون كالت:

يااا مريم وين رايحة..

ماما غير اروح ويه البنات للصالون هم اريد اسوي شعري. 

ماماتي بعد شويه تجي الكوشه مال الحنه  والغراض مال التقديم..شنو كولجن ترحن واضل وحدي ارتب!

والله انكسر ظهري من الصبح لحد الان اشتغل!

ادري بيج تعبتي ..بس شسوي مرت اخوج هم تريد تروح ويه اختج منو يدني التخم وياي ويرتب الغراض..

بصراحة انكسر خاطري على مريم فكلت لخاله:

خاله اني اضل اساعدج ..خليها تروح..

ياااا وانتي مترحين تسوين شعرج ومكياجج وياهن!!

لا..لا خاله ما اروح..اصلا اني ما اروح بالمناسبات!!

ممعقوله!!

ماما كالت:

اي لتعبين نفسج وياها هاي..لا تتمكيج ولا تسوي تسريحات تخيطلها نفنوف شلون مجان وتمشط شعرها وتكعد ..بتي واعرفها!!

من حجت ماما هالشكل شفت يعمر التفت عليه بعيونه ابتسامه خفيفة ورجع يباوع ع التلفزيون ..ماما كالت:

خليهن يرحن هيه تساعدج اني هم اروح لبيت اختي هسه تزعل وتكول جنتي ابيت اهل العروس واني اختج مخليتني وحدي

ماما راحت هي ورفل والبنات هم راحن للصالون بقيت بس اني وخاله وصفوان ويعمر..عاد الولد هم ساعدونه..دنو التخم وشالو التحفيات ومن جابو الكوشه مال الحنه هم نصبوها ..بعدين جابو كيكه جبيره وقطع كيك مفرد بعلب وببسي وعصاير ورتبا اني وخاله صينيه مال حنه..ومن اقترب موعد الحنه الولد وعمو راحو كعدو بالاستقبال وبدن البنات يجن جوارينهم وخالاتهم متوقعت هالكد ناس حيجون...دخلت بدلت ولبست نفنوف جويتي جنت جايبته وياي رتبت شعري وخليت مكياج خفيف من مكياج نازك لان بدلت بغرفتها..من طلعت خاله كالت:

خاله امنية لزمي  الكيك والعصاير وزعي انتي لان هوايه جهال وتصير خربطه ولو تعبتج اليوم

لا خاله عادي..

بقيت اني بالمطبخ ..اهتم بالتوزيع..وطبعا قبل منوزع عزلت كم قطعه من الكيك المفرد وكارتون عصير ضميتهن جوه بالكاونتر كلت..هوايه جهال وكل شويه يدخلون للمطبخ مياكلون بس يخربون الكيك واني ما اعرفهم استحي  من امهاتهم  خلي اعزل منه احتمال من تخلص الحنه عمو والولد هم يردون كيك  طبعا همه هوايه جايبين حلويات وكيك ..بس نازك هم فاتت للمطبخ اخذت كم قطعه لصفوان كالت يحب الكيك..المهم صارت الحنه تخبل وكل شويه يجن نسوان وبنات الصاله نملت بحيث كوه افوت اوزع .. للكاعدين وهالكد مالنسوان والجهال هوايه مضل اي شي من الكيك بس الي ضمينتهن اني جوه ..طبعا الديجي مشتغل ومريم تصور فديو للحنه ونازك تلتقط صور بموبايلها وبنات خالتي يركصن اني اتفرج واصفك كولش حلوة ..اللمه جانت وسناري طالعة تخبل بالبدلة مال الحنه..وخلصت الحنه ماما صاحتني كالت ابقي هنا باتي يم البنات لان هي راح تبات يم خاله ع ابو عرس ابنها ومتكدر تعوف اختها بهيج يوم المهم راحت ماما وخالتي وفرغت الصاله وفاتن مريم ونازك يبدلن بقيت بس اني ومريم ..نعزل ونجمع اغلفة الجوكليت وقواطي الببسي وكراتين العصير الفارغة وشفت عمو اجه كال:

عمي كتلني الجوع ..شنو اليوم تحتفلن للصبح؟؟

خاله كالت اي هسه اصبلك عشه..

جيبلي عشاي للغرفة مابيه اكعد بالمطبخ وفعلا صبتله واخذت صينيه لغرفتهم  وره شوي جوي صفوان ومنقذ ويعمر صفوان فات الغرفته ومنقذ فتح الثلاجة ويعمر شاف الكراتين فارغة كال:

هاي شنو مخليتولي كيك غير اكلب الدنيا عليكم ..!!مشتري الكيك ب١٧٥الف ومتخلولي منه؟؟

بعده يحجي خاله سمعته فاتت للمطبخ:

وشنسوي اذا النسوان وجهالهن انكلبن علينا ..اصلا الجهال اكثر من النسوان مخلو شي..

عاد اني كلت:

لا خاله اني عزلت هوايه كيك وعصير وضميتهن جوه بالكاونتر توقعت الجهال ميخلون شي فعزلت كم قطعة كيك للولد!!

عفيه عليج..والله نادرة وتحسبين حساب كولشي مريم حارت ابطنها ومرت صفوان تضمضم لرجلها..

وشفته كعد يم الميز خاله كالت لمنقذ 

تعال شيل الطبلات رجعهن للاستقبال راح منقذ يشيل طبلات هو وخاله اني دنكت فتحت الكاونتر طلعت كيك وعصير خليتهن بصينيه وقدمتهن ليعمر..ابتسم:

اي ..همزين احد فكر بيه ..وعزلي حصتي. 

اني هم ابتسمت كتله:

الف عافيه 

وسمعته كال بصوت ناصي حيل :

انتي العافيه مالتي..

طبعا كولش صوته ناصي بس اني سمعته فكتله :

شنو؟؟

هو بسرعة بدل كلامه وكلي:

كلت الله يعافيج؟؟

باوعت بعيونه هو هم باوع بعيوني بس مطول..دنك والتهه ياكل كيك اني طلعت كعدت يم سناري ومريم بغرفه سناري ..وبقينا نسولف ونعيد الفديو مال الحنه نتفرج عليه..وتعشينا بغرفة سناري وبقينا نسولف للصبح منمه...وثاني يوم هم انخبصنا بترتيبات العرس وطبعا وره الزفه بقينا كولنا يم بيت خالتي بيت اهل العريس وخلص العرس بس وره العرس هوايه تغيرت امور حسيت ..يعمر تغيرت معاملته خصوصا هوايه مناسبات وصدف خلتني اروح اكثر من مرة ويه ماما لبيت اهله..لان علاقتنا بيهم صارت اقوة همه ماخذين اختي وخاله ماخذه منهم سناري فعلاقتنا قوت وصار عادي اروحلهم خصوصا اني بعد ما اخاف منه بعد التحول الواضح باخلاقه وياي اي هوايه تغير وراحت من ملامحة نظرته المستهترة المغروره بالعكس كلما تصير عيوني بعيونه احسن نظرته نظره اهتمام وحنيه..ومرات التفت الكا يباوع عليه ومن انتبه..يسوي نفسه يباوع بغير مكان ..ميخالف مادام مؤدب وحباب وميتجاوز وبعد ماكو بينا مشاحنات خلي يباوع بعيونه قابل امنع عيونه مني..ومرت ايام واشهر ..هو على حاله هاديء ويتصرف وياي طبيعي حالي حال نازك ومن خلال علاقتي الى قوت باهله عرفت انه كلام نازك صحيح وانه هو شايل حمل اهله على جتافة كل ما اصادفه يدخل للبيت محمل علاليك ومسواك لاهله حتى اخته مريم تكول كل شهر مخصصلي فلوس اشتري ملابس وحتى اخوانه هم يخلي بجيوبهم فلوس رغم عمو شكد يحجي على صفوان يكوله شوفلك شغل لتضل معتمد على يعمر شيصير يعمر شايلنا كولنا..هم يريد يشوف حاله ويتزوج ويستقر خو ميضل حاير بمسؤوليتكم....بس نازك تكول صفوان كلما يشتغل شغله ميستقر يومين ويبطل..ويرجع ياخذ من يعمر مصرفه ومصرفي وحيل ضايجة من هالموضوع تكول عيب من يعمر يصرف عليه وعلى رجلي..وبقت الامور ماشيه طبيعيه الى ان اجه يوم ولادة ..نازك طبعا خطية نازك شبعت ضيم بالولاده واني وماما من خابرنه صفوان العصر وكال نازك بالمستشفى رحنا ركض ..من العصر تطلك وتتوجع الى ان صار الساعة بثمانيه يله جابت وكولنا كاعدين بالممر ننتظر ولادتها بس ماما وخاله ام صفوان جوه يمها..ومن جابت نقلوها لغرفة ثانيه بس الدكتوره كالت الطفله تعبانه لازم تخلوها بالخدج فتره لان ممكمله كل ايامها..واخذوها للخدج خاله خابرت عمو..وبشرته بعدين اتفقن تبقى ماما تبات يمها..وخاله ترجع للبيت وفعلا اخذها يعمر وراح  عبالي اني هم اضل يمهن شو السسترات كالن بس مرافقه وحده تبقى..رفوله كامت تبجي بالكوة قنعنا السستر ات تضل ويه ماما ..فكلت لماما:

يوم اني راح ارجع اقفل البيت واروح ابات يم خالتي!!

هي وين خالتج غير الظهر خابرتني ماخذه جنتها والبنات ورايحة للزياره يباتن هناك!

لعد ابات ابيتنا اقفل البوب وابات هناك!!

صفوان كال:

شنو السالفه خيتي ..شنو تباتين وحدج  باتي عدنا يم مريم ..شلون نخليج وحدج بالبيت

اي ماما روحي ويه..صفوان..

ماشي ..

صفوان حاجه ماما كلها:

اجيبلجن عشه ..اكل المستشفى مينوكل:

اي بعد عمتك لاتتاخر ..بعدهم يحجون وشفت يعمر رجع  بس شافته ماما كالت:

خاله يعمر عود روح وياها قفلو بيتنا واخذها يمكم تبات يم مريم..

اي صار خاله:

وطلعنا صعدنا اني وصفوان بسياره يعمر..شفت يعمر طلع فلوس وانطاهن لصفوان..

روح جيب عشه مرتب لمرتك وامها وارجع بتكسي للمستشفى هسه كتلهن الجوع 

وكف براس الفرع ونزل..صفوان ..وافتر بالسياره..اخذني لبيتنا اول موصلنا,كتله:

اكولك انت روح اني ..ابات ابيتنا معليه شي اقفل البوب وانام..

هههه..موصاحيه والله انطيني المفاتيح اني انزل اقفل البيت ..

لا ..ابقى ابيتنا احسن!!

اهووو..فتح الباب ونزل كلي:

يمعوده انطيني المفاتيح ..شنو مصدكه اخليج تباتين وحدج؟؟

شفته مصر كتله:

لعد انزل اخذ دشداشه انام بيها. 

يله استعجلي..نزلت فتنا لبيتنا هو واكف بالصاله واني دخلت لغرفةماما طلعت دشداشه ..احس صعبه ابات عدهم خصوصا نازك بالمستشفى ..يعني محد من اهلي عدهم اشوفها زحمة ابات وحدي ابيت عيال اختي فكتله:

يعمر..والله معليه شي باب الصاله مالنه اذا انقفل مينفتح ابد..اقفله وانام هنا..روح انت ..هسه!

ابتسم وباوع بعيوني:وكال:

لج انتي من كل عقلج اروح واخلي حبيبتي تبات وحدها!!!

حبيبتك!!!؟؟؟؟؟؟؟؟؟؟؟؟؟

اي حبيبتي 

احبتي //بعد هذا الاعتراف المباشر بالحب..ماذا تتوقعون هل لذلك الاعتراف وقع وتأثير في قلب بطلتنا الجميلة؟؟ هل سترحب بحبه لها؟؟ ام لافكارها السابقة عنه رأي اخر!!!؟؟