رواية اسميتها جميلة الفصل السابع 7 بقلم جنات محمود

  


رواية اسميتها جميلة الفصل السابع بقلم جنات محمود


نفس الرقم هو مستحيل أنساه..ونفس العربيه حفظتها أكتر ما أنا حافظه أسمى... طب وهو؟ معتقدش إنو هو بس ممكن لانو سمعت ف الأخبار إنو سافر تركيه لعند دلوقتى بقالو سنتين معقول ممكن يكون رجع؟ ..
وأنا مالى اصلاً ..

بس أول ما شفت العربيه وانا مش تمام..
_ ساره.. ياساره..
إنتِ معايا يابنتى..
نسيت اصلا مصطفى على الخط.. ،أيوا أيوا أنا معاك ..بس هقفل بقى عشان أركب تاكسى وأخلص مشوارى علشان أرجع البيت لأنى تعبانه شويه

قفلت معاه ووقفت تاكسى وركبت وروحت المقابر..

وقفت قدام قبر المرحومه مرفت أحمد نجيب..أمى...
قعدت قدام القبر قرأت الفاتحه ليها ودعيت لها بالرحمه 

بقالى كتير منزلتش القاهره.. وحشتينى ووحشتنى ضحكتك وكل حاجه متعلقه بيكى.. بدعيلك علطول وعمرك ما غبتى عن بالى .. بتمنى تكونى فى مكان جميل يليق بطيبه قلبك.. وصبرك على إبتلاكى فى الدنيا.. وفضلت بقى شويه أحكيلها على اللى حصلى وإنى بقيت دكتوره زى ماكانت بتحلم إنى أكون وكده.. .
قُمت الوقت اتأخر قفلت عليها الباب بتاع القبر وجيت أمشى بس وقفت على صوت حد بيبكى جاامد أوى.. صوت حد بجد حزين على اللى فقده.. فضلت واقفه شويه متأثره وكنت همشى لقيت فجأه الصوت أختفى..

قربت من القبر ودخلت لقيت واحد واقع مغمى عليه.. قربت منو بسرعه بلف راسو ولما شفت وشو قمت مخضوضه... رجعت لورا بصدمه من الشخص ..هو بعينو.. يوسف.. بصيت على أسم المتوفى.. لقيتو .رحمه 
مكملتش رحمه إيه لأنى متأكده إنها خطيبتو .. 
أخدت شنطتى ولفيت ضهرى ومشيت.. لكن وقفت وبصيت ليه تانى. حرام ،حرام أسيبو وأمشى وكمان مهنتى متسمحليش بكده... بس هو خبطك وحرمك من إنك تشوفى أمك.. رديت على نفسى.. ماهيا كده كده كانت ميّته.. محدش بيقف قصاد الموت وكمان أخدت تعويض عمرى ماكنت أحلم بيه قبل كده .أستغفرت ربنا ورجعت تانى قست النبض لقيتو سليم .خرجت إزازه مايه حاولت أفوقه بيها  مفقش.. أخدت إزازه الريحه بتاعتى ورشيت على إيدو عشان متمسكش فى هدومى أو حاجه لأنو حرام  وقربتها منو. وفعلاً بعد خمس دقايق فاق..
فتح عينو براحه كده وأول ما فاق لقانى فى وشه...

بص ليا بستغراب أعتقد شبّه عليا بس مفتكرنيش..

قام بصعوبه وبعدين سألنى..
هو حضرتك مين؟.. أخدت حاجتى وقولت له.. 
أنا وحده كده..
_ وحده كده؟ 
بصيت ليه .. أيوا وحده كده إيه مش باين إنى وحده ولا إيه.. لقيتو مستغرب أوى فرديت عليه وأنا ماشيه..

خلى بالك من نفسك يا دكتور وأحمد ربنا إنى لحقتك وأدعى بقى لما يحصل لك حاجه تانيه بعد كده متقعش فى إيدى ..ومشيت..

قال بستغراب ، عبيطه دى ولا إيه؟!

تواصلت مع صحبتى ملك اللى هسكن معها فى الفيله فى التجمع ... لكن وأنا فى الطريق .. قابلنى ست لقيتها وقعت مره واحده على الأرض منغير ولا نفس.  أبنها الصغيّر كان معاها وقعد يعيط جامد ومنهار حرفياً على والدتو جريت عليها اتأكدت أنها بتتنفس لكن بطئ جداً قست نبضها لقيتو كذلك .. 

بصيت للناس أطلبو الاسعاف بسرعه لأن الست كانت حامل.. أسعفتها وعملت كل اللى أقدر عليه لعند ما عربيه الأسعاف جت وأخدوها جيت أركب معاها الدكتور حاول يمنعنى..

أنا الدكتور ساره طبيبه جراحه وافق إنى أرافق المريضه..
وصلنا المستشفى وكانت الحاله لازم تدخل العمليات..
  

ممرضه قربت من الحاله وقالت لزميلتها شوفى الدكتور عبد الرحمن بسرعه لازم تدخل أوضه العمليات دلوقتى ونادى دكتوره النساء كمان بسرعه..

للأسف الدكتور عبد الرحمن فى العمليات معاه حاله..
بصيت للست الدقيقه ممكن تفرق فى حياتها..

أنا هدخل أوضه العمليات مع دكتوره النساء.. كانو هيعترضو..

 وملكوش دخل انا اللى هتحمل أى ضرر هيحصل يلا معندناش وقت .. وبالعفل جت دكتوره النساء وكام ممرضه ودخلنا أوضه العمليات..

وكانت حاله الست كالتالى

جدار الرحم بيتفتح أو بيتمزق (بيحصل أكثر لو كانت عاملة قيصريات قبل كده).
​النتيجة: نزيف داخلي حاد وآلام شديدة جداً تؤدي للإغماء والصدمة (Shock).
​ليه عمليات؟ خياطة وتصليح الرحم فوراً وإنقاذ الجنين.

*** 

ركبت عربيتى ورجعت البيت غيرت هدومى ولبست هودى أسود برضو بقالى سنتين مغيرتوش ولو غيرتو لأى سبب بيكون أزرق غامق بنى غامق برضو الالوان الكاتمه عامةً .. وأنا خارج قابلنى بيت رحمه بصيت عليه.. وافتكرت وأنا واقف على الباب مستنيها تخرج عشان أخدها ونروح الكليه... وبعدين بصيت للجنينه.. لما أصررت نعمل خطوبتنا فيها .. زى ما كنا بنلعب فيها سوا ونذاكر برضو سوا أصررت نعمل خطوبتنا فيها.. لسه فاكر وشايفنا هناك اهو وأنا بلبسها الدبله وهيا فرحانه.. 
بس أنا متأكد إن ربنا شايل ليا الخير فى مكان معرفوش.. سلمت على أمى وقولتلها هاروح المستشفى لبابا أسلم عليه وكمان أسلم على عبد الرحمن صاحبى هو أكيد هناك..

ركبت عربيتى ورحت على المستشفى..
وصلت طلعت فوق سالت على والدى طلع فى العمليات وعبد الرحمت كذلك.. لفيت بضهرى وخرجت أشوف المستشفى وكدا.. لقيت بنت محجبه وأقفه قدامى خلعت الماسك وفضلت باصه ليا.. هيا نفسها البنت اللى كانت فى المقابر.. غريبه اوى البنت دى حاسس إن وراها قصه غريبه أنا معرفهاش..
بابا جه جنبى وسلم عليا بلغوه بوجودى ولحسن حظى كان لسه خارج من العمليات..

يوسف وأحشنى أوى يا حبيبى..
_ وانتَ كمان يابابا وأحشنى اوى أوى بجد..

قربت مننا ممرضه.. وقالت..
دكتور محمد الدكتور ساره اللى جت مع الحاله الطارئه ودخلت معاها العمليات.. بصيت أنا وبابا ليها.. 
ولقيت بابا بيقول بصدمه.. ساره؟! ..أبتسمت كده وقربت مننا وبصت لبابا بثقه..

هيا بعينها يا دكتور..
حسيت بابا أتوتر كده ومصدوم..
إنتِ بقيتى دكتوره؟
_ أيوا بقيت دكتوره مش أنتَ كنت قايل قبل كده إنى ذكيه وأنك شايف إن ييجى منى.. أهو جه يا دكتور وبقيت دكتوره.. ياترى بقى هتوفى بوعدك ولا كان عرض وخلص!؟..

سألت بابا بتسغراب ..مين دى يابابا أنتَ تعرفها؟..
بابا كان لسه هيتكلم لكن هيا سبقته.. 
أعرفك أنا بنفسى يادكتور.. 
معاك الدكتور ساره.. ولا تحب أقول جميلة أحسن؟!

"يوم الحادثه"..

كنت لسه مغيبه عن الوعى لكن سامعه صوت بيتردد فى ودنى.
أرجوكِ يا جميلة فوقى..
وكمان باباه أول ما شفنى فى المستشفى.. قال لى يا جميلة.. شكلهم كانو فكرين أسمى جميلة..

بصيت ليوسف وهو مصدوم...
إنتِ... إنتِ جميلة؟!.

لا لا يا دكتور ما قولتلك أسمى ساره  
بابا سألها بستغراب.. جايه ليه؟ إنتِ مخدتيش حقك وأتفقنا خلاص؟ ..

والله أنا لو أعرف إن المستشفى دى تبعكو أصلا كنت سبت الست تموت فى الشارع وروحت..

أتكلمت جد بقى.. متقلقش يا دكتور أنا بجد مكنتش أعرف إن المستشفى دى بتاعت حضرتك وكمان أنا مش ناسيه اللى حضرتك عملتو معايا مهما كانت الظروف اللى أتقبلنا فيها ومهما كان اللى حصل مقدرش أوعدك إن أنا مش زعلانه خالص أو نيتى صافيه أوى يعنى بس... بس عمرى ما هنسى وقفتك جنبى فى الوقت اللى أهلى نفسهم سابونى فيه.. وبجد بجد شكراً ليك لولاك مكنتش هبقى ساره اللى وأقفه قدامك دلوقتى.. الله أعلم حالى كان هيكون أزاى بس أكيد مكنش هيكون زى حالى دلوقتى.. وآسفه لو كنت دخلت العمليات وأنا ماليش الحق فى ده بس الحاله كانت طالبه تدخل عاجل ومقدرتش مش أساعد.. شكرا كمان مره. وبعدين بصيت ليوسف ..ومشيت لكن باباه وقفنى...

طب.. طب على فكره بقى.. يعنى أنا عرضى لسه شغال و وعدى ليكى جاهز أنفذه دلوقتى..

فكرى وردى عليا بابى لسه مفتوح ليكِ.. 
بصيت ليه وقولتله..
أوعدك يا دكتور لو ملقتش شغل هفكر فى الموضوع..ومشيت..

أنا مش مصدق ..دى جميلة؟.. يا بنى ما قولتلك أسمها ساره جميلة مين دى اللى ماسك فيها.
بصيت عليها لعند ما أختفت هيا دى جميلة شكلها أتغير خالص واتحجبت لبسها محتشم حاجات فيها غيرتها ولكن للأحسن! 
كان نفسى رحمه تكون محجبه مكنتش حابب يتوفاها الله وهيا على معصيه..
ربنا يرحمها ويهدى نساء المسلمين.

*** ركبت تاكسى وأنا بتمنى ربنا يعدى اليوم ده على خير بقى وأروح بجد ميحصلش حاجه تانى.
الحمد لله وصلت التجمع ولقيت صحبتى ملك ووصلت البيت بسلام صحبتى كانت مأجره البيت وعايشه فيه لوحدها عشان شغلها وأهلها كانو فى حته جنبها بس بعيده شويه وانا اصريت إنى أدفع الاجار معاها ونقعد سوا الفتره دى بدل ما أفضل لوحدى لعند ما أرجع الاسكندريه تانى.

غيرت هدومى وصليت فروضى اللى فاتتنى للأسف ولعند دلوقتى مأكلتش أي حاجه ..مصطفى رن فا خرجت برا فى الجنينه أكلمه وأنا بتمشى فى الهواء.. 
وانا بكلمه لقيت فجأه كلب بيجرى عليا بسرعه أوى وأنا أصلا عندى فوبيا الكلاب..

جريت بس أتكعبلت فى هدومى ووقعت فى الأرض والكلب وق جنبى وضلت يعمل صوت جامد لعند ما جه صاحبو مسكو وحاول يساعدنى بس أنا مبلمسش رجاله قومت وأنا ماسكه ضهرى وببص للى قدامى عشان أشتمه لقيت أخر حد أتوقعه..

أنتَ!
إنتِ!


شكرا لزيارتكم عالم روايات سكيرهوم

تعليقات