رواية ديون النبض الفصل السابع
بصيت لدكتورة جيهان وقلت لها:
وعد: «لا يا دكتورة، حضرتك إحنا درسنا في الكتاب الخاص بالجراحة إن تشخيص الحالة بيعتمد على مجموعة من الأعراض، ودي كل الأعراض الموجودة في الكتاب.
حضرتك نسيتي تذكري العرض ده، والعرض ده كمان، مع إنهم مهمين جدًا، ومن خلالهم بنقدر نشخّص حالة المريض بصورة دقيقة.
لكن بالشكل ده ممكن نشخّص حالته على إنها مرض تاني خالص، وده ممكن يؤثر على حياته ويعرّضه للخطر».
بصتلي بنظرة كلها غضب وقالتلي:
د. جيهان: «وأنا قلتلك ما تجادلينيش».
رديت عليها وأنا بحاول أوضح وجهة نظري:
وعد: «بس أنا ما جادلتش حضرتك، أنا شايفة إن معايا الحق. والكلام ده مش جايباه من عندي، كل الأعراض اللي ذكرتها لحضرتك موجودة في الكتاب، وفي دكاترة وكتّاب كتير أكدوا على أهميتها».
بصتلي باستنكار وقالتلي:
د. جيهان: «لا، وكمان جريئة؟ يعني إنتِ اللي كنتِ بتتكلمي مع صاحبتك، ودلوقتي بتجادلي؟ وبتجادلي مين؟ بتجادلي أستاذة دكتورة من أوائل المتخصصين في قسم الجراحة والقلب!».
بصيتلها وقلت لها:
وعد: «حضرتك ليكي مكانتك طبعًا، بس ده ما يمنعش إن أي حد ممكن ينسى أو يغلط، مهما كانت مكانته».
في اللحظة دي، كل الطلبة اللي حوالينا بصوا علينا، وحتى الدكاترة المشرفين والمعيدين بقوا متابعين الحوار باهتمام. واضح إن محدش كان متوقع إن النقاش يوصل للدرجة دي.
دكتورة جيهان بصتلي بغضب شديد وقالتلي:
د. جيهان: «اتفضلي اطلعي بره، وما تحضريليش تاني!».
بصيتلها وأنا مش فاهمة إيه اللي حصل، ولا ليه انفعلت عليا بالشكل ده.
أنا كل اللي كنت عايزاه إني أفهم وأتعلم، وكنت مقتنعة إن من حقي أدرس صح وأعرف كل التفاصيل اللي تخص حالة المريض اللي قدامي.
وعد: «حضرتك، أنا مش شايفة إني غلطانة في حاجة. أنا من حقي أفهم ومن حقي أتعلم، وأنا شايفة إن الأعراض اللي ذكرتها مهمة جدًا في تشخيص الحالة اللي قدامنا.
أنا مش فاهمة حضرتك انفعلتي عليا بالطريقة دي ليه، وده مش من حق حضرتك إنك تطرديني من السكشن العملي لمجرد إني وضحت نقطة علمية».
كملت كلامي وأنا بحاول أحافظ على هدوئي:
وعد: «حضرتك نسيتي تذكري بعض الأعراض، وكان ممكن تقولي إنك نسيتيها، وده شيء وارد يحصل لأي حد. لكن مش عيب إننا نعترف بغلطنا. الكتاب النظري هو اللي بيحدد الأعراض، وأنا كل اللي بقوله لحضرتك إن فيه أعراض مهمة ما اتذكرتش».
دكتورة جيهان بصتلي وصرخت في وشي:
د. جيهان: «وأنا بقولك اتفضلي اطلعي بره، وما تحضريليش تاني!».
في اللحظة دي، حسيت إن مفيش فايدة من الكلام، لكن قبل ما أتحرك من مكاني علشان أخرج، قرب مني دكتور مجد، وبص لدكتورة جيهان وقال لها:
د. مجد: «دكتورة جيهان».
بصتله، فسكت لحظة، وبعدها كمل كلامه:
د. مجد: «دكتورة وعد معاها حق».
دكتورة جيهان بصتله باستغراب شديد وقالت له:
د. جيهان: «دكتور مجد، إنت بتقول إيه؟ إنت بتقف معاها ضدي؟».
دكتور مجد رد عليها بهدوء:
د. مجد: «حضرتك عارفة إن أنا عمري ما هقف ضدك، ولا هقلل من مكانتك، بس في نفس الوقت دكتورة وعد معاها حق.
هي كل اللي قالته إن فيه أعراض ما اتذكرتش في تشخيص الحالة اللي قدامنا، والأعراض دي فعلًا مهمة جدًا. ولو نسيناها، ممكن نشخّص الحالة بصورة غير دقيقة، وبالتالي نعرّض حياة المريض للخطر».
وقفت مكاني وأنا مش مصدقة اللي بسمعه. ما كنتش متخيلة إن حد ممكن يتدخل ويدافع عني، وخصوصًا دكتور مجد.
لكن دكتورة جيهان ما عجبهاش كلامه، فردت عليه بلهجة حاسمة:
د. جيهان: «دكتور مجد، بعد إذنك اهتم بعملك وبإشرافك، وما تتدخلش بيني وبين أي طالبة أو طالب موجود في المحاضرة».
دكتور مجد قرب منها خطوة وقال لها:
د. مجد: «أنا آسف يا دكتورة جيهان، بس مش هقدر أنفذ كلام حضرتك. ولو حضرتك مصرة على موقفك، أنا هضطر أسحب نفسي من الإشراف».
اتصدمت من كلامه، وبصيتله وأنا مش عارفة أتصرف إزاي. حسيت إني حطيته في مشكلة كبيرة بسببي، وإنه ممكن يخسر إشرافه على الفرقة علشان موقف حصل بيني وبين دكتورة جيهان.
قربت منه وقلت له:
وعد: «دكتور مجد، بعد إذن حضرتك، أنا مش عايزة أسبب لحضرتك أي أذى. أنا هخرج من السكشن، ومش هحضر لدكتورة جيهان تاني».
وبعدين بصيت لدكتورة جيهان، وبعدها لزمايلي، وقلت لهم:
وعد: «بس أنا واثقة إني ما غلطتش. أنا اتكلمت مع حضرتك بكل أدب واحترام، وكل اللي عملته إني وضحت وجهة نظري. أنا مش غلطانة في حاجة، ومش فاهمة حضرتك انفعلتي عليا ليه».
دكتور مجد بصلي، وبعدها وجّه كلامه لدكتورة جيهان:
د. مجد: «دكتورة وعد مش هتخرج لوحدها، أنا كمان هخرج».
وبعدين رجع بصلي وقال:
د. مجد: «والدكتورة جيهان براحتها تتفهم الأمر بالطريقة اللي تشوفها مناسبة».
ما كنتش عارفة أعمل إيه. كنت متلخبطة جدًا، وكل اللي في دماغي إني مش عايزة أكون السبب في أي مشكلة تحصل لدكتور مجد.
كنت لسه هتحرك علشان أخرج، وكنت ناوية أطلب منه إنه يفضل ويكمل إشرافه، لكن دكتورة جيهان بصتله وقالت:
د. جيهان: «دكتور مجد، استنى».
اتجمدت مكاني.
ما كنتش فاهمة هي ناوية تعمل إيه، ولا إيه اللي ممكن يحصل بعد كده. كل اللي كنت متأكدة منه إني وقعت نفسي في مشكلة، والأصعب إني حسيت إني جرّيت دكتور مجد معايا.
لكن في وسط كل اللخبطة دي، كان فيه سؤال واحد مش راضي يسيبني:
هو فعلًا كان مستعد يسحب نفسه من الإشراف كله علشاني؟ علشان شايف إني على حق؟ ولا فيه سبب تاني أنا مش فاهماه؟ ولا فيه ايه بالضبط..
ما لقيتش إجابة، واضطريت أستنى وأشوف إيه اللي هيحصل.
---
وقبل ما السيكشن العملي يخلص، دكتورة جيهان نادت على دكتور مجد وقالت له:
د. جيهان: «دكتور مجد، بعد ما تخلص المحاضرة، تيجيلي على مكتبي بعد إذنك».
وبعدها بصتلي وقالت:
د. جيهان: «دكتورة وعد، ده آخر إنذار ليكي. اتفضلي احضري السيكشن، ولو عندك أي تفسير، استني لما أخلص الشرح. وبالنسبة للعرض اللي حضرتك اتكلمتي عنه، فأنا عارفة إني ما ذكرتوش، وأظن إني ما ذكرتوش علشان أشوف مين مركز معايا ومين مش مركز.
لكن إنتِ ما استنيتيش الشرح للآخر، وتسببتِ في مشكلة أكبر. المفروض تكوني عارفة حدودك كويس جدًا وإنتِ بتتكلمي مع أستاذة دكتورة، وخصوصًا لما تكون ليها مكانة كبيرة في مجال زي جراحة القلب».
بصيتلها وقلت لها:
وعد: «بس يا دكتورة، أنا ما أخطأتش في حاجة. حضرتك ذكرتي الأعراض، وكملنا التشخيص، وبعدها انتقلنا لنقطة تانية خالص.
وأنا لما لاحظت إن فيه أعراض ناقصة، اتكلمت علشان أفهم، وعلشان التشخيص يكون دقيق. ما كانش قصدي أجادل حضرتك ولا أقلل من مكانتك».
دكتورة جيهان بصتلي وقالت:
د. جيهان: «بالرغم من جرأتك، أنا مبسوطة إنك مصرة على موقفك وإنك شايفة نفسك مش غلطانة. اتفضلي ركزي معايا، ومع الوقت هتفهمي أنا عايزة أقول إيه بالضبط. إنتِ يمكن اتسرعتي شوية وما استنيتيش الشرح للآخر، لكن أنا بقولك اسمعيني للنهاية».
سكت لحظة، وبعدها قلت لها:
وعد: «حضرتك، المريض ممكن ينسى أعراض من الأعراض اللي بيشتكي منها، وممكن ما يعرفش يشرح كل اللي حاسس بيه. لكن إحنا كدكاترة بنمثل بالنسبة لهم جناح رحمة.
لازم نكون فاهمين كل الأعراض اللي ممكن يحسوا بيها، ونحاول نفهم ألمهم ووجعهم حتى قبل ما يقدروا يعبّروا عنه. هما مش دايمًا هيقدروا يشرحوا كل اللي جواهم، لكن إحنا المفروض نكون عارفين ودارسين الأعراض دي، ودورنا إننا نسألهم عن اللي بيحسوا بيه، ونعرض عليهم الأعراض علشان نقدر نوصل للتشخيص الصح».
في اللحظة دي، دكتورة جيهان بصتلي نظرة غريبة، نظرة ما قدرتش أفهم معناها.
أما دكتور مجد، فبصلي هو كمان، وأول ما عيني جت في عينه، حسيت بارتباك شديد، وكأن نظرته زوّدت إحساسي إن الموقف أكبر من مجرد خلاف حصل في سكشن عملي.
ما كنتش فاهمة إيه اللي ممكن يحصل بعد كده، ولا ليه كل حاجة اتعقدت بالشكل ده.
كل اللي كنت بفكر فيه إني دخلت نفسي في مشاكل، وإن لساني اللي دايمًا بيسبقني ممكن يكون السبب في مشكلة أكبر المرة دي.
هو أنا هفضل لحد إمتى لساني يوقعني في مشاكل بالطريقة دي؟
الموقف انتهى، لكن إحساسي بالضيق ما انتهيش.
فضلت طول اليوم بفكر في اللي حصل، وكنت متضايقة إني حطيت دكتور مجد في موقف صعب، وخايفة فعلًا يتحرم من الإشراف على الفرقة بسببي.
دكتورة جيهان مش شخصية سهلة، ومكانتها كبيرة، ومواجهتها قدام الطلبة والمعيدين والمشرفين كلهم ما كانتش حاجة بسيطة.
كنت مترددة من جوايا، لكن في نفس الوقت كان فيه صوت بيأكدلي إني ما عملتش حاجة غلط.
أنا كل اللي عملته إني وضحت وجهة نظري، واستندت للمعلومات اللي درستها في الكتاب. وكنت شايفة إن الدكتورة، مهما كانت مكانتها العلمية كبيرة، لازم تكون عارفة إزاي تتعامل مع الناس، وخصوصًا المرضى.
بالنسبة لي، الطب مش علاج ودواء وبس. نفسية المريض مهمة جدًا، وطريقة الكشف والتعامل معاه ممكن تفرق كتير في حالته.
لما المريض يحس إن الدكتور فاهمه، وإن فيه حد مهتم بوجعه وبيحاول يطمنه، ده بيديله أمل، والأمل ممكن يساعده في رحلته للعلاج.
كنت مؤمنة إن دورنا مش مجرد إننا نشخّص المرض ونكتب العلاج، لكن كمان إننا نسمع المريض ونفهمه ونحس بيه.
ومهما حصل، ما كنتش شايفة إن الدفاع عن المعلومة الصح حاجة تستدعي كل الغضب ده.
---
خلصت محاضراتي وأنا لسه متضايقة.
كنت عايزة أروح لدكتور مجد، أعتذر له عن الموقف اللي حصل، وأشكره على وقفته معايا، لكن في نفس الوقت كنت مترددة. ما كنتش عارفة هيستقبلني إزاي، ولا إذا كان زعلان مني بسبب اللي حصل.
فضلت أفكر شوية، لحد ما أخدت قراري وجمعت شجاعتي.
رحت أنا وزميلتي ناحية غرفة الكشف بتاعته. كان عنده كشوفات كتير، والمرضى مستنيين دورهم.
قربت من الممرضة واستأذنت منها إني أدخل لدكتور مجد.
الممرضة: «هو مشغول دلوقتي».
بصيتلها وقلت لها:
وعد: «بعد إذنك، أنا مش هتأخر عليه. هدخل بسرعة وأخرج».
وقفت مستنية ردها، وأنا بحاول أجهز الكلام اللي هقوله له.
كنت رايحة أعتذر، لكن الحقيقة إن جوايا أسئلة كتير ما كنتش عارفة إزاي أسأله عنها.
ليه وقف معايا بالشكل ده؟ وإزاي كان مستعد يسيب الإشراف كله علشان موقف زي ده؟
ما كنتش أعرف إن الزيارة اللي دخلت أعملها علشان أعتذر له، ممكن تفتح بيني وبينه بابًا جديدًا من الأسئلة....
زميلتي للأسف اعتذرت وقالت انها مستعجله وسابتني ومشيت....
كنت حاسه بإخراج شديد..... لكن دخلت.....
مشهد مكتب دكتور مجد والمواجهة العفوية
ديون النبض 🫀
بقلم الكاتبة مروة صياح 🎯 ✍️
أول ما دخلت غرفة الكشف، افتكرت اليوم اللي دخلت فيه الغرفة دي قبل كده، لما تقمصت دور الطبيبة، ولبست بالطو دكتور مجد، وقعدت على مكتبه، ومسكت قلمه، وحطيت السماعة بتاعته على ودني، وأنا فاكرة نفسي دكتورة بجد!
ابتسم لي أول ما شافني وقال:
مجد: تعالي يا وعد.
بصيت له باستغراب وقلت بعفوية:
وعد: وعد كده من غير دكتورة؟
بص لي وضحك، وبعدين سألني:
مجد: إنتِ عندك كام سنة؟
وعد: يعني ماشية في الاتنين وعشرين...
وعد: لا، حضرتك بتسأل ليه؟
ضحك وقال:
مجد: إنتِ زعلانة إني بقولك يا وعد من غير دكتورة؟
وعد: يعني أنا بقالي تلات سنين بدرس طب، وماشية في الرابعة، وفي الآخر حضرتك تناديني باسمي كده عادي؟ هو أنا ينفع أقول لحضرتك يا مجد؟
أول ما الكلمة خرجت من بُقي، لقيته بص لي بنظرة عميقة، وقال:
مجد وهو بيضحك: بتقولي إيه؟
اتلخبطت، وحسيت إن لساني كالعادة سبقني، فقلت بسرعة:
وعد: أنا أعمل إيه في لساني ده؟ ده دايمًا بيوقعني في مشاكل! أنا آسفة طبعًا، ما ينفعش أقول لحضرتك كده. حضرتك فوق راسي طبعًا، وليك شأنك وقدرك، وحضرتك دكتور مجد، وأنا ما ينفعش أتكلم مع حضرتك بالطريقة دي.
سكت لحظة، وبعدين افتكرت أنا أصلًا جاية ليه، فقلت وأنا بحاول أرتب كلامي:
وعد: أنا المفروض جاية أعتذر، لكن أنا للأسف مش عارفة إيه اللي بيحصل لي! دكتور مجد، أنا آسفة جدًا على الموقف اللي حصل النهارده.
أنا حطيت حضرتك في موقف مش كويس، وكنت هتتأذي بسببي. ودكتورة جيهان باين عليها إنها إنسانة شديدة، ومش بتتعامل باللين ولا بالرفق. أنا أصلًا مش بحبها، ومش بطيقها، ومش مرتاحة لها!
بص لي دكتور مجد باستغراب وهو بيضحك، وبعدين قال:
مجد: يا بنتي اهدي! هو إنتِ دايمًا كده؟ ميت كلمة في الثانية؟ اسكتي شوية!
حطيت إيدي على بُقي على طول وقلت:
وعد: خلاص، أنا سكت أهو! طب قولي أعمل إيه؟ ما هو أنا ما بعرفش أسكت، ودايمًا لساني سابقني ويدخلني في مشاكل!
بص لي وهو بيحاول يمسك ضحكته، وقال:
مجد: هو إنتِ حاطة إيدك على بُقك وكمان بتتكلمي؟
بصيت له، وما قدرتش أمنع نفسي من الضحك، وهو كمان فضل يضحك، لحد ما قال:
مجد: على فكرة، إنتِ روحك حلوة قوي.
اتكسفت من كلامه، وحسيت إن وشي سخن شوية، فحاولت أرجع للموضوع الأساسي وقلت بجدية:
وعد: دكتور... أنا آسفة جدًا. أنا حاسة إني أذيت حضرتك بجد.
مجد: لا، ما تشغليش بالك. ما فيش أي حاجة خالص.
وعد: يعني دكتورة جيهان مش هتأذي حضرتك في حاجة؟
مجد: لا، هي مش هتقدر تعمل حاجة.
بصيت له باستغراب، وقلت:
وعد: وإيه اللي يخليك... قصدي، إيه اللي يخلي حضرتك واثق قوي كده؟ دي باينة عليها دكتورة متسلطة!
اتغيرت ملامحه شوية، وقال بنبرة فيها اعتراض:
مجد: بعد إذنك، إنتِ بس اللي ما تعرفيهاش. هي قلبها طيب وكويسة، بس هي من زمان واخدة على الجدية والانضباط، وما بتحبش حد يقاطعها. بس صدقيني، هي كويسة.
رفعت حاجبي باستغراب وسألته:
وعد: هو حضرتك تعرفها قوي كده؟
مجد: آه، أعرفها من قريب قوي.
بصيت له لحظة، وبعدين قلت وأنا بحاول أربط الكلام ببعضه:
وعد: تمام... من الواضح إنها ممكن تكون صاحبة مامت حضرتك مثلًا! آه، أكيد ليك علاقة قوية بيها، وعشان كده حضرتك واثق إنها مش هتقدر تعمل لك حاجة.
ضحك، وبعدين قال:
مجد: بس إنتِ كمان، من الواضح إن إنتِ ما بيهمكيش حد. جريئة وما بتخافيش من حد!
وعد: المشكلة مش فيَّ أنا، المشكلة في لساني اللي بيوديني في داهية ده! أنا نفسي بصراحة عايزة أقصه، ده بيوقعني في مشاكل جامدة!
ضحك دكتور مجد وقال:
مجد: أنا مش عايزك تقصيه، بالعكس، استمري على اللي إنتِ فيه، بس خففي كلام شوية يا وعد.
بصيت له بسرعة وقلت:
وعد: إنتَ بتقول وعد تاني؟
ابتسم، وقال بنبرة هادية:
مجد: أنا آسف يا دكتورة وعد.
عدلت نضارتي وبصيت له بثقة مصطنعة، وقلت:
وعد: تمام، تمام يا دكتور مجد. أنا هعديها لك المرة دي، بس المرة الجاية لو حضرتك قلت لي وعد من غير دكتورة، والله أنا ما أعرفش هعمل إيه!
بص لي باستغراب ممزوج بالضحك، وسألني:
مجد: يعني هتعملي إيه؟
سكت شوية، وبعدين جاوبته بصراحة:
وعد: بصراحة مش عارفة! أنا أصلاً مش عارفه دي كلمه بقولها وخلاص لكن مابعرفش أعمل حاجه...
فضل باصص لي، وبعدين قال بنبرة خلتني أحس إنه بيلمح لحاجة أنا مش واخدة بالي منها:
مجد: متأكدة؟
بصيت له، وسكتّ لحظة.
هو قصده إيه بمتأكدة دي؟!
أنا جاية أعتذر عن اللي حصل، مش داخلة امتحان شفوي جديد!
بس واضح إن الموضوع مش هيخلص بالسهولة اللي كنت متخيلاها، وإن لساني اللي ورطني من أول القعدة لسه عنده كلام تاني كتير...
