رواية خلخال مشوه الفصل التاسع بقلم زمرده
ريت ذاكَ الفرح دام وريت
اشوفن ابني بحضنك ينام
•---∞∞∞∞∞∞∞---•
گمتلها اسلم عليها وهيَ مدتلي أيدها مبتسمه
نسمات : انا نسمات بت خالتج ناهده
أبتسمت وانا أشوفها لأول مره بعد ذيج السنين الما متذكره بيهن حتى شي من شكلها وما بعيني غير بس شكلها هسه وهيَ تسلم عليَّ وتعرفني على نفسها
بت خالتي
_ وانا غاية بت خالتج زهرة
وعلى نفس أبتسامتها ردت عليَّ
نسمات : سولفتلي هيفاء عنج وگالتلي يّجي يوم تشوفيها بس انا ما جنت أعرف صدگ راح يّجي هل يوم بساع واشوفجن ثنينجن بأقل من شهرين
_ والله حتى انا ما جان ببالي راح اشوفج
نسمات : قسمتج تجين هنا ببدال هيوفة
غضة : جا ما تگعدن وتكملن سوالفجن ؟
وما گلنه لا انا گعدت وهيَ گعدت بصفي وچن صار سنين هواي أعرفها ولا چن صار چم دقيقة
نسمات : صدگ خالة وهيوفة شلونهن ؟
_ الحمدلله بخير
نسمات : والله شگد مقهوره عليها من سمعت بيها طايحة متت من القهر
_ والله بيوم الطاحت خلتنه ما نندل دربنه منين ،شني جا غير بساع بساع طببوها عملية ولو تشوفين حال أمي شلون تلوم بروحها متسودنه
نسمات : يا جا ليش تلوم روحها ؟
_ مو هيَ صاحتها علمود تنزل جدر من فوگ الكاونتر وطاحت
نسمات : يااا انا ما أعرف بس سمعت بيها طايحة
_ شلون طيحة نحسه
ضلينه نسولف شويَ ،ومن صاحنها بالمطبخ گامت وگالتلي أمشي وياها
حطيت ايدي بأيدها وطبينه للمطبخ حيل مستحيه ضليت بس لازگه بيها وين ما تمشي انا وراها مثل ضلها صرت ...
گعدت على الكرسي اباوعلها شلون تفتر وكلساع وحده محشمتها ،باوعتلي وأبتسمت تأشرلي بعيونها
عليهن وهزت رأسها بيأس ومشت من صاحتها وحده من الگاعدات مجموعه ينضفن الخضره
_ نسمااات جيبيلي المصفي من المخزن وخضي لا تجيبي بترابه
جابته واجت خضته على السنك واطته الها وردت تحظر بالخواشيك للغده ما ضل شي يصبون وخبصتهم بره واصلتنه ،نص شغلهم صياح مثلنه و ويَّ ما بدوا يطببون الصواني اجتني وحده من البنات گالت
_ عمه ترديج
گمت وانا اعدل بثوبي ومشيت وراها ،بس شافتني جده أشرتلي على مكان بصفها فارغ
كملت طريقي وگعدت بصفها ،مدت ايدها اطتني خاشوگه وخلت گدامي بطل لبن وبالگوه اكلت الاكل
دسم ويشبع بسرعه وبس كملت گمت حتى اغسل
بالمطبخ وبس طبيت شفتها واگفه تحظر بستكاين الجاي ،مشيت يمها احجي وياها
_ جا شني ضاله هنا ،ما اكلتي ؟
باوعتلي وردت تحط شكر بالاستكاين
نسمات : هسه شويَ واكل
_ شو وحدج هنا ؟
نسمات : كلهن مشن يأكلن وما بيهن وحده حطت على بالها اكو ناس يردون جاي
_ جا حتى لو أنتِ شدخلج ؟
ضحكت بصوت ناصي وفرت أيدها
نسمات : شني شدخلني ،هسه اذا الجاي ما أنصب ما يحجون على ولا وحده بيهن بس عليَّ الحجي يصير بفلس
_ ياااا
نسمات : أي والله ،كلمن مدلل بته ومرته براسي وانا المكروب عليَّ ،ياريت أحد راضي
ما رديت عليها من طبت مرة عمها ،وهيَ من شافتها مشت تشوف الجاي وانا ضليت واگفه اباوع بعيوني عليها شلون وگفت يم الباب ورافعة ردانات ثوبها والمحبس هلكبرها شذرته يلمع بأيدها ،فلك فلكهن والله صدگ مثل ما گالت هيوفة چن عدهن عرس ولا شفت وحده بيهن مبين عليها الحزن وچن ما عولن يخلصن من جدهم "الخبير"
عدلت حجابي من سمعت صوت باب المطبخ يندگ من بره وصوت ولد يصيح
_ جايچن كامل ؟
مشت فتحت الباب شويَ
نسمات : أي كمل ،اطيكياه ؟
_ أي جيبي شمتانيه
نسمات : اوگف بس خلِ أصب
طبگت الباب وردت شالت القوري وبايدها المشخله تصب بساعَ وهذا الواگف بره كلساع يدگ الباب ويصيح
_ خفي ايدج يمعوده
شالت الصينية وباوعتلي
نسمات : بس افتحي الباب
مشيت گدامها فتحت الباب وضميت روحي بسده حتى ما أحد من البره يشوفني ،ومن اخذ الجاي ومشى سدت الباب وباوعتلي
نسمات : شگد عله ،والله لو اشرب وراه بطل ببسي هم ما اجرعه
_ منو هذا ؟
نسمات : أبن عمي العود
_ مبين ما طايقته من كلمة العود
اشرت على بلعومها
نسمات : هنا واگف ولا ينهظم وياي
_ شمسويلج ؟
نسمات : گولي شنو الما مسوي
باوعت للباب وسكتت ما حجيت بعد من شفتهن وحده وره الثانية صارن يطبن للمطبخ ،انا گعدت ونسمات مشت تكمل الجاي للنسوان وبس ودته وردت أجت تشلحت تعزل بصواني الاكل وياهن وبس كملن طلعتهن بره وحده من نسوان اخوة جده گالن الولد بره يغسلوهن
نسمات : تمشين وياي ماضل وكت أحظر روحي
_ أي وين ؟
نسمات : فوگ ،أمشي
مدتلي ايدها لزمتها وگمت وگبل لا أصعد گلت لجده ماشيه فوگ صعدت وانا صافنه على كمية الغرف عبالك فندق مو بيت ،ومن طبينه بوحده من الغرف فتحت الكنتور واندارت باوعتلي وردت تباوع بالكنتور
نسمات : تضلين هنا بس ابدل وارد ؟
_ أي عادي بس لا تتأخرين
نسمات : لا بساعَ
أخذت هدومها ومشت وانا ضليت اباوع بالغرفة ،بيها كنتور أبو بابين صاج ،وعلى جهه جرباية أم نفر وبالحايط الگدامي مراية وجواها ميز زغير وعليه بس عطر ومشط ...
مشيت اباوع على روحي بالمراية واعدل بحجابي انداريت على صوت الباب من سمعته انفتح عبالي نسمات ردت بس بلعت ريگي ورجفت روحي من شفت هل أنسانه الخلت روحي ترجف وانا اباوعلها منظرها يخوف ،يخوف الى درجة وحده يسولف على أنُ هاي الانسانه فاقدة عقلها وما ضال بي شي
رديت ليوره من تقدمت تمشي عليَّ وعيونها
فاتحتهن حيل ،تشاهدت على روحي من گالت
وجهه بوجهي
_ أنتِ مني ؟ وشعددج هنااا ؟
اجيت اعيط لوما نسمات طبت علينه تركض وتوخرها مني وبس وخرتها انا گعدت على الجرباية أرجف مثل السعفه واباوع عليهن أيدي على گلبي
نسمات : مو گلتلج لا تطلعين ؟ ليش تعاااندين ؟
_ سمعت صوت جوه واجيتج تاخذيني انزل اشوف شكو
تحجي وتصفگ وانا ويَّ كل حركه تسويها أريد اشرد بس ما اعرف شلون اكض روحي ،باوعتلي نسمات وردت تحجي وياها
نسمات : ماكو شي ،يالله أمشي لغرفتج وبعد ممنوع تطلعين
_ شني ما اطلع ،رايحه انا واشوف ياهوَ يكضني
نسمات رادت تكضها وهيَ بس كملت حجيها ركضت وخلتنه ثنينه نركض وراها هم زين نسمات لحگت عليها وكضتها گبل لا تنزل جوه واخذتها ما أعرف وين توديها ..!!
أنا ضليت واگفه اباوع من اخذتها الاخر غرفة بالطابق الثاني بحيث بعيدة حيل وصايرة بزاوية ما تنشاف حتى انا لوما شفتهن طبن بيها ما جان صدگت هاي غرفة وچان گلت فد مخزن ..!!!
مشيت للغرفة ،بس طبيت هيَ طبت وراي فتحت شعرها و وگفت گدام المراية تمشطه ،لفته وباوعتلي
أحس بيها تريد تحجي بس حايره
وما خاب احساسي من وگفت گدامي تطگطگ باصابعها
نسمات : احلفج بربج لا تحجين الشفتي الأحد
ابتسمت وانا الف سؤال براسي
_ ما احجي وچن ما شفت شي ،كملتي ؟
نسمات : أي هسه هسه ،بس اللبس حجابي
مشت للكنتور طلعت الشال وردت تلبسه وما يصير حاولت شگد ويا و ولا اجه عدل وياها ،أخر مرة جرته من ما صار وطگت الدمبوس وگعدت تبجي ودموعها يطيحن عشره عشره ،ضليت اباوعلها حايره تحجي بس ما جاي افتهم شي من حجيها لان تركض بالحجي ركض ...
گعدت گدامها وانا اعدل الشال على راسها وهيَ سكتت بس ضلت دموعها تنزل ،أبتسمت وباوعت بوجهه وبأيدي مسحت دموعها
_ صار بعد عليش هل بجي ،گومي غسلي وجهج وخلِ ننزل
هزت رأسها ب أي وگامت غسلت وجهه وردت تباوع على روحها بالمراية ،وگبل لا ننزل اخذت عباتها وجرت نفس تحاول تبين ورحها ما باجية ،نزلنه سوه وبس شافتني جده صاحتني وهيَ ما أعرف وين مشت ،من گعدت يمها گالت
غضة : أمشي بدلي ما ضل وكت راح نطلع
_ هوَ اريد جنطتي
غضة : هناك يم المعرض حطتها زينة
گمت اخذتها ومشيت اصيح نسمات گبل لا اطب المطبخ سمعت وحده تحجي
_ جا مو شفتينه نشتغل ،شني شردتي ؟
نسمات : ما شردت ماضل وكت وانتن كومة شني ما تگدرن تحركن روحچن لو ما يصير تحركين وحده من بناتج خاف لا يضعفن
_ انا الج اذا ما حجيت لعمج عليج اگله تراددني وما تحترمين
نسمات : گليله ولا عبالج أخاف لا والله ،انا ما ضل عدي شي اخسره اشو حتى عزاز گلبي فلست منهم
_ يااا ياااا تسمعن ؟
تحجي وتتلفت على اليمها فيلق بدر وهنَّ يگللها
_ أي سمعنه
من طبيت وصحت
_ نسمات تعاي احاجيج
بس شافني سكتن وهيَ أجتني ،طلعنه من المطبخ وسؤال براسي ما گدرت ما اسألهيا
_ شلون عايشة هنا أنتِ ؟
نسمات : عايشة الله وكيلج ومحمد كفيلج هيج شلون ما أعرف بس الاعرفه ايام تگضي من عمري وانا ما اعرف ليلي من نهاري من الكراب ،اركض للزغير گبل الجبير
القهر اكل گلبي عليها ،خليت ايدي على چتفها
_ قوية أنتِ وعايشة وياهن ،والله انا نص يوم ما صارلي وروحي طگت منهن
نسمات : جا عبالج روحي ما تطگ ،والله مرات ابزع منهن وتصير بالنعل واخذلي جم كفخه على جم راجدي بس اهم شي ابرد گلبي بيهن
_ وأبوج يرضه تنضربين ؟
هزت ايدها
نسمات : أبوي ،عبالج يحجي لو واحد من اخوانه ضربني
_ جا شني يبقى ساكت ؟
هزت رأسها ب أي
نسمات : يگلي عمامج يكسرون رأسج ماتحجين ولا تفكين حلگج
_ يااا ،جا حتى لو همَ على باطل ؟
نسمات : أي والله ومرات كلش قليلة يوگف وياي بوجهم ،هواي الحجي ما يخلص ،شردتي أنتِ مني ؟
_ ردت تصعدين وياي اريد ابدل
نسمات : جا أمشي
لزمتني من ايدي وصعدنه سوه ،بس طبيت للغرفة طلعت هدومي الالبسهن ومشيت للحمام بدلت ورديت يمها اللف بشالي وهيَ تباوعلي
نسمات : شالج كلش حلووو ،بيش مشتريته ؟
_ گدامج ولو هوَ مو مالتي
نسمات : يا جا مال منو ؟
أبتسمت وانا اندار الها
_ مال هيوفة مشتريتة جديد وگالت اللبسي
ضحكت
نسمات : وخلتج تلبسي ؟
_ أي والله انا دشنته هسه
نسمات : لو هيج الخوات لو لا
_ هاي هيوفة هواااي تشتري هدوم لان جده غضة تمولها فلوس بسكوت تموت عليها
ضحكت تأكد على كلامي
نسمات : والله صح ولج من أجتنه ويَّ جده جا شني غير من اگعد وياهن أضل صافنة ولو غابت عنها دقيقة تخبصني أمشي صيحيها تجي يمي وهاي من غير ذاك الحجي الحلو
_ اسكتي وخليها هاي أحنة الفيالق مو بعينها ولا چن عدها كومة أحفاد أهم شي عدها هيوفة لا گامت ولا گعدت
نسمات : بس والله حگها ،جا غير هيَ تنحط على الجرح يطيب
_أخوتي يموتون عليها حتى ولد عمامي أنتِ لو شايفتهم شلون نخبصوا بطيحتها ،يتراكضون وهدوا الموكب ما لفولنه سكنوا المستشفى
نسمات : والله تستاهل ،أحسها حنينة على الكل انا شافتني جم يوم گامت الاكله ما تاكلها عليَّ ومن تگعد تاكل تصيحني الا اگعد بصفها
_ احنه عدنه ثنين هيج ،هيَ وميمنة وحتى هنَّ صاحبات
نسمات : هم سولفتلي عن ميمنة والله حتى تمنيت اشوفها گالتلي انا لا شيء يم حنيتها
_ تخيلي ميمنة من طاحت هيوفة ضلت يمنة شايله كل شغل البيت لان تعرف بينا دوامات وما نلحگ
نسمات : هيج ناس أحسهم قليلين ،هنا بس حقد وغل وعيشة عباره عن كلمن يريد مصلحته
_ أحنه ماعدنه هيج بيناتنه ونتساعد بكل وكت كل وحده تجي تگوم ما بينه وحده تگعد بحجة انا خطار
نسمات : وين هنا امهات البيت گاعدات، الله وكيلج عايشة ويَّ عگارب سامه
_ الله يساعدج انا حيل انغثيت من سمعت شلون يحجن وياج
نسمات : أنتِ ششايفة ،الاقوى والله ،مرات اشبع دگ وضرب بجذبة يألفنها عليَّ لان مثلاً ما كنست لو ما مسحت
_ ما يخافن الله ؟
نسمات : لا وين ،كل مخافه من الله ماكو
رشيت عطر وگتلها
_ خلِ ننزل هسه جده تگلي تأخرتي
نسمات : يالله أمشي
نزلنه أنا وياها بأيدي عباتي وهيَ هم ،گعدت بصف جده وماكو شويَ وگالوا يالله نتوكل
وبس صعدنه بالكوستر انا گعدت بصف جده وبصفي گعدت نسمات وخلصنه الدرب كله نبسبس
ومن وصلنه للنجف گالوا اول شي نزور الإِمام علي (عليه السلام) وراها الا نروح للمگبره
طبينه بالتفتيش و وحده لازمه عباية الثانية وجده گدامنه كلساع تندار تباوعلنه وترجع تكمل طريقها
عبرنه من التفتيش ويا الراحه النفسية من طبينة الضريح وچن حتى الهوه تغير ،بقيت افر بعيوني بالمكان ونسمات تجرجر بيَّ جده عبرتنه وانا ضاله اباوع
طگيناها ركضه وراها ومن صرنه قريبات عليها صرنه نمشي طبيعي ،صلينه صلاة الزيارة وگالوا نضل هم نصلي صلاة الصبح ونطلع للمگبرة ،أذن وأحنه گاعدين بضريح أمير المؤمنين والصلاة بوكتها بهيج مكان ما تتعوض ...
وبس كملنة مشينا لمگبره أل خبير ،وضلينه بالساعتين وگبل لا يردون جده عاندت ويَّ صخر الا تمشي لگبر عمي منير
صخر : واليرحم اهلج جده مگبرتنه بعيده بالنص ساعه يرادلج
غضة : ما عليَّ انا جاية للنجف وما تخليني أمشي ازورن گبر عمك ،والله هسه اخلي واحد من الولد ياخذني
صخر : قفلت بعد ،أمشي أمر لالله بس خلِ اشوفلج ستوته توصلنه
غضة : خوش
ماحجه شي ومشى ،شوي ورد صاعد بستوته أشر النه ومشينة انا وجده وجدي صعدنه ،دگت بينه الستوته بالنص ساعه الا وصلنه ،وبكل مره جده تشوف گبر عمي يتجدد حزنها وچنه اليوم ميت تگابله وتبجي وتنعه وچن هوَ گدامها ومن سكتت يلا قره صخر سورة يس وقرينه سورة الفاتحه وغسلنه گبره وگبر محبوبته البدوية بصفة ،وأخر شي ردينه الهم من خابرونه...
ردتنه الظهر ،ماعولت شوكت احط روحي على الفراش وأول ما وصلنه بس حطيتلي مخده وبعباتي لفيت روحي ونمت ما گعدت غير المغرب على صوت الهوسه بالصاله ،طلعت من الغرفة غسلت وجهي وگعدت شامره شالي على رأسي واباوع عليهن مادات السفره وينگلن بالاكل وگد ما هنَّ هواي صوت سوالفهن هوسة ،حتى لو ربعهن يحجن تصير هوسة
مشيت اگعد يم جده من صاحتني ،انا لان هستوني گاعده كل نفس للأكل ما ألي بالگوه اكلت شويَ و وخرت مشيت للمطبخ اعرفها هسه هيَ هناك ومن دونهن ما تگعد على السفره ..!!
وصدگ أول ما طبيت شفتها واگفه تترس بقوري الجاي ،حطته على النار وشالت ماعون بيَّ تمن ومرگة مخبوطات تاكل وما أعرف وين صافنه حتى ما حسيت بيَّ انا واگفه واباوعلها الا من صحت بأسمها فزت وباوعتلي أيدها على گلبها
نسمات : گمزتيني
أبتسمت
_ جنتي صافنه ،بالج وين ؟
نسمات : هيج حتى انا ما أعرف بي وين
_ اممم
نسمات : اكلتي ؟
هزيت رأسي ب أي
_ شويَ لان معدتي ما أعرف شبيها تگلب
نسمات : خاف ما عجبج الاكل ؟
_ لا بالعكس كلش طيب ،بس انا لان هستوني گاعده
نسمات : من تجوعين گليلي اسويلج
هزيت رأسي ب أي وضليت گاعده يمها وبس كملت صبت ماعون تمن وخلت فوگاه مرگة خلتهن بصينية وانا اباوع عليها وگبل لا تطلع من المطبخ اندارتلي
نسمات : هسه اجيج ما اتأخر
_ خوش
طلعت وانا ضليت گاعده ،شويَ وصارن البنات ينگلن المواعين والكبار گعدن يعزلن بيهن ،شويَ وطبت نسمات كفت ردانها وبس وگفت يم السنك كومن المواعين عليها ،وهيَ وگفت تغسل وما أعرف شعجب وحده من بنات قادر ،مبينه حبابه مو مثل خواتها وگفت وياها تغسل ...
بنفس الوكت اندگ باب المطبخ وصوت ولد صاح
_ صيحوا أخت صخر اخوها يريد يحاجيها
گمت اعدل بحجابي وگبل لا اطلع تأكدت مشى الولد الا فتحت الباب بس شافني تقدم وگف يم الباب حتى لا يشوفني أحد
صخر : گلي لجده غبشة نرد
_ خوش
صخر : خوما تطلعين هنا ؟
_ لا ابد شعدي
صخر : أي عفية ،يالله طبي گلي جده
هزيت رأسي ب أي وطبيت بوجهي لجده گتلها ما حجت شي ،صاحت واحد من الجهال وگالتله
_ صيحلي غافر گله جده غضة تريدك بساع
مشى الجاهل وبس رد گالها
_ واگفلج برة يگول ما اگدر اطب
غضة : جا خوش گايمتله
گامت تتجه على عوجيتها وانا گمت وياها ،طلعت من باب المطبخ وانا وگفت ورا حتى اسمع شراح يگول أعرف بجده شراح تحجي ومبين هيوفة محاجيتها
غضة : غافر خوية رايده منك شي وما أريدن تردني
غافر : إأمري
غضة : أريدن أخذ نسمات وياي
غافر : وين ؟
غضة : للقرية ،شني ضلتها هنا وحيدها
غافر : ليش خوية ،جا غير اهلها كلهم يمها
غضة : أعرف ،بس البنية مكسورة جناح ،لا أنتَ ولا عدها أم يمها ضاله بس تخدم بالمايخافن الله
غافر : والله ما أعرف ،اذا اكلج اخذيها عمامها ما راح يسكتون
غضة : جا شني بكيفهم ،أنتَ أبوها و ولي امرها
غافر : هاي هيَ گليلها ،بس مو تضل يمج اسبوع واجي اخذها
غضة : الله كريم ،ماشية اگلها
طبت جده والعيون كلها عليها ،سمعن حجيهم والوجوه انگلبت ،وجده لبستهن ولا چن شافت الشرار اليطافر من عيونهن وصاحت نسمات ،عافت المواعين و وگفت گبالها تمسح ايدها بثوبها
غضة : حضري روحج اخذج وياي ،المن باقية هنا
باوعتلي وردت تباوع لجده حايره
نسمات : لا عمه ما امشي
غضة : ليش ؟
نسمات : هيج بس انا ما اگدر خليني هنا مرتاحه
غضة : وين راحتج ؟ تجذبين عليَّ ؟
نسمات : عمه والله ما اگدر امشي وياج ،خليني
هنا احسلي
غضة : انا گلت تمشين وياي رضيتي لو لا مو بكيفج
نسمات : عمه والله ما اگدر
غضة : وشني الما يخليج تگدرين ؟
تباوعلها ساكته وجده گبل لا تطلع من المطبخ گالتلها
غضة : حضري روحج ،غبشة ماشين
ردت تغسل بالمواعين وتدردم ويَّ روحها بما أعرف شني ،استغربت شني اليمنعها ماتروح وشني المخليها تريد تضل هنا ،اشو ما الها أحد وكل واحد بيهم يريد بس مصلحته منها ...!!
ضليت گاعده بالمطبخ متظرتها تكمل وبس كملت صعدنه أنا وياها ،طلعت جنطه من الكنتور تحط بيها هدومها وانا اباوع عليها حرف ما طلع منها وكلساع تصفن وترد تسفط الهدوم ،بس كملت طلعت من الغرفة حتى ما گالتلي وين مشت ،بالربع ساعة الا ردت
نسمات : تنامين يمي ؟
_ أي ما ارتاح جوه ،بس خلِ اگول لجده
نسمات : جا امشي ننزل انا وياج هم حتى اسويلج شي تاكلي
_ ماريد يمعوده أنتِ منا تعبانه
جرتني من ايدي وفتحت باب الغرفة
نسمات : امشي يمعوده ياتعب هذا
نزلنه بوجهنه لغرفة الخطار ،فتحت الباب هيَ وانا وراها
نسمات : عمه نايمة
_ جا شلون ؟
نسمات : انا انزل انام يمج ،امشي هسه للمطبخ وانا هم جعت
_ خوش اكل اذا أنتِ وياي
أبتسمت ومشت گدامي طبت للمطبخ وانا وراها گعدت بالگاع اباوع عليها شلون تفتر ،فتحت الثلاجة طلعت لحم خلته بطاسه ترستها ماي حتى يموع وأجت گعدت يمي تسألني على عوائلنه وانا اسولفلها
تريد تعرفهم گبل لا تمشي ويانه
نسمات : يعني عمج باقر عده بس حواري وريحانة؟
_ أي ،وعمي يوسف عده ثلاثه ،ميمنة وبصائر وبركة
نسمات : مو اخوهن جعفر المسجون ؟
_ أي جعفر اخوهن
نسمات : جا شوكت يطلع ؟
_ اندري ،هايَ عركاتنه والمالخ ويَّ بيت غازي بس حتى يطلعونه وما جاي يتنازلون
نسمات : ياا ليش ؟
_ اندري عود أبنهم الدچه ما مات
نسمات : يااا شني داچ واحد ؟
_ أي ،دافع على نفسه
نسمات : ليش شسواله ؟
_ جان طالع بالگيعان و ...
گطع حجينه صوت أبوها وهوَ يصيح بأسمها ،گامت فتحت باب المطبخ ومدت رأسها
نسمات : ها يابه
غافر : اصعدي لغرفتي اكو هدوم وصخه اغسليهن گبل لا ترحين
نسمات : صار ،وبعد ؟
غافر : هاي هيَ
نسمات : جا تصبح على خير
غافر : وأنتِ من اهله
سدت الباب ومشت للسنك من شافت اللحم مايع طلعت سجينه وتخته گصگصته وحطته على النار وردت تثرم طماطه
نسمات : اخلي فلفل حار وياها تاكلين ؟
_ أي عادي
نسمات : أحمي الجاي تشربين لو طرشي ؟
_ لا طرشي
نسمات : خوش
وبس كملت حطت الطاوه وكاسة الطرشي والخبز بصينيه وأجت حطتها گبالي وگعدت
نسمات : ضوگي اكلي وگليلي طيب لو لا
مديت ايدي اخذت خبزه وشلت بيها من الحمسيه السوتها وبس اكلتها أبتسمت مخليه ايدي على حلگي واحجي وياها
_ تخبببل والله عاشت ايدج
نسمات : بالعافية ،اكلي لا تستحين
_ لا والله شني استحي قابل أنتِ غريبة
أبتسمت
نسمات : بت خالتج
_ أي باعي يعني ما استحي منج
نسمات : جا المستحى ماتفيد
بس خلصنه اكل شالت الصينيه وانا غسلت وضليت انتظرها تكمل تعزيل المطبخ ،وبس كملت مشينه أنا وياها للغرفة ،فرشتلي وفرشت لروحها بصفي وطلعت غسلت هدوم ابوها وردت ،انا بس حطيت روحي على الفراش نمت ولا چن گعدت الغروب ...
فزيت على صوت جده تندهني ،وبس شافتني فتحت عيوني گعدت نسمات هم ،گمت انا غسلت وجهي ورديت حظرت روحي بساع وطلعت وره جده تريگت وبس گالوا صخر يگول يلا رديت للغرفة لبست عباتي واندريت
على نمسات تعدل بحجابها
_ جا ما تلبسين عباية ؟
نسمات : لا أنا ألبس جبه
_ شعجب يخلوج ؟
نسمات : هنا نص البنات ما يلبسن عبي وانا وياهن
طلعت بساع من سمعت صوت جده تصحيني ونسمات وراي بس شافتني جده مشت تطلع واحنه وراها ،صخر طابگ سيارته بالباب وجدي صاعد بالصدر وفاتح الباب يحجي وياهم ،بس شافنه سلم عليهم وصعد يشغلها ،جده صعدت واحنه صعدنه وراها انا بعدين نسمات بس صعدت گالت بصوت ناصي ومدنگه راسها
نسمات : السلام عليكم
ردوا عليها السلام وهيَ ضلت طول الطريق رأسها من رافعته ،انا من دوخة الطريق والتعب معدتي ضلت بس تگلب ،من انتبه عليَّ صخر باوعلي بالمراية يحاجيني
صخر : شبيج غاية ؟ وجهج صوفر .
_ ما أعرف
صخر : خاف الخفقان ؟
_ هوَ گلبي ما أعرف شلون يدگ
صخر : اجيبلج شي تاكلي ؟
_ لا ما أريد شبعانة
رأجس : بس باوع لطريقك ،ماضل شي ونوصل وعود حاجيها
رد يسوق ونسمات نامت ،وانا ضليت اباوع للطريق اللهي روحي
°حواري°
طلعت بالحوش بايدي المكناسة ،لامه ثوبي بهدومي وشعري شادته بالشال ،رشيت الحوش ودنگت اكنس بي وانعل الساعة السوده الخلتني بس انا هنا وحدي اركض وما ملحگه
رفعت رأسي على صوته يحاجيني مخبوص
فقار : طبي جوه بسااع
شمرت المكناسة من أيدي وركضت لغرفة أمي ،اول ما طبيت گالت
نجوى : هااا شبيج ؟
_ جابوا غرفة فقار
گامت بساع اخذت جيس الجكليت محظرته وطلعت ،شوي وسمعت صوت هلاهل أمي ،فتحت الباب شوي اباوع منه ،تطش بالجكليت على كل قطعة اخشاب يصعدوها فوک لغرفة اخويَ العريس عيني
طلعت من الغرفة من ضلوا فوگ يشدوها ،اكلني الفضول يامن يوديهم حتى أصعد اشوفها ،ضليت اروح وارد وأمي تباوع عليَّ
أخر شي ملت وعاطت بيَّ
نجوى : خايبة شبيج تحوسين ؟
_ شوكت يولون اريد اصعد اشوف الغرفة
نجوى : جا يطيرون غير جاي يشدوها
_ وانا شيصبرني
عافتني احوس وما حجت وياي وانا ما عولتهم مشوا ركضت فوگ وأمي وراي تصعد ،بس طبيت ضحكت اصلي على محمد وانداريت على أمي والفرح هيج گاعد بگلبي
_ تخبل الغرفة يمه تخبببل
نجوى : جا بعد اختيار ضيرم
_ أي عيني ضيرم
مشيت افتح بيبان الكناتير واباوع بيهن جوه ،خوش مقسمات
نجوى : لمعيها حتى من يجن نسوان عمامج يطشن الجگليت هيَ نضيفة
_ هسه امسحها بهدومي اذا تردين
نجوى : خرب ببليسج شگد تحبين الطربگه
_ جا شني يمه الحياة بلايه طربگه ما تراد
نجوى : هاي عدج ،يالله انا نازله وأنتِ نضيفها مو تنسين
_ ماشية وياج اجيب الغراض
بس نزلنه انا مشيت ترست سطلة ماي واخذت وصل جدد مخليتهن للتلميع وصعدت ،اللمع بيها واغني واهز اجيب واخبط وما خلاني افصل غير كفخة فقار
لزمت راسي وصحت
_ عريس أنتَ عررريس
فقار : جا شني واذا عريس
_ ليش كفختني ؟
فقار : مو شفتج چنج مكينه گايمة تعتعتين ،گلت اجيبج بكفخة عاد تشتغلين عدل
_ هوَ هذا مصلح السيارات ،شيصير وصاااح المكينة
فقار : تسوه راسج وگلادتج المكينة
_ اهووو داقتكم گلادتي
فقار : والله خطية عزيز شگد توسل بضيرم علمود فلوس وما اطاه
_ خوووب أنتَ شغلتك بالحياة تزيد نفط اذا لگيت نار
ضحك وگعد على الجرباية
فقار : خاب جا غير اشاقيج
_ أي خوش
فقار : لمعيها زين
_ ما دخلك
ضحك بصوت عالي واجه يجعص بخدودي يريد يبوسني من گصتي بس ما يطي گلبه ،دنگت احاجيه
_ بوس راسي حتى الله يبارك بزواجك
ضحك بصوت أعلى وباسني وبنفس مكان البوسه غمني ،لزمت راسي اگمز واعيط
_ شبيك مو عررريس ،هسه اعووف غرفتك واخليها خايسة اشوف منو ينضفها الك
مشيت اريد اطلع ولازمه راسي ،اجه يجرجر بيَّ وشايل الوصله
فقار : انا اعتذر بس كمليها بداعة گلادتج
أخذت الوصله من ايده ادردم
_ اهووو شگد تغارون
رديت امسحها بس بعدني اتظاهر انا مطنگره ،عافني ونزل وانا بس كملت نزلت طلعتلي هدوم وطبيت سبحت وانا واگفه امشط بشعري طب هوَ بأيده علاگه واجه يمشي عليَّ ،سويت روحي ابد ما اشوفه بس انا بالگوة كاضه ضحكتي ...
خله العلاگه بوجهي
فقار : نتصالح ؟
اخذتها من أيده
_ لوما علاگة الحلويات ما اصالحك
فقار : خوش جزاج الله الف خير
_ أي
ضحك ومشى يريد يطلع ،صحت وراه
_ هواي تضحك شبيك ما صدگ بس أنتَ راح تتزوج
اندرلي
فقار : أي جا صدگ بس انا راح اتزوج ،منو غيري منهم تزوج ؟
_ أي واذا أنتَ أول واحد
فقار : هيج متعجب وفرحااان ،غاثج ؟
_ لا والله أصلاً انا فرحانه لان أنتَ فرحان
فقار : جا خوش
مشى الوكت بينه وبالليل بدت تصير اللمه،اول شي اجت مرة عمي محمد وجد والبنات ،جريت شالي وركضت اتلگاهن ضحكت فرحانة من شفت حتى هيوفة جاية وياهن ،مشيت يمها وأنا اسألها بأبتسامه
_ شعجب طلعتي ؟
هيوفة : جا شني كلهن يّجن وانا لا ،هاي الفرحة المنتظرتها صار شگد
غمزتلها
_ عاد الشاهده أنتِ
ضحكت وهزت رأسها ب أي ،من رفعت رأسي أنتبهت على بنية وياهن أول مرة اشوفها ولساني ابد ولا گدرت اكضه وما احجي
_ شني بسلا عمي متزوج وهاي بته ؟
ضحكن كلهن وعمة زهره صاحت بيَّ
زهرة : الفلك الفلكج ،من تالي عمج يتزوج عليَّ
_ مو كبرتي بعد ما تفيدين
زهرة : يااا ياااا
الضحك صار بفلس على ردة فعلها ،ومن بين اصواتهن گالت
هيوفة : هاي نسمات بت خالتي ناهده الله يرحمها
_ ياااا صدگ شوكت أجت ؟
هيوفة : اليوم اجت ويَّ جده
أبتسمت ومشيت يمها
_ انا حواري نازلة من الجنه يمكم ،فرحت بشوفتج هوه
ضحكت من ضلت صافنه بوجهي وجفون صاحت
جفون : خااايبة البنية صفنت عبالها عقلج بي شي
_ انجبي رموش
جفون : اجي اسحلج حوليه مو حورية
ضحكت تباوعلنه يمكن مصدومه خطية ولو صدگ عبالها عقلي بي شي
_ باعي نسمات انا عقلي صاحي لا عبالج خبله بس هاي أنا أحب اتشاقه
غاية : مو حجيتلج عليها ،گلتلج عدنه وحده طگه ونص وتكها جفون
نسمات : أي صح تذكرت
صحت انا وجفون
_ يااااا
ضحكت تشرح قصدها
نسمات : انا مو قصدي عليجن ،قصدي هيَ صدگ حجتلي
جفون : انعمت بعد لا تكحلها عزيزي
_ شفت شفت تكي شلون يحجن علينه ؟
جفون : أي شفت ،نسكت ونتحمل شنسوي
°غاية°
ضحكت اباوعلهن ،ولا يتغيرن ولا راح يّجي يوم يعقلن ويكبرن
نجوى : نصعد تشوفن الغرفة ؟
جفون : جا شني عمه قابل جايّن نشوف حواري
نجوى : أوف من لسانج الله يساعد الياخذج أنتِ وهايَ
أشرت على حواري الوگفة تحجي ويَّ نسمات ،من سمعت أمها گالت هاي عرفت روحها المقصودة
حواري : هااا خوب انا ساكته وأنتن تعيلن بيَّ
زهرة : والله ياعمه أنتِ وهاي انا يوميه ادعي بالصبر من هسه للراح تصيرن نصيبة
جفون : انا ما اتزوج
حواري : ولا انا
نجوى : شني تضلن على گلبنه ؟
حواري : اضل اكنسلج وامسحلج وين لاگيه هيج بعد
نجوى : أنعم الله عليج
نسمات بس تباوع ومبتسمه ،من صعدن جريتها
_ امشي نصعد
نسمات : وهيوفة خطية
غضة : اصعدن انا ضاله يمها وين اگدر اصعد الدرج
ركضت اضحك واصيحها من سمعت صوت الهلاهل
_ تعاي بساع
صعدت وهيَ وراي ،طبيت مبتسمه اباوع للغرفة واصلي على محمد نزعت عباتي وصرت اصفگ وياهن
نجوى : هاي فرحة وبعد فرحة وياليحب يتباركنه
حواري وجفون يدگن على الميوزه وعمة تهوسلهن بنص الهوسة وصاحت
حواري : أريد ارگص رگص واكسر الكاشيه احنه اهل الولد واحنه اهل البنية
جفون : وهاا خوتي هاااا
صحنه : هااا
جفون : نسيت
ضحكنه وحواري غمتها وردت تدگ على الميز وتهوس
حواري : سووا درب الأم الولد خلوها تلعب جوله
وعمه من فرحتها وگفت تهوس بالنص ،وبنص هوساتنه طب هوَ يهوس ويانه وحواري ما أعرف منين جابتلها نجانه تدگ عليها وتهوسله
حواري : أشگر حنطاوي كل القوط تلوگ عليه ،اشگر حنطاوي
ضحكنه كلنه على هوستها الگلبتها ،دنگ اخذ جكليته من الگاع
فقار : اروحن اجيب مرتي حتى تكملن هوساتچن
وگبل لا نحجي نزل بساع ،ضلينه فوگ بالربع ساعة ونزلنه من سمعنه صوت جده تصيحنه
و ويَّ ما نزلنه طب فقار و وراه مرة عمي يوسف والبنات وهوَ لازم بأيدة بصائر وهيَ تضحك ضامه وجهه بزنده
فقار : يالله حواري هوسلينه
اندار على جده
فقار : جده خوما تزعلين ابوج الله يرحمه عمره عمر سفينة نوح ونوح هم
غضة : عريس راح اسكت عنك
فقار : يعني نهوس ؟
غضة : هوسوا حبوبة شني لازمتكم
ركضت حواري وردت بأيدها جدوره ،اطت الي ولجفون و وگفت يم بركة شايله واحد
حواري : أنتِ أخت العروس زحمه اطيج واحد
جرته من ايدها
بركة : جيبي يازحمه يمعوده
وگفت حواري بالنص يم بصائر وفقار ،تهوس واحنا ندگ بالجدوره ونردد وراها
حواري : ولا تگول محمره جنها طماطه
وهيوفة صفگت بايدها تهوس
هيوفة : هوَ الرادها وهوَ انعجب بيها وهوَ العاند وهوَ النهى عليها
ضحكنه وبصائر باوعت لفقار
بصائر : ليش نهيت عليَّ
فقار : جا شني هسه تذكرتي
بصائر : لا أنا ما ناسيه وبعدني حاقده عليك
فقار : ميخالف بعدين نتصافه
حواري : اسمعوااا اسمعوااا تذكرت وحده
ميمنة : راح تخبليني منين جايبتهن ؟
حواري : صار شهر يوميا افتر على بنات الصف احفظ وحده منهن
ميمنة : لا والله
حواري : أي والله، هسه اسمعن
فقار : يالله
حواري : ادلل خويه ادلل والمال هوايه
دگيت على الجدر وگعدت اردد وياها ،اجواء تخبل عشناها ولا تنسي، للساعه بهدعش بالليل الا طيشنه لبيوتنه وثاني يوم جان أحد وحنتهم الخميس والعرس الجمعة ...
رديت انا من المدرسة ضهري مكسور من التعب ،هاي عود هم زين ما عدي امتحانات ،بس طبيت صارت گدامي جفون مطلعه الكتاكيت والبطوط تلعب وياهن بس شافتني صاحت
جفون : تمشين وياي لبيت عمي يوسف ؟
_ شعدج ؟
جفون : اريد اروحن اعرف يالون بدله حجزت للحنه
_ خلِ أبدل واتغده ونمشي
جفون : خوش
طبيت وعفتها تركض وره كتاكيتها بس طبيت صارت گدامي نسمات وهيوفة ،أبتسمت
_ شعجب هنا ؟
هيوفة : مليت گلت اتنفس شوي
_ أحسلج
طبيت بدلت ورديت يمهن ،حميت الاكل صبتلي وگعدت اكل وطبت جفون شايلة فروخها على گولة جده وتفتر وگفت يم هيوفة
جفون : احطهن بحضنج ؟
هيوفة : حتى اطيح حظج
ضحكت و وخرت ،حطتهن بالگاع انا اكل وهنَّ يفترن عليَّ يزعني ،شلت صينيتي ومشيت للصاله ،بس كملت رديت غسلت مواعيني وصحتها طالعه بالحوش
_ جفون يالله تعاي نمشي
طبت أمي
زهرة : شني وين تمشن ؟
_ ما عليَّ انا جفون ترديني امشي وياها لبيت عمي يوسف
زهرة : جا شني تمشن وحدچن ؟
أجت وگفت بصفي گرصتني ،خلتني اگمز فركت مكان الگرصه وخزرتها وهيَ غلست عليَّ تحجي ويَّ أمي
جفون : لا عمه جا غير أنتِ توصلينه
زهرة : أي ،امشن يلا
بس مشت أمي كفختها على راسها ،حطت ايدها على رأسها داخت
جفون : وسم ليش
_ حتى لا تگرصين بعد چنج عگرب
جفون : جا غير اريدج تسكتين ،هسه عمه تگول وحدهن قررن
_ جا قابل جذب ؟
جفون : لا مو جذب بس خوما نخليها تعرف
_ اوووف منج
عفافتني ومشت لبست عباتها وحجابها وانا دگيت عناد ما امشي ،من شافتني أمي بعدني لا حجاب ولا عباية والطنگوره واصله عبور القرية ،باوعتلي وباوعت لجفون
زهرة : جا شني ما تمشي وياج ؟
جفون : لا تمشي ،يلا غاية اللبسي عباتج
خزرتها وطبيت جبت عباتي وحجابي لبستهن ومطنگره عليها بس اريد تطيح بيدي كون اكتلها وافوخ گلبي بيها ،بس وصلتنه أمي ردت ما ضلت هواي وأنا من شفتهن مخبوصات ويركضن كفيت رداني وحطيت روحي وياهن ،أخر شي الفراشات طلعناهن نغسلهن ،انا وبركة وميمنة نجلف وبصائر گاعده تصبغ بأظافرها وجفون تباوعلها لا تملغط روحها ...
رفعت ايدها تدعي
بركة : اشوف بيج يوم يا بصائر ،انا اگعد هل گعده وأنتِ تنكربين مثلي
بصائر : اجلفي زين ،الحواف ركزي عليهن
رفعت ايدها بيها الفرچة تريد تطگها ،بساع جريتها من ايدها
جفون : اعصابج بركات العصبية ،طارت بركتج على گولة جده
بركة : تك حواري الخايسة ،ضلي هيج لا شغلة ولا عمله
جفون : جا هنيالي خايسة ،اطيني الصبغ بصائر وراج اصبغ
طگت علچها بصائر واطت الصبغ الجفون ،وبركة مدت روحها بنص الماي والتايت
بركة : انا رااااح اموووت ،وخرنهن مني لا ابتلي بيهن اليوم
ميمنة : خااايبة امشي طبي جوه زقنبتينه ،انا وغاية نغسلهن
من عاطت بيها ميمنة ردت تشتغل ساكته ،وبس كملنه غسلنه الحوش أخير شي وطبينه لگينه عمه
مسويتلنه عشه ،التمينه ناكل ونسولف وما ردينه للبيت الا من اجانه نوح وفقار ويا، اكيد يعني ضل يم بصائر وخله فقار من بيت عمي يوسف لبيتنه مستلمه دگ مسبه ...
وبيوم الحنه ،خبصتنه خبصه ،على أخر لحظه جدي قرر حنتهم هنا بحيث خلانه نركض مراكض وما نحلگ ...
ركضت أصعد فوگ من سمعت صوته يصيحني ،دگيت باب غرفته وطبيت واگف يمشط شعره ،بس شافني رفعلي ايده يأشر على اصبعه
صخر : المحبس الشذرته جوزي وين ؟
مشيت لميز المراية ،فتحت الجرار ،باوعت ماكو
_ شني گبل أسبوع هيج هنا شفته
صخر : انا لبسته امس واليوم ما لگيته
_ شفت ليث خاف هوَ لابسه
صفن مزغر عيونه ،مسح على شواربه وهز رأسه
صخر : طبعاً صدگ عده لان گالي عليه امس وگتله انا اريد اللبسه
_ جا عده ،خلي لابسه خطيه راهم ويَّ دشداشته وأنتِ اللبس الازرگ بلون دشداشتك
ماحجه شي من شفته ساكت نزلت اركض وانا اباوع الخبصه الصايره هنا ،ناس ترگص وناس تشتغل وهستوني نازله سمعت صوته يصيحني مره ثانية
صعدلته اركض
صخر : انزلي گدامي اريدن انزل
_ خوش
مشيت انا وهوَ وراي بس طلع رديت يم جفون وحواري ماخذاتلهن ركن يرگصن ،ونسمات گاعده تباوع عليهن ،گعدت يمها فحطانه من الركض الركضته ،شوي وصاحتني ميمنة ،گمت مشيتلها للمطبخ ،بس شافتني گالت
ميمنة : حركي جفون وحواري خلِ يگومون يكنسن البيت وأنتِ تعاي يمي نكف المواعين
_ صار
وبس گتلهن اكنسن باد حيلهن حتى رگص مابيهن حيل يرگصن ،غميتهن بأثنين ايديه وانداريت على صوتها
نسمات : بس جيبلي المكناسة انا اكنس
_ خوش
جبتلها المكناسة ورديت اطيتها الها ومشيت للمطبخ وگبل لا تطب من الصالون بشوي الا گدرنه نتفرغ نحظر روحنه ،على صوت الهلاهل عرفنه أجت ،نزلت اركض رافعه فستاني وضليت واگفه على نص الدرج اباوعلها مبتسمه ،طالعة تخبل هيَ وبدلتها المارونية
وشعرها المفتوح اميره والله وضحكتها تجنن من تلگنها خالاتها وبنات خالاتها واقاربنه بالهلاهل والجكليت ...
نزلت باقي الدرج وانا مبتسمه ،گعدتها ميمنة وعدلت بدلتها ،وبس گعدت اشتغلت الهوسات والردح صار بفلس ،كل هذا وانا واگفه بس اصفگ وچن جاي احفظ كلشي يصير وعبالك أعرف راح احتاج ذاكرتي بيوم من الايام ..!!
ركضت اللبس حجابي من طبت ريحانة من المطبخ وصاحت
ريحانة : تسترن العريس يريد يطب يحني عروسته
بس تسترنه ردت صاحته وأجت تمشي گدامه وهوَ وراها مدنگ ،تلگنه بالهوسات والجكليت وهوَ بس وصل يمها باوعلها مبتسم بعيون تلمع،باسها من رأسها وگعدوا ،جابت الحنه جده ،حنتها وحنته وهوَ گام باسها من راسها ورد گعد ،والضحكه شني
شاگه وجهه وهيَ تحركله بحواجبها وتأشرله لا يباوع وهوَ يتقصد يباوع على التفاصيل المبينه من البدله...
وما ضل هواي وصاحوه راح تبدي حنته بره ،وبس طلع ردت هوستنه وزادت بخبصة العشه من طببوه من بره ،انا واگفه يم الباب وبصفي ريحانه لان احنه استر لبس بين البنات حتى ما احتاجينه غير بس نلم شعرنه ونحط على راسنه شال وناخذ من ايدهم اللفات والببسي
صخر : وينك نووووح بعد ببسي جيب ،هاج هاي اللفات غاية
اخذتهن من ايده وطبيت وريحانة ضلت تنتظر الببسي ،طبيت اوزع للگاعدات اللفات شويَ وهيَ طبت وراي شايله سلة متروسة قواطي ببسي و وزعتهن ،انا واگفه بصفها نباوع خاف لا اكو نقص وأحد ما ماخذ ،انداريت على صوت أخت أم رقية تحاجي بيها ...
فتحت عيوني وحصرتني الضحكه من سمعتها تگلها
_ خاله أنتِ متزوجة لا ؟
ضميت ضحكتي بأيدي وريحانة أبتسمت وخلت ايدها على بطنها
ريحانة : أي خاله وحامل
_ يا خاله بالعافيه ،ولا مبين عليج
أجت ميمنة مبين سمعتها
ميمنة : صارلها خمس سنين من تزوجت
_ يا يمه اللهم صل على محمد ،جا شگد عمرج ؟
ريحانة : ثنين وعشرين
_ عين النبي تحرسج يمه
ريحانة : الله يسلمج خاله
مشيت للمطبخ اضحك بس طبيت گتلهن
_ احزروا منوو انخطبت
صاحن
_ منوو ؟
صفگت بأيدي فاطسه من الضحك
_ ريحانة انخطبت
ضحكن مصدومات وانا لزمتني الضحكه كلش ولا گدرت اسكت وبالگوه لزمت روحي من سمعت صوته بره يصيح بأسمي ،فتحت الباب ومديت راسي بس شافني خزرني
صخر : شبيج صوتج شعلوه ؟
_ جاي أضحك
صخر : جا ما أعرف تضحكين بس هيج ما تعرفين كلها بره
_ مو ماگدرت اللزم روحي السالفه تفطس
صخر : بله گليلي شني هيَ خلِ افطس وياج
_ هاي مو عدنه وحده من البنات متزوجه وحامل
عگد حاجبه وانا كملت وبالگوه كاضه ضحكتي
_ خطبتها وحده وانصدمت صدمه من گلنالها متزوجه وحامل
باوع وراي وردنگ بساع ومشى بدون ما يحجي شي وانا بس انداريت شفت ريحانة وراي تسولف وياهن ومطيتني ضهرها ،نزعت حذائي وگعدت اباوع لرجلي صايره حمره من الكعب
ميمنة : ماشية اگومها تبدل شو جنها كلش اختنگت من البدله
ريحانة : أي احسن هواي صارلها
مشت ميمنة وانا مشيت وراها ،گومت بصائر وطبن بغرفتنه ،شوي وطلعت لابسه گلبيه كلش حلوه بلون وردي ،وبس شافنها خالاتها صاحن
_ تعاي يمنه
أبتسمت ومشت گعدت بنصهن ،و وحده من خالتها باوعتلي
_ جيبلنه شي ندگ عليه
ما گلت لا وركضت للمطبخ جبت جدوره وصواني شكوا شي يّجي گدامي وحواري وراي نگلت باقي المطبخ ،التمينه وهيَ بنصنه ،دگت وحده من خالاتها على الجدر وهوست
_ زغيرونه بگد الطير تستاهل وشايف الخير
ضلينه ندگ ونرگص لنص الليل وهيَ تعبت كلش اخذتها ميمنة تنام لان وراها صالون واحنه فرشنه لخالاتها وخالات العريس هم وعماتي،ومن كملنه بدلنه ونمنه والصبح فزيت على صوت ميمنة وبصائر يردن يمشن للصالون،البارحه مشت وياها ريحانة وأجت ضهرها كلش يوجعها عاد جده گالت اليوم ماتمشي هيَ،گمت طلعت وراهن من طلعن من الغرفة مسطوره سطر بالگوه اتحرك ،بس شافتني أمي صاحتني اتريك گعدت اكل وانا اغفي بس اعرف روحي ما راح ارد انام لان كلها بدت تگعد وهوسة صارت ...
واحنه گاعدين بالصاله اندگ باب المطبخ وصوته يصيح
عبد الحق : وينجن يمعودات اريد اوديجن وانام
لبست عباتها ميمنة بساع وشالت الجنطه وبصائر وراها طلعن ،وبس خلصنه ريوگ أمي گالت غسلي المواعين كلهن ضلن نايمات و وگعت براسي طن مواعين اغسل وما يخلصن ،وبس كملت مشيت للغرفة اسحول بيهن أريدهن يگعدن
جريت منها المخده
جفون : خااايبة اطيني المخده خلِ انطمر
_ شني نايمات واحنه عدنه عرس ،گووومن يلا
جريت البطانيه منها خليتها ما تعرف شلون تلطم ،وبس سكتت وطلعت مشيت لبركة گعدتها وخوب حواري شلعت گلبي الا گامت وبس گعدت گالت
حواري : گعدي أختي خوش تشتغل
_ ياا شلون تشتغل وهيَ حامل
حواري : نسيت ،بس والله خوش تشتغل
_ خليها نايمة ،وأنتِ أمشي يالله
طلعت تتأفأف ،انا ضليت اعزل بالصاله واللم الفراشات و شوي وردت هيَ وجفون جايبات صينية الريوگ ولحگتهن بركة ،گعدن يأكلن ويحجن ،بالساعة هنَّ گاعدات عود يأكلن والصينية گدامهن ...
صحت بيهن روحي بزعت
_ شني كااافي راح تاكلن حتى الطاوه
حواري : هااا حطيتي عينج على لگمتنه
_ يا لگمه غير اريد نكمل شغل اليوم ترد من الصالون من وكت
حواري : بعد وكت هستوها بالعشره
صحت
_عمه نجوى تعاااي لحواري الخايسه
حواري : شلون سمعه ،تره انا بس ماحب انضف يعني مو خايسه
نجوى : شكو شبيج حواري ؟
_ عمه شلعن گلبي صار ساعه. مگابلات الصينية
نجوى : شني السالفه گومن كومة شغل ورانه
جفون : لاحگين
نجوى : زهرة تعاااي الهن
شويَ وأجت أمي بأيدها المس وهنَّ تطافرن يركضن وضحكهن بفلس وأمي تصيح عليهن
زهرة : ساعة اذا ما گلبتن البيت على البطانه اللعب المس على ضهورچن
حواري : شني عمه على كيفج ويانه
زهرة : أنهجم بيتج ،يلا كل وحده تلزم الها شغله
بركة : صار عيني ،صار انا گتلهن خلِ نگوم هنَّ ما يرضن
زهرة : اطلعي للحوش ويَّ غاية أنتِ ،وأنتن كفن البيت الجوه
مشيت للحوش وعفتهن يلطمن ،شويَ ولحگتني بركة تدردم
بركة : جا هذنِ الكومة لحم ما يتحركن ويانه
شكلت الصونده بالماطور ورديت عليها
_ تردين الخطار يشتغلن ويانه
بركة : جا شحلاها المساعده ،بس هذنِ ما عدهن ذوق
ضحكت وشغلت الماطور ،وبديت اغسل وهيَ وراي تنشف بالماسحه ،وبس كملنه طبيت بدلت هدومي تنگعن ،وبس طلعت من الغرفة هزيت ايدي من شفتهن يرگصن مو شغل سوّنه ،حواري بأيدها المكناسه تهوس بيها وجفون تدگ على المعرض
حواري : على عناد عماته ولعبن لعب خالاته
صاحت وحده من عماتي
_ هااا حواري مو اگوملج
ضحكت وردت تكنس ،وبمعجزه كملن وگبل لا تجي بصائر تحظرنه ،ومن گالوا أجت ركضنه نتلگاها طبت ببدلتها البيضه وصوت الهلاهل ويَّ كل خطوة تخطيها ،وبس صارت الدنيا عصر بدت ركضة العشه وگبل لا يصبون گالوا نزفهم ،مراكضنه صار بفلس لبسنه العبي و وگفنه متحظرين وصوت هواساتهم بره والدبج لهنا ...
ميمنة لبستها البرگع وضبته زين وطب جدي وأبوي وعمي يوسف وفقار بيناتهم والولد بره يهوسوله
جدي نزع عباته وحطها على اچتافها وگف فقار بصفها وحط ايده بأيدها ،وعمي ضل يوصي عليها وهوَ ما على لسانه غير كلمة
فقار : بعيوني احطها
طلعت منا بالهلاهل وطبت لبيت عمي باقر برجلها اليمين عروسة وأم بيته الاتمناها وعاند عليها وهاي احنه زفيناها وفرحتنه لفرحته مو قليلة ،صعدناها گبله وهوَ ضل يم الولد وبس نزلنه صعدوه يزفوه بالهوسات ومن بينهم صاح واعتلت صوت الهلاهل
نوح : وزفينا الجان مسربت ما يلفي الا بنص الليل
اندار عليه
فقار : مو اشمرك من الدرج
نوح : هاا بعدنه بالبدايه
فقار : اخذوه ما اريده
دفع نوح على الولد ونوح تخبل كلنه نضحك على ردة فعله وهوَ مصدگ والولد يصيحون لا لا
نوح : مو گلتلك بس تتزوج تتغير عليَّ
فقار : جا شني أنتَ بيش الكيلو
راد ينزل ومبين زعل وفقار ضحك يجر بي يريد يراضي ونوح مدلغم ولا مقتنع أخر شي صخر دفع فقار وگاله
صخر : امشي فضها ورانه نعشي العالم
وبس زفوه نزلوا وكلنه مشينه نرد وبقيناهم بس همَ بالبيت ،وبس ردينه انخبصنه بالعشه وبس كمل العشه كلها طشت وطبوا جدي وعمامي والولد كلهم التموا بالصاله ،مشيت اشوف الجاي لان ما شاء الله اول ما طبوا صاحوا جاي ،خليت الورگ وضليت أحظر الاستكاين واسمع حجيهم
يوسف : بوية اليوم حاجوني على ميمنة ،أبو مهند تعرفه خطبها مني وگبلها دز النسوان علينه وانا لهسه ما مطيهم كلمه ،شتگول اطيها ؟
رأجس : المن يريدها ؟
يوسف: هوَ المهند تعرفه خوش ولد وعشرة عمر صار ويَّ ولدنه
رأجس : گلهم محجوزه
يوسف : شني المن ؟
مديت رأسي اباوع كلها صفنت بوجه جدي
رأجس : ولد عمها خير من الله للغريب ميمنة ما تطلع
محمد : المنو تريدها يابه ؟
رأجس : انا رأيد ازوج ثنين من الولد ،وگلت الكبار بالاول وما دامكم گاعدين انا مقرر ،ميمنة لصخر وهيفاء لضيرم ...
شكرا لزيارتكم عالم روايات سكيرهوم
