رواية اخترت نفسي الفصل الثاني عشر
وقف ابو احمد وهو بيبص لزين بغضب
ابو احمد/ وانت مين انت كمان وازاى تكلمنى كده..مين ده يا هاجر
بصله زين بصرامه وهو بيقف قدامه
زين / النقيب زين احمد ...انا الى قبضت على ابنك
رجع ابو احمد ورا وهو بيبلع ريقه وبص لاحمد و لابراهيم الى هزله براسه بمعنى اه وبعدين بص لزين تانى بس المره دى وطى صوته
ابو احمد/ بص حضرتك انا بقول الموضوع مش مستاهل وقفتنا دى الموضوع كله مشكله عائليه ما بين واحد ومراته فبطلب من حضرتك تفرج عنه ونحلها هنا وانا تحت امرك فى اى حاجه
بص زين لهاجر ورجع بصله بتركيز هو واحمد
زين / لا ونعم يا حج...انا عرفت دلوقتى انتم طالعين لمين تعالى ورايا يا حج والاحسن انك تشوف محامى من دلوقتى
شاور زين للعساكر عشان يجيبوا احمد وشاور لهاجر عشان تفضل مكانها ودخل المكتب ووراه احمد وابراهيم وابوهم
قعد زين على المكتب وشاور لابو احمد وابراهيم عشان يقعدوا وفضل احمد واقف قدامه وهو بيتمالك اعصابه
زين / بص يا استاذ دلوقتى ابنك مش موجهله تهمه واحده عشان تقولى انها فى بيتها وتتحل ودى دلوقتى هيتعمله اولا ...محضر تعدٍّ بالضرب والسب على اتنين ستات، والتعدي على أحد رجال الشرطة أثناء تأدية عمله، ومقاومة القوة غير السب والشتم والتهديد العلنى يعنى دلوقتى عندك اربع قضايا ده ان مكانوش خمسه
اتصدم ابو احمد من الى سمعه وبص لاحمد الى كان باصص فى الارض ورجع بص لزين
ابو احمد/ ازاى ده حضرتك مين الاتنين الستات دول والضابط ده... انت
زين / بالضبطط اتهجم على مراته ووالدتها ..وبعد الاستغاثة برجالة الامن اتعدى علينا احنا كمان ...ها لسه هتدافع ولا هتقوم تمشى
بلع ابو احمد ريقه وقام بص لاحمد وقرب منه بعصبيه وضربه على وشه
ابو احمد/ عاجبك الى حطتنا فيه دلوقتى عاجبك تهورك وعصبيتك الى ودتك فى داهيه..وانت انت كنت فين وهو بيعمل كل ده ومحشتوش ليه
بص ابراهيم فى الارض وهو مش عارف يرد عليه
ابو احمد/ انا بتأسف عن ولادى والى حصل منهم احنا عيله محترمه ودى اول مره ندخل قسم لكن انا ابنى للاسف الفتره دى فى حاله عصبيه صعبه جدا سببها زوجته الى بره دى للاسف هى الى وصلته للحاله دى واخر ما عملت رفعت عليه قضية خلع عشان بس تفضحه وسط الناس وتأذينا فى سمعتنا
كان بيبصله زين بإبتسامه وهو حاطط ايده على دقنه وكانه بيسمع اغنيه ومركز فى لحنها
زين / بس واضح اننا عارفين سبب القضيه ايه يا استاذ مش كده
ابو احمد/ لا لا حضرتك دى اول مره يمد ايده.. احمد عمره ما مد ايده على حد ولا ده من طبعه انا ابنى مهندس محترم ومتعلم ومثقف وبشهادة الكل الموضوع كله زى ما قولت لحضرتك ده كان خلاف وبيحلوه بس انا عارف مرات ابنى كويس اكيد هى عصبته واضطرته لانه يعمل كده وحضرتك عارف الستات ممكن يخرجوا الواحد عن شعوره عشان يركبوه الغلط
بصله ابراهيم وهو بيهز راسه بقلة حيله على كدب ابوه
ضحك زين بسخريه / ويا ترى انا كمان عصبت ابنك وخرجته عن شعوره ولا انا تعبان فى دماغى...بص يا استاذ انا ضابط يعنى مش هدور ورا احاسيس الناس وامشى ورا الطب النفسي والدوافع انا قدام الفعل وبس
اتعصب احمد ورد عليه
احمد / حضرتك الى مديت ايدك عليا الاول من غير ما تفهم الى حصل ولا حتى تسال انا مين واقربلها ايه
ابو احمد / اسكت متردش ...انا بتاسف لحضرتك عن الى عمله ابنى وارجو انك تسامحه
زين / والله اسامحه دى مش بايدى فى ايد النيابه
وقف ابو احمد بسرعه واستاذن من زين عشان يخرج
ابو احمد/ طب استاذن من حضرتك و اطلب المحامى
زين / اتفضل وخليه يجى بسرعه
خرج ابو احمد وفضل ابراهيم قاعد وزين بيص لاحمد بتركيز ورجع بص لابراهيم
زين / قولى بقى ...دى كانت اول مره اخوك يمد ايده على مراته
سكت ابراهيم وبص لاحمد الى كان بيبرقله ومقدرش يتكلم لانه لو اتكلم الوضع هيسوء
زين /اممم...وماله خليك ساكت هى باينه لوحدها
♥️♥️♥️♥️♥️♥️♥️♥️♥️♥️♥️♥️♥️
خرج ابو احمد وكلم المحامى عشان يجى بسرعه ورجع عشان يدخل بس بص لهاجر الى كانت قاعده فى الطرقه وراحلها بعصبية وبغضب ومسكها من دراعها فاتألمت هاجر وهى باعده وشها بصدمه لان حماها اول مره تشوفه بيبصلها كده واول مره يمد ايده عليها وفضلت تبصله وهى بتسمع كلامه بصدمه اكبر
ابو احمد / انتى قاعده هنا وجوزك جوه بيتعمله محضر وهيتحبس صحيح الحياء والخجل راحوا ..اسمعى لو عايزه تطلقى انتى كده كده هتطلقى انا مرضاش ان واحده زيك تفضل عايشه فى بيتى كفايه الفضايح الى جبتهالنا بس قبل الطلاق تدخلى دلوقتى تتنازلى عن المحضر والا الخلع الى انتى ماشيه فيه ده لا هتطوليه ولا هتطولى طلاق و البنتين دول مش هتشوفيهم تانى واظن سهله مش هيفضلوا مع ابوهم يبقى مش هيفضلوا مع امهم فى ميت حاجه تروح للمحكمه تمنعهم عنك وهتفضلى كده زى البيت الوقف واظن انا مكبرتش ولا عجزت للدرجه دى عشان يقولوا عليا خرفت سامعه يا بنت عبدالله اتقى شرى احسن
زقها ابو احمد قدامه
/ادخلى قدامى يلا ...يلا
مشيت هاجر وهى ماسكه ايديها ودماغها واقفه من التفكير مش عارفه تصدق كلامه ولا تقف و تثور ضده ولا تبعد عنهم نهائى من غير اذى ولا كلام
♥️♥️♥️♥️♥️♥️♥️♥️♥️♥️♥️♥️♥️
فى بيت العيله
ام احمد/ جيب العواقب سليمه يارب يارب ميكونش عملها حاجه دى غلبانه استرها من عندك
كانت قاعده ميار مربعه ايديها وهى بتبص لحماتها الى كانت بتدعى وهى قرفانه وبتقول فى نفسها
(ايكش يكون موتها وخلصنا منها بس نفسي المره دى ميكونش حصلها حاجه اكيد هتحبسه مش هترتاح غير بكده)
ام احمد / ما ترنى تانى با بنتى على عمك ولا على ابراهيم حد يطمنا عليهم
ميار / محدش بيرد اعملهم ايه اكيد مش فاضيين مشغولين مع البيه الى مش بيريح نفسه ما كان طلقها وخلصنا منها
ام احمد/ يا بنتى مش كده حرام عليكم انتم بتعملوا كده ليه دى مراته وام بناته انا مش عارفه بيعمل معاها كده ليه دى غلبانه
ميار/ اه شوفى الحلوه الغلبانه الى هتحبس ابنك ويعالم هيطلع منها ولا لا عشان تامنوها بعد كده
ام احمد/ جيب العواقب سليمه يارب
قعدت تبصلها هاجر وهى لاويه بوقها
(ادعى ياختى ادعى يكش يستجاب منك )
♥️♥️♥️♥️♥️♥️♥️♥️♥️♥️♥️♥️♥️♥️♥️
دخلت هاجر من الباب وبصلها زين وهو مضيق عينه ووراها ابو احمد
زين بغضب/انتى ايه الى دخلك مش قولتلك خليكى بره
بصتله هاجر بارتباك وهى بتبص لحماها ورجعت بصت لزين والكلام واقف فى زورها ومش راضى يطلع
اخدها ابو احمد تحت دراعه وهو بيبتسم بتصنع
ابو احمد / حضرتك هاجر جايه تتنازل عن المحضر عشان مترضاش ان ابو عيالها يتحبس مش قولتلك كانت وذة شيطان وراحت لحالها مش كده يا بنتى
بصتله هاجر وهى مش عارفه تتكلم ورجعت بصت لزين وهزت راسها بخوف
اتعصب زين ووقف وهبد بايده على المكتب خلت كل الى موجودين يتخضوا
زين / هو لعب عيال ولا ايييه يعنى ايه تنازل انتم جايين تهزروا انا مش مصلح اجتماعى هنا .. مش دى الى كانت عايزه خراب البيت من شويه فجاة كده بقت الموناليزا
ابو احمد/ يا فندم فيها ايه بس احنا كل الى عايزينه منخربش البيت عشان سوء تفاهم ووذه من الشيطان تخلينا نعادى بعض وان كان على هاجر ف دى بنتى وانا بعمل ده عشانها وعشان عيالها مش كده
وقرب من هاجر وباس راسها
ابو احمد/ وادى راسها اهى حقك عليا انا واوعدك قدام الباشا انها مش هتحصل تانى وانا الى هقفله بعد كده
بصت هاجر لاحمد الى كان بيبصلها بقرف وهو مش طايقها وماسك نفسه
قعد زين وهو بيبصله بإحتقار
زين / تمام وماله وماله يا استاذ وانا بقى هتعمل معايا ايه تعالى بوس راسى انا كمان بالمره وامسح الى ابنك عمله معايا
ابو احمد/ حضرت...
زين / بس...المدام هتتنازل
مردتش عليه هاجر
زين بغضب/ تمام...اكتب يا ابنى فى المحضر انه اتعدى على ضابط اثناء تادية عمله بالضرب والسب وامر بحبسه اربع ايام وتحويله على النيابه وهم يتصرفوا معاه...اتفضلوا
جه ابو احمد عشان يتكلم بس زين وقفهم وشاور للعسكرى واخد احمد وطلع وهم طلعوا وراه بس زين شاور لهاجر عشان تفضل
وقفت هاجر وزين قام من على الكرسي ووقف قدامعا وهو متعصب وبيضغط على ايده بغضب
وهى واقفه وباصه فى الارض وماسكه ايديها بارتباك
♥️♥️♥️♥️♥️♥️♥️♥️♥️♥️♥️♥️♥️♥️
اخد العسكرى احمد وهو متردد وخايف يدخل الحجز ومش عارف ايه الى جاى وبص لابوه ولابراهيم على امل يلحقوه
ابو احمد/ اهدى متقلقش المحامى زمانه جاى هتتحل
مشى احمد و وقف ابو احمد وهو متعصب وبيضرب بايده على رجله
ابو احمد/ قولى نحلها ازاى يا فهيم اخوك هيتحبس وهيتحول على النيابه الضابط الى جوه ده مش هيتنازل عن حقه وهيدخل اخوك السجن وانا المحامى قال لو هى اتنازلت يبقى كده الحكم خف عنه بس الضابط مش هيسكت كله بسببكم انت لو كنت وصلت قبله يا شملول مكنش ده حصل اخوك هيبات فى الحجز مبسووط
ابراهيم/ اكيد يعنى مش مبسوط يا بابا مهو الى حصل مش قليل فى الحالتين كان هبتحبس ده مده ايده على ام هاجر الى قد امه ومسكتش وضرب الضابط قدامى عايزنا نعمل ايه
ابو احمد/ غبى غبى قولتله ميت مره ومسمعش مهو لو كان حاكم مراته من الاول مكنتش خرجت عن طوعه ووصلته لهنا
فضلوا يستنوا المحامى و رجع ابراهيم ورا وسند على الحيطه وربع ايده وهو بيراقب ابوه الى رايح جاى بعصبيه وبيقول فى نفسه
(احسن خليه يتربى شويه ويعرف ان الله حق)
♥️♥️♥️♥️♥️♥️♥️♥️♥️♥️♥️♥️♥️♥️♥️
زين / انا مليش انى أتدخل فى حياتك انتى حره ده حقك انتى عايزه تاخديه..عايزه تفرطى فيه ان شالله تولعى فى نفسك انتى حره
بس انا عايز افهم حاجه واحده.. انتى وارثه الغباء بالفطره ولا ده مجهود شخصى
بصتله هاجر بصدمه وهى مش عارفه ترد
زين / ما تردييي انتى غبييه؟
خافت هاجر اكتر وقعدت على الكرسي وهى بتعيط
فاتعصب زين اكتر وجز على سنانه وحاول يهدى نفسه وقعد قصادها على الكرسي وهو حاطط ايده على دقنه ومتابعها بفارغ الصبر
هاجر/ انت معاك حق انا غبيه فعلا
زين / ما انا عارف مش محتاجه ذكاء عشان افهم من اول ما شوفتك وانا حسيت بكده
هاجر/ ممكن كفايه بقى
زين / ايه زعلتك اوى دى معلش تعالى على نفسك مجتش على دى
هاجر/ انت عايزنى اعمل ايه ها ...انا مليش حد مليش غير امى .. ست كبيره وملهاش غيرى لا اب ولا عم ولا خال ولا حتى جوز مقدرش اقف لوحدى ومفيش حد فى ضهرى حتى.. وانا مش عايزه حاجه غير انى اربى بناتى فى هدوء مش عايزه مشاكل مع حد ولا حد يأذينى ولا أذى حد انا مش عايزه ازود المشاكل انا كل الى. كنت عاوزاه ان الطلاق يتم بهدوء واسيب البنات ما بينا زى الناس السويه وابعد عن المحاكم والقرف حتى لو مش هاخد اى حقوق.. بناتى عندى بده كله بس محدش بيفهم
فضل زين بيسمعها وهو مضيق عينه ولسه حاطط ايده على دقنه وبعدين اتحمحم واتعدل فى قعدته
زين / قومى روحى يا هاجر
بصتله هاجر بتركيز وهى مش فاهمه ردة فعله
زين/ يا عسكرييي
اتخضت هاجر وبعدين دخل العسكرى فاخد زين مفتاح عربيته وادهوله
زين / خد المدام ووصلها شارع......وتعالى
هاجر / لا شكرا انا هروح لو....
زين / يلا يا ابنى ومتتاخرش
قاام زين ولف وقعد على الكرسي وكانه مسمعهاش وهى اتكسفت وقامت براحه وهى بتبصله وهو مبصلهاش وبعدين خرجت من المكتب بهدوء فبصلها زين وهو مضيق عينه وكأنه بيفكر فى حاجه وهو ماسك التقرير بتاع المستشفى
♥️♥️♥️♥️♥️♥️♥️♥️♥️♥️♥️♥️♥️♥️
فى بيت هاجر
ام هاجر/لسه مفيش اخبار يا بنتى
ساره/لا يا طنط محدش رد برضه
ام هاجر/ يارب استرها
ساره/خير ان شاء الله يا طنط
تعالى يا نغم يا حبيبتي كلى انتى مش جعانه
نغم / لا ..انا عايزه ماما
ساره/ ماما زمانها جايه يا حبيبتي متخافيش
بعد شويه الباب خبط فاتخضوا كلهم وقامت ساره بسرعه ووقفت عند الباب
ساره/ ميين
هاحر/ افتحى يا ساره انا هاجر
ساره بفرحه/ هاجر
فتحت ساره بسرعه وقاموا كلهم بفرحه عند الباب يقابلوها وهم بيحضنوا فيها
ام هاجر/ الحمدلله يارب انتى كويسه يا قلب امك
هاجر/ اااه كويسه يا ماما ..بس عايزه انام مش قادره
ام هاجر/ تعالى تعالى يا حبيبتي اقعدى سنديها يا ساره
سندتها ساره وراحت قعدتها على الكنبه
هاجر/ اااه ضهرى واجعنى اوي
ساره/ مروحتيش المستشفى ليه
هاجر/ ما انا روحت وكشفت والحمدلله مفيش حاجه هم شوية كدمات
ام هاجر/ ضربه فى قلبه البعيد ربنا ينتقم
ساره/ الحمدلله انها وسطنا ..ايه الى حصل هناك ابراهيم مجاش معاكى
هاجر/ لا لسه هناك اصل...
بصت هاجر لنغم الى كانت حضناها ففهمت ساره
ساره/ نغم يا حبيبتي شوفى كده ساجد صحى ولا لا
نغم / حاضر
مشيت نغم وكملت هاجر / اتحبس اربع ايام وهيتعرض على النيابه
ساره/ بجد وبعدين اظن كده الطلاق هيتم من غير ما تعملى خلع والمحضر يثبت
هاجر/ لا مهو...
ساره/ مهو ايه
هاجر/ انا اتنازلت عن المحضر
ام هاجر/ يا نصبتيييي عملتى ايه وحقك يا بنتى ليه كده
ساره/ امال اتحبس ازاى
هاجر/ الضابط مرضاش يتنازل عن حقه
ام هاجر/ والله جدع وابن ابوه بيعرف يدور على حقه مش بيسيبه
ساره/ ليه كده يا هاجر انتى عارفه ان المحضر ده كان هيخلصك منه بسهوله وكمان كان ممكن يعمله محضر تانى بعدم التعرض عشان يحميكى والبنات كده كده خلاص معاكى انتى ضيعتى كتير اوى يا هاجر اوى
عيطت هاجر جامد وهى مش عارفه تتكلم
ام هاجر/ استهدى بالله يا بنتى المهم انه اتحبس ان شاء الله ياخدله فيها مؤبد ومعدناش نشوف وشه
ساره/ استهدى بالله يا حبيبتي المهم انك بخير
ام هاجر/ بخير فين بس انتى مش شايفاها ده اولى كانت ايديه الاتنين يتقطعوا عشان يعرف ان الله حق
طبطبت ساره عليها وقعدت تهديها وهى منهاره وامها مازالت بتحسبن عليهم وعدى اليوم وساره مشيت بعد ما هاجر دخلت نامت واطمنت عليها
♥️♥️♥️♥️♥️♥️♥️♥️♥️♥️♥️♥️
بعد مرور 3 ايام
صحيت هاجر من النوم وهى كانت بتتاقلم على وجع جسمها من الكدمات الى اخدت لون ازرق وبنفسحى
ومشيت فى الصاله ومامتها كانت فى المطبخ بعد شويه سمعت صوت الجرس بتاع الباب حست بخوف شويه بس اطمنت لما سمعت الجرس وراحت فتحت الباب
هاجر/ هدي
حضنتها هدى جامد وهى بتضحك
هدى/ وحشتييني اوييي
هاجر/ انت الى وحشتينيي اوي ...بقالى كتير مشوفتكيش
هدى/ ما انتى واطيه ولا بتيحى ولا بتسألى حتى بتمشى فى نفس اليوم ولا بتردى على تليفونات
هاجر/ غصب عنى بجد متسالنيش على اى حاجه فى الفتره الى فاتت دى بجد
حزنت هدى وحضنتها جامد وهى بتدعمها على امل تخفف عنها بس قاطعهم صوت طفولى غضبان
تقى / طنط هاجر انتى نسيتينى ولا ايه
هاجر/ تقى ..عامله ايه يا روحى لا منستكيش انا اقدر
تقى/ كل ده حضن لماما لماما وانا
حضنتها هاجر وباستها وهى بتضحك
هاجر/تعالوا اتفضلوا ..مامااا تعالى هدى هنا
قعدوا فى الصالون وجت ام هاجر وسلمت عليها
ام هاجر/عاش من شافك يعنى مشوفكيش الا وهاجر هنا
هدى/ اعمل ايه بس يا طنط والله ما بفضى من ساعة ما الهانم دى دخلت المدرسه وانا كل يوم فى قصص تقولى داخله الجامعه
ام هاجر/ دى حبيبة قلبى دى بيكم كلكم
هدى/ لا انتى تروحى تقعدى جمب ماما يا طنط انا زهقت
ضحكوا على تذمر هدى وكملوا كلام وقامت ام هاجر واخدت تقى تلعب البنات
هدى/ انتى كويسه طمنينى عليكى
هاجر / هه.. جدا
هدى / بكلمك بجد
هاجر/ طبعا حضرتى الماراثون الى كان هنا من 3 ايام
هدى / انا مصدقتش بجد مش معقول مستحيل ده يكون احمد الى كنتى بتحكيلى عنه ..الى عوضك عن باباكى
هاجر / كنت بقى
هدى / اقول ايه الواحد بقى يتوقع اى حاجه
سكتت هاجر وهى مش عارفه ترد ولا عايزه تفكر نفسها باى حاجه طبطبت هاجر على رجلها فابتسمت لها هاجر
هدى / المهم عايزه اطلب منك طلب اعذرينى
هاجر /طبعا اتقضلى يا حبيبتي
هدى / انا سايبه زين اخويا واقف تحت وبصراحه هو عايز يجى يشوفك
استغربت هاجر من طلبها وبالاكتر لما سمعت الاسم
هاجر/ زين...اخوكى عايز يشوفنى ليه
هدى / انتى مش واخده بالك صح ..زين هو الضابط الى ...
اتفاجأت هاجر و....
