رواية فدى سكينة الفصل الثالث عشر والاخير بقلم زينب سمير
.
بكرة هو اليوم المنتظر، الشمس قاربت على الغروب، بص فراس حواليه يتأكد من كل حاجة
عمل كل مهامه اليومية اللي بقيت أعتيادية بالنسباله، دخل بعدها الخيمة، فضل يلف حوالين نفسه وهو بيفكر في كل الإحتمالات
بعد ساعات من التفكير لقى الليل لسة طويل
كلم نفسه بتنهيدة طويلة- أنا هنام أحسن.. خلي الوقت يمر
قربت منه صوفيا كالعادة، فقعدها جنبه فضل يتقلب يمين وشمال
لحد ما في الأخر عقله من الإرهاق استسلم ونام
- ما تخلي الصباح يطل عليه نشب النار فيه وبخيمته ومحصوله ما بدي ألمح له آثر.
صدحت كلمات فؤاد في ودن مساعده وهو بيقرب من خيمة فراس في عتمة الليل، ملثم وماسك شعلة نار، وصل للخيمة وقف لثواني يبصلها قبل ما يقرب بالشعلة ناحية قماش الخيمة التقيل ثبتها لثواني قبل ما تمسك النار في طرفها
وتتسلسل تدريجيًا وببطء
أتأكد من إتمام جزء من مهمته ومشى، يكمل طريقه لمكان أرض فراس المخصصة ليه ومحصوله،
في أرض عساف.. واقف عساف مع عباس اللي قال- هيك كل شيء جاهز للحصاد هيدي..
شاور لكمية كبيرة جدًا- هي محاصيل كل أراضينا
وهيدا..
شاور لكمية أقل منها نسبيًا- محصول الأرض اللي بتنافس فيها مع فراس
هز عساف راسه، فسأل عباس بفضول- شو بتتوقع؟ بتفوز ولا بيفوز؟
- بكره بنشوف
- لو ما فاز..
قبل ما يرد عساف قرب حد من رجالته بيجري- ياشيخ في حريق ناشب..
لف عباس وعساف بفزع- ياستير وين..
مشوا بخطواتهم مع الراجل لحد ما شاور لحتة بعيدة عنهم شوية، ضيق عباس عيونه لثواني قبل ما ينطق بفزع وخوف شديد- هيدي خيمة فراس..
مستناش لحظة كمان وبدأ يجري للمكان وهو بينطق بصراخ- نادي الرجال وتعال لنردمها بالرمل.. شهل
عساف- روح نفذ اللي قاله..
مشى الراجل وشاور عساف لواحد تاني من رجالته يقرب منه- بقولك شي بتعمله..
خلص كلامه بسرعة وطلع هو كمان ورا عباس، وصل عباس بينهج
بدأ يصرخ باسم فراس وهو بيلف حوالين الخيمة- فراس.. فراس
وصل عساف في اللحظة دي
وحد من رجالته جه من ناحية الزريبة- ما في حدا هناك.. مية بالمية بيكون جوه خيمته
بصوا الأتنين لبعض بخوف وقلق قربوا من الخيمة وقبل ما يدخلوا اتحرك قماش الخيمة وظهر فراس وشه أحمر من حرارة النار ووشـه مليان هباب أسود، بيكح جامد
قرب عباس منه فورًا يمسك من دراعه ينطق بلهفة- أنت مليح؟ حدا يجيب مي بسرعة
كان دايخ.. من الدخان من المفاجأة.. من آثار النعاس
قرب عساف منه وقبل ما يتكلم وسعت عيون فراس وكأنه أفتكر حاجة فلت من إيد عباس ودخل يجري تاني للخيمة، صرخ عباس وهو بيمشي وراه- شو بيتعمل أنت تعال لهون.. فراس
عساف بعصبية- شو به هلمجنون.. مشان شو بدو يضحي بحاله
وقفت عربية قريب منهم في اللحظة دي نزلت منها سكينة بتجري ووراها وداد بتحاول تهديها
قربت من تجمعهم تصرخ وهي بتجري بإندفاع ناحية الخيمة- فراس..
مسكها عساف من دراعها قبل ما تقرب أكتر باين في عيونه الفزع- شو بتعملي وقفي هنا
شاورت بخوف لجوه وهي مش قادرة تتكلم
حاول يطمنها بصوته- بيطلع.. كان هون وطلع بخير لكنه دخل تاني هلمجنون ما بنعرف ليش وما تقلقي الرجال بيطفوا الناس.. بيكون منيح
خرج فراس أخيرًا ماسك في إيده لحاف شايل فيه حاجة وبيضمها بقوة
قرب منه عساف بغيظ وخوف شديد زقـه من كتفه بعنف وبتوبيخ- شو جرا لعقلك.. بتدخل للنار برجلك مشان شو.. شو في أغلى من روحك
ببطء شديد نزل اللحاف عن اللي في إيده علشان تظهر صوفيا..
نطق بصوت مبحوح- هي كمان روح.. مكنتش هقدر اسيبها تموت
غمض عساف راسه بتنهيدة، ولف عباس وهو بيمسح على وشـه بتعب وآرهاق
مكنش فيه رد، صدمهم بـ رقـة ولين قلبه حتى وسط أصعب لحظات حياته
نطقت سكينة بدموع- المهم إنك كويس.. حاسس بحاجة؟
مـدت إيدها تلمس وشـه بحنان
نفى ببسمة خفيفة- متقلقيش مجراش حاجة
بعد ربع ساعة من كلمات الإطمئنان، النار طفت والزوبعة هديت
نطق عباس وحواجبه معقودة بتفكير- لكن شو اللي ولع بخيمتك هيك؟ أنت كنت تارك نار بره؟
نفى فراس براسه- لا مكنتش مولع حاجة
سكينة بتعجب- اومال ولعت أزاي
عساف وعيونه باصه للأرض- بنشوف.. بنعرف.. راح نعرف كل شي
هلا خلينا نروح
كلهم بدأوا يقوموا وفراس لسة في مكانه بصله- هلم..
فراس- هنام في الزريبة زي الأول مش هتفرق كلها ليلة
عباس وهو بيحاوطه بكتفه- ما بينفع تقعد هون لحظة كمان ما بندري شو بيحصل.. يلا خلينا نروح للدار ونعسل هبابة بكرة يوم طويل
في الأخر استسلم فراس ومشى معاهم..
دخل فراس لأوضة في الدار، وقف يبص حواليه ورغم الرعب اللي حصله إلا إنه أبتسم.. هو تحت سقف واحد مع سكينة
خبطة قوية على الباب ودخول عباس معاه لحاف
- يلا أرتحلك شوي قبل ما النور يشقشق.. بـدك شي؟ بخلي وداد تسخنلك تاكل
- لا مش جعان أنا هنام علطول
بصله عباس لثواني وهو لسة بيحاول يستوعب إنه لا قدر الله كان ممكن يفقدوه في أي لحظة
لكنه هز راسه في الأخر وربت على كتفه
لاحظ فراس صمت عباس المريب وهدوئه فقال بمشاكسة- مقولتيليش ياعبوسة.. فين أوضة سكينة؟
لمعت الشراسة في عيون عباس علطول وقرب يمسكه من ياقة لبسه- بتعرف لو خرجت من باب هي الغرفة شو بعمل فيك؟
ما تطلع من هون لحتى أجيك بالصباح..
مثل فراس الخوف- اوك اوك فاهم سيبني ياعبوسة متبقاش قفوش كدا
- عمومًا أنا راح أحرس باب هلغرفة.. وريني كيف بدك تطلع
مشى وسابه ووقف فراس يبص لآثره ببسمة خفيفة
قبل ما ياخد اللحاف ويروح للسرير، فرد جسمه عليه وهو بيتنهظ براحة
فات قد أية وهو مش بينام على سرير.. ومرتبة
*****
في ساحة كبيرة، تجمع ناس كبير وصوت صخب والكل بيتكلم، الكل عارف بالرهان وجاي متحمس علشان يشوف النتيجة، وقف عباس في الوسط
وعساف من ناحية جنبه محصوله وفراس من ناحية جنبه محصوله..
ملامح عساف هادية، راسيـة.. وملامح فىاس متحفزة عيونه عمالة تمر بين المحصولين وهو بيضيق عيونه بمقارنة ببحاول يحسب مـدى الفرق ولصالح مين..
صدح صوت عباس- بنبدأ هلا..
قربت سكينة مع وداد واقفين ورا الناس في الزحمة، مغطيين وشهم ومش ظاهر غير عيونهم
مسكت وداد إيد سكينة المتلجة- ما تقلقي.. بيحصل كل خير
- إن شاء الله، إن شاء الله..
الدراسة بدأت تدرس، المحصول بينزل من الناحيتين كل شوية كمية واحد فيهم تبان أكتر من التاني والكل يهلل..
لحد ما خلصوا وبدأوا يكيلوا، فراس بيبص على المحصول وبس.. ملامحه مشـدودة، ضاغط شفايفه على بعض بتوتر وكل شوية يمرر إيده في شعره ويشـد فيـه بعصبية
لحد ما بص عباس في الورقة وبص لفراس بملامح مش مفهومة- محصولك..
- هـا؟
حثه يتكلم بأعصاب منفلتة، أبتسم عباس- الأكبر.. أنت اللي كسبت المنافسـة، مبروك عليك سكينتك
صرخ فراس بفرحة وهو بيجري عليه ينط عليه يحضنه بحماس مسكه عباس وهو بيتعدل في وقفته قبل ما ياخده ويقع بيـه وهو بيضحك..
بص بجانب عينه لعساف لقاه باصص للأرض وبسمة خفيفة هادية باينة على ملامح وشـه
وأفتكر اللي حصل أمبارح..
بعد ما أطمن إن فراس نام راح لعساف بالمجلس
- عندك تفسير للي صار؟
- أي.. هلحقير فؤاد هو ورا هاي العملة، لما عرفت بالحريق بعت واحد من رجالتي ينتبه للمحاصيل، لقى رفيقه لفؤاد جاي وناوي يحرق المحصول فمسكه والأخير قّر بكل شي
عباس بغل- ما نوي يبط هلخسيس
إتنهد عساف كمل عباس- بتعرف.. بالأول ما كنت طايقه لفراس بس هلا اتغير رأيي بتوقع إنه أنسب حدا لسكينة.. بيحبها وبيخاف عليها، صحيح ماله من قبيلتنا ولا منطقتنا بس.. أحسن بكتير من اللي يمنا
هز عساف راسه ببطء بتأكيـد قبل ما ينطق- مشان هيك.. خليت راجلي ياخد من محصولي ويحطه لفراس.. ليكسب.. لانو لازم يكسب في هلمنافسة قدام الكل، ما ينفع أرجع بكلمتي بعدها وما ينفع هو يحس إنه تعب راح في الفضا
فاق عباس من شروده وأبتسم ومن جواه وحسب كمية المحصول عارف إن حتى لو عساف مكنش حط لفراس من محصوله، كان فراس هيكسب برضوا، لأن محصوله الأكتر بفرق واضح..
صوت من ورا قطع اللحظة دي- فراس،..
بَعد عن عباس وبص وراه بخضة- ماما
قربت وعيونها مليانة دموع، جرى عليها بشـوق ولهفة، فتحت دراعاتها فأترمى فيهم ونطقت بآسف- أنا أسفة.. أنا طول عمري همي الوحيد أني أشوفك مبسوط وسعيد، ولما لقيت سعادتك الحقيقية أنا وقفت في وشـك، فكرت في شوية أعتبارات ملهاش أي ستين لازمة، أنا مبسوطة وفخورة بيك، عماد حكالي على كل حاجة.. مبروك ليك يافراس، أنا مبسوطة من قلبي ليك
لمحت من وراه عساف واقف، فقربت تنطق بحرج وأعتذار- سامحني على قلة ذوقي معاك
- حصل خير ياهانم..
أبتسمت بلطف- طلعت أكرم وأحسن مني.. ودلوقتي خلينا نطلب منك طلب
ظهر عماد من وراها وحاوط كتفها وبصوا لعساف سـوا- أحنا طالبين إيد سكينة أختك لفراس
فراس كان حاسس إنه في حلم.. حلم مش عايز يصحى منه من حلاوته
هز عساف راسه بالموافقة، فبص عباس حواليه يقول بسعادة- خلينا ننادي عروستنا
لمح وداد فشاورلها- وداد وين عروستنا
وداد وبسمة واسعة على وشها، بتلف علشان تبص وراها وهي بتقول- هون عروستنا..
لكن ظهرت ملامح التعجب والخضة على وشها بدأت تبص في الوشوش بحيرة وهي بتنادي- سكينة.. سكينة
بصت لعباس وعساف- كانت هون جنبي ما بعرف وين راحت
بص عساف وعباس لبعض بتفكير، قرب فراس منهم يسأل بلهفة- في أية.. بتفكروا في أية
نطق عساف ببطء- فؤاد.. فؤاد ورا حريق أمبارح وهو اللي دس عليك كريمة.. بفكر لو إنه..
مكملش كلمته وفراس طلع يجري بلا هودة زي المجنون
وهو فهم اللي عايز يقوله عساف.. لو أن فؤاد ورا خطفها
في ثانية أتقلبت الدنيا والكل بدأ يجري هنا وهناك بتلبك،
ظهر طفل صغير وهو بينهج- ياشيخ.. شوف رجال شايل سكينة على كتفه وبيجري
قرب فراس منه يسأله- فين.. راح بيها فين
شاور على جهة و..
*****
رمشت سكينة بعيونها وهي بتتآوه بوجع، فتحت عيونها ببطء وهي حاسة إنها في عربية بتتحرك بيها، أخر حاجة فكراها عباس وهو بيعلن فوز فراس، وفجأة حست باللي بيسحبها من بين الجموع، وقبل ما تستوعب كان ضاربها على راسها..
حست بأنفاس بتقرب منها، وصوت بتكرهه أشـد الكره- فوقتي ياعروسة
فتحت عيونها بخضة لما سمعت صوته ورجع ليها إدراكها الكامل
أتسحبت لورا بخوف وهي بتبص حواليها بتحاول تفهم اللي حصل
- ما تتلففي حواليكي كتير ما في مهرب لإلك اليوم.. اليوم بتكوني لإلي.. بتكوني عروستي، مو بعد كل هلسنين بتروحي لغيري ياسكينة، ما راح اسمحلك بهيك شي
هزت راسها بنفي وهي بتبص حواليها، العربية بتمشي بيها وتبعد
- فؤاد بطل جنان نزلني هنا.. عساف أخويا مش هيسيبك
- اللي بيحصل يحصل، المهم اليوم بتكوني لي يعني بتكوني لي
وزعق لسواقه- سرع..
- بالله عليك نزلني، الحب مش بالطريقة دي..
- أنا طلبتك بالذوق ما نفع.. بنجرب العافية
وقفت العربية أخيرًا في مكان هَو، فيه صخور متفرقة من حواليه، طريق صعب وواعر، نزل وهو بيجرها وراه، فضلت تحاول تسحب نفسها منه لكنه أقوى منها
شـد على دراعها بقوة- كفاكي فرك واهمدي.. ارضخي للي بيصير
لكنها عضت إيده بغل، لف يبصلها وبأقوى ما عنده ضربها بالكف
صرخت بوجع وهي بتقع في الأرض، مال عليها يقول- معافترك ما راح تآذي غيرك.. استسلمى ما تخليني آذيكي
كانت واقعة على الأرض وهو مقرب منها، ضمت بكف إيدها على الرمل اللي تحت إيدها ولف تبصله وبسرعة رمت الرملة اللي في إيديها على عيونه
تآوه بوجع وهو بيرجع بخطواته لورا ومغمض عيونه اللي حرقاه، بسرعة وقفت وبدأت تتحرك في المكان بلا هوادة،
حاول سواقه يمسكها لكنها زقته بعنف هو كمان..
بدأت تجري وهما وراها،
لحد ما لمحت أخيرًا طوق نجاتها، نادت باسمه بلهفة- فراس
قرب منها وهو بينهج، بص لفؤاد اللي بيقرب، مسك إيدها وخدها يجروا وسط الصخور، وقفوا ورا وحدة فيهم
- أنتي كويسة عملك حاجة؟
نفت براسها و- خدني من هنا أرجوك
- اتنفسي بس اطمني انا معاكي.. وعساف جاي ورايا
مسك إيدها وبدأوا يمشوا بخطوات حذرة، خصوصًا وصوت فؤاد الجهوري حواليهم بينادي عليها بجنون
لمحهم سواقه فشاور عليهم، فبدأوا يجروا من تاني وفؤاد وراهم
- ما راح اتركه لإله أبدًا..
طلع مسدس وعمره، صوته وقف سكينة وفراس.. نطق فؤاد بغل- يابموتك.. يابموته..
رفع المسدس عليهم، لفوا ببطء يبصوله، وقف فراس و زق سكينة تقف وراه، حاولت تمنعه لكنه مـد إيده يشـد عليها علشان تثبت مكانها
- متتحركيش
- فراس لا..
فؤاد- اتركها
- مش هسيبها
- بموتك..
ابتسمله ببطء، وثواني وصدحت صوت رصاصة في الأجواء
غمضت سكينة عيونها وهي بتصرخ- فراس..
سـاد صمت رهيب لثواني، قبل ما تفتح عيونها ببطء ورعب، بصت لفراس لكنه كان لسة ثابت قدامها، لمحت فؤاد واقع على الأرض ووراه عساف، وسلاحه في إيده
عباس بإشمئزاز- كلب وراح..
قرب عساف منهم يمسك سكينة يتفحصها بلهفة- أنتِ منيحة؟
هزت راسها وهي لسة بتترعش
قرب عباس من فراس- كان لازم يحصل فيه هيك من زمان
قال كدا قبل ما يتتهد بأسف- صحيح يمكن يخسر الشيخ مكانته وما بيظل شيخ القبيلة لإن ما ينفع حدا يحكم بين الناس وهو جائر دم.. حتى لو كان دفاع عن النفس أو الشرف.. لكن ما بعتقد الشيخ فكر بهل شيء
بصله فراس بسكون، وبص لعساف..
عاش عساف حياته كلها وهو شيخ قبيلة وكبير قبيلة، دي جزء من شخصيته، دي حياته.. ده آرثه
صوت خطوات بتقرب وناس، حتى هنا في قانون وحكومة
قبل ما حد يستوعب حاجة، قرب فراس وخد من عساف المسدس
بصله عساف بعدم فهم
فراس ببسمة خفيفة- مش هعرف أناديك عساف من غير الشيخ، المشيخة دي آرث وميراث ليكم، محدش يستحقها غيرك
أعترض عساف ولسة هيحاول ياخده منه، شـد فراس عليه- سيبه، لكن أوعدني.. سكينة هتفضل ليـا
نطق عساف بوعـد- ما راح تكون زوجة لحدا غيرك.. ما بتتكتب غير على اسمك.. ما حدا يستحقها غيرك، لو دورت في العالم كله ما بلاقي حدا متلك
أبتسم فراس
وسكينة باصة بدموع بينهم هما الأتنين
الكفتين مترجحتين، الأتنين روحها، متقدرش تختار واحد وتسيب التاني
بص لسكينة وبغمزة خفيفة وصوت إنذار العربيات الشرطة بيصدح- هتستنيني؟
بدموع- هستناك.. هستناك عمري كله
بعد تلت سنين ونص..
صوت سكينة العصبي- مش هتكلمي خالو طول ما أنتي مبتكليش
قولها حاجة ياعساف
صوت ضحكة عالية لعساف وصورته ظاهرة على الفون، مكالمة فيديو- حبيبة قلب خالها بتعمل اللي بدها ياه، لكن ياعيوني اسمعي كلام ماما.. يلا علشان تكبري وتجي قريب لشوفك.. توحشتك كتير
سمعت الطفلة الكلام وفتحت بوقها، سكينة بدهشـة- شوف البت!
بصت لأخوها في الشاشة- سـرك باتع
قبل ما تكمل بغيرة- بس أنا بقيت حاسة إن الهانم أخدت مكاني في قلبك
بصدق- ما في حدا بياخد مكانك
كمل بضحكة خفيفة- هي خدت مكان أكبر منك
- عسـاف..
ففعلًا بعد ما الكل قال عساف عمره ما هيحب حد أكتر من سكينة، حب بنت سكينة باللي أكتر
سأل- وينه جوزك
- في شغله، بيخلص اللي وراه قبل السفر
- بنستناكم على خير
أبتسمت وهي بتقفل معاه وتفتكر اللي حصل من تلت سنين..
لما الشرطة جت ومسكت فراس، لكن لحسن الحظ فؤاد طلع عايش، وبتهديدات عساف لأبوه تنازل عن حقه، لإنه خطأه من الأول!
ودلوقتي هي أتجوزت فراس..
بص للباب اللي أتفتح ودخل منه فراس، قرب يحضنها وهي بيتنهد براحة
نطقت بمرح- على اساس مش بتلاقي سكينتك غير في حضني وبتاع
- ما ده الحقيقي على فكرة
ضحكت وهي بتضمه ليها أكتر..
انتهت احداث الرواية نتمني أن تكون نالت اعجابكم وبانتظار آراءكم في التعليقات شكرا لزيارتكم عالم روايات سكير هوم
شكرا لزيارتكم عالم روايات سكيرهوم
