رواية اساطير الورد الفصل الثالث عشر
🌹🌹🌹🌹🌹🌹🌹🌹🌹🌹🌹🌹
كانا يتبادلان النظرات الصامته و كأنهما فقدا النطق تماماً و عيناهما فقط هي من تتحدث.
نطق دون وعيٍ منه وقال: عيونك جميله أوي.
حملقت به بشدة و ذهول في آنٍ ثم تهاوت أرضاً فاقدةً للوعي.
_يا خبر أبيض.
نطق بها مذعوراً ثم جثا علي ركبتيه و أمسك برأسها وهو يربت فوق وجنتيها بلطف تارةً و بشدة تارةً أخري ويقول:
_يا آنسه ورد.. فوقي.. يا آنسه.
لم يكمل جملته إلا وقد عاد المصعد للعمل و نزل بهم إلي الطابق السفلي فقام بالصعود بواسطته مرة أخري إلي الأعلي حيث شقة ماجدولين و حملها ثم خرج بها من المصعد و طرق الباب طرقات حادة عديدة قبل أن تفتح ماجدولين الباب شاهقةً برعب وهي تقول:
_إيه ده؟! مالها ورد.
أجاب وهو يسرع بها إلي الداخل ويضعها علي الأريكه:
=الأسانسير كان عطلان و تقريباً النوبه جاتلها تاني.
أسرعت إلي الغرفة و أحضرت بخاخ الربو فقال:
=هاتي برفان نفوقها الأول.
_معتقدش في هنا.. ثواني هشوف في حاجة ورد.
أحضرت قنينة العطر خاصة ورد و ناولته إياها فنثر بعضٍ منها علي يده و قربها من أنفها لتسعل بشدة و تبدأ في الإفاقه.
نظرت إليه بأعين ذات رؤيةٍ ضبابيه فقال بإهتمام واضح:
=إنتي كويسه؟!!
أومأت إيماءةً بسيطه هادئه وهي تجوب ببصرها يميناً و يساراً وتقول:
_هو الأسانسير إشتغل؟!
=أيوة وإنتي في البيت أهو.
برز صوت ماجدولين قائلةً: سلامتك يا ورد يا حبيبتي.. بعد كده البخاخه تبقا في إيدك مكان ما تروحي.
هزت رأسها بموافقةٍ فقال حسام: حمدلله على سلامتك يا آنسه ورد.
أعادت النظر إليه وهي تتذكر قوله لها فإزداد خفقان قلبها وقالت: الله يسلمك.
نهض قائماً وهو يقول: أستأذن أنا بقا.
قالت ماجدولين: خليك إتعشي معانا.
ضحك بإقتضاب ساخراً وهو يقول: لأ عشا إيه؟! إنتوا المفروض بعد اللي حصل النهارده ده تقطعوا علاقتكوا بيا تماماً.. من الواضح إن وشي مش حلو عليكوا أبداً.
_لأ طبعاً متقولش كده ده إحنا اللي بنتعبك معانا.
=لأ أبداً تعبكوا راحه.. عن إذنكوا.
صافحها ثم إختلس نظرةً إلي ورد ثم غادر منصرفاً.
ــــــــــــــــــــــــــــــــــــــــــــــــــــــــــــــــــــــــ
عاد وائل إلي منزله يشعر بالإرهاق و الضجر فألقي بجسده إلي أقرب مقعد في طريقه متهاوياً.
أطلت عليه زوجته بإبتسامه دائماً ما يكون لها أشد الوقع علي نفسه فبادلها الإبتسام وهو يفتح ذراعيه لتتقدم منه وتجلس فوق ركبتيه فيحتضنها هو زافراً بتعب ويقول:
_تعباااان أوي يا حنين.. دماغي مصدعه و جعان نوم.
مسحت علي رأسه بغنج وهي تقول:
=إيه رأيك لو تدخل تاخد شاور كويس كده و نطلع نسهر في أي مكان.
رفع وجهه ليقابل وجهها وقال وهو يحاول تمالك أعصابه:
_بقولك تعبان يا حنين.. صاحي من الساعه 6 و اليوم كله كان مقرف.
زفرت بغيظ وتحدثت بفظاظه قائلةً: يووووه.. هو كل يوم تعبان يا حنين.. زهقان يا حنين.. قرفان يا حنين..و مش بتراعي إني قاعدة طول اليوم لوحدي و مستنياك ترجع.
صاح بغضب قائلاً: وهو أنا يعني كنت بره بلعب منا كنت طفحان الدم عشان خاطر ألاحق علي طلباتك اللي مبتخلصش.. وبعدين منا قولتلك و أخوكي قاللك لو حابه تشتغلي في الشركه عشان تضيعي وقت فراغك ده أنا معنديش ماانع.
و إحتد صوته اكثر وقال: لكن إزاااي.. الهانم عايزة تمشي الكون كله علي مزاجها.
وتابع مقلداً إياها: أنا أشتغل؟! طب ليه؟! ناقصني إيه؟!
وصرخ بها قائلاً: إنتي لا بترحمي ولا عايزة رحمة ربنا تنزل.. مش عايزة تشتغلي إن شالله عنك ما إشتغلتي بس متفضليش في الرايحه و الجايه تقوليلي أنا زهقانه و قاعده طول اليوم لوحدي.
صرخت هي بحدة مماثله وهي تقول: وهو أنا يعني يا إما أشتغل يا إما أفضل محبوسه بين أربع حيطان؟!
_ما إنتي مش سيبالي حل وسط أقدمهولك..مهو يا إما أشتغل شبه الحمار طول اليوم عشان أعرف أوفر إحتياجاتك اللي مبتخلصش يا إما أقعد جمبك عشان أخرجك كل يوم و معاليكي متبقيش محبوسه بين أربع حيطان.. أنا إتخنقت و مبقيتش عارف أرضيكي إزاي.
وكانت تتمة حديثه ما أشعل فتيل غضبها الجامح عندما قال: دي بقت عيشه تقصر العمر.
جحظت عيناها بغضب وقالت: أنا عيشتي بقت تقصر العمر يا وائل؟! طب ورحمة ماما منا قعدالك فيها.
نظر إليها بغضب أعمي وقال: مع السلامه يا حنين.. ولا أقوللك.. في ستين داهيه.
هالها ما سمعت، فلأول مرة يحتد بينهما النقاش هكذا و يصلان إلي حائط صد فأسرعت إلي غرفتها و جمعت أغراضها ثم بدلت ملابسها و خرجت من البيت إلي منزل حسام.
ـــــــــــــــــــــــــــــــــــــــــــــــــــــــــــــــــ
منذ عودتها إلي منزل زوجها وهي أصبحت كالقالب المصمت فقط تحمل وجهٍ خالٍ من التعابير، قلبٍ مجرد من المشاعر و الأحاسيس، حتي أنها تكاد تشعر انها باتت تحمل عينان فاضت منهما العَبرات حتي خلت أيضاً.
نزلت إلي شقة "زينب" تجر قدميها بإعياء صار واضحاً علي وجهها الشاحب ثم دخلت وقالت:
_صباح الخير.
قالت زينب وهي تتكأ علي جانبها الأيمن تشاهد التلفاز:
=صباح؟! صباح مين يا حبيبتي الساعه 12الضهر.
قالت بهدوء: معلش راحت عليا نومه.
=طيب الأكل عندك جوه أهو لو هتفطري إفطري لو مش هتاكلي شيليه في التلاجه.
_لأ مش عايزة أكل مليش نفس.
=طيب شيليه في التلاجه و جهزي الغدا أوام عشان جوزك و حماكي هيرجعوا بدري النهارده.
أومأت بموافقة و دخلت إلي المطبخ وبدأت بإعداد الطعام وهي تشعر بخوار قوتها و كأنها ستسقط في الحال ولكنها تحاملت علي نفسها حتي أكملت ما تفعله و خرجت من المطبخ تقول:
_أنا خلصت كل الأكل و غسلت المواعين بتاعة الطبخ كمان.. معلش بس لما ييجوا إبقي غرفي الأكل لأن أنا مش قادرة أقف علي رجلي وهطلع أرتاح.
=مش هتاكلي مع جوزك؟!
_لأ مش عايزة دلوقتي.
صعدت إلي شقتها بينما دخل طارق و والده فنهضت مسرعه تستقبلهم بحفاوة و ترحيب وهي تقول:
=حمدلله على السلامة.. نورتوا البيت.
قبل طارق يدها وهو يقول: الله يسلمك يا زوزو.
ثم شمشم بأنفه وهو يقول: الله.. شكلك عملالنا أكله حلوة من بتوعك.
=أومال إيه.. مجهزالك كل اللي بتحبه.. حمام محشي و ورق عنب و جلاش باللحمه كمان.
مسح علي بطنه وهو يقول بضحك: أيوووه عليكي يا زوزو يا مدلعاااني.
إرتفعت ضحكاتها وهي تقول: وأنا ليا مين غيرك يا حبة عيني.. يلا إدخل إستحمي كده و فوق نفسك علي ما أجهز الأكل.
_أومال غراب البين فين؟!
=لسه طالعه شقتها حالاً.. نزلت لقتني مخلصه كل شغل البيت و الأكل قامت قالتلي خلاص طالما إنتي مش عيزاني هطلع أكمل نوم بقا.
لعن تحت أنفاسه لتقول هي: ولا يهمك يا حبيبي أنا مش فارق معايا منا طول عمري بخدم نفسي.. بس وحياتي عندك يا طارق وغلاوتي عندك ما تقوللها ولا تعمل مشاكل.
أومأ موافقاً و ذهب ليغتسل بينما طفقت هي تحضر طعام الغداء.
أما في الأعلي.. في شقة مريم.. كانت تتجول من غرفتها إلي المرحاض ذهاباً و إياباً وهي تمسك بأسفل معدتها بإعياء شديد وتقول:
_ياارب والنبي يكون دور برد.. يارب ما اكون حامل يارب.
لتداهمها نوبةً أخري من الغثيان و القيء تعتصر أمعائها حتي إنتهي بها الحال وهي ترقد فوق فراشها بتعبٍ بالغ.
إستمعت إلي صوت فتح الباب فعلمت بقدومه فتصنعت النوم ولكن بمجرد ما إن وصلت رائحته إلي أنفها حتي نهضت مسرعه نحو المرحاض مرة أخري لتتقيأ.
تعجب حالها فسألها: في إيه مالك؟!
حاولت الصمود ولكن خرج صوتها ضعيفاً واهناً حيث قالت:
_الظاهر دور برد شديد حبتين.
ليجيب بغلظه: من قعدتك جمب التكييف.. منتي لو بتنزلي تقعدي مع أمي تحت مكانش جرالك كل ده.
لم تجيبه فلقد إعتادت فظاظة قوله و صعدت إلي الفراش مرة أخري تحاول الخلود إلي النوم ولكن دون فائدة.
قال عندما رآها تمسك ببطنها بتعب: لا إنتي حالتك دي ميتسكتش عليها.. أنا هنزل أقول لأمي تجيبلك علاج من عندها.
وقفت امامه تقول بترجي: لأ مش عايزة حاجه أنا إرتحت شويه و هنام.
_إرتحتي إيه إنتي خيلتيني رايحه جايه للحمام.. وسعي كده.
نزل إلي الأسفل و أخبر والدته التي تهللت أساريرها وقالت:
_بتتكلم جد.. مبروك يا واد يا طارق هتبقا أب يا مضروب.
نظر إليها ببلاهه ليقول مشدوهاً: هبقي أب إزاي يعني؟!
ضحكت بشدة وقالت: يا خيبه.. هو إيه اللي هتبقا أب إزاي؟! يعني مراتك حامل يا مدهول.
رفع حاجبيه بدهشه وقال: بتتكلمي جد،وإنتي إش عرفك؟
_إش عرفني إيه يا زفت إنت مش بتقول بترجع و تعبانه.. يبقا حامل.
قال بفرحة عارمه: طب بينا ناخدها للدكتور بسرعه.
_دكتور إيه وبتاع إيه.. ما نصبر للصبح ناخدها الصحه بجنيه نكشف عليها هناك و نجيب العلاج مجاني كمان.
تمتم مسروراً: ماشي ماشي اللي تشوفيه.. انا هطلع بقا أقوللها.
خرج ثم تراجع للخلف خطوتين وسألها:
=طب و هنسيبها تعبانه كده للصبح؟!
_خليها تشرب ينسون دافي و تتدفي و تنام.
اومأ موافقاً ثم دخل إلي شقته سعيداً مختالاً و دخل إلي غرفتها فوجدها تتأوه بتعب و تمسك بأسفل معدتها فقال:
=مبروك يا مريومه.. أمي بتقوللي إن اللي بيحصلك ده أعراض حمل.
نظرت إليه بقهرةٍ تختبرها للمرة التي لا تعرف عددها بينما يتابع حديثه ويقول:
=هعملك ينسون دافي تشربيه عشان تهدي لحد ما نروح نكشف عليكي بكره.
نظرت إليه وقد تهاوت دمعاتها وقالت:
_لأ مش عايزة يا طارق.. إطفي النور وانا هنام.
أغمضت عيناها تحاول كبح جماح دمعاتها التي تسيل رغماً عنها.
لقد كانت تطمح في الفرار من هذا الواقع المرير يوماً ما، علي حَسب أملها كانت تتوقع ان تجدي تلك الحبوب التي تتعاطاها نفعاً ولكنها مشيئة الله قد غلبت كل شيء.
ـــــــــــــــــــــــــــــــــــــــــــــــــــــــــــــــــــــــــــ
عاد حسام إلي منزله ليلاً بعد أن قضي وقتاً لا بأس به بين أوراق مكتبه يحاول جاهداً إنجاز ما فاته.
صعد إلي غرفته فوجد ضوء غرفة شقيقته متقداً فعلم أنها قد تنازعت مع زوجها وجاءت للبقاء معه.
ذهب و طرق الباب عدة طرقات حتي إنفرج و ظهرت هي من خلفه بوجهها الباهت و عيناها الباكيه و فور ما إن رأته حتي إرتمت بأحضانه وهي تنتحب بشدة.
زفر بيأس و تعب في آنٍ ثم شدد من إحتضانها وهو يقول:
_وبعدين معاكي يا حنين.. إنتي اللي عامله في نفسك كده.
نظرت إليه بقوة وقالت: أنا يا حسام؟! طب ليه؟!
قال وهو يزيل دمعاتها من فوق محجريها بيده الحانيه:
_أيوة إنتي والله.. أما ليه بقا فـ دي عايزة قعدة طويله وأنا حالياً هلكان و شايف إن إنتي كمان تعبانه فـ هنأجل كلامنا لبكرة لما أرجع من الشغل.. تمام؟!
أومأت بنعم فقبّل رأسها بحنوٍ خالص و دخل إلي غرفته.
إغتسل و إرتدي ملابس نومه و ألقي بجسده الذي يأن شوقاً إلي الراحه بالفراش وأغمض عينيه.
ما لبث أن فتحهما مرةً أخري وتنهد وهو يتذكر عيناها اللتان غاص بهما و كيف أنهما سلبتاه عقله حينها ليبتسم وهو يتمتم وكأنه يتذوق حروف إسمها بين شفتاه:
_ورد.
إتسعت إبتسامته أكثر وهو يردد إسمها مراراً و تكراراً ثم صدح صوته وهو يدندن مغمض العينين ويقول:
يا بدع الورد يا جمال الورد
من سحر الوصف قالو عالخد
الورد الورد يا جماله
الاحمر من بدعه وجد وهيام الطف يالطيف
والأصفر من ريحته غيره وآلام
ارحم يا رئيف
يا بدع الورد يا جمال الورد
من سحر الوصف قالو عالخد
