رواية عروس البحر الفصل الرابع عشر
طول الطريق آدم كان سايق العربية وهو ساكت تماماً.
وعينه بتبص على الطريق بس عقله .. عند كلمة الدكتور "نسبة النجاح 30%".
ملك كانت قاعدة جنبه، لاحظت وحطت إيدها على إيده.
ملك بقلق: "آدم.. إنت كويس؟ من ساعة ما زياد كلمك في المطار وإنت متغير."
آدم بص لزياد في مراية العربية بنظرة تحذير عشان ما يتكلمش، وبعدين بص لملك وابتسم
"مفيش حاجة يا حبيبتي.. أنا بس مرهق من السفر وقلقان عليكي.. الدكتور قال لازم ترتاحي وممنوع أي توتر."
زياد من الكنبة اللي ورا حب يلطف الجو: " آدم كان خايف أوي لما عرف إني حرقت حلة المحشي.. أصله بيحب الكرنب أوي وزعل عليه."
ملك ضحكت بضعف، بس قلبها كان حاسس إن في حاجة كبيرة مخبيينها عليها.
أول ما وصلوا الشقة.
ست الحسن استقبلتهم بالأحضان، وإلين خرجت من أوضتها بتبتسم.
آدم أول ما شاف أمه، ساب الشنطة من إيده، وجري عليها حضنها .. حضن واحد خايف تكون دي آخر مرة يضمها فيها.
دفن وشه في كتفها وغمض عينه بوجع.
إلين حست برعشة جسمه، فطبطبت على ضهره بحنان وهمست في ودانه: "زياد قالك صح؟"
آدم صوته اتخنق: "ليه ما قولتيليش يا ماما؟"
إلين: "عشان كنت مع مراتك بتجيبوا حقها.. مكنش ينفع أشغلك بيا.. تعال ندخل أوضتي نتكلم."
ملك بصت لزياد بشك: "زياد.. في إيه؟ إلين مالها؟"
زياد بلع ريقه وبص في الأرض: "تعالي يا ملك نقعد وهفهمك بالراحة.."
جوه أوضة إلين.
آدم قفل الباب وقعد قدام أمه على السرير ومسك إيديها الاتنين بلهفة.
آدم بدموع محبوسة: "ماما.. إحنا مش هنعمل العملية دي.. 30% يعني مخاطرة بحياتك! أنا مستحيل أوافق! هناخد أدوية للقلب ونأجل أي حاجة دلوقتي!"
إلين حطت إيدها على خده بحنان: "ولو أجلنا يا آدم، السرطان هيرجع ينتشر في جسمي كله في خلال شهور.. ساعتها النسبة هتبقى صفر في المية."
آدم بصوت مكسور: "بس أنا ما صدقت لقيتك مش هقدر أخسرك !"
إلين بصلابة: "وعشان كده أنا هدخل العملية بكرة الصبح يا آدم.. أنا مضيت على الإقرار خلاص."
آدم اتصدم: "مضيتي؟!"
إلين بابتسامة: "آه.. أنا عايزة أعيش يا آدم.. عايزة أتمسك بالـ 30% دول عشان أعيش وأشيل سالم على إيدي.. مش عايزة أموت وأنا قاعدة في السرير مستنية النهاية.. سيبني أحارب عشانكم يا حبيبي."
الباب اتفتح ودخلت ملك ودموعها على خدها، وورائها ست الحسن.
ملك راحت قعدت جنب إلين ومسكت إيدها: "وهتحاربي يا ماما.. وهتنتصري، وهتخرجي من العملية دي على رجلك بإذن الله."
آدم بص لملك بخوف: "ملك.. أنا قولت لزياد ما يقولكيش عشان صحتك!"
ملك بصت لآدم : "أنا مراتك يا آدم.. مش ضيفة في حياتك تفرحني في الحلو وتخبّي عني المر.. وجعك هو وجعي، وأمك هي أمي"
ست الحسن قربت وحطت إيدها على راس إلين: "ربنا اسمه الشافي المعافي.. الدكاترة بيقولوا أرقام، بس ربنا بيقول للشيء كن فيكون.. وإحنا هنفضل الليلة دي كلها نصلي وندعيلك."
آدم بص للستات التلاتة اللي حواليه.. أمه، ومراته، وجدة مراته.. وحس إنهم أقوى منه بمراحل.
بالليل - في أوضة آدم وملك.
ملك صحيت ملقتهوش جنبها، سمعت صوت الماية مفتوحة في الحمام بقالها كتير.
قامت بقلق، ومشيت بالراحة لحد باب الحمام، وبصت
شافت منظر وجع قلبها..
آدم كان قاعد على أرضية الحمام تحت الدش بهدومه، الماية نازلة عليه، وهو حاطط إيديه على وشه وبيعيط بحرقة من غير صوت عشان محدش يسمعه!
كان منهار لوحده
ملك فتحت الباب ودخلت، وقفلت الماية، ونزلت قعدت على ركبها قدامه على الأرض.
آدم اتخض لما شافها، وحاول يمسح وشه بسرعة عشان يداري دموعه: "ملك.. إيه اللي صحاكي؟ هدومك هتتبل وهتبردي!"
ملك مسكت إيديه الاتنين ونزلتهم من على وشه، وبصت في عيونه الحمرا
"إوعى تداري دموعك عني يا آدم.. عيط في حضني، إنت طول الوقت شايلنا كلنا، جه الوقت اللي أنا أشيلك فيه."
سحبت راسه وضمتها لصدرها بقوة.
آدم ما قدرش يقاوم أكتر من كده.. حاوط خصرها بدراعاته، ودفن وشه في حضنها، وطلع كل الخوف والوجع اللي جواه.
آدم "خايف أوي يا ملك.. خايف أفتح عيني الصبح ملاقيهاش.. أنا لسه ما شبعتش منها."
ملك كانت بتمشي إيدها في شعره وبتبوس راسه: "هتلاقيها يا حبيبي.. والله العظيم هتخرج وهتعيش.. أنا قلبي حاسس، وقلبى ما بيكدبش."
رفعت وشه بإيديها، وبصت في عينيه، وقربت شفايفها باست عيونه الاتنين بشفايفها، وبعدين نزلت على شفايفه وباسته بوسة طويلة
ادم مسك وشها وبادلها البوسة بلهفة
قامت ملك وسحبته من إيده، قلعتوا الهدوم المبلولة، ونشفته بالفوطة وأخدته على السرير
آدم ضمها لحضنه
وهمس قدام شفايفها : "خليكي قريبة مني كده.. ما تبعديش ثانية."
ملك حاوطت رقبته، وقربت منه : "أنا جوه روحك يا آدم.. مش بس قريبة منك."
صباح اليوم التاني - في مستشفى برلين.
الساعة كانت 10 الصبح، ولمبة أوضة العمليات منورة بقالها 4 ساعات متواصلة.
ست الحسن قاعدة على الكرسي بتقرأ في المصحف، وملك قاعدة جنبها ساندة راسها على كتفها وبتدعي، وآدم واقف قدام باب العمليات ما بيتحركش.
أما زياد، فكان رايح جاي في الممر بسرعة لدرجة إنه خيل الممرضين .
زياد بتوتر وهو بيكلم نفسه بصوت مسموع: "يارب.. يارب قومها بالسلامة
يارب ندر عليا لو إلين خرجت سليمة، هبطل آكل فول لمدة أسبوع.. لا أسبوع كتير هبطل تلات أيام.. خلاص يارب أسبوعين والله بس تخرج!"
آدم بصله بابتسامة حزينة: "يا زياد اقعد بقى خيلتني."
زياد قعد جنب آدم وحط إيده على كتفه : "هتخرج يا صاحبي.. إلين دي ست بميت راجل، عدت المحشي بتاع امبارح ومجرالهاش حاجة، مش هتغلبها عملية."
فجأة.. لمبة أوضة العمليات طفت!
الباب اتفتح، وخرج الدكتور شولتز وهو لابس لبس العمليات الأخضر، وملامح وشه مرهقة جداً.
الكل وقف في نفس اللحظة، وقلوبهم وقفت معاهم.
آدم قرب من الدكتور ورجليه مش شايلاه، وصوته طلع بالعافية.
آدم بالإنجليزي: "دكتور.. أرجوك قولي.."
الدكتور شولتز شال الماسك من على وشه، وسكت ثانية، وبعدين ابتسم : "والدتك مقاتلة شرسة يا مستر آدم.. الـ 30% كانوا كفاية جداً ليها.. القلب استحمل، واستأصلنا الورم بالكامل، وهي في الإفاقة دلوقتي وبخير!"
ملك صرخت من الفرحة وحضنت ست الحسن اللي قعدت تزغرد في نص المستشفى الألماني!
والممرضات الألمان اتخضوا من صوت الزغاريد وافتكروها حالة طوارئ!
زياد نط في الهوا وحضن الدكتور شولتز وباسه من خده: "إنت دكتور عالمي! حبيبي يا أبو الشلاتيت! هعملك صينية بط بالبرتقال من إيد ست الحسن!"
الدكتور كان مذهول ومش فاهم حاجة بس بيضحك.
أما آدم.. فركع على ركبه في نص الممر، وحط راسه على الأرض وسجد لربنا ودموع الفرحة مغرقة وشه.
ملك جريت عليه، نزلت جنبه وحضنته وهي بتعيط وتضحك : "مش قولتلك؟ قولتلك قلبي ما بيكدبش يا آدم!"
آدم شالها وحضنها : "الحمد لله يا ملك.. الحمد لله يا وش الخير والسعد على حياتي كلها!"
بعد مرور أربع شهور..
في فيلا الإسكندرية على البحر.
، وصوت الموج بيرد الروح بعد شهور الغربة والتلج في برلين.
إلين كانت قاعدة في الجنينة صحتها ردت، وشها بقى مورد، وشعرها الأبيض القصير بدأ يطلع تاني وشكله جميل عليها، وقاعدة بتقمع بامية مع ست الحسن وهما بيضحكوا.
إلين بضحك: "يعني كده البامية اتعملت صح يا حاجة؟ أنا بقيت أعمل أكل مصري أحسن من اليوناني خلاص!"
ست الحسن بفخر: "طبعاً يا حبيبتي، تلميذتي! بس قولي للواد زياد يبطل يسرق اللحمة من الحلة قبل الغدا!"
جوه الفيلا، في الأوضة اللي اتجهزت عشان المولود الجديد.
زياد كان قاعد على الأرض، حواليه كراتين خشب ومسامير ومفكات، وغرقان في عرقه وهو بيحاول يركب سرير البيبي.
زياد بغيظ وهو بيبص في الكتالوج: "المهندس اللي عمل الكتالوج ده أكيد ساقط إعدادية! إزاي المسمار رقم 4 يدخل في الخشبة رقم 7 وهما مش طايلين بعض أصلاً؟!"
ملك هي اللي دخلت، كانت في نص الشهر التاسع، بطنها كبيرة جداً قدامها، وماشية خطوة خطوة وهي ساندة ضهرها بإيدها، وآدم ماشي وراها شايل مخدة صغيرة ومروحة إيد وبيهاوي عليها!
زياد أول ما شاف منظر آدم انفجر من الضحك: "يا عيني على الهيبة! آدم بيه راشد، حوت البيزنس، ماشي ورا مراته بمروحة ريش! ناقص تغنيلها (يا صفايح الزبدة السايحة)!"
آدم بصله بقرف: "اتلم يا حيوان وخلص تركيب السرير.. وبعدين ده إنت ركبت السرير بالمقلوب! العجل من فوق والخشب من تحت!"
زياد بص للسرير بصدمة: "تصدق صح؟! وأنا أقول البيبي هينام إزاي وهو متشعلق! معلش دي خطة تمويه من الخال الأسطوري."
ملك ضحكت وهي بتقعد على الكرسي بتعب: "حرام عليك يا آدم سيبه، كتر خيره إنه بيساعدنا."
آدم نزل على ركبه قدام ملك، وحط رجليها المورمة من الحمل على رجله وبدأ يدلكهالها بحنان قدام زياد من غير ما يتكسف.
آدم بحب: "حبيبتي تعبانة؟ تحبي نروح للدكتور نطمن؟"
ملك : "لأ يا حبيبي، الدكتور قال لسه قدامي أسبوعين على الولادة.. ده بس تقل الشهر التاسع."
زياد حط إيده على خده وهو بيتفرج عليهم: "يا سلام على الرومانسية.. أوعدنا يارب بواحدة أدلكلها رجليها.. أو هي تدلكلي ضهري اللي اتقطم من سرير ابنكم ده!"
بالليل.
الكل نام، والجو بره بدأ يقلب فجأة.. نوة صيف غريبة هبت على إسكندرية، رياح شديدة ومطر خفيف وبرق في السما.
في أوضة آدم وملك.
آدم كان واخد ملك في حضنه على السرير، إيده محاوطة بطنها الكبيرة، وبيلعب في شعرها.
آدم : "مش مصدق إن خلاص فاضل أيام، والبطن الحلوة دي هتفضى، وسالم هيبقى نايم بينا هنا."
ملك لفت وشها ليه، وبصت في عينه الزرقا اللي بتعشقها: "هتبطل تحبني وتدلعني لما سالم ييجي وتنشغل بيه؟"
آدم رفع حاجبه : "أبطل إيه؟ ده إنتي الأصل يا ملك.. سالم ده حتة منك إنتي..
باسها بوسة رقيقة وطويلة على شفايفها، ونزل باس رقبتها بشوق: "وبعدين الصراحة.. أنا مستني تولدي بالسلامة بفارغ الصبر، عشان وحشتيني أوي.. وعايز أرجع أعوض كل الشهور اللي كنت خايف عليكي فيها دي."
ملك ضحكت بدلع ووشها احمر: "آدم! إنت ما بتشبعش أبداً؟"
آدم بغمزة جريئة: "منك إنتي؟ لو عشت ميت سنة مش هشبع.."
وفجأة..
قبل ما آدم يكمل جملته، ملك ملامح وشها اتغيرت تماماً، وشهقت بصوت عالي ومسكت في دراع آدم بقوة!
آدم اتخض: "ملك! مالك في إيه؟!"
ملك
ومغص شديد جداً ضرب في ضهرها وبطنها في نفس اللحظة!
ملك بصريخ: "آاااااه! آدم! أنا بولد يا آدم! بوووولد دلوقتي!"
آدم اتجمد ثانية وبعدين نط من على السرير زي المجنون، لبس بنطلونه بالمقلوب من التوتر، وجري فتح باب الأوضة وصرخ في الفيلا كلها: "زيااااااااد! اصحواااا! ملك بتووووولد!"
زياد طلع يجري من أوضته وهو لابس بيجامة عليها رسومات بطوط وشعره واقف، ومن الخضّة خبط في العمود الرخام اللي في الصالة ووقع على ضهره!
زياد وهو دايخ: "مين اللي بيولد؟! أنا؟! المطافي جت تاني؟!"
ست الحسن وإلين طلعوا يجروا من أوضهم.
آدم نزل يجري عشان يشغل العربية ويطلعها .. بس أول ما فتح باب الفيلا، اتصدم!
شجرة كبيرة قدام البوابة وقعت بسبب الهوا الشديد، وقفلت مخرج العربيات تماماً، والكهرباء قطعت
آدم رجع يجري لجوه وشه أصفر: "البوابة مقفولة بالشجرة ومفيش عربية هتعرف تطلع هياخدو وقت على ما يشيلوا الشجرة!"
ملك من فوق كانت بتصرخ بألم رهيب: "آاااااه! مش قادرة يا آدم! البيبي ! مش هلحق أروح مستشفى!"
ست الحسن شمرت كمام جلابيتها "مفيش وقت للمستشفى! هاتوا ماية سخنة وفوط نضيفة بسرعة.. أنا اللي هولد ملك بإيدي هنا في البيت زي زمان!"
آدم بص لست الحسن بذهول ورعب، وصوت صريخ ملك مالي الفيلا!
