رواية خبئني بقلبك من قسوة العالم الفصل الثامن عشر بقلم ميمو
فارس بيبصلها بنظرة هادية: طب ما تفضلي كده يا لي لي.
ليالي باستغراب: أفضل إزاي؟
فارس بابتسامة بسيطة: زي ما إنتِ.. من غير ما تحسبي كل كلمة قبل ما تقوليها، ولا تخافي إنك تزعلي حد، ولا تضطري تغيّري نفسك عشان ترضي حد.
ليالي بتتغير ملامحها للحظة، وكأن كلامه لمس حاجة جواها، فتخفض عينيها وتبتسم ابتسامة صغيرة.
ليالي بهدوء: إنتَ ساعات بتبقى بني آدم كويس على فكرة يا فارس.
فارس بيرفع حاجبه: ساعات بس؟!
ليالي بترجع لمشاكستها: متطمعش يا فيرو، إنتَ لسه قدامك مشوار طويل 😂
فارس بيضحك: ماشي يا ستي، هنشوف آخرتها معاكي إيه.
ليالي بتتحرك ناحية باب الروف: آخرتها إني هنزل أكمل شغلي بدل ما أنا واقفة أضيّع وقتي معاك.
فارس بيمشي وراها: شغلك اللي سيبتي اللابتوب عشانه ومشيتي من غير موبايلك؟
ليالي بتقف فجأة وتبصله بصدمة: موبايلي؟!
فارس بابتسامة مستفزة: أيوه يا هندسة، موبايلك اللي رنيت عليه عشر مرات وأنا بدوّر عليكي.
ليالي بتحط إيدها على راسها: يا نهار أبيض! طب ما تقول من الأول!
فارس بضحكة: كنت مستمتع بالهدوء اللي عشته من ساعة ما مشيتي.
ليالي بتبصله بغيظ: فارس!؟
فارس بيفتحلها الباب وهو بيضحك: اتفضلي يا لي لي.
ليالي بتعدّي من جنبه وتهمس بغيظ: هوريك يا فارس.
فارس بيسمعها، ويبتسم وهو بيتابعها بعينيه، وبعدين يقول لنفسه بهدوء:
«ربنا يستر من اللي إنتِ هتعمليه فيا يا لي لي.»
بينزلوا يمشوا في اتجاه المكتب وقبل مايدخلو بيلقو نادين خارج
فارس باستغراب وجدية.... نادين كنت بتعملي ايه جوه
نادين بتوتر تحاول تخفيه... ا.. انا... كنت فكرة حضرتك جوه كنت هشوف حضرتك لو محتاج حاجة بس
فارس بعدم اقتناع، لكن بنبرة هادية وحاسمة... تمام يا نادين، بس المرة الجاية قبل ما تدخلي مكتبي تتأكدي الأول إني موجود.
نادين بتوتر... حاضر يا مستر فارس.
ليالي بتبص لنادين باستغراب، وبعدين تبص لفارس، لكنها بتفضل ساكتة.
فارس بيفتح باب المكتب وبيبص لليالي... اتفضلي يا هندسة.
ليالي بتدخل، وفارس بيلتفت لنادين بنظرة أخيرة قبل ما يدخل ويقفل الباب.
نادين بتفضل واقفة مكانها، وبتبص ناحية الباب بغيظ، وبعدها بتطلع موبايلها وتبعت للمجهول ...
كله تمام عملت اللي اتفقنا عليه
جاري كتابه الفصل الجديد من احداث الروايه وسيتم نشره فور انتهاء الكاتبه منه عاودو زيارتنا الليله او يمكنكم الاشتراك بقناتنا علي التليجرام ليصلك الفصل فور الانتهاء من كتابته ونشره
شكرا لزيارتكم عالم روايات سكيرهوم
