رواية جريمة فديو فاضح الفصل الأول بقلم ياسر عوده
البدايه لما المعلم عارف كان بيحرق مقلب الزباله بتاعه، دي حاجه روتنيه بيعملها كل يوم جمعه، بعد ما بينقد الزباله اللى جاتله وبياخد اللى ممكن ينفعه ويبيعه من بلستك او أي حاجه حديد او أي حاجه تنفع تتباع، وبعدها بيجمع باقي الزباله ويحرقها، بس اللى حصل المرادي كانت حاجه مختلفه، كانت في ريحه وحشه اوي طالعه من الحريق، والريحه كانت بتزيد اكتر واكتر، ووقف المعلم بتاعه ومعاه مسعود اللى شغال معاه محتارين من الريحه اللى ظهره دي، وسأل مسعود عارف وقاله:
-ايه الريحه والوحشه دي يا معلم، زي ما تكون ريحه لحمه متعفنه بتتحرق.
-عندك حق تقريبا كده واحد من اللى بيجمعوا الزباله كان جايب معاه جثه كلب او قطه.
-وايه العمل يا معلم؟
-هنعمل ايه يعني، دلوقتي النار تاكلها وخلاص، ازاي هنطفي النار دي ونلاقي الجثه اللى بتتحرق.
وفضل الحال على اللى هو عليه لغايه لما مسعود شاف شوال بيتحرق وباين منه حاجه غريبه، قرب من الشوال وحاول يسحبه، ولما سحبه اتصدم من اللى شافه، كانت ايد بشريه محروقه تماما، وقتها مسعود فضل يصرخ لغايه لما سمعه عارف اللى جري عليه، وشاف اللى لقاه مسعود، وقتها عارف ساعد مسعود انهم يسحبوا الشوال بسرعه، وابتدوا هما الاتنين يطفوا النار اللى كانت ماسكه فيه، بس المشكله ان النار تقريبا كده كانت قضت على الشوال ودمرت اللى جواه.
اول حاجه عملها عارف انه اتصل على الشرطه، وبلغهم باللى حصل، وفي وقت قليل وصل فريق من الشرطه ومعاهم كل المساعدين من المعمل الجنائي والطب الشرعي، ولما وصل رئيس المباحث اتكلم مع عارف وقاله:
-ايه اللى حصل؟
-احنا كنا بنحرق الزباله وبنتخلص منها زي ما بنعمل كل جمعه يا باشا، بس احنا شمينا ريحه مش كويسه طالعه من الحريق، الريحه كانت غير العاده شويه.
-يعني ايه غير العاده؟
-اصل احنا متعودين ان ممكن قطه او فار بيبقى موجود في الزباله وبيتحرق مع الحريق، وكانت الريحه بتطلع بس المرادي الريحه كانت جامده اوي، بس احنا افتكرنا انها ممكن ريحه حيوان ميت ومرمي في المقلب زي جثه كلب مثلا، وسبنا الزباله تتحرق بس بعد شويه سمعت صوت مسعود بيصرخ ولما روحتله لقيته ساحب شوال من الحريق وظاهر منه ايد بشريه.
-تمام تقدر تخليك دلوقتي ولما احتاجك هتكلم معاك.
-تمام يا باشا.
وبعد ما خلص رئيس المباحث كلام مع عارف، اتكلم مع مسعود واللى قال نفس الكلام، وبعدها كان محتاج يعرف المعلومات والادله الجنائيه اللى وصلها المعمل الجنائي والطب الشرعي، وبداء مع الطب الشرعي وسأل الدكتور وقاله:
-ايه المعلومات اللى جمعتها من فحص الجثه يا دكتور؟
-للاسف الجثه متدمره نهائيا، فضلت تتحرق لفتره طويله جدا، وملامح الجثه متدمره، بس احنا قدرنا نوصل لبعض المعلومات زي ان الجثه لـ شاب، وتقريبا كده سنه ما بين العشرين وال 25، اما سبب الوفاه فكان عده طعنات في اماكن مختالفه في جسمه، احنا قدرنا نحدد انه اتطعن تقريبا حوالي 30 طعنه.
-دا عدد كبير يا دكتور.
-فعلا عدد كبير، وبيدل ان الدافع الانتقام.
-طيب قدرت تحدد تاريخ الوفاه؟
-ايوه من حوالي 24 ساعه، ومش بس كده المرجح ان الجاني مش شخص واحد، دوول اتنين او يمكن اكتر من اتنين كمان.
-ايه اللى خلاك تقول كده يا دكتور؟
-شكل الطعنات مختلفه، يعني تم استخدام اكتر من اداه للقتل سكنتين بس بشكل مختلف، وكمان قدرنا نوصل من شكل الطعنات ان شخص طعنه من الامام، والتاني طعنه من الخلف.
-تمام، احنا محتاجين وصف مفصل لشكل الجثه قبل الحرق، زي الطول والوزن ولون البشره.
-مافيش مشكله يا فندم، بس علشان نعمل كده لازم نستني لغايه لما ناخد الجثه للمشرحه وبعد التشريح هجهز تقرير نهائي بكل المطلوب.
-في انتظارك يا دكتور.
وبعد ما خلص رئيس المباحث مع دكتور الطب الشرعي، اتكلم مع رئيس فريق المعمل الجنائي، وسأله عن الادله الجنائيه اللى وصلها، ورد عليه وقاله:
-طبعا بسبب حرق الجثه ماقدرناش ناخد أي بصمه من على الجثه، وكمان ماقدرناش نجمع أي دليل من المكان بسبب الحريق الضخم اللى كان موجود.
-يعني مافيش أي معلومه ممكن نوصلها من فحص المكان خالص؟
-معلومه وحده يا فندم، احنا لقينا اثر كيروسين على الشوال والجثه، واضح ان الجاني غرق الشوال والجثه بماده الكيروسين سريعه الاشتعال علشان يساعد على حرق الجثه وتفحمها باسرع وقت وتدمير أي ادله.
-معني كلامك ان الجناه كانوا عارفين ان صاحب مقلب الزباله هيحرق المخلفات والجثه جواها.
-بالظبط يا فندم.
-تمام شكرا.
وبعد ما سابه، راح اتكلم مع طارق المساعد بتاعه وقاله:
-الجناه كانوا عارفين ان صاحب مقلب الزباله هيحرق المخلفات الموجوده، ومعني كده ان الشخص اللى جاب الشوال للمقلب عارف ان فيه جثه.
-انا مش فاهم حاجه يا فندم، انت تقصد ايه؟
-ركز معايا يا طارق، اللى جاب الجثه اكيد واحد من اللى بيجمعوا الزباله من الشقق السكنيه، وجاب الجثه هنا علشان يحرقها ويدمر كل الادله وميخلناش نتعرف على الجثه، انا عاوزك تعملي حصر لكل الاشخاص اللى بيجيبوا زباله للمقلب ده، تقعد مع عارف واللى شغال معاه وتعرف منه كل المعلومات دي، ولما تعمل كده تجمعهم وتبتدي تحقق معاهم وتعمل تحريات مفصله عنهم، الجاني مش هيطلع براهم فاهم يا طارق.
-تمام يا فندم، طيب بالنسبه لـ عارف نفسه، هنعمل معاه ايه؟
-لا دا مستبعد وبره دايره الشبوهات، مافيش واحد عاقل هيروح يقتل قتيل، ويجيب جثته في مقلب الزباله بتاعه، وبعد ما يحرقه يبلغ الشرطه على نفسه، واضح كده انه ماكنش يعرف أي حاجه عن الجثه دي، اعمل انت اللى قولتلك عليه تمام.
-حاضر يا فندم.
وبعد ما خلص رئيس المباحث معاينه المكان، اتصل على النيابه علشان تيجي وتعاين المكان، وبعدها تم فرض كردون امني على المقلب علشان مافيش حد يقرب منه لغايه لما النيابه تصدر تعليماتها بخصوصه.
وبشكل رويني اتعمل تحريات على عارف صاحب مقلب الزباله، وبشهاده جميع اللى اتعاملوا معاه وجيرانه في السكن، انه شخص عصامي ورغم ان عمره ماتجوزش 45 سنه، بس قدر ينجح في شغله ويصرف على اخته الوحيده رندا ويدخلها كليه الطب وديما بيحلم انه يشوفها دكتوره ويفتحلها عياده في نفس المنطقه الشعبيه اللى عايشين فيها علشان تخدم سكان المنطقه.
وبعد صدور تقرير الطب الشرعي للجثه اللى كانت متفحمه في مقلب الزباله، تم تعميم مواصفات الجثه على جميع اقسام الشرطه لمطابقاتها بالبلاغت المقدمه باختفاء شاب في منتصف العشرينات من عمره، صاحب بشره بيضا متوسط الطول، وبعد كام ساعه وصل الخبر، ان في بلاغ مقدم من سيده اتوجهت لـ قسم الشرطه علشان تبلغ ان ابنها الوحيد مختفي ومش عارفه تتواصل معاه، واللى حصل وقتها ان سيده في الخميسن من عمرها دخلت قسم الشرطه وكان معاها شاب في ال 30 من عمره وطلبوا مقابله الضابط المسئول، ولما دخلوا مكتب الضابط وسألها:
-ايوه يا مدام، ايه الحكايه.
ردت عليه وقالت:
-انا جايه اقدم بلاغ عن اختفاء ابني سامي، انا مش عارفه اوصله ومش بيرد على التليفون ومرجعش الشقه بتعته بقاله حوالي يومين.
-ايه مواصفاته؟
ولما قالت السيده مواصفات ابنها ووقتها ضابط الشرطه لقاها نفس المواصفات اللى كانت لسه متعممه على كل اقسام الشرطه، وقتها بلغ بالمحضر اللى اتعمل عنده باختفاء سامي، وبعد كام ساعه تم استدعاء السيده ام سامي واللى كان اسمها صفاء لقسم الشرطه وهناك تم عرضها على الطب الشرعي لمقارنه حمضها النووي مع الجثه للتأكد من انها لـ ابنها سامي او لا، وكانت النتيجه ايجابيه، ووقتها دخلت صفاء في حاله من الانهيار وتم نقلها على المستشفى.
