رواية زفاف في حضرة طليقي الفصل الاول بقلم هاجر نور الدين
_ إنتِ متأكدة إنك عايزة تتجوزي تاني؟
بصيت لماما وأنا قاعدة قدام المراية بجهز وقولت باستغراب:
= هو أنا داخلة أعمل عملية قلب مفتوح يا ماما؟
دي قاعدة تعارف مش أكتر!
ردت عليا وهي واقفة ورايا بتظبطلي شعري:
_ ما أنا عارفة إنها قاعدة تعارف، بس عايزة أفهم إنتِ مستعجلة على الجواز ليه؟
إنتِ لسه خارجة من تجربة جواز فاشلة.
لفيت الكرسي ناحيتها وبصيتلها بتركيز وقولت:
= أولًا أنا بقالي سنة مطلقة، مش خارجة من الجواز امبارح، وثانيًا أنا مش مستعجلة ولا حاجة، الراجل اتقدم وأنا وافقت أقعد معاه قاعدة عائلية نشوف الدنيا.
هزت راسها وقالت بتردد:
_ بس أنا خايفة تتكرر معاكِ نفس التجربة، مش هستحمل خبطتين فيكِ بس في نفس الوقت عايزة أشوفك مرتاحة ومبسوطة في بيتك.
ابتسمت وأنا برجع أبص للمراية وقولت:
= متقلقيش، المرة دي أنا اتعلمت، وأول ما أحس إن فيه حاجة مش مظبوطة هخلع من غير ما أستنى لحد ما الموضوع يوصل للمحكمة.
ضحكت ماما رغمًا عنها وقالت:
_ ربنا يهديكِ يا حبيبتي، هو الجواز عندك بقى زي شرا الجزمة؟
لو ضايقتك تقلعيها؟
بصيتلها بضحك وقولت:
= على الأقل الجزمة لما بتوجعني بعرف أرجعها، إنما الجواز القديم دا أنا لحد دلوقتي مش عارفة رجلي كانت مستحملة تمشي بيه إزاي.
ضحكت ماما وقالت:
_ طب يلا خلصي عشان الناس على وصول.
بعد حوالي نص ساعة كان عمر وصل مع والدته وأخته، واستقبلناهم وقعدنا كلنا في الصالون.
كان عمر هادي ومحترم، وطريقته في الكلام مريحة، ووالدته كمان كانت لطيفة، لكن أخته كانت من النوع اللي مبتتكلمش كتير في الأول، بتفضل تراقب وتبتسم، وكأنها بتسجل كل كلمة بتتقال.
بدأت والدته تتكلم مع ماما عن العيلة والشغل، وبعدها عمر وجه كلامه ليا وقال بإبتسامة:
_ أنا بصراحة حابب أعرف عنك أكتر، يعني إي الحاجات اللي بتحبيها وإي اللي بتضايقك؟
إبتسمت وقولت:
= بحب الهدوء، وبحب الناس اللي بتتكلم بصراحة، وبضايق جدًا من اللي بيقول حاجة ويعمل عكسها.
هز راسه وقال:
_ دي حاجة مهمة فعلًا، وأنا كمان بحب الوضوح، ومبحبش المشاكل اللي بتكبر بسبب إن كل واحد مستني التاني يفهمه من غير ما يتكلم.
ابتسمت وقولت:
= أهو كدا إحنا متفقين في أول نقطة على الأقل.
ضحك وقال:
_ لسة في نقط كتير، بس واحدة واحدة.
دخلت أخته في الكلام وهي بتبصلي بابتسامة:
_ طب وإنتِ بقى بتعرفي تطبخي ولا من النوع اللي بيعتمد على الدليفري؟
بصيتلها بابتسامة وقولت بهدوء:
= بعرف أطبخ الحمدلله، بس هو فيه امتحان عملي النهاردا وأنا معرفش؟
ضحكت وقالت:
_ لأ يا حبيبتي، أصل عمر أخويا مدلّع شوية، ومتعود إن كل حاجة تبقى جاهزة، فـ كنت بسأل عشان ميتعبكيش.
رديت عليها بهدوء:
= متقلقيش، أنا مش هتعبه، وهو كمان مش هيتعبني، إحنا داخلين نتجوز مش داخلين نعيّن شيف وخدامة.
ماما ضحكت بخفة، وأخت عمر ابتسمت إبتسامة صغيرة وهي بتقول:
_ طبعًا يا حبيبتي، أنا بس بخاف على أخويا.
بصيتلها وقولت بابتسامة وأنا بتكلم بثقة ومش هخليها تعرف تضايقني لأني فهمتها:
= ربنا يخليهولك، وأنا كمان بخاف على نفسي، فمتقلقيش إحنا الإتنين في الأمان.
عمر ضحك وقال:
_ أنا كدا بدأت أحس إنكم هتتفقوا عليا من أول يوم.
ردت أخته بسرعة:
_ لا يا حبيبي، إحنا بنطمن بس، مش كل الناس بتستحمل طباعك زي ما إحنا مستحملينها.
بصيت لعمر وقولت بتريقة خفيفة:
= أهو دي معلومة مهمة، كنت محتاجة أعرفها قبل ما أوافق.
ضحك عمر وقال:
_ لا متصدقيهاش، دي بتحب تتكلم كتير، أنا شخص هادي جدًا.
ردت أخته وهي بتضحك:
_ هادي؟! يا سلام! دا إنت لو اتأخر عليك الأكل عشر دقايق بتقلب البيت.
ضحكت ضحكة مستفزة وقولت:
= طب كويس إننا عرفنا من دلوقتي، هنكتب في الاتفاق إن الأكل لازم يوصل قبل ما العريس يتحول لشخص تاني.
ضحك عمر، وحتى والدته ضحكت وقالت:
_ ربنا يسعدكم يا رب، ويكتبلكم الخير.
بعد شوية أخته رجعت بصتلي وقالت بنبرة فيها فضول:
_ بس أنا عايزة أسألك سؤال، ومش عايزاكي تزعلي مني.
ابتسمت وقولت وأنا بجز على سناني بهدوء:
= إتفضلي.
قالت وهي بتبصلي بتركيز:
_ هو إنتِ وطليقك لسة بينكم تواصل؟ يعني عشان لو في آي حاجة قديمة أو مشاكل، إحنا بنحب كل حاجة تبقى واضحة من الأول.
بصيتلها بهدوء وأنا بحاول أكتم غضبي ومقومتش أعجنها لأنها بتأكد على كوني منفصلة وأنا فاهمة وقولت:
= لأ، مفيش بينا آي تواصل، وكل واحد في طريقه، وإحنا انفصلنا من سنة وكل واحد كمل حياته.
هزت راسها وقالت بنبرة تبين نفسها متقصدش:
_ أصل ساعات بيبقى في ناس بتتطلق وتفضل متعلقة ببعض، ودا بيعمل مشاكل بعد الجواز.
إبتسمت بهدوء وقولت:
= عندك حق، بس التعلق مش بيتقاس بعدد السنين، فيه ناس بتعيش مع بعض عمر كامل ومبتعرفش بعض، وفيه ناس بتفترق وتكتشف إن الانفصال كان أحسن قرار أخدته.
سكتت لحظة، وبعدها ابتسمت وقالت:
_ وجهة نظر برضوا.
عمر بص لأخته وقال:
_ كفاية أسئلة بقى يا سارة، إحنا جايين نتعرف مش نعمل تحقيق.
ردت عليه وهي بتضحك:
_ خلاص يا سيدي، أنا بس عايزة أطمن عليك.
وبعدها القاعدة كملت بشكل طبيعي، واتكلمنا عن الشغل والبيت والتجهيزات والحاجات اللي كل واحد فينا بيحبها، وعمر كان واضح إنه مرتاح، وأنا كمان إرتاحت لطريقته.
قبل ما يمشوا، والدته بصت لماما وقالت بابتسامة:
_ إحنا اتشرفنا بيكم جدًا، وإن شاء الله يكون فيه نصيب ونبقى أهل.
ردت ماما بإبتسامة:
_ الشرف لينا، وربنا يقدم اللي فيه الخير.
وعمر قبل ما يخرج بصلي وقال بإبتسامة إعجاب:
_ أنا مبسوط إني اتعرفت عليكِ،
وإن شاء الله تكون دي بداية خير.
ابتسمت وقولت:
= إن شاء الله.
خرجوا، وأول ما الباب إتقفل ماما بصتلي بلهفة وقالت:
_ ها؟ إي رأيك؟
اتنهدت وقولت:
= كويس يا ماما، محترم وهادي، وإرتحتله.
ابتسمت وقالت:
_ وأنا كمان ارتحت لأمه، بس أخته دي حاسة إنها هتتعبنا شوية.
ضحكت وقولت:
= دي شكلها بتحب أخوها للدرجة اللي تخليها تترسم علينا، بس متقلقيش أنا بعرف أتعامل مع النوع دا.
قالت وهي بتقعد جنبي:
_ طب وإنتِ موافقة؟
بصيتلها بإبتسامة وقولت:
= أيوا، مفيش مانع نكمل ونسأل عليه أكتر، ولو كل حاجة تمام يبقى على بركة الله.
---
بعد ما مشيوا بحوالي ساعتين، ماما جات قعدت جنبي في الصالون، وفجأة قالتلي:
_ على فكرة، أم عمر كلمتني.
بصيتلها وقولت:
= خير يا ماما؟
قالت بإبتسامة:
_ عمر عايز رقمك، بيقول إنه حابب تتكلموا شوية في حدود التعارف، بدل ما كل حاجة تبقى عن طريق الأهل.
ضحكت وقولت:
= خلاص يا ستي، إبيهوله.
وبالفعل ماما بعتتله رقمي، وبعدها بـ وقت قليل لقيت مكالمة منه،
رديت وقولت:
_ ألو، السلام عليكم.
رد بصوته الهادي:
= وعليكم السلام، إزيك؟
أنا عمر، أتمنى مكُنش إتصلت في وقت مش مناسب.
إبتسمت وقولت:
_ لأ خالص.
قال بإبتسامة:
= بصراحة أنا كنت حابب أتكلم معاكِ شوية بعد قاعدة النهاردا، حسيت إننا اتكلمنا في حاجات عامة ومخدناش فرصة نعرف بعض كويس.
رديت عليه بإبتسامة أنا كمان:
_ عندك حق، القاعدة كانت متوترة شوية.
قال بإبتسامة باينة من صوته:
= طب قوليلي بقى، إنتِ بتحبي تعملي إي في وقت فراغك؟
ضحكت وقولت:
_ سؤال بسيط، بس إجابته طويلة شوية.
= أنا فاضي، اتفضلي.
قولتله إني بحب القراءة والكتابة، وإن عندي شوية اهتمامات خاصة بيا، وإن أكتر حاجة بتبسطني إني أعمل حاجة بحبها وأحس إني أنجزت فيها.
اتكلمنا شوية عن شغله واهتماماته، وعن شكل الحياة اللي كل واحد فينا متخيلها بعد الجواز، وكان واضح إنه بيسمع وبيفهم مش مجرد مستني دوره يتكلم.
في وسط الكلام قال:
= طب إنتِ من النوع اللي لما يزعل بيسكت ولا لازم يتكلم؟
رديت عليه بجدية:
_ على حسب، لو الشخص اللي قدامي بيفهم وبيسمع بتكلم، إنما لو هفضل أشرح في نفسيتي وأثبت إني زعلانة، فالأحسن أسكت وأوفر طاقتي.
ضحك وقال:
= لا كدا أنا لازم أخلي بالي، واضح إن السكوت عندك أخطر من الكلام.
ضحكت وقولت:
_ أهو إنت كدا بدأت تفهمني.
فضلنا نتكلم شوية، ولما قفلنا كنت مرتاحة أكتر من الأول.
---
تاني يوم الصبح نزلت أشتري شوية حاجات من السوبر ماركت، وكنت واقفة عند الكاشير بحاول أحط الأكياس في الشنطة، وفجأة سمعت صوت بيقول:
_ إي ده؟ هو إنتِ بتشتغلي هنا دلوقتي؟
رفعت عيني، ولقيت آدم واقف ورايا!
بصيتله بملل وقولت:
= أيوا، مستنيينك تيجي تعملنا تفتيش على البضاعة.
ضحك وقال:
_ لا أصل واضح إنك بتاخدي الموضوع بجدية، بقالك عشر دقايق بتختاري في كيس مكرونة.
بصيت للكيس اللي في إيدي ورجعت بصيتله:
= عشان مش كل الناس بتشتري أي حاجة وخلاص، في ناس بتحب تختار الحاجة المناسبة، مش زي ناس بتختار وتكتشف بعدين إنها غلط.
ضحك بإستفزاز وقال:
_ لسة بتلمحي للقديم؟
يا بنتي كفاية، أنا خلاص بقيت من الماضي.
رديت عليه بإبتسامة مستفزة:
= أهو دي أول معلومة صح تقولها من ساعة ما شوفتك.
كان لسة هيرد، لكن الكاشير قالي:
_ يا فندم الحساب.
طلعت الفلوس ودفعت، وآدم كان واقف مستني دوره، فخدت الأكياس وكنت همشي، لكن كيس منهم اتقطع فجأة ووقعت منه علبة صلصة على الأرض.
آدم بص للعلبة وبعدين بصلي وقال بضحكة:
_ حتى الأكياس مش طايقاكِ.
بصيتله وأنا بحاول مهتمش للمستفز دا بس وشي مكانش عارف يخبي، ضحك بصوت عالي، وانحنى يساعدني يلم الحاجات، لكن أول ما مد إيده على علبة الصلصة قولتله:
= سيبها، أنا هلمها.
رفع عينيه ليا وقال:
_ إنتِ خايفة أساعدك؟
رديت عليه:
= لأ، بس مش عايزة أرجع البيت آلاقي نفسي مديونة ليك بكيس مكرونة وعلبة صلصة.
وقف وهو بيضحك وقال:
_ إنتِ مستحيل تتغيري.
ابتسمت وقولت:
= الحمدلله، يارب أفضل زي ما انا دايمًا.
شيلت الأكياس ومشيت، لكن قبل ما أخرج سمعت صوته بيقول:
_ على فكرة، سمعت إن في عريس جديد في حياتك.
وقفت لحظة ولفيتله:
= وإنت سمعت منين؟
إبتسم وقال:
_ الدنيا صغيرة، وبعدين أنا لسة أعرف ناس كتير مشتركة بيننا.
بصيتله ببرود وقولت:
= ربنا يزيدك في معارفك، ويشغلك بيهم عن حياتي.
قال بإستفزاز:
_ بس خدي بالك، متستعجليش،
مش كل واحد بيضحك في قعدة التعارف يبقى ملاك.
إبتسمت وقولت:
= متقلقش، أنا بقيت بعرف أفرق بين الملاك والشيطان، خصوصًا إني عشت مع واحد من النوع التاني فترة كفاية.
سيبتهُ بعدها ومشيت.
---
في نفس اليوم، كان عمر قاعد في البيت مع والدته وأخته سارة، وسمع أخته بتقول لأمها:
_ أنا مش مرتاحة للموضوع دا أوي يا ماما.
بصلها عمر بإستغراب وقال:
= موضوع إي؟
ردت وهي بتبصله:
_ موضوع جوازك، إنت مستعجل ليه؟
ما تتأنى شوية، البنت مطلقة وإحنا لسة منعرفهاش كويس.
إتنهد عمر وقال:
= وإي علاقة إنها مطلقة إننا نستعجل أو نتأخر؟
إحنا سألنا عليها، وقعدنا معاها، وأنا ارتحتلها.
_ أنا مقولتش إنها وحشة، بس إحنا منعرفش عنها كل حاجة، وبعدين إنت عارف إن الجواز مش هزار.
بصلها عمر وقال بجدية:
= وأنا عمري ما إعتبرته هزار، وعشان كدا مش هاخد قرار من غير ما أفكر، بس مش معنى إن عندها تجربة قديمة إنها تفضل طول عمرها متهمة بسببها.
قالت سارة بضيق:
_ أنا بس خايفة عليك.
رد عليها بهدوء:
= وأنا مقدر خوفك، بس في فرق بين إنك تخافي عليا وبين إنك تحكمي على حد من غير ما تعرفيه.
والدته دخلت في الكلام وقالت:
_ خلاص يا سارة، عمر كبير وعارف هو بيعمل إي، وإحنا كمان ارتحنا للبنت وأهلها.
سارة سكتت، لكنها كان باين عليها مش مقتنعة،
عمر قام من مكانه وقال:
= أنا مش عايز الموضوع يتحول لخناقة، بس حابب أوضحلكم حاجة، أنا لما أتجوز هختار واحدة أكون مرتاح معاها، مش واحدة الناس كلها موافقة عليها وأنا مش حاسس ناحيتها بحاجة.
وبعدها دخل أوضته، وسارة فضلت باصة لأمها بضيق.
---
بالليل عمر كلمني تاني، وإتكلمنا شوية، وفي وسط الكلام قال:
= على فكرة، أنا عايز أجيلكم مرة تانية.
إبتسمت وقولت:
_ خير؟ هو في سؤال مردتش عليك فيه المرة اللي فاتت؟
ضحك وقال:
= لأ، بس حابب أقعد معاكي تاني ونتكلم براحتنا، وأعتقد إن المرة الجاية هنبقى قربنا ناخد قرار.
رديت عليه:
_ مفيش مانع، إتفضلوا في أي وقت.
قال:
= طب إيه رأيك بعد بكرا؟
أكلم ماما تتفق مع طنط على الميعاد.
قولتله بإبتسامة:
_ تمام، إن شاء الله.
---
عدى اليوم اللي بعده بشكل عادي، وكنت بدأت فعلًا أرتاح لعمر، خصوصًا إنه كان بيتكلم معايا باحترام ومبيحاولش يستعجلني في آي حاجة.
وفي اليوم اللي إتفقنا فيه على الزيارة، من بدري والبيت مقلوب، ماما بتجهز، وأنا بساعدها في المطبخ، وفجأة جرس الباب رن.
بصيت لماما وقولت:
= أكيد جم، روحي إنتِ افتحي وأنا هخلص اللي في إيدي.
سمعت صوت ماما وهي بتسلم على الضيوف، وبعدها صوت راجل بيقول:
_ إزيك يا طنط؟ عاملة إي؟
وقفت مكاني وأنا حاسة إن الصوت مألوف بشكل مش طبيعي.
خرجت من المطبخ وأنا بمسح إيدي في الفوطة، وأول ما بصيت ناحية الباب إتسمرت مكاني.
- آدم!
كان واقف جنب عمر، وبيسلم على ماما بمنتهى الطبيعية، كأنه داخل بيته مش بيت طليقته!
عمر أول ما شافني إبتسم وقال:
_ إزيك؟ عاملة إي؟
حاولت أبتسم وأنا ببص لآدم اللي كان مركز معايا بشكل مستفز، وقولت:
= الحمدلله، أهلًا وسهلًا.
عمر بص لآدم وقال وهو بيضحك:
_ دا بقى آدم صاحبي، أنا حكيتلك عنه قبل كدا، وهو تقريبًا أكتر واحد عارفني في الدنيا.
آدم مد إيده يسلم على ماما، وبعدها بصلي بابتسامة جانبية وقال:
_ إزيك يا... مدام؟!
بصيتله ببرود وقولت:
= الحمدلله، إنت عامل إي؟
عمر بصيلنا بإستغراب وقال:
_ هو إنتوا تعرفوا بعض؟
آدم إبتسم وسبقني في الرد وقال:
_ نعرف بعض، آه إنت كنت مسافر مدة طويلة؟!
سكت لحظة، وبعدين بص لعمر وقال بمنتهى البرود:
_ دي طليقتي يا عمر!
