رواية خيط مقطوع الفصل الأول بقلم ملك ابراهيم
بلاغ وصـل قسـم شرطـة الجيـزة، طفـله عنـدها شهـر مرميـه جنـب مصـنع مُعلبـات ومفصــوله الــرأس.. بس الغـريبه إن صـوابع إيديها كانـوا مبتـورين؟!..
أنا نـورسين سيد المُسلمي.. ظـابط شُرطـة.. كُنت قـاعدة جـوا مكتبي بـراجع أخر قضيـة.. عم شوقي إللي علىٰ أول الشـارع كـان مبلـغ عن عم سيـد إنه واقـف جنبه بعـربية فـول وكـدة هو بينافسـه في أكل عيشـه..
قـدم فيه بـلاغ علشـان نشيـل العربيـة بتـاعته.. ربـنا يهـديهم هما الإتنين.. بس أنا في الأخر قررت أمشي عم شوقي علشان راجل غــلاوي من جـوا..
وأنا بشـوف الـورق بـاب المكتـب إتفتـح بصيـت قصـادي لقيـت حبيب القـلب والعيـن.. خـالد جـوزي وأبو بنتي تـلا...
بس طبعًـا جـايلي بخبـر شبـه بامبـرز تـلا بالظبـط.. وهـو إنـه وصـل بـلاغ بـوفـاة طفـله أو بالتحـديد جـريمة قتـل جـديدة..
_نـورس أنا سيبت تـلا عنـد والـدتك..
_من وقـت ما أُمي رجعت من السفـر وتـلا قاعـدة عنـدها الـوقت كُله.. المُهـم داخـل عليـا دخلـة المُخبـرين دي ليه؟!..
_المُهم داخـل عليا دخلـة المُخبـرين دي ليه؟!..
خالد سحب الكرسي وقعد قدامي، وحط ملف بني على المكتب، وبصلي بنظرة خلتني أعدل قعدتي.
_عندنا جريمة قتـل يا نورس.
_يا ساتر يا رب! هو مفيش يوم يعدي من غير ما حد يمـوت؟!..
_للأسف لأ، والمرادي الموضوع مش سهل.
_طب ما تقول يا أخويا بدل ما أنت عامل فيها مسلسل تشويق!..
فتح خالد الملف وبدأ يتكلم بجدية..
_من حوالي ساعة، وصل بلاغ لقسم شرطة الجيزة من واحـد من عمال مصنع للمعلبـات، بيقول إنه أثناء مروره بجانب سور المصنع لاحظ وجـود كيس كبير مرمي في منطقة مهجورة، ولما قرب منه اكتشف وجود جثـة لـ طفلة.
_طفلـة؟!..
_أيوه، رضيعة عمرها حوالي شهر، والجثـة كانت مفصـولـة الرأس، بالإضافة إلى إن صوابع إيديها مبتـورة...
سكت شوية وأنا بحاول أستوعب الكلام، وبعدها سحبت الملف من قدامه وبدأت أقلب في الأوراق.
_استنى بس... يعني إحنا بنتكلم عن طفلة عندها تقريبًا شهر واحد؟! مين ممكن يعمل كدا؟!..
_دا إللي هنحاول نعرفه.
رفعت عيني ليه وسألته:-
_الجثـة اتنقلت المشرحة؟!.
_أيوه، وأكرم هناك دلوقتي مع فريق الطب الشرعي، مستنيين تقرير المعاينة الأولي.
_والبـلاغ وصل إمتى بالظبط؟!.
_الساعة عشرة ونص بالليـل، والوقت المتوقع للوفـاة لسه مش متحدد.
قلبت صفحة تانية من الملف، ووقفت عند صورة للمكان اللي اتوجد فيه الجثـة..
_المصنع دا شغال؟!.
_أيوه، مصنع معلبات، وفيه ورديات شغالة على مدار اليوم، والمكان اللي اتوجدت فيه الطفلة جنب السور الخلفي للمصنع، بعيد شوية عن البوابة الرئيسية.
_يعني اللي رماها كان عارف المكان كويس، وعارف إن المنطقة دي مش عليها حركة كتير.
خالد بيهـز راسـه، وبعدها قـال..
_وفي حاجة تانية، العامل اللي بلغ عن الجثـة بيأكد إنه عدى من نفس المكان قبلها بساعتين، ومكانش فيه أي حاجة.
_يبقى الجثـة إتسـابت في الفترة دي، ودا معناه إن عندنا وقت تقريبي نقدر نشتغل عليه.
قفلت الملف وقومت من مكاني، وسحبت الچاكيت من على ضهر الكرسي.
_يلا بينا.
خالد بصلي بإستغراب..
_على فين؟!.
_على المشـرحة يا أستاذ خالد، ولا أنت فاكرني هفضل قاعدة أتفرج علىٰ صور الجثــة؟!
_طب استني، مش المفروض نروح مكان الواقعة الأول؟!.
_هنروح الاتنين، بس عايزة أعرف أكرم وصل لإيه قبل ما نبدأ نلم الناس ونتعـب نفسنا في تحقيقات ملهاش لازمة.
خرجنا من المكتب، وخالد كان ماشي جنبي وهو بيبص في تليفونه.
_على فكرة، والدتك قالتلي إن تـلا هتبات عندها النهارده.
_الله! هو أنتوا متفقين عليا؟!..
_متفقين على إيه؟!.
_كل ما أرجع البيت ألاقي بنتي اتخطفـت من حضني، مرة عند ماما ومرة عند طنط، وأنا آخر واحدة أعرف!..
ضحك خالد وقـال..
_يا ستي البنت مبسوطة، وبعدين دي فرصة نخلص شغلنا من غير ما كل خمس دقايق حد يتصل يسألنا هي أكلت ولا نامت.
_أنت بتتكلم عن بنتك كأنها لجنة تفتيش!..
_دي بنتك أنتي، أنا مالي!..
وقفت وبصيتله بصدمة مصطنعة.
_نــــعم؟! عيد الكلام دا تاني يا خالد!..
_يلا يا نورس، الجـريمة مستنيانا.
_هعديهالك المرة دي علشان عندنا جثـة، إنما في البيت لينا حساب تاني.
___________________
وصلنا المشـرحة بعد حوالي عشرين دقيقة، وكان أكرم واقف قدام غرفة الفحص، ماسك ملف صغير وبيراجع فيه بعض البيانات.
أول ما شافنا قرب مننا وقـال..
_أخيرًا وصلتوا، أنا مستنيكم من بدري.
_خيـر يا أكرم، وصلـت لإيه؟!.
فتح الملـف وبدأ يعرض علينا المعلـومات الأولية.
_الجثمان لطفلة حديثة الولادة، العمر التقديري من أربعة أسابيع إلى خمسة أسابيع، ومفيش أي أوراق أو متعلقات شخصية كانت موجودة معاها وقت العثور عليها.
_والوفـاة؟!.
_لسه مستنيين تحديد السبب بشكل نهائي، لكن فيه إصابـات واضحة علىٰ مستوى الرقبة، وفصـل الرأس حصل بإستخدام أداة حـادة، وهنحتاج فحص أدق لتحديد طبيعة الأداة.
بصيتله بتركيز وسألته.
_طب وصوابع الإيدين؟!.
أكرم سكت لحظة وقلب في ورقة تانية.
_دي أغرب نقطة في القضية، الصوابع مش مبتـورة بطريقة عشوائية، فيه آثار قطـع منتظمة نسبيًا، ودا معناه إننا محتاجين نعرف هل اتعملت في وقت الوفـاة ولا بعدها...
خالد عقد حواجبه وقـال..
_يعني ممكن يكون فيه سبب معين ورا تشويه الجثـة؟!.
_احتمال، بس مينفعش نستنتج حاجة قبل ما نخلص الفحص.
قربت من أكرم وخدت منه الملف.
_عايزة أعرف حاجة مهمة... هل فيه أي علامات مميزة على جسم الطفلة؟! وحمات، آثار عمليات، أي حاجة ممكن تساعدنا نوصل لهويتهـا..
_فيه علامة صغيرة علىٰ الكتف الأيسر، شبه أثر تطعيم، لكن لسه بنتأكد منها.
_تمام، عايزة تقرير مبدئي بكل التفاصيل، وأي عينـة ممكن تساعدنا في تحديد هوية الطفلة أو الوصول لأهلها.
أكرم هز راسه وقـال..
_حاضر يا نـورسين بـاشا..
خرجـت أنا وخـالد من المشرحـة، وكنت طول الطريق بفكر في تفصيلة واحدة...
طفلة عمرها شهر، مفيش حد بلـغ عن اختفائهـا لحد دلوقتي، وجثمانهـا إتساب جنب مصنع، مع تشـويه متعمد لأجزاء معينة من جسمها، السؤال مكانش مين قتلـها وبس...
بعد ما خلصنا من المشرحة، رجعنا القسم تاني، وخالد دخل مكتبه علشان يراجع شوية بيانات تخص المصنع، وأنا دخلت مكتبي وحطيت الملف قدامي، وفضلت أقلب في الصور وأراجع كل تفصيلة ظهرت في القضية.
كنت كل شوية أبص لصورة الطفلة وأرجع أبص للتقرير، مش قادرة أفهم إيه اللي يخلي حد يعمل في طفلة صغيرة كدا؟! وإيه السبب اللي يخليه يبـتر صوابع إيديها تحديدًا؟!..
مسكت التليفون واتصلت بأكرم علشان أتأكد إن مفيش أي تحديثات جديدة.
_أيوه يا أكرم، فيه حاجة ظهرت؟!.
_لسه يا فندم، إحنا شغالين على العينات، وأول ما نوصل لأي نتيجة هبلغ حضرتك.
_تمام، بس عايزة الفحص يكون دقيق، خصوصًا آثار القطع الموجودة في إيديها، ممكن تكون هي المفتاح اللي يوصلنا لحاجة.
_حاضر يا فندم.
قفلت معاه ورجعت أسند ضهري على الكرسي، لكن قبل ما ألحق أغمض عيني لثواني، باب المكتب اتفتح ودخل خالد.
_إيه يا نورس، وصلتي لحاجة؟!.
_لأ، لسه مستنية أكرم، وأنت عملت إيه في موضوع المصنع؟!.
خالد سحب الكرسي وقعد قدامي.
_كلمت القوة، قالولي إنهم بدأوا يراجعوا الكاميرات الموجودة حوالين المصنع، بس لحد دلوقتي مفيش حاجة واضحة.
_طب والعامل اللي بلغ؟!.
_حسام بيحقق معاه ومع باقي العمال، وهما مستنيين نروح علشان نبدأ نسمع أقوالهم بالتفصيل.
_خلاص، أول ما أكرم يخلص الفحص هنتحرك.
خالد بصلي شوية وبعدها ابتسم بسخرية.
_إنتي ناوية تفضلي قاعدة هنا لحد ما الجثـة تنطق؟!.
_آه طبعًا، ولو نطقت هخليها تعترف علىٰ الجاني كمان.
ضحك خالد وقام من مكانه.
_طب أنا هروح أشوف حسام وصل لفين، ومتتأخريش عليا.
_حاضر يا سيادة خـالد باشا زوجي تحت أمرك.
خرج خالد وقفلت الملف، وبدأت أراجع تاني بيانات البلاغ، لحد ما عدى حوالي ساعة كاملة من غير أي جديد.
___________________
كنت لسه بكتب ملاحظاتي على ورقة قدامي، وفجأة باب المكتب اتفتح بسرعة، ودخل العسكري وهو بياخد نفسه بالعافية.
_نـورسين بـاشا..
رفعت عيني من علىٰ الورق وبصيتله.
_فيه إيه يا عسكـري، داخل كدا ليه؟!..
_فيه بـلاغ جديد يا فندم!..
_بـلاغ إيه؟!..
العسكري قرب خطوة ورد بسرعة:-
_جريمة قتـل يا فندم.. لقوا ست مقتـولة جوا شقتها والبـلاغ وصل من حوالي ربع ساعة.
قومت من مكاني وسحبت الجاكيت من على الكرسي.
_العنوان فين؟!..
_في منطقة المطـرية يا فندم، والقوة موجودة في المكان ومستنياكم.
_يعني إيه جريمتيـن قتـل في يـوم واحـد!..
