رواية خيانة زوجية الفصل الأول بقلم محمود الأمين
جريمة بتحصل في محافظة بني سويف.. ولكن القاتل مش هيتحاسب، والكل كان عارف كده، ولكن ظهور بعض التفاصيل أثناء التحقيقات خلت الموضوع يتقلب من جريمة قت. ل عادية لواحدة من أصعب قضايا البحث الجنائي.
الجريمة حصلت في يوم عادي، واحد ومراته وابنه نايمين في البيت، والدنيا هادية. والبيت ده بيت عيلة، والناس اللي فيه معروف عنهم إنهم قمة في الاحترام.. فجأة، الراجل ده يصحى من النوم، ويروح على الخزنة بتاعته، يطلع المسدس، ويدخل على مراته اللي نايمة ويضربها بالرص. اص. والحقيقة إنه كان بيضرب طلق عشوائي، لدرجة إن مراته اتصابت بـ6 رصاصات، وبعدها دخل على ابنه وعمل نفس اللي عمله تاني.
طبعًا صوت ضرب النار كان عالي، وخلّى أهله ينزلوا بسرعة على شقته عشان يعرفوا فيه إيه؟! والغريبة إنهم لما دخلوا الشقة لقوه قاعد في الصالة، وحاطط قدامه المسدس الخاص بيه، وبيشرب سيجارة.. تصرف غريب من المهندس شهاب، مهندس البرمجيات اللي بيشتغل في شركة من أكبر الشركات على مستوى الشرق الأوسط.
ولكن لما الشرطة بتوصل المكان، بيعرفوا من أهل شهاب إنه معاه شهادة بتقول إنه مصاب بخلل في الفص الجبهي بالمخ، وإنه غير مسؤول عن تصرفاته.. والفترة اللي فاتت كانت تصرفاته كلها عدوانية، وبعد ما كان بيرتكبها كان بينكر إنه عمل أي حاجة.
طبعًا كلام أهل شهاب كان موثق بشهادة فعلًا من المستشفى ومختومة بختم النسر.. وبكده القانون مش هيحاسبه على الجريمة دي، ولكن ممكن يدخل مستشفى الأمراض النفسية ويقعد فيها بقية حياته.
طبعًا الطب الشرعي والمعمل الجنائي بيوصلوا للمكان، وبيتم تفتيش الشقة وفحص مبدئي للجث. ث وللمكان... ولكن ساعتها رجال الشرطة بتلاقي حاجة، والحاجة دي كانت هي البداية لكشف التفاصيل وحل القضية دي.
وبسبب الحاجة دي، القضية لحد دلوقتي معروفة باسم: عقد عرفي.
....
خيانة زوجية
الجزء الأول
أنا المقدم حمزة عبد المنعم، رئيس المباحث بمحافظة بني سويف. كنت واقف في الشقة أثناء التفتيش وفحص الجث. ث، وساعتها واحد من العساكر لقى في أوضة مقفولة، واللي هي المفروض أوضة الطفل الصغير، عقد عرفي.
والعقد ده كان باسم الأستاذ شهاب وواحدة اسمها سلمى.
ولكن مراته اللي اتقتلت على إيده اسمها مروة، وابنه اسمه سليم، وبنفهم من الورقة دي إن المهندس شهاب كان متجوز على مراته.
قربت منه، كان لسه قاعد على الكنبة، بيتعامل بلامبالاة مش طبيعية، وكأنه مرتكبش جريمة قت. ل. ولما واجهناه بأنه هو اللي ارتكب الجريمة، قال: أنا معملتش حاجة، ومكنش مصدق إن مراته وابنه اتقت. لوا.
ودي حاجة أهله قالوا عليها إنها عادية جدًا، وكان بيقول على أي تصرف هو عمله إنه ما عملهوش، وكان بيستغرب لما الناس بتقوله إن أنت ضربت حد أو عملت حاجة مش كويسة.. لدرجة إننا في فترة من الفترات بدأنا نصوره فيديو وهو بيرتكب الفعل عشان يصدق إنه بيعمل كده.
وبعد ما خلصنا كلام مع أهل القاتل، عرفنا إن مروة دي مقطوعة من شجرة، ومالهاش حد، وإن اللي جوزها شهاب هو عمها، وتوفى قريب.
وإحنا بالنسبة لينا كانت القضية خلصانة: القاتل موجود، والجث. ث موجودة، وسلاح الجريمة موجود وعليه بصماته، والرصاص طالع منه.. جريمة مكتملة الأركان، والمحكمة هي اللي هتقول كلمتها.
تم نقل الجث. ث للطب الشرعي، وقبضنا على شهاب محفوظ، واتحجز عندنا لحين عرضه على النيابة.. لحد كده الدنيا كانت ماشية تمام، لحد ما حصلت حاجة قلبت موازين القضية.
بعد مرور أسبوع، لقينا مدام منى، والدة الجاني شهاب محفوظ، جت عندنا القسم وطلبت تقابلني لأمر ضروري، وقالت إنها جاية تعمل بلاغ تزوير في المحامي بتاع العيلة.
طلبت منها تهدى عشان أفهم إيه اللي حصل بالظبط، وعرفت إن المحامي صبري عادل راح عندهم البيت النهارده وفجّر مفاجأة، وهي إن كل حاجة كانت ملك شهاب اتكتبت باسم مروة.. ومروة قبل ما تموت كانت سايبة وصية للمحامي، في حالة موتها تؤول كل الثروة للجمعيات الخيرية.
ولما أهل شهاب قالوا إن شهاب كان فاقد للأهلية ومش مسؤول عن تصرفاته، يعني العقد ده مضروب، اتصدموا لما قال إن الأستاذ شهاب عامل توكيل لمراته من سنتين، يعني قبل إصابته بموضوع الفص الجبهي ده.. يعني هي كده موقفها سليم 100%.
طبعًا أهل شهاب رفضوا يصدقوا الكلام ده، ووالدته جت تعمل محضر وتقول إن المحامي مزور، ولكن ما عندهاش دليل على كلامها.. ولكن عملنا المحضر وقررنا نستدعي المحامي صبري عادل، ويتم فحص التوكيل والتأكد من صحته.
وبعد ما مشيت والدة شهاب، سألت نفسي: هي ليه مدام مروة عملت كده؟
كنت شايف إن الموضوع فيه حاجات كتير، وإن الجريمة اللي حصلت ملهاش علاقة بموضوع الفص الجبهي أو تعب الأعصاب اللي عنده؛ عشان بعد يومين بس توصلنا معلومة تخلي فيه دافع ورا الجريمة.
معمل تحاليل معروف اتصل على تليفون المهندس شهاب، واللي ردت كانت والدته. وساعتها معمل التحاليل بلغها إن التحاليل الخاصة بالمهندس شهاب جاهزة. والدته كانت مستغربة: هي إيه التحاليل دي؟ ولما راحت عشان تستلمها، اكتشفت صدمة كبيرة.
والصدمة دي إن ابنها شهاب مش بيخلف.. ومش كان بيخلف وحصل عنده مشكلة، لا، دكتور التحاليل أكد لوالدة شهاب إن عمره ما خلّف.
وطبعًا الست كانت هتتجنن! معنى الكلام ده إن مروة كانت بتخون شهاب. فهل ممكن يكون قت. لها هي والولد عشان اكتشف خيانتها؟
كلها أسئلة ملهاش إجابة...
المحامي لما بيوصل، بيتم فحص التوكيل اللي معاه، واللي بيخص مدام مروة، من قبل خبير في البحث الجنائي. وساعتها بنكتشف إن التوكيل ده مضروب فعلًا، ولكن أكيد المحامي ما يعرفش حاجة؛ عشان الخبير أكد إن اللي ضرب التوكيل ده شخص عارف كويس هو بيعمل إيه؟! التوكيل يبان إنه حقيقي 100%، ومش باين خالص إنه مضروب.
وبعد التحقيق مع المحامي صبري عادل، يتم إخلاء سبيله من النيابة بضمان محل إقامته.
وبكده كل الثروة ترجع تاني باسم الأستاذ شهاب.. ولكن أثناء فحص الأحراز اللي كانت موجودة في بيت الأستاذ شهاب، بنلاقي موبايل المجني عليها، ولما بنفتحه بنكتشف فعلًا إن مدام مروة كانت بتخون المهندس شهاب، في محادثات ما بينها وما بين شخص، ولكن واضح إن الشخص ده بيكلمها من أكونت فيك.. بس الكلام اللي موجود في الشات كفيل إنه يثبت الخيانة.
كانت كلها دوافع تخلي أي شخص ممكن يفكر في القتل.
تخيل أنت تكون متجوز، وتكتشف إن مراتك بتخونك، وإن ابنك مش ابنك، وإنها كمان زورت توكيل عشان تسرق كل اللي وراك واللي قدامك.. مش هتفكر في الانتقام؟ ولكن مع وجود الشهادة اللي بتقول إن المهندس شهاب عنده مشكلة في الفص الجبهي واضطراب في الأعصاب، وإنه غير مسؤول عن تصرفاته، أظن إن المحكمة هتركن كل الدوافع دي على جنب، والمهندس شهاب هيطلع براءة من جريمة القت. ل، وممكن يتحول لمستشفى الأمراض النفسية والعصبية لتلقي العلاج؛ عشان وجوده بيمثل خطر على اللي حواليه.
ولكن المعمل الجنائي بيقول معلومة مهمة بخصوص العلاج اللي كان موجود في شقة المهندس شهاب، واللي كان بياخد منه طول الفترة اللي فاتت. وعلى حسب شهادة والدته وأهله اللي في البيت، إن اللي كان مسؤول عن العلاج ده هي مراته، مدام مروة المجني عليها.
المعمل الجنائي قال إن العلاج ده هو السبب الرئيسي في المشكلة اللي كانت عند المهندس شهاب، وإن ده مش علاج للمشكلة.. يعني كمان مدام مروة هي السبب في اللي حصل للمهندس شهاب.
كل حاجة كانت مظبوطة أكتر من اللازم، وعشان كده النيابة حولت الموضوع للمحكمة عشان تقول كلمتها، ويتحكم على المهندس شهاب.
وزي ما كنت متوقع، المحكمة حكمت ببراءته من تهمة القتل، ووضعه في مستشفى الأمراض النفسية والعصبية لتلقي العلاج تحت ملاحظة طبية مشددة.
...
طيب، إيه الموضوع؟ كده خلص؟ ما خلاص المحكمة حكمت! ولكن في الحقيقة لا.. عشان بعد يومين بالتحديد، واحدة كبيرة في السن اسمها إحسان بتروح على القسم وبتعمل محضر إن البيت اللي جنبها فيه ريحة وحشة أوي، وإنها حاولت تخبط على جارتها اللي ساكنة جنبها دي، ولكن مفيش حد بيرد، وهي قلقانة.
والصدمة لما بيسألوها عن اسم جارتها دي، بتجاوب وبتقول إن اسمها سلمى شعيب.. والاسم ده هو نفس الاسم اللي كان موجود في العقد العرفي اللي بيخص المهندس شهاب محفوظ.
ساعتها بنتحرك ومعانا قوة من القسم على المكان ده.. كان بيت من دور واحد وشكله قديم شوية. وأول ما دخلنا البيت، كان فيه فوارغ طلقات على الأرض، واضح إن فيه حد هنا كان بيضرب طلقات عشوائية.
وعلى أرضية الصالة كانت جث. ة مدام سلمى شعيب.. طبعًا الدنيا اتقلبت، الجث. ة كانت وصلت لمرحلة من التعفن، وعرفنا إن مر عليها فترة كبيرة.
والمشكلة إن المنطقة دي البيوت فيها قليلة وبعيدة عن بعض، باستثناء بيت مدام سلمى اللي كان جنب بيت مدام إحسان، وده اللي خلاها تشم الريحة دي.
تليفون المجني عليها كان واقع جنبها، ولما فتحته عشان أشوف مين آخر شخص كلمته، كانت الصدمة اللي فتحت ملف القضية الأولاني من أول وجديد؛ عشان الشخص ده يبقى...
