رواية النصيب الفصل الأول بقلم ديدي
ـ متأكدة من قرارك ؟
= اه متأكدة
قولتها بعد ما لميت هدومى فى الشنطة
و مضيت على ورقة طلاقى
من ابن عمى و حبيب عمرى
ـ دينا أهدى و اسمعينى!
= هادية اهو يا تيتة
ـ إنتِ عارفة أنه مش قصده
ضحكت بوجع :
= مش قصده ! دا بيتجوز يا تيتة ؟
اتكلم جدو يعقوب :
ـ طيب هو حمار إنتِ هتعملى زيه ؟
= مش هقدر يا جدو و الله ما هقدر اشوفه بيتجوز غيرى
ـ عارف بس انتى كمان عارفة أنه مش هيسكت على سفرك دا
= مش هيقدر يعمل حاجه أنا مضيت على ورق الطلاق و خليه هو كمان يمضى و كدا كدا كان كتب كتاب بس يعنى مليش عدة
ـ و فكرك كدا هو مش هيعرف يوصلك؟
= هيوصلى ازاى محدش يعرف أنا مسافرة فين حتى انتو مش قايلة ليكم
اتكلمت تيتة راحيل :
ـ هى خلاص واخدة قرارها يا يعقوب سيبها تمشى ، بس طمنينا عليكِ يا دينا
= عيونى يا تيتة
سلمت عليهم و مشيت
طلعت من البيت و ركبت الاوبر اللى كنت طلباه
وبصيت على شكل البيت المتزين
انوار كتير على البيت
و الجنينة اللى قدام البيت فيها كراسى للمعازيم
و ترابيزة كبيرة لون المفرش اللى عليها ابيض
و حواليها كراسى
دموعى نزلت و انا مش مصدقة
حبيبى هيتجوز انهاردة
عارفة أنه اتجوزنى عشان يحمينى و يحمى ورثى بس انا حبيته
العربية اتحركت للمطار
كنت عارفة أنه مش موجود فى البيت عشان بيجيب شوية حاجات للفرح
فـ استغليت عدم وجوده و مشيت
الهوا كان بيضرب فى وشى
و دموعى مازالت بتنزل على حبيبى
حكايتى بتبدأ
من وانا عندى ١٨ سنة و اهلى عملوا حادثة و ماتوا
مكنش ليا غير جدو و تيتة
و لأن يوسف ابن عم عايش معاهم من و هو طفل
لانه عيلته ماتت و هو صغير
فـ مكنش ينفع نعيش مع بعض فى نفس البيت
و كمان اعمامى حاول يخلونى أمضى على ورق تنازل على املاكى
فـ جدو قرر أنه نكتب الكتاب
باعتبار يوسف اكبر منى بـ ٧ سنين
فى هيبقى وأصى عليا
طبعا انا وافقت من غير تردد
دا يوسف حبيبى احلى و أحن راجل فى الدنيا
دا تربية جدو يعقوب و تيته راحيل
انا عادى كنت ممكن ارفض أنا عندى ١٨ سنة
يعنى عادى اقدر اعتمد على نفسى
بس انا مكنتش هلاقى فرصة حلوة زى دى تانى
بالنسبة لـ يوسف فـ هو وافق لانه مكنش عنده خيار تانى
و لانه بردوا بيسمع كلمة جدو و تيتة
كان بيعاملنى بطريقة حنينة خلتنى اقع فى حبها كل اما اشوفه
مش ناسية اليوم اللى جه وقالى
أنه بيحب زميلته فى الكلية
و اكتشف دا بعد ما قابله بعد التخرج بسنين
و هو خد رأى و انا وافقت عشان
فرحته و لمعة عيونه و هو بيتكلم عنها
كان بالنسبالى موافقتى كأنها إعلان لـ موتى
كنت بشوفه و هو بيختار ليها الهدايا
و لمعة عيونه لما يشوف اسمها بينور على تلفونه
لما ييجى اخر الليل واحنا قاعدين فى الجنينة و يحكي ليا
قد ايه هو بيحبها
حاولت و استحملت كتير عشان فرحته
بس لحد كتب كتابه و مش هقدر
مش هقدر اشوفه و هو بيمضى على القسيمة و هى بتحط اسمها جنبه
مش هقدر اشوفه و هو بيرقص معاها
عشان كدا قررت اسافر
و مضيت على ورقة طلاقى منه
عارفه أنه هيتعصب و هيزعق
بس فـ الآخر هـيهدى و هيكتب كتابه و هينسانى
نزلت من الاوبر و خدت الشنط
و دخلت المطار خلصت الاوراق و طلعت على الطيارة
السيدات والسادة،
أهلًا وسهلًا بكم على متن رحلتنا المتجهة إلى روما
نرجو من حضراتكم ربط أحزمة الأمان
ــــــــــــــــــــــــــــــــــــــــــــــــ
﴿ عَسَىٰ رَبُّنَا أَن يُبْدِلَنَا خَيْرًا مِّنْهَا ﴾
أطفئ بهذه الآية نار حسرتك على كل فرصة ضاعت، وعلى كل شيء خسرته، وعلى كل من أفلت يدك في منتصف الطريق، ما أخذه الله منك فهو لحكمة، فإن علمت الحكمة فاشكر، وإن جهلتها فاصبر، أقدار الله كلها خير وإن أوجعتك.
رسالة إلكترونية
من ابلكيشن ـ katkoty
عدى خمس سنين و حاولت فيهم
اشغل تفكيرى بالشغل الكتير
كنت بشتغل شغل اضافى عشان مفكرش فيه
و ارجع اخر اليوم انام من التعب
بس فشلت
كنت بكلم جدو و تيتة كل فترة
و لما اسمه يتذكر فى المكالمة بقولهم إن مشغولة و عندى شغل كتير
و حتى لما بيقولوا ليا أنه بيسأل عليا بتهو الموضوع
مكنتش عايزة اعرف عنه حاجة
و لا اعشم قلبى بحاجة كفاية لحد كدا
غمضت عيونى و انا بحاول ابعد افكارى عنه ....
خرجت من المطار و ركبت أول تاكسى قابلنى
ابتسمت و فتحت الشباك و انا باخد نفس طويل ...
قد ايه مصر وحشتنى!
مكنتش متخيلة أنها هتوحشنى كدا
و لا كنت متخيلة أنه هرجع ليها تانى...
يوم ما مشيت من هنا الحب كان موقعنى و كاسر جذوز رقبتى...
نزلت البيت و حاسبت التاكسى
شيلت الشنطة و مشيت خطوتين ناحية الباب
دخلت من الباب و انا حاسة بمكس مشاعر متلغبطة
قربت من الصالون و انا بقولهم :
ـ يا مساء الهنا على عيلة ابو الهنا
ابتسامتى اختفت لما شوفتهم
قربت منهم بخطوات مترددة
و انا مش مصدقة اللى شايفاه.
