رواية خلف قناع الحب الفصل الأول بقلم هاجر نور الدين
- يعني هشام متجوزني عشان هبنيلهُ مستقبلهُ؟
قولتها وأنا مصدومة ومش قادة أستوعب الكلام اللي بيقولهولي صاحب هشام الأنتيم وهو بيوريني الدليل بسكرينات ومكالمات بينهم.
فيها هشام جوزي اللي كتبنا الكتاب أول إمبارح وهو بيضحك وبيسخر مني وإن مستحيل يحب واحدة زيي من غير مصلحة.
بصيت لـ أحمد صاحبهُ وقولت بـ عيون مليانة دموع:
- وإنت جاي تقولي دلوقتي ليه وتسمعني حاجات بقالها أكتر من سنة؟
رد عليا بكل بساطة وقال بندم:
- لأني ندمت، وعارف إنكم كتبتوا الكتاب،
بس لسة قدامك وقت تتراجعي لسة الفرح بعد يومين.
مسحت دموعي اللي نزلت غصب عني وقولت بتمثيل القوة:
- أنا حياتي مالكش تدخل فيها،
ولكن أنا الحياة علمتني إن مفيش حد بيتغير في يوم وليلة،
أكيد ليك مصلحة إنت كمان من كونك جاي تقولي وتخون صاحبك.
بصلي بعدم تصديق وقال بتردد:
- دا أنا جاي بوعيكِ هو اللي بيخونك!
أنا ماليش مصلحة!
رديت عليه بإبتسامة ساخرة وقولت:
- بمناسبة الرسايل اللي إنت ماسحها من الشات عشان تبرأ نفسك نسيت تمسح رسالة من اللي بعتهالك هشام وهو عامل ريبلاي عليها، كنت كاتب فيها إن هو كدا اللي بيجني على نفسهُ.
بصلي بصدمة وبلع ريقهُ بتوتر وقال:
- إنتِ عندك شدة ملاحظة قوية، بس فهمتي غلط،
أنا قولت كدا عشان قولتلهُ يعني إنه هيشوفهُ في حد من أهلهُ.
قومت وقفت وخدت شنطتي وأنا ماشية قولت:
- بعد كدا مش هسمح لحد يستغلني تاني،
ومش هقول لـ هشام إنك قولتلي حاجة ولا هلغي الفرح لو هدفك إني أضيع عليه كل حاجة، ولو عرفت إن هشام عرف إني عرفت وقتها بمعارفي اللي إنتوا عايزين تتسندوا عليها هعرف أعلمك السكوت.
مشيت من غير ما أسمع ولا كلمة منهُ، مكنتش مصدقة،
ركبت العربية بتاعتي وكانت عيني كل شوية تتملي دموع بتحجب عني الرؤية.
وقفت العربية على جنب لحد ما أهدى عشان ميحصلش حادثة وقعدت أفكر، هو بجد هشام طول السنة ونص دول بيضحك عليا؟
ويعني إي واحدة زيي متستاهلش الحب مش فاهمة،
أنا مالي؟
بقدر مقبول من الجمال ومثقفة وزي ما بيقول مستقبلي مضمون الحمدلله بسبب الشركتين اللي سبهوملي والدي الله يرحمهُ وبقيت مسكاهم مع أختي ووالدتي.
خدت نفس عميق وقررت إني مش هنهار ولا هدبدب في الأرض ولا هعرفهُ إني عرفت حاجة.
أنا هكمل معاه عادي، لكن الشاطر اللي يضحك في الأخر يا هشام،
شغلت العربية وروحت للچيم اللي بتمرن فيه.
مكنش غرضي الحقيقة إني اتمرن،
مسكت وزن تقيل جدًا بطريقة غلط وبأقصى قوة عندي نزلتهُ على رجلي وكسرتها وكأنهُ وقع مني بالغلط.
الألم كان لا يُحتمل، صرخت والناس نقلوني المستشفى وزي ما كنت عايزة رجلي إتجبست، ماكا وأختي جم واللي كنت مستنياه برضوا هشام.
إتكلم هشام وقال بقلق مبقتش مصدقاه:
- إنتِ مش أول مرة تتمرني يا حنين إزاي الوزن دا يقع منك كدا بالشكل اللي إتشرحلي؟
إبتسمت بهدوء وقولت:
- معلش يا حبيبي قلقتك عليا، يمكن بس من التفكير في الفرح، بس كدا للأسف الفرح هيتأجل لحد ما أفًك الجبس.
رد عليا وقال وهو بيمسك إيدي وبيبوسها:
- يا حبيبتي مش دي الحاجة اللي تفكري فيها دلوقتي،
أهم حاجة بس صحتك وتقومي بالسلامة.
إتكلمت ماما وقالت بتنهيدة وحزن:
- مش عارفة بتشيلي وزن تقيل عليكِ بالشكل دا ليه بصراحة لكن الحمدلله إنها جات لحد كدا، دلوقتي بما إنك المديرة التنفيذية هتحضري إزاي الإجتماعات المهمة اللي محدش غيرك بيفهم فيها مع الشركا التانيين؟
رديت عليها وقولت بإطمئنان:
- متقلقيش يا ماما عادي، كرسي متحرك وهحضر أنا إيدي ودماغي كويسين لسة الحمدلله.
إتكلمت أختي بسرعة ونظرات إقناع:
- ممكن أحضرهم أنا ياماما وفرصة أدخل في الحتة دي، إنتوا مش معتمدين عليا في حاجة أساسية في الشركة!
ردت عليها والدتي وقالت بهدوء:
- لأ يا مريم مش حتتك خالص ومش بتفهمي فيها ودي إجتماعات مهمة تخص مستقبل الشركة، مفيش غير حنين اللي بتفهم فيها ونقدر نعتمد عليها.
بصتلي أختي بغضب حاولت تخفيه ولكن معرفتش وقالت:
- يعني هي إتولدت بتعرف؟
إنتِ وبابا الله يرحمهُ بقى بتفضلوها عني دايمًا.
حاولت ألم الموقف وقولت بهدوء وتنهيدة:
- مفيش حد فيهم بيفضل حد عن التاني، الفكرة إن أنا الكبيرة يا مريم وأكيد هكون فاهمة في الأمور دي عنك، كل حاجة ليها وقتها ولما تاخدي خبراتك الكافية معنديش مشكلة تمسكي مكاني.
سكتت وهي مش راضية عن الكلام ولا عن وجودي في الحياة أصلًا، مهتمتش زيادة لأن موضوعي مع هشام أكبر بكتير من تفاهات الإخوات دي دلوقتي.
عدا اليوم وتاني يوم كنت صممت إني هخرج من المستشفى لأن مالهاش لزوم قاعدتي وأكيد مش هفضل فيها لحد ما أفُك الجبس.
روحت للشركة ولقيت هناك هشام موجود،
قبل ما أعرف الخطة اللي بيرسمها عليا كان ممكن أفهم إن جوزي وبيحافظ على مكاني لكن دلوقتي إبتسمت بسخرية.
لما قربت منهُ بالكرسي وأول ما شافني إبتسم وقال بلهفة مصتنعة جدًا أو بقيت بشوفهُ على حقيقتهُ دلوقتي ومش قابلة منهُ لطف:
- إنتِ خرجتي برضوا وصممتي؟
تجاهلت سؤالهُ وقولت بتساؤل:
- بتعمل إي هنا يا هشام ومسألتش على مراتك المتجبسة حتى من الصبح؟
إتوتر شوية لأنهُ مش متعود مني على النبرة دي وقال:
- جيت عشان أشوف الدنيا وأنظمهالك قبل ما تيجي عشان تيجي على الإجتماعات بس يعني زي ما بعمل على طول.
إتكلمت بهدوء وأنا بمشي بالكرسي ناحية مكتبي وقولت:
- بعد كدا متتصرفش في الحاجات دي لأن عينت موظف جديد مسئول بالشغل دا، لأن جالي بلاغات كتير عن وجود خلل في ميزانية ومالية الشركة وعايزة أعرف الغلط منين.
جه ورايا وهو بيقول بتساؤل وصدمة:
- يعني شاكة فيا؟
بصيتلهُ وقولت بإبتسامة:
- أكيد لأ يا حبيبي، أنا بقولك إن جبت موظف عشان يظبطلي الدنيا وعايزاك تخرج برا الصورة خالص فاهمني.
سيبتهُ واقف في صدمتهُ ودخلت مكتبي وبدأت شغل وترتيب أوراقي وأنا براجعهم.
بصيت على الإزاز اللي كان ظاهرلي من خلالهُ وهو واقف باين عليه الضيق والغضب وبعدها مشي من الشركة.
إتنهدت وأنا برجع ضهري للكرسي وقولت:
- هوريك أسود أيام حياتك يا هشام،
زي ما شوفت مني كل حلو هخليك تراقب بعينك كل شر مني.
تاني يوم كنت في الشركة، وكنت قاعدة في مكتبي براجع شوية ملفات، لحد ما دخل عليا السكرتير وقال:
- أستاذة حنين، في راجل برا مصمم يقابل حضرتك وبيقول إن الموضوع مهم جدًا.
رفعت عيني من الورق وقولت:
- مين هو؟
- بيقول إنه أستاذ فؤاد، من الشركة اللي بنتعامل معاها في التوريدات.
إفتكرت الإسم وقولت:
- خليه يدخل.
دخل راجل في أواخر الأربعينات، سلم عليا وقعد قدامي وقال:
- أنا أسف إني جاي من غير ميعاد، بس في مشكلة لازم حضرتك تعرفيها بنفسك.
رديت عليه بإهتمام:
- خير يا أستاذ فؤاد؟
طلع ملف من شنطته وحطه قدامي وقال:
- إحنا بقالنا فترة بنتعامل مع الشركة في توريد بعض المستلزمات، لكن آخر دفعة اتبعتلنا فيها اختلاف كبير عن الاتفاق، ولما رجعنا نراجع العقود لقينا إن في تعديلات حصلت من غير علمنا.
فتحت الملف وبدأت أراجع الورق وقولت:
- يعني إي تعديلات من غير علمكم؟
رد عليا وقال:
- في بند بيقول إننا وافقنا على زيادة في الأسعار بنسبة كبيرة، وعليه توقيع من الشركة بتاعتكم.
قلبت الورق لحد ما وصلت للتوقيع، وأول ما شوفته عرفت إنه توقيع هشام.
رفعت عيني وقولت بهدوء:
- حضرتك متأكد إنكم موقعتوش على التعديل دا؟
رد عليا بثقة:
- متأكدين، ودي نسخة العقد الأصلي اللي معانا.
خدت منه النسخة وقارنت الاتنين، وبدأت أفهم إن في حاجة غلط فعلًا، لكن مظهرتش أي رد فعل.
قفلت الملف وقولت:
- متشكرة إن حضرتك جيت بنفسك، وأنا هراجع الموضوع وهتواصل معاك خلال يومين بالكتير.
قام وقف وقال:
- أنا واثق إن حضرتك هتوصلي لحل، لأن تعاملنا مع والدك الله يرحمه كان دايمًا مبني على الثقة.
إبتسمتله وقولت:
- ربنا يرحمه، وإن شاء الله ثقتك دي تفضل في مكانها.
خرج من المكتب، وأنا فضلت باصة للعقد شوية.
يعني مش بس بيخطط يستغلني، دا كمان بدأ يتصرف في الشركة من ورايا!
مسكت التليفون وطلبت من السكرتير يجيبلي نسخة من كل العقود اللي هشام كان مسئول عنها خلال السنة اللي فاتت، وقررت أراجعها واحدة واحدة بنفسي.
---
بعد شوية سمعت خبط على الباب، وقبل ما أرد لقيت مريم داخلة.
إبتسمت أول ما شافتني وقالت:
- إيه يا ست المديرة؟ مش هتخلصي شغل بقى ولا إنتِ ناوية تباتي هنا؟
بصيتلها وقولت بضحكة خفيفة:
- لأ يا حبيبتي، كنت مستنياكي تيجي تنقذيني من كتر الشغل.
قربت مني وباستني على خدي وقالت:
- طب يلا بقى، أنا جاية أخدك نتغدى سوا.
بصيتلها بإستغراب وقولت:
- إنتِ جاية مخصوص عشان نتغدى؟
ردت بسرعة:
- أمال جاية أعمل إي يعني؟
ضحكت وقولت:
- معرفش، أصل إنتِ آخر مرة عزمتيني فيها على الغدا كنتِ عايزة مني أمضي على ورق.
ضحكت بتوتر وقالت:
- يا شيخة! هو إنتِ هتفضلي فاكرة؟
بصيتلها وأنا بقفل الملف وقولت:
- أنا بنسى كل حاجة إلا الأكل، يلا بينا.
خرجنا من الشركة، وطول الطريق كانت بتحاول تفتح معايا كلام عن هشام والفرح، وبتسألني إذا كنت ناوية أرجع أحدد ميعاد قريب ولا لأ.
لحد ما سألتني فجأة:
- هو هشام ماله اليومين دول؟ حاساه متعصب ومش على بعضه.
بصيتلها وابتسمت وقولت:
- يمكن ضغط الشغل، أصل أنا شيلت منه شوية مسئوليات الفترة دي.
بصتلي بسرعة وقالت:
- ليه؟ عمل حاجة؟
هزيت كتفي وقولت:
- معرفش، بس حبيت أراجع كل حاجة بنفسي.
سكتت، وأنا فضلت باصة للطريق لحد ما وصلنا البيت،
بعد شوية وقت كلمني هشام واستأذن ماما ييجي يقعد معايا شوية ونتعشا مع بعض وماما بالفعل وافقت.
بعد شوية وأثناء ما كنا قاعدين في الصالون ووالدتي مشغولة قال وهو بيمسك إيدي:
- حنين، هو أنا زعلتك في حاجة الفترة اللي فاتت؟
بصيتله بإستغراب وقولت:
- لأ، ليه؟
- أصل حاسس إنك اتغيرتي معايا، بقيتي بعيدة ومش بتتكلمي زي الأول.
إبتسمت وقولت:
- يمكن عشان الشغل والفرح والظروف اللي حصلتلي، متاخدش على خاطرك.
رد عليا وقال:
- أنا مش عايزك تشيلي هم أي حاجة، أنا معاكي في كل حاجة.
بصيتله وقولت بإبتسامة كان ممكن تكون حب:
- عارفة يا حبيبي، ربنا يخليك ليا.
قرب وباس إيدي وقال:
- طب أنا هنزل أجيب حاجة من تحت وأطلعلك.
هزيت راسي، وأول ما خرج فتحت تليفوني وبدأت أراجع الصور اللي كنت مصوراها للعقود.
لكن فجأة سمعت صوت مريم وهي بتتكلم مع هشام من برا الشقة بصوت وشوشة ولكنها ظاهرة ومثيرة للشك وسمعت صوتها بتقول:
- إنت لازم تهدى شوية، حنين بدأت تلاحظ إن في حاجة مش مظبوطة.
رد هشام عليها:
- أنا عارف، بس مش فاهم هي بتعمل كدا ليه فجأة، عمرها ما كانت بتراجع ورايا بالطريقة دي.
ضحكت مريم وقالت:
- يمكن عشان رجلها مكسورة ومش لاقية حاجة تعملها غير إنها تراجع شغلك!
رد عليها بضيق:
- أنا مش بهزر يا مريم، لو اكتشفت العقود اللي اتغيرت هنلبس كلنا.
سكتت شوية وبعدها قالت:
- طب ما تخلص الموضوع بسرعة، إحنا مستنيين إيه؟
رد هشام بصوت أوطى:
- مش هقدر أعمل حاجة قبل ما أضمن إن كل حاجة بقت في إيدي.
ضحكت مريم وقالت:
- إنت خايف عليها ولا خايف على نفسك؟
سكت لحظة وبعدها قال:
- الاتنين يا مريم، أنا مش عايز أخسر اللي وصلتله، ومش عايز أخسرها هي كمان.
سمعت صوت مريم وهي بتقوله:
- إنت شكلك بدأت تحبها بجد!
رد عليها بنبرة مختلفة:
- يمكن... بس إنتِ عارفة إن الموضوع بينا مكنش المفروض يوصل لكدا.
مريم مردتش، وبعد لحظات سمعتها بتقول:
- طب وإحنا؟ إنت نسيت اتفاقنا؟
رد عليها هشام بهدوء:
- مستحيل أنسى.
مكنتش فاهمة هما بيتكلموا عن إي بالظبط، لكن كنت متأكدة إن في حاجة أكبر بكتير من مجرد سرقة فلوس الشركة.
وفجأة تليفوني نور بإشعار رسالة من رقم مجهول.
فتحتها، وكانت صورة ليا وأنا قاعدة على الكرسي المتحرك في الشركة، متصورة من بعيد، وتحت الصورة مكتوب:
«إنتِ بتدوري في المكان الغلط يا حنين... اللي بتدوري عليه موجود في بيتك، وأقربلك مما تتخيلي».
فضلت باصة للرسالة بصدمة، وقبل ما ألحق أعمل أي حاجة وصلت رسالة تانية:
«ولو عايزة تعرفي الحقيقة عن جوزك، اسألي أختك عن اللي حصل قبل كتب كتابك بيوم واحد».
في اللحظة دي سمعت صوت باب الأوضة بيتفتح، رفعت عيني بسرعة، ولقيت مريم واقفة قدامي وبتبتسم قالت وهي بتقرب:
- بتعملي إي يا حنين؟
قفلت التليفون بسرعة وبصيتلها بإبتسامة:
- ولا حاجة يا حبيبتي، كنت بشوف رسالة.
قربت وقعدت جنبي وقالت:
- طب إيه رأيك نخرج بكرة أنا وإنتِ وهشام؟ بقالي كتير مخرجتش معاكم.
بصيتلها شوية وبعدها ابتسمت وقولت:
- فكرة حلوة أوي يا مريم.
لكن جوايا كان سؤال واحد بيتكرر، إيه اللي حصل قبل كتب كتابي بيوم واحد؟
وليه الشخص اللي باعت الرسالة متأكد إن أختي ليها علاقة بكل اللي بيحصل؟
رفعت عيني وبصيت لمريم، وابتسمت وأنا بقول:
- على فكرة يا مريم، أنا كنت عايزة أسألك عن حاجة مهمة.
بصتلي وقالت:
- خير؟
قربت منها شوية وقولت بهدوء:
- إنتِ كنتِ فين ليلة كتب كتابي؟
إبتسامتها اختفت للحظة، وبعدها بصتلي وقالت:
- وإنتِ مالك بتسألي السؤال دا ليه دلوقتي؟
ابتسمت أكتر وقولت:
- مجرد فضول يا حبيبتي.
لكن اللي مكنتش أعرفه وقتها إن مريم مش بس كانت عارفة كل حاجة، دي كانت مستنية اللحظة اللي هشام يخلص فيها اتفاقه معاها، عشان تبدأ هي خطتها الخاصة!ج
