رواية كش مات الفصل الاول 1 بقلم ملك ابراهيم

_جالي بـلاغ النهـاردة إن في ممثـلة مشهـورة جدًا اتوجدت ميتة جـوا ڤيلتـها في التجمـع الخامـس..

واحـدة من أشهـر نجمـات السينما المصرية، واللي اسمها لوحده كفيل إنه يقلب السوشيال ميديا!.. 

الغريب إن المُمثلـة دي كانت موجودة في حفل فني كبير من كام ساعة، وظهرت قدام الكاميرات بكامـل أناقتها، وابتسامتها مرسـومة على وشها.. مفيـش أي علامة تقول إن الليلة دي ممكن تكون آخر ليلة في حياتهـا!.. 

البـلاغ مقـدمه مدير أعمالها، لكن اللي استـوقفني إن الوفـاة اتسجلت مبدئيًا علىٰ إنها طبيعية، رغم إن في تفاصيل غريبة جوه الفيلا محدش قدر يفسرهـا... 

والأغـرب إن باب الفيلا كان مقفـول، والحراسة بتأكد إن محدش دخـل أو خرج من البوابة الرئيسية بعد رجوعهـا من الحفل.. يعني لو إحنا قدام جريمة قتـل، فالقاتل غالبًا كان موجـود جوه الڤيلا من البداية!.. 

مطلوب مني أروح أعـاين الجثة والڤيلا، وأعرف هل إحنا قدام وفـاة طبيعية، ولا في حد قرر ينهي حياة واحدة من أشهـر نجمات مصر.. ويخلي موتهـا يبان وكأنه مجرد حـادث عادي!.. 

أنا كريـم سيـد.. ظابـط علىٰ ما تُفرج... كُنت قاعـد وقـت ما وصلـني البـلاغ باكـل مع مُراد فـول وبصـل... أيوه بصـل..

وبتكلـم معـاه عن أسباب تواجدنـا كظُبـاط شُرطـة في الوقـت الحـالي.. وأول ما دخـل العسكـري ولسـه هيتكلـم بصيـتله بعيـني سكـت لوحـده.. وقولتـله.. 

_هنقـوم يا سيـد.. جـاتك نيـله وإنت علىٰ إسـم أبويا وفيك شنب منه كدة.. 

قومت من علىٰ الكرسي، ولميت حاجـتي، وبصيـت لمُراد اللي كان لسه بيحـاول يخـلص آخر معلـقة فـول في الطبـق.. ورفـعت حاجبـه فمسـك منـديل وهو بيمسح بوقه وبيقـول..

_يا عم إنت مـا بتصدق تلاقي حجـة علشـان تشتغـلني!.. وبعدين هو أنا اللي بلغت عن الجريمـة؟!.. 

_لا، بس إنت اللي اختـرت تاكل معايـا.. ودي جريمـة في حد ذاتهـا.

ضحك مُراد، وقام من مكانه، وخرجنا من المكتب بالأصـح من القسـم كله واتحركنا ناحية الڤيلا في التجمع الخامس.

___________________

وبعـد حـوالي نـص ساعـة كنا وصلنا، وكـان في أكتر من عربية شرطة واقفة قـدام الڤيلا، والحراسـة متجمعة عند البوابة الرئيسيـة.

نزلت من العربية، وطلعـت الكارنيـه بتاعي، وبعدها دخلت أنا ومُراد، وكـان في ظابط مستنـينا عـند المدخـل.

_مساء الخيـر يا فنـدم.. أنـا النقيب كريـم سيد، ودا النقيـب مُـراد.

رحـب بيـنا، وبـدأ يشـرح اللي حصـل..

_البـلاغ مقـدم من مدير أعمال المجـني عليها، الأستـاذ شريف منصور.. بيقول إنه حاول يتواصل معاها أكتر من مرة، ولما مردتش عليه قـرر الڤيلا بنفسـه، وفتـح بالمفـتاح الاحتيـاطي اللي معـاه، ولما طلع لقاهـا واقعة في أوضتها.

_طب مين أول واحد دخل عليها؟!.. 

_مدير أعمالها يا فندم، وبعده الإسعاف.

_والحراسة؟!. 

_الحـارس بيأكد إن محـدش دخل أو خرج من البوابة الرئيسية بعد رجوعها من الحفل.

بصيت لمُـراد، وبعدها رجعت بصيت للظابط..

_تمام.. محدش يخرج من الفيلا، وعايز تسجيلات الكاميرات من أول ما رجعت المجني عليها لحد وصول الشرطة.

طلعنا على الدور التـاني، ودخلنا الأوضة اللي كانت فيها الجثـة، وبدأت أعاين المكان بعناية.

المُمثلـة كانت واقعة علىٰ الأرض جنب السرير، ولسه لابسـة فستان الحفلـة.. وشكلها كان واضح منه إنها رجعت من الحفلة من وقت قريب.

قربت من الجثـة، وبصيت على وشها، وبعدها لاحظت وجود آثـار د.ـم علىٰ شعرها من الناحية الخلفية.

_مُراد.. نادي علىٰ الدكتور أكرم، وخليه ييجي يعاين بنفسه.

_حاضر.

في الوقت دا، بدأت أبص على باقي الأوضة.. مفيش أي علامات اقتحـام، ولا في حاجة مكسورة، لكن كان في ترابيزة صغيرة قدام الكنبة، وعليها رقعة شطرنج، والقطع متوزعة عليها بشكل غريب.

قربت منها، وفضلت باصص للقطع شوية..

_إيه دا؟!.. هي كانت بتلعب شطرنج قبل ما تمـوت؟!. 

مُراد قرب مني وبص للترابيزة..

_واضـح كدا.. بس الغريب إن في قطع واقعة علىٰ الأرض.

نزلت بعيني، ولقيت لوح الشطرنج الخشبي واقع جنب الترابيزة، وعليه آثار د.ـم واضحة.

بصيت لمُراد..

_محدش يلمس حاجة.. خلي الخبير الجنـائي يصورها ويرفع البصمات وآثـار الـدم.

_تفتكر هو دا سـلاح الجريمـة؟!. 

_ممكن.. بس مش هنستبق الأحداث.

بعد شوية دخل الدكتور أكرم، طبيب الطب الشـرعي، وبدأ يفحص الجثـة، وأنا فضلت مستنيه لحد ما خلص المعاينة الأولية.

قـرب مني وهو بيخلـع الجـوانتي..

_اللي واضح لحد دلوقتي إن المجـني عليها اتعرضت لضربات قوية ومتكررة علىٰ مؤخرة الرأس، والضرـبات دي إتسببت في إصابـات خطيـرة أدت لوفاتهـا.

بصيت ناحية لوح الشطرنج اللي الخبير كان بيصوره..

_يعني ممكن يكون دا سبب الوفـاة.. 

_أيوه، خصوصًا إن حجم اللوح ووزنه ممكن يعملوا إصابـات بالشكل دا لو اتستخدم بقوة.. لكن التأكيد النهائي هيكون بعد التشـريح.

_تمام يا أكرم.. عايز التقرير المبدئي في أسرع وقت، وأول ما تخلص التشـريح تبعتلي التقرير الكامل، ومتفوتش أي تفصيلة مهما كانت صغيرة.

_متقلقش يا كريم، أول ما التقرير يجهز هيوصلك.

لفيت ناحية مُراد..

_يلا بينا على القسم.. عندنا شوية ناس لازم نسمع أقوالهم.

خرجنا من الڤيلا، وبعد ما خلصنا المعاينة الأولية، اتحركنا على القسم عشان نبدأ التحقيق... 

___________________

وبعد مـرور ساعـة - مكتـب كريم سيد.. 

كنـت قاعد ورا المكتب، ومُراد قاعد جنبي، وقدامنا مدير أعمال المجني عليهـا، الأستـاذ شريف منصـور.

بصيتلـه وبدأت اسأله..

_احكيـلي من أول ما خرجتوا من الحفلة، لحد ما اكتشفت إنها ماتـت.

اتنهد ورد..

_أنا وهي خرجـنا من الحفلة حوالي الساعة اتناشر، ووصلتها الڤيلا، وبعدها مشيت علىٰ بيتي.. لكـن قبل ما أوصل اتصلت بيا وطلبت مني أرجعلها عشان في موضوع مهم عايزة تتكلم معايا فيه.

_طب رجعتلها؟!. 

_لا، كنت وصلت تقريبًا، فقولتلها نتكلم الصبح.. وبعدها فضلت أتصل بيها، لكنها مردتش، ولما قلقت عليها روحتلها.

_إيه الموضوع المهم اللي كانت عايزة تكلمك فيه؟!. 

اتردد شوية قبل ما يرد..

_معرفش يا فندم.. هي مقالتش ليا.. 

بصيتله بتركيز..

_غريبة!.. واحدة بتطلب منك ترجع عشان موضوع مهم، وإنت حتى مسألتهاش الموضوع إيه؟!. 

_كانت متوترة شوية، وأنا افتكرت إن الموضوع يخص الشغل.

مُراد اتدخل..

_طب وعلاقتك بيها كانت عاملة إزاي؟!.. يعني مفيش خلافات بينكم الفترة الأخيرة؟!.. 

_لا خالص، إحنا كنا زي الإخوات.

إبتسمت إبتسامة بسيطة..

_كل الناس اللي بنستجوبهم بيقولوا كدا.. عمومًا تقدر تتفضل، وممكن نحتاجك تاني.

خرج شريف، وبصيت لمُراد..

_الراجل دا مخبي حاجة.

_عرفت منين؟!.. 

_عشان أول ما سألته عن الموضوع المهم اتوتر.. وكمان مش مقتنع بحكاية إنه مرجعش عشان كان قرب يوصل بيته.

_يمكن فعلًا مكنش عايز يرجع.

_ويمكن كان عنده سبب يخليه ميقولش الحقيقة.. هاتلي البواب.

دخل البواب بعد شوية، وكان راجل كبير في السن، باين عليه القلق.

_اسمك إيه؟!. 

_عم سيد يا بيه... 

_هو كلكم إسمكم سيد إنهارده جايـز علشان أقول الله يجحمك يا سيـد؟!..

_طيب يا عم سيد، احكيلي إيه اللي حصل من ساعة ما الست رجعت من الحفلة.

_الست رجعت حوالي الساعة اتناشر ونص، وأنا فتحتلها البوابة بنفسي، وكانت لوحدها.. وبعدها دخلت بعربيتها، وأنا رجعت مكاني.

_حد دخل وراها؟!. 

_لا يا بيه، محدش دخل.

_طب خرج حد من الڤيلا بعد رجوعها؟!. 

_لا يا فندم.

_إنت متأكد من كلامك؟!. 

_أيوه والله، أنا كنت موجود طول الليل.

_طب والشغالة كانت موجودة؟!. 

_لا يا بيه، الشغـاله كانت واخدة إجازة النهاردة.

بصيت لمُراد، وبعدها رجعت بصيت للبواب..

_إجازة إيه؟!.. هي كانت عارفة إن الست هتمـوت النهاردة ولا إيه؟!. 

الراجل اتوتر ورد بسرعة..

_لا يا بيه، دي إجازة عادية، كانت طالبة الإجازة من يومين.

_طيب اسمها إيه وعنوانها فين؟!.. 

اداني بياناتها، وطلبت منه يستنى بره لحد ما نحتاجه، وبعدها خرج.

مُراد بصلي وقال..

_إيه رأيك؟!.. 

_رأيي إننا لازم نسمع كلام الشغالة دي.. خصوصًا إنها كانت إجازة يوم الحادثـة بالصدفة.

طلبت من العسكري يدخلها، وبعد دقائق دخلت ست في أوائل التلاتينات، وكانت باين عليها علامات التوتر.

_اسمك إيه؟!.. 

_سماح يا فندم.

_بقالك قد إيه شغالة عند المجـني عليها؟!.. 

_حوالي أربع سنين.

_وعلاقتك بيها كانت عاملة إزاي؟!. 

_كويسة يا فندم، كانت ست طيبة معايا، وعمرها ما قصرت في حقي.

_طيب إنتي كنتي فين امبارح؟!. 

_كنت في بيتي، أنا كنت واخدة إجازة.

_الإجازة دي طلبتيها إمتى؟!. 

_من يومين يا فندم.

_وليه؟!. 

_كنت تعبانة شوية، وكنت محتاجة أرتاح.

_طب آخر مرة شفتيها كانت إمتى؟!. 

_يوم الحفلة.. قبل ما تمشي من الڤيلا.

_وكانت حالتها عاملة إزاي؟!. 

سكتت لحظة، وبعدها ردت..

_كانت متعصـبة جدًا، وسمعتها بتزعق في حد في التليفون.

مُراد قرب منها..

_كانت بتكلم مين؟!.. 

_معرفش يا فندم، بس سمعتها بتقول:- إنت فاكر إني هسكت؟!.. أنا خلاص قررت ومش هتراجع.

بصيتلها باهتمام..

_متأكدة إن دا اللي سمعتيه؟!.. 

_أيوه يا فندم.. وبعدها خرجت وهي متضايقة جدًا.

_طيب تقدري تعرفي مين الشخص اللي كانت بتكلمه؟!.. 

_لا يا فندم، معرفش.

فضلت باصص ليها شوية، وبعدها طلبت منها تستنىٰ بره، لحد ما نراجع أقوالها ونشوف إذا كانت محتاجة تتسأل تاني.

وبعد ما خرجت، بصيت لمُراد..

_واضح إن الست دي كانت داخلة على مشكلة كبيرة مع حد.

_والشخص اللي كانت بتكلمه ممكن يكون هو القاتـل.

_ممكن.. بس لازم نعرف هي كانت بتهـدد مين، وإيه القرار اللي خدته ومش ناوية تتراجع عنه.

مُراد قام من مكانه، ولم ورق التحقيقـات..

_طب أنا هراجع بيانـات التليفـون، ونشوف آخر المكالمات اللي عملتها.

_وأنا هكلم أكرم أشوف وصل لإيـه في التقرير.

خرج مُراد من المكتب، وفضلت قاعد ببص في أوراق القضية، وبحاول أربط كلام مدير الأعمـال باللي قالتـه الشغالة، لكن قبل ما أعمل أي حاجة، سمعت صوت خبط علىٰ الباب.

_إدخـل.

الباب اتفتح، ورفعت عيني ناحية اللي داخل..

ولثـواني فضلت باصص من غير ما أنطق، قبل ما أسمع صوتها اللي كنت فاكره مش هسمعه تاني..

_نورسين بنت سيد الله يجحمــه رجعت يا شوية ظباط!.. 

رفعت حاجبي وأنا ببصلها ومش مصـدق وقـولت..

_إيه دا؟!.. هو إحنا ناقصين مصايــب؟!..