رواية جريمة اعتداء الفصل الأول 1 بقلم ياسر عوده

 


رواية جريمة اعتداء الفصل الأول بقلم ياسر عوده 


الناس اتفزعت لما سمعت صوت شخص عمال يصرخ وبيقول:
-قتيله، قتيله.
وقتها كل الناس اتجمعوا في المكان اللى كان جاي منه الصوت، وكان المكان دا عباره على نفق بس ماكنش نفق عادي، لا دا نفق ماليان زباله ومافيش حد تقريبا بيعرف يعدي منه، ومن ضمن الناس اللى اتجمعت شخص شاف ان التصرف الصح انه لازم يتصل على الشرطه بسرعه، وفعلا دا اللى عمله واتصل على الشرطه، ووصل وقتها ضابط الشرطه اللى كان اسمه كمال واللى كان معروف عنه انه عنيد جدا في شغله.
اول حاجه عملها كمال وقتها انه طلب يشوف الشخص اللى لقي الجثه، وفعلا حضر الشخص دا وسأله:
-ايه اللى حصل؟
-حضرتك انا كنت رايح شغلي زي كل يوم، بس علشان كنت متأخر وبدل ما اروح الف من النفق التاني النضيف، قررت اني اعدي من النفق دا، اصله هيوفر عليا ربع ساعه كامله، مع ان النفق دا كل الناس بتخاف منه، اصلنا ممكن نلاقي في حشرات او فئران وممكن تعابين كمان.
-وانت ماخوفتش لما قررت تعدي منه؟
-كنت خايف طبعا يا فندم، بس اعمل ايه كنت عاوز الحق الشغل بدل ما يخصموا عليا، اصل مديري في الشغل ماعندهوش حاجه اسمها رحمه.
-تمام، ايه اللى حصل بعد كده؟
-انا فكرت يا فندم اني لازم اعدي من المكان بسرعه، اخد النفق جري علشان مافيش حاجه تلحق تقرصني، وفعلا دخلت وكنت بحاول اجري، بس وانا بعمل كده اتكعبلت في شوال ووقعت، ولما قومت بسرعه عيني جت على الشوال ولقيت طالع منه ايد بني ادم، وقتها فضلت اصرخ علشان الناس تلحقني.
كمال كان شايف ان الشخص دا مستحيل يكون من ضمن دائره الاشتباه، ودا كان واضح في انفعاله وحاله الخوف والرعب اللى كان حاسس بيها، وعلشان كده طلب من فريقه انهم ياخدوا اقواله وبيناته الشخصيه ويسبوه يمشي، وبعدها حضر فريق المعمل الجنائي، وكمان فريق الطب الشرعي، وابتدوا يشوفوا شغلهم، وفي الوقت دا بداء فريق المباحث في عمليه تحريات موسعه على امل انهم يلاقوا أي شهود او يعرفوا أي معلومه عن الجريمه او عن المجني عليها.
وبعد ساعه تقريبا اتكلم كمال مع رئيس فريق المعمل الجنائي اللى قاله:
-احنا فحصنا المكان كويس اوي، بس واضح ان الجريمه ارتكبت في مكان تاني، واتنقلت الجثه للمكان ده.
-رفعتم البصمات من على الجثه؟
-حصل يا فندم وخدنا بصمات المجني عليها نفسها، بس لغايه دلوقتي ماقدرناش نوصل لنتيجه، واضح كده ان المجني عليها مالهاش أي سجل جنائي.
-طيب لقيتم أي متعلقات معاها؟
-لا يا فندم، واضح كده ان الجاني كان حريص انه يرمي الجثه بدون أي متعلقات، مالقناش أي اوراق اثبات شخصيه او تليفون او أي حاجه تدلنا على شخصيتها.
-يعني مافيش أي معلومه ممكن تفدنا في التحقيق؟
-احنا انتبهنا ان المجني عليها كانت ملابسه متوسخه جدا يا فندم، واضح كده انها من المتشردين في الشوارع، ممكن تكون من اللى شغالين في التسول مثلا، او أي حاجه قريبه من الموضوع ده.
-دي مشكله كبيره، معني كلامك انها ممكن مايكونش عندها أي اوراق اثبات شخصيه نهائي، وممكن مايكونش ليها أي اوراق رسميه من الاساس؟
-دا احتمال وارد يا فندم.
كلام المعمل الجنائي صعب الموضوع على كمال اكتر، وفهم ان الجريمه اللى قدامه دي مش هتبقى سهله خالص وهتحتاج شغل كتير، المهم انه راح يتكلم مع الطب الشرعي علشان يعرف ايه المعلومات اللى وصلها دكتور الطب الشرعي بعد فحص الجثه، وكان رد دكتور الطب الشرعي:
-المجني عليها اتطعنت طعنات كتير اوي، فوق ال 35 طعنه تقريبا، واضح ان الجاني كان بيكرهها جدا وعاوز ينتقم منها.
-الجريمه حصلت امتي يا دكتور؟
-من حوالي يومين او 3 ايام، ودا واضح من حاله التعفن اللى ابتدت تظهر على الجثه.
-سن المجني عليها كام يا دكتور؟
-تقريبا كده ما بين ال 18 الى ال 19 سنه، وعلى فكره المجني عليه مش عذراء، وواضح انها كانت بتمارس العلاقه الجنسيه كتير، وكمان المجني عليها مدمنه على المخدرات، وخصوصا المخدر اللى اسمه شابو.
-شكرا يا دكتور.
واتكلم كمال مع المساعد بتاعه واللى كان اسمه شريف وقاله:
-انا عاوزك تنشر رجالتنا في المنطقه دي وكل المناطق السكنيه المجاوره، عاوزهم يجمعولنا اكبر قدر من المعلومات اللى تساعدنا نعرف أي معلومه عن الجريمه او عن المجني عليه.
-تمام يا فندم، انا كمان طلبت من رجالتنا يفرغوا أي كاميرات مراقبه موجوده في المنطقه، يمكن نلاقي أي حاجه ممكن تقربنا من الجاني.
-الله ينور، بس انا عاوز تحريات كامله وكل التقارير تبقى على مكتبي في اقرب وقت.
وبعد مرور 48 ساعه، كانت النتيجه مش مشجعه نهائي، الشرطه ماقدرتش توصل لـ أي معلومه ممكن توصل الشرطه لمعرفه الجاني او حتى معرفه شخصيه المجني عليها، وفي الوقت دا حصلت مفاجأه مش متوقعه، لما واحد من المخبرين السرين كان بيحاول يوصل لـ أي معلومه، سمع وحده ست في ال 60 من عمرها تقريبا، عماله تسأل عن بنت اسمها صباح بقالها كام يوم، وعماله تقول انها مش شيفاها زي العاده، وقتها المخبر انتبه عليها وسألها:
-مين صباح دي يا حجه؟
-دي بنت غلبانه، بتقعد هنا في الشارع، بتنام في مدخل بيتي وسايبه عندي فرشتها البطنيه اللى بتستغطي بيها وهدومها اللى معاها، وبقالها كام يوم ماظهرتش وسيبه حاجتها عندي، ودي اول مره تتأخر بالشكل ده.
-طيب هي شكلها ايه صباح دي؟
ووصفتها السيده العجوزه للمخبر، وقتها لقى ان اوصاها قريبه اوي من اوصاف الجثه اللى لقوها تحت النفق من كام يوم، وساعتها المخبر خد الست دي وراح بيها على القسم، علشان تقابل الضابط كمال.
اول حاجه عملها الضابط كمال انه عرض عليها صور الجثه اللى صورهالها لما لقوا الجثه، ووقتها فعلا اتعرفت عليها الست ووقتها الضابط ابتدي تحقيق معاها واللى كان اسمها فتحيه وقالها:
-عاوزك تحكيلي حكايه صباح دي بالتفصيل؟
-انا ماعرفش عنها كل حاجه، اللى اعرفه ان من كام شهر هي ظهرت عندنا في المنطقه، مافيش حد كان عارف وقتها هي مين وجايه منين، كل اللى نعرفه وقتها انها كانت بتنام في الشارع، ولما حد يقرب منها ويسألها هي مين وقتها كانت بتصرخ بصوت عالي وتزعق وبتقولهم انها مش عاوزه حد يقرب منها.
انا لما شوفتها بالمنظر دا صعبت عليا، دي مهما كانت بنت، وعلشان كده روحتلها وكان معايا اكل ليها، وقدمتهولها ومن غير ما تنطق مسكت الاكل وفضلت تاكل فيه زي ما تكون مأكلتش من شهر، ولما اكلت سألتها:
-انتي مين يا حببتي؟، اسمك ايه وجايه منين وايه حكايتك؟
في الاول رفضت انها تتكلم، وكنت كل يوم بروحلها واقدملها اكل وكمان جبتلها بطانيه تستغطي بيها، وفي ستات كتير عملوا اللى انا عملته، وقدملها هدوم وكمان اكل وفرشه تنام عليها، بس أي حد يسألها هي مين ومنين وايه حكايتها ماكنتش بترد عليه خالص.
بس في يوم لما كنت عندها، اتفاجأت لما لقتها بتتكلم معايا وقالت:
-انا اسمي صباح، وكنت في دار للايتام، ولما كبرت خرجوني من الدار، ومش عارفه اروح فين ولقيت نفسي هنا ودي كل حكايتي.
ولما عرفت حكايتها، انا طلبت منها تبات في مدخل البيت عندي، علشان الشتاء قرب، ومن ساعتها وهي بتنام عندي في المدخل، بس من كام يوم لقيتها مش ظاهره خالص، وماعرفش هي راحت فين، وسايبه حاجتها عندي في مدخل البيت، وابتديت اسأل عليها الناس علشان اعرف هي راحت فين.
بعد ما سمع كمال كلام الحجه فتحيه، طلب من المساعد بتاعه انه يروح ويفتش كل حاجه تخص صباح، يمكن لما يعمل كده يوصل لـ معلومه تعرفنا هي مين وجايه منين، وفعلا دا اللى حصل، ولما فتش حاجتها لقي ان في تذكره قطار بتاريخ قديم موجوده بين هدومها، ودي الحاجه الوحيده اللى لقاها وقتها، وكانت التذكره دي مقطوعه من محطه قطار موجوده في محافظه قنا، ووقتها رجح ضابط الشرطه ان صباح اصلها من المنيا، واحتمال تكون الحكايه اللى قالتها صباح للحجه فتحيه مش صحيحه، وابتدت عمليه البحث في المنيا في الوقت اللى كانت التحريات شغاله في المنطقه اللى منها الحجه فتحيه.


تعليقات