رواية دوار العوض الفصل الأول بقلم هاجر سلامه
الباب اتفتح فجأة من غير ما حد يخبط والدنيا كانت هادية خالص وزي ما تكون العاصفة دخلت الشقة مرة واحدة
الحما صباح وقفت في الصالة وبصت لها بنظرة كلها قسوة وجبروت النظرة اللي كانت دايما بتخبيها ورا كلام معسول البنت كانت واقفة في المطبخ بتغسل المواعين وايديها لسه فيها الصابون لما سمعت الرزع لفت بسرعة وهي مخضوضة ولقت حماتها في وشها وعينيها بتطق شرار
الحما صباح :
اسمعي بقى يا بت الناس لحد هنا وكفاية قوي أنا سكت تلات سنين كاملين وقولت بكره تتعدل وبكره ربنا يرزقكم لكن مفيش فايدة وأنا مش هفضل اتفرج على ابني الوحيد وشبابه بيضيع ورا واحدة مابتخلفش أنا عايزة اشوف حفيد ليا قبل ما أموت وعايزة افرح بابني
الكلمات نزلت على ودن هيام زي الصاعقة حست إن رجليها مش شيلالها والصابون نشف على ايديها من الصدمة ومبقتش عارفة تنطق ولا تقول إيه الحما صباح مادتهاش فرصة حتى تستوعب وكملت كلامها بكل برود
الحما صباح :
أنا قررت أجوز ابني بنت أختي خلاص والعروسة جاهزة وكل حاجة هتمشي بسرعة وإنتي بقى مالكيش قعاد فوق الشقة دي هتبقى للعروسة الجديدة إنتي هتنزل تحت تعيشي معايا في شقتي تخدميني وتؤنسي وحدتي أهو بالمرة تعوضي ابني عن اللي حرمتيه منه وماتخافيش مش هنرميكي في الشارع إحنا برضه بندور على الأصول
هيام لقت دموعها بتنزل من غير إرادتها شريط حياتها كله مر قدام عينيها في لحظة افتكرت يوم ما كانت في الكلية وأهلها ماتوا وسابوها لوحدها في الدنيا ملهاش ضهر ولا سند وافتكرت زميلها ابراهيم اللي جه وقالها إنه معجب بيها وهي بكل عزة نفس قالت له أنا ملهاش في المشي البطال والحرام لو عايزني ادخل البيت من بابه وهو وافق وتجوزوا وعاشوا سنة كاملة في الجنة لحد ما بدأت رحلة الدكاترة واكتشفوا إن العيب منها وهو وقف جنبها وقالها إنتي بنتي ومراتي وكل دنيتي ومش عايز عيال بس كلام أمه النهاردة هد كل السقف اللي كانت مستخبية تحته
هيام :
حرام عليكي يا طنط إنتي بتعملي فيا كده ليه أنا ذنبي إيه دي حاجة بتاعة ربنا وجوزي بيحبني ومش عايز يسيبني
الحما صباح ضحكت باستهزاء وقالت :
حب إيه يا عين أمك الحب ده مابيجيبش عيال وابني راجل ومن حقه يفرح وإنتي لو بتحبيه بجد سيبيه يعيش حياته ومتقفيش في طريقه وبعدين أنا قولت اللي عندي والعروسة الجديدة هتيجي تقعد هنا وإنتي مكانك تحت خلاص ومفيش نقاش في الموضوع ده
سابتها وخرجت ورزعت الباب وراها بنفس القوة اللي دخلت بيها هيام انهارت تماما وقعدت على الأرض في الصالة وضمت رجليها لصدرها وفضلت تعيط بحرقة الدموع كانت بتغسل وشها وهي حاسة بقلة حيلة ممرتش بيها من يوم ما أهلها ماتوا كانت بتسأل نفسها هتروح فين وملهاش حد في الدنيا دي كلها الشقة دي كانت حمايتها وجوزها كان ضهرها ودلوقتي كل حاجة بتتهد فوق دماغها في ثانية واحدة فضلت على الحال ده ساعات لحد ما الليل ليل وسمعت صوت المفتاح بيدور في الباب قلبها دق بسرعة وخوف ودخل جوزها ابراهيم وكان باين على وشه التعب والهم أول ما شافها قاعدة على الأرض وعينيها ورمة من العياط جري عليها وخدها في حضنه
ابراهيم :
في إيه يا حبيبتي مالك إيه اللي قعدك كده وإيه اللي حصل
هيام مسكت في قميصه وجسمها كله بيتنفض وفضلت تبكي :
امك جت هنا يا ابراهيم وقالت لي إنها هتجوزك بنت اختها وعايزاني انزل اعيش تحت وتأخد الشقة للعروسة الجديدة قولي إن ده مش حقيقي قولي إنك مش هتاوعها ومش هتكسرني كسر ملوش جبر
ابراهيم اتسمر في مكانه وبص في الأرض ومقدرش يحط عينه في عينها النظرة دي بالذات د..بحته عرفت منها إن الكلام خلاص ملوش فايدة وإن السهم نفذ ابراهيم اتنهد تنهيدة طويلة كلها عجز
ابراهيم :
يا حبيبتي أنتي عارفة إني بحبك ومقدرش أستغنى عنك بس أمي ضغطت عليا جامد وفضلت تعيط وتقولي نفسي اشوف عيالك ونفسي اشيل حفيد ليا قبل ما أموت وقالت لي إن ده حقي الشرعي وأنا تعبت من كتر الخناق معاها ومش قادر أكسر بكلمتها أنتي عارفة إنها ملهاش غيري في الدنيا
هيام بعدت عنه وبصت له بذهول :
يعني وافقت يا ابراهيم وافقت تكسرني وتجيب عليا ضرة وتأخد شقتي اللي تعبنا فيها سوا وافقت تنزلني أبقى خدامة تحت رجل أمك علشان خاطر العيال
ابراهيم حب يمسك ايديها تاني لكنها رفعت ايديها ورفضت تماما وهو قال بصوت مخنوق :
والله ما قادر ابص في عينك ولا كنت عايز الموضوع ده يوصل هنا بس وافقي علشان خاطري أنتي هتبقي مراتي الأولى والحب كله ليكي والموضوع ده مجرد خلفة وبس وأمي مش هتعاملك وحش تحت دي هتبقى زي أمك
هيام ضحكت بمرارة وصوت البكا مغرق كلامها :
أمي أمك اللي جاية تدوس على جرحي وتعايرني بحاجة ماليش يد فيها وتقولي انزلي عيشي تحت مكانك الطبيعي إنت مكنتش قادر تبص في عيني لأنك عارف إنك ظلمتني وبعتني في أول محطة
ابراهيم قعد على الكنبة وحط راسه بين ايديه وبدأ يعيط هو كمان من كتر العجز والضغط النفسي الشقة اللي كانت كلها ضحك وحب اتحولت في ليلة واحدة لمكان كئيب مفيش فيه غير صوت البكا والكسرة هيام سابته ودخلت الأوضة وقفت ورا الباب وفضلت تبص على الحيطان اللي اختارت ألوانها بنفسها والستاير والفرش اللي لفت عليه في كل مكان مع ابراهيم ودلوقتي كل ده هيروح لواحدة تانية باردة مبرد والكل موافق وهي الوحيدة الضحية حست إن الدنيا ضاقت عليها لدرجة مش قادرة تتنفس فيها ومبقتش عارفة تعمل إيه هل توافق وتعيش مكسورة الجناح تحت رجل حماتها والضرة فوق دماغها في شقتها ولا تمشي وتترمى في الشارع وهي ملهاش سند ولا ضهر ولا مليم باسمها الدنيا اسودت في عينيها تماما ونامت على الأرض ورا الباب من كتر التعب والعياط وهي مش عارفة لما النهار يطلع إيه اللي هيحصل وازاي حياتها اتقلبت بالشكل ده في يوم وليلة
