رواية قسوة رجال الصعيد الفصل الاول 1 بقلم هنا حسين

 



رواية قسوة رجال الصعيد الفصل الاول 


﷽
«في بيوت الصعيد، الكلمة أمر، والسكوت طاعة، لكن محدش يعرف إمتى الصبر ينقلب لتمرّد، وإمتى القلب المكسور يبقى أخطر من ألف سلاح.»

يوم جديد مليان بالأحداث، والحركة في سرايا ولاد الجبالي 

كانت مهره واقفة في المطبخ، بتتابع البنات وهما بيجهزوا الأكل، وكل شوية تبص على الحاجات اللي لسه ناقصة.

مهره: يلا يا بنات، الناس بدأت تيجي

جنه: حاضر يا أم سيف الأكل خلاص جهز، وجهزنا أكل العرسان كمان.

مهره: زين قوي. هروح أني أجهز هدوم أبو سيف.

قالت كلامها وخرجت من المطبخ، وسابت البنات يكملوا شغلهم.

أول ما مهره خرجت، صبا نفخت بضيق، ومسحت إيديها في المريلة اللي لابساها.

صبا بزهق: مش عارفة جايبين طباخين ليه وإحنا هنا زي الخدم

يمني بضيق: نعمل إيه بقى هي دي قوانين السرايا، مفيش خدم، وإحنا اللي نخدم.

صبا: قصدك قوانين ولاد الجبالي

جنه: بكفاياكم عاد يا بنات، عايزين نخلص أحسن بعدين يبهدلونا . الطباخين بيطبخوا للناس اللي برا عشان تتعشى، لكن إحنا بنطبخ لرجالتنا والعرسان اهنه.

يمني: في أيام بيت بابا الخدم كانوا ماليين البيت، وعمري ما كنت بشيل طبق من مكاني

صبا: وأنا ياختي الأكل كان بيجيلي على السرير، مش أقوم أطبخ وأغسل وأرتب كمان

جنه: خلاص يا بت العمدة ويا بت النايب نصيبكوا تتجوزوا في بيت الجبالي، وده نظام السرايا من زمان.

بصت يمني لجنه، ولاحظت إن نبرة صوتها اتغيرت شوية، فقربت منها.

يمني: جنه، إحنا مش قصدنا حاجة، وانتِ عارفة غلاوتك عندنا.

جنه: أني مش زعلانة، وعارفة نفسي زين كمان. عيشتكم غير عيشتي مهما كان، وهفضل بت البواب اللي سيدها عطف عليها واتجوزها.

صبا: جنه، ما تقوليش كده انتِ غالية أوي في نظرنا، ومهما يحصل إحنا كلنا هنقف مع بعض.

يمني: سيبكوا من الكلام ده بقى، وتعالوا ننم شوية على العروسة الجديدة.

جنه: عشان أم سيف تنزل تلاقينا، مش اكده وتطين عيشتنا

ضحكت صبا ويمني، ورجعوا يكملوا شغلهم، بينما جنه هزت راسها وهي بتتمتم بكلمتين عن شقاوة البنات.

اذكروا الله ❤️

---

طلعت مهره لأوضتها، واتجهت ناحية الدولاب عشان تجهز هدوم فراس.

كانت بتطلع الجلباب اللي طلبه منها، لما باب الحمام اتفتح وخرج فراس، وشعره مبلول، وبينشفه بالفوطة.

بص عليها بضيق، واتكلم بنبرة فيها غضب 

فراس: مالسه بدري كنتِ استنيني شوية كمان لما أجي أطلب منك.

لفت مهره ناحيته، وحاولت تتكلم بهدوء.

مهره: معلش يا أبو سيف، كنت مشغولة في المطبخ مع البنات.

اتغيرت ملامح فراس، وقرب منها بخطوات سريعة، ومسك دراعها بغضب.

فراس: مفيش حاجة اسمها مشغولة! انتِ اهنه خدامة ليا، فاهمة ولا لأ

اتألمت مهره من مسكته، لكنها ما حاولتش تبعد إيده عنها. رفعت عينيها ليه، وكان في نظرتها وجع حاولت تداريه.

مهره بوجع: أكيد، أساسًا عمري ما كنت غير اكده، خدامة وبس. زي ما انت بالنسبالي واد عمي وأبو ولدي وبس.

سكت فراس للحظة، وكأن كلامها لمس حاجة جواه، لكنه سرعان ما قرب من وشها وهمس بصوت هادي، رغم الغضب اللي كان لسه ظاهر على ملامحه.

فراس: وأني مش عاوز أكون غير اكده.

ساب دراعها، وبعد عنها، وبدأ يلبس هدومه وكأن الحوار انتهى بالنسبة له.

أما مهره، ففضلت واقفة مكانها للحظات، بتفرك دراعها اللي وجعها، قبل ما ترجع تكمل تجهيز هدومه من غير ما تنطق بكلمة تانية.

اذكروا الله 💗

---

في ناحية تانية من السرايا، كان صقر واقف مع أخواته جواد وياسين، وملامحه بتكشف عن ضيق حاول يخبيه، لكنه ما قدرش.

صقر: مفيش غير بيدينا الأوامر وإحنا ننفذ، مش اكده

جواد: ده أخونا الكبير يا صقر، ومش بيدينا الأوامر ولا حاجة، إنت بس اللي بتاخدها على نفسك قوي.

ياسين: إنتوا بتتكلموا في إيه فراس أخونا الكبير، يا صقر، بلاش الخلافات تأثر على احترامك لأخوك.

بص صقر لياسين، وابتسم ابتسامة خالية من أي فرحة.

صقر: دلوق مفيش تأثير، بس في الوقت المناسب مش هيبقى فيه احترام واصل

اتبادل جواد وياسين النظرات، وكل واحد فيهم فهم إن صقر لسه شايل جواه حاجات كتير.

جواد: كفاية اكده، خلّي ليلة أخوك تعدي على خير.

صقر: أني طالع أجهز، ولا مفيش غيره اللي بيجهز في البيت ده

خرج صقر وسابهم واقفين مكانهم.

تنهد ياسين بضيق، وهز راسه وهو بيتابع أخوه بعينيه.

ياسين: أخوكم ده هيجيبها لبر

جواد: ما خبرش، بس لازم اللي بينهم يخلص.

فضل الاتنين ساكتين شوية، وكل واحد فيهم بيفكر في الخلاف اللي بقى واضح إنه أكبر من مجرد اختلاف في الكلام.

اذكروا الله 💝

---

دخل صقر السرايا، ونادى على صبا بصوت عالي.

كانت صبا مشغولة في ترتيب بعض الحاجات، لكن أول ما سمعت صوته، سابت اللي في إيدها وطلعت تجري عليه.

صبا: نعم

صقر: اطلعي ورايا.

دخل أوضته، وصبا وقفت عند الباب وهي بتبص له بضيق، مستنية تعرف عاوز منها إيه.

صقر: ادخلي جهزيلي الحمام.

رفعت صبا حاجبها باستغراب.

صبا: يعني إنت ناديت عليا عشان أجهز الحمام

صقر: أمال أخلي مين يجهزه يا بت النايب

صبا: إنت يعني مش محتاجه

اتغيرت ملامح صقر، وبصلها بغضب.

صقر: إنتِ اتجنيتي إياكِ عاوزة صقر الجبالي يجهز الحمام أمال إنتِ لازمة اللي جابوكي إيه

اتجمعت الدموع في عيون صبا من القهر، لكنها حاولت تتمالك نفسها.

صبا: يعني إنت متجوزني عشان كده مش كفاية شغل البيت اللي مش هين عليكم تجيبوا خدم ونرتاح شوية

صقر: الكلام ده عند أبوكي، إنما اهنه غير كله بيمشي بقوانين.

صبا: بس ده ظلم

قرب منها صقر، وعينيه مليانة غضب، واتكلم بصوت حاد.

صقر: يمين بالله كلمة كمان، وأكون مكسر راسك. يلا غوري، اعملي اللي قلتلك عليه.

خافت صبا من نبرته، فلفت بسرعة ودخلت الحمام تنفذ اللي طلبه منها، وهي بتحاول تمنع دموعها من النزول.

أما صقر، ففضل واقف مكانه، متابع خروجها بملامح جامدة، قبل ما يتجه داخل الحمام 

اذكروا الله 💗

---

في المطبخ، كانت جنه بتراجع الأكل للمرة الأخيرة، ولما اتأكدت إن كل حاجة جاهزة، مسحت إيديها ولفت ناحية يمني.

جنه: اكده الأكل خلاص. هروح عشان أجهز الحريم على وصولهم.

يمني: تمام، وأنا كمان هروح أجهز.

طلعت جنه من المطبخ، واتجهت لأوضتها، ولما دخلت لقت جواد واقف قدام المراية بيظبط نفسه.

جنه: أني كنت طالعة أجهزلك الغيار.

جواد: أني مش عيل صغير، هعرف أجهز لحالي.

سكتت جنه، لأنها عارفة إن الكلام معاه من غير فايدة، واتجهت ناحية الدولاب عشان تجهز هدومها هي كمان.

لكن صوت جواد وقفها.

جواد: مش عاوز لبس ضيق، فاهمة

لفت جنه ناحيته.

جنه: إحنا هنكون حريم بس.

جواد: ليه، ناسية إخواتي الرجالة اللي في البيت

جنه: أني هطلع قبل ما تدخلوا البيت.

بصلها جواد بغضب، واتكلم بنبرة آمرة.

جواد: هو إنتِ لازم تجادليني قولت كلمة، قولي حاضر

نزلت جنه عينيها، وردت بخوف.

جنه: حاضر.

رجعت تكمل تجهيز نفسها في صمت، بينما جواد رجع يبص للمراية، وكأن اللي حصل أمر عادي ما يستحقش الوقوف عنده.

اذكروا الله 💓

---

كانت يمني واقفة قدام المراية، لابسة فستان شيك كانت جايباه من القاهرة أيام الدراسة، وبتحط آخر لمسات الميك اب.

كانت فرحانة بشكلها، وبتبص لنفسها بإعجاب، لحد ما باب الأوضة اتفتح فجأة، ودخل ياسين.

أول ما شافها، وقف مكانه بصدمة، وبعدها اتغيرت ملامحه للغضب.

ياسين: يا نهار أبوكي أسود ومطين بطين إنتِ نازلة بقميص النوم

انتفضت يمني من صوته، ولفت ناحيته بسرعة.

يمني: بسم الله الرحمن الرحيم خضتني يا جدع إنت في إيه

ياسين: خضة لما تخضك يا بعيدة  إيه اللي لابساه ده

يمني: ده فستان كنت جايباه من القاهرة وقت الدراسة.

ياسين: يا أختي دراسة لما تدرس لحمك على عضمك غوري غيري القرف ده

اتسعت عيون يمني من كلامه، وبصت لفستانها باستنكار.

يمني: قرف إيه يعني مفيش رجالة هيكونوا هنا، هنكون وسط النسوان! ما تكبرش الموضوع بقى.

ياسين: كلمة واحدة، غوري غيري اللي لابساه ده والبسي حاجة حشمة

يمني: أنا خلاص خلصت، ولو غيرته هضطر أمسح الميك اب وأحط لون اللي لابساه، وأنا مش مستعدة أضيع التعب ده كله

ياسين: قدامك حلين. الأول تغيري الفستان وتحضري الفرح بسلام، والتاني تفضلي بالفستان، وساعتها مش هتبقي على ذمتي، وأوديكي بيت أبوكي مكسحة، وبرضه بنفس الفستان اختاري إيه يا بت العمدة

فضلت يمني باصة له، وشافت الغدر في عينيه، وعرفت إنه مش بيهزر.

كانت عارفة طبعه، وعارفة إنه ممكن ينفذ تهديده فعلًا، فلفت ناحية الدولاب، وطلعت فستان مقفول، وبدأت تغير هدومها وهي كاتمة غيظها.

بصت لنفسها في المراية بعد ما خلصت، وحاولت تهدي نفسها، لكن كلام ياسين فضل يتردد في ودنها.

أما هو، فخرج من الأوضة بعدماجهز وكأن شيئًا لم يحدث.

اذكروا الله ❤️

---

في الوقت ده، كان الشباب كلهم لبسوا الجلاليب الصعيدي، واتجمعوا عشان يروحوا لأوضة العريس.

دخلوا الأوضة، لكنهم وقفوا مكانهم بصدمة لما لقوا سند لسه نايم.

ياسين: يعني ده نايم

صقر: حد يقومه

جواد: لو جه أبو سيف دلوقتي، كلنا هنطوح

قرب ياسين من السرير، وبدأ يهز سند بعنف.

ياسين: قوم يا واكل ناسك في عريس ينام ليلة دخلته؟ ده شكل العروسة نحس

صقر: العروسة اللي نحس، ولا أخوك اللي بيتسرح وتلاقيه كان عند غزية من إياهم

مسك جواد كوب الميه اللي كان على الترابيزة، ورشه بسرعة على وش سند.

انتفض سند من مكانه، وقعد على السرير وهو بيمسح وشه، وبص لهم بفزع.

سند: إيه في إيه حريقة حد مات في حد يصحي حد اكده

ياسمين: بقالي ساعة بصحي فيك في إيه نايم مع الأموات

سند بزهق: أدي قومت إيه حصل في الدنيا القيامة قامت ولا إيه

جواد: هتقوم لو إنت ما قومتش إنت ناسي النهارده إيه

فرك سند عينيه، وبدأ يفكر، وبعدها رد بكل بساطة.

سند: النهارده الخميس.

صقر: النهارده الخميس يا عريس نسيت دي كمان

اتسعت عيون سند، وقفز من السرير وهو بيبص لهم بفزع.

سند: يخرب بيت سنينكم محدش صحاني ليه من بدري أني راحت عليا نومة

جواد: ما حدش كان فاضي، كلنا كنا مشغولين في تجهيزات فرحك والدبايح وعشا المعازيم.

ياسين: هي السهرة كانت صباحي ولا إيه

سند: بالله عليكم كفاية اكده عاوز أجهز، ولا عاوزين أبو سيف ييجي يطيني مش كفاية العروسة اللي مشوفتهاش؟ قال إيه، بت شيخ ومانع الرؤية لسه في حد اكده أكيد عفشة

ياسين: ما تقلقش، أبو سيف ما يختارش حاجة عفشة واصل، اطمن.

وقبل ما سند يرد، دخل فراس من غير ما يخبط، وبص للشباب باستغراب.

فراس: جايبين في سيرتي ليه

جواد: أبدًا يا أخوي، ولا حاجة.

لف فراس بعينيه ناحية صقر، اللي كان بيبص له بغضب وغل، واتقابلت نظراتهم للحظات، وكل واحد فيهم كان شايل جواه كلام كتير ما اتقالش.

كسر صقر الصمت، واتجه ناحية الباب.

صقر: أني طالع أشوف الدنيا برا.

فراس: استنى، هننزلوا مع بعض. خلي الناس كلها تشوفنا وإحنا إيد واحدة.

وقف صقر، وبص له من فوق لتحت.

صقر: شكليات يعني

اتغيرت ملامح فراس، واتكلم بنبرة حازمة.

فراس: صقر، عمر اللي بينا ما كان شكليات، وإنت عارف ده زين.

جواد: خلاص يا أبو سيف، صلّي على النبي.

الجميع: عليه أفضل الصلاة والسلام.

وبعد وقت، نزلوا كلهم سوا، بعد ما فراس وبّخ سند على تأخيره، لكن ياسين تدخل وأنقذ الموقف، لأنه ما حبش يزعل سند في يوم فرحه.

وبكده، نزل الخمسة كأنهم إيد واحدة، بهيبة وقوة وجمال، تحت أنظار رجال البلد اللي جايين من كل مكان يحضروا فرح سند.

كان منظرهم كفيل يخلي كل اللي في الساحة يركز معاهم، خصوصًا إنهم معروفين بقوتهم وهيبتهم في البلد.

لكن رغم إنهم نزلوا جنب بعض، كان فيه خلافات مستخبية ورا النظرات، محدش من الموجودين يعرف عنها حاجة.

اذكروا الله 💘

---

كانت البنات خلصوا تجهيزاتهم، ونزلوا يستقبلوا النسوان اللي بدأوا يتواجدوا في السرايا.

لفت مهره ناحية جنه، وبصت حواليها وهي بتدور على شيء ما

مهره: أمال فين سما يا جنه

جنه: بتلعب مع سيف يا أم سيف.

مهره: ماشي، بس ابقي بصي عليهم، أو شيّعي لهم عيل، أحسن يتوهوا برا في الرجلين. وما تنسيش إن الرجالة هتلعب بالخيول.

جنه: ماشي، ما تقلقيش. ده جواد وصاني على سما، وقالي ما تخلهاش تطلع، وسيف كبير عنها وهيخلي باله من بت عمه.

هزت مهره راسها، وبعدها لاحظت إن يمني واقفة بعيد عنهم، وملامحها متغيرة.

مهره: هي البت يمني لاوية بوزها ليه اكده

جنه: معرفاش، تعالي نسألها.

قربت مهره وجنه منها، ووقفوا قدامها.

يمني: مفيش يا بنات، عادي.

مهره: عادي كيف يعني ده الحريم بتبص عليكي وإنتِ لاوية وشك اكده! ما تقولي في إيه

تنهدت يمني بضيق، وردت وهي بتكتم غيظها.

يمني: ابن عمك قلّعني الفستان

بصت مهره وجنه لبعض باستغراب، وفي نفس اللحظة ظهرت صبا من وراهم، وكانت سامعة آخر جملة.

صبا: قلّعك الفستان قلّعك إزاي عاوزة أفهم

وانفجرت صبا بالضحك، ولحقتها جنه ومهره، بينما يمني احمر وشها من الكسوف.

يمني: إنتوا فهمتوا إيه أنا قصدي كنت لابسة فستان، وخلاني أقلعه لأنه كان مكشوف شوية

بصت لها مهره ورفعت حاجبها باستنكار.

مهره: شوية

يمني: خلاص، مكشوف خالص ارتحتي كده

ضحكت صبا مرة تانية، بينما مهره اتنهدت بضيق.

مهره: ده اللي مزعلك يعني ماشيفاش انا لابسة شوال كيف يعني أبو سيف ما نزلش غير لما تمم على لبسي، وحاطة إي في وشي والله تحمدوا ربنا على اللي إنتوا لابسينه، وبلاش تحسروني على نفسي

صبا: طب ما تروحي تحطي حاجة كده ولا كده أساسًا مش هيدخلوا غير لما الفرح يخلص.

مهره: ولما يرجع آخر الليل ويشوف، ويطلقني فيها اسكتي ياختي وتعالي نرحب بالضيوف.

سكتت البنات، وبعدها رجعوا يستقبلوا النسوان، وكل واحدة فيهم حاولت تخبي اللي جواها من زعل أو ضيق، عشان اليوم يعدي من غير مشاكل جديدة.

اذكروا الله 🩷

---

بعد ساعات طويلة، خلص الفرح وسط ضرب النار والزغاريط، ولمة العيلة اللي كانت مالية السرايا.

خدت مهره العروسة وطلعت بيها لأوضة سند.

دخلت الأوضة، وقعدتها على السرير، وبعدها خرجت بهدوء وسابت الباب وراها.

كان الشباب واقفين تحت، وفراس بص لسند وقال له:

فراس: يلا يا عريس، عاوزينك ترفع راسنا

ياسين: ما تخافش، ده رافعها من زمان، بس إحنا اللي ماخدناش بالنا

بص له فراس بصّة أسكتته في الحال، فضحك جواد وهو بيحاول يغير الموضوع.

جواد: يلا يا سند، روح ادخل على عروستك.

طلع سند  ودخل وبص ناحية السرير، فلقى حد نايم ومتغطي بالغطا.

قرب سند من السرير، وحط إيده على جنبه، واتكلم بنبرة ساخرة.

سند: قومي يا ختي، مش وقت نوم

لكن ما سمعش أي رد.

استغرب، وقرب أكتر، وبعدها مسك الغطا ورفعه بغضب، لكنه اتفاجئ بيها نايمة بهدوء، وملامحها جميلة لدرجة إنه وقف يتأملها للحظات.

كان جمالها مختلف عن كل اللي تخيله، وفضل باصص لها من غير ما يحس بالوقت.

بعد لحظات، افتكر نفسه، فقرب منها وبدأ يحاول يصحيها.

سند: قومي يا بت، يا اسمك إيه إنتِ قومي

لكن العروسة ما اتحركتش.

هزها مرة تانية، وناداها بصوت أعلى.

سند: إنتِ يا بت سامعاني قومي

مفيش أي استجابة.

بدأ القلق يتسلل لقلبه، ومد إيده يحاول يصحيها مرة تالتة، لكن من غير فايدة.

اتراجع سند خطوتين، وعينيه اتسعت من الخوف، وبدأت أفكار كتير تضرب في دماغه.

سند بفزع: دي... دي ماتت

خرج من الأوضة بسرعة، وجري ناحية السلم، وهو بيزعق بأعلى صوته:

سند: العروسة ماتت


تعليقات