رواية تذكرة بلا عوده الفصل الاول
كنت مستعدة أستحمل أي حاجة… إلا إني أصحى في يوم ألاقي نفسي محرومة من ولادي!
عمري ما كنت مقتنعة إن الجواز هو كل أحلام البنت، أو إن سعادتها لازم تكون مرتبطة بوجود راجل في حياتها.
كنت دايمًا شايفة إن الحياة أكبر من كده بكتير، وإن قدامي طريق طويل نفسي أمشيه وأوصل لآخره، حتى لو اضطريت أمشيه لوحدي.
اسمي هدى، من مواليد التسعينات، اتربيت وسط أسرة بسيطة ومترابطة، عمري ما حسيت معاهم إني محتاجة لحاجة.
أبويا كان راجل طيب، بيحبنا وبيحاول يوفرلنا كل اللي نحتاجه، وأمي كانت ست حنينة، كل همها تشوفنا أحسن ناس في الدنيا. أما إخواتي فكانوا أقرب ناس ليا، والبيت رغم بساطته كان مليان ضحك وحكايات ولمة عيلة.
من وأنا صغيرة، كان عندي طموح مختلف شوية عن بنات كتير في سني. كنت بحب الدراسة، وبستمتع بالكتب والمذاكرة، وكنت بحس بسعادة كبيرة لما أحقق نجاح أو أعدي مرحلة دراسية بتفوق. مكنش حلمي مجرد إني أخلص الجامعة وأشتغل وخلاص، أنا كنت عايزة أكمل تعليمي،واعمل الماجستير والدكتوراه، وأوصل في يوم من الأيام لمنصب كبير في مجال التعليم، أو أبقى دكتورة في الجامعة.
كنت بتخيل نفسي بعد سنين واقفة قدام الطلبة، بشرح وبناقش وبشاركهم خبرتي، وأفتكر كل التعب اللي عديت بيه عشان أوصل للمكان ده. الحلم ده كان بالنسبالي أهم من أي حاجة تانية، وكنت مستعدة أستنى سنين عشانه.
عشان كده، لما بدأت أسمع كلام عن الجواز والعرايس والعرسان، كنت دايمًا بقفل الموضوع بطريقة لطيفة.
أمي كانت ساعات تبصلي وتقول وهي بتضحك:
يا بنتي، هو إنتِ ناوية تفضلي تذاكري لحد إمتى؟ ما تفكري في نفسك شوية؟
كنت أضحك وأرد عليها:
لما أخلص اللي ورايا يا ماما، نبقى نشوف حكاية الجواز دي.
فترد عليا:
ما هو مش لازم تستني لما تخلصي كل حاجة، العمر بيجري يا هدى.
لكن أنا مكنتش شايفة إن العمر بيجري، بالعكس، كنت حاسة إن لسه قدامي وقت طويل أحقق فيه كل اللي نفسي فيه. مكنتش رافضة الجواز لمجرد الرفض، لكن كنت خايفة أدخل حياة جديدة تخليني أتنازل عن أحلامي، أو ألاقي نفسي فجأة مسؤولة عن بيت وأطفال قبل ما أحقق أي حاجة لنفسي.
مرت السنين وأنا مركزة في دراستي ومستقبلي، لحد ما وصلت لسن خمسة وعشرين سنة.
وفي يوم رن تليفوني، كانت واحدة من أصحابي متكلمناش أنا وهي بقالنا فترة بسبب الدنيا والانشغالات، عشان كده قعدنا نرغي كتير واحكيلها وتحكيلي عن كل اللي فاتني.
لحد ما لقتها قالتلي فجأة:
على فكرة يا هدى، أنا عايزة أعرفك على عريس.
ضحكت وقولت لها:
مش لسه قايلالك يابنتي إني مش بفكر في الجواز دلوقتي؟
قالت بإصرار:
طب اسمعيني بس الأول، وبعد كده احكمي.
قولت لها وأنا بضحك:
خير ياستي، مين العريس اللقطة المرة دي اللي هيخليني أغير رأيي ده؟
قالتلي إن اسمه هيثم، وإنه مقيم في ألمانيا بقاله أكتر من 12 سنة، وكمان معاه الجنسية الألمانية.
في البداية مااهتمتش أوي، واعتبرت الموضوع مجرد ترشيح زي ترشيحات كتير سمعتها قبل كده. لكنها فضلت تتكلم عنه بحماس، وقالت إنه راجل مستقر، وعنده شغل كويس، وعارف هو عايز إيه من حياته.
وبعد شوية قالت جملة خلتني أركز معاها أكتر:
هو كمان مش معترض إنك تكملي دراستك، بالعكس، بيقول إنه ممكن يساعدك تكملي الدكتوراه في ألمانيا.
ساعتها حسيت إن الموضوع يستحق إني أسمع تفاصيل أكتر. فكرة إني أقدر أكمل تعليمي، وفي نفس الوقت أعيش تجربة جديدة في بلد زي ألمانيا، كانت مغرية بالنسبة ليا الصراحة.
سألتها:
هو شغال إيه هناك؟
ردت بثقة:
مدير فندق في المنطقة اللي عايش فيها، وشخص عملي جدًا، وطبعًا بحكم إنه عايش هناك من سنين، فاهم الدنيا كويس.
بدأت صديقتي ترتب لفكرة التعارف، وفي البداية كنت مترددة، لكن بعد إلحاح منها وافقت إني أتكلم معاه مرة، لمجرد التعارف، من غير أي وعود أو قرارات مسبقة.
لما اتكلمت مع هيثم لأول مرة، لقيته بيتكلم بهدوء وثقة، وعنده إجابة لكل سؤال تقريبًا. كان بيحكي عن ألمانيا وإنه عايش حياة مستقرة ومريحة، وعن شغله وطبيعة يومه، وعن النظام هناك، والفرص اللي ممكن تكون متاحة ليا لو سافرت معاه.
كان عارف إني بحب الدراسة، ودي كانت نقطة بيرجع لها في كلامه كل شوية.
قال لي:
«أنا شايف إن البنت لازم تحقق نفسها، ومش معنى إنها اتجوزت إن حياتها تقف. بالعكس، لو عندك طموح أنا هساعدك تحققيه».
الكلام ده لمس حاجة جوايا. كنت طول عمري خايفة إن الجواز يبقى عائق قدام مستقبلي، وفجأة ظهر شخص بيقول إنه ممكن يكون سبب في تحقيق أحلامي.
بدأت المكالمات بينا تتكرر، ومع الوقت بقيت أعرف عنه تفاصيل أكتر. كان بيتكلم عن حياته في ألمانيا، وعن المكان اللي عايش فيه، وعن طبيعة شغله ويومه.
ولما الموضوع بدأ ياخد شكل جد، دخل أهلي في الصورة.
في البداية، مكنوش متحمسين أوي. كانوا شايفين إن فكرة إني أتجوز شخص عايش بره مصر وأسافر معاه محتاجة تفكير طويل. أبويا تحديدًا كان قلقان من سرعة الخطوات، وكان شايف إن شهر واحد مش كفاية عشان يعرف شخص ويسلمه بنته.
ومع إصراري أبويا قالي:
يا هدى، إحنا مش ضد إنك تتجوزي، إنتي عارفة كويس إننا نفسنا ده يحصل انهارده قبل بكرة, بس لازم تعرفي الشخص كويس. إنتِ هتسافري وتعيشي في بلد بعيدة، ومش هنكون جنبك لو احتاجتي حاجة.
حاولت أطمنه وقولت:
متقلقش يا بابا،هو واضح إنه إنسان كويس، وكمان مش هيمنعني من دراستي.
أمي بقى كانت مترددة بين خوفها عليا وفرحتها إن بنتها أخيرًا وافقت تفكر في الجواز.
ومع الوقت، وبعد ما شافوا تمسكه بيا وكلامه عن مستقبلي، بدأوا يوافقوا على الفكرة.
كل حاجة حصلت بسرعة فعلًا. خلال شهر تقريبًا، اتحولت المكالمات لاتفاقات، والاتفاقات لتجهيزات، ولقيت نفسي داخلة على حياة جديدة كنت لسه معرفش عنها حاجة.
يوم الفرح كنت مبسوطة، وفي نفس الوقت جوايا رهبة مش قادرة أفسرها. كنت ببص لأهلي وأحاول أخزن كل تفصيلة في ذاكرتي، لأني كنت عارفة إن بعد أيام قليلة هكون في بلد تانية، بعيدة عن البيت اللي اتربيت فيه، وعن الناس اللي طول عمري حاسة معاهم الأمان.
أبويا حضني قبل السفر وقال لي:
خلي بالك من نفسك يا بنتي، وطمنينا عليكي علطول, هتوحشينا أوي.
ابتسمت له وقولت:
متقلقش يا بابا، أنا هكون كويسة وهكلمكم كل يوم.
سافرت مع هيثم ألمانيا، وأنا شايلة جوايا أحلام كبيرة، ومتخيلة إن حياتي الجديدة هتكون بداية مختلفة، وإن الفرصة اللي استنيتها سنين أخيرًا بقت في إيدي.
لكن أول ما وصلت، بدأت أكتشف إن في حاجات كتير مش زي ما اتقالتلي.
كنت بحاول أقنع نفسي إن اللي شوفته في الأيام الأولى مجرد اختلاف في مستوى المعيشة، وإن طبيعي ألاقي الحياة هناك مختلفة عن الصورة اللي رسمتها في خيالي.
كنت بقول لنفسي إن مش كل حاجة لازم تكون مثالية، وإن أي اتنين بيتجوزوا بيحتاجوا وقت عشان يتعودوا على بعض وعلى طبيعة حياتهم الجديدة.
لكن المشكلة إن الأيام كانت بتكشفلي حاجات أكتر من مجرد اختلاف في مستوى المعيشة.
الشقة اللي عايشين فيها كانت صغيرة جدًا، أوضة وصالة، والمطبخ يادوب يكفي شخصين يتحركوا فيه. مفيش أي حاجة من اللي كنت متخيلاها، ولا الحياة المريحة اللي كان هيثم بيتكلم عنها قبل الجواز.
وحتى شغله، اللي كان بيقدمه على إنه مدير فندق، اكتشفت إنه بيشتغل شيف في مطعم!
مكنتش شايفة إن طبيعة شغله عيب، بالعكس، الشغل مادام شريف يبقى مفيش مشكلة، لكن اللي ضايقني إنه اختار يخبي الحقيقة عني ويقدملي صورة مختلفة تمامًا عن حياته.
في البداية حاولت أتكلم معاه بهدوء.
قولت له:
هو إنت ليه مقولتليش الحقيقة من الأول؟ أنا مش فاهمة إيه اللي يخليك تقول إنك مدير فندق، مع إن شغلك مختلف.
بصلي باستغراب، وكأنه مش شايف إن في مشكلة أصلًا، ورد:
وإيه يعني؟ هو أنا شغال في حاجة عيب؟ ما أنا بشتغل وبصرف على البيت؟
قولت له:
أنا مقولتش إن شغلك عيب، أنا بس كنت عايزة أعرف الحقيقة من غير تجميل!
رد ببرود:
خلاص يا هدى، ما تكبريش المواضيع. إحنا اتجوزنا وجينا نعيش هنا، وبدل ما نفكر في الكلام اللي فات، نفكر في حياتنا اللي جاية أحسن!
سكت، لكن جوايا كان في سؤال مش قادر يختفي:
لو هو كدب في حاجة زي دي، يا ترى إيه كمان لسه مقالهوش؟
ومع مرور الوقت بدأت ألاحظ طباع تانية فيه. هيثم كان بخيل جدا، وبيحسب كل حاجة تقريبًا. مصاريف البيت، الأكل، احتياجاتي الشخصية، وحتى الحاجات البسيطة اللي كنت بحتاج أشتريها لنفسي. كنت بحس إني لازم أبررله أي مبلغ بصرفه، مهما كان صغير.
في أوقات كتير كنت بطلب منه حاجة ضرورية، فيرد عليا إننا لازم نوفر، وإن الحياة في ألمانيا مش سهلة زي ما أنا متخيلة. كنت بحاول أتفهم، لكن الغريب إنه مكنش بيحب يصرف على أي حاجة تخصني، وفي نفس الوقت كان متوقع مني أكون راضية عن كل الظروف من غير اعتراض.
كنت بعيدة عن أهلي، ومعنديش أصحاب قريبين أقدر أفضفض معاهم، وده خلاني أحاول أتأقلم أكتر بدل ما أدخل في خلافات معاه. كنت بقول لنفسي إن دي مرحلة وهتعدي، وإن لما حياتنا تستقر ممكن الأمور تتغير.
لكن الأمور ما اتغيرتش.
ومع الوقت، بدأ موضوع الأطفال يدخل في حياتنا. وفي سنة 2016، ربنا رزقني بطفلي الأول، وبعده بفترة جه طفلي التاني. كنت فرحانة بيهم بشكل مايتوصفش، وحسيت إن وجودهم اداني سبب جديد أتمسك بيه بالحياة، خصوصًا وأنا بعيدة عن أهلي وفي بلد غريبة.
كنت ببص لوشوشهم وهما نايمين، وأحس إن كل التعب اللي عديت بيه ممكن يهون عشانهم. كان نفسي أوفرلهم حياة أحسن، وأربيهم في بيت مليان حب وهدوء، بعيد عن أي خلافات أو مشاكل.
لكن حتى فرحتي بالأطفال مقدرتش تغير شخصية هيثم.
مع الوقت اكتشفت إن المبلغ اللي كان بييجي بسبب الأطفال من الحكومة الألمانية كمساعدة لينا ، واللي كان المفروض يساعد في تربية الأطفال واحتياجاتهم، بقى بالنسبة له مصدر يعتمد عليه في مصاريف البيت، وكان بيتعامل معاه كأنه فلوسه الخاصة وابتدى ياخد أجازات كتير من الشغل ويقعد في البيت وهو معتمد على كده.
كنت ساعات أحتاج أشتري حاجة لاولادي، لعبة مثلُا أي حاجة ترفيهية فأطلب منه فلوس, كان بيتضايق من كلامي ويعتبرني مش مقدرة ظروفه، وفي كل مرة بحاول أشرحله إن دول أطفال ليهم احتياجات تانية، وإن مسؤوليتهم مش مجرد توفير أكل وخلاص.
لكن الكلام معاه مكنش بيغير حاجة.
ده حتى في مرة قالي بعصبية:
أنا اتجوزت وخلفت مخصوص عشان الفلوس اللي جاية من الحكومة للأولاد معنديش استعداد أضيعهم في تفاهات!
الجملة صدمتني!
حاولت أعديها إنها اتقالت في وقت غضب وممسكش على الكلمة لكن الخلافات بينا بدأت تكبر أكبر من الأول.
بعد ما كانت مجرد عصبية وصوت عالي وكلام جارح، بعدها الموضوع اتطور لحاجة أصعب بكتير.
هيثم بدأ يمد إيده عليا.
مكنتش متخيلة في يوم من الأيام إن الشخص اللي وعدني إنه هيكون سند ليا، هو نفسه اللي هخاف منه.
والغريبة إن الضرب مكنش بيحصل بسبب مشكلة كبيرة أو خلاف يستاهل. أحيانًا كان بيزعل من كلمة، أو من اعتراض بسيط، أو من حاجة معجبتوش في تصرفاتي.
وفي كل مرة كان بيضربني فيها، كنت بحس إن جزء مني بيتكسر.
كنت بعيط لوحدي، وأحاول أخبي آثار التعب عن أولادي وأهلي لما حد فيهم كان بيكلمني، وأفضل أسأل نفسي:
إزاي وصلت للحياة دي؟ وإزاي الراجل اللي وافقت أسافر معاه وأسيب أهلي عشانه، بقى هو أكتر شخص بخاف منه؟
لكن أكتر حاجة كانت بتشلني عن التفكير في الانفصال هي أولادي.
هيثم كان عارف كويس إن دي نقطة ضعفي، وعشان كده كان بيستخدمها ضدي باستمرار. كان دايمًا يخوفني من القانون الألماني، ويقول لي إن لو اشتكيته أو حاولت أسيبه، ممكن الدولة تاخد مني الأطفال.
كان بيقول:
«إنتِ فاكرة إنك لو روحتي اشتكيتي هيسيبولك العيال؟ ده ممكن ياخدوهم منك، وساعتها لا هتشوفيني ولا هتشوفيهم».
