رواية سر حماتي الاسود الفصل الأول بقلم يوسف مصطفى
انا اكتشفت إن جوزي مخبي عني سر في بيته، والسر ده كان مستخبي ورا حيطة أوضتي.. بس عمري ما تخيلت إن اللي هكتشفه هيخليني أخاف من جوزي أكتر ما بخاف من أي حاجة تانية!
أنا سلمى، عندي 27 سنة، متجوزة أحمد من شهرين. اتعرفنا عن طريق واحدة صاحبة والدتي، وكان جواز صالونات، لكن أحمد كان إنسان محترم وهادي، وحسيت إنه مناسب ليا، فوافقت عليه.
أحمد وحيد أهله، ووالده متوفي من سنين، وكان عايش مع والدته في شقتها. وبعد الجواز قضينا أول شهر في شهر العسل، ولما رجعنا استقريت معاه في نفس الشقة، لأن مكنش عنده شقة تانية، والشقة أصلاً باسم والدته.
أنا في الأول مكنتش متضايقة من الموضوع، بالعكس، كنت مقدرة إنه مش عايز يسيب أمه لوحدها، خصوصاً إنها ست كبيرة وملهاش غيره.
وأحمد نفسه كان دايماً بيطمني ويقولي:
بصي يا سلمى، أنا عارف إن وجود ماما معانا ممكن يضايقك، بس دي أمي وملهاش غيري، وأنا بوعدك أول ما ظروفي تتحسن هجيبلك شقة لوحدنا. ولو حسيتي إنك مش مرتاحة، قوليلي وأنا ممكن أأجرلك شقة بعيد عنها.
كنت بقوله إني متفهمة ومش عايزة أبعده عن أمه، وكنت مقتنعة إن الموضوع محتاج شوية وقت عشان نتعود على بعض.
لكن اللي مكنتش أعرفه إن حماتي مش مجرد ست صعبة في التعامل.. دي وراها حكاية غريبة جداً!
من أول أسبوع بدأت ألاحظ تصرفات مش طبيعية منها.
مرة كنت بعمل الغدا، وخرجت من المطبخ دقيقتين أجيب حاجة من أوضتي، ولما رجعت لقيتها واقفة قدام الحلة وبتحط فيها كمية ملح كبيرة.
وقفت مكاني وقلتلها:
في حاجة يا ماما؟ الأكل ناقصه ملح؟
اتخضت لما شافتني، وحاولت تخبي إيديها وقالت:
ـ آه يا بنتي، الظاهر إني حسيت إنه محتاج شوية.
قلتلها ماشي، وسبتها وكملت الأكل، لكن لما دوقت لقيته مالح بشكل مستحيل يتاكل.
عديت الموقف، لكن الموضوع متكررش بنفس الطريقة، إنما بدأت تظهر تصرفات تانية.
كل ما أدخل الحمام ألاقيها بعد دقيقة بتخبط عليا بعنف وعايزة تدخل، ولو بتكلم في التليفون مع صحبتي ألاقيها بتلف حواليا بحجة إنها بتدور على حاجة، وأول ما أقفل المكالمة تمشي.
ولو دخلت المطبخ أعمل حاجة، تفضل واقفة ورايا تراقبني، لدرجة إني بقيت أحس إني مش عارفة أتحرك في بيتي براحتى.
كنت كل ما أشتكي لأحمد يضحك ويقولي:
معلش يا حبيبتي، ماما بس لسه متعودتش عليكي، ومع الوقت هتحبك وهتحبيها.
لكن أكتر حاجة كانت بتخليني أحس إن في حاجة غلط، هي اللي بتحصل كل يوم بالليل.
بالظبط الساعة 12، حماتي تقوم من مكانها وتجري على أوضتها، وتقفل الباب بالمفتاح.
وبعدها بدقايق أسمع صوت تخبيط جامد جداً من جوه الغرفة.
مش تخبيط عادي، لأ.. ده صوت كأن حد بيخبط بإيده على الحيطان وبيحاول يخرج من مكان محبوس فيه!
وفي أيام كنت أسمع صوت حاجة بتتسحب على الأرض، وبعدها صوت خربشة طويلة، كأن حد بيحك ضوافره في الحيطة.
والأغرب من كل ده إن أحمد ساعات كتير كان بيدخل أوضة أمه بعد نص الليل، ويقعد معاها بالساعات، وفي أوقات كان بيبات عندها ويرجع أوضتنا الصبح.
في الأول كنت بقول يمكن أمه تعبانة أو محتاجة منه حاجة، لكن بدأت أستغرب لما لقيت باب أوضتها دايماً مقفول بالمفتاح، والمفتاح متعلق في سلسلة صغيرة في رقبتها ومبتفارقهاش أبداً.
حتى لما كنت أعرض عليها أنضف أوضتها، ترفض رفض قاطع.
لأ يا سلمى، أوضتي أنا اللي بنضفها.
وكنت ساعات أشم ريحة وحشة جداً طالعة من ناحية أوضتها، ريحة شبه ريحة حاجة قديمة ومقفولة بقالها سنين، لكن أول ما أسألها تنكر وتقول مفيش أي ريحة.
وفي مرة قررت أسأل أحمد بصراحة:
ـ هو يا أحمد، ليه ماما مش بتخليني أدخل أوضتها؟ وليه إنت بس اللي بتنضفها؟
بصلي بضيق وقال: هو إنتي مالك بأوضة ماما؟ دي حاجتها وخصوصيتها، وإنتي ليه مصممة تدخلي في كل حاجة تخصها؟
استغربت عصبيته وقلتله: أنا بس بسأل، مش قصدي حاجة.
فزعق في وشي لأول مرة من يوم ما اتجوزنا:
خلاص يا سلمى! متفتحيش الموضوع ده تاني!
ساعتها عيطت من الخضة، مش من الزعل بس، لأ..أنا حسيت إن أحمد اللي قدامي ده مش نفس الشخص اللي اتجوزته.
عدت الأيام، لكن فضلت حاسة إن في سر كبير مستخبي في الشقة دي.
لحد الليلة اللي كل حاجة فيها اتغيرت.
كنت نايمة، وصحيت فجأة على صوت تخبيط شديد.
فتحت عيني وبصيت في الساعة.. 12 بالظبط.
سمعت صوت حماتي وهي بتقفل باب أوضتها، وبعدها صوت خطوات أحمد وهو رايح ناحيتها
استغربت، لأن أحمد كان قاعد جنبي من شوية، لكن واضح إنه قام من غير ما أحس.
حاولت أنام تاني، لكن صوت التخبيط زاد، والمرة دي كان جاي من ناحية الحيطة اللي ورا سريري.
فضلت باصة للحيطة، لحد ما سمعت صوت خربشة قريبة جداً مني.
قربت ودني بحذر..وفجأة!
صوت ست همس من ورا الحيطة:افتحي..أرجوكي افتحي!
اتجمدت مكاني.. قعدت أقول لنفسي يمكن ده صوت من الشقة اللي جنبنا، لكن الصوت اتكرر، والمرة دي كان أوضح: الحقيني.. أنا مش قادرة أستحمل!
قومت من السرير بسرعة وولعت النور، وبدأت أدور على مصدر الصوت.
وفجأة لاحظت إن في جزء صغير من الحيطة ورا السرير شكله مختلف، كأن فيه فتحة متغطية بمعجون ودهان.
قربت منها، وحطيت إيدي عليها، لكن قبل ما ألمسها سمعت صوت خربشة من الناحية التانية.
وبعدين..صُباع ست ظهر من فتحة صغيرة في الحيطة!
صرخت ورجعت لورا، لكن الصباع اختفى بسرعة، وسمعت صوت حاجة معدنية بتتحرك.
بعد ثواني، ظهر طرف مفتاح، وبدأت الإيد توسع الفتحة واحدة واحدة.
وفجأة المفتاح وقع على سريري!
قلبي كان هيقف من الرعب.. مسكت المفتاح بإيد بتترعش، ووجهت كشاف الموبايل ناحية الفتحة
في الأول مشوفتش غير ضلمة، لكن كان فيه حركة واضحة جوه.
قربت الكشاف أكتر..وهنا شفت وش ست!
وشها كان مليان جروح قديمة، وشعرها منكوش ومتلبد، وعينيها غارقة في سواد مرعب، وكانت باصة لي كأنها شايفة طوق النجاة الوحيد في حياتها.
صرخت ورميت المخدة على الفتحة.. وفي نفس اللحظة باب أوضتي اتفتح، وأحمد دخل بيجري.
في إيه يا سلمى؟ مالك؟!
بصلي وأنا بترعش، ووشي كله عرق، وبعدها بص ناحية السرير.
حسيت إنه لاحظ حاجة، لكنه حاول يتصرف بشكل طبيعي.
إنتي شفتي حاجة؟
اتوترت جداً، ومقدرتش أقوله الحقيقة، خصوصاً إني سمعت خطوات حماتي في الطرقة.
فقلت بسرعة: لأ.. أنا بس حلمت بكابوس.
أحمد قرب مني، وطبطب على كتفي وجابلي كوباية مياه.
وبعدها قال جملة خلت قلبي يتقبض:
ـ معلش يا حبيبتي، أنا مضطر أروح أقعد مع ماما الليلة دي، هي تعبانة شوية.
وسابني وخرج.
فضلت قاعدة على طرف السرير، مش قادرة أبص ناحية الحيطة.
كنت عايزة أعرف مين الست دي، وإزاي موجودة جوه الحيطة، وليه أحمد بيدخل أوضة أمه كل ليلة، وهل حماتي عارفة بوجودها؟
فضلت طول الليل نايمة في أبعد طرف عن الحيطة، وكل شوية أبص ناحية الفتحة اللي غطيتها بالمخدة.
ومع أول ضوء للنهار غلبني النوم.
صحيت على صوت حماتي وهي بتزعق:
يا بنتي اصحي بقى! بقينا في الضهر،هو أنا هفضل مستنياكي لحد إمتى؟ أحمد راجع كمان شوية، قومي شوفي الغدا!
قومت وأنا حاسة إن جسمي متكسر ودماغي هتنفجر من قلة النوم.
عملت الغدا بسرعة، وأول ما حماتي انشغلت في التليفزيون دخلت أوضتي وقفلت الباب بالمفتاح.
كنت مقررة إني لازم أعرف الحقيقة، حتى لو هتكون آخر حاجة أعملها في البيت ده.
طلعت على السرير، وشيلت المخدة من على الفتحة.
وفجأة لقيت نفس الست قاعدة في الضلمة، وفي إيدها مفتاح تاني، وبتحاول توسع الفتحة.
المرة دي قدرت أشوف ملامحها بوضوح.
كانت مرعوبة، وبتحاول تتكلم من غير ما صوتها يطلع.
قربت منها وقلت بصوت واطي:
إنتي مين؟ وإزاي وصلتي هنا؟
فضلت باصة لي شوية، وبعدها دموعها نزلت على خدها.
وقالت بصوت مبحوح: أنا اسمي لبنى.. مرات أحمد الأولى!
حسيت إن الأرض بتلف بيا.
إيه؟! مرات أحمد الأولى؟ إنتي بتقولي إيه؟!
ردت وهي بتمسك في إيدي من الفتحة:
أيوه.. أنا مراته. بقالى أربع شهور محبوسة هنا، وأم أحمد هي اللي حابساني!
حاولت أستوعب كلامها، لكن كان عندي سؤال واحد أهم من كل حاجة:طب وإنتي محبوسة جوه الحيطة دي إزاي؟ وليه أحمد سايبك هنا؟!
بصت وراها بخوف، وبعدها قالتلي جملة خلت الدم ينشف في عروقي:
اسمعيني كويس يا سلمى.. أحمد مش هو اللي بيبات عند أمه كل ليلة زي ما إنتي فاكرة..وأمه مش لوحدها في الأوضة!
وقبل ما أقدر أسألها تقصد إيه..سمعت صوت المفتاح بيتحرك في باب أوضتي!
وبعدها صوت حماتي من بره: سلمى.. إنتي بتعملي إيه جوه؟ افتحي الباب!
لبنى مسكت إيدي بقوة، وبصتلي بعينين مليانين رعب وهمست: أوعي تفتحي لها.. لو عرفت إنك شفتيـني، هتعمل فيكي زي ما عملت فيا!.. يتبع
