رواية من قتل سهير الرقاصة الفصل الأول بقلم ياسر عوده
انا اتعلمت من الشغلانه بتعتي ان في بعض الكلمات لو اتكتبت في أي موضوع، وقتها تتأكد ان الموضوع داه يبقى ترند، ايوه زي ما بقولكم كده، ودي عن تجربه شخصيه مش أي كلام وخلاص، ومن ضمن الكلمات اللى بترفع أي موضوع للترند كلمه رقاصه، يعني لو كتبت أي موضوع متعلق بـ أي رقاصه وقتها هتلاقي الناس كلها مهتمه تعرف التفاصيل، وعلشان كده كل واحد من الصحفيين اللى بيشتغلوا في مجال الحوادث والجريمه لو سمع اسم رقاصه في أي جريمه، وقتها بيبقى متأكد ان داه يبقى الترند وخبر الموسم، ودا اللى حصل معايا بالظبط.
انا كنت قاعد في مكتبي في الجريده اللى انا شغال فيها، اسمي حسام وشغال صحفي في قسم الحوادث والجريمه، وبقالي فتره مالقتش جريمه من النوع التقيل، معظم الجرايم اليومين دوول بتتكلم عن الخيانه الزوجيه وكلها بقت شبه بعض، وفجأه جالي اتصال، ولما رديت على الاتصال لقيت واحد صحبي من جريده تانيه، شغال في قسم الفن واللى كل اخباره عباره عن فضائح واعمال الفنانين، لما اتصل عليا رديت عليه وقولتله:
-اخبارك ايه يا احمد، عاش من سمع صوتك، ايه فكرك بيا؟
-انا بتصل بيك مع انك قليل الاصل ومش بتسأل عني علشان عندي خبر ليك بـ مليون جنيه.
-يا راجل، طيب اقولك بلاش تقولي الخبر وهات المليون جنيه احسن.
-يا عم بضل رخامه، اسمعني كويس في جريمه قتل حصلت.
-فين دي، بس قولي الاول من امتي وانت مهتم بجرايم القتل اساسا.
-مش مهتم ولا حاجه، كل الحكايه ان المجني عليها وحدها ليها علاقه بالوسط الفني، وطبعا انا عرفت فقولت اعرفك علشان تاخد السبق الصحفي دا اهو انت اولى من الغريب.
-والله كتر خيرك، بس قبل ما اسمع التفاصيل، عندي سؤال بيلح عليا.
-اسأل واخلص.
-انت ليه مابلغتش أي حد من زمايلك في قسم الجريمه في الجريده اللى انت شغال فيها؟
-اتصدق يا حسام انت فقري ووش فقر، بدل ما تشكرني تقولي ليه ماقولتش لـ زمايلك في الجريده.
-انا بفهم بس مش اكتر يا احمد.
-طيب هفهمك، بصراحه الشخص اللى ماسك عندنا قسم الجريمه مابينزليش من زور، وعلشان كده انا استخسرت فيه الخبر ده، اصله هيبقى ترند.
-تمام قولي بقى مين المجني عليها؟
-اسمها الرقاصه سهير المنسي، معروفه جدا في الهرم ومعظم الكبريهات تعرفها كويس.
-انت بتقول رقاصه؟
-ايوه رقاصه، مش بقولك خبر هيبقى ترند لمده اسبوع على الاقل.
-عندك حق، قولي العنوان فين بسرعه.
-طيب اكتب عندك العنوان.
وفعلا خدت من احمد العنوان، كانت عايشه في وحده من العمارات الفاخمه في وسط البلد، ورغم ان العماره قديمه بس باين عليها الفخامه، حاجه كده من التراث القديم بتاع زمان، المهم اول لما روحت هناك منعني عسكري واقف على باب العماره وقالي:
-على فين يا استاذ؟
-هو ايه اللى بيحصل هنا؟
-مالكش دعوه، عرفني انت رايح فين؟
-انا واحد من الناس اللى ساكنه في العماره وعاوز اطلع شقتي.
بصلي كده من فوق لـ تحت وزي ما يكون بيعايني، بيشوفني انفع اعيش في عماره زي دي ولا لا، وبعدها قالي:
-ساكن في الدور الكام؟
رديت عليه بشكل تلقائي:
-الدور السادس.
-طيب اطلع على شقتك على طول.
وسابني وطلعت فعلا، بس طلعت للشقه اللى كانت عايشه فيها الرقاصه، وطبعا كنت عرفت من احمد هي كانت ساكنه في الدور الكام.
واول لما طلعت دخلت الشقه، كان فيها ناس كتير ما بين شرطه ونيابه وفريق معمل جنائي وطب شرعي، ودخلت من غير ما أي حد يسألني انت هنا بتعمل ايه، وكنت عمال اصور المكان بالتليفون بتاعي من غير ما أي شخص ينتبه ليا، لغايه لما وقفت في مكان لقيت فيه وكيل النيابه بيحقق في اللى حصل، وكان بيستجوب واحد وبيقوله:
-انت اللى بلغت عن الجريمه؟
-ايوه يا باشا انا.
-اسمك وسنك ووظفتك؟
-اسمي عوض، عندي 52 سنه، وشغال حارس في العماره دي.
-تمام يا عوض، قولي ايه اللى حصل بالظبط وازاي اكتشفت الجريمه.
-الست سهير الله يرحمها كانت متعوده كل يوم الصبح تنادي عليا علشان اجبلها مراتي تدخل عندها تنضف الشقه وتعمل الاكل قبل ما هي تخرج على شغلها.
-هي كانت بتطلب مراتك امتي كده؟
-كل يوم يا باشا، من ساعه لما هي تصحي بعد الضهر كده، اما تتنادي عليا او تتصل عليا وتطلب اني اطلع مراتي علشان تلحق تنضف الشقه قبل ما هي تروح شغلها على الساعه 6 المغرب كده.
-وهي كانت بتسيب مراتك في الشقه وتروح الشغل ولا بتعمل ايه؟
-لا يا باشا هي عمرها ما سبتها في الشقه، بتفضل موجوده لغايه لما مراتي بتخلص التنضيف وكمان الطبيخ، وبعدها مراتي بتنزل من عندها قبل ما المرحومه تروح شغلها.
-مراتك اسمها ايه؟
-اسمها غاليه يا باشا.
-وفين غاليه؟
-مسافره للبلد بقالها 3 ايام.
-تمام، ابعت هتها من البلد وتجيلي النيابه.
-ليه يا باشا مراتي ماكنتش هنا اصلا.
-ابعت هتها بدل ما نجبها احنا بمعرفتنا.-حاضر يا باشا.
-كملي بقى ايه اللى حصل، ازاي اكتشفت الجريمه؟
-حاضر، المرحومه بقالها يومين مش بتبان خالص، بس انا كنت بقول انها اكيد مش محتجاني علشان عارفه ان مراتي مسافره واكيد مش هتتصل عليا، بس النهارده وانا طالع اقفل باب الاسانسير اللى كان معلق في الدور اللى فوق شقه المرحومه، انتبهت ان في ريحه مش كويسه طالعه من الشقه، في الاول قولت دا اكيد بسبب ان مراتي مش بتروح تنضف عندها علشان مسافره، بس بعد ما فكرت شويه قولت لا مستحيل مش للدرجادي، دوول لو حتي رمين لحمه نايه بره التلاجه وفسدت مش هتعمل الريحه دي، وفي الحقيقه في البدايه قولت لنفسي لو خبطت عليها بسبب الريحه هتسمعني كلام زي السم، وعملت نفسي مش واخد بالي ومشيت، بس بعد ساعه كلمني اكتر من واحد من سكان العماره عن الريحه العفشه اللى ملت العماره كلها، وطالبوني اشوف ايه حكايه الريحه دي واتصرف، ووقتها كنت لازم اجي لشقه المرحومه علشان اخبط عليها واقولها ان السكان بيشتكوا من الريحه اللى طالعه من عندها.
-تمام يا عوض، وجيت وخبط ايه اللى حصل.
-مافيش يا باشا، انا فضلت اخبط فتره طويله اوي بس مافيش حد رد عليا، لا المرحومه ردت ولا حتي جوزها رد.
-هي متجوزه؟
-طبعا يا باشا، الست سهير كانت متجوزه من الاستاذ رمزي.
-وهو فين رمزي؟
-علمي علمك يا باشا.
وقتها وكيل النيابه بص نحيه ضابط من ضباط الشرطه وقاله:
-فين رمزي زوج المجني عليها؟
-لغايه دلوقتي ماقدرناش نوصله يا باشا، احنا ابتدينا نتحري عنه ونحاول نعرف هو فين.
-لازم توصلوله، ومدام مختفي يبقى هيبقى من ضمن المتهمين.
-حاضر يا فندم.
وبص وكيل النيابه مره تانيه للحارس عوض وقاله:
-كملي ايه اللى حصل بعد كده؟
-انا فضلت اخبط عليها لغايه لما واحد من السكان جالي على صوت الخبط وقالي:
-في ايه يا عوض، مالك عامل ازعاج ليه.
-بخبط على مدام سهير يا باشا ومش بترد، والريحه طالعه من عندها وباقي السكان بيشتكوا من الريحه دي.
-هي الريحه اللى قرفانا دي من عندها؟، بس الموضوع كده مايريحش يا عوض، انت ماعكش مفتاح احتياطي لباب شقتها؟
-لا طبعا وهي الست سهير هتديني نسخه من المفتاح بتاعها بأماره ايه.
-طيب خلاص اتصل على الشرطه.
-اتصل ليه؟
-قدر في مصيبه جوه، الريحه دي ممكن تكون ريحه جثه.
-جثه ايه يا استاذ الله يسترها علينا وعليك، ايه الكلام اللى انت بتقوله ده.
-اسمع الكلام يا عوض بلغ الشرطه، الموضوع فيه مسئوليه عليك.
وقالي الكلام ده ومشي، ومن ساعه لما قالي كده وبطني وجعتني اوي يا باشا، وبعد ما قعدت افكر خوفت كلامه يبقى صح، وساعتها هيجوا علي الغلبان اللى زيي وهيشيلوه المسئوليه، وعلشان كده قررت اتصل على الشرطه واتصلت عليكم.
-تمام يا عوض، دلوقتي انت هتخليك على جنب لغايه لما نحتاجك مره تانيه.
-انتم هتحقوا معايا تاني يا باشا؟
-احنا لسه بنقول يا هادي.
