رواية غرفة السطوح الفصل الأول بقلم شهيرة عبدالحميد
من فترة كده اتقدملي شخص صالونات جاي عن طريق صحبتي المُقربة، قالت لي أنه شاب محترم وخلوق وجارهم في المنطقة وتضمنه جدًا جدًا.
وافقت من ثقتي في صحبتي وقبلت بأنه يتقدملي واشوفه ولو في رؤية شرعية بس، وفعلًا كان إنسان مُهذب جدًا وخجول ومُتعلم وفيه كل الصفات اللي تتمناها أي بنت زي ما قالت صحبتي بالظبط.
حتى ملامحه بالنسبالي كانت مقبولة جدًا ويمكن أحلى مني كمان في الشكل، من اللحظة الأولى اللي شوفته فيها وأنا بدعي ربنا يكتبهولي وتتم على خير، خصوصًا أن أي عريس بيتقدملي مبيرجعش تاني!
بابا وماما لما قعدوا معاه يتفقوا على الشبكة والمهر والحاجات دي، اكتشفوا أن حالته المادية صعبة جدًا، ولسه يعتبر تحت الصفر وبيبدأ.
سألوه عن شقته قال أنه مأجر شقة فوق السطوح وهيبدأ فيها حياته لحد ما ربنا يكرمه، وللأسف باظ الموضوع كالعادة.
حزنت جدًا عليه.
شئ جوايا مخليني متقبلة كل شيء، حتى وضعه المادي والاجتماعي ومش فارقلي غيره هو وخلاص.
وتاني يوم لقيت رسالة منه على تليفوني بيقولي "صباح الخير يا آنسة شمس، آسف جداً اني طلبت رقمك من مديحة زميلتك، أنا بس عايز أسألك سؤال واحد وتجاوبيني بصراحة ممكن؟".
قلبي دق بشدة من الفرح، خصوصًا إني طول الليل نايمة ببكي وبفكر فيه، وقولتله "اكيد اتفضل يا أستاذ حازم".
مفيش ثواني وكان اونلاين وشاف رسالتي وقالي "هو أنا شخص وحش للدرجادي علشان اترفض؟ يعني كل ما هتقدم لبنت هترفضني علشان الفلوس؟".
كلامه أثر فيها وقولتله "بالعكس يا استاذ حازم، أنت متترفضش نهائي، أنا حتى معترضة على رفض أهلي وزعلت منهم لأن فعلاً ده مش عيب ارفضلك علشانه.. كمان أنا أول مرة ارتاح لشخص كده".
حاولت اعبرله عن الـ حساه تجاهه، وفاجئني بجملة أثرها ثابت جوايا وقالي "أنا لو كنت أملك الدنيا يا شمس، كنت جبتلك حتى الشمس.. لكن ما باليد حيلة".
شخص زي ده ازاي ميكونش من نصيبي؟ ليه يترفض وليه استسلم بسهولة كده!
الكلام جاب بعضه، واليوم جر اتنين ولقيت نفسي مش قادرة استغنى عن وجود حازم في حياتي خلاص.
حاولت مع أهلي اني افتح معاهم الموضوع تاني، لكن الرفض كان قرار نهائي وممنوع النقاش فيه.
عمري 28 سنة، والـ أصغر مني اتجوزوا واختاروا حياتهم، مقدرتش اسيطر على إحساسي بالهرب وفي يوم سيبت لأهلي جواب كتبتلهم "أنا اسفة ليكوا، لكن دي حياتي وأنا اللي هعيشها مش انتوا".
وروحت لحازم اوضته على السطوح.
حازم اللي فتحلي الباب وهو متنح ومش فاهم أنا إزاي موجودة قدامه، وازاي بعت أهلي ودنيتي لأجل حياته البسيطة اللي مفيهاش أي شئ مبهر غيره.
اول حاجة قولتهاله "لو بتحبني يا حازم أنزل معايا دلوقتي أكتب عليا واتجوزني، وانا مش عايزة حد من الدنيا غيرك، مستعد تشتريني زي ما اشتريتك؟".
كان واضح أنه مصدوم ومبسوط في نفس الوقت، مش مصدق نفسه وقالي "شمس انتي بتتكلمي بجد؟ تتجوزيني أنا ".
قولتله "ايوا انت، هتتجوزني ولا امشي؟".
اتهورنا ونزلنا عند أقرب مأذون كتبنا الكتاب، ورجعت معاه لغرفة السطوح اللي نويت من جوايا أنها تكون جنة، والـ اعترضوا عليه أهلي يكون هو ميزة جوازي.
ماكنتش أعرف أني هعيش اصعب أيام حياتي.
ريحة الغرفة مش أحسن حاجة، وده أمر طبيعي لشاب عازب عايش لوحده مبيعرفش ينضف كويس، قولت إني تاني يوم هنضفها وارجعها احسن من أي قصر.
مع أول ليلة بليل سمعت صوت بكاء طفل شديد، بكاء مستمر كأن أم بتعذب ضناها.
حازم كان نايم، سحبت جاكيت حازم وقومت خرجت برا ملقتش حاجة نهائي.
السطوح فاضي وصوت البكاء اختفى!
رجعت الأوضة والصوت بيقرب مني وبيشتغل من تاني، وكل ما افتح باب الاوضة الصوت يهرب مني؟
حازم قام على صوت فتح الباب وقالي "شمس بتعملي ايه؟".
رجعت جنبه وقولتله "مفيش.. قلقت بس شوية".
الصبح نزل حازم وهو بيقولي "ادعيلي يا شمس، لو اتقبلت في الشركة دي أنا هخليكي اسعد واحدة في العالم".
ودعته على الباب وقفلت وراه.
مجرد ما قفلت الباب سمعت الـ بيقول "ممم.. مااااه.. ماماااه".
طفل بيحاول ينطق كلمة ماما!
فتحت بسرعة جدًا لقيت العربية دي وجواها العروسة المرعبة دي!؟
اتفزعت من منظرها، وخرجت اشوف حد موجود على السطوح مثلًا طفل بيلعب ولا حد نسيها، لكن مفيش حد نهائي غيري.
العجيب كله إني لسه قافلة الباب ورا حازم والعربية دي ماكنتش موجودة هنا، وليه واقفة قدام بابي أنا ؟؟
قربت منها وجسمي بيتحرك بصعوبة من الخوف متجمد، حاولت أمسكها لكن على عكس ما توقعت انها بلاستيك عادية، حسيت أنها طرية! تشبه جسم الأطفال بجد مش دمية قديمة فيها مسامير.
قلبي اتنفض، ودقاته بتزيد، زي ما يكون العروسة دي بتبص عليا من جميع الإتجاهات.
خدت العربية زي ما هي كده، وحطيتها ناحية السلم يمكن حد يطلع ياخدها وتبعد عني، ورجعت لاوضتي.
سمعت صوت خربشة على الباب.
بقيت متأكدة أن في حاجة غلط، وأكيد لو فتحت مش هلاقي حاجة كالعادة، فقررت مفتحش الباب مهما حصل.
رجع صوت الطفل يقول "مااااههــهه، ماااامممــهه"، مقدرتش أفتح بردو، قعدت ورا الباب وفضلت أبكي لحد ما غيبت في النوم، وصحيت على صوت حازم من برا وهو بيخبط بقوة وبيقولي "شمس افتحي، انتي كويسة".
فتحتله الباب وأول ما شوفته فضلت أبكي واترعش واقوله "متسبنيش لوحدي هنا يا حازم، المكان ده مخيف أوي".
طبطب عليا وحاول يهديني وقالي "شمس انتي عايزة تسبيني؟ من أول ليلة يحصلك كل ده وتضعفي أوي كده، متسبنيش ارجوكِ أنا محدش اتمسك بيا قدك".
حازم مش فاهم حاجة من الـ بتحصلي، ومش عارفة لو قولتله هيقول عليا طفلة وجبانة و لا يُعتمد عليا ولا هيفهمني؟
لكن على ايهً حال مقدرتش احكيله وقولتله أن المكان جديد عليا وعلشان كده محتاجة وقت اتأقلم فيه.
حازم وعدني أنه هيفضل صاحي جنبي طول الليل لحد ما يتأكد إني نمت، وبعدين هينام هو، المهم مش هيسبني لحظة تاني لحد ما اتطمن.
وتاني يوم صحيت لقيته نايم جنبي.
الساعة كانت اتنين الضهر، صحيته بشويش وقولتله "حازم مش هتنزل شغلك؟ الساعة اتنين".
قام بكسل يفرك عينه وقالي "مفيش شغل يا شمس، امبارح متقبلتش في حاجة و النهاردة كان عندي ميعاد انترفيو لكن محبتش اسيبك لوحدك".
ولا مرة شكيت أن اختياري في حازم كان غلط، برغم كل الـ بيحصل، لكن أنا بعتبرها أجمل أيام حياتي وببني طوبة طوبة في رحلة عيالنا واحفادنا هيتحاكوا عنها.
يومًا ما هيقولوا تيتا بنت الناس الأكابر، باعت الدنيا علشان جدو الفقير والـ قدر في وقت قليل يكون من أشهر مهندسين الوطن العربي.
حبيت اليوم يكون مميز بما أن حازم قاعد معايا، وقولتله ينزل يجيب شوية خضار علشان اجهزله أول أكلة من صنع أيديا.
واتصدمت لما قالي أنه مبيعرفش يشتري خضار وطول عمره عايش على الفول والفلافل أو علب الكشري، وبرغم أني يعتبر زيه بالظبط ومعنديش أي خبرة في الأسواق، قررت أنزل واعتمد على نفسي زي كل زوجة مسؤولة عن بيتها.
لبست هدومي اللي جيت بيها والـ معنديش غيرها، وانتظرت حازم يديني فلوس انزل بيها، لكن تقريبًا كان ناسي، ومقدرتش أطلب منه، كل الـ كان بيقوله حازم "شمس متتأخريش عليا، ما بلاش تنزلي طيب ونجيب اي حاجة".
متأكدة أن حازم بيخاف عليا وبيحبني يمكن اكتر ما حبيته، لكني صممت ونزلت بالـفلوس الـ معايا، سألت عن مكان السوق كان في الشارع الـ ورانا مش بعيد، اشتريت حاجات بسيطة ورجعت.
وأنا على السلم سمعت نفس صوت بكاء الطفل، جاي من السطوح فوق!
قلبي وقع في رجليا، خوفت على حازم معرفش ليه، وجريت السلم بسرعة والشنط بتقع مني من الارتباك والتوتر.
أول ما طلعت لقيت حازم قاعد على السطح وماسك نفس العروسة اللعبة الـ خوفت منها!
قربت منه بخوف وقولتله "دي دي بتاعتك يا حازم".
كان مستغرب أسلوبي ورعشة أيدي قدامه، وقالي "مالك يا شمس في ايه؟ دي لقيتها محطوطة هنا معرفش بتاعت مين هتلاقي حد من الجيران نسيها".
حاولت ابان هادية علشان ميقلقش من تصرفاتي، وقالي بابتسامة "ياااه يا شمس لو أشيل ابني منك قريب كده، اعتقد أنا وقتها مش عايز حاجة تاني من الدنيا دي، هتكوني حلوة اوي يا شمس وانتي أم وشايلة ابنك بين ايديكي كده بتهدهديه".
ناولني العروسة، مسكتها منه ولاحظت أنها المرادي بلاستيك ناشف غير اول مرة لمستها فيها!
اصطنعت ابتسامة على وشي بصعوبة وقولتله "بإذن الله يا حبيبي قريب، يلا نسيبها مكانها بقا بدل ما صاحبها يجي ويفتكرنا عيال وبنلعب بيها ".
لاحظ حازم أن شنط الخضار فاضية في أيدي وقالي "انتي مجبتيش حاجة؟".
بصيت بحرج على الشنط الـ اتقطعت ووقع كل الـ فيها وقولتله "أنا بقول ناكل فول وفلافل بردو أحسن ".
مر الموقف بينا ونزل حازم علشان يجيب الغدا.
ومجرد ما نزل سمعت صوت اقدام بتطلع على السلم؟ لكن أقدام بتدب جامد مش خطوات خفيفة.
وخيال شخص وقف قدام الاوضة ورايح جاي، ضله ظاهرلي من تحت الباب.
خدت نفس عميق ومسكت خشبة وفتحت الباب بسرعة، لقيت ست مليانة وكبيرة في السن بتقولي بخوف "اعوذ بالله أنصرفي أنصرفي".
رميت العصاية من أيدي وقولتلها بحرج "أنا اسفة جداً، بس حضرتك اللي خوفتيني بحركتك قدام الباب، طب كنتي خبطي ولا اديني حس".
الست كانت بتبعد بخوف وبتقولي "انتي مش عفريته؟ لا تأذيني ولا أءذيكي".
ضحكت على أسلوبها وقولتلها "عفريتة ايه بس يا طنط مانا بكلمك أهو، بعدين في عفريته تلبس كاجوال كده".
بصت على جسمي من فوق لتحت وقالتلي "انتي إيه الـ مقعدك هنا، وجيتي هنا إزاي".
ردة فعل طبيعية من الست لما تشوف واحدة في غرفة الشاب المستأجر عندها، خصوصًا أن جوازي أنا وحازم حصل بسرعة غير عادية، وقولتلها "أنا مرات المهندس حازم".
ملامح الست كانت بتدل أنها مش مصدقاني، وكملت وقولتلها " متستغربيش، هو فعلا الموضوع حصل بسرعة، لكن نصيب بقا الحمد لله".
لقيتها فجأة بتضرب كف على كف وبتقولي "يابنتي حازم مين مفيش حد ساكن هنا من زمن الزمن، الاوضة دي مقفولة على أسرارها انتي بتهببي ايه هنا، امشي يابنتي انفدي بجلدك، اعوذ بالله، اعوذ بالله".
سابتني ونزلت وانا فضلت واقفة مكاني مبتحركش!
لو الاوضة دي مفيهاش سُكان اومال أنا عايشة مع مين؟
عقلي وقف للحظات كده مش قادرة أفهم شيء، كأني مضروبة على دماغي بحجر حديد مأثر عليا.
حازم طلع في نفس اللحظة وهو بيقولي "شمس حببتي واقفة كده ؟ الست دي زعلتك ولا إيه.. شمس مبترديش ليه مالك يا ماما حصل إيه"
كل ده وأنا متنحة، وبشاورله على الست وبقوله "دي دي.. دي بتقولي مفيش سُكان هنا.. ومفيش حازم".
حازم ملاحظ صدمتي، وفتح ازازة ماية رش منها على وشي وقالي "حبيبة قلبي فوقي ارجوكي.. حصل ايه فهميني براحة، أنا كل ما أنزل يحصلك حاجة يا شمس " .
فوقت شوية وقعدت جنبه قولتله "الست دي قالتلي كلام غريب يا حازم، بتقولي أن الاوضة دي مقفولة على أسرارها وكلام مرعب كده مش فاهمة حاجة".
حازم حط أيده على وشه بحزن وقالي "منهم لله كلهم، بجد الناس بقت بشعة يا شمس، دي صاحبة البيت وعايزة تطفشني اكمني مش منتظم في الايجار معاها غصب عني، واستغلت اني نزلت وطلعت علشان تخوفك مني وتخرب حياتي، وانتي يا شمس بكل سهولة بتصدقي اي حاجة كده، للدرجادي ممكن تسبيني وتصدقيهم؟".
فهمت دلوقتي الـ بيحصل، وفهمت قد إيه حازم مضغوط من كل شئ، ولأن المواقف بتاعت العروسة مأثرة عليا، فدمجتها كمان بحازم والست.
اعتذرتله على سوء ظني وخوفي منه، وقعدنا اتغدينا سوا ولفينا علينا بطانية خفيفة لكن مقضية الغرض، وقعدنا تحتها زي الخيمة ندردش ونتكلم عن ماضينا واحلامنا وكلام عشوائي كتير مبينتهيش.
قد إيه الحياة حلوة بوجود الـ زي حازم، وقد إيه خفيفة وهينة رغم عدم وجود الأموال والنفوذ.
لو كنت اتجوزت شخص أغنى مني بمراحل، معتقدش إني كنت هعيش السعادة الحقيقية دي كلها.
اموال الدنيا كلها متشتريش راجل حنين وطموح ومتسامح، بيحب يسمعك وبيعشق عيوبك قبل مميزاتك.
نظرة اهلي السطحية هي الـ وصلتني لكل ده، وصلتني إني دلوقتي في وضع ونظرة سيئة من كل الـ حواليا ومحدش بيصدق اني اتجوزت بالسرعة دي.
سألني حازم وسط الكلام "انتي ممكن تسبيني يا شمس لو في يوم اشتاقتي لأهلك؟ ممكن تتعبي من الحياة معايا وتملي؟".
رديت وقولتله بكل حب "إزاي شخص زيك يتساب يا حازم، انت يتسابلك الدنيا مش تتساب".
مسك أيدي الاتنين وقالي "اتمني أمنية يلا قبل النوم، وكل يوم قبل النوم هنعمل فقرة كده نقول فيها أمنياتنا واحلامنا علشان لما تتحقق، نتجمع تحت نفس البطانية دي ونقول لقد فعلناها ونحكي عن رحلة الوصول".
غمضت عيني لحظة كده وقولتله "نفسي اشوف أهلك يا حازم، هما فين".
حازم ساب أيدي فجأة بغضب وقالي "ليه كده يا شمس، ليه أنا كنت كويس".
واضح اني فكرته بذكرى سيئة، اعتذرت وقولتله "اسفة والله مش قصدي، أنا معرفش اي حاجة عنك يا حازم وقولت من ضمن الدردشة يعني".
نبرة صوت حازم كانت مكتومة، كأنه هيبكي وقالي "ممكن تغيري الموضوع لو سمحتي".
حزنت إني وصلته للمرحلة دي، وغيرت الموضوع بسرعة بشوية كلام عشوائي ملوش أي لازمة، لحد ما اتاكدت أنه نسي الـ حصل، وخلاص احنا الاتنين بننام.
تقريبًا أنا سبقته في النوم ومحستش بحاجة خالص ونمت نوم عمييييق، كله كوابيس ومشاهد غير مفهومة.
صحيت بعد حوالي ساعتين مخضوضة وبدور على حازم جنبي ملقتوش!!؟؟ شوفت تليفوني الساعة كانت تلاتة الفجر.
قومت انادي "حازم أنت فين؟ حازم".
سمعت صوت بكى جاي من برا السطوح!!؟؟ فتحت الباب حتة صغيرة، ولقيت حازم منكمش في نفسه وحاضن العروسة المرعبة وقاعد بيبكي؟؟!.
