رواية حكايتي مع القدر الفصل الأول بقلم جلنار حسين
المكان :- في إحدى محافظات العراق الجنوبية
الزمان :- عام ١٩٩٢م - ساعة السادسة صباحاً.
حنين : فتحت عيني ببطء باوعت للشباك ولنّها الدنيا هستوها بدا يطرّ الفجر بيها ونور الصبح ينزل بالتدريج..
تذكرت عندي امتحان، كمت شغلت الأضوية وباوعت للساعة بالحايط جانت ب6:00 ضبط، مطيت جسمي بكسل ثگيل، وبعده النوم يداعب عيوني، وشعري منكوش ومبهذل من فراش الليل، سحبت ملابسي وحضرتهن وخليتهن گبالي، وطلعت للطارمة...
أول ما فتحت الباب استقبلتني برودة الجو المالي المكان هبة هواء صبحية تصك بالعظم صك! مشيت خطوتي بكسل كملت الطريق للمغسلة، ولنهم كلهم متجمعين هناك سرة وكلها جاي تغسل وتتهيأ ليومها، باوعت الهم وگلت بتملل وطاقة خربانة :
حنين :- شنو القصة كلها منا؟
ردت عليه أختي بنبرة حنونة:
إخلاص :- روحي حبيبتي نامي وارتاحي هسة جعفر راح يغسل وراها ميثم وراها سهير وراهم اني..
تنهدت وگلت بخيبة أمل :-
حنين :- مضطرة اكمل بين ماتكملون، وبعد انتظار وأخيراً وصل السرة إلي!
غسلت وجهي بذاك الماي البارد اللي طير كل الكسل والخمول وصحاني تماماً...
دخلت للمطبخ أحضر الريوگ اليوم جان دوري والبيت كله عامر بعادة أبوي الغالي اللي ما يغيرها أبد، يكعد من الفجر ويشغل سورة البقرة بصوت الشيخ "عبد الباسط "، صوت ينسكب على الروح بالسكينة ويشرح النفس، يخلي أركان البيت كلها تتنفس طمأنينة.
امتزجت تلاوة القرآن الدافية ويا ريحة الصوبة النفطية وهي تسحب بروده الجو وتوزع دفئها بكل زوايا البيت
جانت الصوبة مشتعلة بهدوء، وريحة النفط المحببة تتداخل ويا ريحة الخبز الحار والجاي المخدر على حرارتها الهادية، وينحط على راسها قوري الجاي وقوري الماي الخدران حتى يطلع منه بخار يملي المطبخ بالدفء..
بلشت أحضر الريوگ، وسويت بيض وجاي مهيل ، ويا خبز حار طالع من التنور لأن أمي هستوها خبزته وفايحة ريحته بالمطبخ.
وقبل لا نمد إيدنا للريوگ ونطلع، جان اكو قانون وقواعد عودتنا عليها أمي وأحنا صغار.. لازم كل واحد بينا يشرب حليب حار يدفي جسمه الصغيروني ويدفّي عظامنا ببرودة الصبح، يلا بعدها نتريگ.
تجمعنا كلنا منتظرين ابوي يجي على السفرة
الحاج لطيف :- بابتسامة حنونة صبحكم الله بالخير
كاظمية :- صباح الخير والعافية حجي
الحاج لطيف :- يلة بوية حنين جيبي الخبز حتى نتريگ هم يالله افتح المحل ويترزق على باب الله.
حنين :- صار يابة، وهاي الخبز الحار لحبيب گلبي ابوي الغالي،
الحاج لطيف:- فدوة ل ايدج حنونة.
حنين :- تدلل يابه، سمينا بسم الله وبلشنا نتريگ، وأني بلشت اصبلهم جاي، كمل ابوي الريوگ وكام غسل واجة يدعي النا بكل الخير والتوفيق، وطلع لدكانة الي فاتحينا من البيت، يفتح بابه على باب الله ويترزق..
بعد ما كملنا، رجعت للغرفة وگعدت گبال المراية.. سحبت المشط وبديت أمشط شعري بهدوء، وضفرته ضفيرتين مرتبات وخليت بيهن شريط أحمر ناصع، وسحبت الجواريب الي بيهم الكشكش الناعم لبستهن.
وطلعت لمدرستي اتمشى واراجع امتحاني، وصلت لمدرستي جانت امتحانات نصف السنة الدراسية واليوم الامتحان ماقبل الاخير، دخلت القاعة الامتحانية والعرگ يجري من كصتي رغم الجو شتاء وبارد، گلبي يدك بسرعة والم المغص ذبحني الخوف يقرة الف عندي،
هاي عادتي قبل كل امتحان لازم اتوتر واخاف وارتبك واليوم مو اي امتحان اليوم امتحان رياضيات واني خايفه من الهندسة لان ماضابطتها مثل الجبر،
مشيت خطواتي من بين الطالبات لحتى اوصل لمكاني بالرحلة القاعة كلش باردة واني لابسة جاكيت مو دافي ابد احس جسمي خشب من البرد كمت امسح ايديه بحرارة واني اراجع الي يجي على بالي قبل لايبلش امتحاني.
ندستني صديقتي نسرين وهي تكول :
نسرين :- حنين حافظة لو لا؟
حنين :- ماضابطة الهندسة كلش صعبة ومافهمتها، بس جبر مضبطته بلكي نكدر نجاوب ان شاء الله.
نسرين :- ان شاء الله يروحي، إذا احتاجيتي مساعدة بلغيني تمام؟
حنين :- تمام
صاحت المدرسة :- بلا كلام الدفاتر راح تتوزع الي اسمعلها نفس يتأشر على دفترها بالأحمر وتنطرد بلا صوت مفهوم؟
حنين :- عم الهدوء بالقاعة فقط صوت دگات الگلب تنسمع وتوتر الطالبات، توزعت دفاتر الأمتحان كتبنا اسمائنا ولصقناها بلاصق تحطة ع طوية الدفتر بالجانب الي بي الأسم ينلزك بقدرة قادر مااعرف شلون.
بلشت احل الي اعرفة واتذكر الي شرحته الي صديقتي نسرين تركت الهندسة للأخير وبلشت بالجبر حتى احل براحتي، فرغت القاعة سلمت دفتري للمدرسة وطلعت لكيت صديقاتي نسرين و ياسمين منتظراتني رحت عليهم واول ماوصلت نثنيهم سألوني نفس السؤال..
نسرين :- ها بشري جاوبتي؟؟
ياسمين :- شلون جانت الأسئلة؟ جاوبتي؟
حنين :- الحمدلله كدرت اجاوب الي اعرفله بس خايفه من الهندسة لان جوابي مو هلكد بس الي ذكرتة من شرح نسرين كتبته، أن شاء الله ننجح ومايضيع تعبنا.
نسرين :- ان شاء الله يروحي لاتخافين خليج سباعية أنتِ درستي وتعبتي ان شاء الله مايضيع تعبج
ياسمين :- نسرين ماحفظتي طبع حنين دائماً قلقة وتخاف هسة راح تبقى تفكر بالرياضيات منا لمن نستلم النتائج اله ترتاح
نسرين :- صراحة اني هم خايفه لان الاسئله جانت دقيقه بشكل وتعرفن ست سوسن شكد اسئلتها دقيقه بس نكول عسى ولعل نجيب درجات نجاح زينة
حنين :- ان شاء الله مايضيع تعبنا وسهرنا، يلا بنات خل نرجع للبيت تأخرنا ورانا بعد امتحان كيمياء
نسرين :- لازم ندرس للكيمياء بتركيز أكثر، لان ست اناهيد اسألتها صعبه نار، بنات شنو رأيكم نجمع وندرس سوة مو احسن؟؟
ياسمين :- طبعاً احسن، هيج نگدر نسيطر على المادة أكثر وهم نستفاد من معلومات بعض، شنو رأيكم تجون يمي بنات
نسرين :- حبيبتي ب ٤ اجيج اني، وانتِ حنين بيش الساعة تجين
حنين :- مااعرف إذا كدرت راح اجي، يلة بنات وصلت لبيتنا اشوفكم باجر مع السلامة
نسرين وياسمين :- مع السلامة حبيبتي مو متجين
حنين :- ان شاء الله
وصلت للبيت بخطوات ثقيلة سحبت نفسي للغرفة،وبدلت ملابس المدرسة بهدوء يرافقه خمول يكسر العظم، غسلت إيدي ووجهي حتى اصحصح ولمحت أمي وگفت سلمت عليها بنبرة خافته، لكن الرد كان بارد كالعادة، ما بيه ذاك الشوگ ولا الحنية اللي تبرد الگلب، رحت للمطبخ والمكان جان يفوح بريحة الأكل اللي انترك بعد ما الكل خلصوا غداهم وتفرقوا صبيت غداي بصحن صغير ، گعدت وحدي كالعادةآخر الناس تتغدى بالبيت اللگمة ما جان إلها طعم، بلعت اللگمات بس حتى أسد جوعي واسند طولي اللي انهد من الامتحان والدوام
كملت حمدت الله وشكرته على النعمة وفرغت صينيتي التفتت للمغسلة، وهنا يبدي التعب الحقيقي.
طاسات، مواعين، كاسات، وجدور كبار مبقعة بالدهن، منثورة ومكدسة فوگ بعضها كأنها جبل ما يخلص...
وگفت گبال المغسلة، سحبت الإسفنجة والزاهي، وبديت اغسل الماي يشرشر على إيدي وظهري بدى يوجعني وينحني مع كل جدر انظفه
ساعة اتلوى تكسرت من الوگفه أصابعي تجعدت من الماي والزاهي والحرارة تطلع من جسمي من كثر المجهود اغسل الجدور الكبار و اغمض عيوني لحظات أتمنى بس اخلص من المواعين اكرهم اريد اخلص حتى ارتاح ،
بس المواعين ما تخلص.. كل ما اصعد جدر على السنگ الگي جوا كومة اماعين تنتظر دورها وسط صمت البيت وثگل الظهيرة اللي ما يرحم تعبي وأخيراً بعد ساعه من غسل المواعين خلصت هسة أكدر اروح أقره للامتحان.
سحبت جسمي المنهد وسحبت كتاب الكيمياء من الجنطة ، ورحت لأبعد زاوية بالبيت، گعدت على السجادة واستندت على الحايط البارد اللي حاسة برودته تنفذ العظم لميت رجلي لصدري، فتحت الكتاب وسط ذاك الهدوء الشبه خناگ، وبديت أقرأ وأحضر للامتحان جانت عيوني تغشي وتثگل من النعاس والتعب، بس أضغط على نفسي وأثبت كتابي بيدي.. قريت الشرح وتركت المعادلات لنسرين تشرحهم الي..
باوعت للساعة بالحيط، العقارب تمشي ببطء قاتل وكأن الوكت معاند وياي.. جانت الساعة بـ 3:30، وأني أحسي الدقايق منتظرة لـ الساعة بـ 4:00 ضبط گلبي يدق بخوف وقلق مبهم أراجع الكلام براسي ألف مرة قبل لا أنطق بيه شلون أبلغ أمي وأحجي ويا إخواني؟ مجرد التفكير بإن أطلب إذن للطلعة جان يحمل همّ أكبر من الامتحان نفسه كل اللي أريده أروح لبيت صديقتي، أساعدها وتشرح لي اللي فاتنا، نقرأ سوا حتى نسند بعضنا بهاي المادة الصعبة بس ببيتنا الطلعة مو مجرد خطوة للشارع.. الطلعة سين وجيم، ونظرات شك، وقلق يسبق الخطوة قبل لا تنحط على العتبة غمضت عيوني وأني مستندة على الحايط البارد لامة كتابي لصدري وأستجمع شجاعتي المنتظرة ويا دقة الساعة أربعة حتى أگوم وأواجه الخوف وأطلب هذا الحق البسيط
حنين :- يمة اريد اطلب منج طلب صغيروني، و فدوة لگلبج لاترجعيني خايبة
كاظمية :- احجي شتريدين؟ وبدون مقدمات.
باوعتلي بنظرة حادة و هي جاي تلف كبة تمن ، خزرتني وگالت بصوت جاف يگطع السالفة من أصلها:
كاظمية:- وليش ترحين؟ اگعدي بمكانج اقري وانتظري أخوج أيمن يرجع بالليل وهو يشرحلج!
انعصر گلبي من الخوف، بس الحاجة والامتحان الجاي يضغطن على صدري، تقربت منها خطوة وترجيتها بصوت يخنگ بيه البجي :
حنين :- يمة.. انتِ تعرفين أيمن يتأخر يلا يرجع للبيت، وأني باجر عندي امتحان! فدوة يمة ما أتأخر، بس تشرحلي المعادلات المعقدة ورأساً أرجع..وانتِ تعرفين خالة أم نسرين شگد حريصة علينا وتعاملنا حالنا حال بتها، والبيت ما بيه أحد بس نسرين، يعني أمان والله.. لو أعرف أحلهم بوحدي جان ما طلبت أطلع، بس الكيمياء صعبة والمدرسة تجيب الأسئلة من بين الأسطر وأني كوة أجيب درجة النجاح بيها!
سكتت لحظات وهي تباوع لي بنظرة استصغار وعدم اقتناع، بعدها هزت كتفها بنفاذ صبر ودارت وجهها عني وهي تگول ببرود :
كاظمية :- ماشي.. امشي شوفي أبوج، إذا وافق روحي، وإذا گال لا.. تگعدين وتسكتين وتنتظرين أخوج يرجع هو يشرحلج!
حنين :- تمام يمة، رحت ل أبوي جان گاعد بزاويته المحببة بالدكان ، حاط الراديون الزغير يم أذنه، يُفر بالمؤشر بهدوء حتى يلگي صوت أخبار المساء أو تواشيح دافية، تقربت منه بخطوات مترددة، وگفت يمه وقبل لا أنطق بحرف، انتبه لخيالي نزل الراديون من إيده وابتسم لي بذاك الوجه الصافية ملامحه، وگال بصوت دافئ يسبق الخوف اللي بصدري:
الحاج لطيف :- تعالي بنيتي حنين.. خيرج، محتاجة شيء؟
گلت اله بنبرة ترجي ناعمة:
حنين :- بوية حبيبي .. أمي گالتلي أسألك، تقبل أروح لبيت نسرين صديقتي ؟ بس تشرحلي كيمياء لأن باجر عندي امتحان وأخاف أرسُب، وأخوي أيمن يتأخر يلا يرجع..
باوع لي بحنان الدنيا كله، مسح على
رأسي وگال بابتسامة تطمن الگلب:
الحاج لطيف :- ليش لأ بنيتي؟ روحي اقري واستفادي، المهم تنجحين وترفعين رأسي.. بس ديري بالج على روحج، ورأساً ترجعين قبل لا تظلم الدنيا .
طبيت للبيت بلهفة بلغت أمي بموافقة أبوي ومبين من نظراتها موافقة بس بعد أبوي گال اي متكدر تحجي شي طبيت للغرفة عدلت حجابي واخذت كتابي ودفتري وطلعت حتى اروح لبيت نسرين واكفه بالباب وصاحني أبوي بصوتة الدافي :
الحاج لطيف :- حنين... تعالي بنيتي
التفتت اله، مد ايدة بيجب دشداشتة وسحب فلوس حطن بيدي وغمزلي بعطف وحنان يناقض كل القسوة العايشينها بالبيت، گال بصوت ناصي محد يسمعة
الحاج لطيف :-هاج بنيتي هذا مصرف إلج تونسي بيه ويا صديقتج بس ها، مو تجيبين طاري لأحد أو لأمج وإخوانج إني انطيتج فلوس، خليها بيني وبينج
حنين :- صار يابة مااجيب طاري كدام اي أحد، سديت الباب وراي وكملت طريقي واني احجي بيني وبين نفسي واسأل اسأله مالها جواب، ليش أمي هيج قاسية ويانة احنة البنات؟ ليش دائما تردد البنية ماينطاها وجه؟ ليش تفضل اخوانا الولد علينا؟
قبضت إيدي على الفلوس، وحسيت بدفء غريب ينزل على گلبي؛ أبوي جان يدارينا بأسلوبه الخاص، يطينا الأمان الخفي اللي يحمينا من قسوة البيت، وحتى لو جان يخاف من المشاكل، بس حنيته جانت دائماً توصلنا بطريقة تخلينا نحس إحنة مو وحدنا بهالدنيا.
وصلت لبيت صديقتي نسرين ودگيت الباب بخطوات مستعجلة، فتحتلي خالة أم نسرين بوجهها الطيب وابتسامتها الداافية
حنين :-السلام عليكم، شلونج خالة؟ نسرين موجوده؟
ردت علية بحنية وطلبت مني أدخل:
أم نسرين :- وعليكم السلام ورحمة الله وبركاته هلا خلة هلا ومية هلا تفضلي اي موجوده بغرفتها هي وياسمين كاعد يدرسن
أول ما دخلت للغرفة، لگيت نسرين وياسمين ملتمات، الكتب والدفاتر مفروشة بالنص، وهستوهن بلشن بأول معادلة كيميائية على الورقة.
تنفست براحة وگلت لهن وأني ألم أطراف شالي وأعدل وگفتي:
أوف.. الحمد لله گدرتي ألحگ عليجن قبل لا تفوتني المادة!
ابتسمن البنات ورحبن بية، وگعدت وياهم بالنص، ذبيت الخوف والقلق مال البيت ورا ظهري، وبدينا نفتح الكتب ونتساعد بحل المعقد من المواد، بوسط جو مليان إصرار وصحبة طيبة تفتح النفس.
للساعة بـ 6:00 رجعت للبيت، ودخلت للمطبخ أني وأختي إخلاص حتى نسوي العشاء سوينا نواشف تشهي.. كبة باذنجان و بتيتة وطماطة لاجعة. التمت العائلة كلها على السفرة، وجان جو العشاء هادئ ودافئ لمه الجمعة العائلية.
لكن أول ما شلنا السفرة وخلصنا، تبدد ذاك الهدوء وحضر الخوف بجموده.. دخل أخوي الكبير أيمن بنبرته الصارمة ونظرته الحاسمة،
وطلب مني..........
