رواية جيران اخر زمن الفصل الأول بقلم حبيبه منصور
«الجثة لازم تتشرح كويس أوي، وكل التفاصيل تتكتب، تتشرح كويس قبل ما النيابة تعاين الصبح والتقرير يبقى موجود.. مش عايزة غلطة واحدة!»
دي مكنتش جملة في فيلم رعب، دي كانت الجملة اللي الست "أم عبير" سمعتها وودانها مش مصدقة اللي بتسمعه وهي حاطة راسها على باب الشقة اللي قدامها
أم عبير كانت خارجة ترمي كيس الزبالة، لكن أول ما سمعت كلمة «الجثة» رجليها اتسمرت مكانها، والكيس اللي في إيدها وقع على الأرض من غير ما تحس.
قربت ودنها أكتر من الباب.
«والإصابات اللي في منطقة الصدر لازم تتصور قبل ما نبدأ.. ومحدش يلمس أي حاجة غير لما نخلص.»
أم عبير حطت إيدها على بؤها
يا نهار إسود!
هي البنت الجديدة دي دكتورة تجميل ولا فاتحة مخزن جثث في الشقة؟!
وقبل ما تلحق تسمع باقي الكلام، الباب اتفتح فجأة، وظهرت قدامها بنت في أوائل العشرينيات، شعرها ملموم بإهمال، لابسة بنطلون أسود وتشيرت واسع، وفي إيدها موبايل.
بصت لها باستغراب.
– خير يا طنط؟ محتاجة حاجة؟
أم عبير رجعت خطوتين لورا، وحاولت ترسم ابتسامة متوترة.
– لا يا حبيبتي.. أنا.. أنا كنت معدية بس.
البنت بصت للأرض، وبعدين رجعت بصتلها.
– معدية على باب شقتي؟
– أيوة.. يعني.. كنت بشوف النور عندك مفتوح ولا لأ.
البنت رفعت حاجبها.
– النور؟
– أيوة يا حبيبتي، أصل أنا بحب أطمن على الجيران، واشوفهم عايشين ولا لا
ابتسمت البنت ابتسامة صغيرة وقالت:
– ربنا يخليكي، بس أنا لسه عايشة الحمد لله.
أم عبير بلعت ريقها ومشيت بسرعة، وهي بتبص وراها كل شوية.
البنت دي هي «ليل».. طبيبة شرعية متخصصة في القضايا الجنائية وتشريح الجثث، ملامحها هادية جداً، ومش من النوع اللي بيتكلم كتير من غير سبب.
ليل لسه منقولة القاهرة جديد بعد سنين من الشغل والتعب في قلب الصعيد، وبما إنها شغالة في مشرحة زينهم، فطبيعي إن يومها بيبدأ لما أيام الناس كلها تخلص.
كانت متعودة تشوف حاجات غير عادية، وتتعامل مع أصعب المواقف بهدوء، لكن اللي مكانتش تعرفه إن أصعب اختبار في حياتها مش هيكون في المشرحة، ولا في التعامل مع جثة مجهولة..
هيكون في عمارة رقم 4!
---
قبل تلات أسابيع بالظبط..
تاكسي أبيض وقف قدام عمارة قديمة في شارع جانبي هادي نسبياً.
نزلت منه ليل وهي بتفرك عينيها من التعب، وبعدها مدت إيدها للسواق عشان تدفع الأجرة.
– اتفضل يا أستاذ.
السواق بص للشنطة الكبيرة اللي في الشنطة الخلفية.
– دي كل حاجتك يا دكتورة؟
– أيوة.
– طب ما شاء الله، إنتي جاية تسكني ولا تفتحي محل أدوات منزلية؟
ليل بصت للشنطة وبعدين بصتله.
– لو كنت فتحت محل كان زماني كسبت أكتر من شغلي.
السواق ضحك وهو بينزل الشنطة.
– ربنا يوسع رزقك يا بنتي.
شكرته، ولفت وشها ناحية العمارة.
مبنى قديم، سبع أدوار، والغسيل منشور في كل حتة، وأصوات التلفزيونات طالعة من الشبابيك المفتوحة.
وقفت تبص للمبنى ثواني.
– يا رب تكون شقة كويسة.. أنا مش ناقصة.
في اللحظة دي، صوت جه من جنبها:
– إنتي الدكتورة الجديدة؟
لفت، لقت راجل كبير قاعد على كرسي خشب قدام مدخل العمارة، ماسك جورنال وبيحرك مروحة بلاستيك في إيده.
– السلام عليكم.. عم صابر؟
عم صابر حط الجورنال على رجله وقام.
– وعليكم السلام ورحمة الله.. أيوة يا بنتي، أنا عم صابر.
– أنا ليل.. عمي المستشار توفيق كلم حضرتك من يومين، وقال إنك شوفت لي شقة هنا وجيت عشان أستلم المفتاح.
أول ما سمع اسم المستشار توفيق، عم صابر اتعدل في وقفته.
– يا مرحب يا مرحب! ده إحنا مستنيين حضرتك من بدري يا دكتورة! سعادة المستشار كلمني وقال لي إن بنت أخوه دكتورة قد الدنيا وعايزة شقة قريبة من شغلها.
ليل ابتسمت.
– ربنا يخليك، تعبتك معايا.
– تعب إيه بس يا بنتي؟ ده إحنا تحت أمرك. الشقة في الدور التالت، واسعة ونضيفة، وفيها شمس و حاجه كده تدخل القلب.
بصت ليل للعمارة.
– كويس، أهم حاجة الهدوء.
عم صابر سكت لحظة، وبعدين قال:
– أيوة.. الهدوء موجود طبعاً.
لكن نبرته كانت غريبة شوية.
ليل كانت لسه هتسأله، ظهر صوت ست من وراه.
– مين دي يا صابر؟
طلعت ست في أواخر الأربعينات، لابسة عباية بيت ملونة، وشبشب في رجلها، وبتبص لليل من فوق لتحت
– مين القمر دي؟
عم صابر اتنهد.
– دي الدكتورة الجديدة يا أم عبير.
أم عبير قربت بابتسامة واسعة.
– يا أهلاً يا حبيبتي! منورة العمارة، اسمك إيه؟
– ليل.
– يا سلام! اسم جميل أوي. إنتي منين يا ليل؟
– من الصعيد.
– متجوزة؟
ليل بصتلها باستغراب.
– لا.
– مخطوبة؟
– لا.
– طب عندك كام سنة؟
عم صابر دخل بسرعة:
– يا أم عبير سيبي البنت تاخد نفسها، لسه جاية من السفر!
أم عبير تجاهلته تماماً.
– طب يا حبيبتي بتشتغلي إيه؟
ليل ابتسمت وهي بترد:
– أنا طبيبة شرعـ...
عم صابر كح فجأة
– دكتورة تجميل! أيوة يا أم عبير، دكتورة تجميل! بتوع الوشوش والماسكات والحاجات دي.
ليل بصت له.
وبعدين بصت لأم عبير
أم عبير عينيها لمعت.
– تجميل؟! يا خبر! ده إحنا جالنا الخير لحد عندنا!
ليل فتحت بقها تتكلم، لكن عم صابر سبقها.
– يلا يا دكتورة اطلعي ارتاحي، السفر أكيد تعبك.
أم عبير قربت منها وهمست:
– بس أنا عندي شوية تجاعيد كده، نبقى نشوف لهم حل يا حبيبتي.
ليل ابتسمت ابتسامة متكلفة.
– إن شاء الله.
أول ما دخلوا العمارة، عم صابر قرب منها وقال بصوت واطي:
– أبوس إيدك يا دكتورة، امشي معايا في اللي قولته.
– اللي قولته إيه بالظبط؟
– إنك دكتورة تجميل.
ليل وقفت مكانها.
– نعم؟!
عم صابر بص وراه يتأكد إن أم عبير مش سامعة.
– بصي يا بنتي، الست دي لو عرفت إنك طبيبة شرعية في مشرحة ، مش هتبات في الشقة ليلة واحدة. دي بتخاف من خيالها، ولو عرفت إنك بتشرحي جثث هتقول العمارة بقت مسكونة، وهتلم السكان عليا.
ليل ب زهق
– يعني أنا جاية أسكن هنا، ولا جاية أمثل دور دكتورة تجميل؟
عم صابر ابتسم.
– الاتنين يا بنتي، الاتنين.
– طب والشنطة دي؟
– قولي فيها كريمات ومكياج.
ليل بصت للشنطة اللي فيها هدومها وكتبها وحاجات شغلها.
– ماشي.. ناقص أقول إن عندي صالون كمان.
عم صابر ضحك.
– أهو لو حبيتي تفتحي صالون، إحنا أول زباينك.
ليل هزت راسها بيأس وطلعت السلم.
مكنتش تعرف إن دي كانت أول كذبة في سلسلة طويلة من الأكاذيب اللي هتضطر تقولها عشان تعيش بسلام في العمارة دي.
---
اليوم الأول.. كيس الزبالة
رجعت ليل من الشغل الساعة عشرة بالليل، جسمها كله مكسر، وعينيها مش قادرة تفتح.
كانت نفسها تدخل تاخد دش وتنام من غير ما تسمع صوت بني آدم واحد.
طلعت الدور التالت، وأول ما قربت من باب شقتها وقفت.
فيه كيس زبالة أسود كبير مرمي قدام الباب، والمية اللي طالعة منه عاملة بركة صغيرة على السيراميك.
ليل بصت للكيس.
وبعدين بصت لباب الشقة اللي قصادها.
الباب اتفتح ببطء، وظهرت وفاء، جارتها.
– مساء الخير يا حبيبتي.
ليل أشارت للكيس.
– مساء النور.. هو الكيس ده بتاع حضرتك؟
وفاء بصت للكيس بكل برود.
– أيوة.
– طب ممكن تشيليه لو سمحتي؟
– ليه يا حبيبتي؟
ليل افتكرت إنها يمكن مش واخدة بالها من المية اللي نازلة منه.
– أصل هو بيسرب مية قدام باب شقتي.
وفاء بصت للأرض.
– آه، معلش، أصل البواب متأخر وروحت حطاه عندك.
ليل سكتت ثانيتين.
– عندي أنا؟
– أيوة، أصل الطرقة قدام شقتي ضيقة، والكيس كبير.
ليل خدت نفس طويل.
– طب ما تحطيه قدام باب شقة البواب.
وفاء هزت راسها.
– لا يا حبيبتي، عم صابر عنده ضغط وسكر، مينفعش نتعبه.
ليل ابتسمت ابتسامة باردة.
– وأنا عندي حساسية من الزبالة، ينفع نتعبني أنا؟
وفاء اتضايقت.
– جرى إيه يا دكتورة؟ دي جيرة، وإحنا بنساعد بعض.
ليل شاورت على الكيس.
– دي مساعده ؟ ، احنا هنحتاج الإسعاف كمان شويه من الريحه
وفاء رفعت حاجبها.
– إنتي بتتريقي عليا؟
– لا والله، أنا بس بطلب طلب بسيط انك تشيلي الكيس.
وفاء دخلت شقتها وهي بتتمتم:
– ناس جاية من بره ومش عارفة الأصول!
ليل فضلت باصة للباب المقفول ثواني، وبعدين بصت للكيس.
طلعت موبايلها واتصلت بعم صابر.
– ألو، عم صابر؟
– أيوة يا دكتورة، خير؟
– أنا عايزة أعرف هو فين أقرب مكان أدفن فيه نفسي؟
– نعم؟!
– مفيش حاجة، أنا بس بسأل.
---
اليوم التاني.. أول زبونة في عيادة التجميل الوهمية.
ليل كانت راجعة من الشغل، وأول ما فتحت باب العمارة سمعت صوت ست بينادي عليها.
– يا دكتورة! يا دكتورة ليل!
لفتت، لقت أم عبير جاية ناحيتها وهي ماسكة صورة في إيدها.
– إزيك يا حبيبتي؟
– الحمد لله يا طنط.
أم عبير قربت منها وفتحت الصورة.
– بصي يا دكتورة، شايفة الست دي؟
ليل بصت للصورة.
– أيوة.
– دي واحدة صاحبتي عملت فيلر عند دكتور، وشفايفها بقت زي البطة. أنا بقى عايزة أعمل زيها بس من غير ما أبقى بطة.
ليل فضلت باصة للصورة.
– حضرتك عايزة تعملي إيه بالظبط؟
– فيلر بسيط، وبوتوكس هنا، وعايزة أشد المنطقة دي شوية.
وشاورت على وشها.
ليل حاولت تحافظ على هدوئها.
– يا طنط أنا مش بعمل الحاجات دي.
أم عبير ضيقت عينيها.
– إزاي يعني؟ ما انتي دكتورة تجميل!
– أنا تخصصي مختلف.
– مختلف إزاي؟ هو التجميل فيه تخصصات كمان؟
ليل سكتت.
– أيوة.
أم عبير فكرت شوية، وبعدين قالت:
– طب تعالي شوفي وشي بس، يمكن محتاج عملية بسيطة.
ليل ابتسمت بالعافية.
– إن شاء الله لما أفضى.
أم عبير مسكت إيدها.
– لا يا حبيبتي، تعالي دلوقتي، أنا عاملة شاي بالنعناع.
ليل بصت للسقف.
يا رب الصبر.
---
اليوم الرابع.. مشمش المفقود.
الساعة كانت اتنين بعد منتصف الليل.
ليل كانت نايمة على سريرها، بعد شيفت طويل في المشرحة، وأخيراً قدرت تنام.
لحد ما الباب خبط.
خبطتين.
وبعدين خمس خبطات ورا بعض.
ليل فتحت عين واحدة.
الخبط شغال جامد
قامت من السرير وهي بتتمتم:
– مين ابن الوارمه اللي امه داعيه عليه النهارده ؟
فتحت الباب بعصبية.
كان واقف قدامها شاب في أواخر العشرينيات، لابس بيجامة، وشعره منكوش، وفي إيده علبة أكل قطط.
– دكتورة ليل!
– نعم؟
– مشمش ضايع!
ليل بصت له من غير تعبير.
– المشمش ضايع ازاي ، و ده مش أوان المشمش اصلا
الشاب قرب خطوة.
– لا انا قصدي على المشمش بتاعي ، مش مشمش الفكهامي
– مين؟
– مشمش!
– يا أستاذ أنا معرفش انت عايز ايه ، يطلع ايه مشمش ده
الشاب حط إيده على قلبه.
- مش عارفه مشمش ازاي؟؟؟
ده القط بتاعي
ليل بعصبيه:
- يعني انت مصحيني الساعه ٢عشان قطه؟؟؟!!!!!!!
– ده مش مجرد قط، ده ابني.
ليل بصت له وبعدين بصت للساعة.
– امشي من وشي دلوقت بدل ما اخلي أهلك يدوروا عليك مع مشمش
بص لها ب استعطاف:
- معلش شوفيه عندك جوا
ليل اخدت نفس عميق:
– يا أستاذ، أنا كنت نايمة، ولو قطتك دخلت شقتي كنت هحس بيها!
الشاب بص لجوه الشقة.
– طب ممكن أبص بس؟
ليل رفعت إيدها.
– خطوة واحدة لجوه وأنا هخليك تنسى اسم مشمش نفسه.
الشاب رجع لورا.
– خلاص يا ستي، أنا آسف.
وبعدين قال وهو ماشي:
– بس لو لقيتيه ابقي كلميني.
ليل قفلت الباب، وسندت ضهرها عليه.
ثواني وسمعت صوته من بره:
– مشمش! يا مشمش!
ليل رفعت وشها للسقف.
– يا رب عدي الايام دي على خير
---
اليوم السادس.. أم حسن الفضوليه
ليل كانت خارجة من الحمام، لابسة روب البيت، وبتنشّف شعرها، لما سمعت صوت حاجة بتقع في المطبخ.
اتجمدت مكانها.
مين في الشقة؟!
طلعت بسرعة، ولقت ست واقفة قدام التلاجة وبتبص جواها.
ليل صرخت:
– انتي مين؟!
الست اتخضت، ولفت ناحيتها.
– يا ساتر يا رب! خضتيني!
– أنا اللي خضتك؟! إنتي بتعملي إيه هنا؟!
– أنا أم حسن، جارتك في الرابع.
ليل بصت للباب المفتوح.
– ودخلتي شقتي ليه؟
أم حسن ردت بكل هدوء:
– شوفت الباب مفتوح، قولت أدخل أطمن.
– تطمني على إيه؟!
– عليكي يا بنتي.
ليل أشارت للمطبخ.
– بتطمني عليا من جوه التلاجة؟!
أم حسن قفلت التلاجة.
– أصل شوفت عندك أكل كتير، قولت أشوف لو محتاجة حاجة.
ليل حطت إيدها على دماغها
– أنا محتاجة إن حضرتك تطلعي بره.
أم حسن اتضايقت.
– إيه ده؟ هو أنا عملت جريمة؟!
ليل بصتلها بجدية.
– لا، بس لسه ممكن تعملي.
أم حسن خرجت وهي بتتمتم:
– ربنا يهديكي يا بنتي، أعصابك تعبانة من الشغل.
ليل قفلت الباب بالمفتاح، وبعدها بالترباس، وبعدها حطت كرسي وراه.
من يومها بقت بتتأكد من الباب تلات مرات قبل ما تنام.
---
الأسبوع التاني.. عيادة ليل المجانية.
يوم الجمعة، ليل كانت قاعدة في الصالة بتراجع تقرير شغل، ولابسة نضارة، وشعرها مربوط.
سمعت جرس الباب.
فتحت، لقت أم جرجس واقفة ومعاها بنت شابة.
– صباح الخير يا دكتورة.
– صباح النور.
– معلش هنتعبك معانا شوية.
ليل بصت للبنت.
– خير؟
أم جرجس دفعت بنتها لقدام.
– دي ماري بنتي، خطوبتها الخميس الجاي.
ليل ابتسمت.
– ألف مبروك.
– الله يبارك فيكي. بقى إحنا قولنا نجيلك تشوفي وشها، عايزين نعمل فيلر وبوتوكس.
ليل سكتت.
– نعم؟
ماري اتكلمت بخجل:
– ماما بتقول إنك دكتورة تجميل.
ليل بصت لأم جرجس.
– يا جماعة أنا مش بعمل فيلر ولا بوتوكس.
أم جرجس فتحت شنطتها وطلعت صورة.
– طب شوفي الصورة دي، عايزين الشفايف تبقى كده.
ليل بصت للصورة.
– يا طنط، أنا مش متخصصة في الحاجات دي.
أم جرجس اتضايقت.
– طب إنتي دكتورة إيه بقى؟
ليل سكتت لحظة.
– دكتورة في تخصص طبي مختلف.
أم جرجس قربت منها.
– يعني بتعملي عمليات؟
– أيوة.
– عمليات تجميل؟
ليل غمضت عينيها.
– لأ.
ماري دخلت في الكلام:
– ماما يلا نمشي، الدكتورة مش فاضية.
أم جرجس بصتلها.
– اسكتي يا بت، إحنا لسه بنتكلم.
ليل ابتسمت لماري.
– ربنا يتمملك على خير يا حبيبتي.
أم جرجس خرجت وهي بتقول:
– غريبة والله، دكتورة تجميل ومش بتعمل فيلر!
ليل قفلت الباب، ورجعت لمكتبها.
بعد خمس دقايق، جرس الباب رن تاني.
فتحت.
كانت أم عبير.
– معلش يا حبيبتي، عندك كريم مرطب؟
ليل بصتلها.
– لا.
– طب كريم تفتيح؟
– لا.
– طب ماسك للوش؟
ليل ابتسمت.
– عندي مشارط.
أم عبير رجعت خطوتين.
– إيه؟!
ليل افتكرت اللي قاله عم صابر
– بهزر يا طنط.
أم عبير حطت إيدها على قلبها.
– يا بنتي حرام عليكي، أنا قلبي مش مستحمل الهزار ده!
---
اليوم العاشر.. اجتماع سكان العمارة.
ليل كانت نازلة تشتري حاجة من السوبر ماركت، لما لقت عم صابر واقف عند المدخل وبينادي عليها.
– يا دكتورة ليل، تعالي بس دقيقة.
– خير يا عم صابر؟
– السكان عاملين اجتماع صغير.
ليل بصت حواليها.
– اجتماع؟ وليه؟
– عشان نتعرف عليكي أكتر.
ليل وقفت.
– نتعرف عليا؟!
– أيوة، دي أصول الجيرة.
كان فيه كراسي متحطوطة في مدخل العمارة، وأم عبير قاعدة في النص، ووفاء جنبها، وآدم صاحب القطة واقف بعيد شوية ماسك تليفونه.
أم عبير أول ما شافتها ابتسمت.
– أهي الدكتورة وصلت!
ليل بصت للناس.
– مساء الخير.
أم عبير أشارت للكرسي.
– اقعدي يا حبيبتي.
ليل قعدت وهي مش فاهمة حاجة.
أم عبير بدأت الكلام:
– إحنا هنا زي العيلة، وكلنا بنحب بعض، وأي حد جديد لازم نعرف عنه كل حاجة.
ليل ابتسمت.
– طبعاً.
وفاء دخلت:
– يعني مثلاً، إنتي بتشتغلي فين؟
– في مستشفى.
– أنهي مستشفى؟
– مستشفى حكومي.
آدم رفع عينه من الموبايل وضحك.
أم عبير بصت له.
– بتضحك على إيه يا آدم؟
– ولا حاجة يا طنط.
أم عبير رجعت لليل.
– وبتشتغلي إيه بالظبط؟
ليل اتنهدت.
– طب ممكن أسأل سؤال؟ هو الاجتماع ده تحقيق ولا تعارف؟
وفاء بصتلها بضيق.
– إنتي ليه عصبية كده يا دكتورة؟
ليل ردت بهدوء:
– عشان لسه راجعة من الشغل، وكنت فاكرة إني جاية أعيش في عمارة مش أقدم cv
عم صابر حاول يغير الموضوع.
– طب يا جماعة، مين عايز شاي؟
ليل قامت فوراً.
– أنا همشي، عندي شغل.
أم عبير نادتها:
– استني يا حبيبتي، لسه ما اتفقناش على ميعاد نعمل فيه الماسكات!
ليل كملت طريقها من غير ما ترد.
آدم ضحك وهو بيبصلها.
ومن اللحظة دي، بدأ يكتشف إن الدكتورة الجديدة مش سهلة أبداً.
---
اليوم الثاللثزعشر.. مشكلة الاسانسير
ليل كانت طالعة من الشغل، شايلة شنطتها، وفي إيدها كوباية قهوة، ولما وصلت العمارة لقت الاسانسير واقف.
دراست على الزرار
مفيش استجاب.
ضغطت تاني.
برضه مفيش.
بصت للسلم.
خمسة أدوار
اتنهدت وبدأت تطلع
في الدور التاني سمعت صوت أم عبير:
– يا دكتورة! استني يا حبيبتي!
ليل وقفت.
– أيوة يا طنط؟
أم عبير كانت واقفة على السلم وماسكة طبق محشي.
– خدي يا حبيبتي، ده ليكي.
– تسلمي، بس أنا لسه واكلة.
– لا لا، خديه، ده محشي مخصوص.
ليل خدت الطبق مجاملة.
طلعت دور كمان، لقت وفاء واقفة قدام شقتها.
– يا دكتورة، معلش ممكن تساعديني؟
ليل بصتلها.
– خير؟
وفاء مدت إيدها.
– عندي حباية طالعة هنا، وعايزاكي تشوفيها.
ليل بصت لوشها.
– روحي لدكتور جلدية يا مدام.
وفاء ضحكت.
– ما انتي دكتورة!
ليل ردت وهي بتكمل طلوع:
– أنا مش دكتورة لكل حاجة يا مدام.
وصلت الدور التالت أخيراً، وفتحت باب شقتها.
حطت الطبق على الترابيزة، وخلعت الجزمة، وقبل ما تلحق تقعد، سمعت خبط على الباب.
فتحته.
آدم واقف.
– مساء الخير.
– مساء النور.
– هو مشمش دخل عندك؟
ليل بصتله بثبات.
– آدم.
– نعم؟
– لو مشمش دخل عندي، هجيبه لحد عندك ب بوكيه ورد و يعتذرلك أنه ساب البيت
آدم ضحك.
– طب ماشي، كنت بس بسأل.
– وإنت كل يوم بتسأل نفس السؤال ليه؟
– يمكن يكون دخل النهارده.
ليل قفلت الباب في وشه.
ومن ورا الباب سمعته بيقول:
– تصبحي على خير يا دكتوره
ليل ..
هو انا شوفت خير من ساعة ما جيت هنا
---
الأسبوع التالت.. بداية الكارثة.
ليل بدأت تحفظ أصوات الجيران من غير ما تشوفهم.
صوت أم عبير وهي بتنادي على عم صابر.
صوت وفاء وهي بتزعق لجوزها.
صوت آدم وهو بينادي على مشمش.
وصوت أم حسن وهي بتخبط على أي باب في العمارة عشان تستلف حاجة.
بقت عارفة مين بيصحى الساعة ستة، ومين بيرجع الساعة اتناشر، ومين بيشغل التلفزيون بصوت عالي.
حتى بقت بتعرف إن أم عبير لما تسكت أكتر من عشر دقايق، يبقى أكيد فيه مصيبة بتخططلها.
وفي يوم، ليل كانت راجعة من الشغل، لقت عم صابر واقف قدام المدخل ووشه متغير.
– مالك يا عم صابر؟
– ولا حاجة يا بنتي.
– شكلك مش مطمن.
– أصل أم عبير عايزة تطلعلك.
ليل وقفت.
– ليه؟
عم صابر بص حواليه.
– عايزة تعرف تخصصك الحقيقي.
ليل حطت إيدها على وشها.
– هو أنا هفضل كده كتير؟
عم صابر ابتسم.
– معلش يا بنتي، هي بتحب تعرف كل حاجة.
في اللحظة دي، ظهر صوت أم عبير من فوق:
– يا عم صابر! الدكتورة وصلت؟
ليل رفعت عينيها للسقف.
– يا رب ارحمني.
أم عبير نزلت السلم بسرعة، وفي إيدها دفتر صغير وقلم.
– يا دكتورة! كنت مستنياكي.
– خير يا طنط؟
– أنا عاملة قائمة بكل الحاجات اللي محتاجاها في وشي.
ليل بصت للدفتر.
– قائمة؟
– أيوة، عشان مننساش حاجة.
فتحت الدفتر وبدأت تقرأ:
– أول حاجة، نرفع الحواجب. تاني حاجة، نشد الخدود. تالت حاجة، نشيل الخطوط اللي جنب البق. رابع حاجة...
ليل رفعت إيدها.
– خلاص يا طنط، كفاية كده.
أم عبير بصتلها.
– ليه؟ إنتي مستعجلة؟
– لا، بس أنا مش بعمل أي حاجة من دي.
أم عبير اتنهدت.
– طب أنا هعمل إيه في وشي؟
ليل بصتلها بجدية.
– تحبيه زي ما هو.
عم صابر ضحك بصوت عالي.
أم عبير بصت له بغيظ.
– إنت مالك يا عم صابر؟! هو أنا بكلمك؟
ليل استغلت الفرصة وطلعت السلم بسرعة.
---
اليوم الأخير من الاسبوع التالت
كانت الساعة حوالي واحدة بعد منتصف الليل.
ليل رجعت من الشغل وهي مرهقة جداً، وفي إيدها ملف طبي لازم تراجعه الصبح.
دخلت شقتها، غيرت هدومها، وقعدت على المكتب.
فتحت الملف وبدأت تراجع الصور والتقارير.
بعد شوية، تليفونها رن.
كان اتصال من زميلها في الشغل.
– أيوة يا دكتور؟
– مساء الخير يا ليل، معلش هزعجك.
– خير؟
– التقرير اللي بعتتيه ناقص فيه تفصيلة صغيرة، محتاجين نراجعها الصبح قبل ما النيابة تيجي.
– تمام، ابعتهالي وأنا أراجعها.
– تسلمي يا دكتورة.
قفلت المكالمة ورجعت للملف.
لكنها مكانتش واخدة بالها إن باب الشقة مش مقفول كويس.
وفجأة...
– يا ساتر يا رب!
ليل انتفضت من مكانها.
رفعت عينها لقت أم عبير واقفة عند الباب!
– طنط أم عبير؟!
أم عبير كانت باصة على الملف المفتوح.
– إيه ده يا بنتي؟!
ليل قفلت الملف بسرعة.
– حضرتك دخلتي إزاي؟
– الباب كان مفتوح.
– وده سبب يخليكي تدخلي من غير استئذان؟
أم عبير أشارت للملف.
– هو إنتي بتشتغلي في إيه بالظبط؟
ليل سكتت.
أم عبير قربت خطوة.
– أنا سمعتك بتقولي جثة وتشريح قبل كده، وشفت صور غريبة في الملف ده.
ليل حاولت تسيطر على أعصابها.
– يا طنط، دي أوراق شغل.
– شغل إيه؟
– شغل طبي.
أم عبير ضيقت عينيها.
– طبي إزاي؟
ليل بصتلها بثبات.
– طبي جداً.
أم عبير فضلت باصة لها شوية، وبعدين قالت:
– أنا حاسة إنك مخبية حاجة.
ليل ابتسمت.
– وأنا حاسة إن حضرتك محتاجة تتعلمي تخبطي قبل ما تدخلي بيوت الناس.
أم عبير اتكسفت شوية.
– خلاص يا حبيبتي، متزعليش، أنا بس كنت بطمن عليكي.
– اطمني عليا من بره يا طنط.
أم عبير خرجت، وليل قفلت الباب بالمفتاح.
وبعدها رجعت للمكتب وهي بتتمتم:
– أنا محتاجة أشتغل في مكان مفيهوش بني آدمين.
---
اليوم الأخير.. البلاغ الجماعي.
بعد شيفت طويل استمر أكتر من عشر ساعات، ليل خرجت من المشرحة وهي حاسة إن دماغها هتنفجر.
ركبت العربية، وسندت راسها على الكرسي.
كانت محتاجة يوم إجازة.
أسبوع إجازة.
شهر إجازة.
أو يمكن تغير العمارة كلها.
لكن أول ما افتكرت إنها راجعة البيت، افتكرت كيس الزبالة، ومشمش، وأم عبير، ووفاء، وأم حسن، وأم جرجس، والأستاذ مدحت، والحاج سلامة.
فتحت عينيها فجأة.
– لا.. كفاية.
السواق بص لها من المراية.
– في حاجة يا دكتورة؟
– أيوة، أنا محتاجة أروح القسم.
السواق اتوتر.
– قسم إيه يا بنتي؟ حصل إيه؟
ليل سندت راسها تاني.
– هقدم بلاغ.
– ضد مين؟
– ضد العمارة كلها.
السواق سكت
وبعد ربع ساعة، كانت ليل قاعدة قدام أمين الشرطة في القسم.
رفع عينه من المحضر بملل.
– خير يا آنسة، أقدر أساعدك إزاي؟
ليل عدلت قعدتها وقالت بكل جدية:
– مساء الخير، أنا جاية أشتكي من الجيران.
أمين الشرطة بص لها.
– جيرانك؟
– أيوة.
– مين فيهم؟
– كلهم.
– نعم؟!
ليل طلعت موبايلها وفتحت النوتس.
– بص يا فندم، أنا بقالي تلات أسابيع ساكنة في عمارة رقم 4، وفي خلال التلات أسابيع دول اتعرضت لمجموعة من الانتهاكات اللي تستدعي تدخل الدولة.
أمين الشرطة حاول يخفي ابتسامته.
– انتهاكات؟!
– أيوة. أولاً، واحدة رمت كيس زبالة قدام باب شقتي، ولما طلبت منها تشيله قالتلي دي جيرة.
أمين الشرطة بدأ يكتب.
– اسمها إيه؟
– وفاء.
– تمام، وبعد كده؟
– واحد خبط على بابي الساعة اتنين بالليل عشان قطته ضايعة.
أمين الشرطة رفع عينه.
– قطته؟
– أيوة، وعايز يدخل يفتش شقتي عشان يتأكد إنها مش عندي.
أمين الشرطة عض على شفته عشان ميضحكش.
– طب وبعدين؟
– ست دخلت شقتي من غير استئذان، وفتحت التلاجة كمان.
أمين الشرطة وقف الكتابة وبص لها.
– فتحت التلاجة؟!
– أيوة يا فندم، كانت بتطمن عليا.
أمين الشرطة نزل راسه وهو بيضحك.
ليل كملت بجدية:
– ودي مش كل حاجة. فيه واحدة تانية عايزة تعمل فيلر وبوتوكس في الصالة، وواحدة بتعرض عليا صور وشوش صحابها عشان أظبطها، وراجل كل ما يشوفني يفك الشاش من على رجله ويطلب مني كريم للتجاعيد.
أمين الشرطة رفع إيده.
– استني استني، هو إنتي دكتورة إيه أصلاً؟
ليل سكتت لحظة.
– طبيبة شرعية.
أمين الشرطة بص لها باستغراب.
– طبيبة شرعية؟!
– أيوة.
– وبتشتكي من الجيران؟
ليل بصتله ببرود.
– أيوة يا فندم، أنا بتعامل مع الجثث طول اليوم، ومش عارفة أتعامل مع الأحياء اللي ساكنين معايا!
أمين الشرطة انفجر ضحك.
– طب والله دي أول مرة تحصل قدامي.
ليل كانت هترد، لكن موبايلها رن.
بصت للشاشة.
آدم.
اتنهدت بعمق، وردت.
– نعم؟
صوت آدم كان متوتر وبيتكلم بسرعة:
– ليل، إنتي فين؟
– في القسم.
– القسم؟! ليه؟!
– بعمل محضر ضدك.
– يا بنتي مش وقته! انزلي بسرعة، في مصيبة في العمارة!
ليل سندت ضهرها على الكرسي.
– مصيبة ايه تاني
ادم ..
= لأ المره دي مصيبه من برا
