رواية قتلت زوج امي فبداء عقابي الفصل الأول بقلم ياسر عوده
-الو انتي مدام عزه؟
-ايوه انا، مين معايا؟
-انا الامين محمود، وعاوزينك تيجي على المستشفى، بنتك رانيا عملت حادثه.
لم سمعته وهو بيقولي الكلام ده حسيت ان الدنيا كلها اسودت قدام عنيا، فجأه لقيت التليفون بتاعي وقع من ايدي، وماكنتش عارفه اقول ايه او اعمل ايه، بس الحقيقه انا كان عندي احساس ان دا هيحصل، ايوه زي ما بقولكم كده، كان عندي احساس اني هفقد بنتي الوحيده رانيا.
لما التليفون وقع مني الاتصال فصل، بس بعد لحظات اتصل نفس الشخص مره تانيه، وحاولت اتمالك نفسي ومسكت التليفون ورديت عليه وسألته:
-بنتي ماتت صح؟
-لا يا فندم بنتك كويسه، وكل اللى بطلبه منك انك تيجي المستشفى.
-لو بنتي كويسه خليني اتكلم معاها، عاوزه اسمع صوتها؟
-للاسف ماينفعش، هي دلوقتي في غرفه العنايه المركزه وغير مسموح انها تتكلم في التليفون.
-لا بنتي ماتت انا عارفه وكنت حاسه بان دا هيحصل.
-لا يا فندم بنتك كويسه، ولو مش مصدقاني تعالي دلوقتي وهتتأكدي من كلامي.
وفعلا خدت منه عنوان المستشفى وروحت على هناك، وطول الطريق وانا عماله ادعي ربنا انه مايعقبنيش في اللى عملته في حياتي في بنتي، هي مالهاش ذنب، عارفه اني غلطت وماتعقبتش على غلطي، بس معقول دا هو عقابي اللى استحقه.
وصلت للمستشفى وهناك قابلت الامين محمود وعرفته بنفسي، ووقتها لقيته بيقولي:
-زي ما قولت لحضرتك في التليفون، بنتك كانت حالتها مستقره، بس مش عارف ايه اللى حصل فجأه، بعد ما خلصت معاكي الاتصال عرفت من الدكتور ان حالتها اتدهورت وللاسف بنتك ماتت، البقاء لله ربنا يصبرك.
وزي ما سمعتم كده، كل اللى كنت متوقعاه حصل فعلا، بنتي رانيا ماتت، كنت عارفه ان دا عقابي، والغريبه بقى لما الامين محمود قالي الخبر دا ماحستش باي حاجه، حسيت اني فاضيه من جوه، ماكنتش قادره اعيط، او اصرخ او حتى كنت قادره اقف على رجلي، وعلشان كده انا قعدت على الارض وكنت بقول:
-ارتحت يا عطيه، ارتحت لما خدت مني اللى بحبها، كنت عارفه انك مش هترتاح في قبرك الا لما تعمل كده.
ولما سمعني الامين محمود قالي:
-ايه الكلام اللى بتقوليه دا يا مدام، انا مش فاهم حاجه، مين عطيه وايه حكايه انه مش هيرتاح في قبره الا لما بنتك هتموت؟
وقتها بصتله وقولتله:
-خلاص كل حاجه راحت، وهعيش ليه بعد ما رانيا ماتت، انا هحكيلك كل حاجه، كل اللى عملته من زمان، وماتحاسبتش عليه وقتها، ودلوقتي دفعت كل الفواتير اللى عليا، لا مش كلها لسه اهم فاتوره لازم ادفعها، لازم اتعاقب على الجريمه اللى عملتها لما قتلت عطيه الاعمي.
اتصدم الامين محمود لما سمع كلامي، ورد عليا وقالي:
-قتلتيه، انت عارفه انتي بتقولي ايه؟
-ايوه عارفه وواعيه كمان، واقصد كل كلمه بقولها، وكل اللى طلباه منك انك تسمعني، خليني ازيح السر اللى جوايا من سنين وطابق على صدري.
-قولي انا سمعك.
-من ساعه لما فتحت عيني على الدنيا ماكنتش اعرف في حياتي غير اتنين، الاولي كانت زينب، ودي تبقى امي، والتاني عطيه ودا كان ابويا، او دا اللى هما فهمهولي لما ابتديت اكبر واعرف يعني ايه كلمه بابا وماما.
كان عندي حوالي خمس سنين، لما كانت امي بتاخدني من ايدي وبننزل الشارع من الساعه 7 الصبح، ومش بنرجع الا الساعه 7 بالليل، وطول النهار بنبقى انا وهي في الشارع، هي بتقعد على الرصيف وتفضل تدعي لكل الناس اللى معديه او اللى راكبين العربيات، وانا شويه بقعد جنبها، وشويه تانين بروح اقف عند ازاز العربيات واقول لـ أي واحد راكب العربيه:
-أي حسنه يا باشا، انا جعانه وماكتش طول اليوم.
ووقتها في اللى بيدوني فلوس، وفي اللى بيدوني اكل، وناس تانيه بتقولي ربنا يسهلك وغيرهم بيزعقوا معايا لما بقرب من العربيه بتاعتهم من الاساس، وبفضل على الحال ده طول النهار، وتفضل امي تقول للناس انها بتصرف على جوزها العاجز وكمان علي عيالها السابعه، والحقيقه كانت غير كده خالص، لا جوزها عاجز ولا حتى عندها 7 عيال، وكنت انا بنتها الوحيده.
ولما كنا نخلص الشغل ونرجع البيت هناك نلاقي ابويا عطيه قاعد على الكنبه مستنينا نرجع، ولما نرجع امي تطلع كل اللى كسبته وتدهوله، وكنا بنكسب كتير، وديما كان بيرد عليها ويقولها:
-هما دوول اللى جبتيه يا بوز الفقر طول اليوم؟، انا مش عارف انا مستحملك ليه كل ده.
امي ماكنتش بترد عليه خالص، كانت بتسمع كلامه وبتسكت، وتدخل على اوضتها علشان تغير هدوم الشغل، وانا فضلت واقفه قدام ابويا، ووقتها سألني:
-وقفه كده ليه يا بت؟
-جعانه عاوزه اكل.
-هو دا اللى فالحه فيه، كل اللى بتفكري فيه بطنك وخلاص، غوري شوفي التلاجه هتلاقي فيها طفح كولي منه، يا رب يطمر فيكي، أهو عمال اعلف فيكي وخلاص.
وروحت على التلاجه علشان الاقي شويه الفول بتوع كل مره، وفضلت اكل فيه، والاغرب بقى تصرف امي، علشان رغم الكلام اللى ابويا قالهولها، كانت بتطلع من الاوضه بتاعتها بعد ما غيرت هدوم التسول، وكانت بتسهر مع بابا ويفضلوا سهرانين لوقت متأخر، وانا بنام من كتر التعب، بس مع مرور الايام، ولما كبرت وبقى عندي حوالي 15 سنه، وبقيت بعرف ازاي اتصعبن على الناس علشان يدولي فلوس اكتر، حصلت حاجه غيرت من حياتي للابد، واللى حصل اني بعد ما روحت انا وامي من الشغل زي كل يوم، وبعد ما أكلت ودخلت انام، وفضلت امي صاحيه مع ابويا في الصاله كالعاده بيشربوا المخدرات بتاعتهم، صحيت فجأه على صوت عالي، كان صوت خناق وصريخ، ووقتها قومت من على سريري، وفتحت الباب فتحه صغيره، وبصيت على الصاله ووقتها شوفت ابويا وهو نازل على امي بالضرب وهو بيقولها:
-اتي ليكي عين تتكلمي وتبجحي، مش كفايه اللى عملتيه زمان، ولا نسيتي انتي عملتي ايه.
وقتها امي ردت عليه وقالتله:
-لا مانستش يا عطيه، غلطه عمري اني صدقتك زمان، انت السبب للحاله اللى انا فيها دلوقتي، كنت ست بيت محترمه ومتجوزه من راجل محترم، منك لله ضيعتني وحولتني من ست بيت لـ وحده شحاته بتتسول من الناس وبتذلل ليهم، الله يرحمه زكريا، فاكر زكريا يا عطيه ولا نسيته.
لما ابويا سمع اسم زكريا اتعصب واتعفرت، ولقيته مسك امي وفضل يضرب فيها بطريقه غريبه وكان زي المجنون، وفضل يضربها بأي حاجه تيجي قدامه من غير عقل، وفي الاخر زقها على الحيطه ولما اتخبطت بالشكل ده وقعت على الارض وماتحركتش، ووقتها هو راح نحيتها وفضل يحركها ويقولها:
-مالك يا زينب، انتي نمتي ولا ايه، قومي يا زينب قومي.
بس امي ماتحركتش او ردت عليه، وفضلت في الحاله اللى هي فيها دي ووقتها لقيته خرج من البيت وهو بيجي وهو عمال يقول:
-ماكنتش اقصد، انا ماكنتش اقصد.
وقتها انا خرجت من اوضتي وبصيت على امي، ووقتها لقيتها ماتت، وفضلت مصدومه لما لقتها بشكل دا، وماكنتش فاهمه اعمل ايه، وبعد تفكير قررت اللى هعمله، رغم ان عطيه هو اللى قتل امي، بس بالنهايه هو ابويا، او دا اللى كنت مفكراه وقتها، وعلشان كده قررت وقتها اني مش لازم اخسره زي ما خسرت امي، وعلشان كده قررت اني هحاول انقذه من السجن.
انا شلت امي وحطتها على السرير، وكمان غيرتلها هدومها ومسحتلها الدم من عليها، وبعدها قررت اروح اجيب الدكتور علشان يشوف امي، ولما جبت الدكتور وشافها قالي:
-ايه اللى حصلها، وشها وجسمها مليان كدمات.
وقتها خوفت، اصلي ماكنتش عارفه انه هيعرف الحقيقه بالسهوله دي، ووقتها قولتله:
-معرفش هي اللى فضلت تخبط راسها في الحيط لما اتخانقت مع ابويا وهو سابلها البيت ومشي.
الدكتور بصلي كده بطريقه حسيت انه مش مصدق كلامي، وقالي:
-مش هقدر اكتبلك تصريح بالدفن، ولازم ابلغ الشرطه، في شبه جنائيه.
حاولت امنعه بس ماعرفتش، وراح واتصل على الشرطه فعلا، ولما جت الشرطه وسألوني عن اللى حصل قولتلهم ان امي هي اللى عملت في نفسها كده، ولما مسكوا ابويا وعرف اللى انا قولته اكد على كلامي، بس الجيران اكدوا للشرطه انهم كانوا بيسمعوا صوت ابويا وهو بيتخانق مع امي، وعلشان امي كانت تحت تأثير المخدرات، وقتها المحكمه علشان ماكنش عندها دليل ان ابويا هو اللى ضربها وموتها، اتحكم عليه بالسجن 3 سنين بس، وكنت فاكره وقتها اني عملت الصح، انا كنت مفكره وقتها اني مش لازم اخسره هو كمان زي ما خسرت امي، وكنت مفكره انه هيفوق لنفسه من بعد الى حصل.
بعد مرور ال 3 سنين، خرج ابويا من السجن، ولما خرج في البدايه كان بيتعامل معايا كويس، بس بعدها ابتدي يرجع لعادته القديمه، وكان بيطلب مني ارجع اشتغل في الشحاته والتسول، مع اني سبت التسول من ساعه لما دخل السجن واشتغلت في مصنع، ولقيته بيقولي:
-الفلوس اللى بتقبضيها من المصنع دي مش هتكفينا، علشان كده لازم ترجعي لشغلانتك القديمه.
-لا يا بابا، انا خلاص بطلت الشغلانه دي، انا عاوزه اعيش زي أي وحده بكرمتها.
-كرامه ايه وزفت ايه، انتي لازم تسمعي كلامي، شغلانتك دي مش هتأكلنا عيش حاف.
-انا قولتلك اني مش هرجع للشغلانه دي، لو عاوز روح انت اشحت، انا خلاص اخترت طريقي.
