رواية فوضى لطيفة الفصل الأول 1 بقلم دنيا شعبان

 


رواية فوضى لطيفة الفصل الأول بقلم دنيا شعبان 


= معلش، هو آدم جاي يتجوز ولا جاي يعيّن حد يرعاه؟

كانت سلوى واقفة في المطبخ بتراجع على الأكل للمرة العاشرة، بينما رنا قاعدة على الكرسي وبتراقب حركة أمها بابتسامة ساخرة.

= يا ماما هو إحنا مستنيين رئيس الجمهورية؟ إنتِ من الصبح في المطبخ، والناس جاية تتقدم لي فرح مش جاية تفتح مطعم!

_ عيب يا رنا، عيب الكلام ده، دي أول زيارة والناس ليها احترامها.

= وأنا قولت حاجة؟ أنا بس مستغربة إنك عملتي أكل يكفي سكان العمارة كلها.

_ يا بنتي قومي شوفي أختك بدل الرغي ده.

= أختي بتجهز، وأنا قاعدة أجهز نفسي نفسيًا للزيارة دي.

التفتت سلوى إليها باستغراب.

_ تجهزي نفسك ليه؟

= عشان أنا مش مرتاحة لي ملك أخت الأستاذ آدم ده.

_ وإنتِ عرفتيها منين عشان مش مرتاحة لها؟

= شوفتها في الصورة اللي آدم بعتها ل فرح ، وشكلها كده من النوع اللي بيحب يتكلم كتير.

_ يا بنتي ما تحكميش على الناس من صورها.

= حاضر يا ماما، هحكم عليها من كلامها.

ضحكت سلوى رغمًا عنها، ثم عادت لمراجعة الأطباق.

في الغرفة، كانت فرح تقف أمام المرآة، ترتدي فستانًا هادئًا بلون فاتح، بينما رنا دخلت عليها بعد أن طرقت الباب طرقتين سريعتين.

= إيه يا عروسة؟ خلصتي؟

_ أيوه، إيه رأيك؟

= حلوة، بس متوترة ليه؟

_ مش عارفة، حاسة إن الموضوع غريب شوية.

= غريب إزاي؟ ده عريس جاي يتقدم، مش داخلين عملية جراحية.

_ يا رنا بقى، أنا بتكلم بجد.

اقتربت رنا منها وعدلت لها خصلة من شعرها.

= بصي يا فرح، إنتِ مش رايحة تثبتي إنك تستاهليه، ولا رايحة تعملي اختبار قبول عند عيلته. اللي هيعجب بيكي أهلاً وسهلاً، واللي مش هيعجبه حاجة فيكي يشرب من البحر.

_ رنا!

= إيه؟ هو أنا قولت حاجة غلط؟

_ عايزاكي تهدي شوية، مش ناقصين مشاكل.

= أنا هادية جدًا، بس مش هسمح لحد يضايقك.

ابتسمت فرح واحتضنتها.

بعد دقائق، رن جرس الباب.

سلوى:
_ يا ساتر يا رب، جم! رنا افتحي الباب يا حبيبتي.

قامت رنا وهي تتمتم:

= يا رب استر، أول اختبار في تاريخ العيلة.

فتحت الباب، فوجدت آدم واقفًا في المقدمة، وإلى جواره والدته نادية، وملك التي كانت تمسك حقيبتها وتنظر حولها بفضول.

ـ السلام عليكم.

= وعليكم السلام، اتفضلوا.

دخل الثلاثة، واستقبلتهم سلوى بترحاب شديد.

_ أهلًا وسهلًا، نورتونا، اتفضلوا يا جماعة.

ـ ربنا يخليكي يا حاجة سلوى، البيت منور بأصحابه.

صافحت نادية سلوى، ثم جلست على الأريكة، بينما آدم كان يحاول إخفاء ابتسامته وهو يبحث بعينيه عن فرح.

ملك:
ـ إزيك يا طنط؟ عاملة إيه؟

_ الحمد لله يا حبيبتي، إنتِ عاملة إيه؟

ـ كويسة.

جلست رنا بجوار أمها، وبدأت تنظر إلى ملك التي كانت تتفحص المكان بعينيها.

ملك:
ـ ما شاء الله، الشقة جميلة، بس واضح إنها قديمة شوية.

رفعت رنا عينيها إليها، بينما ابتسمت سلوى بهدوء.

_ ربنا يخليكي يا حبيبتي، دي شقة العمر، إحنا بقالنا فيها سنين.

ملك:
ـ ربنا يبارك لكم فيها، أنا بس بحب الشقق الحديثة والمساحات المفتوحة، بحسها أشيك.

= أيوه طبعًا، كل واحد وذوقه، وفيه ناس بتحب البيوت اللي فيها ذكريات مش مجرد حيطان جديدة.

نظر آدم إلى رنا، ثم حاول كتم ضحكته.

ـ إنتِ اسمك رنا صح؟

= أيوه، أخت العروسة.

ـ تشرفنا.

= الشرف لينا.

نادية:
_ هي فرح فين يا سلوى؟ مش هنشوف العروسة؟

_ ثواني يا حبيبتي، هندهلها.

نهضت سلوى، وقبل أن تتحرك رنا قالت:

= أنا هجيبها يا ماما.

دخلت رنا الغرفة، فوجدت فرح واقفة بجوار الباب.

= تعالي يا ست البنات، الجماعة وصلوا.

_ طب قوليلي، عاملين إيه؟

= كويسين، بس أخت العريس بدأت من بدري.

_ بدأت إيه؟

= ولا حاجة، مجرد مراجعة عقارية للشقة!

_ رنا، والنبي اهدي.

= أنا هادية، إنتِ بس اطلعي.

خرجت فرح بصحبة أختها، وما إن رآها آدم حتى اعتدل في جلسته وظهرت ابتسامته بوضوح.

ـ إزيك يا فرح؟

ابتسمت بخجل.

_ الحمد لله، إزيك يا آدم؟

ـ الحمد لله، عاملة إيه؟

_ كويسة.

نادية:
_ ما شاء الله، قمر يا حبيبتي، ربنا يحفظك.

_ تسلمي يا طنط.

ملك:
ـ إيه ده، إنتِ أطول مما كنت متخيلة!

نظرت فرح إليها بابتسامة.

_ خير؟

ـ لا أصل آدم كان قايل إنك قصيرة شوية.

التفت آدم إليها بسرعة.

ـ أنا مقولتش كده يا ملك!

ـ يا ابني ما أنا بهزر!

رنا:
= أهو بدأنا، طب كويس إنك وضحتي إنك بتهزري عشان كنت هفهم إنك جاية تقيسي أختي.

كتم آدم ضحكته، بينما نظرت نادية إلى رنا بنظرة غير مرتاحة.

نادية:
_ إنتِ دمك خفيف يا بنتي.

= الحمد لله يا طنط، بنحاول.

سلوى:
_ اتفضلوا يا جماعة، القهوة جاهزة.

بدأت سلوى في تقديم المشروبات، وجلست فرح بجوار أمها، بينما أخذت ملك تتحدث عن تجهيزات الزواج.

ملك:
ـ بصراحة أنا بحب كل حاجة تكون متخططة من بدري، يعني الفرح مثلًا لازم يكون في مكان كبير، وفستان العروسة يكون مميز، والشبكة طبعًا لازم تكون على مستوى.

نادية:
_ ربنا يكرم آدم ويقدر يعمل كل اللي نفسه فيه.

آدم:
ـ يا ماما أنا لسه قاعد، هو إحنا دخلنا في الفرح والشبكة ليه؟

ملك:
ـ إيه يا آدم؟ ما إحنا بنتكلم، ولا إنت خايف من المصاريف؟

ـ لا مش خايف، بس لسه بدري على الكلام ده.

ملك:
ـ طب ما نعرف من دلوقتي، عشان نبقى عارفين إحنا داخلين على إيه.

رنا:
= هو إنتوا جايين تتقدموا لفرح ولا عاملين اجتماع ميزانية؟

ضحك آدم بصوت منخفض، بينما سلوى حاولت تغيير الموضوع.

_ معلش يا جماعة، رنا بتحب تهزر كتير.

نادية:
_ لا يا حبيبتي، ربنا يخليها لكم، بس البنت لما تتجوز لازم تكون عارفة إن الجواز مسؤولية، مش مجرد فستان وفرح وخروجات.

فرح:
_ أكيد يا طنط، وأنا عارفة إن الجواز مسؤولية.

ملك:
ـ بالضبط، يعني مثلًا آدم متعود إن كل حاجة تكون جاهزة له، أكله وهدومه وكل حاجة، هو مش بيعرف يعتمد على نفسه أوي.

التفتت رنا إليها.

= معلش، هو آدم جاي يتجوز ولا جاي يعيّن حد يرعاه؟

ـ رنا!

قالتها سلوى بتحذير، لكن رنا لم تتراجع.

ملك:
ـ لا يا حبيبتي، أنا بوضح لها بس، عشان أخويا متعود على نظام معين في البيت.

= وأنا مش فاهمة إيه علاقة النظام ده بأختي؟ هو مش آدم راجل كبير ويقدر يشيل مسؤولية نفسه؟

ـ طبعًا يقدر، بس أنا عارفة أخويا كويس.

= وأنا عارفة أختي كويس، ومش محتاجة حد يشرح لها هتعمل إيه بعد الجواز.

آدم:
ـ خلاص يا جماعة، إحنا لسه بنتعرف على بعض، مش لازم نحول القعدة لمناقشة في مين هيغسل لمين.

نادية:
_ لا يا آدم، دي حاجات لازم تتعرف من الأول، عشان محدش يزعل بعد كده.

فرح:
_ عند حضرتك حق يا طنط، بس أنا كمان عندي حاجة أحب أوضحها.

نظر الجميع إليها.

_ أنا بحب البيت واهتم بالتفاصيل، وبحب أعمل حاجات كتير بنفسي، لكن ده مش معناه إن مسؤولية البيت كلها تبقى عليا لوحدي. أنا وآدم هنكون شركاء، وكل واحد فينا هيساعد التاني على قد ما يقدر.

آدم:
ـ وأنا موافق على الكلام ده جدًا.

ملك:
ـ أيوه بس الكلام سهل، إنما التنفيذ حاجة تانية.

رنا:
= طب ما نستنى لما يتجوزوا ونشوف التنفيذ، ولا إنتِ مستعجلة على المشاكل قبل الفرح؟

نادية:
_ يا بنتي إنتِ بتردي على كل كلمة ليه؟ إحنا قاعدين نتكلم عادي.

= وأنا برد عادي يا طنط، هو الكلام لما يطلع من ناحيتي بيبقى خناقة؟

سلوى:
_ يا رنا، كفاية يا حبيبتي، إحنا بنتناقش عادي.

ثم التفتت إلى نادية بابتسامة هادئة.

_ معلش يا نادية، البنات لسه صغيرين، وكل واحدة فيهم بتحب أختها وخايفة عليها.

نادية:
_ ربنا يخليهم لك يا سلوى، بس أنا كمان بخاف على ابني، ومش عايزاه يتعب بعد الجواز.

فرح:
_ ربنا يخليه لحضرتك، وأنا كمان مش عايزة أتعبه، ولا عايزة هو يتعبني، إحنا المفروض نكون راحة لبعض.

آدم:
ـ هو ده الكلام اللي أنا كنت مستنيه أسمعه.

ملك:
ـ يا سلام! هو إحنا كده هنسمع شعر النهارده؟

آدم:
ـ وإنتِ مالك يا ملك؟ ما تسيبينا نفرح شوية!

ضحكت رنا، بينما نظرت ملك إليه بغيظ.

ـ إيه يا آدم؟ هو أنا مش أختك؟

ـ أختي وحبيبتي، بس مش لازم تعلقي على كل كلمة بقولها.

ملك:
ـ خلاص يا سيدي، اتجوز بقى ونسانا!

رنا:
= أهو ده المطلوب، أخيرًا اتفقنا على حاجة!

ضحك آدم هذه المرة دون أن يستطيع منع نفسه.

ــــــــــــــــــــــــــــــــــــــــ⁦...♡

بعد مرور بعض الوقت، دخلت سلوى المطبخ لتجهز الأكل، ولحقت بها فرح لتساعدها، بينما ظلت رنا مع الضيوف.

ملك:
ـ هو إنتِ مش هتساعدي مامتك؟

= لا، أنا مستنية حضرتك تقومي تساعديها.

ـ نعم؟!

= أصل إنتِ من ساعة ما جيتي وإنتِ بتقيّمي الشقة والناس والأكل، قولت يمكن عندك خبرة في الضيافة.

آدم:
ـ رنا، ارحمينا بقى!

= أنا ساكتة أهو، بس أختك مش مدياني فرصة.

نادية:
_ يا بنتي إحنا ضيوف، مش لازم كل كلمة تتحسب علينا.

= وأنا معنديش مشكلة مع وجود ضيوف، بالعكس، إحنا مبسوطين بيكم، بس الضيف لما يدخل بيت الناس المفروض يحسسهم إنهم في بيتهم، مش يحسسهم إنهم في امتحان.

ساد صمت قصير.

آدم نظر إلى ملك بنظرة تحذير، ثم التفت إلى رنا.

ـ عندك حق، بس خلينا نعدي اليوم على خير.

= أنا معنديش مانع، بشرط محدش يضايق أختي.

نادية:
_ محدش ضايق أختك يا حبيبتي، وإحنا جايين نطلب إيدها لابننا، يعني أكيد ليها معزة عندنا.

= ربنا يديم المحبة يا طنط.

ــــــــــــــــــــــــــــــــــــــــ⁦...♡

في المطبخ، كانت فرح تضع الأطباق على السفرة، بينما سلوى تراقبها بابتسامة.

_ إنتِ كويسة يا فرح؟

_ أيوه يا ماما، ليه؟

_ حاسة إنك متضايقة.

_ شوية، بس عادي.

_ بصي يا بنتي، أنا مش عايزاكي تزعلي من حد، ولا عايزاكي توافقي على حاجة إنتِ مش مقتنعة بيها عشان ترضي الناس. آدم هو اللي هتعيشي معاه، ولازم تكوني مرتاحة.

نظرت فرح إلى أمها وابتسمت.

_ ربنا يخليكي ليا يا ماما.

_ ويخليكي ليا يا حبيبتي، ويكتب لك الخير.

ــــــــــــــــــــــــــــــــــــــــ⁦...♡

عادت فرح وسلوى إلى الصالون، وبدأ الجميع يتناول الطعام.

ملك:
ـ الأكل حلو أوي يا طنط، بس أنا مش بحب الأكل اللي فيه دهون كتير.

سلوى:
_ ألف هنا يا حبيبتي، كنت عاملة شوية أكلات مختلفة عشان كل واحد يلاقي اللي يحبه.

ملك:
ـ تسلم إيدك، بس أنا بصراحة متعودة على أكل ماما، هي بتعمل الأكل بطريقة مختلفة شوية.

رنا:
= طب ما تاكلي من أكل طنط نادية لما تروحي، إحنا مش هنزعل.

آدم كاد يختنق من الضحك، فناولته فرح كوب الماء وهي تحاول ألا تضحك.

ملك:
ـ هو إنتِ لازم تردي على كل حاجة؟

= لا والله دا أنا طيوبة خالص، بس أنا اجتماعية وبحب أشارك في الحوار.

آدم:
ـ رنا، أنا بدأت أخاف من يوم الجواز.

ىنا:
= متخافش يا آدم، إحنا لسه في مرحلة التعارف، ولسه عندنا إمكانيات كتير!

ضحكت سلوى، وحتى نادية ابتسمت رغمًا عنها.

ــــــــــــــــــــــــــــــــــــــــ⁦...♡

بعد انتهاء الزيارة، وقف آدم يستعد للمغادرة، ثم اقترب من فرح قليلًا.

ـ انبسطت إني شوفتك النهارده.

_ وأنا كمان.

ـ بس أختك دي محتاجة أقعد معاها قعدة مخصوص.

ابتسمت فرح.

_ ليه؟ زعلتك؟

ـ لا، دي خوفتني على مستقبلي!

ضحكت فرح بخجل.

ـ رنا طيبة، بس مبتحبش حد يضايقني.

ـ وأنا كمان مش هحب حد يضايقك، حتى لو كانت أختي.

نظرت إليه فرح بابتسامة، قبل أن تقاطعهم ملك:

ـ يلا يا آدم، هو إحنا هنبات هنا؟

ـ يا بنتي ما تسيبيني أودع الناس!

رنا:
= لا يا ملك، إحنا مش مستعجلين، اقعدوا براحتكم، البيت بيتكم.

ملك:
ـ تسلمي يا حبيبتي، بس إحنا لازم نمشي.

= مع السلامة، ونورتونا.

خرجوا أخيرًا، وأغلقت رنا الباب، ثم استدارت إلى أمها وفرح.

= ها، إيه رأيكم؟

سلوى:
_ والله يا بنتي الناس شكلهم طيبين، وربنا يتمم على خير.

رنا:
= طيبين؟ يا ماما دي أخت العريس كانت هتعمل لنا جرد على محتويات الشقة!

فرح:
_ رنا، بلاش تبدأي.

= أنا؟ ده أنا كنت ملاك النهارده، لو كنت اتكلمت براحتي كان زماننا بنودعهم من البلكونة.

ضحكت سلوى، بينما جلست فرح على الأريكة تفكر.

_ مش عارفة يا ماما، بس أنا حاسة إن ملك مش هتكون سهلة.

اقتربت سلوى منها وربتت على كتفها.

_ يا حبيبتي، متحكميش على حد من أول قعدة، الأيام هتوضح لنا كل حاجة، وإحنا ندعي ربنا يكتب لك الخير.

أما رنا فجلست بجوار أختها وقالت بجدية مصطنعة:

= أنا بس عايزة أعرف حاجة واحدة.

_ إيه؟

= هو آدم ده بيحبك قد إيه؟

_ رنا!

= أصل لو بيحبك فعلًا، يبقى لازم يعرف إن الجواز منك مش هيكون مجرد جواز من فرح، ده هيكون اشتراك عائلي مدى الحياة معايا!

انفجرت فرح وسلوى في الضحك، بينما رفعت رنا حاجبيها بثقة.

= وأنا مش هتنازل عن دوري في المسلسل!


تعليقات