رواية خلف الأضواء الفصل الثاني والعشرون بقلم نور الهادي
الدكتورة: اهتمي بنفسك أكتر، لو مش عشانك، عشان ابنك.
رفعت ديما عينيها للدكتورة بشدة وقالت بصدمة:
ديما: ابني؟!
الدكتورة: متعرفيش إنك حامل؟
توقفت عيون ديما بصدمة.
قالت ديما باستغراب:
- حامل؟!
قالت الدكتورة:
- المفروض تكوني عارفة.
قالت ديما:
- معرفش، الفترة الأخيرة كان عندي ظروف كتير.
قالت الدكتورة:
- مفيش مشكلة، المهم إنك عرفتي دلوقتي عشان تهتمي بنفسك أكتر من كده.
قالت ديما:
- ليه؟ أنا في الشهر الكام؟
قالت الدكتورة:
- بداية الرابع.
بصتلها ديما بشدة، وبصت على بطنها، فقالت الدكتورة:
- متتوتريش، الإجهاد كان عليكي. إنتِ بس البيبي حالته كويسة... ننتبه أكتر المرادي بقى.
.....................
كانت ريم قاعدة ساكتة، بصلها مراد من سكوتها وقال:
- اسمك ريم؟
أومأت له ريم، فقعد مراد جنبها وقال:
- متقلقيش، ديما كويسة.
كانت ريم بتعيط، فسكت مراد وبصلها.
قالت ريم:
- وإنت مين؟
قال مراد:
- أخوها.
قالت ريم:
- ديما عندها أخ؟! يعني... إنت أخويا أنا كمان؟
ابتسم وقال:
- أكيد، اعرفي اسمي كويس.
ابتسمت ريم، وخرجت ديما. قامت ريم وراحتلها بسرعة.
بصلها مراد وهو بيقف وقال:
- الدكتورة قالتلك إيه؟
قالت ديما:
- ضغط واطي.
قال مراد:
- إنتِ كويسة دلوقتي؟
قالت ديما:
- آه، شكرًا يا مراد.
قال مراد:
- بتشكريني كتير... بس أنا معملتش حاجة.
قالت ريم:
- ديما، إحنا هنروح فين؟ ماما...
قالت ديما:
- هحاول أكلمها، كانت قلقانة عليكي.
قالت ريم:
- وجاسر... هشوفه تاني؟ هتاخديني هناك عنده؟
قالت ديما:
- لا... معدش فيه جاسر يا ريم.
بصلها مراد من اللي قالته، وهو متابعها بتركيز وفضول.
...........................
قالت مي بصدمة:
- ده بجد اللي بتقوله ده يا أسامة؟
قال أسامة:
- مش متخيل الفكرة.
قالت مي:
- وليه لأ؟ مشفتش راشد كان أقربله من عيلته، واهتم بيه، وافتكرناه مجرد تابع مخلص، طلع عمه!
قال أسامة:
- وليه يخبي؟ لأنه طلع في الآخر سبب قتل أخوه ومراته.
سكتت مي بحزن وقالت:
- جاسر إزاي استحمل كل ده؟
قال أسامة:
- جاسر بيعافر جواه عشان ميبقاش زيه. أنا شفت عين جاسر وهو عايز يقتله، بس مقدرش يضرب نار عليه.
قالت مي باستغراب:
- لأن جاسر كان انتقامه هو كيانه وهدفه.
قال أسامة:
- كنت فاكر كده، بس لما ظهرت ديما، جاسر بقى ليه حياة... بقى يحسب خطواته لأنه عايز يبقى ليه حياة معاها. مش عايز يدمر الكون اللي في دماغه... هو بقى يحسب الصح والغلط عشان ميضيعش نفسه، عشان ديما. لكن في الأول مكنش فيه أي سبب أو خسارة يخاف منها. دلوقتي بقى فيه خسارة اسمها ديما.
قالت مي:
- عايز تفهمني إنه مخسرهاش؟ ديما لازم تعرف إن جاسر بيحبها بجد، مع إنه غلط، بس ده كان قبل ما يحبها.
قال أسامة:
- دي النقطة اللي شايفاها ديما. إنها حبت جاسر وشافته حبيبها في ظل ما هو كان بيأذيها... هي شايفة إن الوهم والحب اللي عاشته كان لوحدها هي. دي مش حاجة تضايق؟ إن يكون ليك شخص أمان، وهو مستني يأذيك ويغدر بيك... بتوجع يا مي.
قالت مي:
- وجاسر متوجعش يا أسامة؟ جاسر أكتر حد اتوجع ولسه بيتوجع... في ظل ما شافش الراحة، مش راضيين يسيبوه يرتاح. ده مش عدل.
مشيت وسابته، فنظر لها أسامة، وتنهد ومشي وراها.
قال:
- مي!
قالت مي:
- فين جاسر دلوقتي؟
قال أسامة:
- خرج من امبارح، أعتقد بيدور عليها.
سكتت مي، فلفها أسامة وقال:
- أنا كمان مضايق زيك. إحنا اللي عشنا معاهم وشوفنا حبهم... هتبقى خسارة كبيرة لو مرجعوش.
سكتت مي، ولمسها أسامة وقال:
- أول مرة أشوفك مضايقة كده.
نظرت مي لأسامة، وقربت منه ومسكت وشه، وكسرت الحواجز اللي بينهم. اندمج أسامة وهو بيقربها منه، لكن مي بعدت، وأسامة كان بيبصلها بشدة من اللحظة اللي جمعتهم.
قال:
- مي...
بعدت مي عنه من غير ولا كلمة ومشيت.
...........................
رجع مراد البيت، وشاف والدته قاعدة ساكتة.
قال:
- بابا هنا؟
قالت ميرفت:
- آه، بلاش تدخله دلوقتي، لأنه مضايق.
قال مراد:
- ليه؟
قالت ميرفت:
- مش لاقي بنت منى.
قال مراد:
- ريم؟
قالت ميرفت باستغراب:
- ريم؟! لا، ديما. مين ريم؟
اتوقفت عيون مراد للحظة، لأنه عارف إن ريم مع ديما.
قال:
- هي ديما ضاعت؟
قالت ميرفت:
- جاسر الهاشمي جه هنا وسأل أحمد عنها، وأحمد بيدور ومضايق من ساعتها.
سكت مراد، لأن أحمد في مكانة والده، حتى لو مجمعهمش دم. هو مش بيناديه غير بابا، لأنه بيشوفه أبوه الحقيقي.
دخل عند أحمد المكتب وقال:
- في أخبار عن ديما؟
قال أحمد:
- مين قالك؟
قال مراد:
- ماما.
قال أحمد:
- لازم ألاقيها. مش هيبقى هي والزمن عليّا، حتى لو مش عايزاني... على الأقل تبقى قدام عيني.
مراد كان عايز يقوله، لكنه سكت بسبب وعده لديما، ومكنش عايزها تحس إنه استغل احتياجها ليه عشان يوصل أحمد ليها.
..........................
كان جاسر في عربيته، وقف على جنب الطريق ونزل منها، وقال:
- ديمااا!
مكنش لاقيها، ولا هي بترد عليه. مكنش عارف يروح من غيرها، وكان قلقان عليها. فين ممكن تكون راحت؟ افتكر آخر كلام بينهم، وتنهد بضيق وقال:
- ردي يا ديما، كفاية.
رن تليفونه، كانت مي، لكنه مردش. بعتتله رسالة صوتية:
"مستر جاسر، عقود شغلك اتوقفت كتير، سواء في الفن أو الاستثمار، وده بيضر بحضرتك وبشغلك اللي تعبت فيه، وهيخلي المنافسين أعلى منك. المنتجين كتير بيكلموني في غياب كبير ليك في الفترة الأخيرة، وعايزين يعرفوا سببه ويتابعوا معاك أعمال السنة دي. لما تسمع المسج كلمني ضروري."
قفل جاسر تليفونه من غير اهتمام، وخرج سيجارة، وأخد نفس وهو بيتنهد تنهيدة عميقة.
رن تليفونه، ولما لقى اسم روز، شعر بالغضب. لكن فجأة اتبعتتله رسالة، فتحها ولقى صور لديما بين إيد شخص متخيلوش... كان مراد شايلها.
كانت روز بترن على جاسر وهي قاعدة حاطة رجل على رجل، وبتشرب كاس. رد جاسر، والبرود في عينيه.
قالت روز بابتسامة:
- شوفت إني مهتمة بيها أكتر منها، وأعرف مكانها وإنت لأ؟
قال جاسر:
- جبتي الصور دي منين؟
قالت روز:
- مش جبتها، دي صور للإخوات غير الأشقاء... تتوقع ممكن تجمعهم قصة حب؟ عشان بس أعرفك إنك قادر تبقى معايا، هي خلاص نسيتك.
قال جاسر:
- إقامتك انتهت يا روز، هتترحلي بكرة على بلدك.
قالت روز:
- مين قالك؟ ممكن أخد الجنسية وأفضل.
ابتسم جاسر بسخرية وقال:
- هترمي نفسك على مين تاني؟
غضبت روز بشدة وقالت:
- أنا...
قال جاسر بحدة:
- اخرجي من البلد بكرامتك، عشان مخرجكيش على نعشك.
قفلت روز بغضب وخوف من ثقته، وقالت:
- يعني إيه أترحل؟ يعني إيه؟ أكيد بيخوفني... بس مش هخرج من هنا إلا وإنت معايااا.
...........................
كانت ديما نايمة، وعينها مفتوحة، وريم نايمة جنبها بتغط في النوم. لكن ديما عينها مكنتش داقت طعم الراحة أو النوم، ودمعة سالت من عينها، فمسحتها وحطت إيدها على بطنها.
قامت وخدت الدوا اللي الدكتورة ادتهولها، وبعدها فتحت تليفونها، ولقت مكالمات من جاسر. رجعت حطت تليفونها مكانه بعيد عنها.
في اليوم التالي، صحيت ديما وملقتش ريم. خرجت وسمعت صوت، فشافت ريم قاعدة مع مراد، واللي كان جايب شنط.
قالت ريم:
- ديما، صحيتي؟
بصلها مراد وقال:
- جبت فطار. اكتشفت بليل إن التلاجة مفيهاش أكل كفاية.
قالت ديما:
- مكلتش مع عيلتك؟
قال مراد:
- هاكل معاكم لو معندكيش مانع.
قالت ريم:
- ديما بتعرف تعمل أكل حلو أوي.
بص مراد لديما وقال:
- فعلًا؟!
قالت ديما:
- الحياة بتعلمك حاجات حتى لو مش عايزها... الطبخ كان من الشغل اللي جربته أيام الجامعة عشان المصاريف على ماما كانت كتير.
سكت مراد وهو بيبصلها.
قالت ريم:
- ديما، أنا جعانة.
قال مراد:
- يلا نفطر... لما تبقي كويسة تقدري تعملي أكل.
قالت ديما:
- مين قالك إني مريضة؟ شكلي يقول كده؟!!!!!
بصلها مراد من سؤالها الانفعالي، وقال:
- امبارح كنتِ في المستشفى وأُغمي عليكي.
سكتت ديما وفهمت قصده، فاتحرجت. كانت فاكرة إنه بيتكلم عن شكلها أو بيشفق عليها.
قال مراد:
- يلا عشان ريم جعانة.
ابتسمت ريم، ومشيت معاهم. قعدوا على السفرة، وديما كانت بتبص لمراد. لقد كان شخصًا لطيفًا وهادئًا، لا يشبهها.
قال مراد:
- بابا سأل عنك.
بصتله ديما، فقال مراد:
- مقولتلوش إنك هنا، بس واثق إنه هيعرف، لأن مفيش حاجة هتتخبى عنه.
قالت ديما:
- لو خايف تضايقه، أنا همشي.
قال مراد:
- لو مشيتي هيضايق مني أكتر... لما قالي إنك مش في بيت جاسر، كان قلقان عليكي.
قالت ديما:
- بتحاول تعمل إيه يا مراد؟ تستعطفني؟
قال مراد:
- مش مضطر، لأنه والدك... إنتِ مش بتكرهيه، مش كده؟
نظرت له في عينيه وقالت:
- إنت شخص سوي نفسيًا، إنت معانتش زيي، فمش هتشوف وجهة نظري... معرفش لو كنت بحقد عليك ولا بكرهك.
بصلها مراد بشدة، فقالت ديما:
- أنا شايفة شخص عاش في عيلة، وسط أمه ووسط أبوه اللي اداله كل الاهتمام اللي اتحرمت منه... أنا شايفة إني كان ممكن أبقى سوية زيك كده يا مراد.
قال مراد:
- شايفاني خدت منك حياتك؟
قالت ديما:
- إنت ملكش ذنب، بس مترميش ذنب أبوك عشان حبه ليك عليّا.
قال مراد:
- كلمني عنك زمان. أنا كنت عارف إن ليه بنت، تفتكري إزاي لو مكنتش سمعت عنك منه؟ ادي له فرصة يصلح، وأنا عارف إن جواكي شيء مختلف يا ديما. لو كنتِ بتعاني من أي أمراض نفسية، مكنتيش حبيتي ولا وقعتي في الحب وقلبك مريض.
بصتله ديما من اللي بيقوله، فقال مراد:
- جاسر؟! حبيتيه، مش كده؟ بل شايف أكتر من حب.
قالت ديما:
- في قلوب سودا قادرة تحب.
قال مراد:
- بيتهيألك ميبقاش حب... مفيش قلب نقي قادر يحب بجد.
سكتت ديما، وجت صورة جاسر قدام عينيها. مدت إيدها تمسك كوباية المية، لكنها وقعت من إيدها غصب عنها، واتبلت الأرض.
قالت:
- أنا آسفة.
قال مراد:
- إنتِ كويسة؟
أومأت له، وانحنت عشان تلمها، لكن مراد مسكها وقال:
- مش مشكلة، سيبيها عشان متتجرحيش.
بصتله ديما، ومراد كان بينظر ليها وهو ماسك إيدها. ديما اتحرجت وسحبت إيدها، ومراد ارتبك قليلًا وقال:
- محصلش حاجة، ولا يهمك. مجرد كوباية.
سمعوا صوت خبط على الباب فجأة، فراح مراد يفتح، واتصدم جدًا لما شاف جاسر واقف بعيون باردة كالجحيم.
قال مراد:
- جاسر!
قال جاسر:
- ديما هنا؟
وقفت ديما لما سمعت صوته.
قال مراد:
- ديما...
زقه جاسر ودخل، فقال مراد بغضب:
- جاسر، استنى عندك بس!
لكن جاسر متكلمش، وراح يشوف ديما. ولما شافها فعلًا موجودة، قرب منها وقال:
- بتعملي إيه هنا؟
قالت ديما:
- إيه اللي جابك يا جاسر؟
قال جاسر:
- كانت الصورة بجد... إنتِ قاعدة هنا معاه؟
سكتت، فقال جاسر بغضب:
- متتكلمي!
قالت ديما:
- ميخصكش. أقعد معاه، معقدش، ميخصكش يا جاسر. اللي بينا انتهى.
بص جاسر لريم، وبعدها رجع بص لديما، وأدرك إنها مش لوحدها هنا. مسك إيدها وقال:
- امشي.
بصتله ديما وقالت:
- سيبني!
قال جاسر:
- بقولك امشي يا ديييما!
قالت ديما:
- سيبني بقولك! مش هاجي معاك في حتة، أنا مش عايزاااك!
بصلها جاسر من اللي قالته، وقرب مراد منه ومنعه وقال:
- متغصبهاش على حاجة.
نزل جاسر ببوكس على وشه بغضب، فاتسعت عيون ديما وقالت:
- إنت بتعمل إيه؟!
مراد كان بيتألم، لكنه بص لجاسر بغضب.
قال جاسر:
- مين ادالك الحق تدخل بينا؟
قالت ديما:
- أنا اديتهوله.
بصلها جاسر من ردها، فقالت ديما:
- إيه اللي جابك تاني؟ عايز مني إيه؟ متسبني في حالي بقى!
قال جاسر:
- ديما، عارف إنك مجروحة مني، عارف إني غلطت. أنا منكرتش ولا كدبت عليكي، أنا كنت دايمًا صريح معاكي.
قالت ديما:
- إنت كداب، حتى مع نفسك... إنت حياتك كلها كدب في كدب يا جاسر. أنا... ندمانة إني عرفتك.
بصلها جاسر بشدة، ودمعت عيون ديما وهي باصاله، وقالت:
- كفاية، بطل تأذيني.
قال جاسر:
- أذيكي؟!! أنا يا ديما؟
قالت ديما:
- آه، إنت... شوفتك بتأذيني. بيني وبينك الطلاق، أنهينا بقى.
قال جاسر:
- قولتلك مش هطلللّق، مش هطلللّق، سامعاني؟!
قالت ديما:
- وأنا عايزة أتجوز يا جاسر.
بصلها جاسر بشدة، فقالت ديما:
- أنا مش هبقى مغفلة عشان أربط نفسي بيك وتسبني متعلقة بحبالك، تحركني وقت ما إنت عايز وتسيبني وقت ما إنت عايز... سحرك اللي كان على عيني اتشال، أنا مبقتش شيفاك زي الأول.
قرب منها جاسر بخوف وغضب وقال:
- يعني إيه يا ديما؟
قالت ديما:
- يعني أنا هتجوز، ومراد يبقى خطيبي.
بصلها جاسر بصدمة، وبص لمراد بصدمة أكبر.
قالت ديما:
- مفيش حاجة تجمعني بيك، أنا هيكون ليا حياة مع غيرك.
قرب منها جاسر، وفي عينه شر، وقال:
- عارفة بتقولي إيه؟
قالت ديما:
- وواعية لكل كلمة بقولها.
قال جاسر:
- إنتِ مررراتي!
قالت ديما:
- وإنت معدتش جوزي... إنت علاقة انتهت، علاقة خرجت منها خسرانة كل ما أملك، حتى نفسي... بسببك إنت بس.
بصلها جاسر، وقرب منها وقال:
- ديما، اسحبي كلامك... قولي إنها مش الحقيقة.
سكتت ديما، فبصلها جاسر في عينيها وقال:
- مفيش بينك وبينه حاجة، إنتِ متعرفيهوش.
قالت ديما:
- معتقدش إن المعرفة هتفرق. كان في إنسان كنت فاكرة إني أعرفه أكتر من روحي، بس طلعت غلطانة، وهو فوقني.
قال جاسر:
- سامحيني، أنا عارف إني غلطت.
قالت ديما:
- إنت اللي قلتلي إن في أوقات مش لازم تسامحي فيها اللي بيأذوكي، حتى لو كانوا مين... لأن وقتها بتيجي على حساب نفسك. وأنا جيت على نفسي كتير لحد ما إنت موتها... أنا بعمل بنصيحتك يا جاسر، وفوقت، وفعلاً مبقتش أسامح، وخصوصًا إنت...
بصلها جاسر من اللي قالته، فقالت ديما:
- كفاية لحد هنا، امشي.
قال جاسر:
- همشي يا ديما، بس مخلصناش لحد هنا... عايزة ترفعي قضية، ارفعي، لأن محدش قادر يخلصك مني غيري، ومش هسمحلك باللي بتفكري فيه وناوية عليه.
قالت ديما:
- جاسر الهاشمي بنفسه بيمسك فيا ويحاول...
قال جاسر:
- اللي وقف حياته عشانك بيحاول يا ديما.
قالت ديما:
- بتحاول تعيشني وهم، زي ما عيشتني الوهم، أنا هدوقهولك يا جاسر.
مردش عليها، وهو شايف عينيها المجروحة منه. بص لمراد ومشي، ورن على أحمد وهو بيركب عربيته. جاله الرد، فقال جاسر من غير مقدمات:
- ديما لو باتت ليلة كمان عند ابنك، مش هيحصل كويس.
قال أحمد:
- إنت بتقول إيه؟
قال جاسر:
- اللي سمعته. هي قاعدة عنده ورافضة تيجي معايا، وبتقول إنهم هيتجوزوا.
اتصدم أحمد من اللي بيسمعه، فقال جاسر:
- اسمعني يا أحمد، لو كنت إنت اللي ورا الموضوع، صدقني المرة دي مش هتهون عليا لأجل إنك أبوها. كلمتك عشان تاخدها عندك مؤقتًا، بما إنها مش عايزة تيجي معايا، لكن مش هسمح إنها تقعد مع الشخص ده في بيته. واسمع اللي سمعته، أتمنى تفهمها الكلام ده.
وقفل جاسر الخط، وساب أحمد في صدمته، مش من تهديد جاسر، بل من إن ديما طلعت عند مراد.
........................
وصل أحمد لبيت مراد وخبط. فتح مراد الباب وقال:
- بابا.
بصله أحمد، وشاف علامة على خده، وكأنه اتعرض للكم. مسكه أحمد وبص لوشه، فقال مراد:
- جاسر كلمك؟
قال أحمد:
- عندك يا مراد؟
قال مراد:
- وعدتها مقولكش، أنا آسف.
بصله أحمد بضيق وقال:
- هي فين؟
أشار له مراد، فدخل أحمد فورًا. لقى ديما خارجة وريم معاها.
قالت ريم:
- هنروح فين يا ديما؟
قالت ديما:
- امشي يا ريم.
وقفت ريم لما شافت أحمد، اللي بص لها وهي ماشية مع أختها. بص أحمد لديما، وشاف دموعها اللي في عينيها وبتكبحها. بصت ديما لمراد، وكأنها بتتهمه.
قال أحمد:
- مراد مقاليش يا ديما... لأول مرة يكذب عليا عشانك. للدرجة دي مش عايزاني أعرف مكانك؟
مردتش ديما. قرب أحمد منها ووقف قدامها، وقال:
- ليه كلمتيه هو بدالي؟ ليه جيتي هنا؟ مجيتيش على بيتك؟
قالت ديما:
- لأنه مش بيتي.
قال أحمد:
- مين قالك كده؟ قوليلي على اللي قالك، وأنا أدفنه ده بينك غصب عن أي حد وفوق الكل.
قالت ديما:
- محدش قالي، الحقيقة هي اللي بتقول. أنا مليش بيت، حتى المكان اللي اعتبرته بيتي مكنش بيتي من الأول... دي الحقيقة.
قال أحمد:
- ليه بتقولي كده؟
قالت ديما:
- إنتوا اللي خلتوني أقول كددده! إنتتتوا دلوقتي جايين تحاسبوني؟! إنت كمان عمرك ما كنت بريء، فبلاش تاخد دور الضحية، لأنه مش دورك. لو مكنتش بنتك، لو كان ليا أب غيرك...
قبضت على إيدها وهي بتجز على أسنانها، وقالت:
- مكنش زماني هنا، ضعيفة مهزومة في دنيا لوحدي. في كل مرة من وأنا طفلة أحس وأتأكد إن مليش حد أستند عليه... لو كان بس ليا...
قال أحمد:
- كفاية يا ديما.
بدأت تمشي، لكنه مسكها وقال:
- رايحة فين؟
قالت ديما:
- أي مكان.
قال أحمد:
- فاكرة إني هسيبك تبعدي عني تاني بعدما لاقيتك؟ بعدما عرفت إن ليا بنت من صلبي، بعدما عرفت إنك عايشة؟ فكراني هسيبك تبعدي تاني؟ لو كنت سبتك يومها، فأنا كنت مستني فرصة وآخدك، مش إني سبتك لراحتك.
قالت ديما:
- لأ، لراحتي.
قال أحمد:
- لأاا، مش لراحتك!
بصتله من انفعاله، فقال:
- لو فيا كل العبر، لو اتعاقبت كل السنين دي بيكي، فده كفاية. متجيش تكملي عليا العذاب.
قالت ديما:
- وعذابي أنا ده مليهوش أي أهمية؟
قال أحمد:
- ليه يا ديما؟ لييه بس؟
مسك إيدها وقال:
- في وسط الدنيا دي كلها، في وسط أي حاجة تحصلك، لازم تعرفي إني موجود... إني أبوكي غصب عن أي حد، حتى إنتِ. متقدريش تنكري إنك مني ومن دمي.
دمعت عينه، وقرب أحمد منها وقال:
- خليني أصلح اللي عملته. أنا جيتلك مش عشان أعاتبك ولا أزود عليكي، أنا جاي لبنتي.
ديما سالت دمعة من عينها غصب عنها، نزلت دمعتها بقهر، وشفايفها بترتجف بحزن وضعف. قرب أحمد منها، فديما اترمت في حضنه وفضلت تعيط.
بصلها أحمد بشدة، ومراد نظر ليهم. فديما، اللي كانت ثابتة قبل ظهور جاسر، انهار قناعها وبكت قدام أحمد في حضنه. كانت بتبكي على نفسها وبسبب جاسر، وبرغم ذلك، أحمد كان حاسس بمشاعر كبيرة، حتى لو مكنتش بتحضنه إلا في لحظة ضعف.
حضنها جامد وقربها ليه، وكأنه بيحضن طفلة بين إيديه، مش بنت شابة. كان بيحضنها ودموع بتتغلغل في عينيه، العين اللي ما عرفتش غير القسوة والجمود. عينه دمعت بشجن في لحظة عناق ابنته، وهو بيرجعها لأحضانه اللي اتحرم منها سنين.
كان بيتنهد تنهيدة عميقة شقت مسامع الزمن والأنفس، وأعادت غصة قوية في حلقه، من الخوف إن المشاعر دي تتاخد منه تاني.
قال أحمد بندم وتأنيب:
- أنا آسف، حقك عليا.
قالت ديما:
- لو مكنتش عملت كده، مكنتش خدتني منك.
قال أحمد:
- ذنبك وذنبها فيا، ومني. عاقبتيني كفاية.
قالت ديما:
- سألت عنك كتير... ليه اتخليت عني؟ وليه سبتني؟ ليه لما كان حد في المدرسة يضايقني يجيب أبوه وأنا لأ؟ ليه حرمتني من أبسط حاجة ليا وأنا طفلة؟ دورت عليك... مرضيتش أقرب منك بعدما عرفتك، لقيتلك حياتك واسمك وعيلة... العيلة اللي حرمتني إنت منها.
قال أحمد:
- كفاية يا ديما، أرجوكي.
قالت ديما:
- إنت أذيتني زيه، إنت حرمتني من طفولتي وهو كسرلي قلبي... استنيتك كتير، وإنت جيت، بس متأخر.
قال أحمد:
- سامحيني إني اتأخرت.
كان بيسمع صوت بكاها وهو بيعانقها، وكأنها بتشكيله حزنها، وكأنها ملقتش حد غيره، حتى لو لم تعتبره أبوها. فزي ما قال، هي مش بتنكر دمه اللي فيها.
قال أحمد:
- أنا آسف، أوعدك إني هعوضك عن كل ده. أوعدك إن مش هسيب المعاناة طريق ليكي، ولا حزن هيطولك. من النهارده هقف في وش أي حد، حتى لو كان مين. أبوكي مش هيسمح لحد يأذيكي.
قالت ديما:
- حتى لو جاسر؟
صمت أحمد، ثم قال:
- حتى لو جاسر.
قالت ديما:
- أنا عايزة أطلق.
قال أحمد:
- سيبي الموضوع ده على أبوكي.
وكأن أحمد، اللي كان بيعامل جاسر بهينة من أجل ما تسبب له فيه، ومن أجل حقيقة والده وعيلته، نسي كل ده قدام ديما. وكأنه هيعاديه كأب بيطاع لطلب ابنته وحمايتها. فكان أول طلب ليها، ومش هيخذلها فيه بسبب صديقه المتوفى وابنه، حتى وإن كان سببًا في أذية عيلته وتيتيمه. هيبقى أناني من أجلها.
...........
في فيلا أحمد، كانت منى قاعدة ساكتة في الأوضة اللي خلاها أحمد فيها بعدما وعدها يرجعلها بنتها. كانت قاعدة ساكتة، وكأنها للمرة الأخيرة وثقت في راجل تاني.
الأول كان أحمد، اللي اتجوز غيرها بعدها، وإبراهيم اللي عمل معاها زي عسل جارف غارق من الحب، وأخبرها بالوعود الزائفة كبقية الرجال. وصدقته لأنه ساعدها وخلاها تحتضن بنتها، فكانت بتثق فيه، لكنه رجع وغدر بيها. كان من أشباه الرجال؛ ضربها، وسرق مالها، وباع بنتها.
وفي النهاية ضاعت بنتها بسبب جوزها الأول، سبب كل اللي حصل لها... أحمد السيوفي، اللي بنى مملكته واسمه وعيلته الفخمة، وتركها زي ماضٍ يدفنه.
اتفتح الباب ودخلت ميرفت، فقالت منى:
بصتلها منى من نظرتها ومعناها، وقامت فورًا وهي بتخرج بسرعة. وقفت عينيها لما شافت ريم بنتها مع مراد.
قالت ريم:
- ماما!
جريت عليها وحضنتها منى جامد.
قالت ريم وهي بتقبض عليها بقوة:
- إزاي تعملي فيا كده؟ بتقلقيني عليكي ليه؟
قالت ميرفت بلطف:
- الحمد لله إنها رجعتلك.
قالت منى:
- كنتي فين؟ لقيتوها فين؟
قال مراد:
- مش أنا، دي ديما اللي جابتها.
بصت منى لمراد، فقال:
- عن إذنكم، هروح أشوفها.
قالت منى بصدمة:
- هي ديما هنا؟
قالت ميرفت:
- آه، أحمد جاب ديما وريم الفيلا.
..................
كانت ديما قاعدة في الأوضة، فقال أحمد:
- لو احتجتي أي حاجة كلميني، سجلت رقمي في تليفونك.
كانت ديما ساكتة، فقعد أحمد وقال:
- مش عايز أضغط عليكي، بس عايز أتكلم معاكي.
قالت ديما:
- جبتني هنا ليه؟
قال أحمد:
- وجودك هناك كان غلط. جاسر في النقطة دي عنده حق.
بصتله ديما، فقال:
- متخليهوش يمسك عليكي غلطة. هو مرماش اليمين لسه.
قالت ديما:
- رفض.
قال أحمد:
- إنتِ عايزة كده؟ عايزة تطلقي؟
أومأت له ديما.
قال أحمد:
- سبيني، هكلمه. لو رفض، أبوكي هيتصرف.
جه مراد وقاطعهم، ونظر لديما وقال:
- بقيتي كويسة؟
قالت ديما:
- أنا آسفة، بسببي...
قال مراد:
- مفيش حاجة. حطيت نفسي مكانه، وكان معاه حق. حتى لو كنت خطيبك، مفيش حق تبقي عندي.
بصتله ديما من اللي قاله، وبص أحمد لديما وقال:
- إنتِ موافقة على جوازك من مراد؟ التسرع مش حلو، وخصوصًا إنك بتحاولي لسه تخرجي من علاقة.
قالت ديما:
- لو مكنتش موافقة، مكنتش قولتها لجاسر.
بصلها أحمد قليلًا وصمت، ثم قام وقال:
- ارتاحي دلوقتي، وكل حاجة هتمشي زي ما إنتِ عايزة... تعالى يا مراد، عايزك.
أومأ له مراد. وبينما أحمد بيمشي، مراد بص لديما وقعد معاها، وقال:
- ثقي في بابا.
قالت ديما:
- ليه قولت كده؟
قال مراد:
- إني خطيبك... إنتِ قولتي إننا هنتجوز، وأنا عندي رغبة أخليه حقيقة. لو مش موافقة، بلغيني قبل ما أكلم بابا.
بصتله ديما في عينه للحظة، وهو معاها.
......................
رجع جاسر الفيلا، وشاف مي اللي كانت مستنياه.
قالت:
- جاسر.
مردش عليها، فقالت:
- جاسر، مش جاية أكلمك في أمورك الشخصية، بس جه الوقت ترجع تهتم بشغلك.
قال جاسر:
- مي، أنا مش فاضي.
قالت مي:
- العقود اتراكمت، كمان أعمالك. بلغني أرد عليهم بإيه؟ غيبتك هتخلي أي حد يستغل ويطلع من اختفائك ويتشهر.
تنهد جاسر، فقربت منه مي وقالت:
- متضيعش اللي عملته سنين. شغلك أساس نجاحك.
قال جاسر:
- ديما هي اللي مهتم بيها دلوقتي... هرجعها وأرجع كل حاجة معاها. خلال كده متشغلنيش عنها.
مشي، بس مي قالت:
- جاسر، البودي جاردز الصبح راحوا لروز ورحّلوها غصب عنها. شفت لقطات من كاميرات، كانوا واخدينها غصب... حضرتك عندك علم بالكلام ده؟
قال جاسر:
- بتسألي لو كنت السبب أو لأ؟
لف بعيونه ليها بكل جدية، وقال:
- اتأكدي إنها مترجعش هنا تاني.....
بصتله مي، وفهمت إنه هو الفاعل ببرود ولا مبالاة.
قال جاسر: اساااامه
جه اسامه وبص لجاسر الى قال_ الغى الشركه ابى بين شركتى مع راشد سواء ف التمثيل او الاستثمار
قال اسامه_ الموضوع هيبثى كبير لان اسهمك كمان داخله ف شركته
قال جاسر_يبقى ابتدى من دلزقتى...مش عايز ثغره واحده للشغل يبقى فيها راشد سمعتونى مش كده
اومأ له اسامه بتفهم بدون جدال
..............
دخل مراد عند أحمد مكتبه، وكان مستنيه.
قال مراد:
- عايزني؟
قال أحمد:
- اقعد.
قعد وهو بيبصله، فقال أحمد:
- فهمني اللي بيحصل.
قال مراد:
- من حيث إيه؟
قال أحمد:
- موضوع جوازك إنت وديما. إمتى وإزاي؟ ومعتقدش إن في اليومين اللي كانت فيهم عندك...
قال مراد:
- حضرتك عندك مانع من الموضوع؟
قال أحمد:
- بتكلم عن المبدأ... إنت عايز تتجوزها؟
قال مراد:
- آه، عايز يا بابا، وديما موافقة. لو عايز ترجعها تاني، أنا معنديش مانع.
قال أحمد:
- بالنسبة لجاسر؟
قال مراد:
- أعتقد ده شيء يخصها، وطالما ميهمهاش، فهو ميهمنيش.
بصله أحمد قليلًا، فقال مراد:
- إنت رأيك إيه يا بابا؟ عارف إني بحترم رأيك في أي موقف وبقتنع بيه.
قال أحمد:
- أنا شخصيًا معنديش اعتراض عليك. إنت ابني اللي مربيه، يعني لو بقيت زوج لديما، فده هيرضيني أنا شخصيًا.
ابتسم مراد وقال:
- واضح إن كان عندك اعتراض على جاسر من البداية.
قال أحمد:
- مش عارف، بس يمكن لأني شوفتها بتحبه أوي، بس الحب ده أذاها... كذلك إنت متأذيهاش، عشان هتتأذى مني أنا.
قال مراد:
- أوعدك إني هكون عند حسن ظنك.
....................
دخلت منى على ديما، لقتها بتاكل. نظرت منى ليها، فقالت ديما:
بصتلها ديما من وجودها، فدخلت منى وقالت:
- افتكرت إنك... هتقعدي ٣ أيام متاكليش.
قالت ديما:
- المفروض أموت من الجوع.
قالت منى:
- عارفة إن الزعل بيأثر على شهيتك، زي ما كنتي بتعملي زمان. توهميني إنك بتاكلي، وأعرف إنك عايشة على المية. دي طبيعتك، جسمك مبيستقبلش أكل.
قالت ديما:
- الوضع مختلف... مضطرة، حتى لو ببلع غصب عني.
بصتلها منى باستغراب، فقالت ديما:
- أقصد إني مش مجروحة، أنا باكل قدامك أهو.
قعدت أمها قصادها، وديما بتكمل أكل، فقالت منى:
- ديما، إنتِ كويسة؟
سكتت ديما من سؤال أمها اللي سألته بقلق، فقالت منى:
- أنا لسه... احكيلي يا ديما، فيكي إيه؟
قالت ديما:
- شيفاني مريضة؟
قالت منى:
- كأني شايفة حد غير ديما بنتي اللي أعرفها. حصل حاجة تاني؟ احكيلي.
قالت ديما:
- مسبش حاجة تتحكي.
بصتلها منى، فقالت ديما:
- عايزة أنام، بعد إذنك.
عرفت إنها بتقولها تخرج بالذوق. كانت شايفة كسر في بنتها، بس برغم كده مش بتبكي، وده خلاها مختلفة عن حقيقتها.
خرجت منى، بس وقفت وقالت:
- كأنك تخنتي؟ بطنك كبرت شوية؟!
بصت ديما ليها وهي بتمشي. فضلت ديما باصة لبطنها، ولمستها وهي بتحاوطها بهدوء وصمت.
.....................
كان جاسر قاعد في الفيلا في الجنينة، وأحمد قدامه، اللي جاله في بيته لأول مرة، وجاسر رحب بيه ودخّله. حطت الخدامة القهوة ليهم.
قال أحمد:
- ديما عندي في البيت.
قال جاسر:
- عارف.
قال أحمد:
- بس مش ده اللي أنا جاي لك عشانه.
قال جاسر:
- هات اللي عندك، عارف إن مجيئك وراه حاجة.
قال أحمد:
- ليه مبعدتش ديما عنك حتى بعدما عرفت إنها بنتي؟ كان عشان تستخدمها عليا أنا بس؟
قال جاسر:
- مقدرتش أبعدها.
قال أحمد:
- وضح أكتر. معتقدش إنه حب، لأن هي اللي حبت وإنت خونتها.
قال جاسر:
- مقتنع باللي بتقوله؟ وإنت بذات نفسك اللي بلغتني بروز، لأنك عارف إنها قاصدة تدمر علاقتي بديما.
قال أحمد:
- وإنت اللي سمحتلها بده.
قال جاسر:
- أنا مخونتهاش.
قال أحمد:
- طلقها يا جاسر.
قال جاسر بحنق:
- مش إنت اللي تأمرني يا أحمد السيوفي.
قال أحمد:
- مش أنا، دي رغبة ديما.
توقفت عينا جاسر، فهي لا تزال مصرة على طلاقها ولم تهدأ كما ظن.
قال أحمد:
- بشكرك، لأن بسببك رجعت معايا وقاعدة عندي في الفيلا... بس مقدرش أخلف بوعدي ليها.
قال جاسر:
- لو اللي بتفكر فيه صح، تبقى بتغلط غلط كبير.
قال أحمد:
- مش أنا اللي قررت، هما اللي قرروا وفاجئوني بيه. بس ديما مكنش عندها اعتراض، هي عايزة مراد.
قال جاسر:
- إنت عارف إن اللي بتتكلم عنها تبقى مرااااتي، باسمي! اللي بتخطط تجوزها لابنك دي على ذمتي أنا.
قال أحمد:
- لو كانت تهمك مكنتش سبتها.
قال جاسر:
- سبتها عشان تهدى، مش عشان تاخدها مني.
قال أحمد:
- تبقى غلطان، لأنك لما تسيب النار بتزيد، مش بتطفى.
بصله جاسر من اللي بيقوله، فقام أحمد وقال:
- ديما لأول مرة تطلب مني طلب، متتوقعش مني أقف في وشها أو حتى أخذلها... طلقها يا جاسر، عشان الأمور متتصاعدش أكتر من كده.
مشي، بس جاسر قال:
- أحمد!
وقف أحمد وبصله، فقال جاسر:
- أنا مش هطلق ديما. تقدر ترفع قضية.
قال أحمد:
- هتبقى وحشة في اسمك وسمعتك، وإنت معروف، مش شخص عادي.
قال جاسر:
- متفرقش، لأنك هتخسرها. ارفع قضايا اللي إنت عايزها، محدش هيقدر يخليني أطلقها عشان تعمل اللي هي عايزاه... عرفها النقطة دي، وبلغها لو مراجعتش عن اللي في دماغها ورجعت بكرة، أنا هقلبها دم.
قال أحمد:
- إنت بتهددني؟ فاكر إنك كده هتخوفها وأنا عايش؟
قال جاسر:
- خاف إنت كمان، لأن الأذية هتطولك وإنت وابنك... بلاش تلعبوا على النقطة دي. سيبت كل حاجة عشانها... مفيش طلاق إلا بموتي.
بصله أحمد من نبرة جاسر وتحديه بكل قوة وجمود. مشي جاسر وقابل أسامة، ومن غير ما يبصله خرج من عنده.
راح أسامة لجاسر، لقاه قاعد ساكت وماسك الفنجان في إيده جامد.
قال أسامة:
- أحمد كان هنا ليه؟ في حاجة عن ديما؟
كان جاسر ساكت، وعينه مشتعلة. وفجأة الفنجان اتكسر في إيده، ونزل الدم.
اتصدم أسامة وقال:
- جاسر بيه!
قرب منه وقال:
- هاتوا علبة الإسعافات.
وقبل ما يلمسه، جاسر منعه يقربله. بصله أسامة وقال:
- إنت كويس؟
قال جاسر:
- كويس.
مشي وهو بيكبح غصته، وإيده بتقطر دماء وهو مش حاسس.
........................
كانت منى واخدة إيد ريم وماشية.
قالت ريم:
- ماما، هنمشي؟
قالت منى:
- هشوف ديما لو عايزة تيجي معانا.
بدأت تمشي، بس وقفت لما لقت ديما وراها.
قالت منى:
- ديما، إحنا هنمشي.
قالت ديما:
- رايحة فين؟
قالت منى:
- معرفش، بس هلاقي مكان أكيد، متقلقيش. خليكي إنتِ هنا، ولما أرن عليكي ردي عشان أبقى أطمن عليكي كل شوية.
قالت ريم:
- ماما، عايزة أبقى مع ديما.
سكتت منى. قربت ديما من ريم وهي بتحضنها، فبادلتها ريم بابتسامة.
تنهدت ديما وقالت:
- مش هتكوني زي مستقبلك هيبقى أحسن مني يا ريم.
جه أحمد وبص لمنى، وقال:
- رايحة فين؟ بلغوني إنك ماشية.
قالت منى:
- كنت باقية عشان رجوع بناتي، واطمنت عليهم، وريم بقيت معايا. وجودي هنا ملوش لازمة.
قال أحمد:
- خليكي.
بصتله منى، فقال أحمد:
- لحد ما أوفرلك بيت مناسب.
قالت منى:
- مش مضطر تعمل كده، شكرًا.
قال أحمد:
- منى!
بصتله من حدته، فقال بجدية:
- خليكي هنا في الفيلا مع بناتك، محدش هيحرمك منهم. الفيلا كبيرة، محدش هيمشي.
قالت منى:
- بتحاول تخفف من ذنبك؟
قالت ديما:
- خليكي يا ماما، عشان ريم على الأقل.
قالت منى:
- مش عايزة أبقى تقيلة على حد. المكان مش هيريحني.
قال أحمد:
- محدش يقدر يتكلم، والكلمة خرجت مني أنا... لو قصدك على ميرفت، فأنا هتكلم معاها.
سكتت منى وهي بصاله من إصراره على بقائها هنا. لم يكن مكانًا لها، لكنها لم تفكر يومًا إنها ممكن تبقى هنا.
خدت ريم ودخلت.
بص أحمد لديما وتنهدت، فبصت ديما لأبوها وقالت:
- شكرًا.
قال أحمد:
- معملتش حاجة عشان تشكريني عليها.
قرب منها وقال:
- بتتعاملي معايا برسمية يا ديما، لسه مش قادرة تناديني زي مراد... هديكي وقتك، المهم إنك بقيتي معايا.
سكتت ديما، ثم قالت:
- كلمت جاسر؟
قال أحمد:
- جاي من عندك... اتكلمت معاه، بس رفض.
سكتت ديما، فبصلها أحمد وقال:
- متقلقيش، المحامي هيكلم محامي جاسر، ولو موصلش لحل هنرفع القضية.
قالت ديما:
- هيخلص إمتى؟
قال أحمد:
- الموضوع بياخد وقت يا ديما، مش بالسرعة دي... ليه مستعجلة؟ لو عشان مراد، فهو فاهم ده.
قالت ديما:
- اتفقت معاه نعلن الخطوبة.
قال أحمد:
- إنتِ لسه على ذمة جاسر، مش هينفع.
قالت ديما:
- قولت إنك هتهتم بيه؟!
بصلها أحمد من تغيرها، ومكنش فاهم اللي بيدور جواها بالظبط. قال:
- متأكد باللي بتعمليه؟ إنتِ لسه بتحبيه وبتعملي كده عشانه، ولا عايزة تنهي الموضوع بجد؟
قالت ديما:
- اتوهمت إنت كمان لما روحتله إن كان في حب... مكنش فيه، عشان أكون بعمل كده تحت أي سبب اسمه جاسر. لو هو مش عايز ده، براحته، لكن أنا عايزة أشوف حياتي ومش هوقفها عليه، سواء طلق أو لأ.
................
في الغد ف فيلا جاسر، كان المنتج قاعد معاه.
قال المنتج:
- الحقيقة غيابك كان شيء مخيف أوي يا أستاذ جاسر، خصوصًا بعد كمية الشائعات والكلام اللي طلعت وإنت تجاهلته تمامًا.
قالت مي:
- لو طلعنا، هنكون بندّي لكلامهم قيمة.
قال جاسر:
- ادخل في الموضوع.
قال المنتج:
- أكيد أنا متشكر لمي إنها قدرت تحدد ديت، لأنك مش بتنزل شركتك، فقلت نيجي نتكلم عن عقد فيلم جديد بإيرادات عالمية.
رن تليفون جاسر، فرد وقال:
- ألو.
قال أسامة:
- جاسر، إنت فين؟
قال جاسر:
- في إيه؟!
قال أسامة:
- ديما بتتخطب لمراد! حد من رجالتنا اللي قولتله يبقى عند البيت ويتابعها عرف واتصل بيا أبلغك فورًا. إنت تعرف بالكلام ده؟
اتحولت ملامح جاسر، وبان في عينيه شبح مخيف، لدرجة إن المنتج سكت عن كلامه وبص لجاسر من شكله.
قال المنتج:
- أستاذ جاسر؟
بصت مي لإيده اللي قابضة جامد على تليفونه، كأنه هيكسره. قام جاسر وسابهم.
قالت مي:
- جاااسر!
.................
في فيلا أحمد، كانت ميرفت بتبص لمراد بصمت.
قال:
- عايزة تقولي حاجة يا ماما؟
قالت ميرفت:
- أنا معدتش فاهمة حاجة. معنديش اعتراض على الخطوبة، هندّي اعتراض على الفكرة؟
قال مراد:
- بتثقي في ابنك، مش كده؟
قالت ميرفت:
- إنت معجب بديما يا مراد؟ أكيد ملحقتش تحبها.
قال مراد:
- عارفة إنك بتثقي فيا، فمتقلقيش، لأني مش بعمل حاجة غلط.
كانت ديما لابسة فستان أسود، جامد مع ملامحها، ومخفي بروز بطنها اللي محدش يعرف عنه غيرها.احمد لم يكن يتفهم ما يدور او يشعور بالخطأ الى مش عايز يعارض بنته عليه
ديما لاقَت مراد وقف جنبها، فقال:
- العشا هيبقى عائلي بينا. بتفكري في إيه؟
سمعوا صوت، فبصت ميرفت وقالت:
- إيه الصوت ده؟
دخل جاسر بخطوات جامدة، والجنون والشر في عينه بشكل مخيف، وهو داخل زي الإعصار.
قال أحمد:
- جاسر!
قال جاسر:
- بتعملي إيه يا ديما؟
سافت ديما ايده الى عليها شاش وانه متصاب قالت:
- بتعمل إنت إيه هنا؟
قال جاسر:
- اللي بتعمليه غلط كبير... إنتِ مرااااتي وبتتخطبي لغيري!
قال مراد:
- جاسر...
وفجأة شهر جاسر سلاحه على مراد، فاتسعت أعينهم جميعًا.
قالت ديما:
- جاااسر!
قال جاسر:
- فكرت في إيه وإنت بتخطط تتجوز منها؟ إني هسكتلك وأقف أتفرج؟ ولا استنيت أطلقها عشان تبقى ليك؟
دخل الحراس فورًا.
قال أحمد:
- اقفففوا! استنوا!
بصله جاسر ببرود، فقال أحمد:
- نزل السلاح يا جاسر عشان متندمش.
قال جاسر:
- فكرني بهزر؟ أي حد هيفكر يتجوزها هيلبس كفنه قبل البدلة.
قالت ميرفت بخوف:
- ابني... ابعد عنه، سيبه.
كان جاسر بيبص لديما، وقال:
- غلطت لما سيبتك هنا. كان لازم أخدك يومها، حتى لو غصب عنك... بس هعملها النهارده.
مسك أحمد إيد بنته وقال:
- مش هتروح معاك في حتة.
بص جاسر لإيد أحمد بغضب، وقال:
- لو طلبتها، البوليس هو اللي هيجيلها لحد عندي.
قال أحمد:
- أعلى ما في خيلك اركبه. مش هتعمل حاجة غصب عنها، ولا هتاخدها من هنا.
وفجأة عمر جاسر سلاحه، فصرخت ميرفت برعب:
- لااا! أحمد، أرجوووك!
بص أحمد لجاسر بصدمة كبيرة منه ومن بروده، وقال:
- إنت اتجننت يا جاسر؟ إنت بتعمل إيه؟!
قال جاسر:
- لو مسبتهاش، هوريك الجنون اللي على حق... عايزين تخطّبوا مرررراتي وفاكرني هسكت؟ تبقوا غلطانين!
قالت ديما:
- قولتلك مش عايزاك يا جاسر!
قال جاسر:
- مش بمزاجك، سامعاني؟ طلبتيها ونولتيها يا ديما. فكراني هخاف على اسمي؟ فكراني هخاف على نفسي؟ معنديش حاجة أخسرها قدك... اللي كان هيقتل قبل كده عشان انتقامه، اتوقعي إنه يدمر ويقلب كل حاجة عشان يرجعك... بلاش تتسببي في قتله أو قتل أي حد هنا، لو خايفة...
قال أحمد:
- متحاولش تضغط عليها. البوليس جاي، ومش هتهاون معاك في اللي بتعمله، وإنك تهاجم عيلتي.
قال جاسر:
- أعلى ما في خيلك اركبه، معنديش مانع. استنى البوليس، بس هييجي على جريمة بجد. تحب تشوف؟
بصله أحمد بشدة وصدمة، وسط ذهول الجميع من غضب جاسر وشره المطلق.
قالت ديما:
- إنت عايز إيه يا جاسر؟ لسه من شوية...
قال جاسر:
- عايزك... تيجي معايا حالًا، أو أي قرار تاني هتندمي عليه.
قال أحمد:
- وأنا بقولك مش هتيجي، ووريني هتعمل إيه. بنتي مش هتخرج من هنا، ولا هتروح معاك في حتة. بينك وبينها الطلاق.
قال جاسر:
- مش إنت اللي تقووول، واللي بتخططله مش هيحصل.
قال أحمد:
- طلاقك منها هيتم بموافقتك أو غصب عنك. إنت مشتريتهاش، ولا حد يقدر يشتري بنتي.
قالت ديما:
- أنا هاجي معاك يا جاسر.
بصلها أحمد بصدمة، وبصت ديما لأبوها بهدوء وقالت:
- خلاص، أرجوك بلاش الموضوع يكبر.
قال أحمد:
- متروحيش، ميقدرش يقرب منك.
بعدت ديما عن أحمد، ومراد عينه عليها، بتروح لجاسر وهي بتبصله.
قالت:
- أنا هاجي معاك يا جاسر.
مسك إيدها وهو بيسحبها ليه قدام عيونهم كلهم. نظر في عينيها وقال:
- كنتِ عايزة الجنون اللي بجد؟ عايزه تشوفى اللي ممكن أعمله بسببك؟
نظرت ديما له في عينه، فضغط على إيدها أكتر وشالها على ايده بصيتله ديما بشده قالت_بتعمل اى... نزلنى
قبض عليها بامتلاك وهو شايلها بزراع واحده وقال:
- وحياتك يا ديما عندي، مهما عملتي محدش يقدر يلميك غيرى، لأنك ملكي... يا ليا يا للى خلقك
جنون العظمه الى عند جاسر، لو مسكش فيكى كده سبيه💀
شكرا لزيارتكم عالم روايات سكيرهوم
