رواية عنيدة في عصمة قاسي الفصل الثاني
في الغرفة اللي فيها مرام كانت مرام بنت جميلة جدًا بيضاء وعيونها خضرا وشعرها أسود طويل لابسة لبس العمليات نايمة على السرير والحزن مش مفارق ملامحها دخل أياد وهو متعصب
أياد
عجبك اللي عملتي في روحك ده إنتي اتجننتي ولا عاوزة إيه بالظبط يا مرام من ورا اللي عملتيه ده
مرام بدموع
وإنت بتنقذني ليه ما كنت تسبني أموت كنت هرتاح وأريحكم كلكم
أياد حاول يسيطر على أعصابه سحب كرسي وقعد عليه
أياد
وإنتي فاكرة لما تموتي أنا هرتاح يعني
مرام
حاجة زي كده
الاتنين بصوا لبعض وسكتوا للحظة بعدين مرام قالت بحزن
مرام
أياد بصراحة إنت لسه بتحبني
أياد تنهد بهدوء
وفي رأيك لما كنت مش بحبك اتجوزتك ليه
مرام بخجل
ممكن علشان حاسس بالذنب أو خايف من الفضايح مثلًا
أياد ركن بظهره على الكرسي ورد ببرود
أياد
طالما بتقولي كده يبقى إنتي عارفة اللي فيها عيشي وانسي يا مرام وإحنا كده كده اتجوزنا وخلاص
مرام بحزن
يعني إنت بجد خلاص ما بقيتش بتحبني
أياد
مش هكدب عليكي يا مرام وهقول لسه بحبك أنا فعلًا كنت بحبك وبقدرك جدًا بس ما كنتش عاوز يحصل اللي حصل على الأقل قبل الجواز إنتي بالنسبة ليا كنتي طعم سهل يا مرام وسلمتيني نفسك بسهولة قتل الشغف جوايا من ناحيتك
مرام بصت له بصدمة وهي بتحاول تستوعب اللي سمعته
مرام
إنت بتقول إيه يا أياد مش إنت اللي طلبت ده وقولت لي كده كده إحنا هنتجوز
أياد
أيوه أنا اللي طلبت وكنت هطلب مرة وعشرة وألف وأي شاب بيطلب الطلب ده خصوصًا قبل الجواز بس ما كنتش أبدًا أتمنى إنك توافقي أو تكوني فريسة سهلة وضعيفة بالشكل ده
مرام بدموع
بس أنا وثقت فيك يا أياد
أياد بهدوء
وفي حاجة زي دي كان لازم تختاري كرامتك وتفتكري إن أهلك كمان واثقين فيكي وحاجة كمان افرضي إني كنت خُنت الثقة وما كملتش جوازي منك كنتي هتعملي إيه
مرام فضلت ساكتة مذهولة ومش مستوعبة إن ده أياد اللي كان بيزن عليها كل لحظة علشان بس يحضنها دلوقتي هو نفسه اللي بيعاتبها على اللي كان بيطلبه وكمان محملها الغلط وكأنها هي اللي طلبت أياد بصلها للحظة ورجع كمل كلامه ببرود
أياد
بس أنا ما عملتش كده رغم إنك نزلتي من عيني وكمان مستحيل أأمن على مستقبلي معاكي إحنا هنفضل متجوزين فترة وبعدين كل واحد يروح لحاله وأتمنى إنك تعقلي وما تعديش الغلط مرتين
أياد كان بيتكلم ومش واخد باله من عالية اللي كانت جاية تطمن على حالة مرام وسمعت الحوار بالصدفة أياد قام ولف علشان يخرج شاف عالية اللي كانت واقفة على الباب ملامحه اتبدلت لغضب
أياد
إنتي يا حيوانة مين اللي سمحلك تدخلي وكمان بتتجسسي علي اي
عالية بصت له بغيظ ودخلت بهدوء
عالية
أولًا أنا مش حيوانة ثانيًا ده مكان عملي وجاية أطمن على المريض مش داخلة على حضرتك شقة خاصة في المعادي واتفضل اطلع بره علشان أشوف شغلي
أياد بغيظ
بت إنتي مين فاكرة نفسك
عالية بثقة
الدكتورة عالية وإنت اللي مفكر نفسك حاجة كبيرة واخد في نفسك مقلب وإنت في الأساس ولا حاجة وكمان إنسان معدوم الأخلاق والضمير
مرام بصت لعالية بصدمة وذهول وفتحت بوقها من غير ما تحس عالية تجاهلت أياد اللي كان بيغلي منها وقربت من مرام علشان تشوف جرحها أياد خد بعضه وطلع وهو بيتوعد لها
أياد
طيب لما نشوف العصفور جناحه هيوصله لحد فين
مرام بصت لعالية بصدمة وعالية كانت بتفحصها
مرام
إنتي إزاي قدرتي تتكلمي مع أياد بالشكل ده إنتي عارفة هو مين ولا ممكن يعمل فيكي إيه
عالية بغيظ
ولا يهمني هو ولا عشرة زيه إنسان تافه وحقير ومش عارفة إنتي إزاي غبية أوي كده معقولة كنتي هتنهي حياتك علشان شخص تافه زي ده؟
ــــــــــــــــــــــــــــــــــــــــ
تاني يوم الساعة 7 الصبح عالية دخلت مكتبها وهي بتدلك رقبتها بتعب ما لحقتش ترتاح بسبب اللي حصل بس اتفاجئت لما شافت أياد قاعد على كرسي مكتبها ورافع رجليه على سطح المكتب
عالية
إنت إنت بتعمل إيه في مكتبي يا بني آدم إنت ومين سمحلك تدخل أصلًا
أياد ببرود
توتوتو العصبية مضرة للصحة يا دكتورة ولا ما خدتيش المعلومة دي في فترة الدراسة
عالية
إنت إنسان مستفز اتفضل اطلع بره
أياد ابتسم ببرود وقام وقرب منها وهو بيطلع فيزا من محفظته
أياد
عندي حل أحسن من كده دي فيزا فيها عشرة مليون جنيه اعتبريها ملكك باللي فيها
عالية بصت لها باستغراب وبعدين ضمت إيديها لصدرها بغرور
عالية
وإيه المقابل أكيد مش حب ولا مساعدة خيرية من حضرتك
أياد ابتسم
تعجبني ثقتك وذكاؤك دي
قرب من ودنها
عاوزك تقضي ليلة معايا وده مش حب لا سمح الله. بس اعتبريها تسلية علي القد كدا
عالية برقت بصدمة وفجأة ضربته بالقلم وهي بتقول بزعيق
عالية
بره يا حيوان يا حقير لا أنادي لك الأمن يعلمك الأدب ومش هيهمني إنت مين ولا ابن مين ومتأكد إن الدكتور عامر مش هيتشرف بحقير زيك ابن له
أياد بصلها بغيظ وحنق وفجأة ابتسم وهو حاطط إيده على خده
أياد
مش هعتبر ده قرار نهائي وهستنى أعرف قرارك
قرب من المكتب وخد قلم وبعدين مسك إيد عالية بالغصب وهي بتحاول تمنعه وكتب رقم تليفونه
أياد
وده رقمي هستنى منك اتصال
عالية بغيظ
إنت إنسان حقير ومش معنى إنك حقير ومعدوم الأخلاق يبقى الكل زيك واتفضل بره
شاورَت على الباب أياد ابتسم ببرود وهو قاصد يستفزها
أياد
أممموت أنا في القطط اللي بتخربش دي على العموم أنا أصلًا كنت طالع وما تنسيش مستني اتصالك يا دكتورة عالية
أياد اتحرك وخرج من المكتب وهو متعصب منها عالية بصت لإيدها بقرف وبعدين مسكت إزازة مية من على المكتب وغسلتها بغيظ وعنف
عالية
إنسان سافل وحقير مش عارفة إيه البلوي اللي بتتحدف عليا دي بس يا ربي.
