رواية سحر ادريس الفصل الثاني بقلم فاتن أسامة
ضفدعة..
هي إيه إللي إتحولت لـ ضفدعة!!
'وللحظة خوفت والتوتر بدأ ينتشر في كل جزء فيا'
هي مش فاكراني فعلا ولا تعرفني
وفوق كل دا.. المصيبة إللي إتحطيت فيها
بـرجلي داريت عليها، بس خوفت ألمسها
وبـثبات مزيف:
_ أنا.. أنا تبع الفِراشة، بتوع النور يعني، ودخلت هنا عشان...
ـ أنت الصبي بتاع حسين رنجة؟ تعال دا بيدور عليك
طلعت خوفي المكتوم علي هيئة نَفَس طويل
بعد ما الست دي دخلت وأنقذتني
_ أنا مش عارف، لاقيت نفسي هنا، وكنت بدور علي...
سلمي قاطعتني وقالت
ـ حسين رنجة! أومال بتقول تبع بتوع النور ليه؟
_ مانا شغال معاهم، وعمي حسين يكون قريبي
الست إتدخلت بينا:
ـ مش وقته شرح، يلا يا سلمي إجهزي يا حبيبة ماما
هزت راسها بالموافقة، بس كانت عيونها مركزة عليا
بطريقة تقلق!
عملت نفسي بعدل هدومي بسرعة
وأخدت الضفدعة من غير ما حد ياخد باله
كنت بتعامل معاها بـشويش وكأنها حاجة تخصني، مِلكي، بنتي مثلا
مكنتش لاقي إسم يناسب الموقف المرعب دا
طلعت بسرعة لعمي حسين، كان مستنيني علي باب الأوضة
أخدته بسرعة من إيده وطلعنا برا البيت علي بعضه
ـ هو إيه إللي حصل! ونَفَسك مقطوع كدا ليه يابني
_ أنا محتاج... محتاج... محتاج أروح البيت دلوقتي حالا
مشيت خطوة فـ وقفني
ـ أنت مش هتمشي من هنا غير لما تعرفني إيه إللي وراك يا أمير
= أهه... أهه يا دماغي... إيه الزنقة دي
بصينا أنا وهو لبعض، والصدمة كانت الفرد التالت
وبالمعني الأصح 'الفرد الرابع'
لما فضلنا ندور علي مصدر الصوت، وفي الأخر يطلع من..
ـ ضفدعة؟ ضفدعة بتتكلم!!!!
ـــــــــــــــــــــــ
_ أنا بعتذر لحضرتك جدًا
ـ لا ولا أي حاجة يابني، بس أول مرة حسين يغمي عليه في حياته
طبطبت علي كتفها
_ إحنا بس عشان وقفنا في الشمس كتير، ومكانش أكل أي حاجة
رسمت إبتسامة بالعافية وبعدين قالت
_ بس أنت مين يا إبني؟
رديت بـتسرع
_ أنا واحد قابل عمي حسين بالصدفه، وبعدها دا إللي حصل علطول، هستأذن أنا بقا عشان معاد القطر
أخدت شنطتي وبدأت أتحرك
وعند الباب:
_ صحيح.. هو كان دايخ لدرجة تخيل ضفدعة بتتكلم عشان لو حكالك متصدقيش
ـــــــــــــــــــــــ
ـ حضرتك القطر مش طالع النهاردة، بيتم تصليحه، وهيتحرك من بكرا بإذن الله
سمعت الجملتين ومشيت تاني
كل دا وخالي مبيردش
ولا سكن، ولا أكل، أنا حتي معرفش أماكن كتيرة هنا
كلها أماكن عامة زورتها مش أكتر
طلعت برا المحطة
وعلي الرصيف قعدت..
الضفدعة كانت بتتحرك كتير
وأنا حاطط إيدي عليها، خايف حد يشوفها
حاولت أداريها لحد ما زهقت ودخلت الحمام..
= إيه يا أخي، أنت كنت حابسني في إيه؟ وشايلني كدا ليه؟ وسع إيدك كدا
_ إخرسي بقا يا شيخة، أعوذ بالله من الشيطان الرجيم
كنت بتكلم بصوت مليان خوف، وغضب
الإتنين سوا، لدرجة بدأت أعرَق
_ أكيد دا كابوس وهفوق منه
= حمام رجالي!!
بدأت تتلفت حواليها، ولما إستوعبت إحنا فين، صرخت
قفلت بوقها وبعدين قولت بـضيق مكتوم
_ أسكتي هتفضيحنا
= أنت إللي مدخلني معاك الحمام وأنا إللي هفضحك؟ ياعم بقولك سيبني الله يرضي عنك
_ أهه.. قولتيلي..
فتحت باب الحمام وإتأكدت مفيش حد برا
وقدام المرايا وقفتها عشان تعرف هي إيه دلوقتي
بدأت بتضحك ولسانها بيكرر:
= أنت عبيط يابني! ماسك ضفدعة ليه، بتحبها للدرجة!!
ثواني معدودة كانت عبارة عن ضحك
وكانت نهايتهم غير كدا تمامًا
وقعت من إيدي، لما شهقت بصدمة وصوتها بدأ يعلي
= أنا... إيه دي!! أنا فين، وقصيرة كدا ليه و...
عيونها إترفعت عليا
= أنا ضفدعة؟؟ بقيت ضفدعة؟؟
بتتنطط في كل مكان وهي بتصرخ
= مش دي النهاية، إستحالة تكون دي النهاية، يا ناس، إلحقوني...
جريت وراها لحد ما تعبت
وهي لسه بتصرخ
مسكتها وأنا بقع في نص الحمام
كنت قربت أتكسر
وراجل كبير في السن دخل علينا في الوضع المُخل دا
= أوعي يا حيوان، صدري...
خبيتها ورايا لما حسيت الراجل سمع صوت ست من مصدر مجهول
ـ هو في حاجة يا إبني؟
_ لا ياعم الحج، إتفضل
ومن تاني.. علي الرصيف
= طلعني من جيبتك طيب ومش هعمل صوت
_ إسكتي يا شيخة بقا، الناس هتفكرني واحد مجنون بيكلم نفسه
= عشان خاطريييييييييي
طلعتها من راسها وهي ضامة رجليها
وإيديها الإتنين محاوطة نصها إللي فوق
= مينفعش طيب تشتريلي هدوم!!
ضحكت برغم حسرتي
_ دا كل إللي فارق معاكي دلوقتي
= أومال عايز تتفرج عليا يا حيوان!!
أدتني بالقلم
_ والله؟
= إنني آسفه
_ أنتي عارفة إني ممكن أحطك جنبي هنا، وبـ أنتن شبشب حمام أفعصك وأطلع روحك
= أنت أعقل من كدا يا أمير
_ أنا... قولتي إيه؟
= أنت أعقل من كدا
_ يا إيه؟
= هممم... مش فاكرة بصراحة
_ إبتدينا نستعبط
طلعت لسانها وهي بتتكلم
= إيه دا؟ لساني طويل؟ لساني طويل! يا حلاوتي
طلعته أكتر ولسعتني بيه
= الله؟ أنا خلاص مرتاحة كدا، سيبني ضفدعة
رميتها علي الرصيف جنبي
وبصوت مهزوز من الوقعة
= أهه يا أهطل!! ترميني كدا؟ إفرض إتكسرت ولا جرالي حاجة، أهلي مش هيسكتولك علفكرة
بصيتلها بـ لامبالاة ورجعت بصيت قدامي من تاني
= إتفضل صالحني
إلتزمت الصمت فـ إتكلمت تاني
= بقولك صالحني
_ يالهواااااااي، إيه الرغي دا كله، حرام عليكي
نطت علي كتفي
وبـمرح.. إتمشت علي دراعاتي لحد ما بقت جوا إيديا
= بص.. أنا هساعدك، بس عندي شرط
_ تساعديني إزاي
= جرا إيه يا إبن نيڤين
عيوني وسعت من الصدمة
_ قولتي إيه؟؟
= زي ما سمعت
قالت الجملة وهي مربعة إيديها
حاجبها مرفوع ورموشها الكثيفة عمال تتحرك يمين وشمال
_ عرفتي منين؟
= أنت إللي عارفنا منين، وجيت عندنا ليه
_ أنتي مالك أنتي
ضحكت بعد خمس ثواني سكوت وبعدين قالت
= بحيث كدا بقا، شوف مين هيطلعنا من المصيبة إللي إحنا فيها دي دلوقتي
_ وهو أنا يعني مقدرش أسيبك دلوقتي وأمشي؟
ردت عليا بـثقة متبادلة
= وأنا يعني مقدرش أفضحك وأفضح سرك أنت وخالك إدريس!!
_ أنتي مين يا ست إنتي؟
= أنا صدفه، جارتك يا أمير
ـــــــــــــــــــــــ
= وبس يا سيدي، هتعمل إللي قولتلك عليه
وأنا هعمل إللي قولتلي عليه، إتفقنا؟
|فلاش باك|
_ جارتي مين، وصدفه مين
قعدت بأريحية أكتر
= سلمي عبدالمجيد عز الدين، وأنا صدفه محمد عز الدين
رديت بـعدم فهم
_ يعني إيه!
لسعتني بلسانها
= لا ركز معايا شويه أكتر من كدا يا مارو
_ أنتي محسساني أنك كنتي ضفدعة قبل كدا ليه؟ إيه السلام النفسي إللي إنتي فيه دا
= برضو.. مصمم يقاطعني
_ كملي ياستي
أخدت نَفَس
= هيييح، بص يا سيدي
أنا صدفه بنت عم سلمي، أصغر منك ومن سلمي بـسنة
كنتو في تانية إعدادي لما سلمي مشيت وسابت المنيا
وأنا كنت في أولي إعدادي
عدلت قعدتي وتركيزي بدأ يزيد
_ عمي عبدالمجيد أخد سلمي زمان وقرر يعيش في القاهرة
شوية بـشوية، إتجوز وإشتري بيت كبير، وجمع باقي إعمامي حواليه
وبدل ما كان بيت العيلة في المنيا، بقا في القاهرة
وكلهم مشيو وسابوني أنا وجدتي..
سألت بـإستغراب
_ وليه منقلتوش معاهم؟
= جدتي متعلقة بالمكان، إللي إتربت وعاشت طول عمرها فيه
_ وأنتي!!
عيونها راحت يمين وشمال
= أكيد مش هسيب تيتا لوحدها يعني
_ وأهلك!
= ماما وبابا ماتو زمان وأنا صغيرة
بابا يا سيدي تعب فجأة ومات، وماما من حزنها عليه لحقته
ربنا يرحمهم
لمست وشها بـخفة
_ وإيه المطلوب دلوقتي
= وسع بس إيدك، الأيلاينر هيبوظ
|باك|
_ إنتي ليه عايزة تساعديني
= عشان عارفة حكايتك، وعارفة قد إيه فضلت مُخلص لحُبك أنت وسلمي، ومنسيتهاش
وقفت تاني بعد ما كنا قربنا من البيت
_ وأنتي عرفتي حكايتي إزاي
= مكانش في الإتفاق نقول أسرار بعض
بان علي ملامحي الضيق
= مبحبش حد يزعل مني
_ مانتي إللي مش راضية تجاوبي من غير رغي كتير
= أنا رغاية يا أمير!!
عيونها لمعت بالدموع، فـ طبطبت عليها
_ يا حبيبتي مقصدش، بس أنتي بصراحة رخمة
= صالحني
_ أفندم!
= صالحني يلا
_ إزاي يعني
= قول حقك عليا يا صدفه يا حبيبتي
_ يالهوااااااااي
ربعت إيديها وهي مركزة في عينيا
= هاااا؟
رديت بـغيظ
_ حقك عليا يا صدفه يا حبيبتي
= المهم بقا يا سيدي، أنا عرفت إزاي؟
_ يارب نخلص
= عرفت من إللي عرفته بقا أنت مالك!!
فلتت نفسها من إيدي ونطت لـبعيد
طلعت تجري ناحية البيت، وعلي البوابة وقفت وبصتلي
= يلا بسرعة
طلعت أجري أنا كمان
عشان ننفذ إتفاقنا
بس كل دا محصلش
وإللي خططناله إتبخر، لما سمعنا جملة
‹بارك الله لهما وبارك عليهما
وجمع بينهما في خير›
صدفه طلعت علي دراعي
ولما شافت دموعي بتنزل واحدة ورا التانية
نزلت هي كمان عند جيبة القميص
عند صدري.. وبدأت تطبطب عليا
= كنا متفقين أبوظلك الجوازة عشان تاخد فرصتك
وبعدها تساعدني نصلح إللي حصل فيا دا
سندت راسها علي صدري
_ حقك عليا يا حبيبي...
بصيتلها وبعدين مشيت
مكنتش عارف أحدد إيه الطريق
ولكن.. فضلت ماشي!!
= ممكن تهدا شوية طيب
اقف خلينا نتكلم، مينفعش تفضل في الحالة دي
وبعد زَن كتير، فشلت تسيطر علي حالتي
وكل إللي بتعمله.. حُضنها
وإيديها إللي عمال تطبطب عليا
= ما تقف بقا
وقفت
وقبل ما أتكلم، موبايلي رن
ـ أيوا يا أمير
_ معلش يعني يا خالو، أنت بتستعبط!!
ـ أنت إللي بتستعبط؟ إيه المصيبة إللي أنت عملتها دي
_ أكيد السحر متقلبش علي الساحر
ـ دا فعلا إللي حصل يا أمير
'صوته بدأ يبان عليه القلق'
ـ السحر معمول للبنت إللي بيحبها أمير عشان تحبه
ولو وقع علي واحدة تانية
لازم أمير إللي يحبها، عشان ترجع لـطبيعتها والسحر يتفك...
شكرا لزيارتكم عالم روايات سكيرهوم
