رواية نور الفصل الثاني
نور كانت قاعدة في جنينة الكلية، ماسكة الموبايل وإيدها بتترعش، وعينها على رقم عمها منصور.
سلمى جنبها بتشجعها وبتقولها:
• يلا يا نور كلميه بقى.. ده عمك يعني مش حد غريب.. ده هيفرح أوي إنك افتكرتيه وطلبتي منه حاجة.
نور خدت نفس عميق وداست اتصال..
رن.. رن.. رن..
وفجأة صوت عمها الدافي جه من الناحية التانية، صوت حنين كأنه حضن أبوها بالظبط:
• ألووو.. نور حبيبة عمها! ده النهارده عيد ولا إيه؟ بنتي اللي وحشاني بتتصل بيا بنفسها؟
نور عينيها دمعت أول ما سمعت صوته:
• ازيك يا عمي.. وحشتني أوي والله.. بقالي كتير مكلمتكش. • انتي اللي وحشتيني يا بنت الغالي.. عامله إيه انتي وأمك؟ طمنيني عليكم.. بقالي كتير مشفتكوش ولا قعدت معاكم.
نور حاولت تمسك نفسها عشان متعيطش قدامه:
• الحمد لله يا عمي.. كويسين.. أنا.. أنا كنت عايزة أطلب منك طلب.. بس مكسوفة أوي والله. • تكسفي من عمك؟ ده أنا أبوكي التاني يا نور.. قولي يا حبيبتي عايزة إيه؟ لو أقدر أجيب لك نجمة من السما هجيبها لك.
نور بصت لسلمى، سلمى هزت راسها يعني كملي، فنور قالت بسرعة كأنها خايفة تتراجع:
• أنا شفت إعلان شغل يا عمي.. سكرتيرة تنفيذية في شركة كبيرة اسمها الشريف جروب.. مرتبها كويس أوي.. وهيحل مشاكل كتير عندنا في البيت.. بس هما طالبين خبرة ٣ سنين وأنا لسه طالبة في تالتة هندسة.. فـ.. فـ كنت بقول.. لو حضرتك تعرف حد هناك.. ممكن يعني.. يتوسط لي أعمل المقابلة بس؟ وأنا هثبت نفسي والله.
سكت عم منصور ثانيتين.. ثانيتين حسست نور إنهم سنتين.
قلبها وقع في رجليها وقالت لنفسها: "أكيد هيقولي لأ.. أكيد هيزعل إني بطلب واسطة.. أكيد هيقولي كملي كليتك".
بس فجأة عمها ضحك ضحكة كبيرة وطيبة:
• هههههههه.. هو ده الطلب اللي انتي مكسوفة منه يا بنت أخويا؟ ده أنا كنت فاكرك هتطلبي حاجة صعبة! • يعني.. يعني حضرتك تعرف حد هناك يا عمي؟ • أعرف؟ ده أنا اللي كنت مربي صاحب الشركة دي على إيدي! الحاج شريف الشريف ده كان شغال معايا زمان، وأنا اللي علمته الشغل من وهو لسه صغير.. ده بيعتبرني أخوه الكبير.. ولسه لحد النهارده بيكلمني في كل كبيرة وصغيرة وبياخد رأيي.
نور اتنفضت من الفرحة:
• بجد يا عمي؟ بجد؟! • بجد يا حبيبتي.. بصي.. أنا هكلمه دلوقتي حالاً.. وهقوله بنت أخويا الله يرحمه جاية تعمل مقابلة.. وهخليه هو بنفسه يقابلك.. انتي بس جهزي نفسك وسيبي الباقي على عمك.
نور قفلت مع عمها وهي مش مصدقة نفسها.
سلمى حضنتها وبتزغرت بصوت واطي في الجنينة:
• شفتي؟ مش قولت لك؟ ربنا بيفرجها يا نور! ربنا بيفرجها!
بس الفرحة مكملتش دقيقة..
نور افتكرت فجأة: هتلبس إيه في المقابلة؟
هي معندهاش غير الطقمين القدام.. واحد بتلبسه للكلية والتاني للبيت.. ولا واحد فيهم ينفع يروح بيه شركة كبيرة زي دي، ويقابل صاحب الشركة نفسه!
رجعت البيت وهي طايرة من الفرحة والخوف في نفس الوقت، وحكت لأمها كل اللي حصل.
ست فاطمة دمعت وقالت:
• ربنا يبارك لعمك يا بنتي.. طول عمره أصيل وابن أصول.. بس هنعمل إيه في اللبس يا نور؟ ده انتي معندكيش حاجة تليق بمقابلة زي دي.
نور دخلت أوضتها وفتحت الدولاب.. طقم بيج قديم، وطقم أسود بقاله سنتين، وشوز واحد مقطوع من الجنب وبتداريه بالبنطلون.
قعدت على السرير ودموعها نزلت تاني.. هتروح المقابلة إزاي كده؟ هيتريقوا عليها؟
وفي عز ما هي قاعدة كده.. موبايلها رن..
عمها منصور..
ردت بسرعة:
• ألو يا عمي؟ • بقولك إيه يا نور.. أنا كلمت الحاج شريف.. والراجل رحب أوي أول ما سمع اسمك.. وقالي هاتها بكره الساعة ١٠ الصبح تعمل مقابلة.. بس أنا عايز أقابلك قبلها النهاردة.. ضروري. • تقابلني؟ فين يا عمي؟ وامتى؟ • قابليني بعد ساعة في القهوة اللي على أول الشارع عندنا.. عايز أقعد معاكي وأفهمك طبيعة الشغل هناك عاملة إزاي.. عشان تدخلي فاهمة انتي رايحة على إيه.
نور لبست بسرعة ونزلت جري.. وقلبها بيدق من القلق والفرحة.
نور بشعرها.. شعرها الأسود الطويل كان ملموم كده أي كلام زي عادتها.. بس وشها كان منور من الفرحة.
وصلت القهوة لقت عمها قاعد مستنيها، وطلب لها عصير مانجا زي ما كان بيطلب لها وهي صغيرة.
أول ما قعدت، عمها بص لها بصة حنية وجد في نفس الوقت وقال:
• بصي يا نور يا بنتي.. أنا عايزك تسمعيني كويس أوي.. الشغل ده مش هزار.. الناس دي ناس جادة جداً.. جداً فوق ما تتخيلي.. الشريف جروب دي من أكبر الشركات في البلد.. والشغل هناك بالورقة والقلم.. مفيش تأخير.. مفيش دلع.. مفيش هزار في الشغل.
نور هزت راسها:
• حاضر يا عمي.. والله هكون قد المسئولية.
عمها كمل وهو بيبص في عينيها:
• أنا مش بقولك كده عشان أخوفك.. أنا بقولك كده عشان أنا اللي ضامنِك قدام الراجل.. أنا حطيت وشي قدامه وقولت له دي بنت أخويا.. بنت راجل محترم.. متربية أحسن تربية.. فأوعي يا نور.. أوعي تعملي أي مشكلة هناك.. أوعي حد يشتكي منك.. انتي داخلة هناك باسمي.. وأنا عايز راسي تفضل مرفوعة بيكي زي ما أبوكي الله يرحمه كان رافع راسه بيكي.
نور دمعت وقالت:
• والله يا عمي ما هكسفك أبداً.. ده انت شيلت همي من غير ما أطلب.. ربنا يخليك ليا.
عم منصور ابتسم وطلع من جيبه ظرف فلوس وحطه قدامها على الترابيزة:
• خدي يا حبيبتي.. دول ليكي.
نور اتخضت: • إيه دول يا عمي؟ لأ.. لأ والله ما هاخد.. كفاية اللي انت عملته.. • اسمعي الكلام يا نور.. متكسفينيش.. أنا عارف إنك مكسوفة.. بس أنا عمك.. دول مش سلف ولا حاجة.. دول عشان تنزلي انتي وسلمى تشتري طقم جديد يليق بيكي.. وشوز جديد نضيف.. وتظبطي نفسك كده عشان المقابلة بكره.. انتي رايحة تقابلي صاحب شركة كبيرة.. لازم تدخلي عليه واثقة في نفسك.. وشكلك يشرف.. وشعرك الجميل ده تظبطيه كده ويبان.. انتي بنت زي القمر.
نور مسكت الظرف وإيدها بتترعش.. أول مرة في حياتها تمسك مبلغ زي ده.. بصت لعمها بدموع وقالت:
• ربنا يخليك يا عمي.. والله ما عارفة أقولك إيه.. • متقوليش حاجة يا بنتي.. روحي بقى هاتي سلمى وانزلوا هاتوا اللي ناقصك.. واللي يتبقى من الفلوس اديه لأمك.. خليها تجيب اللي ناقص البيت.. لحد ما نشوف الشغل الجديد هيعمل معاكي إيه.. وربنا يكرمك يا حبيبتي.
نور باست إيد عمها وخرجت وهي طايرة.. كلمت سلمى وقالت لها:
• سلمى! عمى اداني فلوس عشان أجيب طقم جديد! تعالي ننزل بسرعة!
سلمى جت جري.. ونزلوا هما الاتنين على وسط البلد.. ودخلوا محل ورا محل..
نور كانت خايفة تصرف كتير.. بس سلمى كانت بتنقي معاها:
• لأ ده لأ.. ده هيخليكي شكلك أكبر.. خدي ده.. ده شيك أوي عليكي.. ده بتاع بنات الشركات الكبيرة!
وفي الآخر.. نور اشترت طقم كلاسيك شيك جداً.. بلوزة بيضا نضيفة وبنطلون أسود مظبوط عليها.. وشوز أسود جديد بكعب صغير.. وشنطة صغيرة شيك..
وقفت قدام مراية المحل وبصت لنفسها.. فكت شعرها.. شعرها الأسود الطويل نزل على كتفها.. لأول مرة من زمان تحس إنها بنت حلوة.. وإن شكلها يليق بمكان كبير.
سلمى قالت لها:
• يا بنتي انتي قمر بشعرك ده.. بكره لما تروحي كده.. هيقبلوكي على طول.
رجعت البيت وهي شايلة الشنط.. واديت باقي الفلوس لأمها وقالت:
• خدي يا ماما.. دول الباقي.. هاتي اللي ناقص البيت.. وادفعي اللي علينا.. ومتشيليش هم حاجة تاني.
ست فاطمة خدت الفلوس ودموعها نزلت.. وحضنت بنتها وقالت:
• ربنا يكرمك يا بنتي ويفتحها في وشك.. انتي تستاهلي كل خير.
بالليل.. نور علقت الطقم الجديد قدامها على الدولاب.. وقعدت تسرح شعرها وهي بتبص لنفسها في المراية.. وهي مش مصدقة.. بكره الساعة ١٠ الصبح.. هتروح شركة الشريف جروب.. هتقابل الحاج شريف نفسه..
يا ترى المقابلة هتمشي إزاي؟ وهل فعلاً هيقبلها من غير خبرة؟ ولا فيه حاجة تانية مستنياها هناك هي متعرفهاش؟
