رواية مرافئ الحنين الفصل الثاني بقلم مها ابراهيم
- أنا مستحيل أوافق .
- ليه بقىٰ إن شاء لله، مالو تميم شاب زي السكر،
ودين وأخلاق، ده غير انهُ إبن عمك حسن إللِ بتعتبريه ابوكِ التاني، ايه حجتك بقىٰ؟!
رديت بزهق
- يا ماما يَحبيبتي تقدري تقوليلي تميم ده يعرف عني ايه عشان يطلبني للجواز،
ده لسه واصل مصر من إسبوع .
بتقوم تقف وبتبدأ تتحرك في الأوضة
- والله إللِ أعرفه إن في فترة خطوبة يعني تقدري تتعرفي عليه ويتعرف عليكِ،
ولا إنتِ بقىٰ في حد تاني شاغل بالك؟!
بتنفض من مكاني بعد أخر جميلة قالتها بمكر
- ايه اللِ بتقوليه ده يا ماما!
بتاخد نَفسها وهي بتضحك بسخرية
- مش عليا يا بنت بُثينة، أنا عارفة كل حاجة،
إبراهيم مش نصيبك يا سارة .
- أنا مكشوفة أوي كدا؟
- ده علىٰ أساس' نِحنا والقمر جِيران'
إللِ شغاله كل يوم، كانت لِحد غيره .
بطبطب علىٰ كتفي بعد ما قعدت قصادي
- فكري بعقلك شوية، تفتكري إبراهيم ميعرفش بمشاعرك إللِ نص العمارة عرفاها؟
بِنسكت شوية، وبعدين ببدأ أتكلم بهدوء
- أنا مبقتش بفكر في إبراهيم من يوم ما خطب،
وميهمنيش هو كان يعرف ولا لا .
بتبتسم برضىٰ
- عين العقل، فكري بقىٰ في موضوع تميم .
بقلب عيوني بملل،
وأنا ببصلها وهي مُتجه ناحيه الباب عشان تخرج
- يا ماما بقىٰ .
- فكري يا سارة .
بتقفل الباب،
وبتسبني محبوسة في دوامة أفكاري .
ــــــــــــــــــ
- تميم ده يا مجنون يا مخبول .
بتاخد بُق من كوباية الشاي، وبعدين بتقول
- يبنتي ما يمكن الراجل عايز يتجوز ويِبني أُسرة
- يا فريدة إنتِ كمان مش قادره تفهميني .
بتبصلي بحيرة وتسكت، برجع بظري لورا،
وأنا براقب الكافيه إللِ بدأ يتملي ناس .
حركة رايحة جاية
صوت الكراسي وهي بتتحرك،
وضحكات متقطعة من ترابيزة للتانية .
واحد قاعد لوحده، عينه متعلقة بموبايله.
والتاني مستمتع بفنجان قهوته،
وكأن مفيش حاجة مستعجلة في الدنيا.
وعلى ترابيزة جنب الشباك اتنين مندمجين في كلامهم، مش واخدين بالهم من دوشة المكان حواليهم .
كل واحد مشغول بعالمه،
وأنا قاعدة وسط كل ده، تايهة في أفكاري .
إنتشلني من أفكاري دخول تميم،
بيسحب كرسي ويقعد،
وبعدها جه النادل ياخد طلبه.
فضلت عيني متعلقة بيه شوية،
لحد ما النادل رجع وحط قدامه فنجان القهوة،
أخده تميم ورفعُه لشفايفه بهدوء .
وفي نفس اللحظة،
رفع عينيه ناحيتي وثبّت نظره عليّا بهدوء،
نزلت عيوني بسرعة وأنا بتحاشى النظر ليه .
وانشغلت بكوباية الشاي اللي قدامي،
بحرك المعلقة جواها من غير أي داعي .
حاولت أرجع أكمل كلامي مع فريدة،
لكن فضولي خلاني أبص ناحيته مرة تانية بطرف عيني،
لقيته رجع لقهوته وكأن مفيش حاجة حصلت .
تنهدت بهدوء ورجعت أسند ضهري على الكرسي،
وأنا بقول لنفسي إن آخر حاجة ناقصاني دلوقتي هي إني أدخل في حيرة جديدة بطلها تميم حسن .
ـــــــــــــــــ
- كل إللِ أعرفه عنها،
إسمها، زينب
قابلتها مره واحده بس،
صُدفة واحدة كفيلة تزرع حبها في قلبي العمر كله.
بتيجي في بالي اغنية لِ عبد الحليم حافظ،
وهو بيقول
|كان يوم حُبك أجمل صُدفة،
لما قابلتك مره صُدفة،
يالي جمالك أجمل صُدفة|
بيرفع عمي خالد كوباية الشاي وبياخد منها بُوق وبعدين بيقول
- بس كل ده يفيد بِ ايه، وهي مش موجوده .
بَتعدل، وأنا بسأله بـ إهتمام
- وعمرك ما فكرت تدور عليها؟!
بسخرية بيضحك وبعدين بيقول بوجع
- تفتكر ما دورتش عليها؟،
أنا لفيت إسكندرية كلها لِحد ما لقيتها يا تميم .
برسم إبتسامة علىٰ شفايفي
لكنها بتختفي بالتدريج لما بيكمل..
- كانت لابسة فستان الفرح، كانت بتتجوز..
كانت بتضحك يا تميم،
ضحكتها كانت مالية المكان كله،
وعينيها بتلمع من الفرحة .
كانت بتسلم على الناس وكل شوية ترفع فستانها بإيديها عشان تعرف تمشي،
وإلل حواليها بيزغردوا ويباركولها .
سكت شوية، وابتسم وهو بيفتكر:
- كانت جميلة أوي..
وأكتر حاجة وجعتني إني كنت شايف فرحتها، ومكنتش أتمنىٰ لها غير إنها تفضل مبسوطة كده طول عمرها .
اكتفيت إني أبصله بأسف، مش لاقي كلام أقوله.
بإبتسامة خفيفة بيكمل
- وبس يا سيدي،
أهي دي حكايتي مع الحُب..
ومن ساعتها مش عارف أنساها،
ولا قادر أشيلها من بالي .
- الساعة داخلة علىٰ 12، لازم نمشي
لمّ عمي خالد حاجته،
وسلّم عليّا قبل ما يخرج،
وفضلت متابع خطواته لحد ما اختفى ورا باب العيادة.
رجعت أسند ظهري على الكرسي،
وبصيت لكوباية الشاي اللي سابها على الترابيزة، ولسه كلامه بيرن في ودني .
غريبة حكايات الناس،
كل واحد شايل جواه حكاية محدش يعرف عنها حاجة، ويمكن أبسط صدفة تغيّر عمر إنسان بحاله .
بصيت في الساعة،
كانت فعلًا داخلة علىٰ12،
قفلت الملف اللي قدامي،
وقمت أطفي أنوار العيادة .
ــــــــــــــــــ
وصلت العمارة وطلعت،
لكني غيّرت مساري وطلعت على السطح بدل ما أدخل الشقة بتاعتنا .
وزي ما توقعت، لقيتها فوق... إللِ شقلبت كيانِ
سارة،
جارتي الجميلة الحزينة،
قاعدة على كرسيها المعتاد،
حاطة كوباية الشاي بالنعناع بين إيديها،
وصوت فيروز خارج من موبايلها،
مالي هدوء السطح .
|نحن والقمر جِيران
لما طل وزارنا
ع قناطر دارنا
رشرش المرجان|
كانت ساندة راسها على ضهر الكرسي،
وعينيها معلّقة بالسما .
وقفت عند باب السطح شوية،
واتأملت المشهد من بعيد .
كان واضح إنها مش واخدة بالها من وجودي،
أو يمكن واخدة بالها ومش حابة تبيّن .
ابتسمت وأنا بتقدم ناحيتها
- مساء الخير يا جارة..
هو السطح بقى مكانك المفضل ولا إيه؟
ومن غير ما تحرّك راسها عن السما قالت
- من زمان، وهو مكاني المفضل.
سحبت كرسي وقعدت عليه بهدوء،
وبصيت للسما للحظة قبل ما أقول
- واضح إن ليه مكانة خاصة عندك .
ردّت وهي لسه باصة لفوق
- هنا الواحد بيعرف يسمع أفكاره بعيد عن دوشة الدنيا.
ببصلها بطرف عيني، وقلت بمشاكسة
- طب وأنا كده بوّظت عليكي الخلوة؟!
وبغيظ بتبصلي،
وكانت هترد بس قاطعها صوت فيروز
وهي بتقول:
| وياما سهرنا معه
بليل الهنا مع النهدات
وياما علىٰ مطلعه
شرحنا الهوىٰ غوىٰ حكايات|
رفعت إيديا جنب كتافي باستسلام
- يبدو إن فيروز عندها راي تاني غير إللِ كنتِ هتقوليه .
بتضحك
بصتلها شوية قبل ما أحوّل نظري للسما من تاني.
سكتنا، لكن المطر كان له رأي تاني..
بدأ ينزل واحدة واحدة،
وصوت الطقطقة علىٰ أرض السطح بدأ يملأ المكان.
مدّيت إيدي قدامي أختبر المطر،
لكن هي كانت سبقتني،
رفعت وشها للسما ومدّت كفوفها تستقبل النقط، وعلى وشها ابتسامة صغيرة ظهرت من غير ما تحس .
ابتسمت وأنا ببصلها،
قطع حالة الصمت اللي بينا سؤالها المفاجئ
- هو إنت متقدملي ليه؟
رمشت بعيني كذا مرة، و بهدوء رديت
- يمكن عشان عايز أتجوزك مثلًا!
- من غير خفة دم، إنت تعرف عني إيه اصلا عشان تبقىٰ عايز تتجوزني؟!
بسكت ثواني، وبعدين بقول
- أنا أعرف عنك كل حاجة يا سارة..
بتحبي الشتا والمطر،
والشاي بالنعناع اللي غالبًا مش بتشربي غيره،
وفيروز اللي برضو غالبًا مش بتسمعي غيرها،
ومحل الورد بتاعك ووردتك المفضلة،
والسبورة اللِ هناك دي اللِ دايمًا بتكتبي عليها مشاعرك...
سِكت لحظة،
وابتسمت ابتسامة خفيفة قبل ما أكمل
- وإبراهيم .
شكرا لزيارتكم عالم روايات سكيرهوم
