رواية فقد عذرية الفصل الثاني بقلم محمود الأمين
لما دخلنا الشقة، أول حاجة لقيناها على الأرض كانت دم، والبداية كده مبشرة، شكل الدكتور اللي اسمه عماد ده اتق. تل هو كمان، وساعتها الأمور كانت هتتعقد شوية، ولكن لما فتشنا الشقة كانت ما فيهاش أي حد، آثار الدم اللي على الأرض دي مش عارفين بتاعة مين؟
ولكن في أوضة النوم لقينا حاجة بتأكد وجهة نظري، والحاجة دي صور لزينب كانت موجودة في الأوضة اللي بيبات فيها الدكتور عماد. واضح إن وجهة نظري مظبوطة، وإن الدكتور عماد كان على علاقة بزينب وهي كانت حامل منه.. بس السؤال دلوقتي: فين الدكتور عماد أصلًا، والدم اللي على الأرض ده يخص مين؟
طبعًا في مختص من المعمل الجنائي جه وأخد عينة من الدم اللي على الأرض، وبعد ما خلصنا تفتيش الشقة ورفع البصمات منها، خرجنا ورجعت تاني على مكتبي، وفي الوقت ده تم استدعاء ممدوح، وده بعد ما خرج من المستشفى عشان نحقق معاه ونفهم منه بعض التفاصيل، وفعلاً هو ما اتأخرش وجه حسب الاستدعاء.
_ أستاذ ممدوح، إحنا دلوقتي قدام جر. يمة قت. ل، والعناصر فيها مكتملة: سلاح الجر. يمة واللي عليه بصماتك، الدافع وهو إنك اكتشفت إن مراتك حامل وإنت ما قربتش ناحيتها من ساعة الجواز، والجاني والمجني عليها، ويمكن اللي مخلينا مش موجهين ليك اتهام صريح لحد دلوقتي هما نقطتين. الأولى إنك كنت متخدر بمخدر قوي، وجايز اللي خلص على مراتك ده يكون هو اللي عمل فيك كده ومسكك السكينة بعد ما قت. لها، خصوصًا إنك ذكرت واحد صاحبك دكتور صيدلي اسمه الدكتور عماد، وإنه طلع معاك يومها وشرب معاك الشاي. والنقطة التانية هي الحمل، عشان بنسبة كبيرة مراتك كانت حامل من صاحبك الدكتور عماد، وهو اللي خلص عليها قبل ما السر ينكشف. وإحنا لما رحنا عنده البيت عشان نقبض عليه ما لقيناهوش، بس كان في آثار دم على الأرض، ولما فتشنا البيت كويس لقينا صور مراتك عنده.
= عماد يعمل فيا كده؟!.. طيب ليه؟
_ مش هو برضو اللي رشحها قدام أهلك عشان إنت تتجوزها؟
= أيوه هو.. بس ما كنتش متخيل إن ممكن يعمل فيا كده.
_ طيب ممكن أعرف الحوار اللي دار ما بينك وما بين المجني عليها لما رجعتوا من عند الدكتور وعرفت إنها حامل؟
= كنت ساكت ومش قادر أتكلم، كانت خايفة مني وفي نفس الوقت مش عاوزاني أبلغ أهلها، وأنا كنت محتار أفضحها ولا أخلص عليها، بس بعد تفكير قررت أبلغ والدتها وبلغتها فعلًا، وفضلت تستحلفني في التليفون إني ما أعملش فيها حاجة، وإن هي هتيجي الصبح وتتصرف.. بس أكتر حاجة كانت مخلّياني بغلي من جوه إن هي كانت رافضة تقول مين هو الشخص اللي غلطت معاه. حاولت معاها كتير بس رفضت، وأنا كنت بحاول أكون هادي على قد ما أقدر عشان ما أعملش مصيبة وأرجع أندم عليها. وبعدها خرجت من البيت وقابلت عماد، ركب معايا التاكس وحكيتله كل حاجة، وبعدها طلعنا عندي وطلبت منها تعمل كوبايتين شاي بس، ومش فاكر أي حاجة تاني حصلت بعدها.
....
بعد ما خلصت كلام مع ممدوح، وصلتلنا إخبارية عن جث. ة متفحمة وموجودة على الطريق الصحراوي، واللي كان قريب جدًا من البلد اللي ساكن فيها ممدوح والدكتور عماد. الجث. ة كانت متفحمة لدرجة إن الطب الشرعي في البداية ما كانش عارف دي جث. ة راجل ولا جث. ة ست، ولكن اللي أكدوا وقتها الدكتور اللي بيفحص الجث. ة إنه ما مرش على وف. اة الجث. ة دي كتير، ولكن في النهاية الطب الشرعي أكد إن الجث. ة دي جث. ة راجل، وإنه في البداية اتعرض لطع. ن بسكينة، وبعدها القاتل ولع في جث. ته، بس مين الشخص ده؟
اللي جه في بالي وقتها هو الدكتور عماد.. بس لو هو اللي اتق. تل فعلًا، هيكون ممدوح هو المشتبه الرئيسي في الجريمتين، وهيكون كذب علينا في تفاصيل كتير قالها.. منها إن مراته خبت عليه اسم الشخص اللي كان معاها.
وأول حاجة بنعملها هي إن الجث. ة بتتنقل على الطب الشرعي، وبيتم أخد عينة دم منها عشان نطابقها بعينة الدم اللي كانت موجودة في بيت الدكتور عماد، وطبعًا لو العينة طلعت متطابقة، كده هنتأكد إن الجث. ة اللي إحنا شفناها دي هي جث. ة الدكتور عماد فعلًا.
وقبل ما ناخد أي خطوة، كان لازم ننتظر نتيجة تشريح الطب الشرعي للجث. ة المتفحمة اللي لقيناها، وأنا كان كل هدفي إني أعرف أي جر. يمة فيهم اللي تمت الأول، عشان بعد 48 ساعة يظهر تقرير الطب الشرعي، وزي ما توقعت، زينب هي اللي اتقت. لت الأول، وبعدها اتق. تل الشخص اللي حتى الآن بنسبة 90% هو الدكتور عماد.
وده خلانا ندور على كاميرات في الشارع، وفعلاً لقينا كذا واحدة. كنت عاوز أتأكد من كلام ممدوح، بعد ما طلع بيته مع الدكتور عماد يومها نزل تاني ولا لأ؟!.. ولكن من حظنا السيئ إن أثناء مراجعة الكاميرات لاحظنا إن في ساعة كاملة مش موجودة، وده بسبب إن النور قطع في الساعة دي.
يعني وارد جدًا يكون ممدوح عرف العلاقة اللي ما بين مراته وما بين الدكتور عماد، فخلص عليها في البداية، وبعدها راح وخلص عليه، خصوصًا إن تقرير الطب الشرعي بيقول إن الجريمتين حصلوا في نفس اليوم، بس جر. يمة مدام زينب حصلت الأول.
لحد ما ظهرت نتيجة العينة، واللي كانت مطابقة 100%، عينة الدم اللي في الشقة تطابقت مع عينة دم الجث. ة المتفحمة، وده معناه إن اللي مات ده هو الدكتور عماد.. القاتل خلص عليه وبعدها ولع في جث. ته.
بس لما عملنا تحريات عن الدكتور عماد نفسه.. طلع وراه بلاوي. الدكتور عماد كان بيبيع أدوية مخدرة ومحطوطة على الجدول بدون روشتة، يعني نقدر نقول إنه كان بيبيع مخدرات، وفي بينه وبين كذا واحد في المنطقة مشاكل، يعني ممكن يكون حد من الناس دي هو اللي خلص عليه، ولكن أنا برجح إن اللي خلص عليه هو ممدوح. أصل إن جريمتين يحصلوا في يوم واحد دي أكيد مش صدفة خالص، وده اللي خلانا نستدعي ممدوح من تاني عشان نتكلم معاه.
_ للأسف يا ممدوح، إنت المتهم قدامي دلوقتي. الجث. ة اللي إحنا لقيناها وكانت متفحمة، اتأكدنا إنها هي جث. ة الدكتور عماد، يعني خلاص الشخص اللي كان على علاقة بمراتك واللي كنا شاكين إن هو اللي قتلها، اتق. تل هو كمان وفي نفس اليوم. فالعقل بيقول إيه؟
إنت اتأكدت إن في علاقة ما بين مراتك وعماد، وإن الطفل اللي في بطنها ده يبقى ابنه، خلصت على مراتك، وبعدها نزلت من بيتك واستغليت إن النور قاطع في المنطقة وما فيش كاميرات هتصورك، وروحت على بيت عماد وخلصت عليه وخرجت بالجث. ة، واستغليت برضو موضوع النور وولعت فيها بعيد. وبعدها رجعت على المنطقة، دخلت شقتك، أخدت الحبوب المخدرة دي بكوباية عصير مثلًا.. ومسكت السكينة على أساس إنك توهمنا إن في حد عمل كده في مراتك وبعدين مسكك السكينة عشان يلبسك الجر. يمة.
= أنا آسف يعني يا باشا.. اللي حضرتك بتقوله ده فيلم هندي ومحصلش، واللي حكيته لحضرتك هو اللي حصل، وأنا ما أعرفش موضوع عماد ده خالص، لا أعرف إنه كان على علاقة بمراتي قبل ما أتجوزها، ولا أعرف إن هو اللي قتلها، ولا أعرف مين اللي قتله؟
وبعدين عماد كان معاه مشاكل كتير، والناس اللي كان عامل معاها مشاكل دي بلطجية وناس بتضرب مخدرات، يعني ممكن أي حد منهم يكون هو اللي خلص عليه.
_ في نفس اليوم يا ممدوح؟!
= ليه لأ يا باشا.. صدقني أنا معملتش حاجة.
....
كنت لسه مع ممدوح اللي بينكر كل حاجة، وساعتها جالي خبر من الطب الشرعي إنه هيكون في صعوبة في استخراج DNA من الجنين اللي كان في بطن زينب، وده بسبب إن الجنين كان لسه في الأسابيع الأولى، ولكن الموضوع مش مستحيل وهو بيحاول.
وفي وسط كل ده، بلاغ ييجي من الأهالي في المنطقة، وكان في صوت صراخ عالي، والناس حرفيًا كانت بتجري في الشارع.. اللي مقدم البلاغ أنا ما فهمتش منه أي حاجة، فنزلت بسرعة على المنطقة ومعايا قوة من القسم، وهنا كانت الصدمة، عشان لقيت في واحد فتح الصيدلية، والواحد ده هو الدكتور عماد!
كنت واقف مصدوم، لما الدكتور عماد عايش، أومال الجث. ة دي جث. ة مين؟!!
