رواية قتلت زوج امي فبداء عقابي الفصل الثاني بقلم ياسر عوده
ابويا وقتها ماكنش قادر يتقبل اني قولتله لا، فهم وقتها ان كل حاجه اتغيرت، وانا مابقتش البنت المطيعه بتاعت زمان واللى بتقبل بأي حاجه وهي ساكته، بس هو ماكنش عنده استعداد انه يتقبل الوضع دا، علشان كده رجع لعادته القديمه واللى كان بيعملها مع امي، ولقيته نازل عليا ضرب، وقتها وفي اللحظه دي فهمت اني غلطت غلطه عمري، وكانت غلطتي اني ماعترفتش عليه للشرطه وقتها وخليتهم يسجنوه للابد او حتى يعدموه بسبب الجريمه اللى هو عمالها، وبعد ما شبع من ضربي سابني وكنت مش قادره اقف على رجلي من الضرب، ودي ماكنتش المره الاخيره، لانه ابتدي يضربني كل يوم، لغايه لما سمعت كلامه ورجعت لشغلانتي القديمه، وبقيت اجبله فلوس كتير علشان يشرب بيها.
حياتي اتحولت لـ جحيم، بس الاسوء من كل دا لما في يوم لما كنت نايه، حسيت بحد في الاوضه بتعتي وبيلمسني، قومت مفزوعه ولقيت ابويا معايا في الاوضه، وزعقت فيه وقولتله:
-انت بتعمل ايه هنا؟
-هشش وطي صوتك، انا عاوزك وانتي عجباني.
اتصدمت من كلامه وقولتله:
-ايه اللى انت بتقوله دا، فوق لنفسك انت ابويا.
وقتها رد بعصبيه وقالي:
-انا مش ابوكي، ولا عمري كنت ابوكي، ابوكي زكريا علشان كده زي ما خدت منه مراته، هاخد كمان بنته.
وقتها افتكرت امي لما كانت بتتخانق معاه وقالت اسم زكريا، وماكنتش عارفه مين زكريا ده، وحاولت افهم منه وقولتله:
-ايه الكلام اللى انت بتقوله ده، انت اكيد سكران ومش واعي للي بتقوله.
وقتها هو كان شبه نايم فعلا، كان واقف وعيونه مغمضه، والمخدرات كانت مخلياه مش عارف بيقول ايه، وقالي:
-زكريا كان ابن عمي، وطول عمره كان شايف نفسه احسن مني، وانا عمري ما كرهت حد قد ما كرهته، وعلشان كده اول لما عيني جت على مراته قررت اني احاول اتقرب منها، بس امك في البدايه صدتني، ورفضت تتجاوب معايا، بس انا ماسبتهاش، واستغليت ان زكريا ابوكي كان بيغيب في شغله باليومين وبيسيبك انتي وامك لوحدكم، اصله كان غفير حراسه، وزي ما بيقولوا الزن على الودان امر من السحر، وعرفت اخلي امك تعمل معايا علاقه غير شرعيه، وكمان خلتها تدمن المخدرات، وبعدها قولتلها:
-انا مابقتش قادر استغني عنك يا زينب، وعاوزك تبقي ليا لوحدي.
-وانا كمان بس نعمل ايه، اطلب من زكريا الطلاق ونتجوز.
-لا طبعا، احنا محتاجين ناخد كل حاجه بيته وفلوسه.
-طيب نعمل ايه؟
-نتخلص منه، وتبقى ارملته.
امك في البدايه كانت خايفه ورفضت الفكره، بس بعد كده وفقتني لما لقتني مصمم على اللى في دماغي، وحطتلها الخطه اللى هتخلينا نتخلص منه بسهوله من غير ما أي حد ياخد باله.
انا جبت لـ امك الزرنيخ، وطلبت منها تحط لـ ابوكي منه كميات قليله كل يوم في الاكل او أي مشروب، وفعلا عملت اللى قولتلها عليه، وخلال اسبوع واحد بس ابوكي مات، وحتى الدكتور نفسه ماقدرش يعرف سبب الموت، افتكر انه مات بالسكته القلبيه، ووقتها انا خدت منه كل حاجه، فلوسه ومراته وكمان بنته، انا انتقمت منه شر انتقام.
ـــــــــــــــــــــــــــــــــــــــــــــــــ
كل دا وانا كنت بسمع اللى بيقوله عطيه، ماكنتش مصدقه اللى بسمعه، وهو راح في النوم كانت المخدرات دخلته في حاله اغماء، وقتها روحت على المطبخ وجبت سكينه، كنت عاوزه انتقم منه شر انتقام، ومسكت السكينه وقبل ما اطعنه واقتله، رجعت في كلامي، حسيت اني هريحه وكمان هضيع نفسي، وهو كان يستاهل موته اصعب من كده الف مره، هو قتل ابويا وكمان امي وكمان كان عاوز يتعدي عليا، وشغلني خدامه عنده طول عمري، لا لازم يموت بطريقه اصعب من كده، وعلشان كده انا سحبته بره اوضتي وسبته في الصاله، وقفلت عليا باب الاوضه ونمت، كنت محتاجه خطه تخليني اعذبه بالطريقه اللى يستهلها.
تاني يوم لقيته بيتكلم معايا وبيقولي:
-انا امبارح قولتلك حاجه؟
-حاجه زي ايه؟
-أي حاجه وخلاص، اصلي مش فاكر.
-لا انت ماقولتش حاجه، انا حتى لما سألتك انت جيت الاوضه بتعتي ليه قولتلي انك غلطت ودخلت اوضتي بالغلط.
-ايوه صح دا اللى حصل.
طبعا هو ماكنش فاكر حاجه، وانا كنت محتاجه افهمه اني ماعرفتش حاجه، وفضلت افكر ازاي انتقم منه، وبعد تفكير لقيت الحل المناسب.
اول حاجه انا كنت محتاجه دكتور صيدلي، بس مش أي دكتور، لا محتاجه دكتور من نوع خاص، وعلشان كده انا روحت صيداليه من اللى بتبيع الاقراص المخدره للمدمنين، وفعلا روحت وحده منهم واتكلمت مع الدكتور وقولتله:
-عاوزه نوع من انواع الادويه يأثر على عين الواحد ويعميه، وكمان يا ريت لو يصيبه بالمرض ويخليه مش قادر يتحرك من مكانه؟
-مافيش دواء ممكن يعمل كده، بس اللى ممكن يعمل كده سم صناعي، بس لازم يتاخد بجرعات مخففه جدا، ومع الاستمراريه هيأثر على النظر وكمان الصحه بوجه عام.
-تمام حلو ده، هو دا المطلوب.
وفعلا دفعت ليه اللى هو عاوزه، وخدت منه التركيبه اللى عمالهالي مخصوص، وابتديت احط لـ عطيه جرعات صغيره اوي من السم في البيره اللى بيشربها باستمرار، وفضلت مستمره على الوضع دا لغايه لما تظهر النتيجه اللى كنت مستنياها، وبعد 3 شهور ابتدت النتيجه تظهر فعلا، واول حاجه حصلت انه كان بيحس بدوخه وكمان بيقع باستمرار، وبعدها ابتدي يفقد البصر بشكل تدريجي، وفي الاخر بقى ملازم للسرير ومش بيتحرك خالص، وفضل على الحال ده سنه كامله، كان بيتمني الموت ومش طايله.
انا ماسبتهوش يموت بالساهل، وعلشان كده وقفت السم اللى كنت بحطهوله، وابتديت اعذبه براحه ووحده وحده، ولما صحته ابتدت تتحسن وابتدي يقف على رجليه، بس طبعا كان خلاص فقد عنيه، انا اتكلمت معاه وقولتله:
-اظن يا عطيه انت كده مناسب للشغل اكتر مني.
استغرب من كلامي وسألني؟
-شغل ايه؟
-الشحاته، انت من النهارده هتطلع تشحت، تخيل بقى واحد اعمي مابيشوفش لما يقعد في الشارع ويفضل يقول للناس ان نظره راح ومحتاج حق العلاج، وشغل المسكن هدا وقتها الفلوس اللى هتلمها كتير اوي، واضح كده انك اتخلقت علشان الشغلانه دي.
وقتها انفعل عليا وقالي:
-انا مستحيل اطلع اشتغل الشغلانه دي، انتين سيتي نفسك ولا ايه، نسيتي انا ممكن اعمل فيكي ايه، اوعي تفتكري ان علشان عنيا راحت مش هعرف اربيكي، لا انتي كده بتحلمي.
وحاول يوصلي ويمسكني، وفعلا انا سبته يعمل كده، كنت محتاجه اعرفه هو بقى ايه بالظبط، واول لما مسكني وحاول يضربني زي ما كان بيعمل زمان، وقتها فهم انه مابقاش قادر يعمل كده، علشان انا زقيته ووقعته على الارض، ومش بس كده انا جبت العصايا اللى كان بيحب يضربني بيها وانا صغيره، ونزلت على جدته الضرب لغايه لما سويته، الناس كانت بتسمع صوته وهو بيصرخ من الوجع وانا نازله ضرب فيه، وكان بيحاول يهرب مني وبيخبط في الحيطان وهو بيحاول يهرب، وانا اضرب فيه واقوله:
-خلاص يا عطيه زمنك راح، من النهارده انت هتسمع كل كلمه انا بقولها، ومش بس كده انا هاخد منك حقي القديم والجديد، اوعي تفتكر اني معرفتش الحقيقه، انا عرفت انك مش ابويا، وعرفت اللى انت عملته زمان مع امي في ابويا، ومش بس كده انا كنت عارفه اللى انت عملته مع امي، جه اليوم اللى هتدفع فيه تمن كل اللى عملته معايا.
صدم عطيه كانت باينه على ملامح وشه، هو ماكنش متخيل ان انا عارفه كل حاجه، وحاول ينكر كل اللى انا قولته ويدافع عن نفسه وقال:
-مين اللى قال انك مش بنتي، لا انتي بنتي وانا ابوكي، انا اللى ربيتك وحبيتك، حتي لو مش انا اللى خلفتك، بس انا اللى ربيتك، الاب اللى بيربي مش اللى بيخلف يا عزه.
ضحكت لما قالي الكلمتين دوول وقولتله:
-بجد يا عطيه، بجد انت مصدق نفسك، مش لايق عليك الدور اللى انت عامله ده، بلاش تخليني اقول عليك ممثل فاشل، اسمع من النهارده انت اللى هتسمع كلامي، ولو في يوم عصيت اوامري هصبحك بـ علقه وامسيك بـ علقه انت فاهم.
ومن يوميها انا بعمل فيه كده فعلا، كنت بتلكك علشان اضربه، كان قدامي لا حول له ولا قوه، وكنت بسمع صوته وهو بيعيط وهو نايم وعمال يطلب من ربنا يرحمه، كنت بتعصب لما بلاقيه بيعمل كده، دلوقتي افتكر ربنا، دلوقتي عاوز يترحم، ليه ماكنش بيرحمني او بيرحم امي قبل كده، وابويا اللى قتله كل دا وعاوز الرحمه، وعلشان كده انا ماكنتش برحمه، وكنت مصممه اخد منه حقي تالت ومتلت.
بس للاسف عطيه هرب مني، ايوه هرب مني وراح لمكان ماعرفتش اوصله فيه.
ــــــــــــــــــــــــــــــــــــــــــ
في اللحظه دي الامين محمود سألني وقالي:
-هرب راح فين؟
شكرا لزيارتكم عالم روايات سكيرهوم
