رواية قناص الغرام الفصل الثاني
هناك من يبحث عن الحب، وهناك من ينتظره، وأخرون قد وقعوا به وأيضًا من تَلوع بالحب وعرف الحزن واليأس من أجله. فالناس بين عاشق ومجروح... أما أنا فلست منهم.
أنا من طرق الحب بابه فهرب ولم يجد سبيل سوى الهروب، فكما تعودت في حياتي؛ كل شيء ينتهي بخيبة أمل تُزيد الفراغ بداخلي، بل تعبث بكل أوراق عمري بين طيات الألم والفقد، حتى نسيت من أنا وما كنت عليه. رضيت بالوحدة وقررت أن أرافقها طوال عمري، حتى انتهي من ثأري وأذهب إىل من أحببتهم وغادروا.
يظنون أن القتل سهل... هيهات، فقد فقدت جزء من روحي مع كل رصاصة انطلقت من سلاحي، صرت مشوه من الداخل حتى ظننت أن قلبي لن يعرف طريق الحب، ولكن كبقية أوراقي المبعثرة جاء الحب ملوث بالدم، حب محكوم عليه بالفشل والفراق من قبل اللقاء.
أما قلبي الذي ظننته لن ينبض مرة أخرى وقد دُفن بين الثأر والانتقام؛ جاء ليُعلن تمرده أمام هاتان العينين، عرف طريق الحب لمن ستسقيه مرار الفقد، وكأنه يرغب فقط في تعذيبي، فقبضت عليه بين ضلوعي خشيةً أن يسمع أحد ضرباته التي تعزف بأعلى مقامات الموسيقة، تحرك أوتار ما بقي من روحي، ولأول مرة شعر جسدي أنه حي بعد أعوام من الموت، تحلل فيها كل جميل بعيني، حتى طغى جمالها على عيني، جاءت لتروي ظمأ أيامي ومرارة وحدتي، وتضفي عليها أهوال عشق ممنوع.
عذرًا أيتها الفتاة؛ فأنا من قتلت والدك وتلوثت يديّ بدمائه، بل لازلت أرى على راحتيّ دمائه التي لن تجف يومًا، فقط ستذكرني بأنني قتلت بريئًا.
وبعد أن شعر بانهيار قلبه أمامها؛ تحكم فارس في نظراته، ورسم على وجهه علامات الجمود، معلنًا حربًا ضد قلبه الغادر الذي خانه ووقف على أعتاب تلك الجفون يرتجف كطفل صغير، كلما ارتدت وعادت أمامه لتظهر مقلتيها المليئة بحزن هو من تسبب به، فنظر إلى حاتم مرة أخرى وقال : بس دي أنسة! أنا كنت فاكرها عيلة لسه.
ندا بدهشة: نعم؟! عيلة! عيلة في جامعة إزاي يعني حضرتك؟
نظر لها فارس وقال بتهكم: معلش أصلي داخل على الأربعين، فا حتى لو مخلصة جامعة هشوفك عيلة.
ندا : إيه تفكير جدو ده؟
فارس : لا مش لدرجة جدو، بس أنا أقصد هتقعدي إزاي معانا إحنا الاتنين هنا.
شعرت ندا بالإحراج فنظرت أرضًا بخجل، وضمت اللوحة بين يديها بقوة ثم همت بأمساك حقيبتها وقالت : أنا قلت لأستاذ حاتم كده برده، أسفة لو أزعجت حضرتك، أنا همشي وهتصرف في مكان أنام فيه.
كادت تذهب إلا أن قال فارس باندفاع حتى يمنعها من أن تغادر : لا لا مش قصدي.
نظرت له ندا وقالت : لا هو حضرتك معاك حق، يعني هو فعلًا ماينفعش أقعد معاكم هنا.
فارس : وماينفعش برده تفضلي في الشارع في وقت زي ده.
تنهد وقال: بصي فيه أوضة فوق زيادة، اطلعي نامي فيها وأقفلي على نفسك، وأنا بكرة الصبح هبعت حاتم يدور على شقة صغيرة ليكي تقعدي فيها، وما تقلقيش أنا هنفضل معاكي في أي حاجة، أول ما هتتصلي بيا هتلاقيني قدامك.
نظرت له ندا بامتنان وقالت : شكرًا بس كده كتير بجد.
حاول حاتم أن يتدارك ما حدث حتى لا تشعر بالإحراج أكثر وقال : لا ولا أي حاجة، تعالي أوصلك أوضتك عشان ترتاحي.
أومأت له ندا بنعم ولحقت به، تحت نظرات فارس الذي ينظر إلى أثرها وهو يقبض على قلبه، ثم قال بصوت خافت : وبعدين في الورطة دي!
صعدت ندا إلى الغرفة وهي تتلفت حولها بتوجس، المنزل جميل وهادئ ويبدو أنه منزل عائلة وليس منزل لشخص واحد، ولكن أين تلك العائلة الآن! هل ماتوا؟
فتح حاتم باب الغرفة أمامها ثم مد يده ووضع الحقيبة دون أن يدخل الغرفة، أشار إليها كي تدخل ثم قال : المفتاح في الباب، وفيه حمام في الأوضة خاص. لو إحتاجتي أي حاجة قولي، ولو حسيتي بجوع إنزلي أعملي الأكل اللي تحبيه، المطبخ فيه كل حاجة.
ندا : ﻷ شكرًا أنا مش جعانة.
أومأ إليها وأغلق الباب، عاد إلى أسفل مرة أخرى واقترب من فارس وقال بضيق : إيه يا ابني الأسلوب ده! فيه حد يقول لبنت الكلام ده؟!
فارس بارتباك : ما أنا إتفاجأت بيها.
حاتم : ما أنا قولتلك إنها طالبة في جامعة، متوقع إيه يعني؟
فارس : ماشي بس ماقولتليش إنها حلوة كده، وبعدين دي شكلها أكبر من سنها.
حاتم : بالعكس ده وشها صغير أوي. بس استنى استنى... إنت أول مرة تقول على بنت حلوة! هو فيه حاجة ولا إيه؟
هرب فارس من عينيه ثم قال بتوتر : حاجة إيه! ددده ده مستحيل يعني.
حاتم : أيووووه، مستحيل ها، أظن فاهمني.
فارس بضيق : فاهم. أنا طالع أنام.
ذهب فارس من أمامه ونظر له حاتم وهو يشعر بالقلق، وقال : يارب اللي في بالي يطلع غلط. مش ماقصة بجد وجع كفاية اللي هو فيه.
مر الليل الطويل على فارس كالعادة، فهو كلما أغمض عينيه رأى صورة والديه بين يديه وهما يحتضران، ينظر إليهما باكيًا عاجزًا. كابوس يطارد نومه لسنوات، حتى بات النوم بمثابة إعادة فتح جرحه مرارًا وتكرارًا.
في منتصف الليل؛ نهض من نومه يتصبب عرقًا ينظر إلى الغرفة من حوله ويتنفس بصعوبة، فشرب بعض المياه، وبقي في الفراش حتى هدأ.
لا يعلم لما شعر بالخوف أن تشعر ندا بهذا الشعور مثله، وتصبح مشوهة من الداخل بسببه. زاد هذا من غضبه مما فعل وإن كان قتله لم يكن متعمدًا، إلا أنه لا يرى مبررًا أمامها كي تسامحه.
حل الصباح ونزل فارس وجلس على الطاولة، نظر إلى حاتم وقال : عامل فطار حلو يعني النهاردة!
حاتم : عندنا ضيفة يعني، وما كلتش إمبارح أي حاجة، حتى قولتلها تنزل تاكل قالتلي ماليش نفس. استنى هطلع أخبط عليها عشان تنزل تفطر.
فارس : ماشي يا ماما حاتم.
حاتم بتهكم : ظريف ما شاء الله.
صعد حاتم، وبعد قليل سكع فارس طرقات على باب المنزل، فنهض وفتحه، فوجد رائد يدخل المنزل وقال بحدة : ممكن أعرف إيه اللي إنت عملته ده؟ أبعتك في مهمة تخلصنا من واحد مدوخ الدخلية؛ تقوم تقتل راجل مالوش....
قاطعه فارس ووضع يده على فمه وقال : هششش هتفضحنا اسكت.
نزل حاتم وخلفه ندا وسمعا صوت رائد العالي، فنظرت لهما ندا وتوقفت لتراقب ما يحدث بهدوء، دفع رائد يد فارس وقال : أفضحك إيه؟! تمو....
صاح حاتم بسرعة وهو يركض نحوه وقال : رائد حبيبي، إيه بس زعلان ليه كده! يوووه يا فارس كل شوية تزعله كده! معلش معلش... هو أكيد مش قصده يعني، ده أنتوا أصحاب عمر.
ثم أمسك بذراعه ودفعه باتجاه الباب وقال : تعالى بس أنا هفهمك هو كده ليه.
نظر له رائد بتعجب وقال : مالكوا إنتوا الاتنين النهاردة؟!
وقبل أن يغادر المنزل لمح ندا تقف على عند الدرج فقال : ومين دي؟!
دفعه حاتم بقوة وقال : تعالى بس وأنا هفهمك.
نظر فارس إلى ندا التي تقف بمنتصف الدرج تتابع ما يحدث بصمت. وها هو قلبه يعلن تمرده للمرة الثانية أمام عينيها، فحاول أن يحافظ على جموده وقال : اتفضلي الفطار، أنا جعت وقاعد مستنيكي كل ده.
ندا بخجل : أسفة ماعرفش إنك مستني، أستاذ حاتم ماقاليش.
فارس : خلاص خلاص اقعدي.
ندا : أنا عارفة إنك مش حابب وجودي، فأنا همشي النهاردة.
انتبه فارس إلى أسلوبه الحاد معها، قد جعلها تشعر بأنه لا يرغب في تواجدها هنا، ولكن هذا عكس ما يريده فقال : لا أنا ماقولتش كده، أنا بس اتعصبت من اللي جاي يزعق على الصبح ده.
ندا : هو أنت قتلت حد؟
ظهر الحزن على عينيه، ثم نظر إلى عمق عينيها البريئة وقال في نفسه: "لو تعلمين من قتلت لقتلتينني الآن." تحمحم وهرب بعينيه من نظراتها ثم قال بصوت ضعيف : شغلنا كده.
ندا : إنت ظابط صح؟
فارس : لا.
ندا : طيب قتلت حد إزاي مش فاهمة؟! وبعدين مش إنتوا كنتوا شغالين مع بابا زي ما حاتم قال؟
فارس : أنا قناص في الحربية مش ظابط.
ندا : ااااه فهمت.
فارس : كلي بقى.
شرعت بالأكل فقد كانت جائعة للغاية ولكن خجلت أن تدخل المطبخ دون أن تستأذن. بعد لحظات دخل حاتم وجلس بجوار فارس فنظر له وقال : فين رائد؟
حاتم : مشي.
فارس : فهمته؟
حاتم : اه. بعد الأكل عايزك في موضوع تبع الشغل.
ندا : أنا ممكن أكل في أي حتة وأسيبكم على راحتكم.
فارس بضيق : محدش فينا متضايق منك. ممكن بلاش الحساسية الزيادة عن اللزوم دي.
نظرت إلى صحنها بخجل فزفر حاتم وهو يرمق فارس بنظرة تحذيرية وقال : بصي فارس مش بيعرف يتكلم مع الناس قوي، بس مع الوقت هتعرفي إن نص كلامه بيبقى مش قصده.
ندا : لا بس هو معاه حق، أنا ماينفعش أقعد معاكم هنا.
حاتم : ما إحنا اتفقنا إنه هيبقى مؤقت، أنا بس هشتغل شوية مع فارس بعد الأكل وبعدين هخرج أدور على شقة صغيرة كده ليكي.
ندا : ما هو كتير لما تيجبولي شقة برده، وبصراحة أنا مش معايا تمن إيجار.
حاتم : لا إحنا هنجيبلك شقة ليكي باسمك تعيشي فيها، عشان محدش يقدر يطردك منها.
فارس : محدش ضامن عمره، على الأقل لو جرالنا حاجة نبقى مطمنين عليكي.
انسابت دمعة من عينيها وقالت : بابا الله يرحمه كان دايمًا يقول كده: "محدش ضامن عمره." كان دايمًا بيخرج وهو عنده خوف إنه ممكن مايرجعش.
نظر لها فارس وابتلع ندمه ومرارة حديثها بألم، لم يتحمل رؤية الدموع التي تنساب من عينيها بسببه، فنهض من على الطاولة وترك الطعام. نظرت له ندا بتعجب وقالت : هو أنا قلت حاجة غلط؟
حاتم : لا أصل والده كمان مات في عملية في الداخلية. ثواني بس هطلع ألحقه قبل ما يدخل أوضته وماشفش وشه تاني.
ركض حاتم خلفه، وقبل أن يغلق الباب أمسك المقبض وقال : استنى قبل ما تحبس نفسك.
فارس بحدة : سيبني دلوقتي يا حاتم.
حاتم : المعلومات اللي عندي ماينفعش تستنى، ومش عارف هتخرج إمتى لو حبست نفسك.
زفر فارس ثم ترك الباب ودخل الغرفة، لحق به حاتم وأغلق الباب خلفه وقال : رائد قالي إن غانم موجود النهاردة عند رجل أعمال في فيلته، بيقول إن رجل الأعمال ده شغال معاه، وعامل حفلة كبيرة أوي وأكيد غانم هيروح.
فارس : إداك العنوان؟
حاتم : اه والمعاد كمان، وفيه حادثة قالبة السوشيال ميديا كلها؛ في رجل أعمال كبير قتل ممثلة معروفة، القضية كان فيها شاهد واحد وهو اللي شافه وهو بيدخل الفيلا بتاعتها وقت الحادثة، ولما خرج منها كان بيجري وهو مرعوب.
فارس : سمعت عن القضية دي. مش ده رجل الأعمال سليم زهران؟
حاتم : أيوة هو، الجديد بقى إن الشاهد غير أقواله قدام القاضي وسليم خرج منها لعدم كفاية الأدلة. رائد بيقولي إن فيه واحد صاحبه هو اللي كان ماسك القضية دي، بيقوله رحت عشان أشوف الشاهد وأعرف غير أقواله ليه، لقاه عزل ونقل في شقة في القاهرة الجديدة بعد ما كان حتة بواب، وطبعًا هي باينة من الأول إنه واخد رشوة، بس راح عشان خاف يكون سليم مهدده، بس اتأكد بقى إنه باع ضميره. رائد بقى بيقولي إن سليم ده في إشاعات حواليه كتير إنه ماسك شبكة إباحية، وكانوا شاكين إنه عرض على الممثلة دي تشتغل معاه وهي رفضت فقتلها.
فارس : يعني سليم ده خرج من قضية قتل بالرشوة وشغال في الشمال؟
حاتم : والحكومة مش عارفة تمسك عليه دليل واحد.
صمت فارس قليلًا ثم قال : خلي الرجالة بتوعنا في المقر يعملوا تحريات ويتأكدوا من المعلومات دي، ولو طلعت صح يبلغوني، ولو فيه إي حاجة تانية عايز أعرفها النهاردة.
حاتم : تمام، بس ممكن طلب؛ خف على البت اللي تحت دي شوية، إحنا قلنا نعوضها مش نذلها.
فارس : يوووه، مش قادر يا حاتم بقى. إنت متخيل إني عملت فيها نفس اللي غانم عمله فيا! أنا أكتر واحد حاسس بيها، وعارف إن لو الحقيقة اتكشفت في يوم من الأيام هتبقى عايزة تقتلني زي ما أنا بعمل في غانم دلوقتي.
حاتم : فيه فرق كبير، أولًا إنت قتلته غلط مش قاصد يعني تموته، ده غير إنك مش غانم ولا راجل عايز الحرق زيه بالعكس، وبعدين هتعرف منين يا فارس بس، إنت بس اتعامل معاها طبيعي، اه صح... مش هينفع تتعامل طبيعي إنت. طيب بص اتعامل معاها زي ما البني آدمين بيتعاملوا مع بعض. فاكر البني آدمين بيتعاملو إزاي مع بعض يا فارس ولا بقيت من فصيلة تانية؟
فارس بحزم : اطلع برا.
حاتم : حاضر.
ترك حاتم الغرفة قبل أن ينفجر فارس في وجهه غاضبًا، فهو أعلم الناس به وبغضبه الشديد، وعلى الرغم من أن حاتم هو صديق طفولته ويعلم شخصيته جيدًا؛ لكنه لا يزال يتذكر فارس الطفل الذي تربى معه، وهو على يقين أنه ليس بهذا السوء، فقد تغير كثيرًا بعد حادث والده وتشوهت شخصيته كما تشوهت حياته.
حان وقت الغداء وأصرت ندا أن تعد الطعام بنفسها، وبعد أن وضعت الطعام على الطاولة قالت : هو إستاذ فارس مش هياكل معانا؟
نظر حاتم إلى الطعام وقال : الأكل شكله تحفة! فارس هيفوته كتير.
ندا : طيب اطلع قوله ينزل ياكل معانا.
حاتم : فارس طالما دخل أوضته مش هيخرج منها غير بمزاجه، يعني ماتحاوليش تخرجيه عشان مش هيسمع كلامك.
ندا : طيب هيقعد من غير أكل؟
حاتم : لما يخرج من حبسته دي هياكل لوحده، سيبي بس أكل في المطبخ وهو هيتعامل، وأصلًا عنده عملية بليل مش هياكل النهاردة.
جلست ندا أمامه وقالت : طبعه صعب أوي الصراحة، أنا خايفة منه.
حاتم : معذورة، هو شكله يخوف فعلًا، أنا ذات نفسي بخاف منه. فارس مابيهزرش فبلاش تقفي قدامه، ولا تاخدي على كلامه، هو دبش كده.
ندا : بس عينيه حزينة أوي،ن إتضايقت لما اتكلمت على بابا وافتكر باباه، لو كنت أعرف ماكنش قلت حاجة.
حاتم : الحادثة بقالها سنين بس لسه مأثرة عليه لأنه مات على إيده، ومامته لما عرفت ماتت وراه في نفس اليوم، لحد دلوقتي فارس مش عارف يرجع زي الأول أبدًا.
انسابت دمعة من عينيها وقالت : الله يكون في عونه، أنا مش هاين عليا أكل وهو لا، طيب بص أنا هطلع أحاول معاه يمكن ينزل.
حاتم : بلاش أحسن.
نهضت ندا وقالت : هجرب بس.
صعدت ندا إلى غرفته وطرقت الباب، فنظر فارس إلى الباب بتعجب، فحاتم يعلم أنه إذا اختلى بنفسه لا يحب أن يقاطعه أحد، فترك السلاح من يده حيث كان يعده للمهمة ليلًا، ثم اقترب من الباب وفتحه فنظرت له ندا بخوف وقالت بتلعثم : أنا... لأ... هو إنت مش هتاكل؟
نظر لها فارس مطولًا بتعجب ولم يتحدث، فشعرت ندا بالخوف أكثر فرجعت بخطواتها إلى الخلف فقال فارس : رايحة فين؟
ندا : مش عارفة، هو أنا بفقد قدامك النطق فا همشي.
ركضت من أمامه فنظر إليها ثم التفتت وقالت : اه صح الأكل جاهز وكده.
ثم ركضت نحو الدرج ونزلت، فابتسم فارس بهدوء، يتأمل تصرفاتها الطفولية وتلعثمها أمامه، ثم لحق بها إلى أسفل. نظر حاتم إليه بتعجب وقال : إيه ده؟! ندا عرفت تخرجك من الأوضة؟
جلس فارس علي الطاولة وقال : ماردتش أزعلها عشان شكلها خايف مني.
حاتم : ليه وأنا مش باين عليا إني بخاف منك؟
نظر له فارس وهو يعقد حاجيبيه ثم قال : لا إنت خاف عادي.
حاتم : ماشي ماشي، ممكن ناكل بقى؟ لأن الأكل طعمه حلو أوي! تسلم إيدك يا ندا.
شرع فارس بالطعام ولم يبدي رأيه به، فظلت ندا تراقبه وهو يأكل بهدوء ثم وقف وقال : حاتم شوف حوار الشقة ده وأنا هنزل ومش هتأخر.
حاتم : أنا كلمت سمسار فعلًا وهقابله بعد ساعة، هغير هدومي وأنزل.
ندا : أجي معاك؟
فارس : لا حاتم هيدور خليكي إنتي هنا.
ثم صعد إلى غرفته مرة أخرى وأخذ حقيبته وغادر المنزل.
بعد وقت كان فارس يقف أمام المنزل الذي أرسل له رائد عنوانه، ثم انتظر وصول غانم إلى هناك.
وصل غانم وقام فارس بالإستعداد لإطلاق الرصاص، ولكن وقف الحارس خلفه فحجب عنه الرؤية، ظل يحاول حتى استطاع أن يرى جسده، فأطلق الرصاصة على الفور، ولكن تحرك غانم فاستقرت الرصاصة بالحائط خلفه. رفع الحراس أسلحتهم وصوبوا نحو مصدر إطلاق الرصاص. ركض غانم إلى السيارة مرة أخرى مذعورًا تحت حماية الحرس، نهض فارس ليهرب من المكان ولكن كانت الطلقات تأتيه من كل اتجاه، وضع سلاحه داخل الحقيبة وحملها وركض سريعًا، وما أن وقف حتى استقرت رصاصة في كتفه، أمسكس كتفه بألم وتحمل حتى وقف مرة أخرى وركض سريعًا قبل أن يصلوا إليه.
نزل الدرج وهو يترنح بين الجدران، ثم أخذ سيارته وقادها سريعًا.
كان الطريق طويلًا، وقيادة السيارة كانت مرهقة بالنسبة له، فنزف كثيرًا وبدأ يتصبب عرقًا ويقود السيارة بإعياء ولا يرى أمامه جيدًا.
حتى وصل إلى المنزل، نزل من السيارة وهو يمشي كالسكران، يتنفس بصعوبة ورؤيته مشوشة. طرق الباب فذهبت ندا لتفتح، فوجدته ينزف بشدة وبالكاد يستطيع أن يقف على قدميه، فصرخت بقوة من هيئته، نظر إلة نظرات الخوف في عينيها، وبرغم اﻷلم كان خوفها أكثر إيلامًا، فقال بصوت ضعيف كي يطمئنها : هشششش ماتخافيش.
أغلق فارس الباب، وتماسك بكل قوته حتى لا ينهار أمامها، حاول السير فلم يستطع، فتقدمت ندا منه ووضعت ذراعه على كتفها، صعدت معه إلى غرفته وارتمى على الفراش أمامها، فقالت بتوتر : فين تليفونك اتصل بحاتم؟
أعطاها الهاتف وفتحه ثم سقطت يده، وقال بصوت مكسور : حقك عليا.
نظرت إليه فوجدته أغمض عينيه ولا يتحرك، فصرخت بقوة وهي تبكي. لا تصدق أنه قد يموت بين يديها الآن! وإن كانت أمنيته أن يموت قبل أن تعرف حقيقة ما فعله.
