رواية اساطير الورد الفصل الثاني
💫💫💫💫💫💫💫💫💫💫💫💫💫
_أنا يشرفني أطلب إيد بنتك "مريم" لإبني "طارق".
خيّم السكون علي الأجواء المحيطه و إنتابت الجميع حاله من الصدمه و عدم الإستيعاب فقال" غريب":
=مريم؟! تقصد....
قاطعته زوجة "بدير" قائلة:
_أيوة الآنسه مريم يا ريس غريب.. مش المحروسه الوسطانيه إسمها مريم بردو؟!
رد غريب بـ تيه و قال: أيوة.. أيوة مريم.
أخرجه بدير من شروده حيث قال: إيه يا ريس غريب روحت فين؟! مالك إتاخدت كده؟!
نظر له غريب بتخبط وقال: ها؟! لأ مفيش حاجه.
تحدثت زوجة بدير قائلة: ما تنادوا لنا العروسه يا جماعه عشان نتعرف عليها و تتعرف علينا.. و ده اسمه كلام بردو؟
_حالاً.
نطقت بالأخيرة "غرام" التي هرولت لإستدعاء إبنتها تحت نظرات غريب المتعجبه و التي إزدادت عندما رأي "مريم" تدخل إلي غرفة الصالون وهي في أبهي طلاتها و حالاتها.
=يختي بسم الله ماشاء الله قمر 14.. تعالي يا عروسة إبني يا حبيبتي إقعدي جمبي هنا.
تحدثت بها زوجة بدير وهي تجذب يد "مريم" لتجلس إلي جوارها وهي تتفحصها من رأسها إلي أخمص قدميها.
كان "طارق" ينظر لها كالمسحور فـ مال علي أذن والدته وهو يقول بحبورٍ شديد:
_الله.. دي جميله أوي ياما.. أحلي من ورد كمان.
لكزته بيدها و تمتمت بإنتصار:
_شوفت يا خايب تنقية أمك شكلها إيه.. عشان بعد كده تمشي ورايا و إنت مغمض.
ظل "طارق" يختلس النظرات إلي "مريم" التي لم تعره أي إهتمام فنظر إلي والدته و قال:
_دي شكلها بت خام ياما.. بتتكسف من خيالها.. شوفي حاطه وشها في الأرض إزاي؟!
أومأت والدته بتأكيد و قالت:
=أومااال.. و أنا بردو هنقيلك أي واحده؟!
ظلا يتهامسان حتي قاطع حديثهم الخافت صوت حطام قوي صادر من حجرة المطبخ...!!
ـــــــــــــــــــــــــــــــــــــــــــــــــــــــــــــــ
بأعين باكية و قلبٍ نازف كانت "ورد" تراقب ما يحدث في الخارج، حاولت تمالك أعصابها و السيطرة عليها و لكن فقدت آخر ذرة صبر عندما رأت "مريم" تخرج بهيئتها الأنيقه و تجلس بجوار الرجل الأول الذي دق له قلبها.
أمسكت بصينية الأطباق و ألقتها أرضاً بقوة حتي تحول كل ما عليها إلي حطام.
فور أن إستمع والدها إلي صوت تكسير الزجاج أسرع إلي المطبخ و من خلفه زوجته.
_في إيه يا ورد حصل إيه؟!
قالها غريب بلهفه و خوف فنظرت له ورد نظرة كان لها وقع أليم في نفسه.
نظرة واحده عابره و لكنها حملت بين طيّاتها الكثير.
الخذلان كان له الصدارة، خيبة الألم، القهر، هوان النفس.
لم يشعر بها سواه و لم يفهم أنين قلبها غيره، تكلم برفق و قال:
_خلي بالك يا ورد لـ رجلك تنجرح.
جرح؟! عن أي جرح تتحدث و أنت لا تعلم ما يضني روحي و يهلك قلبي!!
للمرة الألف تهزمني الأيام و تسرق مني أبسط حقوقي و يا لجرأتها.. تطالبني بالتحمل و التجلد.
بثّته نظراتها العاتبه التائهه مما جعله يواري نظره عنها ولا ينظر إلي عيناها مباشرةً.
=هو إنتي لسه صغيرة يا ست ورد عشان الأطباق تقع منك.. إتفضلي بقا لمي اللي إتكسر ده و إنقلي الحاجات في أطباق تانيه.. بسررعه.
كشّرت "ورد" عن أنيابها و همّت بإطلاق سياط لسانها عليها ولكن أوقفها والدها وهو يقول:
_ورد مش هتلم حاجه يا غرام.. خلي مريم و رؤي ييجوا ينضفوا اللي اتبهدل.
تبجحت "غرام" وقالت: عايز مريم تسيب عريسها و تيجي تتضف؟! جري إيه يا غريب؟!
نظر إليها نظرة ألجمتها ثم قال بحسم: خلاص رؤي تنضف مكانها.. ورد تعبت النهارده في شغل البيت.
أطلقت ورد بداخلها ضحكه ساخرة ساخطه.
هه!! هل ببضعة كلمات تعتقد أنك ستجبر كسري؟! ببضعة كلمات ممكن أن تعيد إليّ روحي و حماستي و شغفي الذين سرقتموهم للتو؟!
حسناً.. و إن كنت تريد مواساتي و تطييب جراحي فمن ذا الذي يعيد إليّ فرحة قلبي اليتيمه التي وأدتموها فور ولادتها؟!
إستمع إلي صوت زوجة بدير تتسائل:
_خير يا أم مريم؟! في حاجه حصلت؟!
أسرعت "غرام" للخارج وهي تقول بصوت خافض:
-لا أبداً ده الغندورة ورد كسرت الأطباق.
ثم همست إليها وهي تقول: أصل بيني و بينك البت متدلعه و مش فالحه في حاجه.. أفضل أقوللها تعالي يا ورد يا بنتي أعلمك حاجه تنفعك للزمن ما انا مش هعيشلها طول العمر.. تقولي انا اطبخ و أمسح زي مريم و رؤي كده؟! مستحيل طبعاً ده انا لما أتجوز لازم أجيب شغاله تخدمني.
لوت الأخري شفتيها بحنق و قالت:
_شغاله؟! تخليها قاعده بقا لما يبقا يجيلها اللي هيجيبلها شغاله.
إبتلعتا حديثهما فور دخول الريس غريب الي الصالون مرة أخري وهو يتمتم معتذراً فقال "بدير":
_خير يا ريس غريب.. حد إتعور؟!
هز غريب رأسه نافياً وقال: لا الحمدلله جت سليمه.
_طب الحمد لله.. نخلينا في المهم.
أومأ غريب موافقاً فإستطرد الآخر و قال:
_طبعاً أنا شايف إن القبول موجود الحمدلله و حيث كدا بقا يبقي ملوش لزوم نماطل.. إحنا نقرا فاتحه النهارده و نتفق و الخميس الجاي إن شاءالله نلبس الشبكه.. و 6شهور و نعمل الفرح.
قطب غريب حاجبيه وهو يقول: مش بدري اوي يا بدير؟!
_بدري من عمرك يا ريس غريب.. خير البر عاجله.. و بعدين نأجل ليه و كل حاجه جاهزة.. طارق ماشاءالله عنده شقته جاهزة من مجاميعه.. مش ناقصها غير العروسه.
تحدث غريب بإعتراض و قال: أيوة بس انا لسه مش جاهز و مجيبتش حاجه.. و إنت سيد العارفين الناس في بحري بتبص لبعضها و انا مش عايز أجوز بنتي أقل من حد.
قاطعته زوجته قائلة: سيبها لله يا غريب.. أنا هدبر كل حاجه متقلقش.
_هتدبر...........
قاطعه بدير قائلاً: متعقدش الأمور بقا يا ريس و قدم المشيئه و سيبها لله زي ما الست ام مريم قالت.
و أمام إصرار الجميع لم يستطع إلا أن يومأ موافقاً فقال بدير:
_علي خيرة الله.. نقرا الفاتحه.
ـــــــــــــــــــــــــــــــــــــــــــــــــــــــــــــــ
بعد رحيل الجميع و خروج ورد مباشرةً من المطبخ إلي غرفتها دون الحديث مع أياً منهم إنفجرت "غرام" صارخه بوجه غريب وهي تقول:
_عاجبك الفضايح اللي بنتك عملتهالنا دي يا ريس؟! خد بالك انا فهماها كويس و عارفه إنها كانت عايزة تبوظ جوازة أختها بس.......
قاطعها غريب قائلاً: مش جوازة أختها يا غرام و إنتي عارفه.. الناس دول كانوا لآخر لحظه جايين يطلبوا ورد.
_ولما هما كانوا جايين يطلبوا ورد إيه اللي حصل و خلاهم يطلبوا مريم؟! إنت بتضحك علي نفسك يا غريب ولا للدرجادي صعبان عليك إنهم سابوا بنتك و طلبوا بنتي.
صرخ بها قائلاً: بنتك إيه و بنتي إيه.. لاحظي إن الاتنين بناتي و لحمي و دمي.. انا بس صعبان عليا كسرة نفس ورد و عشمها إن العريس ده كان جايلها.
_و مين اللي قالك إنه كان عايزها هي من الأول؟! ما يمكن ده كان سوء فهم منك إنت.
ضيق بين حاجبيه بعدم إستفهام وهو يردد خلفها:
=سوء فهم مني؟! إزاي؟!
_يعني الريس بدير لما كلمك في البحر قاللك إيه؟!
قال بتذكر: قاللي انا هاجي اطلب منك إيد بنتك.
_طيب.. قاللك بنتك.. مقالش أسامي.. إنت ليه بقا إفترضت إنه عايز ورد؟! ولا هي ورد بس اللي بنتك و مريم و رؤي بنات البطه السودا..!!
نظر إليها بتشتت و قال: لا بس هو كان عينه علي ورد من زمان و كان بيلمحلي إنه هياخدها لإبنه.. أنا متأكد.
قالت بسخريه: والله عينه علي ورد.. مناخيره علي غيرها أنا اللي يهمني إنه جه و طلب مريم منك.. اظن يعني هو له لسان و عارف مريم من ورد ولو كان عايز يطلب ورد كان قال.
بدا عليه التخبط و الحيره فـ ألقي بجسده إلي المقعد من وراءه بتعب و قال:
_ربنا يعدينا منها علي خير.
ـــــــــــــــــــــــــــــــــــــــــــــــــــــــــــــــ
مضت الأيام وهي تتلاشي الحديث معهم جميعاً حتي والدها.
وجدت في عزلتها الراحه و الهدوء الذي تحتاجه روحها، أصبحت اكثر بروداً و أقل تأثراً و إنفعالاً.
لم تخضع لمحاولات والدها العديده في مراضاتها قبل ذلك اليوم الذي أخبرها فيه علي وشك الذهاب في رحلة صيد جديدة.
_أنا عارف إنك زعلانه مني و من الدنيا كلها.. و عارف كمان إنك مفكرة إني موافق علي اللي حصل أو ليا يد فيه.. بس اللي عايزك تعرفيه إني أب.. و مريم بنتي زي ما انتي كمان بنتي و حته من روحي.. مكنتش عارف اتكلم ولا أقول إيه.. أنا إتحطيت في الموقف ده غصب عني زيك يا ورد.
إختتم "غريب" كلماته قبل أن يقترب من "ورد" و يطبع قبله حانيه علي جبينها جعلتها تنفجر باكية و ترتمي إلي أحضانه بإفتقاد شديد.
ربت علي ظهرها بحنو بالغ وهو يقول: متعيطيش يا حبيبة أبوكي.. والله يا ورد بكرة ربنا هيعوضك بسيد ابوه.. صدقيني ربنا بيختار لنا الأحسن دايماً و بيعمل لنا الصالح.. لو كان ليكي خير فيه كان بقا من نصيبك.
كفكفت دمعاتها و نظرت إلي والدها و قالت:
_انا مش زعلانه يا بابا.. انا عارفه إنه مش من نصيبي.. أنا بس صعبان عليا نفسي إن من بين كل الخلق مختارش الا البني ادم اللي بيحب أختي.
إبتسم بحنان و قال: يا ورد.. لسه ياما هتقابلي في الدنيا.. هتحبي و تتحبي و تفارقي و تعيشي و يمر عليكي أوقات تحسي إن خلاص.. دي نهايتك. و ديتها يوم ولا اتنين و تلاقي نفسك بتقومي و تقفي علي رجليكي من تاني و عايزة تعيشي حياتك.. الدنيا ياما فيها يا ورد و لو نخيتي من أولها مش هتعرفي تعيشي.. لازم تقوي قلبك و تاخدي الضربه و تقومي من تاني.
ثم ربت علي كفيها وقال: اللي مداقش المر معرفش طعم الحلو يا ورد.
و مسح بيده علي خصلاتها الناعمه و أكمل: ربنا يجعل أيامك زي إسمك يا بنتي.. كلها ورد.
إحتضنها مرةً أخري قبل ان يودّعها مغادراً نحو رحلة عمله.
ـــــــــــــــــــــــــــــــــــــــــــــــــــــــــــــــ
بعد مرور ثلاثة أيام..
حاولت ورد العمل بنصيحة والدها و الخروج من عزلتها إلي الحياة مجدداً و لكن مع معاهدات ذاتيه أبرمتها مع نفسها بتجنب "غرام" و محاولة البدء من جديد.
و كعادتها بينما هي منهمكه بتنظيف المنزل و ترتيب الغرف دق جرس الباب فأسرعت رؤي بفتح الباب.
ظهر "بدير" من خلف الباب فأسرعت رؤي تنادي والدتها بينما إقتربت "ورد" منه و تسائلت بشك:
_اومال أبويا مرجعش معاك ليه يا ريس بدير.. مش كان المفروض يرجع النهارده!!؟
نظر إليها بدير و قد إمتلئت عيناه بالدموع و قال:
_الريس غريب تعيشوا إنتوا.
